Gjykata Penale e Brukselit ka dënuar me burgim të përjetshëm tre autorët e vrasjes së ish-aktivistit shqiptar nga Kosova, Enver Hadri.
Veselin Vukotiq dhe Andrija Drashkoviq u shpallën fajtorë për ekzekutimin e vrasjes, ndërsa Bozhidar Spasiq u shpall fajtor për dhënien e urdhrit të vrasjes.
Enver Hadri, ish-president i Komitetit për Mbrojtjen e të Drejtave të Njeriut në Kosovë, ishte vrarë në veturën e tij derisa ishte ndalur para semaforit në Saint-Gilles, Belgjikë, në shkurt 1990.
Trupi gjykues dhe juria nuk kanë dhënë asnjë rrethanë lehtësuese për të tre të dënuarit, kështu duke i dënuar të tre me burgim të përjetshëm, dënimin maksimal, raportoi “The Brussels Times”
Më 25 shkurt 1990 pasdite, Enver Hadri kishte ndaluar veturën kur një tjetër veturë u ndal krah tij dhe dy kriminelët qëlluan me armë drejt Hadrit. Ai ishte goditur me plumb në kokë.
Hetimi që zgjati me vite nxori përfundimin se vrasja ishte politike, e urdhëruar nga shërbimet e inteligjencës së ish-Jugosllavisë, me ndihmën logjistike të nëntokës së Beogradit.
koha