Sot u bë nënshkrimi zyrtar i ndarjes së Universiteteve publike të Gjakovës, Gjilanit dhe Mitrovicës nga Universiteti i Prishtinës “Hasan Prishtina”.

Me këto marrëveshje do të rregullohet përfundimisht çështja e lëvizshmërisë së stafit akademik, statusit të punëtorëve administrativ, statusit të studentëve, buxhetit dhe çështje të tjera të rëndësishme për funksionimin e këtyre universiteteve.

Në ceremoninë e nënshkrimit të marrëveshjeve për ndarjen e universiteteve të reja publike nga Universiteti i Prishtinës, u tha se tani ka ardhur koha që këto universitete të konsolidohen dhe të pavarësohen përmes një procesi, duke marrë përgjegjësitë në aspektin akademik, menaxherial dhe atë financiar. Ministri i Arsimit, Arsim Bajrami, tha se këto marrëveshje janë shumë të rëndësishme, pasi rregullojnë procesin e përfundimit të tranzicionit, ku secili universitet do të jetë plotësisht i pavarur.

“UP është pajtuar që të ndihmojë universitetet edhe më tutje me staf, të tregoj solidaritetin akademik brenda standardeve akademike, duke lejuar secilin profesor të UP-së që ët punojë edhe një ditë pune në një normë të caktuar 6 orë te universitetet e reja…”

Rektori i Universitetit të Prishtinës, Ramadan Zejnullahu, tha se këto marrëveshje çojnë drejt stabilizimit të universiteteve dhe se është një ngjarje shume e rëndësishme edhe për institucionet të cilat janë në themelim.

“Këtë bartje të kompetencave menaxheriale mbi një pjesë të pasurisë, por edhe të një pjese të stafit ne do të shkëpusim bashkëpunimin, përkundrazi ai bashkëpunim është i nevojshëm edhe për ne, por edhe për institucionet që po themelohen. Natyrisht që përvojat tona gjithmonë do të jenë në përdorimin tuaj sa herë që nevojiten….”

Edhe rektorët e tjerë të Universiteteve Publike të Mitrovicës, Gjilanit dhe Gjakovës, shprehën gatishmërinë e tyre për bashkëpunim të vazhdueshëm me Universitetin e Prisahtinës, deri sa ato të tejkalojnë të gjitha sfidat me të cilat ballafaqohen. (rtk)