Në gati shumicën e shkollave në Maqedoni po zhvillohet greva në arsim, edhe pse ajo po injorohet nga ana e pushtetit dhe 35ve proqeveritare.Sindikata e Arsimit, Shkencës dhe Kulturës (SASHK) theksoi se greva po vazhdon në arsim dhe kulturë dhe se asaj për çdo ditë po i bashkëngjiten shkolla të tjera. Por nga ana tjetër, Ministria e Arsimit nuk ka dhënë asnjë përgjigje. Së fundi grevës i është bashkëngjitur komuna e Kërçovës.

Jakim Nedelkov, kryetar i SASHK theksoi se përveç shkollave në grevë janë edhe numri i madh i kopshteve për fëmijë dhe institucioneve kulturore.

“Ne vazhdimisht apelojmë, por është edhe obligim ligjor që dy partnerët social të zgjidhin problemet në tryezën e përbashkët. Për fat të keq kërkesa jonë për vazhdimin e bisedimeve po përballet me dyer të mbyllura. Nga 2 janari deri tani nuk kemi pasur asnjë kontakt me Ministrinë e Arsimit. Me ministrinë e Punës Sociale më herët kanë përfunduar negociatat, ndërsa me ministrinë e Kulturës nuk ka pasur asnjë takim, dhe kjo ka ndodhur më shumë se gjysmë viti”, deklaroi Nedelkov. SASHK kërkon heqjen e dënimeve për mësimdhënësit për shkak të testeve eksterne, por edhe rritjen e rrogave për 25 për qind.

Ministria e Arsimit ka bërë të ditur se sot fillon testimi ekstern për nxënësit që përfundojnë vitin e tretë dhe të katërt shkollor në shkollat e mesme. Testimi ekstern do të zhvillohet gjatë periudhës nga 26 deri 30 janar. Kjo është konfirmuar edhe nga zyrtarët e kësaj ministrie, e cila ka kërkuar që shkollat të zbatojnë këtë detyrim.

Për shkak të kësaj situate të krijuar me grevën, nesër në Shkup do të qëndrojë kryetari i Konfederatës Evropiane për arsim, i cili do të takohet me kryeministrin Nikola Gruevski, ministrin e Arsimit Abdilaqim Ademi dhe ministra të tjerë.

Lidhur me grevën është prononcuar me një komunikatë edhe BDI, e cila ndër të tjera ka theksuar se greva ka nisur që kur në krye të ministrisë është kuadri i saj shqiptar.

“Është simptomatike fakti që SASHK-u, deri më tani, ka qenë përkrahës i politikave të MASH-it dhe Qeverisë, kurse prej muajit shtator 2014 qëndrimet e saj ndaj kësaj ministrie kanë ndryshuar, madje në disa raste janë shoqëruar me shantazhe dhe kërcënime. Ajo që na bën të dyshojmë ende më shumë dhe që tregon se SASHK ka qasje të dyfishtë, është fakti se pikërisht në tetor të vitit 2014, kur kishte rritje të rrogave me 4%, kjo organizatë sindikaliste ngulte këmbë në rritjen e rrogave. Nuk duam të besojmë, sido që kemi shumë arsye, që SASHK radikalizoi kërkesat e saj thjesht dhe vetëm sepse Ministria e Arsimit dhe Shkencës u mor nën drejtim nga një ministër shqiptar”, reagon BDI, duke bërë thirrje për fillimin e procesit mësimor dhe ndërprerjen e grevës.

SASHK ka reaguar ndaj kësaj deklarate, duke theksuar se BDI nuk ka nevojë që grevës ti jap ngjyrime etnike dhe se ministri aktual i arsimit nuk është fajtor, por një viktimë. Sindikata kërkon që kjo parti të mos lëshojë deklarata për përçarje etnike brenda sindikatës. (INA)

Ministria e Arsimit dhe Shkencës ende nuk ka qëndrim lidhur me grevën e mësuesve të organizuar nga Sindikata e Arsimit Shkencës dhe Kulturës. Nga ky dikaster heshtin dhe nuk duan të komentojnë kërkesat e mësimdhënësve. Nga ana tjetër, nga sindikata informojnë se presionet mbi anëtarët e tyre nëpër shkollat fillore dhe të mesme janë ashpërsuar. Ndërkohë greva, në mënyrë të pjesshme vazhdon thuajse në të gjitha shkollat e vendit. Mësuesit thonë se kërkesat e SASHK-ut janë reale dhe duhet të pranohen nga MASH-i.

“Kërkesa jonë kryesore është të hiqen dënimet e dala nga testimi ekstern pasi mendojmë se ato provime janë jo objektive. Kërkesë tjetër është rritja e pagave personale pasi duke marrë parasysh angazhimet që bëjmë në shkollat ku punojmë, mendojmë se për momentin këto të ardhura janë të vogla. Sot pjesërisht ka mësim, një pjesë e kolegëve tanë maqedonas janë kundër grevës, por një pjesë prej tyre i janë bashkangjitur grevës dhe po qëndrojnë në kabinete. Pjesa e profesorëve me mësim në gjuhën shqipe pothuajse të gjithë jemi në grevë”, deklaroi Enver Ajdini, përfaqësues i Sindikatës në SH.M ‘Arseni Jovkov’.

“Ne kërkojmë që vlerësimi ekstern të hiqet tërësisht pasi nuk është sipas asnjë norme pedagogjike dhe didaktike e cila do ta mbajë në stres tërë kohën mësuesin. Kërkesë tjetër është që ditari elektronik të hiqet pasi është punë shtesë që e bëjmë dy herë d.m.th njëherë plotësojmë ditarin e rëndomtë pastaj këtë elektronik, pra gjërat e njëjta i përsërisim, edhe shumë gjëra tjera që arsimin e kanë kthyer mbrapa 25 vjet”, tha Rexhep Alili, mësues SH.F ‘Dituria’ Saraj.

Mësuesit thonë se greva do të vazhdojë pavarësisht presioneve të ndryshme. Ata thonë se nuk janë të vërtetë zërat se greva ka dështuar.

“Greva e mësuesve të cilët janë 100% në bojkot të mësimit do të vazhdojë deri në momentin derisa arrihet qëllimi, plotësimi i 6 kushteve të parashtruara nga SASHK-u ndaj Ministrisë së Arsimit dhe Qeverisë. Ajo nuk është e vërtet, ato janë manipulime, unë mbrëmë dëgjoja lajme që gënjenin shumë thjeshtë, pasi thoshin se në një shkollë ka pasur bojkot vetëm nga një arsimtarë, çka nuk është e vërtet pasi nuk mund të quhet bojkot vetëm me një mësues, çka do të thotë se ai lajmë është gënjeshtër”, u shpreh Emrush Ramadani, mësues SH.F ‘Gjergj Kastrioti Skënderbeu’.

Sipas informatave të Sindikatës, 70% e shkollave në vend, pavarësisht presioneve të mëdha nga autoritetet, janë në grevë. Sipas SASHK-ut greva po ndiqet 100% në Kumanovë, Tetovë, Gostivar, Komunën Qendër, Strumicë, Manastir, Strugë, si dhe në pjesën më të madhe edhe në Dellçevë e Çair. Pjesërisht, greva po mbahet edhe në Shkup, Veles dhe Kërçovë. Valmir Kuçi