Kongresmeni amerikan Eliot Engel, është optimist se kriza politike në Maqedoni të tejkalohet së shpejti.

Pas takimit me kryeministrin Nikola Gruevski dhe krerët e partive kryesore në Shkup, ai tha se thellimi i mëtejmë i krizës do ta të vështirësonte zgjidhjen e problemeve me të cilat ballafaqohet vendi.

“Unë jam gjithnjë optimist. Gjithmonë kam qenë dhe kjo funksionon. Unë nuk kisha ndonjë këshillë për kryeministrin, apo dikë tjetër, por thjesht dua të them se kjo krizë duhet të zgjidhet sa më shpejt të jetë e mundur, sa më shumë zgjat kjo krizë, aq më e vështirë bëhet përballja me problemet aktuale. Kështu që shpresoj, se kjo do të arrihet sa më shpejt të jetë e mundur”, tha Engel.

Zyrtari amerikan pret zgjidhje të shpejtë edhe për problemin që kanë Shkupi dhe Athina lidhur me emrin kushtetues të Maqedonisë, që po mban të bllokuar integrimin e këtij vendi në BE dhe NATO.

“Duke pas parasysh krizën në Greqi, shpresoj se të gjithë do të kuptojnë se ka shumë çështje më të rëndësishme se emri. Prandaj shpresoj se dy palët do të arrijnë kompromis dhe se problemi me emrin mund dhe të zgjidhet. Shpresoj se kjo që dëgjuat është shenjë e mirë”, u shpreh kongresmeni amerikan.

Duke folur për raportet ndëretnike, zyrtari amerikan, tha se Maqedonia mund të bëhet model për shoqëritë multietnike, nëse institucionet e vendit garantojnë të drejta të barabarta për të gjithë qytetarët pa dallim etnie.

/ Top Channel