Shqiptarët nuk kanë as dyshimin më të vogël se edhe ky regjistrim i paralajmëruar i popullsisë nga pushteti në duart e LSDM dhe sejmenëve të tyre shqiptarë, do të jetë ashtu si të tjerat deri tani, një proces kryekëput politik që do të shërbejë vetëm për të mirëmbajtur falsifikimin shumëvjeçar të të dhënave për strukturën reale të popullsisë në Maqedoninë e Veriut!

Regjistrimi i popullsisë si një operacion serioz dhe i besueshëm statistikor në Maqedoninë e Veriut, do të bëhej i mundur vetëm duke krijuar kushtet e domosdoshme për këtë, përmes ndryshimeve të pashmangshme kushtetuese, që do t’i paraprinin këtij procesi të rëndësishëm.

Lëvizja për shtet dhe Drejtësi, bën të ditur opinionit publik qëndrimin e saj të palëkundur se besimin e shqiptarëve në këtë regjistrim të paralajmëruar të popullsisë, nuk e ngjallin as buzëqeshja e stisur dhe premtimet boshe të kryeministrit Zaev, as përfaqësuesit e korruptuar shqiptarë në pushtet, me dosje penale në sirtarët e LSDM, e as pazarllëqet me partitë shqiptare që synojnë pjesë pushteti pa kushte në qeverinë e Zaev.

Por vetëm ndryshimet e pashmangshme kushtetuese që do të ridefinonin Maqedoninë Veriore si shtet i shqiptarëve dhe bashkësive të tjera etnike shumicë, me sistemin qeverisës në përputhje me këtë, do t’u siguronin shqiptarëve për herë të parë në historinë e tyre në këtë shtet të imponuar atyre me dhunë, pushtetin real për të bërë një regjistrim të besueshëm. thuhet më tej në reagimin e Lëvizjes për Shtet dhe Drejtësi.

Edhe Eurostati, para një kohe tërhoqi vërejtjen  se metodologjia për zbatimin e regjistrimit është e përcaktuar nga Kombet e Bashkuara dhe nuk guxon të jetë lëndë e tregtimit politik dhe shtrembërimit të parimit dhe mënyrës së kryerjes, ndërsa me realizimin e çfarëdo qoftë qëllimeve të tjera që nuk kanë lidhje me një operacion klasik statistikor, nuk do të pranohet nga ana e Eurostatit.