Në Maqedoni, Gjykata Administrative vendosi që të mos përsëriten zgjedhjet në një qendër votimi në Gostivar, duke shmangur kështu mundësinë e përmbysjes së rezultatit të votimit në vend.

Por Gjykata vendosi në favor të rivotimit në Tearcë pranë Tetovës, që në varësi të rezultatit mund të sjellë ndryshime në numrin e vendeve në parlament për dy partitë maqedonase, VMRO-DPMNE-në dhe Lidhjen Social Demokrate, duke i nxjerrë me numër të njëjtë ligjvënësisht, me nga 50 secila.

Votimet në Tearcë, ku ka 714 votues të regjistruar pritet të mbahen më 25 dhjetor.

Komisioni Shtetëror i Zgjedhjeve kishte vendosur të premten për ripërsëritjen e votimeve, pas një ankese të partisë Besa.

Në votimet e 11 dhjetorit VMRO-DPMNE fitoi në këtë zonë me vetëm 76 vota më shumë se Lidhja Social Demokrate.

Qendra e votimit në Gostivar ka më pak se 900 votues të regjistruar, shumica e tyre shqiptarë.

Aktualisht, VMRO-DPMNE ka 51 mandate, ndërsa Lidhja Social Demokrate 49. Nga partitë shqiptare, BDI ka 10 mandate, Besa 5, Aleanca për Shqiptarët 3 dhe PDSh 2. Deri tani ato nuk janë shprehur publikisht lidhur me koalicionet e mundshme.

Partisë që do të marrë mandatin për formimin e qeverisë i duhet një shumicë prej 61 deputetësh. Por, në bazë të numrit të deputetëve cilado qeveri që të jetë, sipas njohësve të rrethanave, nuk do të mundet të bëjë ndryshime dhe reforma që kërkojnë 2/3 e votave.

Zgjedhjet e parakoshme të 11 dhejtorit në Maqedoni, që u organizuan për të kapërcyer krizën politike në vend, pas skandalit të përgjimeve, duket se nuk e realizuan këtë pritshmëri. Një numër analistësh parashikojnë zgjedhje të reja parlamentare jo më larg se në pranverën ose verën e ardhshme. (voa)