Presidenti i Maqedonisë së Veriut, Stevo Pendarovski e shpalli të mërkuren në mbrëmje gjendjen e jashtëzakonshme në vend për shkak të koronavirusit. Kjo masë do të zgjasë për tridhjetë ditë dhe varësisht prej rrethanave mund të zgjatet për tridhjetë ditë të tjera. Ky akt do t’ia shtojë autorizimet qeverisë maqedonase, ndërsa z. Pendarovski pret që me ashpërsimin e masave do të ketë sukses parandalimi i COVID-19 dhe se ekonomia e vendit nuk do të pësojë. Vendimi për gjendjen e jashtëzakonshme shpallet për herë të parë në Maqedoninë e Veriut që nga pavarësia e saj.

Të mërkuren pasdite qeveria teknike i kërkoi parlamentit, i cili sipas Kushtetutës është i autorizuari i parë për shpalljen e gjendjes së jashtëzakonshme, por kryetari i Parlamentit menjëherë e dërgoi atë akt tek presidenti duke pohuar se nuk mund ta thërrasë parlamentin për të debatuar mbi këtë çështje.

“Vendimi im mbështetet tek neni 125 i Kushtetutës që mundëson një gjë të këtillë, nëse parlamenti për arësye të ndryshme nuk mund të mblidhet. Konkretisht, vendimin për shpalljen e gjendjes së jashtëzakonshme e mora për t’u mbrojtur dhe ballafaquar nga pasojat e përhapjes së virusit COVID-19. Gjendja e jashtëzakonshme do të zgjasë 30 ditë dhe në momentin kur parlamenti të jetë në gjendje të mblidhet vendimi do t’i dërgohet për konfirmim”, tha zoti Pendarovski.

Gjendja e jashtëzakonshme i mundëson pushtetit ekzekutiv më tepër autorizime dhe ai do të mund t’i shfrytëzojë të gjithat burimet e shtetit dhe ato private. Kjo sipas presidentit, “për ta menaxhuar më me sukses epideminë”.

Në këtë situatë do të duhet të anulohen zgjedhjet e caktuara për më 12 prill, ndërsa zgjedhjet parlamentare do të shpallen vetëm pasi të krijohen kushte, siç u shpreh presidenti Pendarovski, “për deklarimin e drejtë dhe demokratik të qytetarëve”.

Me që parlamenti është shpërndarë dhe kryetari i tij Talat Xhaferi nuk ishte në gjendje ta thërrasë atë, atëherë organi i dytë shtetërorë i autorizuar është presidenti për ta marrë një vendim të këtillë historik, siç është vlerësuar edhe nga qeveria edhe nga vetë presidenti.

Ndërkohë, numri i të prekurve nga koronavirusi është ngritur në 35, teksa po bëhen testet për tridhjetë banorë të tjerë, pre tyre 17 nga Dibra.

Kryeministri i qeverisë së përkohshme Oliver Spasovski tha më herët në një konferencë për media se situata është e jashtëzakonshme dhe serioze me kërcënime për koronavirusin ndaj shëndetit publik, shëndetit të njerëzve, por edhe ndaj ekonomisë së vendit.

“Kjo kërkon masa të jashtëzakonshme. Qeveria e Maqedonisë së Veriut, shtoi Spasovski, tashmë nuk ka as dilemën më të vogël. Tash dhe menjëherë të shpallet gjendja e jashtëzakonshm”e, u shpreh ai.

Qeveria kërkon disiplinë dhe zbatimin e masave nga ana e qytetarëve, ndërkohë që thotë se nuk do të cenohen liritë e tyre, por masat mund të shtrëngohen në të ardhmen varësisht me rrethanat e koronavirusit.

Nuk dihet nëse do të zbatohet ora policore. Autoritetet qeveritare janë të bindura se me gjendjen e jashtëzakonshme, që është e barabartë me gjendjen e luftës, do të mbrohej më me sukses shëndeti publik dhe ekonomia e vendit.

Megjithatë, opozita e drejtuar nga VMRO-DPMNE-ja ka dyshime lidhur me shpalljen e gjendjes së jashtëzakonshme, e cila sipas saj, do të impononte shumë kufizime. Partia sugjeron gjendjen e krizës.

voa