Institucionet ia hedhin njëra tjetrës përgjegjësinë, lidhur me shtyrjen e seancës së djeshme të Gjykatës së Apelit për rastin “Monstra”. Avokati Naser Raufi fajëson thjesht Gjykatën e Apelit. Ai thotë se burgu mund të sjellë në sallë të akuzuarit vetëm kur kjo i kërkohet nga gjykatat e vendit. Ai aludon se Gjykata nuk kishte dërguar fare kërkesë për sjelljen e të akuzuarve në seancë. Me Gjykatën e Apelit kontaktuam edhe përmes zyrës për Marrëdhënie me Publikun, si dhe u dërguam pyetje në formë të shkruar. Por për përgjigjen na u tha se duhet të presim.

“Sipas deklaratës së Drejtorit të burgut të Idrizovës, përgjegjësia është përfundimisht e Gjykatës së Apelit, pasi dëgjuam deklaratën e Drejtorit të burgut që tha se nga Gjykata e Apelit nuk ka marrë ndonjë urdhër për të sjellë të akuzuarit, Agimin dhe Hakiun në seancën e Apelit. Absolutisht përgjegjësia është e Gjykatës së Apelit”, deklaroi Naser Raufi, avokat.

“Pas endjes nga një institucion në tjetrin, u rikthyem në fillim, këtu në Gjykatën e Apelit ku për kërkesën tonë me shkrim për atë që ndodhi dje, dhanë përgjigjen e zakontë: do të përgjigjemi nesër”.

Avokati i 6 të akuzuarve për rastin “Monstra” sot ka nisur edhe një shkresë zyrtare te lideri i opozitës Zoran Zaev në të cilën i ka kërkuar që të publikojë bombën e shumëpërfolur për rastin “Monstra”. Materialet, Raufi ka kërkuar që t’u dorëzohen edhe avokatëve dhe prokurorisë.

“Ne avokatët, sot brenda ditës dorëzuam një shkresë te Zaevi, i cili ka paralajmëruar bombat për këtë rast. Mendoj se në kohë të shkurtër do të realizohet kërkesa jonë që provat të cilat i paralajmëroi Zaevi, t’i dorëzojë në Prokurorinë e lartë, ose eventualisht te avokatët”, tha Naser Raufi, avokat.

Gjashtë personat e dënuar me burg të përjetshëm për vrasjen e pesëfishtë që ndodhi në vitin 2012 në afërsi të liqenit të Smilkovës e ankimuan vendimit në Gjykatën e Apelit. Seanca e parë e thirrur për dje u shty me arsyetimin se dy nga të burgosurit nuk u sollën nga burgu. Arben Zeqiri