Shoqata Shqiptaro – Amerikane në SHBA ka shprehur shqetësime lidhur me ngjarjet e fundit në Maqedoni dhe kryesisht me popullin shqiptar.

Kjo organizatë thekson se në Maqedoni dhe pranë saj po thurren skenare të njohura për të shpallur fajtor kujdestar të kohës popullin shqiptar, me tendenca gjoja për destabilizimin e Ballkanit të trazuar.

“Rasti i Gushincës tregon qartë kurdisjen e orës antishqiptare dhe fshehjen e problemeve të rënda politike dhe ekonomike në këtë vend me një të ardhme të brishtë dhe ende në fund të rrugës për kahet e reja të ndarjes nga e kaluara e boshtit pansllavist në hapësirën ballkanike. Duke hedh dritë për aktualitetin politik të sigurisë në Maqedoni, nuk jemi të kënaqur me angazhimin e deritanishëm të BE, që po ledhaton butësisht qarqet qeveritare në Shkup dhe Beograd. Andaj është koha që SHBA të marrin rrolin e zgjidhjes së çështjeve të hapura, si asaj shqiptare në Ballkan. SHBA duhet të bëjë këtë pasi që njihet si kreatore e vlerave të lirive njerëzore dhe demokracisë, e cila hapi rrugën e shtetësisë së Kosovës si një vend me perspektivë evropiane”, thekson SHSHA.

Kjo organizatë në Çikago kërkon urgjentisht zgjidhjen e çështjeve të hapura të shqiptarëve në Maqedoni, duke nisur nga përfshirja e shqiptarëve në bisedime me maqedonasit, hapja e ndryshimeve kushtetuese për ridefinimin e statusit të shqiptarëve si faktor shtetëformues dhe i barabartë me maqedonasit, me të drejtën e tyre për vetëvendosje. Po ua rikujtojmë pushtetarëve maqedonas se Maqedonia është shtet shumëkombësh,shumëkulturash, prandaj ajo nuk mund të konstituohet si shtet demokratik i pranuar nga bashkësia ndërkombëtare,vetëm po qe se mbështetet në këto parime dhe realitetin e kohës”, thekson SHSHA. (ina)