VMRO-DPMNE po insiston që partneri i saj i koalicionit BDI të pranojë miratimin e projekt-ligjit për letërnjoftime dhe ate për pasaportat.

Në kuadër të këtyre përpjekjeve ka pasur një takim midis dy koordinatorëve të grupeve parlamentare të VMRO-DPMNE, Ilija Dimovski dhe atij të BDI-së, Talat Xhaferri, ku është diskutuar për pjesët kontestuese të ligjit që refuzohen nga partia e Ali Ahmetit.

Miratimi i këtyre ligjeve po mbahet i bllokuar, për shkak se për kalimin e tyre duhet votimi i dyfishtë apo sipas parimit të Badenterit.

Sipas projekt – ligjeve, qytetarëve që qëndrojnë jashtë vendit më shumë se tre muaj, u hiqet adresa e banimit duke iu pamundësuar kështu nxjerrjen e letërnjoftimit të ri në të ardhmen. Me këtë rrezikohen mërgimtarët shqiptarë, të cilët mund të humbasin të drejtën e posedimit të dokumenteve të Maqedonisë.

Një projekt – ligj i tillë po zbatohet edhe në Luginën e Preshevës, ku Ministria e Brendshme serbe po shlyen nga evidenca mijëra qytetarë shqiptarë, me arsyetimin se jetojnë jashtë vendit dhe kanë ndryshuar adresat e tyre të banimit. Kjo ka të bëjë me mijëra shqiptarët e shpërngulur nga kjo zonë drejt Kosovës por edhe vendeve evroperëndimore.

Kundër këtyre ligjeve në Maqedoni kanë reaguar partitë e tjera politike, por edhe personalitete publike duke theksuar se në rast të kalimit të ligjeve të tilla shqiptarët duhet të dalin në protesta.

Këto projekt – ligje kanë kaluar në Qeveri, në seancat e së cilës kanë qenë edhe ministrat shqiptarë.(INA)