Shtypi austriak ka filluar ti kushtojë kujdes të veçantë samitit për Ballkanin Perëndimor, që mbahet këtë të enjte, më 27 gusht në Vjenë të Austrisë.

Gazeta vjeneze Die Presse, pasi ka bërë publike listën e zyrtarëve të lartë të Bashkimit Evropian, që do të janë pjesëmarrës të samitit, ka shkruar se pjesëmarrja e personaliteteve më të rëndësishme të BE-së në këtë samit, dëshmon se problem i integrimit të Ballkanit Perëndimor në BE zë vend të rëndësishëm brenda Unionit Evropian.

Kancelarja gjermane Angela Merkel, përfaqësuesja e BE për politikë të jashtme Federika Mogereini, kryeminsitri i Italisë Matteo Renci, Komesari i BE-së për fqinjësi të mirë Johanes Hahn, Kancerali federal i Austrisë Werner Fajman, ministri i jashtëm i Austrisë Sebastian Kurz, përfshirë dhe kryeministrin e Kroacisë, bashkë me kryeministrat e vendeve të Ballkanti Perëndimor, janë emrat e pjesëmarrësve në samitin e Vjenës kushtuar Ballkanit perëndimor, njofton sot gazeta austriake “Die Presse” në numrin e saj të sotëm.

I vetmi vend që nuk është pjesë e Ballkanit Perëndimor e që merr pjesë në samit është Kroacia. Sipas gazetës Die Presse, krijimi i nocionit Ballkan Perëndimor është bërë pikërisht me këtë qëllim, për të larguar Kroacinë nga ky grup vendesh, pasi Kroacia në planin kulturor dhe historik, ndihet si pjesë e Evropës së mesme.

Konferenca, shkruan Die Presse, është vazhdimësi e procesit të Berlinit dhe i shërben afrimit të vendeve të Ballkanit perëndimor me Bashkimin Evropian. Vetë pjesëmarrja e personaliteteve më të rëndësishme të BE-së në këtë samit, dëshmon se problemi i integrimit të Ballkanit Perëndimor në BE zë vend të rëndësishëm brenda Unionit Evropian.

Sipas gazetës austriake, vendi nikoqir ka bërë të gjitha përgatitjet, ndërsa tema kryesore e bisedimeve në samitin e Vjenës do të jetë: “Forcimi i bashkëpunimit rajonal në fushën politike dhe ekonomike, sidomos në fushën e infrastrukturës dhe procesit të integrimit në BE”.

Gazeta citon ministrin e jashtëm Austriak Sebastian Kurz të ketë thënë se: “stabiliteti dhe rritja ekonomike në hapësirën e Ballkanit perëndimor është në interesin e vetë vendeve të BE-së”.

Minsitri Kurz ka deklaruar se BE-ja do të mbështetë fuqishëm projekte që këto vende i çojën përpara në rrugën drejt afrimit me BE-në.
Për rëndësinë e takimit të Vjenës flitet edhe në faqen zyrtare të kancelares gjermane Anglea Merkël. Në kalendarin e saj thuhet se para fillimit të samiti, ajo në Vjenë do të takohet me kancelarin austriak Werner Fajman.

Në njoftimin e kabineti të kancelares Merkel për Samitin e 27 gushtit, thuhet se aty do të diskutohet edhe problematika aktuale e migracionit dhe azilit. Pas samitit do të ketë një konferencë shtypi, ku do të paraqiten kancelaria Merkel, kancelari austriak Fajman, zonja Mogereini dhe një kryeministër nga njëri prej vendeve të Ballkanit Perëndimor. (rtk)