Ndotja katastrofike që ka përfshirë brigjet e lumenjve në vend, burimin kryesor e ka tek vendet e papërshtatshme që përdorin bashkitë për grumbullimin e mbetjeve urbane.
Zakonisht këto vende ndodhen përgjatë brigjeve të lumenjve duke bërë që prurjet e lumit të marrin me vete gjithçka gjejnë.
“Në pamje të parë Bashkia e Librazhdit duket sikur ka bërë zgjedhjen e duhur duke i grumbulluar mbetjet larg shtratit të lumit. Prej disa vitesh ato depozitohen në shtratin e këtij përroi i cili gjithësesi i përcjell drejt lumit Shkumbin. Pas zgjidhjes së problemit të mbetjeve urbane të Bashkisë së Elbasanit, ky duket së është burimi kryesor i ndotjes së lumit Shkumbin, ndërsa situata bëhet edhe më e rëndë për shkak se këtu grumbullohen edhe mbetje spitalore”, raporton korrespondentja e Top Channel, Bruna Kërçuku.
“Unë e kam kundërshtuar dhe kur isha kryetar i komunës Qendër, se këto mbetje hidhen në territorin e ish komunës. Janë menduar disa variante. Një nga variantet është transporti drejt Elbasanit,në landfillin që është ndërtuar. Por pse jo, ne po hartojmë dhe një projekt tjetër që do të jetë në territorin e bashkisë së re Librazhd”, thotë Enver Shkurti, nënkryetar i Bashkisë Librazhd.
E gjithe kjo ndotje largohet me rrjedhën e lumit, por ajo ka shkatërruar tërësisht bregdetin. Çdo mbetje destinacionin e fundit ka plazhet shqiptare.
/ Top Channel