Sekretariati i Komunitetit të Energjisë e ka mirëpritur të hënën miratimin nga Parlamenti i Shqipërisë të ligjit të ri për Energjinë Elektrike, në përputhje me Paketën e Tretë Rregullatore.

Dirk Buschle, zv.drejtori i Sekretariatit të Energjisë, ka deklaruar se, rëndësia e ligjit të sapomiratuar në Shqipëri shkon përtej anës formale të përmbushjes së detyrimeve të legjislacionit europian.
“Ligji përbën një hap vendimtar përpara në rrugën e gjatë të reformës energjitike në Shqipëri, për të cilën ai vendos një themel të fortë. Që në fazën e draftit paraprak të këtij ligji, ne kemi punuar ngushtësisht sëbashku me autoritetet shtetërore në Shqipëri. Jam veçanërisht mirënjohës për bashkëpunimin që kemi patur me partnerë të aftë e të përgjegjshëm në Qeveri dhe në Parlament, ndaj më duhet t’i përgëzoj për punën e tyre”, ka shtuar Buschle.

Mes vendeve kontraktuese të Komunitetit të Energjisë, Shqipëria është shteti i dytë që miraton kërkesat e Paketës së Tretë Rregullatore për sektorin energjitik.

/ Top Channel