Anketimi i grupeve të qytetarëve dhe gazetarëve nxori se shtypi është i pafuqishëm të godasë korrupsionin e përhapur gjerësisht, sepse denoncimet e tij nuk ndiqen më tej nga drejtësia.

Nga studimi doli se kultura e mos-ndëshkimit të korrupsionit ka zënë vend në administratë e në shoqëri dhe po pranohet si një dukuri e zakonshme, kundër të cilës media dhe drejtësia nuk po arrijnë rezultate.

Studimi i profesorëve të Universitetit të Tiranës, mbështetur nga fondacioni Konrad Adenauer, zbuloi se besimi i qytetarëve ndaj institucioneve që duhet të godasin korrupsionin është shumë i ulët, korrupsioni është shumë i përhapur në politikë dhe në administratë.

Sipas tyre, mediat mbeten ndër institucionet kryesore në luftën kundër korrupsionit.

Qytetarët kanë besim të madh te mediat në këtë luftë, ndërsa vetë gazetarët e anketuar kanë besim më të pakët në këto përpjekje.

Një autor i studimit, prof Mark Marku thotë se besimi i lartë qytetarëve te mediat është për t’u vlerësuar, sepse qytetarët e dinë mirë dhe e shprehin në anketë se gazetarët janë nën presione të mëdha.

Por pse politikanët janë të korruptuar? Të anketuarit besojnë se korrupsioni kanë zënë vend në kulturën e shoqërisë dhe një pjesë i janë dorëzuar korrupsionit, duke thënë që po të ishin në vendin e politikanëve do të bënin të njëjtin abuzim.

Gazetarët e anketuar e lidhin dobësinë e medias kundër korrupsionit me nivelin e lartë të mos-ndëshkimit të tij, i cili shkakton edhe autocensurë te një pjesë e tyre.

Një tjetër gjetje e studimit është shkalla e ulët e transparencës së administratës shtetërore.

Por akoma më i dobët është reagimi i organeve të drejtësisë ndaj rasteve të korrupsionit, që denoncohen nga mediat.

Profesor Marku thotë se prokuroria ka gati një material të bollshëm nga mediat për të goditur korrupsionin. (voa)