Arkivi mujor: Shkurt 2015

Analiza

Deklaratë për Media e Visar Ymerit, e hënë, 2 shkurt 2015

Komento

Të mërkurën në ora 12 do të takohemi në sheshin “Zahir Pajaziti” në Prishtinë për të marshuar deri te sheshi “Skënderbeu”. Aty pastaj do të vazhdojmë me protestën që ngulmon që të shkarkohet Aleksandër Jabllanoviqi dhe që Trepça të shndërrohet në ndërmarrje publike me status të veçantë, e cila do t’ia bartte Kuvendit të Republikës së Kosovës vendimmarrjen për Trepçën, do ta shpëtonte atë nga falimentimi, dhe do ta shtronte rrugën për investimet në të dhe rimëkëmbjen e saj e të ekonomisë së Kosovës.

Protesta është shprehje. Shprehja bëhet komunikim vetëm kur pala tjetër dëgjon. Dhe ka kuptim vetëm kur paraprakisht merremi vesh për premisën bazë. Përmes protestës qytetarët flasin. E qeveria duhet të dëgjojë. Është e pafalshme se si qeveria e Republikës së Kosovës nuk e dëgjon shprehjen e kërkesave të qytetarëve. Është e pafalshme se si ajo ka mirëkuptim për fashizmin e Jabllanoviqit e hegjemoninë e Vuçiqit, e në anën tjetër polici, kërbaç,plumba gome e gaz lotsjellës për qytetarët.

Nuk mund të ketë zhvillim ekonomik e as sovranitet republikan e integritet territorial pa vendosmëri të krerëve institucionalë. Nuk mund të ketë Republikë të Kosovës po qe se për të vendosë Vuçiqi e Daçiqi, Qeveria e Serbisë. Kjo politikë reaksionare e hegjemoniste e Serbisë, e cila shqiptarët i vlerëson dhe trajton si egërsira, e resurset e Kosovës i do për t’i eksploatuar, do ta rrënojë Republikën e Kosovës. E Republika nuk do të ndërtohet kurrë duke e kërkuar pëlqimin e atyre, si dhe duke i mveshur me pushtet ata, që dojnë ta rrënojnë atë. Nuk mund të ketë Republikë të Kosovës, e rrjedhimisht as Kryeministër të Republikës, po qe se njëkohësisht ky Kryeministër nuk është posti fundamental ekzekutiv në vend. Mungesa e vullnetit për shkarkimin e Jabllanoviqit, duke u fshehur prapa ligjeve, mungesa e gatishmërisë për ta shndërruar Trepçën në ndërmarrje publike, duke u fshehur prapa pretendime të paqena për borxhe, e gërmojnë tokën nën ulësen e postit të kryeministrit. Dhe kështu e gërmojnë tokën nën këmbët e Republikës së Kosovës.

Populli i Republikës nuk do ta pranojë këtë.

VETËVENDOSJE!

Kosova

Biletat e shumëkërkuara Prishtinë – Beograd

Komento

Një numër i qytetarëve të Kosovës kanë vendosur të marrin rrugën e migrimit të paligjshëm, me gjithë thirrjet nga institucionet qendrore dhe ato ndërkombëtare në vend për të shmangur një rrugë të këtillë.Të dielën në mbrëmje, Stacioni i Autobusëve në Prishtinë, ishte mbushur me qytetarë që niseshin në drejtim të Serbisë, me shpresën për të depërtuar në disa vende të Bashkimit Evropian.

Zyrtarë të Stacionit të autobusëve në Prishtinë thanë për Radion Evropa e Lirë se numri i qytetarëve të cilët janë duke udhëtuar në drejtim të Serbisë, javët e fundit, është shtuar. Sipas tyre, deri me datën 6 shkurt, janë shitur të gjitha biletat për relacionin Prishtinë- Beograd.

Fitim Abdullahu nga Vushtrria, i cili një çantë mbante në shpinë, thotë se për shkak të kushteve të vështira ekonomike ka marrë vendim që të largohet nga Kosova dhe për synim ka të arrijë në shtetin gjerman. Por, fillimisht thotë se do të qëndrojë në Beograd e Suboticë për të kaluar pastaj nga Hungaria në Austri dhe në fund në Gjermani.

“Gjithçka po shkon në degradim, shkatërrim, për ketë arsye kam vendosur [të largohem]. Unë kam ndërprerë studimet master dhe kam vendosur me ik. Qe katër vjet jam i diplomuar, vazhdimishtkam konkurruar në institucione publike, kam pasur shumë stres. Konkurroj dhe në fund e kuptoj se aty ka qenë i pranuar dikush tjetër”, tha Abdullahu, i diplomuar në fushën e Elektro-Energjetikës.

Fatos Hasolli nga Fushë-Kosova bashkë me disa shokë të tjerë po qëndronin pranë peronit numër tre, aty ku po qëndronte autobusi drejt Serbisë. Hasolli, për dallim nga shokët tij që hezitonin të flisnin tha se për shkak të mungesës së vendeve të punës dhe mos zhvillimi të Kosovës, po niset drejt vendeve, ku siç tha,mund të ketë një jetë me të mirë.

“Arsyeja është se nuk kam mundur të punësohem. Nuk ka gjasa të punësohem,sepse gjithçka këtu po shkon me intervenime. Shpresë nuk ka dhe arsyeja e vetme është të nisesh diku ku mund të kesh punë e besim. Mendoj se në Gjermani është më mirë. Shkollën e kemi, përvojën e kemi, mendojmë të punojmë ku të mundemi. Nuk kemi persona që na presin atje, por besoj se do tia dalim”, tha Hasolli.

Ai kishte humbur shpresën e ndonjë ndryshimi pozitiv në Kosovë.

“Mendoj se brenda 10 vitesh nuk mund të ketë dicka të mirë për Kosovën. Nese ka diçka, ne do të ishim të parët që do të ishim kthyer dhe do të punonim”, tha Hasolli.

Kushtrimi, një tjetër djalë i ri nga komuna e Vushtrrisë, thotë se bashkë me dy shokë të tjerë po niset drejt vendeve të Bashkimit Evropian. Në krah mbante një çantë me ushqim e ujë..

“Jemi nis për në Gjermani. Nga Hungaria në Austri dhe Gjermani.Kushtet e vështira në Kosovë, po shpresojmë për kushte financiare më të mira. Mund të punojmë çkado që kërkohet, edhe punë krahu”, tha Kushtrimi.

Edhe Labinoti është nga Vushtrria. Ai shpjegon se si kishte një vend pune në Kosovë, por ka marrë vendim të dalë jashtë vendit, për një punë më fitim prurëse.

“Shkollën e mesme e kam të kryer. Punë e kam pasur, e kam lënë. Kam punuar në mobilieri,por nuk kishte rroga të mira. Tash po shpresojmë në diçka më mirë, nëse dalim jashtë”, tha ai.

Flamur Gashi nga Prishtina është nisur mbrëmë nga stacioni i autobusëve në Prishtinë drejt Gjermanisë. Me vete kishte gjithsejt 400 euro…

“Kam vendosur të dal se nuk po ka kushte këtu. Nuk ka të ardhme këtu për të rinjtë, duhet me dalë dhe me gjetë punë atje. Po shpresojmë me dal në të zezën në Gjermani. Në Kosovë i lashë dy prindër, dy vëllezër dhe dy motra”, tha Gashi.

Përfaqësuesit e Ministrisë se Punëve të Brendshme thanë sot se ende nuk kanë ndonjë të dhënë për migrimet e qytetarëve të Kosovës këtë vit. Ata thanë se të dhëna nuk kanë as për muajin dhjetor të viti të kaluar. Deri në muajin nëntor të vitit 2014, nga Kosova kanë migruar 24, 100 kosovarë, sipas të dhënave të Ministrisë.

Përfaqësues të lartë të institucioneve të Kosovës dhe ata ndërkombëtarë, përfshirë këtu edhe ambasadorët e vendeve të Bashkimit Evropian, kanë bërë thirrje në disa raste që të ndalet migrimi i paligjshëm, duke tërhequr vërejtjen se asnjë vend i BE-së nuk ofron më statusin e azilit. (rel)

Kosova

Mustafa në interpelancë para Kuvendit për rastin Jabllanoviq

Komento

Me kërkesën e partive politike opozitare, kryeministri i Kosovës Isa Mustafa është thirrur në interpelancë para Kuvendit të Kosovës, ditën e enjte, për të raportuar për rastin e ministrit për Kthim dhe Komunitete në Qeverinë e Kosovës, Aleksandar Jabllanoviq.Jabllanoviq i kishte quajtur më 6 janar “egërsira” protestuesit në Gjakovë, të cilët po përpiqeshin të pengonin disa pelegrinë serbë që të vizitojnë Gjakovën me rastin e Krishtlindjeve Ortodokse.

Opozita, insiston që ministri Jabllanoviq të shkarkohet nga posti, me gjithë kërkim faljen e zotit Jabllanoviq për deklaratën e bërë.

Shefi i Grupit Parlamentar të Lëvizjes Vetëvendosje, Visar Ymeri, ka thënë se kryeministri Isa Mustafa është “bërë një kryeministër social, me aktivizimin e tij vetëm në Facebook”, kështu që atij do t’i kërkohet të ballafaqohet edhe me Kuvendin në lidhje me ministrin në kabinetin e tij që, sipas Ymerit, ka fyer qytetarët.

“Kërkesa e parë e protestës; në fakt kërkojmë nga kryeministri që ai me të vërtetë të bëhet kryeministri i vendit dhe t’a sovranizojë postin e kryeministrit, duke e pasur mundësinë, vullnetin dhe guximin që ta shkarkojë një prej ministrave të Qeverisë së Republikës së Kosovës. Mirëpo deri më tani Isa Mustafa e ka dëshmuar që ai nuk e ka ndërmend të sillet si kryeministër sovran”, ka thënë Ymeri.

Pas protestave të fundit më 27 janar që eskaluan me dhunë, debati në Kuvend për rastin Jabllanoviq është mirëpritur edhe nga kryetari i Kuvendit, Kadri Veseli. Ai ka thënë se problemet duhet të zgjidhen në institucione dhe jo në rrugë.

“Kryesorja është që të rikthehet debati në institucione. Ne do ta kemi të enjten mbledhjen e Kuvendit, ku edhe do të debatohet, bisedohet dhe të njëjtën kohë besoj se do të ketë edhe reflektim dhe të mos futemi në ultimatume e presione të cilat faktikisht na drejtojnë në një drejtim që nuk është në të mirën e Kosovës”, ka deklaruar Veseli.

Ndërkohë, edhe shefi i Grupit Parlamentar të LDK-së, Ismet Beqiri i konsideron fyese deklaratat e ministrit serb Jabllanoviq, por zgjidhjen e sheh vetëm në Kuvend, e jo me protesta të dhunshme.

Sipas Beqirit, në Kosovë ka shumë probleme për të cilat qytetarët edhe mund të protestojnë, por kjo sipas tij, nuk e justifikon dhunën.

“Mendoj se në Kosovë ka 1001 arsye për të protestuar, por asnjë arsye të vetme nuk ka që të përdoret dhuna dhe të ketë lëndime. Edhe unë bëj pjesë në grupin e atyre që e konsideron shumë të pamatur, të paqëndrueshëm dhe të pa drejtë pse jo edhe fyese deklaratën e Jabllanoviqit. Por zgjidhjen për këtë e shoh vetëm në Kuvend”, ka deklaruar Beqiri.

Interpelanca e kryeministrit Mustafa është thirrur nga opozita një ditë pas protestës që është paralajmëruar për të mërkurën, në të cilën kërkesë kryesore mbetet shkarkimi i Jabllanoviqit.

Pjesëmarrjen në protestën e ftuar nga Vetëvendosje më 4 shkurt, e kanë konfirmuar edhe dy partitë tjera opozitare, Aleanca për Ardhmërinë e Kosovës dhe partia Nisma.

Më 24 dhe sidomos më 27 janar, në protestat që u mbajtën në Prishtinë, situata eskaloi në përleshje ndërmjet protestuesve dhe policisë, që si pasojë solli dhjetëra të lënduar si nga protestuesit ashtu edhe policia e Kosovës. (rel)

Shqipëria

Vazhdojnë operacionet e shpëtimit në jug, evakuohen qindra familje

Komento

Gjendja alarmante për shkak të vërshimit të ujit në Fier e Vlorë vijon ndërsa ne terren po ndërmerren operacione shpëtimi për banorët që ndodhen në mes të ujrave. Deri me tani jane zhvendosur shume familje, sipas te dhenave ne terren, niveli i ujrave te Semanit dhe Vjoses po ulet por ai mbetet ende kercenues.

Nderkohe ne Fier ne komunen Levan, në fshatrat Ferras, Martinë, Bishan dhe Poro, forcat e ndërhyrjes emergjente kanë evakuuar 110 familje. Operacionet më të vështira kanë qënë në vendin e quajtur “Kthesa e Qarrit” ku vetëm pas mesnate janë evakuuar 30 familje, 3 prej të cilave ishin vetëm gra me fëmijë, të cilat kishin disa orë të mbetura mbi çatitë e banesave të tyre.

Në komunën Frakull janë evakuuar 30 familje nga fshatrat Kashishtë, Kaftarë dhe Sheqmusalala. Dy helikoptere te forcave ushtarake kane nderhyre ne fshatin Poro te komunes Frakull dhe fshatin Darzezë e Re komuna Dërmenas në rrethin e Fierit.

Ne qarkun e Vlores ne mesnate jane evakuuar 70 familje, të cilat rrezikoheshin nga përmbytja ne Novosele ne fshatrat Mifol, Fitore, Bishan, Dëllëngë, Delishisht dhe Poro.

Drejtuesit e Komunës, për shkak të mundësisë për dalje nga shtrati i lumit Vjosë, për arsye sigurie kanë evakuar 40 familje nga banesa e tyre. Për evakuimin e familjeve nga komuna Novoselë janë angazhuar njëitë e “Delta Forcë” të Forcave të Armatosura. Policia rrugore ka bllokuar rrugën e vjetër Levan-Novoselë për shkak të ujrave sipërfaqësore që kanë arritur nivele të larta mbi rrugë. Rruga funksionale nga Fieri në Vlorë është vetëm autostrada e re Fier-Vlorë. / Top Channel

Shqipëria

Shqipëri: Lumenjtë dalin nga shtrati

Komento

Zona jugore dhe qendrore e Shqipërisë, po përjeton një situatë të rënduar reshjesh dhe përmbytjesh. Lumenjtë Osum, Gjanicë, Drinos, Vjosë, Shkumbin e Devoll, si dhe degëzimet e tyre, kanë dalë nga shtrati duke shkaktuar përmbytje dhe çarje të tokës në zonat përreth.Ushtria e Shqipërisë është në gatishmëri dhe ka ndërhyrë për evakuimin e banorëve në zonat e prekura, ndërkohë Ministra e Brendshme bën me dije se janë ngritur shtabet e emergjencave civile në çdo qark.

Në fshatin Novoselë të Vlorës, 300 shtëpi janë përmbytur nga dalja e ujërave të lumit Vjosë. Disa fshatra në zonën e Fierit janë rrethuar nga uji, dhe forcat e ushtrisë kanë tentuar për të larguar disa njerëz të bllokuar në banesat e tyre, por, errësira dhe koha e keqe e vështirësuan ndërhyrjen e tyre.

Të prekura janë edhe disa fshatra në Gjirokastër nga dalja e lumit Drino, disa fshatra në Librazhd nga dalja e lumit Shkumbin, si dhe disa fshatra në Berat që rrezikohen nga lumi Osum.

Deri tani nuk ka njoftime për të lënduar në njerëz, ndërsa fatura financiare e dëmeve materiale dhe në bagëti, ende nuk është bërë. Specialistët e sinoptikës parashikojnë vazhdimin e reshjeve gjatë gjithë javës në vazhdim. (rel)

Shqipëria

Vjosa kërcënon jetën e njerëzve, operacione shpëtimi për banorët e rrethuar nga uji

Komento

Situata në jug të vendit është duke u rënduar gjithmonë e më shumë për shkak të përmbytjeve. Reshjet e shiut rrisin në çdo orë nivelin e lumit Vjosa që ka arritur në shifra rekord në këto 50 vitet e fundit. Janë me mijëra personat që kanë lënë banesat e tyre ndërsa dhjetëra persona kanë kërkuar ndihmën e policisë, ushtrisë dhe emergjencave civile për të shpëtuar veten.

Në Memaliaj, në Darzezë, në Levan dhe Urën e Mifolit janë duke u zhvilluar operacione shpëtimi.

Alarmi më i fundit është dhënë nga punonjësit e një punishteje në Vlorë, pranë Kripores, ku ujërat po shkatërrojnë gjithçka, por më e rëndësishmja kërcënojnë punonjësit që ndodheshin aty. Gazetari i Top Channel Thimi Samarxhi, i cili ndodhet në zonën e përmbytur sqaron se “në Novoselë, pranë Urës së Mifolit, gjithçka është mbuluar me ujë dhe në pulari ndodhen punonjës që janë në rrezik për jetën.”

“Ka kamionë të ushtrisë dhe një furgon policie të pranishëm. Situata është e rënduar. Janë rreth 120 familje të evakuuara, por ka edhe familje të tjera që presin ndihmë me helikopter. Rruga nacionale nuk ka probleme kalueshmërie, por rruga e vjetër është tërësisht e pakalueshme”, sqaron gazetari i TCH.

Bota

Ligj për migrimin apo dëbime më të shpejta?

Komento

Në Gjermani janë shtuar zërat që kërkojnë hartimin e një ligji për migracionin. Njëkohësisht, Bavaria kërkon zgjerimin e listës së shteteve të sigurta edhe me Shqipërinë e Kosovën.Trajtimi i migrantëve që vijnë në Gjermani për arsye ekonomike apo politike vazhdon të jetë pjesë e debatit publik në Gjermani. Socialdemokratët dhe kristjandemokratët, të dyja parti në pushtet në Gjermani kanë qendrime të ndryshme për këtë çështje. Nëse socialdemokratët janë për ta legalizuar migrimin ekonomik në Gjermani me anë të një ligji të posaçëm, kristjandemokratët kundërshtojnë. Konservatorët në federatë dhe në lande kërkojnë zbatimin edhe më rigoroz të rregullave që ekzistojnë.
Kryetari i Grupit Parlamentar Socialdemokrat, Thomas Oppermann ka kërkuar në mënyrë të përsëritur muajt e fundit hartimin e një ligji për migracionin në Gjermani. Këtë kërkesë ai e përsëriti në intervistën që i dha të dielën (01.02) gazetës “Bild am Sonntag”. Oppermann-i kërkon ta rregullojë migrimin në Gjermani me një sistem të ri pikësh.
Kërkohet sistem pikësh për të tërhequr migrantët
“Është me vend që nevoja për migrantë nga vende jo anëtare të BE të rregullohet çdo vit nga e para. Për këtë na nevojitet një sistem i zhdërvjellët pikësh”. Sipas Oppermann-it, sistemi i pikëve e rregullon thjesht ardhjen e të huajve. Kur në Gjermani vijnë shumë migrantë nga BE, Gjermanisë i duhen më pak migrantë nga jashtë BE. Sa më e madhe nevoja, aq më i ulët numri i pikëve që të nevojiten. Veç kësaj, socialdemokrati propozoi që çdo vit të përcaktohen ato profesione ku ka më shumë mungesa. Ata që kanë kualifikime për ato profesione, marrin veçanërisht shumë pikë.
Përfaqësuesi socialdemokrat u shpreh më tej kundër një kufizimi kohor të lejeve të qendrimit dhe të punës. “Ai që kërkon të tërheqë fuqi të mira punëtore, duhet t’u ofrojë atyre perspektivën që të rrinë për një kohë të gjatë në Gjermani.” Ai përshëndeti në këtë rast tërheqjen në vendin e migrimit edhe të familjeve të migrantëve. “Natyrisht që migrantët sjellin me vete edhe familjet. Përndryshe ata as nuk do të vinin. Më shumë fëmijë i bëjnë mirë shoqërisë sonë në plakje.”
Pakësimi i numrit të popullsisë në Gjermani, ku çdo vit vdesin rreth 200.000 vetë më shumë se sa lindin, po i preokupon vitet e fundit politikanët gjermanë. Studime të instituteve të migrimit kanë përcaktuar modelin kanadez të migrimit, modelin tek i cili mund të orientohet Gjermania. Kanadaja tërheq me sistem përzgjedhjeje migrantë të kualifikuar. Por hapa konkretë për ndryshimin e bazës ligjore në Gjermani ende nuk janë ndërmarrë.
Gjermania rrezikon mirëqënien pa migrantë
“Në dhjetë vitet e ardhshme do të kemi 6,7 milionë punëmarrës më pak, për shkak të rudhjes së popullsisë. Pa migrantë ne nuk mund ta mbyllim këtë hendek dhe ecim drejt një katastrofe ekonomike”, thotë Oppermann.
CDU dhe CSU, gjithashtu në pushtet në Gjermani janë më të rezervuara në këtë drejtim. Politikanë kristjandemokratë kanë deklaruar se nuk e shohin të nevojshëm për momentin një ligj për migrimin. Ndër ta bën pjesë Ministri i Brendshëm, Thomas de Maiziere (CDU), i cili mendon se rregullat ekzistuese mjaftojnë.
Por socialdemokratët si Oppermann-i vazhdojnë të këmbëngulin. Në fund “do të vendosë gjithsesi interesi ekonomik. Kur nuk je më në gjendje të paguash pensionet, sepse ka pak kontribues në arkën e pensioneve, atëherë edhe skeptikët më të mëdhenj do të kërkojnë migrantë të kualifikuar”, thotë Oppermann. Edhe partia liberale FDP, aktualisht e papërfaqësuar në Parlamentin federal, është shprehur pro një sistemi pikësh, si ai që ekziston në Kanada.
Paralelisht me këtë, konservatorët kanë përsëritur kërkesën e tyre për ta zgjeruar listën me të ashtuquajtura vende të reja të sigurta. Ministri i Brendshëm i landit të Bavarisë, Joachim Herrmann (CSU) kërkoi që në listën e vendeve të sigurta të përfshihen shtete të tjera ballkanike. Kjo do ta shpejtonte kthimin e tyre në atdhe.
Herrmann: Shqipëria dhe Kosova tek vendet e sigurta
Gazetës “Welt am Sonntag” Herrmann-i i tha se e sheh me vend përfshirjen e Shqipërisë, Kosovës dhe Malit të Zi në listën e shteteve të sigurta. Kuota e pranimit të azilkërkuesve nga këto vende “është gati zero, meqenëse kërkesat për azil nga këto vende kanë kryesisht motive ekonomike”, tha Herrmann.
Herrmanni kërkoi veç kësaj një kthim më të shpejtë në atdhe të azilkërkuesve të refuzuar nga shtetet e sigurta si Bosnjë-Hercegovina, Maqedonia dhe Serbia. Kthimi në atdhe duhet të bëhet po qe e mundur që në institucionin e pranimit të migrantëve. “Azilkërkues të tillë bllokojnë vende strehimi, të cilat neve na duhen për njerëz që janë vërtet të ndjekur politikisht”, tha Herrmann.
Ministri Federal i Brendshëm, Thomas de Maiziere kërkoi ta përfshijë që vjet Shqipërinë dhe Kosovën në listën e shteteve të sigurta. Por kjo kërkesë e tij në fillim të vitit që shkoi u kundërshtua atëherë nga socialdemokratët.
Konservatorët kritikojnë keqpërdorimin që i bëhet sistemit të azilimit në Gjermani. Kurse socialdemokratët thonë se me një ligj migracioni, i cili do të rregullonte migrimin ekonomik, do të shmangej edhe presioni për keqpërdorim të azilimit.
Sipas OECD-së, Gjermania është bërë që në vitin 2013 vendi i dytë në botë i preferuar nga migrantët, pas SHBA. 465.000 migrantët e rinj, me të cilat u shtua Gjermania në 2013-ën do të qendrojnë gjatë në Gjermani. Dy të tretat e migrantëve të rinj vijnë nga shtete anëtare të Bashkimit Evropian. (dw)

Bota

Sërish shumë të vrarë në luftime të reja në Ukrainë

Komento

Në luftime të reja të ashpra në Ukrainën Lindore, sipas të dhënave të qeverisë dhe të kryengritësve janë vrarë të paktën 19 vetë. Kryesisht luftime janë zhvilluar pranë një pike kyçe transporti në afërsi të Donjeckut.Brenda 24 orësh janë vrarë 13 ushtarë dhe janë plagosur 20 të tjerë, deklaroi një zëdhënës ushtarak ukrainas. Veç kësaj janë vrarë tre civilë dhe u plagos rëndë një i katërt, kur shtëpitë e tyre në rajonin e Luhanskut u ndodhën nën goditjen e zjarrit. Kështu deklaroi guvernatori lokal Gennadi Moskal. Sipas të dhënave të guvernatorit besnik të Kievit, veç kësaj në veri të Luhanskut, në qytetin Shastja, ku kanë shpërthyer luftime të rënda u vranë nga raketat dy ushtarë ukrainas.

Një zëdhënës i separatistëve prorusë theksoi se brenda 24 orësh u vranë tre civilë në rajonin e së vetëshpallurës “Republikë Popullore e Donjeckut”. 19 të tjerë u plagosën. Në qytetin Makijivka, që kontrollohet nga kryengritësit në kufi me Donjeckun, tri godina u goditën nga predhat e mortajave.

Kush e kontrollon Debalceven?

Luftimet më të ashpra, trupat qeveritare dhe separatistët i zhvilluan midis pikës me rëndësi strategjike të transportit, Debalceve, 50 kilometra nga Donjecku.

Ministri i Mbrojtjes, Stepan Poltorak tha të shtunën (31.01) se kryengritësit e kishin marrë “pjesërisht” kontrollin në qytet. Kievi megjithatë i përgenjeshtroi të dhënat e kryengritësve, se ata mbajnë të mbyllur atje rreth 8000 ushtarë ukrainas.

Të shtunën në mbrëmje, në Minsk të Bjellorusisë përfunduan pa rezultatet bisedimet më të fundit të paqes. Në negociata morën pjesë qeveria e Kievit, separatistët prorusë, Organizata për Siguri dhe Bashkëpunim në Evropë (OSBE) si dhe Rusia. Palët e konfliktit akuzuan njëra-tjetrën për përgjegjësinë për dështimin.

OSBE-ja i akuzoi separatistët prorusë se mbajnë qëndrim bllokues. Në vend që të flisnin për një armëpushim dhe për tërheqjen e armëve të rënda nga Donbasi, kryengritësit patën kërkuar në bisedimet në Minsk një ndryshim të marrëveshjeve të deritashme.

Në konfliktin që zgjat prej nëntë muajsh janë vrarë deri tani më shumë se 5000 vetë. Që prej fillimit të shtatorit, në Lindje të Ukrainës është në fuqi formalisht një armëpushim, por i cili thyhet herë pas here. haz/ sp (rtr, afp)

Bota

Koment: Greqia bën amok

Komento

Athina përplaset me Brukselin, madje më shpejt se e priste kryeqendra e Europës. Tani duhet të zhvillohen shpejt strategji kundër këtij zhvillimi, para se Tsipras të fusë në valle të gjithë Europën, mendon Barbara Wesel.Ditë me radhë Brukseli vriste mendjen, se si duhej të hynte në bisedime me qeverinë e re. Përgjigja nga Athina tani: Nuk ka bisedime! Ministri i Financave, Yanis Varoufakis nuk do të bisedojë më me trojkën e Bashkimit Europian, Bankës Qendrore Europiane dhe Fondit Monetar Ndërkombëtar. Njësoj sikur dikush të mos dojë më të bisedojë me bankën, që i ka dhënë një kredi të madhe. Kjo sepse ai beson se bankat, sistemi financiar ndërkombëtar dhe e gjithë ekonomia globale janë një poshtërsi. Sigurisht askush nuk mund të ndalet të mos e besojë këtë, por duhet të dijë: Në xhirollogari nuk rrjedh më para.
Kush nuk bisedon me kreditorët e vet falimenton
Trojka e tre kreditorëve vendos për pagesa të ardhshme. Dhe ajo nuk ka rrugë tjetër veçse të bllokojë 7 miliardë eurot në fund të shkurtit, të cilat duhet të derdheshin si pjesë e paketës së fundit të ndihmës. Athina në inat e sipër thotë, se as nuk ka nevojë për to. Ndërkohë në shkurt dhe mars duhet të jenë gati 11 miliardë euro që Greqia duhet të paguajë për rifinancimin, normat e interesit etj. Nuk do më ky vend të zbatojë detyrimet e tij? Nëse Athina dëbon trojkën, Banka Qendrore Europiane nuk mund t’i funrnizojë më bankat greke me para. Pra as bankomatët nuk nxjerrin më para. Alexis Tsipras është tallur më parë me këtë, duke thënë se ai nuk do ta fusë vendin e tij në kaos. Por zgjimi i dhimbshëm për qytetarët grekë mund të vijë më shpejt se mendohet.
Me këtë trupë të re qeveritare në Athinë mund të qeshësh, po qe se qëllimi i deklaruar i Tsipras dhe të tjerëve nuk do të ishte të fusë në këtë vorbull të gjithë Bashkimin Europian. Planet e udhëtimit të krerëve të rinj flasin vetë: Londra, Roma dhe Parisi -janë në listë, sepse aty shpresohet për mbështetje. Tsipras e mënjanon Berlinin. Gjermania është një vend ndër të tjerët, thotë ai. Edhe ministri gjerman i Financave Wolfgang Schäuble e ka shprehur qëndrimin e tij: Ne nuk i detyrojmë grekët të marrin para. Po qe se nuk duan të flasin me ne, atëherë të mos flasin.
Tsipras kërkon të përçajë BE-në
Tsipras po përpiqet tani të bashkojë italianët dhe francezët kundër Berlinit. Krahas kësaj ai kërkon ndihmë edhe në Londër, ku sundon mendimi, se Gjermania duhet të derdhë para në eurozonë për të stimuluar rritjen ekonomike. Por britanikët nuk janë përgjegjës për këto borxhe, prandaj më mirë të mos merren me këtë temë. Edhe në Romë dhe Paris parimisht ekziston mendimi se BE duhet të shpenzojë më shumë para dhe gjërat rregullohen. Aty me dëshirë do të zbutej edhe më tej pakti i stabilitetit. Por si italianët edhe francezët janë kundër një faljeje të një pjese të borxhit. Sepse jo vetëm Gjermania duhej të përgjigjej për 50 deri 60 miliardë euro, por edhe italianët e francezët e humbasin pjesën e tyre.
Se çfarë do qeveria e re në Athinë dihet – një konferencë borxhesh ku Greqia të lirohet nga një pjesë e madhe e borxheve si Gjermania pas Luftës së II Botërore. Por situata nuk krahasohet nga ana historike. Ju miq dhe shokë në Greqi nuk jeni viktima të tërmeteve, luftës qytetrae apo stuhive, por të elitave tuaja korrupte dhe kleptokratike. Askush nuk është fajtor, ju vetë! Bankat ju dhanë para me mendjelehtësi! Kjo është e vërtetë! Por askush nuk ju detyroi t’i merrni ato dhe t’i shtrini këmbët më shumë se jorganin. Mos e bëni më këtë rol viktime që nuk shkon!
Qeveria greke mund të luajë lojën e saj me BE. Do të shihet se ku do të shkojë. Fondi Monetar Ndërkombëtar në Uashington nuk impresionohet nga delirantë si Alexis Tsipras dhe kërkesat e tij pa bazë. Të shohim si do shkojnë bisedat me kreun e FMN-së, Christine Lagarde.
“Grexit” si një mundësi
Në fund mund të besohet se paturpësia fiton. Mund të jesh edhe i dehur nga pushteti i ri dhe t’i fusësh duart në xhepa kur sapo ndahesh me një koleg europian. Por nuk mund të fyesh pa ndërprerje personat me të cilët je në një tavolinë negociatash edhe sikur të jesh aty për të biseduar për falimentimin e Greqisë apo daljen nga eurozona. Angela Merkel nuk ka pse të lejojë të krahasohet me Hitlerin, dhe Wolfgang Schäuble nuk ka të bëjë aspak me rajhun e katërt.
Tsipras dhe njerëzit e tij zëvendësojnë arsyen e sensin e realitetit me paturpësi dhe stil të pasjellshëm. BE duhet të mendojë shumë shpejt se si duhet të veprojnë mekanizamat për të mundësuar një “grexit”, para se e gjithë Europa të futet në valle. Thuhet se udhëtarët nuk duhen ndalur, e aq më pak kur ke të bësh me udhëtarë të tillë. (dw)

Bota

Përhapja e sëmundjes së fruthit në SHBA

Komento

Mbi 100 vetë në Shtetet e Bashkuara janë infektuar me virusin e fruthit brenda këtij muaji. Përhapja e virusit ka çuar në paralajmërime nga Shtëpia e Bardhë që prindërit të vaksinojnë fëmijët.Fruthi, një sëmundje tepër ngjitëse, shfaqet me acarim të lëkurës, temperaturë dhe sekrecione nga hundët. Deri tani virusi nuk ka shkaktuar të vdekur.

Mbi 90 raste janë diagnostikuar në Kaliforni, ku zyrtarët lokalë thonë se virusi është përcjellë përmes infektimeve të marra në parkun e argëtimit Disneyland.

Në Shtetet e Bashkuara shumë prindër zgjedhin të mos i vaksinojnë fëmijët, pasi shqetësohen për ndikimin negativ që mund të ketë vaksina në mbarëvajtjen e tyre shëndetësore. Këtu qëndron edhe problemi, thonë zyrtarët e shëndetësisë, pasi lufta kundër sëmundjeve të rrezikshme të fëmijërisë kërkon një vaksinim total të popullatës. (voa)