Në Shqipëri kryeministri Edi Rama njoftoi sot se i ka kërkuar kandidatit të Partisë socialiste për kreun e Bashkisë së së Kavajës që të tërhiqet nga gara e ditës së dielë.

“I kam sugjeruar kandidatit tonë të tërhiqet nga gara e të dielës e t’i kërkojë të tërhiqet edhe kandidatit tjetër, të cilit ia bëj dhe unë këtë apel, shumë miqësisht. Vjen gjithnjë një moment për të thënë fjalën e fundit dhe luajtur gurin e fundit, po ky moment nuk është 7 maji”, – deklaroi kryeministri Rama në një dalje të posaçme publike.

Vendimi i kryeministrit, erdhi pas deklaratave të forta të opozitës e cila ka vendosur që ditën e zgjedhjeve në Kavajë të organizojë atje një manifestim.

E djathta nuk është përfshirë në garën për kreun e Bashkisë së Kavajës, duke mos paraqitur asnjë kandidat.

Sot kreu i opozitës Lulzim Basha përsëriti dhe një herë se nuk tërhiqet nga objektivi për një qeveri teknike e cila sipas tij duhet të garantojë zgjedhje të lira e të ndershme.

“Ne jemi gati, dhe stacioni ynë më i rëndësishëm, i pari në këtë betejë finale që do ta fitojë e nesërmja, shpresa dhe e ardhmja, do ta fitoja Republika e Re, është Kavaja. Përballja e parë, është dita e dielë në kryeqytetin e lirisë, në kryeqytetin e demorkacisë, në Kavajë. Ditën e dielë, le ta mësojë çdo shqiptar dhe çdo miki huaj, se në 7 Maj Republika e vjetër rrëzohet në Kavajë”. Opozita ka përsëritur vazhdimisht se ajo nuk do të lejojë zhvillimin e zgjedhjeve pa u arritur më parë një marrëveshje e gjerë politike.

Zoti Rama akuzoi opozitën se synon destabilizimin e vendit.

“Që ka një plan për destabilizim të këtij vendi, që çadra është ngritur për ta vënë në jetë këtë plan, që pas atyre që janë ngujuar në çadër nga frika e drejtësisë, ka të tjerë që e duan destabilizmin për të dëmtuar Shqipërinë, këto nuk janë më hamendje. Janë fakt!”.

Kryeministri shtoi se “të pengosh njerëzit të votojnë, është krim i rëndë! Dhe ky krim që nuk ka ndodhur as në vendet më të humbura, me demokraci shumë më të dobët se Shqipëria, në këtë vend nuk mund, nuk duhet e nuk do ta lejojmë të kryhet. Por – theksoi zoti Rama – as kemi arsye dhe as nuk është nevoja që ta bëjmë Kavajën pasnesër, vendin ku ky krim të tentohet e të ndëshkohet me çdo çmim. Sepse, nëse të ngujuarit në çadër, në dëshpërimin e tyre kërkojnë shesh për të bërë një stërvitje me përmbajtje kriminale në Kavajë, për të nxirë Shqipërinë sa të munden e për të cenuar e dëshpëruar kë të munden përpara 18 qershorit, as ne, as Shqipëria, as miqtë e partnerët tanë të pazëvendësueshëm nuk kemi pse bëhemi pjesë e kësaj stërvitjeje të shëmtuar, por kemi nevojë të zhvillojmë, pasi t’i kemi dalë çdo borxhi PD-së, ndeshjen e 18 qershorit”.

Kryeministri i bëri sërish thirrje zotit Basha që të marrë në konsideratë ofertën e bërë prej tij, duke saktësuar se koha e mundshme për përfshirjen e Partisë Demokratike në zgjedhje skadon të dielën e ardhshme, kur nis dhe përgatitja e materialeve zgjedhore.

Zoti Rama nënvizoi se për datën e zgjedhjeve më 18 qershor nuk mund të negociohet, sikundër dhe për kërkesën e opozitës për një qeveri teknike.

Vendimi i kryeministrit Edi Ram u përshëndet menjëherë nga Presidenti Buajr Nishani, në zyrën e të cilit për dy ditë me radhë u zhvilluan dhe takimet mes kryeministrit Rama dhe kryetarit demokrat Basha, ndonëse pa asnjë rezultat.

“Presidenti e vlerëson qëndrimin e Kryeministrit për shtyrjen e zgjedhjeve për Kryetarin e Bashkisë së Kavajës si një mundësi për të vijuar dialogun politik mes palëve për të gjetur një zgjidhje kompromisi të krizës politike në vend. Në këtë kontekst, Presidenti i Republikës vijon të nxisë mbajtjen hapur në vijimësi të dialogut mes palëve”, – përfundon deklarata

Edhe Ambasada e Shteteve të Bashkuara mbështeti “thirrjen e Kryeministrit për shtyrjen e zgjedhjeve bashkiake në Kavajë me qëllim që të ruhet përqendrimi i qeverisë dhe opozitës tek procesi i dialogut. Nxisim vazhdimin dhe përshpejtimin e procesit të dialogut sepse koha që mbetet për t’i zgjidhur çështjet me anë të negociatave përpara zgjedhjeve të 18 qershorit është e kufizuar”, – nënvizon deklarata e ambasadës amerikane në të cilën theksohet se “mbështesim të drejtat e shqiptarëve për të protestuar paqësisht dhe nxisim të gjitha palët që të tregojnë vetëpërmbajtje. Iu bëjmë thirrje të gjitha partive që të mos angazhohen në akte që mund të nxisnin dhunë, veçanërisht akte që ndikojnë në aftësinë e qytetarëve për të marrë pjesë në zgjedhje dhe për të ushtruar të drejtën e tyre për të votuar. Dhuna nuk ka vend në procesin demokratik”, përfundon deklarata e ambasadës amerikane.

Edhe kryetari i LSI-së, Petrit Vasili, partneri kryesor i socialistëve e vlerësoi pozitivisht shtyrjen e zgjedhjee në Kavajë “në funksion të çtensionimit të situatës. Dialogu duhet të vazhdoje dhe atij i duhet krijuar hapësira dhe qetësia e duhur. Zgjedhjet me standarte mbeten sfidë madhore pa kthim”, theksoi zoti Vasili në një deklaratë.

Ndërsa kryetari i Partisë Demokratike të opozitës e vlerësoi tërheqjen e kandidatit socialist nga zgjedhjet vendore të Kavajës si “fitoren e parë të republikës së re”, sepse, sipas tij, kryeministri Rama ka një plan “për të rikthyer monizmin në vendin që përmbysi diktaturën komuniste”.

Zoti Basha tha se “faktori i vetëm i destabilizimit në Shqipëri janë bandat e majta kriminale të lidhura me pushtetin, që po bëheshin gati të lanin hesapet me njëri-tjetrin në Kavajë”.

Ai theksoi se “rruga e vetme për tu bashkuar me shumicën dërrmuese të shqiptarëve, që duan zgjedhje të lira dhe të ndershme, ndarjen me krimin dhe ndarjen me drogën, është qeveria teknike”.

“Zgjedhjet e vetme që do të mbahen në Shqipëri, do të jenë vetëm zgjedhjet e lira dhe të ndershme, vetëm me pjesmarrjen e opozitës, vetëm me zgjidhjen politike, e cila, për këtë lëvizje, kalon nga qeveria teknike dhe garancia e nevojshme për votën e lirë të qytetarëve” – tha zoti Basha. (voa)

Shtyhen zgjedhjet bashkiake të 7 majit në Kavajë – përqëndrim tek dialogu me opozitën dhe në evitimin e trazirave dhe të destabilizimit.

Kryeministri Edi Rama në një konferencë për shtyp të zhvilluar sot pasdite ( 5 maj 2017) deklaroi se  i ka sugjeruar: “kandidatit të PS-së në Kavajë të tërhiqet nga gara të dielën pasi PD-ja ka përgatitur një plan konkret për të shkaktuar trazira të dielën në Kavajë.”

“Ka një plan për destabilizim të këtij vendi, që çadra është ngritur për ta vënë në jetë. Këto janë fakte, por që Shqipëria nuk do të destabilizohet nga ky plan që me vendosmëri do ta çojmë deri në dështimin e plotë” – tha kryeministri Rama. Ai  rikonfirmoi se nuk ka shtyrje të zgjedhjeve parlamentare të 18 qershorit. “18 qershori është përcaktuar sipas Kushtetutës dhe nuk mund të jetë pjesë e asnjë negociate mes partive, sepse partitë duhet të garantojnë dhe jo të ndërmjetësojnë të drejtat e popullit sovran”, theksoi kryeministri Rama.

Schütz – Mbështesim shtyrjen e zgjedhjeve bashkiake të së dielës në Kavajë

Në një deklaratë zyrtare për DW-në ambasadorja e Gjermanisë në Tiranë, Susanne Schütz, ka shprehur mirëkuptim për shtyrjen e zgjedhjeve bashkiake në Kavajë, të planifikuara për pasnesër, më 7 maj, ”për të mbajtur të hapur kësisoj rrugën për bisedime mes qeverisë dhe opozitës në interes të një zgjidhjeje të krizës aktuale politike dhe pjesëmarrjes sa më të gjerë të partive politike në zgjedhjet parlamentare.”

“Ne mbështesim përpjekjet e palëve të përfshira për të vazhduar këtë dialog me qëlllim për të gjetur një zgjidhje në bazë të Kushtetutës së Shqipërisë. Njëkohësisht u bëjmë thirrje të gjitha palëve të shmangin çdo veprim qe mund të ndikojë që një protestë paqësore të shndërrohet në dhunë” thuhet në deklaratën e ambasadores gjermane.

Në zgjedhjet bashkiake në Kavajë opozita nuk ka paraqitur asnjë kandidaturë. Tërheqja e kandidatit socialist e bën të pamundur zhvillimin e tyre këtë të dielë.

SHBA – Dhuna nuk ka vend në procesin demokratik

Mbështetje për shtyrjen e zgjedhjeve bashkiake në Kavajë dhe apel për shmnangie të dhunës kanë shprehur sot edhe SHBA.  Në një deklaratë të ambasadës amerikane në Tiranë u bëhet thirrje “të gjitha partive politike që të mos angazhohen në akte që mund të nxisin dhunë dhe veçanërisht në akte që ndikojnë në aftësinë e qytetarëve për të marrë pjesë në zgjedhje dhe ushtruar të drejtën e tyre për të votuar. Dhuna nuk ka vend në procesin demokratik.” Thekson deklarata e ambasadës së SHBA-së në Tiranë.

Vazhdojnë negociatat Rama-Basha 

Ndërkohë negociatat Rama-Basha, të ndërmjetësuara nga Presidenti i Republikës, Nishani  për  të arritur një kompromis që PD-ja të marrë pjesë në zgjedhjet parlamentare të 18 qershorit vazhdojnë që prej dy ditësh. Por negociatat ngecin përderisa palët vazhdojnë të kenë qëndrime të papajtueshme lidhur me pranimin e ofertës së negociatorëve të përzgjedhur nga BE-ja, europarlamentarët McAllister dhe Fleckenstein. Në ofertën e tyre nuk është përfshirë  kërkesa nr. 1 e opozitës në protestë: dorëheqja e kryeministrit Rama dhe formimi i një qeverie teknike për ta çuar “vendin  në zgjedhje të lira dhe të ndershme”. Po ashtu opozita e akuzon qeverinë Rama ”se do të blejë votat” me paratë e drogës dhe të kanabis”. Oferta e negociatorëve të Parlamentit Europian u pranua nga kryeministri Rama.

Në negociatat e këtyre dy ditëve të fundit , të ndërmjetësuara fuqishëm nga BE dhe SHBA palët vazhdojnë të kenë qëndrime krejt të kundërta lidhur me krijimin e qeverisë teknike.

Ministri i Jashtëm gjerman Sigmar Gabriel që vizitoi kohët e fundit Tiranën deklaroi se “qeveria teknike nuk është e nevojshme” dhe i bëri thirrje opozitës që të marrë pjesë në zgjedhje. Por protesta e opozitës për një qeveri teknike vazhdon dhe ka hyrë në muajin e saj të tretë.

BE-ja dhe SHBA-ja janë shprehur se zhvillimi i zgjedhjeve të 18 qershorit dhe rezultati i tyre janë legjitime edhe pa pjesëmarrjen e PD-së, më të madhes në opozitë në Shqipëri, por kane paralajmëruar se mospjesëmarrja e PD-së e bën vulnerabël stabilitetin e vendit. (dw)

Në Shqipëri ka dështuar dhe takimi i dytë, sot në mbrëmje mes kryeministrit Edi Rama dhe kreut të opozitës Lulzim Basha. Pas më shumë se dy orësh të dy kanë dalë nga mjediset e presidencës, me të njëjta pozicione nga të cilat ishin ndarë një ditë më parë.

Kryeministri përsëriti se ai kishte paraqitur të njejtën ofertë, atë të emërimit të një zëvendës-kryeministri, të porpozuar nga opozita, por jo anëtar i saj, i cili së bashku me një përfaqësues të zgjedhur nga Bashkimi Europian, një përfaqësues të zgjedhur nga Shtetet e Bashkuara, dhe një përfaqësues të zgjedhur nga OSBE-ja do të ketë detyrën e monitorimit të plotë të sjelljes së shtetit në fushatë. Përveç zëvendëskryeministrit opozitës i është ofruar po ashtu një zëvendësministër i Brendshëm, përfshirë një zëvendësdrejtor të përgjithshëm të policisë dhe 12 zëvendësdrejtorë policie në qarqe që të kontrollojnë rolin e policisë, një zëvendësministër të Arsimit për të mbikqyrur dhe ndërhyrë menjëherë në rast të shkeljeve nga ana e trupave mësimore, si dhe një zëvendësministër të Drejtësisë për të vëzhguar procesin zgjedhor në burgje. “Një ofertë tjetër nuk e kemi dhe nuk do ta kemi sepse nuk shohim hapësirë për më shumë”.

Por për kryetarin e opozitës, “propozimi i zotit Rama ishte një mos-ofertë për zgjidhje”. Sipas zotit Basha situata e rëndë në të cilën gjendet vendi për shkak të lidhjes që sipas tij pushteti ka vendosur me krimin dhe narkotrafikun, “nuk mund të zgjidhet me një ofertë për monitorim, por kërkon një zgjidhje politike”. Kreu i opozitës u shpreh se kundërpropozimi i saj mbetet mbetet ai për “një qeveri teknike me mandate për të zgjidhur dhe ndalur influencën e krimit dhe drogës në zgjedhjet e ardhshme, dhe për të krijuar kushtet që qytetarët të votojnë të lirë dhe të pa kërcënuar. Kollona e dytë – shtoi ai – është eksplorimi i mundësisë që brenda 6 muajve të realizohet votimi elektronik”.

Por dhe për këtë çështje zoti Rama ka qenë kategorik, duke nënvizuar se “zgjedhjet do të mbahen më 18 qershor”, duke propozuar që një përfaqësues politik i opozitës, të përfshihet në qeveri dhe të punojë për një projekt i cili nëse certifikohet si i zbatueshëm, të mund të jetë i gatshëm për zgjedhjet e ardhshme vendore”. (voa)