Ambasadori amerikan në Gjermani, Richard Grenell që është përzgjedhur nga Presidenti Donald Trump si Drejtori në Detyrë i Zbulimit Kombëtar, thotë sa nuk do të jetë për një kohë të gjatë në atë post.

Në një mesazh në Twitter, Ambasadori Grenell konfirmoi se po e merr postin përkohësisht dhe se “Presidenti do të njoftojë të emëruarin (jo mua) së shpejti”.

Shtetet e Bashkuara kanë qenë pa një drejtor të përhershëm të zbulimit kombëtar që nga gushti 2019, kur Dan Coats dha dorëheqjen zyrtarisht, pas një sërë përplasejsh publike me Presidentin Donald Trump.

Por deri tani nuk ka pasur ndonjë koment nga Shtëpia e Bardhë lidhur me kohën kur do të shpallet një kandidaturë për drejtorin e përhershëm.

Zoti Grenell pritet të marrë detyrën si drejtor i përkohshëm, duke zëvendësuar drejtorin aktual në detyrë, Joseph Maguire, i cili në bazë të ligjit nuk mund të vazhdojë ta ushtrojë detyrën pas 12 marsit.

Presidenti Trump njoftoi për synimin e tij për të caktuar zotin Grenell të mërkurën në mbrëmje me një mesazh në Twitter.

Në një deklaratë të enjten, sekretarja e shtypit e Shtëpisë së Bardhë Stephanie Grisham lavdëroi zotin Grenell dhe vlerësoi përgatitjen e tij për rolin.

“Ai ka shumë vite përvojë pune në Komunitetin e Zbulimit në një numër pozicionesh, përfshirë si i Dërguar i Posaçëm për Negociatat Serbi-Kosovë dhe si zëdhënës i Shteteve të Bashkuara në Kombet e Bashkuara. Ai është i përkushtuar të mbajë një qëndrim jopolitik, jopartiak si kreu i Komunitetit të Zbulimit, nga i cili varet siguria jonë”, tha zonja Grisham.

Një zyrtar i adminstratës konfirmoi gjithashtu për Zërin e Amerikës se zoti Grenell do të mbajë postin e ambasadorit në Gjermani dhe do të vazhdojë të shërbejë si i dërguar i posaçëm për negociatat e paqes mes Serbisë dhe Kosovës, ndërsa drejton zbulimim kombëtar.

Ambasadori Grenell, që njihet si mbështetës besnik i Presidentit Trump, shkaktoi debate në Gjermani kur mori postin, kur tha se donte “të fuqizonte konservatorë të tjerë në gjithë Evropën, udhëheqës të tjerë”.

Pas këtyre komenteve, Ministria e Jashtme e Gjermanisë, kërkoi sqarime.

Zoti Grenell ka folur sidomos hapur në lidhje me ato që ai i quan rreziqe që paraqet biznesi me gjigantin kinez të telekomunikimit Huawei. Ai i ka bërë thirrje Gjermanisë të mos bëhet kliente e Huawei-t për shkak të dyshimeve se kompania instalon në produktet e saj pajisje përgjimi me kërkesë të Pekinit.

Disa ish-zyrtarë të zbulimit dhe disa ligjvënës me peshë thonë se zoti Grenell nuk ka përvojë të mjaftueshme në zbulim dhe përmendin refuzimin e presidentit për të emëruar një drejtor të përhershëm.

“Presidenti po ia ul rëndësinë postit, duke refuzuar të caktojë një kandidat që duhet të konfirmohet (nga Senati)”, tha James Clapper, ish-drejtor i zbulimit kombëtar gjatë administratës së Presidentit, Barack Obama.

“Nuk është gjë e mirë për vazhdimësinë dhe qëndrueshmërinë. Mesazhi i përgjithshëm që përçohet është që presidenti thjesht do një besnik të tij, të ulet në karrige thjesht për formë”, i tha ai Zërit të Amerikës.

Edhe nënkryetari i Komisionit të Senatit për Zbulimin, demokrati Mark Warner, e kritikoi përzgjedhjen e ambasadorit Grenell në Twitter.

“Duket se Presidenti ka zgjedhur një individ pa përvojë në zbulim në krye të komunitetit të zbulimit kombëtar, si drejtor në detyrë”, shkruante senatori Warner, duke e akuzuar më tej zotin Trump se po angazhohet në “një përpjekje për të anashkaluar autoritetin kushtetues të senatit për këshilluar dhe konfirmuar për poste kaq kritike”.

Fillimisht, pas dorëheqjes së ish-drejtorit Dan Coats pothuajse tetë muaj më parë, zoti Trump njoftoi se do të emëronte kongresmenin republikan John Ratcliffe për postin, por ai e tërhoqi emrin e vet nga shqyrtimi, pasi dolën pikëpyetje lidhur me kredencialet dhe përvojën e tij.

Kështu presidenti Trump caktoi ish-pjesëtarin e njësisë elitë Navy Seal, Joseph Maguire, që kishte shërbyer si drejtor i Qendrës për Kundërterrorizmit Kombëtar.

Ligjvënës dhe ish-zyrtarë të zbulimit e vlerësuan zotin Maguire për angazhimin e tij për të shmangur politikën.

“Mendoj se Joseph Maguire bëri aq sa mundi në rrethana të vështira për të mos lejuar korruptimin e misionit të komunitetit të zbulimit”, tha Paul Pillar, një ish-zyrtar i lartë i CIA-s, aktualisht në Universitetin Georgetown.

Por ai shpreh shqetësim lidhur me caktimin e ambasadorit Grenell.

“Grenell jo vetëm që nuk ka përvojë në zbulim, çka është një minus por është partiak. Vendosja e tij si drejtor në detyrë i Zbulimit Kombëtar, është një tregues i politizimit të komunitetit të zbulimit më shumë se kurrë më parë, nën presidencën e zotit Trump”, tha ai.

Presidenti Trump ka pasur një marrëdhënie të acaruar me komunitetin e zbulimit, pasi ky i fundit arriti në përfundimin se Rusia ndëryri në zgjedhjet presidenciale të vitin 2016.

Në disa raste, ai është përplasur hapur me shefat e agjencive të zbulimit. Në një rast në Twitter, ai i sulmoi ashpër duke i quajtur “jashtëzakonisht pasivë dhe naivë”.

voa

Presidenti Trump konfirmoi se po emëron ambasadorin amerikan në Gjermani Richard Grenell si Drejtor në detyrë të Zbulimit Kombëtar.

Një zyrtar i Shtëpisë së Bardhë i tha Zërit të Amerikës se ai do të vazhdojë të mbajë edhe postin e Ambasadorit në Gjermani. Richard Grenell është i dërguar i Presidentit Trump për bisedimet Kosovë Serbi.

Presidenti e bëri njoftimin të mërkurën vonë në Twitter, pak orë pasi lajmi u bë i ditur nga disa media amerikane.

“Jam i kënaqur të njoftoj se Ambasadori ynë shumë i respektuar në Gjermani, @RichardGrenell, do të bëhet Drejtor në Detyrë i Zbulimit Kombëtar.” “Rick (Richard Grenell) ka përfaqësuar vendin tonë jashtëzakonisht mirë dhe mezi pres të punoj me të,” shkruante Presidenti Trump në Twitter.

Drejtori i Zbulimit Kombëtar mbikëqyr gjithë komunitetin e inteligjencës amerikane të përbërë nga 16 agjenci dhe bashkëpunon ngushtë me drejtorin e Departamentit të Sigurisë Kombëtare.

Meqenëse do të jetë drejtor në detyrë i Zbulimit Kombëtar, Grenell nuk ka nevojë për konfirmim nga Senati.

Zoti Grenell tha sot se nuk do të jetë ai që do të emërohet nga Presidenti Trump si drejtor i përhershëm në këtë post. Presidenti, tha zoti Grenell në Twitter, do ta bëjë njoftimin për drejtorin e përhershëm së shpejti, por nuk do të emërojë atë në këtë post.

Richard Grenell ka qenë zëdhënës i SHBA në Kombet e Bashkuara në kohën e Presidentit George W. Bush. Para kësaj ka qenë komentator në shtyp dhe televizion si dhe themelues i një firme për marrëdhënie me publikun.

Ai nuk ka përvojë të drejtpërdrejtë në komunitetin e inteligjencës, por shihet si mbështetës i besnik i presidentit Trump dhe politikave të tij.

Grenell ka folur sidomos hapur në lidhje me ato që ai i quan rreziqe që paraqet biznesi me gjigantin kinez të telekomunikimit Huawei. Ai i ka bërë thirrje Gjermanisë të mos bëhet kliente e Huawei-t për shkak të dyshimeve se kompania instalon në produktet e saj pajisje përgjimi me kërkesë të Pekinit.

Grenell do të jetë anëtari i parë gay i kabinetit në historinë e SHBA.

Ai do të zëvendësojë shefin e tanishëm në detyrë të Zbulimit kombëtar Joseph Macguire i cili pasoi drejtorin e mëparshëm Dan Coats që u shkarkua korrikun e kaluar nga Presidenti.

Presidenti Trump ka pasur një marrëdhënie të tensionuar me komunitetin e tij të inteligjencës pasi ky arriti në përfundimin se Rusia kishte ndërhyrë në zgjedhjet presidenciale të 2016-s dhe paralajmëroi në lidhje me kërcënimin që përbën ngrohja globale për sigurinë kombëtare.

voa

Qindra pasagjerë kanë nisur të dalin nga një anije e cila u vendos dy javë në karantinë në një port japonez, në një përpjekje për të frenuar përhapjen e koronavirusit të ri që u ka marrë jetën mbi 2 mijë vetëve në Kinë.

Rreth 500 pasagjerë pritet të zbresin nga “Diamond Princess” të mërkurën në Yokohama, atje ku anija ishte ankoruar prej mbërritjes së saj më 3 shkurt. Zyrtarët japonezë të shëndetësisë i futën të 3,700 pasagjerët dhe ekuipazhin e anijes në karantinë, pasi një prej pasagjerëve që kishte zbarkuar në Hong Kong u diagnostikua se ishte prekur nga COVID-19. Por kjo nuk e ndali përhapjen e virusit pasi 542 pasagjerë rezultuan të infektuar, çka e bën atë grupin më të madh të të prekurve të konfirmuar jashtë territorit kinez.

Pekini njoftoi të mërkurën se numri i vdekjeve si pasojë e COVID-19 ka mbërritur në 2,004 vetë. Shumica e vdekjeve janë raportuar në provincën Hubei.

Gjashtë persona jashtë territorit kinez kanë humbur jetën si pasojë e virusit, rasti më i fundit një burrë 70-vjeçar në Hong Kong, që përbën dhe rastin e dytë të vdekjes për këtë territor. Komisioni kinez për Shëndetin raportoi të mërkurën 1,749 raste personash të prekur nga virusi, numri më i ulët deri më tani për muajin shkurt, duke e çuar numrin e përgjithshëm të rasteve të konfirmuara në Kinë në 74,000 të infektuar.

voa

Gjermania ka nevojë për fuqi të huaj punëtore, ndaj qeveria po përshpejton procesin e ardhjes së ekspertëve të huaj. Në Bonn është hapur një shërbim i ri që do të koordinojë procesin e njohjes së diplomave.

Ekonomia gjermane varet nga fuqia e jashtme punëtore. Qeveria federale për këtë shkak ka nisur një program për sjelljen e fuqisë së huaj punëtore dhe ekspertëve nga vendet tjera në Gjermani, nën moton – „Make it in Germany“. Ky është prioriteti nacional. “Pa ekspertë të huaj nuk mund ta mbajmë mirëqenien e tanishme. Nuk është e mundur që të presin tepër gjatë këta njerëz, duhet të punojmë për mundësinë e ardhjes së tyre“, deklaroi ministri i Punës Hubertus Heil.

Enti gjerman për statistika pohon se numri i shtetasve të gatshëm për punë në Gjermani do të zvogëlohet deri në vitin 2035 për katër deri në gjashtë milionë punëtorë. Në shumë fusha ekonomike ka mungesë të fuqisë punëtore. Sipas të dhënave të Odës gjermane për Industri dhe Tregti (DIHK), madje 56 përqind të sipërmarrjeve mendojnë se mungesa e fuqisë punëtore është për momentin problemi më i madh i tyre.

Çdo e treta sipërmarrje gjermane në vitet e kaluara ka angazhuar fuqi punëtore nga vendet e tjera të Bashkimit Evropian, respektivisht nga vendet e treta. Shumë sipërmarrje gjermane për shkak të mungesës së fuqisë punëtore nuk mund të pranojnë kërkesa të reja dhe janë duke përjetur dëme të mëdha financiare.

Vendi i migrantëve

Qeveria federale i ka kuptuar më në fund kërkesat e sipërmarrjeve dhe kohët e fundit është duke punuar intensivisht për krijimin e kushteve për ardhjen e fuqisë punëtore nga vendet e tjera. Pas një debati të gjerë është miratuar ligji për ardhjen e fuqisë punëtore dhe në këtë mënyrë qeveria ka pranuar se Gjermania është një vend i migrantëve – dhe ate gjashtë dekada pas valës së parë të ardhjes në këtë vend të gastarbeiterëve.

Qëllimi kryesor i këtij ligji është që të lehtësojë ardhjen e punëtorëve të huaj në tregun gjerman të punës – në të gjitha fushat ekonomike. „Në parim është tërësisht e njëjtë se kush nga cili vend vjen, më e rëndësishmja është që të dëshmojë se është i gatshëm të integrohet në këtë vend, e që do të bashkëpunojë dhe të jetë pjesë e kësaj shoqërie. Nuk është me rëndësi prejardhja e personit por vetëm dëshira për t’u integruar në shoqëri“, deklaroi ministrja federale për Arsim Anja Karliczek, në një deklaratë për Deutsche Wellen.

Të hënën e kaluar ajo së bashku me kolegun e saj, ministrin për Punë Hubertus Heil, ka hapur në Bon të Gjermanisë një Qendër për njohjen e kualifikimeve (ZSBA), të arritura në vendet e tjera. Shtypi gjerman njofton se në këtë vend do të koordinohen rreth 1400 shërbime të ndryshme, të cilat do të merren me njohjen e diplomave.

Procesi i njohjes së diplomave ka qenë deri tani tepër i komplikuar dhe ka zgjatur tepër kohë, shumë më gjatë se në vendet skandinave, SHBA apo Kanada dhe shumë vende të tjera. Gjermania nuk mund t’i lejojë vetes që këto procedura të vazhdojnë dhe që në këtë mënyrë të humbë ekspertët që do të vinin këtu. Ky shërbim ka filluar punën këtë muaj me shpresë se këto procedura do të korrigjohen.

Procedura më e thjeshtë dhe e shpejtë

Gjatë një vizite në këtë Qendër, Karliczek dhe Heil kanë demonstruar se si do të duhej të dukej kjo në jetën e përditshme. Personat që janë të interesuar për punë në Gjermani duhet fillimisht të kontaktojnë Qendrën ZSBA, e cila do t’ju ndihmojë në përgatitjen e dokumentacionit të plotë që nevojitet për njohjen e kualifikimeve. Zyra mund të këshillojë në forma të ndryshme: përmes chat, me postë elektronike apo dhe me telefon. Kërkesat e personave do të shpërndahen dhe dërgohen tek institucionet e duhura në nivelin e landeve.

Por ajo që në njërën anë ndihmon Gjermaninë (me rregullat e reja për ardhje në këtë vend), në anën tjetër krijon probleme të mëdha – nga juglindja e Evropës nuk po largohen vetëm kuadrot më të kualifikuara me diploma universitare, por edhe forca sanitare, automekanikë dhe punëtorë të tjerë. Nga Kroacia, Serbia dhe Bosnje-Hercegovina largohen për në Gjermani rreth 100.000 persona.

A është qeveria gjermane e vetëdijshme se çfarë do të thotë kjo për tregun e punës në këto vende? Përgjigja e Heil ishte: “Ne kemi bërë disa marrëveshje bilaterale, për shembull që të mos tërheqim sanitarët nga vendet që kanë nevojë për këtë fuqi punëtore. Megjithatë mendoj se duhet të respektohet liria e lëvizjes dhe nga organizimi i mirë mund të përfitojnë të gjitha palët. Kjo në fund forcon edhe raportet mes vendeve tona.“

Mirë për Gjermaninë, keq për Ballkanin?

Më 1 mars të këtij viti në Gjermani futet në fuqi ligji i ri për ardhjen e fuqisë punëtore. Me këtë ligj duhet të lehtësohet ardhja e fuqisë punëtore, por edhe kërkimi i fuqisë së nevojshme për punë nga vendet që nuk janë anëtare të BE. Në të ardhmen nuk do të vlejnë më rregullat sipas së cilave përparësi u jepet personave nga vendet anëtare të BE. Një nga rajonet e synuara nga punëdhënësit gjermanë është Ballkani Perëndimor. Punëtorët nga këto rajone kanë një reputacion të mirë: „Në të kaluarën kemi pasur shumë kërkesa nga Ballkani Perëndimor, që është një prej rajoneve shumë të rëndësishme për ne. Atje kemi gjetur dhe gjejmë fuqi shumë të mirë, të kualifikuar dhe ekspertë, e atje kemi edhe shumë njerëz që zotërojnë gjuhën gjermane, që është një prej përparësive të mëdha për integrim të shpejtë në punë dhe shoqëri“, thotë për DW Torsten Rolfsmeier nga Enti federal për punësim.

Motivi për shkuarje në Gjermani nuk janë vetëm rrogat më të mira, por edhe korrupsioni, mungesa e perspektivës dhe mungesa e sundimit të ligjit në vendet prej nga vijnë ata. OSBE pohon se vetëm nga Serbia në periudhën prej vitit 2000 –  2015 janë larguar 650.000 persona – gati një e dhjeta e banorëve. Situata të ngjashme kemi edhe në vendet tjera të Ballkanit Perëndimor.

Ndër ta janë shumë të rinj, me kualifikime të larta, pas të cilëve mbetet një boshllëk i madh në tregun e punës në këto vende dhe forcohet problemi i lëvizjeve demografike. Nga ana tjetër këta persona dërgojnë remitenca në vendin e origjinës dhe kështu ndihmojnë në ruajtjen e qetësisë sociale në këto vende.

dw

Richard Grenell, ambasadori amerikan në Berlin merr së shpejti një post të rëndësishëm në Uashington. Grenell është po ashtu i ngarkuar i posaçëm i SHBA për dialogun Kosovë-Serbi.

Presidenti amerikan, Donald Trumpi vlerëson besnikërinë. Nga kjo përfiton edhe Richard Grenell, ambasadori amerikan në Berlin, përkrahës i flaktë i presidentit amerikan. Ambasadori amerikan në Berlin, Richard Grenell do të jetë koordinatori i ri drejtues i shërbimit sekret në Shtëpinë e Bardhë- Këtë e bëri të ditur presidenti amerikan në twitter. “Rick e ka prezantuar vendin tonë shumë mirë dhe gëzohem që do të jetë punoj me të.”

Grenell zëvendëson në këtë post, Joseph Meguire. Grenell, anëtar i partisë republikane konsiderohet edhe mbështetës pa rezerva i presidentit Trump, dhe gjithmonë e përmend lidhjen e mirë që ka në Shtëpinë e Bardhë. Gjatë kohës si ambasador në Gjermani, Grenell zuri kryetitujt e gazetave gjermane me deklarata polarizuese dhe kritikë të ashpër për politikën gjermane, gjë që është e pazakontë për një diplomat.Drejtori i shërbimeve sekrete, DNI, të cilën do ta marrë Grenell ka si detyrë të koordinojë punën e shërbimeve sekrete.

Vitin e kaluar, Grenell u emërua nga presidenti Trump si i dërguar i posaçëm i SHBA për dialogun Kosovë-Serbi. Së fundmi në kuadër të Konferencës së Sigurisë në Mynih (14-16.02)me ndërmjetësimin e ambasadorit amerikan, Richard Grenell u nënshkrua të premten marrëveshja për hekurudhën dhe autostradën Serbi-Kosovë në prani të presidentit të Kosovës, Hashim Thaçi, atij serb, Aleksandar Vuçiq.

la/ml/mak (dpa, rtr)