Izraeli intensifikoi sulmet ajrore në Rripin e Gazës dhe e izoloi atë, duke ndërprerë furnizimet me ushqim, karburant dhe gjëra të tjera të hënën në shenjë hakmarrjeje për sulmin e përgjakshëm të militantëve të Hamasit.

Numri i të vdekurve nga të dyja palët u rrit në afro 1600. Hamasi gjithashtu përshkallëzoi konfliktin, duke u zotuar të vriste izraelitët e kapur nëse ushtria izraelite sulmon civilët pa paralajmërim.

Në ditën e tretë të luftës, Izraeli vazhdoi të gjente trupa të viktimave të sulmit të befasishëm të Hamasit në fundjavë në qytetet jugore të Izraelit. Ekipet e kërkim-shpëtimit gjetën 100 trupa në komunitetin e vogël rural të Beerit, rreth 10% e popullsisë së tij, pas një përleshjeje të gjatë të tyre me militantët e Hamasit. Në Gaza, dhjetëra mijëra njerëz u larguan nga shtëpitë e tyre pasi sulmet ajrore shkatërruan ndërtesat.

Ushtria izraelite tha se riktheu kontrollin në jug të vendit, pasi sulmi i Hamasit e gjeti aparatin e saj të njohur ushtarak dhe të inteligjencës pothuaj plotësisht të papërgatitur dhe çoi në beteja të ashpra në rrugët e qyteteve për herë të parë në dekada. Hamasi dhe militantë të tjerë në Gaza thonë se po mbajnë peng më shumë se 130 ushtarë dhe civilë të rrëmbyer brenda Izraelit.

Tanket dhe dronët izraelitë u dislokuan për të mbrojtur çarjet në gardhin kufitar të Gazës për të parandaluar inkursione të reja. Mijëra izraelitë u evakuuan nga një numër qytetesh afër Gazës dhe ushtria mobilizoi 300 mijë rezervistë.

Këto lëvizje, së bashku me shpalljen zyrtare të gjendjes së luftës nga Izraeli të dielën, tregojnë se Izraeli po kalon në një ofensivë të madhe kundër Hamasit, duke kërcënuar me shkatërrim më të madh në Rripin e Gazës, një rajon me popullsi të dendur dhe të varfër.

“Ne sapo kemi filluar të godasim Hamasin”, tha kryeministri izraelit Benjamin Netanyahu në një fjalim televiziv kombëtar. “Ajo që ne do t’u bëjmë armiqve tanë në ditët në vijim do të bëjë jehonë tek ata për breza të tërë.”

Rreth 900 njerëz, përfshirë 73 ushtarë, janë vrarë tashmë në Izrael, sipas mediave. Në Gaza, më shumë se 680 njerëz kanë humbur jetën, sipas autoriteteve atje; Izraeli thotë se qindra luftëtarë të Hamasit janë mes tyre. Mijëra njerëz të tjerë janë plagosur nga të dyja anët.

voa

Presidenti ukrainas Volodymyr Zelenskyy të hënën tërhoqi paralele midis sulmeve të Hamasit ndaj izraelitëve dhe sulmeve ruse ndaj ukrainasve, duke i quajtur ato “po aq të liga”. “Dhe vetë izraelitët, gazetarët izraelitë që ishin me ne, në Ukrainë, që ishin në Buça, tani thonë se panë të njëjtën të keqe që erdhi nga Rusia. E njëjta e keqe. Ekziston vetëm një ndryshim. Izraelin e goditi një organizatë terroriste, ndërsa Ukraina u godit nga një shtet terrorist”, u tha Presidenti Zelenskyy pjesëmarrësve në një takim të NATO-s, në të cilin ai mori pjesë përmes një video lidhje.
“Qëllimet e deklaruara janë të ndryshme, por thelbi është i njëjtë. Mund shihni gjak në rrugë, makina të dëmtuara të civilëve, trupa të njerëzve të torturuar”, tha udhëheqësi ukrainas.

Fushata e dezinformimit

Shërbimi ukrainas i zbulimit akuzoi të hënën shërbimet ruse të zbulimet për kryerjen e një fushate diskreditimi ndaj Kievit.

“Shteti agresor i Rusisë po përdor sulmin terrorist të Hamasit ndaj shtetit të Izraelit për një provokim në shkallë të gjerë kundër Ukrainës. Shërbimi i zbulimit i Ministrisë ukrainase të Mbrotjtjes raporton se shërbimi ushtarak rus i zbulimit tashmë ka transferuar armë të prodhuara në SHBA dhe vendet e BE-së, të kapura në Ukrainë, tek terroristët e Hamasit”, thuhet në një deklaratë, të publikuar në faqen e shërbimit ukrainas të zbulimit në Facebook.

Rusia nuk ka sinjalizuar se po mbështet një palë të caktuar në konflikt dhe u ka bërë thirrje të gjitha palëve që të heqin dorë nga dhuna dhe të negociojnë. Por udhëheqësit e Hamasit thuhet se kanë udhëtuar në Moskë disa herë në vitet e fundit dhe Moska dhe Teherani janë aleatë të tyre strategjikë.

Në një intervistë me shërbimin ukrainas të Zërit të Amerikës, përfaqësuesi i shërbimit ukrainas të zbulimit tha se ata kishin informacion se agjentët rusë kanë marrë pajisje të kapur në Ukrainë dhe kanë filluar t’ua dorëzojnë ato përfaqësuesve të Hamasit, për të krijuar përshtypjen se zyrtarët ukrainas u kanë shitur atyre armët.

“Ne kemi informacione se disa nga armët e kapura në Ukrainë tashmë Rusia i ka transferuar tek terroristët e Hamasit, në kuadër të një operacioni për ta akuzuar më vonë Ukrainën për këtë.”

Zoti Yusov paralajmëroi se do të ketë më shumë akuza të rreme se militantët e Hamasit dyshohet se po luftojnë ushtrinë izraelite me armë nga Ukraina.

Rusia shpreson që sulmet e Hamasit në Izrael do largojnë vëmendjen nga lufta në Ukrainë

Instituti Amerikan për Studimin e Luftës shkroi në një raport më 7 tetor se Kremlini po përdor, dhe ka të ngjarë të vazhdojë të përdorë, sulmet e Hamasit në Izrael për të nxitur fushata informacioni që synojnë dobësimin e mbështetjes së Shteteve të Bashkuara dhe Perëndimit për Ukrainën.
“Kremlini ka intensifikuar disa operacione informacioni që nga sulmet e Hamasit në Izrael më 7 tetor, shpesh duke akuzuar Perëndimin për neglizhencë ndaj konflikteve në Lindjen e Mesme dhe favorizim të mbështetjes së Ukrainës. Kremlini shpreson se komuniteti ndërkombëtar do të heqë vëmendjen nga Ukraina për t’u përqendruar në Lindjen e Mesme”, thonë analistët e ISW.

Raporti citon një propagandues rus të ketë thënë se Rusia do të përfitonte nga përshkallëzimi i konfliktit mes Izraelit dhe palestinezëve sepse kjo “do ta largonte përkohësisht vëmendjen nga Ukraina, duke e kthyer atë tek konflikti i përjetshëm në Lindjen e Mesme”.

voa

Palestinezët në Gaza, nuk janë asnjëherë shumë larg syve të Izraelit.
Dronë mbikqyrës ngrihen vazhdimisht në qiell. Kufiri, i sigurisë së lartë, ështe i mbushur me kamera dhe roje sigurie.

Agjencitë e shërbimeve të zbulimit mbështeten tek burimet dhe aftësitë teknologjike në gjetjen e një sërë informacionesh.

Por duket se Izraeli “i kishte sytë mbyllur” gjatë sulmit të befasishëm të grupit militant Hamas, që rrëzoi barrierat kufitare të Izraelit dhe dërgoi atje qindra militantë për të kryer sulmet që lanë të vrarë qindra njerëz dhe e çuan rajonin drejt konfliktit.

Për dekada me radhë, për shkak të arritjeve të forta, shërbimet inteligjente izraelite kanë fituar lavdinë e të qenit të pamposhtur.

Izraeli ka parandaluar komplote të thurura në Bregun Perëndimor, pretendohet se ka kapur militantë të Hamasit në Dubai dhe është akuzuar për vrasjen e shkencëtarëve bërthamorë iranianë, pikërisht në zemër të Iranit. Edhe kur përpjekjet e tyre kanë qenë të pasuksesshme, agjenci si Mossad, Shin Bet dhe shërbimet zbuluese ushtarake kanë arritur të ruajnë këtë “lavdi mistike”.

Por sulmi i fundjavës, gjatë një festë të madhe hebraike, që e zuri në befasi Izraelin, i vë në dyshim këto aftësi dhe ngre pikëpyetje rreth gatishmërisë së vendit përballë një armiku më të dobët, por të vendosur. Mbi 48 orë më vonë, militantët e Hamasit vazhduan të luftonin forcat izraelite brenda territorit izraelit dhe dhjetëra izraelitë ishin zënë robër nga Hamasi në Gaza.

Është një dështim i madh,” thotë Yaakov Amidror, ish-këshilltar i sigurisë kombëtare i kryeministrit Benjamin Netanyahu. “Ky operacion vërtet dëshmon se aftësitë e shërbimeve zbuluese në Gaza nuk ishin të mira”.

Zoti Amidror nuk pranoi të ofronte një shpjegim mbi dështimin, tha se mësimet duhet të nxirren pasi situata të qetësohet.

Kundër Admiral Daniel Hagari, zëdhënësi kryesor i ushtrisë, pranoi se ushtria duhet t’i japë popullit një shpjegim. Por ai tha se koha për këtë nuk është tani. “Së pari, luftojmë, pastaj hetojmë”, tha ai.

Disa thonë se është shumë herët që përgjegjësia të bjerë vetëm mbi shërbimet e zbulimit. Ata vënë në dukje se për shkak të një vale dhune në Bregun Perëndimor, disa burime ushtarake u zhvendosën atje, ndërsa përmendin edhe kaosin politik që shoqëron Izraelin, lidhur me hapat e qeverisë së ekstremit të djathtë të kryeministrit Netanyahu për ndryshime në sistemin e drejtësisë.

Plani i diskutueshëm ka kërcënuar forcën bashkuese të ushtrisë së fuqishme të vendit.

Por, mungesa e të dhënave mbi planin e Hamasit pritet të paraqesë vetëm një nga shkaqet që çuan në sulmin më vdekjeprurës ndaj Izraelit, për dekada të tëra.

Izraeli tërhoqi trupa dhe banorë nga vendstrehimet në Gaza në 2005. Por edhe pasi Hamasi pushtoi Gazën në vitin 2007, Izraeli dukej se ruante avantazhin e tij, duke përdorur burimet njerëzore dhe ato teknologjike.

Izraeli pretendonte se dinte vendndodhjet e sakta të udhëheqjes së Hamasit dhe dukej se e vërtetonte këtë nëpërmjet vrasjes së drejtuesve militantë në sulmet ushtarake, ndonjëherë ndërsa ata ishin në gjumë.

Izraeli ka ditur të godasë tunelet nëntokësore të përdorura nga Hamasi për lëvizjen e luftëtarëve dhe kalimin e armëve, duke shkatërruar kilometra të tëra kalimesh të fshehta.

Pavarësisht këtyre aftësive, Hamasi ishte në gjendje ta mbante planin e tij të fshehtë. Sulmi i egër, i cili ka të ngjarë të ketë marrë muaj të tërë planifikimi dhe stërvitjeje të përpiktë dhe që përfshinte edhe bashkërendimin midis grupeve të shumta militante, dukej se nuk u kap nga aparatet e shërbimeve izraelite të zbulimit.

Amir Avivi, një gjeneral izraelit në pension, tha se në mungesë të bazave brenda

Gazës, shërbimet e sigurisë izraelite kanë filluar të mbështeten gjithnjë e më shumë tek mjetet teknologjike për të siguruar informacion. Sipas tij militantët në Gaza kanë gjetur mënyra për t’iu shmangur teknikave teknologjike, duke i dhënë Izraelit një pamje jo të plotë të qëllimeve të tyre.

“Pala tjetër mësoi se si të përballej me aftësitë tona mbizotëruese teknologjike dhe ndaloi përdorimin e teknologjisë që mund ta ekspozonte”, tha zoti Avivi. Ai është president dhe themelues i Forumit të Mbrojtjes dhe Sigurisë së Izraelit, një grup ish-komandantësh ushtarakë.

“Ata janë kthyer në Epokën e Gurit,” tha ai, duke shpjeguar se militantët nuk po përdornin telefona apo kompjutera dhe po thurnin planin në dhoma veçanërisht të mbrojtura nga mbikëqyrja teknologjike ose duke vepruar nën tokë .

Institucionet izraelite të sigurisë, e kanë parë vitet e fundit Hamasin si një palë shumë të interesuar për qeverisje, që kërkon të zhvillojë ekonominë e Gazës dhe të përmirësojë standardin e jetesës së 2.3 milionë banorëve të Gazës.

Zoti Avivi dhe të tjerët thonë se e vërteta është se Hamasi, i cili bën thirrje për shkatërrimin e Izraelit, e sheh akoma këtë synim, si përparësi.

Në vitet e fundit, Izraeli ka lejuar afro 18,000 punëtorë palestinezë nga Gaza të punojnë në Izrael, ku mund të fitojnë një pagë rreth 10 herë më të lartë se në rajonin e varfër.

Institucionet e sigurisë e shihnin këtë si një mënyrë për të ruajtur qetësinë relative.

“Praktikisht, qindra, për mos thënë mijëra burra të Hamasit janë përgatitur për muaj të tërë për këtë sulm të befasishëm, pa u zbuluar”, shkroi Amos Harel, një analist mbi çështjet e mbrojtjes, në gazetën e përditshme izraelite “Haaretz”. “Rezultatet janë katastrofike”.

Aleatët që ndajnë të dhëna me Izraelin thanë se agjencitë e sigurisë kishin gabuar në leximin e situatës.

Një zyrtar i shërbimeve egjiptiane të zbulimit tha se Egjipti, vend që shërben shpesh si ndërmjetës mes Izraelit dhe Hamasit, kishte folur vazhdimisht me izraelitët për “diçka të madhe”, por pa dhënë më shumë detaje.

Ai tha se zyrtarët izraelitë u përqëndruan në Bregun Perëndimor dhe nënvlerësuan rrezikun që paraqiste Gaza.

“Ne i patëm paralajmëruar se situata mund të shpërthente së shpejti dhe do të ishte një shpërthim i madh. Por ata i nënvlerësuan paralajmërimet tona”, tha zyrtari, i cili foli në kushte anonimiteti për agjencinë e lajmeve “Associated Press” pasi nuk ishte i autorizuar të fliste për mediat mbi përmbajtjen e ndjeshme të të dhënave të shërbimeve inteligjente.

Izraeli është përqëndruar tek plani i kryeministrit Nentanyahu për reformim të gjyqësorit, plan që ka shkaktuar përçarje në vend.

Zoti Netanjahu është paralajmëruar në mënyrë të vazhdueshme nga shefat e mbrojtjes dhe një sërë ish drejtuesish të agjencive të shërbimeve të zbulimit, që ky plan, po dëmtonte forcën bashkuese të shërbimeve sekrete të vendit.

Martin Indyk, i cili ka shërbyer si i dërguar i posaçëm në bisedimet mes izraelitëve dhe palestinezëve gjatë administratës së Presidentit Obama, tha se ndarjet e brendshme lidhur me ndryshimet ligjore ishin një faktor që ndikuan në kapjen në befasi të Izraelit.

voa

Autoriteti francez për kontrollin e niveleve të rrezatimit, ka ndaluar shitjet e telefonit iPhone 12 të kompanisë Apple, pas testeve që sipas saj tregojnë se i kishte shkelur kufijtë e lejuar në Evropë të ekspozimit ndaj rrezatimit.
Agjencia Kombëtare e Frekuencave (ANFR) tha të martën se shkalla e rrezatimit nga ky model, ishte më e lartë nga sa përcakton ligji.

Jean-Noel Barrot, ministri francez për ekonominë dixhitale, i tha gazetës Le Parisien se një përmirësim i softuerit mund ta zgjidhë problemin. Nëse Apple nuk e zgjidh problemin, ANFR tha se do të urdhëronte një tërheqje të të gjithë telefonave të këtij modeli nga e gjithë Franca.

Firma Apple i kundërshton përfundimet e ANFR-së, duke thënë se shumë organe ndërkombëtare kanë përcaktuar se iPhone 12 është në përputhje me standardet globale të rrezatimit.

ÇFARË DO TË THOTË TEJKALIMI I KUFIJVE TË RREZATIMIT

Niveli standard i thithjes së rrezatimit shprehet në vat për kilogram të peshës trupore. Rrezatimi nga telefonat celularë shkaktohet nga fusha elektromagnetike pranë aparatit që krijohet nga radiofrekuencat përmes të cilave transmetohet sinjalin.

Ndryshe nga ekspozimi ndaj rrezeve X, ose gama – që shkaktojnë mbetjet radioaktive – rrezatimi i lëshuar nga telefonat celularë nuk arrin të shpërbëjë lidhjet kimike ose të ndryshojë qelizat e trupit të njeriut.

ÇFARË KA IDENTIFIKUAR ANFR?

ANFR tha se kohët e fundit ka kryer testimet e 141 telefonave, përfshirë disa të modelit iPhone 12, të blerë në dyqane. Në provat e pavarura laboratorike, dy pajisje iPhone 12 nuk ishin në përputhje me standardet e BE-së, tha zyra e Ministrit Dixhital për agjencinë Reuters.

Si rezultat i kontrollit të nivelit të rrezatimit të telefonave inteligjentë, janë bërë deri tani 42 ndalime të shitjeve në vend, tha ministri.

SA E LARTË ËSHTË RREZIKSHMËRIA?

Problemi kryesor i shkaktuar nga rrezatimi pa jonizim nga telefoni, është ngrohja e indeve të trupit. Kur rrezatimi e tejkalon nivelin e përcaktuar dhe në varësi të kohëzgjatjes së ekspozimit, kjo mund të shkaktojë efekte si djegie, ose trullosje nga nxehtësia, sipas Komisionit Ndërkombëtar për Mbrojtjen nga Rrezatimi Jo-jonizues (ICNIRP), një organ që përcakton nivelet në shkallë globale.

ANFR tha se laboratorët kishin gjetur një nivel rrezatimi prej 5.74 vat për kilogram gjatë testeve të iPhone 12-ës në duart ose xhepat e përdoruesve.

Standardi i BE-së është 4.0 vat për kilogram. Megjithatë, kjo nuk paraqet asnjë rrezik për shëndetin e njeriut, tha kryetari i ICNIRP-it, Profesor Rodney Croft.

OBSH-ja dhe organe të tjera ndërkombëtare të shëndetësisë thonë se nuk ka prova përfundimtare sipas së cilave rrezatimi nga telefonat celularë shkakton efekte të tjera negative shëndetësore. Megjithatë, ajo ka bërë thirrje për kërkime të mëtejshme.

Në vitin 2011, Agjencia Ndërkombëtare për Kërkime mbi Kancerin (IARC) e klasifikoi rrezatimin nga telefonat celularë si “ndoshta kancerogjen”, ose të kategorisë 2B. Ky emërtim përdoret kur agjencia nuk mund të përjashtojë një lidhje të mundshme.

Agjencia tha se kishte prova “të kufizuara” të një rreziku në rritje për tumore në tru tek disa, por jo të gjithë përdoruesit, veçanërisht tek ata që e përdorin shumë telefonin, por shtoi se nuk mund të përjashtonte gabime tek të dhënat, çka do të thotë nuk mund të jepet një përgjigje përfundimtare.

SI KA REAGUAR APPLE?

ANFR ka thënë se një përmirësim i softuerit duhet të jetë i mjaftueshëm për të zgjidhur problemin. Me fjalë të thjeshta, kjo ndodh sepse softueri – aplikacionet, programet dhe informacione të tjera operative në një pajisje – ndikojnë tek mënyra se si funksionon telefoni.

Pra, një përditësim i softuerit duhet të jetë i mjaftueshëm për të reduktuar ekspozimin e përdoruesve të iPhone 12.

Megjithatë, Apple i ka hedhur poshtë përfundimet e agjencisë. Kompania tha se i kishte ofruar ANFR-së rezultate të shumta të laboratorit të saj dhe të palëve të treta të pavarura, që vërtetojnë se niveli i rrezatimit është në përputhje me të gjitha rregulloret dhe standardet botërore. Apple tha se do t’i kundërshtojë rezultatet e ANFR-së dhe do të vazhdojë të angazhohet me agjencinë për të treguar se është në përputhje me normat.

A DO TË KETË NDALIME TË TJERA?

ANFR tha se iPhone 12 nuk i përmbush standardet e Bashkimit Evropian, duke ngritur pikëpyetje nëse do të ndërmerren edhe ndalime të tjera të shitjeve të këtij modeli. ANFR do t’ua përcjellë gjetjet e saj rregullatorëve në shtetet e tjera anëtare të BE-së.

Ndërsa mbetet e paqartë nëse po bëhen hetime nga autoritete të tjera, Zyra Federale e Gjermanisë për Mbrojtjen nga Rrezatimi tha të mërkurën se “çështja e nevojës për ndryshim është aktualisht objekt diskutimi”.

Dhe një e përditshme holandeze njofton se autoriteti përkatës i këtij vendi për nivelet e rrezatimit po analizon raportin e ANFR-së dhe do t’i kërkojë shpjegime kompanisë Apple.

voa