Presidenti amerikan Barack Obama synon që me një njësi speciale të eleminojë krerët e “Shtetit Islamik”. Por strategjia e tij është kritikuar shumë, shkruajnë mediat amerikane dhe gjermane.

Në Uashington do të mblidhen këtë të enjte presidentët dhe kryeministrat e 51 vendeve të ndryshme, në “Nuclear Security Summit”. Zyrtarisht thuhet se tema kryesore është parandalimi i përhapjes së armëve bërthamore në botë. Por tema dominuese me siguri që do të jetë luftimi i të ashtuquajturit “Shteti Islamik”.

Në SHBA po vazhdon fushata parazgjedhore për kandidatët e republikanëve dhe demokratëve për president të ardhshëm amerikan. Zgjedhjet do të mbahen nga fundi i vitit, por presidenti Barack Obama do të dëshironte që deri në fund të mandatit të tij, të shkatërrojë pjesën më të madhe të “Shteti Islamik”. Ndaj është e sigurt që pas sulmeve të fundit në Bruskel, kjo konferencë do të shfrytëzohet për dërgimin e një sinjali të fuqishëm për unitet në luftën kundër terrorizmit dhe terroristëve.

Sulmet po vazhdojnë prej javësh

Prej javësh po vazhdojnë sulmet amerikane kundër IS në Siri dhe Irak, bën të ditur revista “Spiegel” duke shtuar se “krahas sulmeve ajrore dhe ndihmës së trupave irakiane dhe kurde në tokë, një rol të madh po edhe angazhimi i njësive speciale”. Ushtarët elitë të Ushtrisë Amerikane angazhohen në të ashtuquajturat misione “Kill-or-Capture”, që do të thotë se obligimi i tyre është që të kapin apo të vrasin kuadrot e IS, me qëllim asgjësimin apo të paktën dobësimin e rrjetit terrorist. Në fillim të marsit, gazeta “Neë York Times” ka njoftuar për arrestimin e personave të rëndësishëm të IS në Erbil të Irakut. Gazeta shkruan se qëllimi i dërgimit të ushtarëve të njësisë speciale Delta Force është të dobësojë udhëheqësinë e IS. Ndërsa këto ditë është konfirmuar edhe vrasja e një prej krerëve të IS.

200 ushtarakë elitë kundër udhëheqësve të IS

Shtëpia e Bardhë dhe Pentagoni i kanë hedhur poshtë informacionet për angazhimin e njësive speciale. Por njëkohësisht janë theksuar sukseset e tyre, për shkak të kritikave të shtuara ndaj presidentit Obama dhe strategjisë së qeverisë së tij në luftën kundër IS. Ministri i Mbrojtjes Ashton Carter ka bërë të ditur së fundi se njësitë speciale do të “eliminojnë krerët e Kabinetit të IS” një nga një. Ndërsa më i kërkuari në këtë listë është Abu Bakr al-Baghdadi. Së fundi është vrarë i ashtuquajturi “ministër i Financave” i IS, Abdul al-Kaduli. Qëllimi fillestar ka qenë që Kaduli të arrestohet. Rrjeti CNN njofton se pasë identifikimit të Kadulit dhe njëjsisë së tij në territoret e IS, kanë filluar aksionet për arrestimin. Por gjatë aksionit ai dhe luftëtarët e tij janë vrarë. Ndërkohë njoftohet se njësitë amerikane kanë kapur shumë pjesëtarë të tjerë të IS.

Mediat njoftojnë se njësia speciale numëron rreth 200 ushtarakë elitë dhe ata vijnë kryesisht nga Delta Force, një njësi komando, e cila prej 30 vjetësh me radhë angazhohet në aksionet kundër terrorizmit. Presidenti Obama dhe këshilltarët e tij janë të bindur në sukseset e njësisë, por mendojnë se aksionet duhet të jenë të kujdesshme. “Ne nuk mund të sulmojmë objektiva pa qenë të sigurt se kush është në shënjestër”, tha ai.

Kritikat ndaj strategjisë së Obamës

Kritikët e Obamës mendojnë se kombinimi i njësive speciale dhe sulmeve ajrore nuk mjafton për eliminimin e “Shtetit Islamik” Gati të gjithë kandidatët e rebublikanëve në fushatën parazgjedhore kanë paralajmëruar se aksione shumë më të ashpra kundër IS. Disa prej tyre flasin madje për dërgimin e dhjetëra mijëra ushtarëve në luftë kundër IS. Republikanët John McCain dhe Lindsey Graham kanë kërkuar dërgimin e trupave tokësore amerikane, të cilët duhet të luftojnë së bashku me peshmergët dhe irakianët. SHBA ka aktualisht rreth 3000 ushtarë në Irak, por ata kryesisht kryejnë punën e këshilltarëve dhe koordinatorëve. Obama deri tani i mbetet besnik strategjisë së tij. Mendohet se këtë strategji do ta mbrojë edhe në samitin e ardhshëm. (dw)

Presidenti Erdogan e bën veten qesharak, kur thërret ambasadorin e Gjermanisë për shkak të një videoje satirike. Diplomacia gjermane përpiqet ta ruajë atë sa më shumë nga turpërimi, mendon Matthias Bölinger.

Shefi i Shtatmadhorisë amerikane, gjeneral Joe Dunford tha se ai nuk ka “asnjë dyshim” që ndërhyrja ruse në Siri e mbajti në këmbë qeverinë e presidentit sirian Bashar al-Asad.

“Në lidhje me aktivitetin e Rusisë në Siri, – tha gjenerali, – nuk ka absolutisht asnjë dyshim se ata e stabilizuan regjimin, dhe e kanë vënë veten në një pozitë të tillë që mund të ndikojnë mbi zgjidhjen politike në vend.”

Ai i bëri komentet në Qendrën për Studime Strategjike dhe Ndërkombëtare në Uashington.

Gjenerali Dunford tha se qeveria siriane ishte në pozitë tepër të vështirë në korrik dhe gusht të vitit të kaluar, por tani është në “gjendje shumë më të mirë.” Tërheqja e Rusisë nga Siria “hedh pikëpyetje” rreth qëllimit të saj të vërtetë të hyrjes në konfliktin në Sirian, tha gjenerali.

“Qëllimi i deklaruar ishte për të goditur ISIS-in,” tha ai. “Ata kanë shpallur tashmë tërheqjen. Nga këndvështrimi im, ka ende punë për të bërë kundër ISIS-it”. (voa)

Mosmarrëveshja për praninë e diplomatëve të huaj si vëzhgues në procesin gjyqësor kundër dy gazetarëve kritikë ndaj qeverisë në Turqi është ashpërsuar. Presidenti Erdogan ka shprehur zemërimin e tij.

Në një fjalim të mbajtur në Stamboll, Presidenti i Turqisë sulmoi veçanërisht Konsullin e Përgjithshëm të Britanisë së Madhe, Leigh Turner. Pa e përmendur Turnerin me emër, Recep Tayip Erdogani kritikoi që ai angazhohet për një gazetar, i cili ka dalë para gjyqit për shkak të akuzave për spiunazh. “Dhe sikur të mos mjaftonte kjo, ai bën edhe një fotografi faqe më faqe me të dhe e nxjerr në internet”, tha Recep Tayip Erdogan sipas agjencisë së lajmeve Anadolu.

Gazetarë kritikë të qeverisë para gjyqit

Turneri pati ndjekur të premten me disa diplomatë të huaj, midis tyre edhe me ambasadorin gjerman, Martin Erdmann, hapjen e procesit gjyqësor shumë të diskutueshëm kundër dy gazetarëve kritikë ndaj qeverisë, Can Dündar dhe Erdem Gül. Kryeredaktorin e gazetës “Cumhuriyet”, Dündar dhe shefin e zyrës së gazetës për kryeqytetin i akuzojnë ndër të tjera për spiunazh, tradhëti të sekreteve shtetërore dhe mbështetje të një organizate terroriste. Në rast dënimi, të dy i pret burgim i përjetshëm.

Para se të shkonte për të ndjekur procesin gjyqësor, Turner publikoi disa fotografi në rrjetin e Twitterit, midis tyre një selfie me Dündarin dhe e komentoi seancën me fjalët: “Turqia vendos vetë se çfarë vendi dëshiron të jetë”. Erdogani deklaroi se me këtë qe kapërcyer një kufi. “Nëse ky person mund ta kryejë edhe më tej shërbimin e tij në Turqi, kjo ka të bëjë me fisnikërinë dhe me mikpritjen tonë”, tha Erdogani sipas agjencisë Anadolu. Sipas tij, në vende të tjera, diplomatët që manifestojnë sjellje të tilla nuk durohen për asnjë ditë.

Ministri i Drejtësisë: sjellja e diplomatëve është e papajtueshme

Anadolu raporton duke iu referuar qarqeve diplomatike se ministria e Jashtme Turke është ankuar zyrtarisht në disa përfaqësi të huaja diplomatike, për shkak të pjesëmarrjes së diplomatëve të tyre në proces. Se në ç’formë konkrete është bërë ankesa, kjo është e paqartë. Edhe një konfirmim të Ministrisë së Jashtme Gjermane për momentin nuk ka. Qeveria në Ankara zemërohet para së gjithash për shkak të publikimeve të diplomatëve në twitter, siç u shpreh një diplomat turk. Kjo mund të vlerësohet si përzierje në punën e pavarur të gjykatës dhe shkel “paanshmërinë” e diplomatëve, u tha.

Ministri i Drejtësisë, Bekir Bozdag e quajti sjelljen e diplomatëve sipas medieve turke si “të papranueshme”. Edhe kryeministri Ahmet Davotuglou e dënoi pjesëmarrjen në procesin gjyqësor të diplomatëve. Erdogani vetë u dërgoi që të shtunën një shpërthim zemërimi vëzhguesve të paftuar të procesit gjyqësor: “Ky nuk është vendi juaj, kjo është Turqia”, u shpreh ai i revoltuar në vendin e tij. Diplomatët mund të kryejnë aktivitet në kuadër të përfaqësive të tyre, përndryshe nevojitet leje, tha Presidenti turk.

Kritika ndërkombëtare ndaj procesit gjyqësor

Shkak për procesin është raportimi i gazetës “Cumhyriet” vitin e kaluar, se Turqia ka furnizuar me armë ekstremistët islamikë në Siri. Erdogani, që i paditi vetë gazetarët në gjyq dhe Shërbimi i Fshehtë turk, MIT janë bashkuar si palë me akuzën e prokurorisë.

Kundër këtij procesi gjyqësor protestuan në një letër të hapur Këshilli i Evropës, organizata ndërkombëtare gazetarësh si dhe midis të tjerash më shumë se njëqind autorë në një letër të hapur, midis tyre edhe nobelisti i Letërsisë, Mario Vargas Llossa. Organizata Reporterë pa Kufij dhe organizata të të drejtave të njeriut kërkojnë ndalimin e procesit gjyqësor, që për mendimin e tyre është i motivuar politikisht. Procesi gjyqësor zhvillohet me dyer të mbyllura. Gjykatësit miratuan në fillim të procesit një kërkesë përkatëse të prokurorisë. Mbështetësit e të dy të akuzuarve në sallën e gjyqit reaguan me zemërim për përjashtimin e opinionit publik. (dw)

Pas sulmeve terroriste në Bruksel, autoritetet europiane të sigurisë kanë intensifikuar punën për gjetjen e personave të lidhur me atentatorët. Kërkohen së paku tetë të dyshuar si terroristë e falsifikues pasaportash.

Dorasit e sulmeve terroriste në Francë e Belgjikë i kanë ndihmësit e tyre islamistë në Siri, ose diku të fshehur në Europë, raportoi të dielën (27.03) gazeta gjermane „Welt am Sonntag“, duke iu referuar të dhënave nga qarqet e sigurisë. Ekstremistët e kërkuar janë persona kontakti të kreut logjistik të atentateve të Parisit, Abdelhamid Abaaoud, dhe të ndihmësit të tij të kapur në Belgjikë, Salah Abdeslam, shkruan gazeta gjermane. Në Gjermani është aktivizuar Zyra Federale e Kriminalistikës për kapjen e ndihmësve të terrorit.

Sulmet u koordinuan përmes telefonit

Duke iu referuar rezultateve të para të hetimit nga Franca dhe Belgjika, „Welt am Sonntag“ shkruan se kreu i dyshuar i celulave terroriste të të ashtuquajturit „Shteti Islamik“, IS në Europë është algjeriani Mohamed Belkaid, i cili u vra së fundmi gjatë një aksioni policie në Belgjikë. Bashkë me Najim Laachraoui, një konstruktues bombash dhe më vonë atentator në Bruksel, ai i ka koordinuar dhe drejtuar komandot e terrorit në atentatet e Parisit përmes telefonit nga Belgjika. Në atentatet e Parisit më 13 nëntor humbën jetën 130 vetë dhe u plagosën më shumë se 350 të tjerë. Të martën e kaluar në aeroportin e Brukselit Zaventem, dy atentatorë shpërthyen bomba vetëvrasëse, rreth një orë më vonë një atentator tjetër shpërtheu bombën në një stacion metroje në kryeqytetin belg. 31 vetë humbën jetën, qindra të tjerë u plagosën.

Pasaporta të fallsifikuara për terroristët

Në Itali policia arrestoi një algjerian të kërkuar në Belgjikë, i dyshuar për lidhje me grupin terrorist të Brukselit dhe Parisit. 40 vjeçari Djamal Eddine Quali, i arrestuar në Salerno, bën pjesë në një bandë të fallsifikuesve të pasaportave, që ka qenë në kontakt me terroristët e Parisit e Brukselit, bëri të ditur policia, e cituar nga agjencia e lajmeve Ansa. Autoritetet belge e kanë kërkuar atë me urdhërarrest ndërkombëtar. Duket se kjo bandë ka përgatitur edhe pasaportat e falsifikuara të përdorura në sulmet e Parisit e Brukeslit. Në Belgjikë ndërkohë policia ka bërë të ditur se ka në arrestuar një atentator të tretë që ka lidhje direkte me atentatet në Bruksel, fjala është për personin e tretë me kapele në pamjet e publikuara në aeroportin e Brukselit.

Foto e Najim Laachraouit, konstruktues bombash

Nuk ka të dhëna për një sulme terroriste

Qeveria gjermane nuk ka të dhëna aktualisht për sulme të planifikuara terroriste në Gjermani, sipas të dhënave të Ministrit të Punëve të Brendshme Thomas de Maizière, CDU. „Autoritetet nuk kanë të dhëna të tilla, që të anulojmë aktivitete të ndryshme apo të izolojmë zona të caktuara“, ka thënë ministri gjerman. Megjithate gjendja mbetet e „tensionuar“.

Ministri i Jashtëm gjerman Frank-Walter Steinmeier ka bërë të ditur organizimin e një konference të madhe antiterrorizmi në Berlin në verë. Politikani socialdemokrat u shpreh se më shumë do të synohet politika preventive për t’iu kundërvënë radikalizimit të të rinjve. (dw)

Sulmet vdekjeprurëse të javës së fundit në Bruksel e përqëndruan sërish vëmendjen e Amerikës tek terrorizmi, si dhe e rritën rëndësinë e tematikës së sigurisë kombëtare gjatë debateve për zgjedhjet presidenciale.

Ndërkohë që belgët vazhdojnë të mbajnë zi, protestat dhe shqetësimet për sigurinë shkaktuan anullimin e një marshimi për paqen që do të mbahej në Bruksel.

Përtej Atlantikut, sulmi ka ngjallur retorika të nxehta përgjatë fushatës së zgjedhjeve presidenciale. Republikani Ted Cruz u zotua të shkatërrojë Shtetin Islamik.

“Do t’i shkatërrojmë nëpërmjet bombardimeve ajrore masive deri sa t’i shfarosim.”

Gjatë një interviste telefonike, kandidati republikan kryesues, Donald Trump, tha se Shtetet e Bashkuara gjenden në rrezik.

“Terrorizmi ka dalë jashtë kontrollit. Nëse nuk tregohemi shumë të fortë dhe tepër të zgjuar, atëherë do të përballemi me një problem shumë të madh.”

President Obama ka thënë se vetëm ushtria nuk mundet të çrrënjosë terrorizmin dhe se Amerika duhet të udhëheqë nëpërmjet shembullit të saj.

“Duke qenë të hapur për refugjatët që i largohen dhunës së ISIS-it; duke qenë të vendosur për të fituar betejën kundër propagandës së dhunshme me një pamje të shpërfytyruar të Islamit që synon të radikalizojë të rinjtë myslimanë. Në këtë përpjekje, partnerët tanë më të rëndësishëm janë amerikanët myslimanë.”

Ky mesazh u mbështet edhe nga kandidatja kryesuese demokrate.

“Nuk mund t’i dorëzohemi panikut dhe frikës. Nuk është në përputhje me vlerat tona, nuk na mbron me efikasitet dhe realisht luan lojën e terroristëve.”

Republikanët , mes tyre senatori Ted Cruz, e akuzojnë Obamën për dobësi.

“Jam kundër përfshirjes së SHBA-së në një luftë pa fund në Lindjen e Mesme.”

Pas sulmeve të vitit të kaluar në Paris, anketimet treguan një rritje të shqetësimit të amerikanëve për sigurinë gjatë një cikli elektoral gjatë të cilit normalisht do të kishin dominuese tematikat ekonomike. (voa)

Ndërkohë që Evropa është pushtuar nga paniku dhe tronditja që lanë pas sulmet e Brukselit, ekspertët e sigurisë po diskutojnë masat që duhen zbatuar në të ardhmen për të parandaluar sulme të tjera të kësaj natyre. Izraeli ka një përvojë të qartë në zbatimin e masave të sigurisë për të identifikuar dhe parandaluar personat me synimeve terroriste.

Në Izrael, banorët i pranojnë masat e përditshme të kontrollit si një fakt i jetës, për t’u prerë rrugën elementëve keqbërës.

“Mbaj mend që gjatë gjithë jetës kam kaluar nëpër pika kontrolli, si gjithë të tjerët. Kjo metodë funksionon,” thotë një banor.

Kontrollet janë praktikë e rregullt në çdo aktivitet të jetës që nga transporti publik e deri tek veprime të rëndomta si hyrja në qendra tregtare. Izraelitët e kanë përqafuar këtë mënyrë jetese, me gjithë kokëçarjet shtesë që sjell, për hir të sigurisë së jetës.

“Shihet qartë që siguria është më e fortë këtu se në vende të tjera, por është diçka e domosdoshme. Nuk kemi zgjidhje tjetër pasi ka shumë njerëz që duan të na bëjnë keq,” thotë një shtetas izraelit.

Jeta në gjendje të vazhdueshme gatishmërie, qoftë edhe në rastet kur bëhet praktikë e përdishme, ka koston e vet psikologjike, monetare, por edhe kohore. Meir Elran, drejtor i Programit për Sigurinë Kombëtare, thotë se shpreson që Evropa do të gjejë mënyra të tjera për t’iu përgjigjur rrezikut nga terrorizmi, në forma të ndryshme nga ato që ka zgjedhur Izraeli:

“Shkojmë shpesh në Evropë dhe kur i shohim si jetojnë evropianët, na ngjallet zili. Ajo ndjenja e lirisë që ka invidi, që mund të bëjë ç’të dojë. E dimë që kur kthehemi në vend, do të na kontrollojnë, do të kalojmë barriera sigurie. Nganjëherë do të kalosh disa kontrolle për të shkuar nga një market në një bankomat e më pas për të marrë fëmijët në shkollë. Kjo na është bërë praktikë e përditshme. Uroj që evropianët të mos e gjejnë veten në këtë situatë, uroj që të gjejnë masa të tjera në përgjigje të kërcënimit terrorist. Por duhet të them se nëse evropianët do të vendosin të zbatojnë masa të tillë, nuk është shumë keq. Edhe me këto masa ne vazhdojmë të mbajmë liritë tona, të kemi mundësinë e lëvizjes”.

Ndërkohë që zyrtarët evropianë diskutojnë masat e sigurisë për të ardhmen, një balancë delikate është në pikëpyetje mes të drejtës për jetën dhe të drejtës për privaci dhe liri. (voa)

Senatori i shtetit Vermont Bernie Sanders fitoi me shumicë dërrmuese zgjedhjet paraprake presidenciale brenda Partisë Demokrate në shtetet perëndimore Uashington, Alaska dhe Hawaii, në përpjekjet e tij për t’iu afruar rivales Hillary Clinton.

Sanders fitoi 82 përqind të votave në Alaskë dhe më shumë se 70 për qind në Uashington dhe Hawaii. Rregullat e Partisë demokrate i ndajnë delegatët në baza proporcionale, prandaj edhe me humbjet e mbrëmshme  kandidatja Clinton përsëri merr një pjesë të tyre.

“Ne e dinim se gjërat janë duke u përmirësuar për fushatën tonë në shtetet perëndimore,” tha dje senatori Sanders. Zonja Clinton ka dominuar në shtetet jugore gjatë garave të para brenda demokratëve, ndërsa kandidati Sanders ka fituar pesë nga gjashtë shtete në garat e kohëve të fundit, të gjitha në pjesën perëndimore të vendit.

Edhe me fitoret e së shtunës, zoti Sanders përsëri renditet prapa ish-sekretares së shtetit, e cila ka rreth 300 delegatë më shumë. Ai përballet me një rrugë të vështirë në përpjekjet për të marrë emërimin.

Megjithatë, senatori refuzon të tërhiqet dhe mbetet një kundërshtar i fortë për zonjën Clinton në disa shtete që ende nuk i kanë zhvilluar zgjedhjet paraprake. (voa)