Shefja e politikës së jashtme të Bashkimit Evropian, Federica Mogherini, u takua të mërkurën në mbrëmje me kryeministrat e gjashtë vendeve të Ballkanit perëndimore për të diskutuar situatën në rajon.

Takimi joformal synon debatet rreth zhvillimeve të fundit në rajon dhe rreth pikëpamjeve të përbashkëta për të ardhmen evropiane të rajonit.

Zonja Mogherini tha më herët gjatë ditës se do të takojë kryeministrat e Shqipërisë, Kosovës, Bosnjës e Hercegovinës, Maqedonisë, Malit të Zi dhe Serbisë “për të diskutuar gjendjen në rajon, rrugën përpara dhe se si mund t’i forcojë Bashkimi Evropian mundësitë dhe perspektivat për marrëdhëniet e mira fqinjësore në rajon, rritjen e bashkëpunimit ndërmjet tyre dhe të secilit prej këtyre vendeve me BE-në si dhe të konsolidojmë atë që ne i referohemi normalisht si fuqia transformuese e perspektivës evropiane me qëllim të zhvillimit të shoqërive gjithëpërfshirëse, qeverisjes së mirë por edhe ekonomive të qëndrueshme“.

Ajo u shpreh e inkurajuar me disa nga zhvillimet pozitive siç është hapja e rrugës për zgjidhjen e krizës politike në Maqedoni. Takimi i sontëm tha ajo, është një mundësi e mirë për të “ndërtimin e një mirëkuptimi rajonal dhe për të përcaktuar rrugën e ecjes së përbashkët në rrugën evropiane“.

Në takimin e sontëm që ka për qëllim edhe përgatitjen e takimit të vendeve të Ballkanit Perëndimore dhe BE-së që do të zhvillohet në Trieste të Italisë në fillim të muajt korrik, do të diskutohet edhe për vizitën që zonja Mogherini, kishte zhvilluar në muajin mars në gjashtë vende të Ballkanit perëndimorë në përpjekje për t’i siguruar ato se Bashkimi Evropian mbetet i hapur për zgjerim, me gjithë krizën në të cilën ndodhet ai.

Ajo i kishte cilësuar tensionet ne rajonin e Ballkanit perëndimorë si “skajshmërisht të rrezikshme” gjë që sipas saj shton nevojën që Bashkimi Evropian të veprojë me përkushtim për të siguruar ardhmëri evropiane për rajonin.

Zonja Mogherini ka shprehur besimin se fuqia e BE-së në rajon është e lidhur me besueshmërinë e integrimeve evropiane. (voa)