Agjencia Amerikane për Zhvillim Ndërkombëtar USAID po mbështet prej 8 vjetësh një projekt të tele-mjekësisë në Shqipëri dhe në Kosovë.

Ideuesi dhe drejtuesi i këtij projekti, dr.Rifat Latifi, thotë se tashmë, që rrjeti i telemjekësisë u shtri në të gjithë territorin, është koha që shëndetësia shqiptare të përfitojë sa më shumë prej saj.

Telemjekësia në Shqipëri po nis një etapë të re zhvillimi pas 8 vjetë shtrirje në të gjithë territorin e vendit.

Projekti mbi shëndetin elektronik dhe telemjekësinë po financohet për një kohë të gjatë nga agjencia amerikane për zhvillim ndërkombëtar USAID, departamenti amerikan i shtetit, dhe nga qendra e telemjekësisë e ushtrisë amerikane.

Ky projekt po sjell përfitime të mëdha për mjekësinë shqiptare: ai po kursen cdo vit qindra udhëtime të pacientëve drejt kryeqytetit.

Dr. Rifat Latifi është ideuesi dhe drejtuesi i projektit të telemjekësisë në Shqipëri dhe Kosovë.

Ai thotë se projekti është një sukses i plotë dhe vetëm në dy vitet e fundit janë mjekuar mbi 1 mijë e 300 pacientë në kushte klinike.

Përfitimi më i madh i telemjekësisë është diskutimi më i mirë mes doktorëve për sëmundjen e pacientit dhe mjekimi sa më i shpejtë i tij duke shkurtuar distanacat midis qyteteve dhe kohën e ndërhyrjes mjekësore.

Dr. Fatos Olldashi, nëj emër i njohur në fushën e neuro-kirurgjisë thotë se mjekësia shqiptare ka ende shumë mangësi, por plotësimi i këtyre mungesave po ecën njëkohësisht me përdorimin e teknologjive të reja.

Qendra Spitalore Universitare Nënë Tereza ka ofruar rreth 70 për qind të telekonsultave në të gjithë fushat e shëndetësisë, ndërsa pjesa tjetër nga spitalet e tjera të Shqipërisë.

Krahas mjekimit të drejtpërdrejt të pacientëve rrejti i telemjekësisë ka zhvilluar më shumë se 500 takime për edukimin e punonjësve të mjekësisë me mbi 20 mijë pjesëmarrës; mjekë, infermierë, farmacistë, psikologë, studentë e sociologë. voa