Arkivi mujor: Janar 2015

Analiza

Dy letra që sot i kam dërguar në adresat private, të parën për Pirro Priftin, të dytën për 36 atdhetarë…

Komento

nga Aurel DasaretiPërshëndetje,
ta them edhe njëherë, nuk ka dyshim se kur mbron Janullatos-in mbron agresionin grek ndaj Shqipërisë. Sikur ta dija 100% se këtë aktivitet e bën me vetëdije, nuk do të shkruaja fare. Megjithatë, shpresoj se nuk je aq i vetëdijshëm për çështjen prandaj edhe kjo letër.
Je i diskutueshëm, kur dikush që nuk i përket komunitetit ortodoks e kritikon Janullatosin dhe ngjashëm, ti u thuash se nuk kanë legjitimitet të flasin për çështjen pasi nuk i takon komunitetit ortodoks, por ti nuk pushon të kritikosh komunitetin mysliman. Kjo do të thotë se vetes i lejon atë që tjetrit ia mohon, standarde të dyfishta postkomuniste.
Kuptohet, ti ke të drejtë të kritikosh fundamentalistët islamik shqipfolës, sepse shqiptaria është para fundosjes, por kritiko edhe grekofilët, sepse ata janë edhe më të rrezikshëm për momentin.
Nëse ne nuk bashkohemi si vëllezër (le t`i harrojmë fetë brenda katër mureve të shtëpisë, ashtu e kërkon momenti) do të humbasim të gjithë. Gjithë bota perëndimore është nacionaliste, më përpara e duan vetveten e pastaj Pirro Priftin apo Aurel Dasaretin, atëherë pse ne t`i duam të huajt më tepër se vetveten?!
Kisha dëshiruar që prej sot të luftosh vetëm për nënën Shqipëri, nuk është kjo vetëm mendimi im.
Shpejt vizitoj Shqipërinë, mund të takohemi në ndonjë restorant…dua të dëgjoj mendimin tënd për shumë çështje, dhe do të bindesh se unë jam unë, kur kanë qenë sigurimsat as që kisha lindur dhe nuk jam aspak armiku jot, përkundrazi mund të bëhemi miq… Nëse ma garanton se “fshehtësinë” do ta mbash vetëm për vete do ta dërgoj fotografinë time, jo vetëm fotografi civile…Kuptohet se jam i lindur si Aurel Dasareti por prej moshës 8 vjeçare mbaj emër anglez, është kjo histori e gjatë…
Kalofsh mirë, nga Arizona,
Aureli
http://www.zemrashqiptare.net/news/id_31927/cid_116/Zeqir-Lushaj:-Intervistë-ekskluzive-me-ekspertin-Aurel-Dasareti.html

***

Përshëndetje!
Zeqir Lushaj përveç tjerash është poet i lindur dhe pasi unë pata fatin të komunikoj një kohë të gjatë me Zeqirin, për gjithë çështjet e rruzullit tokësor, erdha në përfundim se Zeqiri është i veçantë në kuptimin pozitiv. Prandaj nuk habitem se tjerët i shkruajnë vargje…E përsëris, atdhedashuria e tij i lejon t`i jap shprehje një prirjeje të fuqishme për krijim…
Më vjen keq se letrën nuk pata mundësi ta lexoj në kohën e duhur; kjo sepse isha në terren…
PS: U përshëndes të gjithëve që do ta pranoni këtë letër. Nuk njihemi personalisht por mendoj se shumica prej nesh gjendemi në diasporë dhe se ndiejmë të njëjtën dhembje për situatën e vëllezërve dhe motrave tona që gjenden në atdhe, në veçanti boshatisjen e Kosovës. Nuk habitem pse ikin, me siguri kanë lexuar shkarravinat në “portalet e famshme” shqipfolëse që ua kanë gatuar “kosovarëve” këto dy muajt e fundit – tituj fantastik, përafërsisht: “Suedia kërkon punëtorë, prej pastruesit e deri në doktor- aplikoni”, “Australia kërkon…aplikoni”, “Gjermania jep azil por vetëm 2% mund të fitojnë këtë status…aplikoni” etj. Dhe, u mashtruan fukarenjtë, u pasuruan pronarët e autobusëve dhe të portaleve djallëzore antikombëtare të internetit të cilët nuk ka kush t`i ndjek penalisht…për tradhti madhore.
Ne shqiptarët kemi lejuar që politikën të na e përpilojnë samarxhinjtë. Ashtu është kjo punë, kur në xhungël mungon luani, zbritën prej drurëve majmuni dhe fillon të qeverisën.
Me këtë letër ua dërgoj artikullin tim të fundit që është botuar në disa portale të mirëfillta, ndoshta ndonjë prej jush dëshiron ta lexon.
Natën (ditën e mirë) dhe respekt për ju,
Aurel Dasareti

http://www.lajmet.com/cutenews/show_news.php?subaction=showfull&id=1422638249&archive=&template=tit-klasik
http://gazetadielli.com/marshimet-e-vdekjes/
http://ina-online.net/opinione/51270.html
http://www.tetovasot.com/2015/01/marshimet-e-vdekjes/
http://www.voal-online.ch/index.php?mod=article&cat=INTERVIST%C3%8BPRESS&article=51541
http://gazetakritika.net//Forumi/Doreshkrim.php/index.php?itemid=7645
http://www.parajsa.com/kulture/intervista/221836-marshimet-e-vdekjes-aurel-dasareti.html#prettyPhoto
http://www.shqiperiaebashkuar.info/2015/01/marshimet-e-vdekjes/
http://tribunashqiptare.net/?p=26898
http://www.fjala.info/?p=2929
http://www.revistadrini.com/2015/01/marshimet-e-vdekjes/
http://ilirida.net/marshimet-e-vdekjes/

Analiza

Marshimet e vdekjes

Komento

Nga Aurel Dasareti, USA, ekspert i shkencave ushtarake-psikologjike (dasaretiaurel@yahoo.com.au)

Shkatërrimi i komunizmit dhe “çlirimi” nga Serbia nuk solli ndonjë formë të re më progresive në organizimin shoqëror në Shqipëri-Kosovë… Pseudo-demokratët patën një etje të madhe për t`u pasuruar në mënyra të pista, prandaj ngritën institucione të tilla për t`i realizuar dhe konkretizuar këto etje. Jeta profesionale e tyre si “politikan” përbën një shembull të qartë të interesit personal, kriminalitetit, paditurisë, tradhtisë. Veprimet e tyre tradhtare janë të drejtuara kundër sigurisë shtetërore dhe pavarësisë.Të përkujtojmë viktimat e gjenocidit serb…ndaj shqiptarëve; për të mos harruar tragjeditë masive në të kaluarën dhe të tashmen: jo vetëm për burrat që luftuan trimërisht për vendin e të parëve të tyre, dhe dinjitetin e tyre si qenie njerëzore, por edhe për të gjithë shqiptarët e tjerë: bijtë e pambrojtur, gratë dhe të moshuarit të cilët humbën jetën e tyre, viktimat e pafajshme të agresionit barbar serb.
***
Në arshivën familjare e gjeta një dokument të shkruar dikur nga një i afërm, dëshmitar i cili në vitet 1912-1913 i shpëtoi Golgotës Shqiptare:
“Marshimet e vdekjes. Ata shqiptarë që nuk vdiqën nën tortura, u detyruan të nisin në marshimet e vdekjes. Gjatë rrugës ata vdiqën si mizat. I nxehti i padurueshëm, torturat dhe mungesa totale e ujit dhe bukës e bënë punën e vet. Edhe kur ushtarët dhe xhandarët serbë kishin ujë të mjaftueshëm me vete e derdhnin por nuk na jepnin neve, ose kur kalonim pranë disa vrimave me ujë, të burgosurve nuk u lejoheshe me pi. Gratë dhe fëmijët zakonisht detyroheshin të shikojnë se si burrat e tyre, baballarët dhe vëllezërit keqtrajtohen dhe vriten përfundimisht. Dhe, vinte radha e tyre të masakrohen. Nuk mund të jetë ndonjë dyshim se qëllimi i dëbimeve ishte që sa më shumë shqiptarë të vdisnin. Gratë dhe fëmijët ishin veçanërisht të pambrojtur ndaj abuzimit para se ata u vranë. Në çdo katund gratë shqiptare u përdhunuan dhe pastaj vrarë më pas. Ato që e kundërshtuan këtë u masakruan menjëherë ose u keqtrajtuan aq keq sa që vdiqën pavarësisht. Vajzat e reja dhe fëmijët ishin dëshmitarë të prerjes me thikë të kokës së prindërve të tyre nga serbët. Pastaj, madje edhe vajzat e reja që në realitet ishin vetëm fëmijë u dhunuan seksualisht, shumica prej tyre më pas u vranë…”
***
Mizoritë e kryera nga serbët kundër shqiptarëve gjatë luftës së Kosovës 1998-1999 nuk janë të ndryshme nga ato të kryera në 1912-1913, siç përshkruhet në dokumentin “Golgotha Shqiptare” nga Leo Freundlih, humanisti madh, hebreu që protestoi kundër zhdukjes masive të shqiptarëve nga serbët në vitet 1912-1913 ku serbët vranë më tepër se 500.000 shqiptarë.

Njeriu pa emocione, nuk mund të luftojë për asnjë ide; për të luftuar është e domosdoshme të duam atë për të cilën luftojmë, dhe të urrejmë atë kundër së cilës luftojmë.
***
Kosova kalon çaste kritike. Nevojtarët protestojnë, por mes tyre ka edhe disa provokatorë, agjentë (të rekrutuar nga mashtruesi kronik Hashim Thaçi dhe reptili Isa Mu(t)stafa) që shkatërrojnë pronat dhe sulmojnë policinë, me qëllime djallëzore të gatuara në kuzhinat e padronëve serb – të provokojnë kundërveprime.

Ndërkaq, punëtorët e rendit publik, policia e verbët, ka marrë urdhra politike nga tradhtarët dhe rrahin protestuesit paqësor, vëllezërit dhe motrat e veta të gjakut. Më e rrezikshme është kur zjarrfikësit ndezin shtëpitë, atëherë nuk ka kush do t`i shuan zjarret…Kjo sepse protestat mund të kalojnë në luftë qytetare – vëllavrasjeje.
***
Është tragjike-komike që “patriotët / intelektualët e diasporës” në vend që të bashkohen rreth një subjekti të vetëm, të bëhen një model për shqiptarët e trojeve, kontribuojnë edhe më tepër në përçarjet e tyre. Kanë formuar degë ose nëndegë të partive antikombëtare që veç ekzistojnë në Atdhe. Vetëm në Gjermani dhe Zvicër numri i degëve (nëndegëve) të LDK-së dhe PDK-së është më i madh se numri i emigrantëve. LDK-ja e sotme e Mu(t)stafës qysh moti ka devijuar, nuk është më ajo e Rugovës, kjo sa për freskimin e mendjes së fanatikëve partiak.
***
Çfarë kërkesash duhet të përmbushë një individ për të qenë një intelektual i vërtetë?

Patrioti dhe intelektuali i vërtetë nuk është i gatshëm të heqë dorë nga atdhedashuria, ndershmëria, burrëria, liria dhe përgjegjësia për hir të skemave apo programeve, për një shkollë, parti, fe, rrymë apo klan. Si mund një individ të jetë një intelektual i pavarur dhe autonom kur ai ka zgjedhur të regjistrohet në një grup të caktuar të të kuptuarit?!

Intelektual do të thotë të sillesh në mënyrë racionale dhe objektivisht reflektues në mjedisin tënd. Të jesh intelektual nuk do të thotë domosdoshmërish të jesh veçanërisht i zgjuar; ajo më shumë kuptohet si një mënyrë e veçantë për të aplikuar inteligjencën tënde në takimet tua me botën. Intelektuali duhet të qëndroj fortë pas disa vlerave të caktuara, por të ketë mosbesim në ideologjitë dhe partitë më të mëdha shqipfolëse, sepse janë tradhtare.
***
Detyra jonë është jo vetëm të informojmë për sendet dhe ngjarjet por të përcaktojmë cilësitë dhe ndjenjat që duhet t`u zhvillojnë popullatës: dashurinë pa kufi ndaj Atdheut, gjuhës shqipe, zotësisë në punë, disiplinën, thjeshtësinë, cilësinë për të thënë të vërtetën, guximin për të reaguar s`bashku kundër padrejtësisë dhe tradhtisë kombëtare, dashurinë për njëri tjetrin, nderimin për më të mëdhenjtë dhe kujdesin ndaj më të vegjëlve.

Mbi të gjitha kemi nevojë që edhe në trojet e arbrit të sundojë ligji, i njëjtë për të gjithë, askush para ligjit. Ideologji të skajshme, të djathta ose majta, bëjnë të lindë një shoqëri e mbyllur, në të cilën individi i nënshtrohet kolektivit, shoqëria sundohet nga shteti, kurse shteti është në shërbim të një dogme që pretendon të jetë mishërim i së vërtetës përfundimtare. Në një shoqëri të tillë nuk ka liri. Dhe, një shoqëri që ka liri të pakufi tjetërsohet në anarki.

I sfilitur nga vetëdija për pafuqinë e vet, për vetminë e vet, shqiptari në vend që të kërkojë përgjegjësi ose kap për fyti qeveritarët e vet mashtrues – shkaktarët e tragjedisë së tyre, në mënyrë joligjore braktisën Atdheun. Kërkon të kapërcejë barrën e tij ekzistenciale duke arritur një gjendje ekstazike të ngjashme me gjendjen e transit, duke rifituar kështu njësimin e brendshëm dhe njësimin me natyrën. Janë të ndryshme mënyrat për t`ia arritur kësaj, si për shembull kjo puna e “emigrantëve taze”. Ajo pjesë e popullsisë naive të Kosovës që ikën në Perëndim, nuk e din se pas 2-3 muajsh do të dëbohen nga “nikoqirët” dhe do të kthehen prej nga u nisën edhe më të varfër, nuk e kanë kuptuar se shanset për azil, qëndrim dhe punësim në Perëndim janë zero, përveç nëse ndonjë trim prej tyre martohet me ndonjë homoseksual atje. Qeveria kriminele e PDK dhe LDK-së nuk i burgosin pronarët kriminel të autobusëve. Marshimet e vdekjes vazhdojnë…

Maqedonia

Euro-integrimet, edhe 2015-ta mbetet e bllokuar

Komento

Edhe këtë vit Maqedonia mund të mos e ri-aktivizojë Dialogut të Nivelit të Lartë me Bashkimin Evropian, i pezulluar që në vitin 2013. Zv/kryeministri për çështje evropiane Fatmir Besimi, në një takim me gazetarë, tha se vendimi për ri-aktivizim të mundshëm, pritet të sillet nga komisioneri evropian për zgjerim Johanes Han, në vizitën e parë të tij në Shkup, në muajin shkurt. Besimi tha se qeveria po bën përpjekje për rikthimin e dialogut me opozitën, që përbën edhe kushtin kryesor të Brukselit për zhbllokimin e Dialogut të Nivelit të Lartë, por pa dhënë detaje mbi formatin dhe rezultatet e mundshme nga këto bisedime. Besimi pranoi se ngërçi politik po dëmton imazhin e vendit përpara syve të Brukselit por edhe procesin integrues në përgjithësi. Fusha të tjera që rëndojnë mbi dialogun e Nivelit të Lartë janë edhe mos përmbushja e kushteve për 35 të lirë, administratë të pa-politizuar dhe gjyqësor të pavarur. Në këtë kuadër, ndër skenarët e mundshëm për vitin 2015, numri ‘një’ i integrimeve nuk përjashtoi as humbjen e rekomandimit për fillimin e bisedimeve. Nga ana tjetër Besimi nuk deshi të komentonte as pritjet nga qeveria e re greke në kuadër të zgjidhjes së emrit, duke theksuar se është ende herët për të bërë vlerësime të tilla, megjithëse theksoi se Shkupi duhet të mbetet i hapur dhe proaktiv në procesin e emrit. Semra Jakupi

Maqedonia

Nga Maqedonia ilegalisht janë transferuar 5 miliardë dollarë

Komento

Për dhjetë vite, nga Maqedonia në vendet e huaja përmes rrugëve ilegale janë transferuar rreth 5 miliardë dollarë, thuhet në raportin e institutit “Integriteti Global Financiar” nga Uashingtoni, shkruan gazeta “Vest”. Sipas këtij instituti, shuma më e madhe është shënuar në vitin 2011, kur nga Maqedonia jashtë vendit janë transferuar 852 milionë dollarë. Prej vendeve të rajonit, Maqedonia qëndron më keq se Shqipëria dhe Bosnje Hercegovina, kurse më mirë se Bullgaria dhe Serbia, raporton “Lajm”.

Deputetja Roza Topuzovska-Karevska e ka pyetur ministrin e financave Zoran Stavrevski se a posedon informata për këtë raport dhe kush janë ata që transferojnë shuma marramendëse nga Maqedonia. Stavrevski u përgjigj se nuk është i njoftuar me raportin e këtij institute amerikan, duke shtuar se bëhet fjalë për informacione jorelevante. Ai megjithatë premtoi përgjigje më të plotë me shkrim. (lajm)

Maqedonia

Leja për punën e “Jugohromit” shpallet “top secret”!

Komento

“Kemi vendosur të ngrejmë padi ndaj Qeverisë, kurse vendimi i qeverisë për “Jugohromin” na nevojitet për të mbështetur padinë. Kemi kërkuar edhe ndihmën e disa funksionarëve shqiptarë për të siguruar sa më shpejtë këtë dokument, mirëpo edhe ata na kanë thënë se nuk munden ta sigurojnë. Për këtë arsye mendojmë se ai është shpallur dokument kofidencial”, thotë për “Lajm”, Arianit Xhaferi nga Eco GuerillaPërfaqësuesit e organizatës “EcoGuerilla”, e cila po udhëheq revoltën e qytetarëve të Tetovës kundër ndotjes së ajrit, akuzojnë pushtetin se po tenton të fshehë “gjurmët e krimit” që është bë me vazhdimin e lejes për punë të fabrikës “Jugohrom”, pa përmbushur standardet e nevojshme ekologjike.

Ata dyshojnë se dokumenti është shpallur “dokument kofidencial”, me qëllim që të mos mundet të publikohet në opinion.

“Edhe pse ka kohë që kemi bë kërkesë zyrtare, Qeveria nuk po na e dorëzon vendimin e sjellur për vazhdimin e lejes për punë të “Jugohromit”. Kemi vendosur të ngrejmë padi ndaj Qeverisë, kurse vendimi i qeverisë për ‘Jugohromin” na nevojitet për të mbështetur padinë. Kemi kërkuar edhe ndihmën e disa funksionarëve shqiptarë për të siguruar sa më shpejtë këtë dokument, mirëpo edhe ata na kanë thënë se nuk munden ta sigurojnë. Për këtë arsye mendojmë se ai është shpallur dokument kofidencial”, thotë për “Lajm”, Arianit Xhaferi nga Eco Guerilla. Ai kërkon publikisht ndihmën e funksionarëve shqiptarë, si dhe të gazetarëve, që të japin kontribut për gjetje sa më të shpejtë të këtij dokumenti. Edhe përkundër tentimeve të bëra, të enjten nuk arritëm të mësojmë zyrtarisht prej qeverisë nëse dokumenti është shpallur “sekret” ose jo. Prej Qeverisë na dërguan te ministria e ekologjisë, kurse ministri Nurhan Izairi na deklaroi se vendimi është i qeverisë, prandaj atje duhet të kërkojmë dokumentin.

Ndotja në Tetovë, të enjten ka qenë pjesë edhe në debatin e zhvilluar ën Kuvend.

Deputetja e PDSH-së Merale Uzairi Ferati, në seancën ku u parashtruan pyetje nga deputetët për anëtarët e Qeverisë, ka pyetur ministrin e ambientit jetësor Nurhan Izairi-n për gjendjen shqetësuese në rajonin e Pollogut.

“Se sa shqetësuese, sa alarmante dhe do të kisha thënë sa tragjike është situate në Pollog tregojnë të dhënat e matura nga matjet e shkallës së ndotjes që shkakton Jugohromi së bashku me statistikat të cilat tregojnë rritjen e numrit të sëmundjeve të ndryshme vdekjeprurëse. Sipas të dhënave zyrtare shkalla e ndotjes në Tetovë është për 150 deri në 200 herë më e lartë nga norma e lejuar. Kapaciteti momental i Jugohromit në ditë prodhon përafërsisht 3 ton pluhur”, ka theksuar Ferati.

Megjithatë, deputetja nga radhët e PDSH-së nuk arriti të marr përgjigje nga ministri Izairi, pasi ky i fundit mungoi në seancën kur ekzekutivi duhet t’i përgjigjej pyetjeve të deputetëve.

Në këtë qytet ku shumica janë shqiptarë shifra alarmante ka publikuar në një shkrim autorial, neurologu Arben Taravari.

“Tetova në vitin 2010 kishte vetëm 1319 te sëmurë prej tipave të ndryshme të kancerit, kurse 2013 kjo shifër ishte gati se e dyfishuar, respektivisht në 2013 ne Tetovë u regjistruan 2375 të sëmurë nga tipe të ndryshme të kancerit”- shkruan Taravari. Ai apelon që të ngritet vetëdija tek qytetarët e Tetovës dhe të reagojnë më shpejt për të parandaluar katastrofat në shëndetin e njerëzve të këtij qyteti duke përfshirë kanceret e ndryshme në mushkëri, organet e barkut, kanceret e ndryshme në kokë dhe te gratë. edhe abortet spontane që vitet e fundit janë rritur te grat shtatzëne shqiptare sidomos nga ajri i ndotur dhe nga grimcat kancerogjene që i lëshon fabrika Jugohrom. (lajm)

Analiza

Pushtetarët që prangosin të zgjedhurin e popullit, kurrë s’i shpëtojnë mallkimit të popullit

Komento

“Ia lidhën duart kryetarit të Komunës së Prishtinës, por harruan se regjimi që mbështetës të vetëm ka policinë, se pushtetarët që prangosin të zgjedhurin e popullit, kurrë nuk do mund t’i shpëtojnë mallkimit të popullit. Si diktatorë të vegjël e të mjerë, dalin e paturpshëm thonë se 35t janë duke ua rrënuar shtetin, e nuk shohin se për çdo natë, Kosovën e braktisin me qindra të rinj.
Dhe me të drejtë e dënojnë dhunën dhe thonë se vota, e jo protesta në rrugë, të sjellin në pushtet, por harrojnë se deri dje këtë e thoshin edhe robëruesit e Kosovës, harrojnë se drejtuesit e shtetit nuk përfaqësojnë vetëm votuesit e tyre, por e kanë në duar fatin e tërë popullit.

Dhe si të tillë – njësoj si çdo zaptues, i cili fatin e shtetit e të popullin e barazon me fatin e vet politik – ata e konsiderojnë armik çdonjërin që i kundërshton, si të tillë ata shohin vetëm gurët e protestuesve, por jo edhe pamjet trishtuese kur të riut të shtrirë, i vërsulen policët! Dhe drejtues të tillë janë të rrezikshëm për popullin dhe shtetin, drejtuesit e tillë janë trishtues për tërë shqiptarinë, ngaqë ata janë të gatshëm t’ia thyejnë popullit edhe boshtin e patriotizmit! Andaj duhet thënë: Regjimi i sotëm që drejton Kosovën, me shumëçka është fytyra e së djeshmes, që vret dhe varros të sotmen dhe të ardhmen e rinisë kosovare!

Nëse do ishte ndryshe, nëse drejtuesit e sotëm të Kosovës me të vërtet do kishin për qëllim të mirën e vendit dhe të popullit, atyre do u mjaftonte edhe një pik gjaku polici apo protestuesi, që të dilnin e të thoshin: Ne jemi pushtetarë, por jo pushtues të popullit e të vendit tonë, andaj ejani që gjithë së bashku ta ndajmë të mirën e të keqen e këtij vendi! Pra ata do propozonin të mundshmen që sot mund ta qetësojë Kosovën: një Qeveri teknike, që do e nxirrte vendin nga ky tunel ku është futur! Por, këtë nuk mund ta presësh nga ata me mendësi nga djeshmja e pushtuesit, nga ata që marrjen e votës, e barazojnë me marrjen e ‘tapisë’ që të shpallë pronarë të Kosovës!” (Kim Mehmeti)

Kosova

Nuk ka dhunë që na ndalë – e mërkurë, 4 shkurt, ora 12:00

Komento

Pas një mbledhje të përbashkët të Kryesisë dhe Grupit Parlamentar së Lëvizjes VETËVENDOSJE!, u vendos që data e protestës së ardhshme të jetë të mërkurën, më 4 shkurt, në ora 12:00, i njoftoi Albin Kurti mediet e mbledhura në konferencën e sotme për shtyp. Ai shpjegoi se protestuesit, po ashtu si të martën, do të mblidhen në sheshin “Zahir Pajaziti”, prej nga do të marshojnë drejt sheshit “Skënderbeu”, para Qeverisë së Kosovës.

“Pra, vazhdon protesta përderisa vazhdon të qëndrojë në Qeveri Jabllanoviqi”, tha Kurti, duke sqaruar se kërkesat e protestës mbesin të njëjta – shkarkimi i Ministrit Jabllanoviq dhe mbrojtja e Trepçës përmes një ligji të veçantë, i cili e definon Trepçën si ndërmarrje publike të veçantë.

Ai po ashtu falënderoi të gjithë qytetarët për ndihmën dhënë protestuesve të martën, ku solidaritet i veçantë është shprehur me të lënduarit, duke i ndihmuar ata pa rezervë me ujë qumësht e qepë.

Ndërkaq, deputetja Aida Dërguti tha se Figurat kryesore të partive politike që tani janë në Qeveri, rrugëtimin e vet në politikë e nisën qoftë me protesta si LDK, qoftë me luftë çlirimtare si PDK, të cilët e braktisën dhe sakrifikuan për pushtet. Nënshtrimi ndaj kushteve të Listës Serbe dhe fyerjeve të Jabllanoviqit për qytetarët e Kosovës, tregon gatishmërinë e këtyre qeveritarëve që të nënshtrohen. Ajo tha se qytetarët janë themeli i Republikës dhe Republika pa qytetarët nuk mund të ekzistojë. Prandaj, çdo qytetar veç e veç dhe të gjithë së bashku, kanë obligim që të mbrojnë dinjitetin e dëshmorëve e viktimave, që u fye nga Jabllanoviqi. Ndërsa, të sotmen si mundësi dhe të ardhmen si zhvillim e mirëqenie, qytetarët mund ta sigurojnë vetëm përmes mbrojtjes së Trepçës.

Në fund, kryetari, Albin Kurti, duke iu përgjigjur pyetjeve të gazetarëve mbi dhunën policore tha: “Nuk ka dhunë që na ndal neve. Nuk ka brutalitet policor që na bën neve të mos dalim në protestë apo të mos marshojmë përpara. Sepse nuk mund të bëjmë kompromis me Republikën, me jetën e dinjitetshme, me lirinë, me atë që na bënë subjekt e subjektivitet njerëzor”.

Lëvizja VETËVENDOSJE!

Shkenca

Telefonat inteligjentë si mjet diagnostikimi të malaries

Komento

Mjekët që luftojnë malarjen, një ndër sëmundjet më vdekjeprurëse në planet, mund të kenë së shpejti në dispozicion një mjet ndihmës – një aplikacion në celularët e tyre inteligjentë. Shkencëtarët kanë zbuluar një mënyrë që përdor kamerën e celularit për gjurmimin në gjakun e pacientëve të mikroorganizmave që shkaktojnë këtë sëmundje.Sipas Organizatës Botërore të Shëndetësisë, rreth 600 mijë njerëz vdiqën nga malaria në vitin 2013, një shifër që e klasifikon këtë sëmundje të përcjellë nga mushkonjat si një ndër më vdekjeprurëset në botë.

Aspekti më i hidhur i kësaj katastrofe është se prek më së shumti fëmijët e vegjël.

Zbulimi i hershëm i sëmundjes është i rëndësishëm për një trajtim të suksesshëm. Por, duke qenë se simptomat fillestare i ngjasojnë gripit të zakonshëm, një mikrobiologu i duhet të ekzaminojë një pikë gjaku të pacientit me mikroskop për të bërë diagnostikimin e duhur.

Shkencëtarët në Britani kanë prodhuar një pajisje, të quajtur Xrapid, e cila i bashkohet celularit duke e shndërruar atë në një mikroskop të fuqishëm. Ndërsa një aplikacion, i bazuar në teknologjinë e identifikimit të fytyrës, identifikon me shpejtësi parazitët protozoarë në njollën e gjakut.

Jean Viry-Babel është drejtor i kompanisë IanXen, e cila prodhoi aplikacionin. Ai thotë se kushton shumë pak dhe funksionon menjëherë.

“Marrim pra një pamje me rezolucion të lartë të një kampioni gjaku. Ndajmë rruazat e kuqe të gjakut nga pjesa tjetër, nga rruazat e bardha dhe pllakëzat e gjakut, dhe fillojmë të shqyrtojmë individualisht secilën prej rruazave të kuqe.”

Viry-Babel thotë se aplikacioni ka çmim të ulët, është i lehtë në përdorim dhe ofron besueshmëri në masën 98%. E vetmja paisje shtesë që kërkohet është një xham i zakonshëm laboratorik.

“Ka vetëm një buton, që emërtohet ‘Diagnostiko’. Pra, thjesht e pozicionon mbi xhamin dhe gjakun e përtharë, dhe shtyp butonin që jep diagnozën ‘po’ ose ‘jo’.”

Shkencëtarët thonë se paisja do të fillojë të testohet në terren gjatë muajve janar dhe shkurt në Tanzani, Benin dhe Indonezi, ndërsa përdorimi në shkallë të gjerë mendohet të fillojë nga fundi i muajit mars.

Ata gjithashtu synojnë të zgjerojnë përshtatshmërinë e paisjes së re, duke e mësuar të njohë edhe sëmundje të tjera, si p.sh. turbekulozin etj. (voa)

Kosova

Grevë në arsim dhe shëndetësi

Komento

Në shumicën e institucioneve parauniversitare dhe ato shëndetësore në Kosovë po zhvillohet greva një ditëshe e organizuar nga sindikatat përkatëse.Greva e të dy sektorëve ka për qëllim realizimin e Kontratës Kolektive, të nënshkruar në mars të vitit të kaluar, ndërmjet Qeverisë se Kosovës dhe përfaqësuesve të bizneseve dhe punëtorëve.

Kontrata Kolektive, marrëveshja mbi të cilën është arritur në bazë të Ligjit të Punës, ligjërisht rregullon të drejtat e punëtorëve në sektorin publik dhe privat.

Rexhep Sadiku, nënkryetar i Sindikatës se Bashkuar për Arsim, Shkencë dhe Kulturë, (SBASHK) për Radion Evropa e Lirë, tha se shumica e mësimdhënësve në nivel shtetëror kanë hyrë në grevë.

“Greva ka filluar dhe gjithçka është duke u zhvilluar sipas skenarit të paraparë të SBASHK-ut. Sipas informacioneve që kemi, po zbatohet vendimi”, tha Sadiku

Kërkesat e SBASHK-ut kanë të bëjnë me pikat e parealizuara deri më tash nga Kontrata Kolektive, siç janë: shujta 2 euro për çdo ditë pune, kompensimi prej 0,5 për qind për çdo vit të shërbimit, kompensimi prej 70 për qind për biletat e udhëtimit për mësimdhënësit me rastin e pensionimit dhe tre paga mesatare për mësimdhënësit me rastin e pensionimit.

Por, zyrtarë të Ministrisë se Arsimit, Shkencës dhe Teknologjisë kanë kërkuar mirëkuptim nga SBASHK-u dhe mësimdhënësit, në mënyrë që të jepet kohë për gjetjen e një zgjidhje të qëndrueshme.

Azem Guri, këshilltar i ministrit të Arsimit, Arsim Bajrami, për Radion Evropa e Lirë, tha se nga pikat e Kontratës Kolektive si pikë më e ndjeshme është çështja e sigurimit të shujtës ditore për të punësuarit në këtë sektor.

“Kjo pikë kap shumën prej10.5 milion euro, po ashtu kërkon kohë, kërkon hapësirë dhe menaxhim të buxhetit. Prandaj ne kemi kërkuar nga SBASHK-u mirëkuptim në këtë pikë”.

“Kurse sa i përket çështjes se biletave të udhëtimit, që është e paraparë në 70 për qind të transportit urban, në takimin që ka pasur më kryetarët e komunave ministri i Arsimit Arsim Bajrami, kryetarët e komunave kanë shprehur gatishmëri që këtë pikë të përmbushin, madje disa komuna e kanë të përfunduar këtë çështje, kurse disa janë në proces e sipër”, tha Guri.

Në anën tjetër edhe punëtorët shëndetësorë në gjithë territorin e Kosovës kanë filluar grevën 24 orëshe, ka thënë për Radion Evropa e Lirë, Blerim Syla, kryetar i Federatës Sindikale të Shëndetësisë.

“Sot, Federata e Sindikatave të Shëndetësisë, gjegjësisht punëtorët shëndetësorë kanë filluar grevën nga ora 7:00 e mëngjesit. Fillimisht kërkojmë ndjesë nga qytetarët dhe i lusim ata të na mirëkuptojnë”, tha zoti Syla, duke njoftuar se greva do të zgjasë deri në orën 7 të mëngjesit të së shtunës.

Punëtorët shëndetësorë kërkojnë zbatimin e Kontratës Kolektive dhe të fillohet dialogu për rritjen e pagave.

Izet Sadiku, këshilltar i ministrit të shëndetësisë, Imet Rrahami, shprehet se sa i përket Kontratës Kolektive, pritet zbatimi i pikave të kërkuara nga punëtorët shëndetësor, por që kjo çështje kërkon kohë.

Sa i përket fillimit të dialogut për rritjen e pagave, Sadiku thotë se janë të gatshëm të diskutojnë për këtë çështje, por që rritja e pagave duhet të jetë vendim i qeverisë.

“Ata (punëtorët shëndetësorë), kanë kërkuar që të hyjmë në diskutime për këtë çështje, këtë e ka premtuar edhe Ministria e Shëndetësisë edhe kryeministri i Kosovës, Isa Mustafa. Mirëpo, nuk mund të premtohet pa ditur zhvillimin ekonomik dhe faktorë të tjerë të cilët përcaktojnë rritjen e pagave”, tha Sadiku.

Sidoqoftë, në funksion janë shërbimet emergjente në klinikat shëndetësore, transfuzioni, hemodializa dhe lindjet. (rel)

Shqipëria

Parlamenti shqyrton Gjykatën e Lartë dhe KQZ-në

Komento

Deputetët e majtë rrëzuan mbrëmë në parlament dekretet e presidentit Bujar Nishani për ligjin e Gjykatësë së Lartë dhe të ligjit tjetër për Kontrollin e Lartë të Shtetit. Ata pohuan se ligji i ri për Gjykatën e Lartë, që presidenti e ktheu për rishqyrtim, rrit transparencën dhe zgjedhjen me meritë të gjyqtarëve.Ligjvënësit e shumicës theksuan se aktualisht nuk dihet se si dhe mbi çfarë vlerësimesh presidenti zgjedh antarët e Gjykatës së Lartë. Por opozita deklaroi se ligji i ri është antikushtetues, sepse këtë kompetencë ia heq presidentit dhe ia kalon qeverisë, pra, ligji synon kapjen e Gjykatës së Lartë nga ekzekutivi.

Partia Demokratike shprehu shqetësimin se duke ia hequr presidentit kompetencën kushtetuese shumica po vonon integrimin në Bashkimin Europian. Opozita tha se ishte e gatshme për të bashkëpunuar për një reformë gjithëpërfshirëse në drejtësi, por shumica me hapin e njëanshëm sot e fragmentoi këtë proces, duke synuar thjesht ta uzurpojë sistemin gjyqësor.

Përfaqësues të shumicës thanë se ngritja e Këshillit për emërimin e gjyqtarëve të Gjykatës së Lartë nuk prek kompetencat e Presidentit. Megjithatë edhe më parë socialistët rrëzuan kandidatët e propzuar nga presidenti Nishani për antarë të Gjykatës së Lartë. Po me votat e shumicës rrëzoi edhe dekretin presidencial për të rishqyrtuar ligjin për organizimin e Kontrollit të Lartë të Shtetit.

Parlamenti miratoi në mbrëmje edhe 3 antarët e rinj të Komisionit Qendror të Zgjedhjeve, vende të mbetura të mbetura bosh prej një viti, pas dorëheqjeve qysh nga zgjedhjet e kaluara. Edlira Jorgaqi dhe Gëzim Veleshnja janë dy antarët më të rinj, ndërsa për Denar Bibën betimi mbrëmë shënoi një kthim të dyfishtë në të njëjtin post, si antar dhe si nënkryetar i KQZ, nga ku dha dorëheqjen.

Votimi dhe betimi u kryen në të njëjtën seancë, ndaj ata mund t’i bashkohen KQZ-së menjëherë për të administruar përgatitjet e zgjedhjeve vendore, të cilat tashmë kanë filluar.

Parlamenti u përfshi dje në një seancë maratonë, ku u diskutua gjatë për disa korigjime me akt normativ brenda një muaji në buxhetin e sapoaprovuar të shtetit, të cilat në fund u miratuan me votat e shumicës. (voa)