Arkivi mujor: Shkurt 2015

Kosova

Beogradi kërkon “qartësi ligjore” për Asociacionin

Komento

Pas nënshkrimit të marrëveshjeve për strukturat e sigurisë dhe gjyqësorin në veri, Prishtina dhe Beogradi në një të ardhme të afërt pritet që të shtrojnë në tavolinën e dialogut çështjen e formimit të Asociacionit të komunave serbe.
Krijimi i kësaj bashkësie nga serbët e Kosovës dhe Beogradi zyrtar vlerësohet si prioritet i lartë, ndërkohë që Qeveria në Prishtinë ende nuk ka dhënë hollësi se si do të rrjedhë procesi.

Burime të besueshme të “Kohës Ditore” që kanë njohuri për dialogun që ndërmjetësohet nga Brukseli kanë bërë të ditur se palët ende nuk kanë arritur që t’i përafrojnë qëndrimet lidhur me legjislacionin për krijimin dhe funksionalizimin e Asociacionit.

“Serbia kërkon që Asociacioni të ketë sa më shumë kompetenca ekzekutive. Dhe kjo shkon në funksion të strategjisë së Beogradit që pas një kohe heqja e Kosovës si pjesë e saj nga Kushtetuta serbe të kushtëzohet me ndryshime kushtetuese edhe në Kosovë, ndryshime këto që do të njihnin sipas kërkesës serbe, tri territore me organizim të veçantë në Kosovë nën administrimin lokal të Asociacionit që Beogradi e quan bashkësi ose komunitet”, ka thënë ky burim. /koha/

Maqedonia

DÇP kërkon dorëheqje të menjëhershme të ministrit Izairi

Komento

Lëvizja Duam Çair të pastër ka reaguar sot duke kërkuar dorëheqjen e ministrit të ekologjisë Nurhan Izairi për shkak mos menaxhimit të situatës me ndotjen e madhe që i bëhet 300 mijë banorëve të Pollogut.“KËRKOJMË DORËHEQJEN PA KUSHT DHE TË MENJËHERSHËM të ministrit të ekologjisë z. Nurhan Izairi. Ky person mund të jetë gjithçka por jo edhe ministër i ekologjisë kur para syve të tij dhe mbi 300 mijë banorëve sheh dhe nuhat edhe vetë helmin që helmon tetovarët me rrethinë! Kërkojmë dorëheqjen pa asnjë kusht dhe të menjëhershëm të ministrit Izairi.” thuhet në komunikatën e tyre. (lajm)

Maqedonia

Inspektorët: Ja pse mbrëmë kishte erë të keqe në Tetovë

Komento

Natën e mbrëmshme ne SOS linjën ekologjike të inspektoratit komunal të Tetovës (0800 55 043), si dhe në ueb modulin Tetova Eko Raport, ka pasur mbi 100 denoncime nga ana e qytetarëve për një erë të paidentifikuar gazi e cila kishte kapluar qytetin e Tetovës dhe rrethinën.Pas alarmimit të situatës, inspektorët komunal të ambientit jetësor kanë dalë në terren, gjegjësisht në vendbanimin Reçicë e e Vogël dhe fshatin Reçicë e Madhe, me çrast është konstatuar se gazi dhe ndotësi potencial i ajrit nuk vjente nga kjo zonë, por i njëjti kishte burimin nga një uzinë përpunuese të vajrave mekanik në fshatin Pallçisht, e cila ende nuk ishte pajisur me leje pune nga ana e Ministrisë për ambient jetësor dhe planifikim hapësinor.

Sipas të dhënave që morrëm nga inspektorati shtetëror i ekologjisë, pas inspektimit të kryer, fabrika në fjalë mbrëmë ka kryer prova të 2 reaktorëve prodhues dhe si pasojë e këtij veprimi është karakteristike era të cilën e kanë ndier qytetarët e Tetovës, por e cila nuk ka pasoja të dëmshme për shëndetin e tyre.

Të vetëdijshëm për situatën e ndotjes me të cilën po përballemi, komuna e Tetovës është maksimalisht e përkushtuar në luftën kundër ndotjes së ajrit ambiental , andaj apelojmë dhe inkurajojmë qytetarët, që në çdo kohë të raportojnë për situata të tilla, përfshirë këtu edhe rastet kur kemi të bëjmë me ndotës potencial që veprojnë jashta kufijve komunal të komunës së Tetovës, siç edhe ishte rasti i mbrëmshëm në f.Pallçisht, dhe e gjithë kjo me të vetmin qëllim për senzibilizim të situatës dhe inkurajim të reagimit sa më të shpejtë dhe ekspeditiv të institucioneve përgjegjëse. (lajm)

Maqedonia

Kim Mehmeti: Pa mbështetjen e BDI-së dhe PDSH-së ky regjim s’do kishte jetë

Komento

Postimi i plotë i publicistit Kim Mehmeti në profilin e tij të facebook-ut:“E dini se cila është pyetja më e pakuptimtë që ditëve të fundit ma shtrojnë disa shqiptarë të Maqedonisë: Se a do ketë ndonjë “bombë” të opozitës që do e shpalosë kriminalitetin eventual të kryesuesve të BDI-së e PDSH-së?! Pyetje kjo që më çon të pyes veten: Vallë shqiptarët e këtushëm ende nuk e dinë se po të mos kishte mbështetjen e BDI-së dhe PDSH-së, ky regjim nuk do mund të mbetej në këmbë as një ditë të vetme?! Është e mundur vallë që shqiptarët e Maqedonisë të mos e kenë kuptuar se pa mbulesën e partive shiptare, do ishte e pamundur që para hundëve të tyre të ‘shpërthenin’ bombat si ajo e rastit të ‘Sopotit’, ‘Brodecit’, ‘Enciklopedisë maqedonase’, të rastit ‘Monstra’, të projektit ‘Shkup 2014’, të likuidimit të Harun Aliut me shokët…. Dhe është e mundur vallë të ketë ndonjë shqiptar që ende nuk e ka kuptuar pse kryesuesit e BDI-së kurrë nuk e përmendin emrin e heroit të UÇK-së, Harun Aliut dhe pse tani kërkojnë që ndërkombëtarët ta pastrojnë plehun që e la pas vetes regjimi, pjesë e të cilit ishte edhe BDI-ja?!” (lajm)

Maqedonia

Sa më shumë heshtin tetovarët, aq më shumë ndotet ajri

Komento

Mbrëmë ne orët e pas mesnatës qytetarë të shumtë të Tetovës janë ankuar për një erë të çuditshme gazi që ka kapluar qytetin dhe rrethinën, duke shkaktuar probleme të frymëmarrjes.Shumë mesazhe dhe telefonata shqetësimi kanë arritur edhe deri te aktivistët e lëvizjes Eco Guerilla. “Tetova një kohe të gjatë është peng i këtij terrori ekologjik që po ushtrohet mbi qytetarët e saj. Duke dashur që mos të krijohen spekulime dhe dyshime mbi përmbajtjen e këtij gazi, Eco Guerilla bën thirrje që në mënyrë urgjente të prononcohen zyrtarisht ministri i Ekologjisë dhe Komuna e Tetovës. Gjithashtu, ftojmë qytetarët që të paraqiten në linjën telefonike 0800 55 043 e cila është pa pagesë dhe web aplikacionin E-report Tetova, ku në çdo kohë mund ti paraqesin problemet me ndotjen e ajrit dhe ambientit”, thuhet në reagimin e Organizatës “Eco Guerrilla”. (lajm)

Kosova

Kosova në vijën e zjarrit në konfliktin Washington-Moskë”

Komento

Sipas fjalëve të sekretarit amerikan të shteti John Kerry, disa vende europaine gjenden në “vijën e frontit në konfliktin ndërmjet Washingtonit e Moskës.“Bëhet fjalë për Kosovën, Serbinë,Malin e Zi, Maqedoninë dhe vendet tjera: Gjeorgjinë, Moldavinë, Pridnjestrovla – ato janë në vijën e zjarrit”, ka deklaruar Kerry, transmeton RIA “Novosti”, përcjell koha.

35t ruse më herë kishin raportuar për gjoja pjesëmarrjen e ish-luftëtarëve të UÇK-së në luftimet në Ukrainë e kundër separatistëve.

Rusia në kohë të fundit ka akuzuar Serbinë për shkak se qeveria e saj ka angazhuar shtëpinë konsultative të ish – kryeministrit britanik Tony Blair. (rtk)

Shqipëria

PE, rekomandimet për Shqipërinë, hartohet projektrezoluta

Komento

Komiteti i Jashtëm i Parlamentit Europian pritet të shqyrtojë projektrezolutën për Shqipërinë, bazuar në gjetjet e raportuesit Knut Fleckenstein. Eurodeputeti socialdemokrat vizitoi Tiranën në mes të janarit dhe pas dy javësh dorëzoi pranë sekretariatit raportin e tij ku mbizotëron thirrja për dialog politik.

Top Channel zbardh pjesët kryesore të këtij dokumenti, ku në më pak se 6 faqe përmblidhen 24 rekomandime.

Pika B
Ndërsa miratimi konsistent dhe zbatimi efektiv i reformave të qëndrueshme mbi 5 prioritetet kyçe shërbejnë për transformimin demokratik të Shqipërisë dhe i hapin rrugën nisjes së negociatave të anëtarësimit në BE;

Pika C
Anëtarësimi në BE është një proces gjithëpërfshirës që i takon vendit dhe gjithë qytetarëve të tij; ndërsa mungesa e dialogut të qëndrueshëm politik mund të pengojë progresin e mëtejshëm në procesin e anëtarësimit; Shqipëria ka nevojë për një konsensus kombëtar mbi agjendën e reformës;

Pika 10
Fton autoritetet kompetente të nxisin integritetin dhe pavarësinë e institucioneve kyçe të demokracisë, sikundër dhe depolitizimin e gjyqësoit; fton autoritetet kompetente të proçedojnë pa vonesa të tepërta në dhënien e drejtësisë për viktimat e ngjarjeve të 21 Janarit 2011″.
/ Top Channel

Kosova

Rexhep Qosja: Mjaft me aleanca balte! Koha për politikë etike

Komento

Ai është njëri prej kritikëve më të mëdhenj të aleancës PDK dhe LDK, të cilën e ka quajtur edhe “aleanca e baltës”. Për të shprehur qëndrimin e tij për situatën ekonomike dhe politike në Kosovë, rajon dhe në Europë, pjesa e tretë e “Shqip” solli një intervistë me Akademikun Rexhep Qosja. Rudina Xhunga: Ndalemi pak në rajon, Tsipras në Greqi, ishte sipas jush njeriu ideologjik, njeriu me parime, njeriu se tregoi se kush guxon fiton, i një Europe prej së cilës duhet mësuar, qoftë nga ata që pretendojnë pushtetin si të rinj në Shqipëri edhe ata në Kosovë por që sdurojnë dot dhe kujtojnë se mund të bësh aleancë me këdo.

Rexhep Qosja: Unë mendoj se ai është një formacion i rëndësishëm jo vetëm për Greqinë, por edhe për Europën. E para sepse sjell një politikë të re, e dyta sepse sjell një etikë të re në politikë. Ne jemi mësuar të kemi politikë pa etikë. Emanuel Kanti thotë se herët a vonë politika pa etikë dështon. Ata sollën një etikë të re dhe në atë etikë të tyre, ata i sollën besimin popullit. E keni parë çfarë bën? 700 vetura të administratës së qeverisë së mëparshme i nxorrën në shitje, veturën 750 mijë euro të kryeministrit të mëparshëm e nxorën në shitje. E dini se me çfarë shkojnë në punë ata? Me veturat e veta.

Rudina Xhunga: Atëherë na duhet të rikthejmë marksizmin?

Rexhep Qosja: Jo. Mendoj se në radhe të parë ata janë socialdemokratë. Ata po mbrojnë dhe krijojnë një model të ekonomisë atdhetare, jo të ekonomisë neoliberale. Çfarë është ekonomia atdhetare? Mospajtimi me privatizimin e çdo gjëje. Neoliberalizmi ka sjellë varfërimin e tmerrshëm të të varfërve dhe pasurimin e paarsyeshëm të të pasurve.

Rudina Xhunga: Kosovën si e shikoni 8 apo 10 vjet më pas, apo gjërat do të vinë drejt bashkimit, drejt bashkëpunimit në fillim në ekonomi e mandej në të gjitha. Çfarë shikoni ju përtej, çfarë shikoni ju që këta njerëzit që po ikin nuk e shikojnë?

Rexhep Qosja: Unë para ca kohësh shkrova se Kosova e sotme nuk është Kosova që kam ëndërruar. Pse? Sepse ka shumë padrejtësi në Kosovë, demokracia parlamentare është një mbulesë, një mbulesë e një realiteti politik jodemokratik. Në shtetin e së drejtës përfshihet edhe e drejta sociale, nuk përmendet kurrkund kjo. Të zbatohej kjo e drejtë sociale, njerëzit nuk do të iknin kaq lehtë, nuk është e lehtë të lësh shtëpinë, tokën, është shumë e vështirë.

Rudina Xhunga: Po ju nuk do e lini kurrë Kosovën?

Rexhep Qosja: Nuk do e lë natyrisht. Është lehtë ta duash Amerikën, Francën, Anglinë, Gjermaninë, janë shtete të mëdha dhe të pasura, por ta duash Kosovën dhe Shqipërinë bashkë është atdhetarizëm i vërtetë.

Rudina Xhunga: A është i pashmangshëm bashkimi i shqiptarëve?

Rexhep Qosja: Është mendim që e kam mbrojtur gjithmonë në shkrimet e mija, shqiptarët të bashkohen. Ideja e bashkimit të shqiptarëve është forca që e ka lëvizur historinë shqiptare. Kjo ide e ka çuar Kosovën tek liria dhe pavarësia që ka sot. Ushtria Çlirimtare e Kosovës hyri në luftë me këtë ideal, me këtë ide të madhe. Mendimi për një jetë më të mirë të shqiptarëve është edhe arsyeja pse nuk mund të heqim dorë prej kësaj ideje, ideja e bashkimit të shqiptarëve, e cila pashmangshmërisht do të ndodh një ditë. (tch)

Analiza

Bashkimi i shqiptarëve, i pashmangshëm

Komento

Akademik Rexhep Qosja ka përsëritur edhe një herë se bashkimi i shqiptarëve është i pashmangshëm. Ai ka bërë me dije se ideja e bashkimit është forca që e ka lëvizur historinë e shqiptarëve, duke shtuar se kjo ide e ka formuar UÇK-në dhe e ka çliruar Kosovën.Në një intervistë të gjatë për emisionin “Shqip” në “Top Channel”, pjesë nga e cila sjell “Epoka e re”, Qosja ka deklaruar se një arsyeje se pse nuk mund të heqim dorë prej kësaj ideje, është edhe mendimi për një jetë më të mirë të shqiptarëve në një shtet. “Është mendim që e kam mbrojtur gjithmonë në shkrimet e mia, shqiptarët të bashkohen. Ideja e bashkimit të shqiptarëve është forca që e ka lëvizur historinë shqiptare. Kjo ide e ka çuar Kosovën tek liria dhe pavarësia që ka sot. Ushtria Çlirimtare e Kosovës hyri në luftë me këtë ideal, me këtë ide të madhe. Mendimi për një jetë më të mirë të shqiptarëve është edhe arsyeja pse nuk mund të heqim dorë prej kësaj ideje, ideja e bashkimit të shqiptarëve, e cila pashmangshmërisht do të ndodhë një ditë”, ka thënë Qosja.
Duke folur për këta shatë vjet të shtetit Kosovës, ai ka thënë se në ndërtimin e shumë institucioneve dhe në anëtarësimin e Kosovës në shumë organizata rajonale dhe ndërkombëtare është shënuar sukses. Mirëpo, sipas Qosjes, shteti i Kosovës ka ngecur në disa fusha. “Unë para ca kohësh shkrova se Kosova e sotme nuk është Kosova që kam ëndërruar. Pse? Sepse ka shumë padrejtësi në Kosovë, demokracia parlamentare është një mbulesë, një mbulesë e një realiteti politik jodemokratik. Në shtetin e së drejtës përfshihet edhe e drejta sociale, nuk përmendet kurrkund kjo. Të zbatohej kjo e drejtë sociale, njerëzit nuk do të iknin kaq lehtë, nuk është e lehtë ta lësh shtëpinë, tokën. Është shumë e vështirë”, ka thënë Qosja.
Mjaft kritik ai është shprehur edhe ndaj privilegjeve të mëdha të pushtetarëve dhe ndaj pasurimit të shpejtë të disa individëve. “Si mund të jesh për aq pak kohë në pushtet në Kosovën e varfër dhe të kesh aq shumë miliona, aq shumë privilegje? Nuk mund të pajtohem me këto padrejtësi”, është shprehur akademik Qosja.

Fajtorë për ikjet janë shqiptarët, jo serbët

Akademik Rexhep Qosja në këtë intervistë ka folur edhe për eksodin e ikjeve të qytetarëve të Kosovës. Ai ka vlerësuar se qytetarët e Kosovës po ikin nga vendi për shkak të situatës së pashpresë në vend. Qosja ka shtuar se këtë e kanë nxitur gjendja e rëndë ekonomike dhe mungesa e institucioneve qendrore për gjashtë muaj. “Kjo ikje tregon shumë dhe nuk flet mirë për Kosovën. Kjo ikje që po zgjat që katër muaj, ndoshta prej shatorit të vitit të kaluar dhe nuk e di se sa do të zgjasë dhe a do të ndërpritet, tregon se diçka është e paqartë, e pacaktuar në këtë politikën tonë. Janë shfaqur mendime të ndryshme për këtë eksod të ri të ikjeve të shqiptarëve prej Kosovës. Unë them se fajtori më i madh dhe kryesori jemi ne, shqiptarët”, është shprehur akademik Qosja.
Pretendimet e politikanëve të Kosovës, se për këtë eksod është fajtore Serbia që i ka hapur kufijtë, sipas tij, janë të pavërteta. “Tashti këta të politikës mund të arsyetohen se serbët kanë faj por, jo, tani serbët nuk kanë faj për eksodin e shqiptarëve, aspak nuk kanë faj. Serbia i ka çel kufijtë edhe për të tjerët, edhe për shqiptarët”, ka thënë Qosja. Ndër të tjera, ai ka treguar se, pavarësisht gjendjes në vend, nuk do ta lë kurrë Kosovën. “Nuk do ta lë, natyrisht. Është lehtë t’i duash Amerikën, Francën, Anglinë, Gjermaninë, janë shtete të mëdha dhe të pasura, por t’i duash Kosovën dhe Shqipërinë bashkë është atdhetarizëm i vërtetë”, ka thënë ai.
Qosja edhe një herë e ka kritikuar koalicionin qeverisës PDK – LDK, duke e cilësuar këtë partneritet si “aleancë e baltës”. Ai ka thënë se është koha të kemi një politikë me etikë. Ndërkaq, i pyetur për fitoren e ‘Syrizas’ në Greqi, akademik Qosja ka thënë se ai është një formacion i rëndësishëm jo vetëm për Greqinë, por edhe për Evropën. “E para, sepse sjell një politikë të re. E dyta, sepse sjell një etikë të re në politikë. Ne jemi mësuar të kemi politikë pa etikë. Imanuel Kanti thotë se herët a vonë politika pa etikë dështon. Ata sollën një etikë të re dhe në atë etikë të tyre, ata ia sollën besimin popullit. E keni parë çfarë bën? 700 vetura të administratës së qeverisë së mëparshme i nxorën në shitje, veturën 750 mijë euro të kryeministrit të mëparshëm e nxorën në shitje. E dini se me çfarë shkojnë në punë ata? Me veturat e veta”, ka deklaruar Qosja.

Rugova nuk është arkitekt i pavarësisë

Akademik Rexhep Qosja e ka kritikuar presidenten e vendit, Atifete Jahjaga dhe gjithë ata që ish-presidentit të Kosovës, Ibrahim Rugova, i drejtohen si arkitekt i pavarësisë së Kosovë. Ai ka thënë se si mund ta ketë Rugova këtë epitet kur për pavarësinë e Kosovës janë paraqitur individë dhe grupe, duke filluar prej Adem Demaçit në vitet 1958 e këndej. “Ne e dëgjojmë kryetarin e Kosovës përditë duke thënë se Rugova është arkitekti i pavarësisë së Kosovës. Po mirë, si mund të jetë ky njeri arkitekt i pavarësisë së Kosovës, kur për pavarësinë e Kosovës janë paraqitur individë dhe grupe duke filluar prej Adem Demaçit në vitet 1958 e këndej, duke filluar prej grupeve ilegale të disa organizatave, duke filluar prej organizatave të vitit 1981, duke filluar prej intelektualëve që kanë shkruar shumë para se ta çelte gojën kryetari i Lidhjes Demokratike, Ibrahim Rugova, me kolegët e tij. Jo, ai s’është arkitekt. Si mund të jetë arkitekt i pavarësisë së Kosovës njeriu që bëri programin e partisë për një autonomi të Kosovës më të dobët se autonomia e vitit 1974, një autonomi pothuajse komunale ose kulturore. Nuk mundet”, ka thënë Qosja, i cili është shfaqur kritik edhe ndaj Isa Mustafës për të kaluarën e tij dhe të tashmen, duke thënë se ai nuk e meriton të jetë kryeministër i Kosovës.

Shkenca

NASA, 5 misione për studimin e tokës

Komento

Agjencia amerikane e hapësirës, NASA, është duke i dhënë fund periudhës së saj 12-mujore më të ngarkuar në më shumë se një dekadë, pas realizimit të katër misioneve në vitin 2014 dhe përgatitjes së misionit të pestë të planifikuar për më 29 janar.Siç njofton korrespondejta e Zërit të Amerikës Rosanne Skirble, instrumentet që do të dergohen në orbitë do të studiojnë sistemet vitale të Tokës që mbështesin jetën dhe se si po reagojnë ato ndaj ngrohjes së planetit.

Sondat e fundit të flotës së NASA-s e sjellin në 18 numrin e instrumenteve që vëzhgojnë tokën.

Së pari, në shkurt të vitit të kaluar filluam misionin GPM ose Matja e Reshjeve Globale, thotë shkencëtari i NASA-s, Tom Wagner.

“Ky sistem do të na ndihmojë të kuptojmë më mirë reshjet, do të jetë në gjendje të masë nivelin e borës në atmosferë, dhe në përgjithësi do të përmirësojë njohurinë tonë mbi reshjet”.

GPM u pasua nga misioni për vëzhgimin e dioksidit të karbonit orbital ose OCO-2. Zoti Wagner thotë se kjo është e rëndësishme, duke patur parasysh se lirimi i dioksidit të karbonit është kontribuesi kryesor i ngrohjes globale.

“Një nga gjërat më të rëndësishme që ne kemi nevojë të dijmë është se nga vjenë dioksidi i karbonit dhe ku po shkon. A thithet nga oqeani? A po lirohet nga tharja e Arktikut? Dhe, në qoftë se ne duam të kuptojmë se ku do të jetë planeti ynë në 50 ose 100 vjet, në duhet t’i kuptojmë këto lloje të proceseve”.

Në vitin e fundit, janë montuar dy instrumente në Stacionin Ndërkombëtar të Hapësirës.

“Është hera e parë që ne jemi duke vënë instrumente në Stacionin Hapësinor për të vëzhguar Tokën. Stacioni i hapësirës është një platformë e rëndësishme sepse ka shumë energji”.

Një nga instrumentet quhet RapidScat. Nga pozita e tij fikse jashtë stacionit hapësinor, ai dokumenton shpejtësinë e erërave që lëvizin në sipërfaqe të oqeanit, duke siguruar të dhëna të cilat mund të përmirësojnë modelet klimatike dhe parashikimin e motit. Instrumenti tjetër quhet CATS.

“Ky instrument përmes lazerave do të përpiqet të kuptojë marrëdhëniet mes ndotësve dhe grimcave të tjera dhe formimit të reve”.

Sateliti tjetër që do të dërgohet në orbit quhet SMAP dhe do të analizojë lagështinë. Fokusi i tij është cikli i ujit, një element kritik për jetën në planet. Zoti Wagner thotë se SMAP dhe mjetet e tjera do të monitorojnë shëndetin e sistemeve jetike të Tokës.

“Fakti i thjeshtë është se Toka është e gjitha e ndërlidhur. Në qoftë se dëshironi ta kuptoni atë, ju duhet të bëni matje në mbarë planetin, gjatë gjithë kohës, për ta kuptuar më mirë atë që po ndodh. Dhe satelitët janë një nga mënyrat më të mira për ta bërë këtë”.

Shkenctari i NASA-s Tom Wagner thotë se nga arkiva e madhe e të dhënave që vijnë nga satelitët përfitojnë parashikuesit e motit dhe shkencëtarët që përdorin modelet e parashikimit të motit. Të dhënat e NASA-s ndihmojnë edhe fermerët dhe menaxhuesit e oqeaneve dhe tokës që të marrin vendime më të mira në përgjigje të ngrohjes globale. (voa)