Arkivi mujor: Mars 2015

Bota

Ide për një ushtri të përbashkët në Evropë

Komento

Me këtë ushtri Evropa mund të reagojë në mënyrë të besueshme ndaj ndonjë kërcënimi të paqes në një shtet anëtar ose në një vend fqinj të BE-së.Në kuadër të konfliktit me Rusinë, Presidenti i Komisionit të BE-së, Zhan-Klod Junker u shpreh për krijimin e një ushtrie të përbashkët në Evropë. Me këtë ushtri Evropa mund të reagojë në mënyrë të besueshme ndaj ndonjë kërcënimi të paqes në një shtet anëtar ose në një vend fqinj të BE, tha Juncker për gazetën “Welt am Sonntag” (08.03). Përfaqësuesit e koalicionit qeveritar gjerman e mbështesin këtë ide.
Ministrja gjermane e Mbrojtjes Ursula von der Leyen (CDU)

tërhoqi vëmendjen për bashkëpunimin ushtarak tashmë në rritje midis shteteve evropiane dhe tha se: “Është mirë të kemi një ushtri të fortë evropiane për ta bërë të qartë se ne jemi të vendosur për të mbrojtur të drejtat e njeriut në botë, dhe veçanërisht për të mbrojtur paqen.”
Social-demokrati Hans-Peter Bartels tha: “Kur kemi arritur te një ushtri evropiane apo struktura më të mira të mbrojtjes evropiane, gjë që do të bëhet gradualisht, kjo do të ishte një shtyllë evropiane e NATO-s.”
Kurse Christine Buchholz, nga partia opozitare E Majta, e kritikoi idenë e Zhan-Klod Junkerit. Ajo tha: “Z. Juncker godet në këtë mënyrë hapur përpjekjet për të gjetur një zgjidhje paqësore apo një zgjidhje deeskalimi.” (dw)

Kosova

Amandamentet për Gjykatën Speciale në Kushtetuese

Komento

Amandamentet e propozuara nga Qeveria e Kosovës për themelimin e Gjykatës Speciale për krimet e luftës, i janë proceduar Gjykatës Kushtetuese për interpretim.Sipas procedurave, në rastet kur inicohen ndryshime kushtetuese, “fillimisht, vlerësimin e bën Gjykata Kushtetuese, andaj edhe kësaj radhe kështu është vepruar”, ka thënë kryetari i Kuvendit të Kosovës, Kadri Veseli.

Në momentin që Gjykata Kushtetuese e interpreton kushtetutshmërinë e procedimit të ndryshimeve në Kushtetutë, atëherë, sipas kryekuvendarit të Kosovës, Kuvendi do të vijojë me procedurat tjera.

Veseli ka thënë se Kosova tashmë ka marrë obligime ndërkombëtare për krijimin e Gjykatës Speciale.

“Ky është një obligim që nga prilli i vitit 2014, në një letër këmbim në mes të përfaqësuesve të Republikës së Kosovës dhe Bashkimit Evropian. Do të thotë, është një vazhdimësi dhe jemi në një procedim të cilin tani e ka bërë Qeveria e Kosovës dhe më pas, Kuvendi do të marrë ato vendime të cilat janë në përputhje me Kushtetutën e Kosovës dhe në interesin e qytetarëve tanë”, ka thënë Veseli.

Themelimi i Gjykatës Speciale po kundërshtohet nga partitë opozitare.

Shefja e Grupit Parlamentar të Aleancës për Ardhmërinë e Kosovës, Donika Kadaj Bujupi, ka thënë për Radion Evropa e Lirë se politika duhet të qëndrojë larg gjyqësorit.

Sipas saj, praktika në Kosovë ka dëshmuar se jo vetëm vendorët, por edhe faktori ndërkombëtar nga fusha e drejtësisë, nuk është treguar i paanshëm, duke e përmendur këtu sidomos EULEX-in dhe skandalet e përfolura për të cilat edhe BE-ja ka inicuar hetime.

“Qëndrojmë pranë asaj se nuk do ta votojmë. Konsiderojmë se për çështjet e lidhura me drejtësinë në Kosovë, sidomos pas skandaleve të përcjellura me ndërhyrjet e politikës, përkatësisht ish-kryeministrit Thaçi dhe skandaleve që ndërlidhen edhe me gjyqtarë të EULEX-it, duhet të jipen shumë përgjigje rreth çështjeve që lidhen me drejtësinë në vend”, ka thënë Kadaj Bujupi.

Në anën tjetër kryetari i Kuvendit të Kosovës, Kadri Veseli, ka shprehur mendimin e tij personal se Gjykata Speciale nuk do të njollosë luftën e Ushtrisë Çlirimtare të Kosovës, siç është duke pretenduar opozita përmes distancimit të saj nga miratimi i ndryshimeve kushtetuese për themelimin e kësaj gjykate.

“Personalisht them që UÇK-ja ka bërë një luftë të drejtë çlirimtare me të cilën e ka çliruar këtë popull nga padrejtësitë dhe robëria dhe të gjithë luftëtarët e UÇK-së kanë qenë luftëtarë të lirisë. Çdo gjë që ka të bëjë me të drejtën e UÇK-së, me të drejtën e Kosovës si shtet, ne do ta procedojmë në mënyrën që asnjë njollë të mos i mbetet Kosovës, qytetarëve të saj dhe luftës së shenjtë të UÇK-së për çlirim”, ka deklaruar Veseli.

Qeveria e Kosovës dhe koalicioni qeverisës, themelimin e Gjykatës Speciale po e shohin si një mundësi të mirë që Kosova t’u jap fund edhe dilemave e dyshimeve te një pjesë e faktorit ndërkombëtar, rreth supozimeve për krimet e luftës.

Kryeministri Isa Mustafa, ka deklaruar se themelimi i kësaj gjykate nuk ndikon në zbehjen e luftës së Ushtrisë Çlirimtare të Kosovës.

“Mendojmë se kjo është mirë të bëhet, sepse emri i Kosovës, emri i UÇK-së, emri i qytetarëve, grave e burrave që kanë marrë pjesë në luftën çlirimtare duhet të pastrohet dhe ne nuk duhet të lejojmë që asnjë njollë të vihet dhe mbetet mbi këtë emër”, ka theksuar kryeministri Isa Mustafa.

Për miratimin e amendamenteve Kushtetuese në lidhje me Gjykatën Speciale, Kuvendi i Kosovës duhet të sigurojë 80 vota për, si dhe dy të tretat e votave të deputetëve nga radhët e pakicave.

Aktualisht, komuniteti serb ka ngrirë aktivitetin e vet në institucionet qendrore, kështu që kthimi i këtij komuniteti në Kuvend do të jetë i domosdoshëm për ndryshimet kushtetuese.

Nëse koalicioni në pushtet arrin që t’i bëjë ndryshimet e nevojshme kushtetuese, më pas pritet që të votohet edhe ligji për themelimin e kësaj gjykate.

Themelimi i këtij “mini” Tribunali Ndërkombëtar për Kosovën, pason hetimet e iniciuara nga Këshilli i Evropës, që si bazë kishin dyshimet e supozuara të zviceranit Dick Marty, mbi trafikimin e organeve të serbëve nga pjesëtarët e ish-Ushtrisë Çlirimtare të Kosovës.

Në bazë të këtyre supozimeve, prokurori amerikan Clint Williamson, ka zhvilluar edhe një hetim të gjerë.

Paraprakisht, po në lidhje me themelimin e kësaj gjykate, një ekip nga Kosova, i kryesuar nga ministri i Drejtësisë në Qeverinë e Kosovës, Hajredin Kuçi, ka zhvilluar negociata me Brukselin rreth infrastrukturës ligjore e kushtetuese. (rel)

Shqipëria

“Shkëmbim studentësh mes Bavarisë dhe Shqipërisë”

Komento

Intervistë ekskluzive për DW me Ministren e Bavarisë për Evropën dhe Çështjet Ndërkombëtare, Dr. Beate Merk.DW: Znj. Ministre, çfarë qëllimesh dhe pritshmërishë kanë vizitat që ju bëtë fundjavën e kaluar në Serbi, Kosovë dhe Shqipëri?
Dr. Beate Merk: Qëllimi i kësaj vizite është që njerëzve në Serbi, në Kosovë dhe në Shqipëri t’u bëhet e qartë që Gjermania ka rregulla. Pjesë e këtyre rregulave është edhe mosmiratimi i kërkesave për azil të shtetasve nga Kosova, Serbia, dhe Shqipëria. Është shumë e rëndësishme, ta theksoj këtë, sepse një pjesë e njerëzve shesin gjithçka që ata kanë dhe marrin rrugën drejt Gjermanisë. Fatkeqësia vjen më pas kur kthehen, nuk gjejnë më asgjë dhe u rrezikohet vetë egzistenca e tyre.
Sipas raportit të fundit të Komisionit Europian për liberalizimin e regjimit të vizave në Ballkanin Perëndimor, Gjermania është vendi anëtar i BE që merr numrin më të madh të aplikimeve për azil. Cila është situata në Gjermani lidhur me azilkërkuesit nga Ballkani Perëndimor dhe në veçanti nga vendet që ju sapo vizituat: Serbia, Kosova dhe Shqiperia?
Numri i azilkërkueve shqiptarë është rritur shumë kohët e fundit, ndërkohë që nga vende të luftës civile si Siria numri i azil kërkuesve është 44 mijë, numri i azilkërkuesve nga Ballkani është 66 mijë. Të premten e kaluar ( 6 mars 2015) është bërë kërkesë në Parlamentin gjerman që Shqipëria të klasifikohet si vend i sigurtë. E drejta për azil u rezervohet atyre që vijnë nga zona të luftës, të luftës civile ku jeta e tyre është në rrezik apo nga vende ku njerëzit persekutohen për motivre politike dhe jo për ata që marrin rrugën dhe vijnë në Gjermani dhe kërkojnë azil për motive ekonomike.
Ç’masa planifikon të marrë Gjermania në rast të një vazhdimi të abuzimit të mundshëm me liberalizimin e vizave nga vendet e Ballknait Perëndimor dhe për pasojë shtimit të kërkesave për azil nga qytetarët e këtyre vendeve?
Masa e parë që do të ndërmerret do të jetë ajo e mosdhënies më shërbime në para por vetëm në mallra, pasi kemi parë që shërbimi në para është një sinjal negativ që nxit njerëzit për të kërkuar azil në Gjermani. Masa tjetër do të jetë shkurtim sa më parë që të jetë e mundur i procedurave të azilit, në mënyrë që, të gjithë atyre që nuk u përket e drejta për të kërkuar azil dhe për t’iu miratuar të kthehen sa më shpejt në vendet e tyre.
Me këto masa shpresohet që në Gjermani të ulet në mënyrë drastike numri i kërkesave nga vendet e Ballkanit Perëndimor për azil me motive ekonomike, ndërkohë që liria e lëvizjes përbën parakusht për vazhdimin e kërkesave të tilla. Në këto kushte cilat janë argumentat e Gjermanisë për të vazhduar mbrojtjen e liberalizimit të vizave dhe lirinë e lëvizjes për qytetarët e Ballkanit Perëndimor?
Ka një dallim shumë të madh nëse shkon në një vend për arësye ekonomike apo shkon atje për vizitë turistike. Koncepti i liberalizimit të vizave ka të bëjë vetëm me këtë të dytën, pra që njerëzit të lëvizin të lirë vetëm për vizita turistike. Kjo është një mundësi dhe përparësi shumë e madhe për një vend, pasi qytetarët e tij kanë mundësi të lëvizin në vendet e BE, të shohin mënyrën europianë të jetesës, funksionimin e shtetit ligjor, demokracisë.
Z. Merk, po përfitoj nga prania juaj në Tiranë dhe t’ju drejtoj një pyetje lidhur me marrdhëniet mes Bavarisë dhe Shqipërisë, të vendosura 30 vjet më parë me vizitën historike të politikanit gjerman Franz Josef Strauss, në gusht 1984, në Shqipërinë e atëhershme të izoluar, komuniste. Tani që Shqipëria është një vend kandidat për anëtarësim në BE, cilat shihni si fusha për forcimin e bashkëpunimit me interest të ndërsjelltë? Si do ta mbështesë Bavaria Shqipërinë në përpjekjet për t’iu afruar BE?
Para pak kohësh patëm nderin të festonim 30 vjetorin e vizitës së Franz Josef Shtraus në Shqipëri. Dhe është një sinjal shumë pozitiv të shohësh sesi ka ecur Shqipëria në këto 30 vjet, çfarë ndryshimesh pozitive dhe progresi ka ndodhur. Dhe sesi gjatë këtyre 30 viteve është rritur edhe miqësia gjermano – shqiptare. Në Shqipëri për të festuar 30 vjetorin e marrdhënieve mes Bavarisë dhe Shqipërisë erdhi zv. Presidenti i Bundestagut gjerman, deputeti Johannes Singhammer. Është shumë mirë që Shqipëria është vend kandidat për t’u bërë pjesë e BE dhe shumë i angazhuar për të arritur këtë qëllim. Ne kemi gadishmërinë për ta ndihmuar në këtë rrugë. Patëm një bisedë me Erion Veliaj, Ministër i Mirëqënies Sociale dhe Rinisë, ku diskutuam mënyra dhe forma sesi Shqipëria të ndihmohet për të bërë hapa përpara drejt BE. Duam të forcojmë shkëmbimim e formimit shkollor, të studentëve, pra që studentë nga Shqipëria të vijnë të studiojnë në Bavari dhe pse jo, studentë nga Bavaria të vijnë të studiojnë në Shqipëri. Është edhe një tregues i mirë përballë Bashkimit Europian për të sinjalizuar sesi Shqipëria po lufton për t’u integruar dhe sesi njerëzit në Shqipëri po përpiqen për të ecur përpara dhe jo për ta lënë vendin e tyre. (dw)

Bota

Katastrofa siriane

Komento

Katër vjet më parë, sirianët u ngritën kundër regjimit të Assadit. Protestat u përhapën në luftë me shumë fronte. Shpejt nisën të luajnë rol edhe xhihadistët. Tani janë ata që i garantojnë mbijetesën politike Assadit.”Populli dëshiron përmbysjen e regjimit” – fjali si këto lexoje të sprucuara në mure godinash dhe shtëpish në mars 2011, në qytetin e Sirisë jugore, Daraa, të shkruara nga disa nxënës. Këta nxënës i arrestuan, gjë që i bëri banorët e qytetit të protestojnë në rrugë kundër arrestimit. Forcat e sigurisë të regjimit të Assadit pas kësaj hapën zjarr kundër demonstruesve. Kjo i bëri në ditët dhe javët në vazhdim edhe më shumë sirianë që të protestojnë në mënyrë paqësore kundër veprimit të ashpër të qeverisë. Por edhe këto demonstrata, regjimi i luftoi në mënyrën më të vendosur – dhe nisi me këtë një spirale dhune, viktimë e së cilës kanë rënë deri sot gati një çerek milioni sirianë. Të tjerë përpiqen që t’i shpëtojnë dhunës që ka kaluar çdo kufi. Rreth katër milionë sirianë janë larguar nga vendi që atëherë, rreth gjashtë milionë e gjysmë janë kthyer në migrantë të brendshëm.
Por prej kohësh sirianët nuk marrin arratinë vetëm nga dhuna e regjimit. Ata përpiqen t’u shpëtojnë edhe akteve mizore të grupeve xhihadiste, si të Frontit Al-Nusra, por para së gjithash të “Shtetit Islamik” (IS). Ai vepron pa mëshirë kundër atyre që i ka shpallur “të pafe” në rajonet që ka pushtuar.

“Repertor standard i diktatorëve”
Që xhihadistët arritën të përhapen kaq shumë në Siri si dhe në Irakun fqinj, kjo ka të bëjë drejtpërdrejt me Assadin, thotë politologu Nadim Shehadi, i cili punon në Qendrën Kërkimore britanike, Chattham House. Për Assadin nuk ekzistonte mjet tjetër më i mirë se ky, për ta larguar regjimin e tij nga shënjestra. “Një mënyrë e tillë veprimi bën pjesë në repertorin standard të diktatorëve. Hap burgjet, liron kriminelët. Shkakton kaos dhe pastaj hiqesh sikur do ta luftosh këtë kaos – dhe e rifiton në këtë mënyrë legjitimitetin tënd.”
Me të vërtetë, vështrimi i bashkësisë ndërkombëtare ndaj Sirisë ka ndryshuar në mënyrë të konsiderueshme. Nëse në vitin e parë të luftës, në qendër të vëmendjes ishin aktet mizore të regjimit të Assadit, në muajt pasues në qendër të vëmendjes avancuan marshimi fitimar dhe më pas aktet mizore të IS. Prerje koke, djegia në të gjallë i një piloti jordanez, njerëz që i hedhin nga katet më të larta të ndërtesave poshtë: me dhunën e tij të shfrenuar IS i tmerroi njësoj si myslimanët, ashtu edhe jo myslimanët. Dhe më e vonta, që kur në verë 2014 organizata terroriste shpalli kalifatin e saj, ishte e qartë që pretendimi i saj për pushtet nuk njeh kufi. Përmes atentateve në vende të tjera, si në Evropë, në Kanada dhe në Australi, xhihadistët nuk kanë vend për dyshim se zotërojnë një rrjet të përbotshëm simpatizantësh dhe mbështetësish potencialë, të gatshëm për të goditur kudo dhe në çdo kohë.
Veprimi ushtarak kundër IS i nevojshëm, por i pamjaftueshëm
Barah Mikhail, politolog në Institutin e Kërkimit të Paqes FRIDE në Barcelonë thotë se problemi në plan afatgjatë nuk mund të zgjidhet ushtarakisht. “Megjithatë ndëkohë nuk po avancojmë as politikisht. Aktualisht gjendja duket e tillë që me IS nuk mund të zhvillosh negociata”.

Prandaj IS e vendos bashkësinë ndërkombëtare para sfidave shumë afatgjata, thotë Mikhail në intervistë me DW. Duhen krijuar rrethana që e ndalojnë në plan afatgjatë procesin e rekrutimit nga IS. Simpatizantët dhe mbështetësit potencialë mund t’i ndalosh pa dyshim që të bashkohen me IS, thotë ai. “Por kjo mund të arrihet vetëm po t’i integrosh ata më mirë në Perëndim dhe po të eleminosh në Lindjen e Mesme difekte qendrore si korrupsioni dhe papunësia. Po të mos arrihet kjo, gjithnjë e më shumë njerëz do të ndihen të tërhequr nga IS.”
Përballë akteve të mizorisë të IS, Assadi nuk është më për bashkësinë ndërkombëtare armiku numër një. Ndryshe nga xhihadistët, regjimi i tij konsiderohet vërtet ilegjitim, por krahasimisht i parashikueshëm në veprimet e tij – dhe si garant i stabilitetit rajonal, nëse jo ndërkombëtar. “Qeveria Obama-s e ka bërë tashmë të qartë se ajo dëshiron që Bashar al Assadi të qendrojë në pushtet”, deklaron Nadim Shehadi. “Ajo nuk do qeveri të re në Siri.” (dw)

Bota

Asnjë gjurmë – Një vit nga zhdukja e avionit MH370

Komento

Më 8 mars të vitit të kaluar u zhduk avioni i pasagjerëve MH370 i shoqërisë malajziane së fluturimit, në itinerarin Kuala Lumpur-Pekin. Fati i avionit MH370 nuk dihet, kërkimet vazhdojnë deri në thellësitë 6.000 metra.Megjithëse mendohet se avioni Boing 777, ku ndodheshin 227 pasagjerë dhe 12 anëtarë të ekuipazhit në bord, është rrëzuar në Oqeanin Indian, asnjë nga përpjekjet ndërkombëtare për lokalizimin e pjesëve të rrëzuara nuk ka pasur sukses deri tani. Më 29 janar DCA- Autoriteti i Aviacionit Malajzian bëri zyrtarisht të ditur se bëhet fjalë për një aksident, në të cilën mund të mendohet se kanë humbur jetën të 239 pasagjerët. Kjo deklaratë jep mundësinë tani për zhdëmtimin e të afërmve të viktimave. Malajzia thekson se gjetja e avionit të zhdukur ka prioritet.
Të dhënat satelitore tregojnë se avioni MH370 ka fluturuar më shumë se gjashtë orë pas zhdukjes nga radari. Në një intervistë ekskluzive me Deutsche Welle-n, flet Martin Dolan, drejtues i Zyrës Australiane për Sigurinë e Transportit, organizatë që koordinon kërkimet në Oqeanin Indian.
DW: Sa optimistë jeni tani, pas një viti aksioni kërkimesh se po kërkoni në vendin e duhur për të gjetur pjesë të avionit?
Martin Dolan: Jemi optimistë të rezervuar, sepse jemi të binudr që me metodat që po përdorim mund të zbulojmë gjurmë rrënojash. Duhet të jemi megjithatë të kujdesshëm, sepse nuk kemi gati asnjë informacion për pozicionin e avionit në tabanin e detit. Zona aktuale e kërkimit është bërë mbi bazën e rikonstruktimit të itinerareve të mundshme të fluturimit – një analizë unikale e të dhënave satelitore me informacionet e transmentuara nga avioni. Por kërkimet janë një sfidë e madhe, dhe nuk kemi asnjë garanci se jemi në rrugën e duhur.

Sa vende dhe sa anije janë të përfshira aktualisht në aksionin e kërkimit?
Aktualisht janë tre anije që merren me kërkimet nëndet – anija Fugro Equator, Fugro Discovery und Fugro Supporter – të cilat financohen nga qeveria e Australisë dhe Malajzisë. Përveç kësaj në mision merr pjesë edhe GO Phoenix, e cila financohet tërësisht nga qeveria malajziane. Krahas ekuipazhit normal në anije ndodhen edhe specialistët për kërkimin apo vlerësimin e të dhënave. 35 vetë në çdo anije, të cilët punojnë gati 47 ditë pa ndërprerje në det të hapur. Por ka edhe grupet e punës në qendrën e koordinimit në Australi, specialistët që janë në vend, apo shumë punonjës të tjerë nga qeveria kineze dhe malajziane. I gjithi është një mision shumë i madh që angazhon shumë njerëz.
Çfarë lloj aparaturash përdoren dhe si funksionojnë ato?
Tre nga anijet – die GO Phoenix, Fugro Discovery und Fugro Equator merren me kërkimet nën det, ata kanë radarë e skanerë speciale dhe kamera. Aparatura të tilla mund të punojnë deri në 6000 metra thellësi, janë të lidhur me kabllo me gjatësi prej disa kilometrash, deri në 10 kilometra dhe janë në funksion për javë të tëra, pa qenë nevoja të tërhiqen lart. Por ka zona si humnera në det për shembull apo ndryshime relievi që e bëjnë të pamundur futjen e aparaturave. Për të siguruar që edhe këto zona të mbulohen, është vënë në përdorim, Fugro Supporter, nga 29 janari. Kjo anije është e pajisur me një automjet lëvizës nënujor, (shkurt i njohur si AUV, shën.red.)me rrota dhe motorr më vete, ky automjet është shumë i manovrueshëm për të vazhduar kërkimet e programuara më parë. Pas çdo misioni AUV ngjitet lart, ne i marrim të dhënat dhe i ndërrojmë bateritë. AUV mundëson një kërkim mjaft efektiv.
Ku ka qenë vështirësia më e madhe deri më tani apo sfidat më të mëdha për gjetjen e avionit në zonën ku po kërkoni?
Vështirësia kryesore është mungesa e informacioneve për pozicionin e avionit dhe itinerari i fluturimit, pas ndërprerjes së kontaktit me radarët në veriun e Sumatras. Tek shumica e avionëve të rrëzuar, pozicioni i fundit i dhënë ndodhet relativisht pranë vendit të rrëzimit. Në këtë rast ne e dimë se MH370 ka fluturuar edhe shumë orë të tjera, pas zhdukjes nga radari. Nga ana tjetër përgatitja e misionit nënujor të kërkimit ishte shumë e vështirë. Duhej të gjenim ekspertët për t’u konsultuar për aparaturat teknike, dhe specialistët e duhur për kërkimet. Ndoshta ata nuk janë vënë re nga opinioni, por ka pasur specialistë, anëtarë të ekuipazhit që kanë punuar deri natën vonë për të përgatitur gjithçka.

Në çfarë thellësie mendoni se mund ta gjeni avionin e në ç’gjendje?
Zona e kërkimit është shumë e ndryshueshme në reliev për sa i përket thellësisë. Disa pjesë arrijnë 6.000 metrat, kjo është një ndër arsyet pse kërkimi është kaq i vështirë. Nuk mund të thuhet me siguri gjendja e avionit. Ka gjasa që të jenë ndarë në shumë pjesë pas përplajes me sipërfaqen e ujit dhe është fundosur pastaj.
Ky është misioni më i shtrenjtë i kërkimit në historinë e aviacionit. Kush i merr përsipër shpenzimet?
26 vende janë pjesë e misionit deri më tani, ku çdo vend ka marrë përsipr shpenzimet e veta. Australia ka dhënë 90 milionë dollarë, nga të cilat 60 milionë lidhen më kërkimin nënujor.
Po kush vendos nëse kërkimet do të vazhdojnë apo jo nëse avioni nuk do të gjendet.
Çdo vendim për këtë do ta marrin qeveritë e Australisë, Malajzisë dhe Kinës. .
Martin Dolan ist drejtor i Zyrës Australiane të Sigurisë së Transportit (ATSB).

Bota

Ushtarë rusë në Ukrainë

Komento

Një tankist i plagosur rus pranoi në një intervistë: Ushtarë profesionistë rusë luftojnë në frontin e parë. Sipas gazetarëve ata janë shumë të kujdesshëm që të mos bien në sy të gazetarëve e të vëzhguesve të tjerë.Ishte një rrëfim surprizues. Në një intervistë me gazetën opozitare ruse “Novaya Gazeta” (02.03.2015) një tankist i plagosur rus pranoi atë që shumëkush ka kohë që e supozon: që përkrah separatistëve në Ukrainën lindore kundër ushtrisë ukrainase luftojnë edhe ushtarë aktivë rusë. Dhe ndoshta shumë. Një ditë pas publikimit të intervistës gjenerali amerikan Ben Hodges tha në Berlin se ushtria amerikane mendon se janë rreth 12.000 ushtarë të tillë.
Kjo nuk është historia e parë e këtij lloji. Gazeta ruse “Kommersant”, botoi më 19 shkurt një reportazh çuditërisht të hapur për përfshirjen e ushtarëve rusë në Ukrainë lindore nga ana e separatistëve prorusë. Surpriza qe se ky artikull u botua në versionin online të kësaj gazete, që i përket oligarkut pro Kremlinit, Alisher Usmanov. Në tekst korrespondenti Ilya Barabanov përshkruan, se si ai qe takuar me tre rusë, të cilët kishin qenë deri kohët e fundit ushtarë në ushtrinë ruse, dhe se pastaj gjoja nga bindja kanë shkuar gjysmën e dytë të janarit në Ukrainë Lindore për të luftuar atje. Ushtarët profesionistë rusë luftojnë sipas gazetarit në frontin e parë dhe janë shumë të kujdesshëm që të mos bien në sy të gazetarëve dhe të vëzhguesve të tjerë.

Për shpërblime dhe dekorata
Dmitri Pyslar nga Komiteti i Nënave të ushtarëve nga Rusia, tha në intervistë me DW-në, se ushtarët rusë janë duke luftuar në Ukrainë lindore, dhe ata ishin të pranishëm edhe gjatë sulmit në Debalceve, madje edhe pas armëpushimit. Por meqë çdo gjë ndodh fshehurazi dhe më mënyrë sekrete, është shumë e vështirë për të marrë të dhëna të sakta dhe të plota. Është e pamundur që ta përcaktosh numrin e ushtarëve që marrin pjesë në operacione të tilla, thotë Pyslar. “Ne kemi provuar dhe dështuar. Disa shkojnë, të tjerë vijnë. Në Ukrainë nuk ka një trupë të stacionuar për gjithë kohën.”
Aktivistët e të drejtave të njeriut në Rusi dyshojnë për pretendimin e përhapur se ushtarët rusë po kalojnë “lejen dhe pushimet” në frontin e luftës në Donbas, apo po luftojnë vullnetarisht dhe pa ndonjë kontratë me ushtrinë ruse. Valentina Melnikova nga “Lidhja e Komiteteve të Nënave të Ushtarëve” ka pasur disa takime me ushtarët i ka pyetur ata. Asnjë prej tyre nuk na ka thënë, se ka qenë për pushime ose vullnetarisht aty, tha ajo në një intervistë DW, Përkundrazi, kjo është një legjendë. Ushtarët, me të cilët ka folur Melnikova kanë thënë se atyre “u është premtuar një shpërblim”, një dekoratë ose statusi i veteranit. Shpesh, megjithatë, këto premtime u nuk mbahen. “Ata janë ankuar tek ne, se nuk do shkojnë për herë të dytë në Ukrainë, sepse nuk kanë marrë asgjë nga ato që u kishin premtuar.”

Ushtarë që zhduken dhe rishfaqen
Në Rusi ekziston një ligj që shteti mund t’i dërgojë ata që kryejnë shërbimin ushtarak jashtë vendit, vetëm në qoftë ata e pranojnë shprehimisht këtë. Megjithatë ka mjaft raste ushtarësh, të cilët për shkak se kanë refuzuar, janë vendosur nga Prokuroria Ushtarake në ndjekje penale për dezertim, thotë Valentina Melnikova. E njëjta gjë ndodh me ushtarët rusë që kapen rob në Ukrainë.
Një rast të tillë ka dokumentuar Melnikova me ndihmën e gazetës New York Times. Një jetim i quajtur Petr Hohlov kishte nënshkruar në vitin 2014 një kontratë të përkohshme me ushtrinë ruse. Një ditë ai papritmas u zhduk nga baza e tij ushtarake, pa lajmëruar për këtë as të shoqen, as vëllain. Disa kohë më vonë ai u shfaq në një video të autoriteteve ukrainase – si ushtar rus i zënë rob.
Më vonë i vëllai mësoi se Petri qe shkëmbyer si rob me ushtarë ukrainas dhe përfundoi tek separatistët. Por përfaqësuesit e ushtrisë ruse thonë zyrtarisht se Hohlow duhet të ketë dezertuar. Petri humbë sërish pa gjurmë. Dhe vetëm disa muaj më vonë, një gazetar i New York Times e ndeshi përsëri Petr Hohlovit në një pikë kontrolli të separatistëve në Ukrainën lindore. Ai i kishte thënë gazetarit se ishte atje vullnetarisht.
“Turistë” luftëtarë në Donbas
Qeveria e Moskës thotë në mënyrë të përsëritur se nuk “ka trupa të rregullta ruse” në Ukrainë. Dhe ky formulim mund të jetë i vërtetë, sepse deri tani nuk janë parë formacione apo njësi të ushtrisë ruse në Ukrainë lindore. Vetëm një herë, në fund të gushtit të vitit të kaluar, qe parë në Ukrainë një grup i madh ushtarësh rusë. Autoritetet ruse deklaruan në atë kohë, se ata kishin humbur rrugën dhe kishin kaluar kufirin pa e ditur se janë në Ukrainë.
Ky është qëndrimi zyrtar i Kremlinit. Megjithatë ka edhe politikanë jo shumë të njohur rusë që po flasin gjithnjë e më hapur për “vullnetarë” me përgatitje ushtarake që luftojnë në Ukrainë, në front në Donbas. Viktor Zavarzin, deputet dhe anëtar i Komitetit të Mbrojtjes të Dumës ruse, tha: “Qëndrimi ynë se të gjithë që janë liruar nga ushtria apo janë me pushime, mund të shkojnë kudo që dëshiron. Ka fakte që ka oficerë dhe ushtarë që shkojnë atje për të marrë pjesë në luftime. Ne nuk e fshehim këtë fakt. ” (dw)

Maqedonia

Kriza në Maqedoni mobilizon faktorin ndërkombëtarë

Komento

Pavarësisht se pushteti nuk e shikon dramatike krizën politike, faktori ndërkombëtar është mobilizuar tashmë për të ndihmuar gjetjen e një zgjidhjeje. BE-ja dhe SHBA-ja janë në kontakte të vazhdueshme për të gjetur forma kontribuimi në zgjidhjen e krizës madje në njoftimin e ambasadës amerikane për herë të parë nënvizohej ndihma ndaj qytetarëve të vendit.
“Ne jemi në kontakte të ngushta dhe të vazhdueshme me Misionin e Bashkimit Evropian në Shkup dhe partnerët e tjerë ndërkombëtarë se si të luajmë një rol konstruktiv që t’i ndihmojmë qytetarët dhe institucionet e Maqedonisë t’i adresojnë sfidat aktuale të Maqedonisë”, theksojnë për Alsat nga Ambasada e SHBA-së në Shkup.

Edhe zëdhënësja e komisionarit për fqinjësi dhe zgjerim, Maja Kocijancic në një deklaratë për Alsat theksoi se Komisioneri Han është angazhuar në gjetjen e metodave që do të nxjerrin vendin nga kriza.

“Komisioneri Hahn dhe shërbimet e tij po shqyrtojnë opsione të ndryshme të kontribuojnë në zgjidhjen e problemit, në bashkëpunim me Institucionet e tjera të BE-së”, tha Maja Kocijancic, Zëdhënëse e Komisionarit për fqinjësi dhe zgjerim.

Çështja e Maqedonisë jozyrtarisht mësohet të jetë diskutuar në suaza të takimit të Ministrave të Jashtëm të BE-së dhe vendeve kandidate në Riga ku merr pjesë edhe shefi i diplomacisë maqedonase Nikolla Poposki. Semra Jakupi

Maqedonia

Bisedat e përgjuara që zbardhin falsifikime dhe skandale zgjedhore

Komento

Në këto biseda ndëgjohen se si janë përgaditur skenare për manipulime, falsifikime, presione dhe forma të tjera të keqpërdorimit të procesit zgjedhor Lideri i LSDM-së, Zoran Zaev ka publikuar materiale tjera të bisedave të përgjuara të krerëve të pushtetit aktual.

Në këto biseda ndëgjohen se si janë përgaditur skenare për manipulime, falsifikime, presione dhe forma të tjera të keqpërdorimit të procesit zgjedhor dhe vjedhjes së votave, me qëllim që partia në pushtet siç thuhet të vazhdojë qeverisjen e saj.

Ja disa nga temat e biseduara midis kryeministrit Nikola Gruevskit, ministres së brendshme, Gordana Jankullovska, ministrit të transportit dhe lidhjeve, Mile Janakievski, shefit të kabinetit kryeministror Martin Protugjer dhe biseda me zyrtarë të tjerë dhe ministra, përfshirë sërish si protagonist gazetarin Llatas.

Manipulimi me votuesit nga Pusteci i Shqipërisë

Në një bisedë dëgjohet kryeministri Nikolla Gruevski në bisedë me ministrin e transportit Mile Janakievski, lidhur me rrjedhën e zgjedhjeve në komunën Qendër të Shkupit.

“Po t’i kishim presparët në rrethin e parë, do të kryenim punë”, ka thënë Gruevski. Termi presparë sipas tij është ëprdorë për votuesit nga “Pusteci”. Poashtu është lëshuar një incizim ku sipas Zaev dëgjohet ministrja Jankullovska se si i quan votuesit e Pustecit “çoveçinja”, term ofendues në gjuhën maqedonase për termin “njeri”.

Po ashtu është publikuar edhe një bisedë mes Jankullovskës dhe një zyrtareje të VMRO-DPMNE-së, ku ajo i thotë se në disa fshatra me disa banorë, janë regjistruar dhjetëra votues të rinj. Poashtu diskutojnë mundësitë se si të fshehin këto parregullsi, duke thënë “frikohem se do të në zbulojë OSBE-ja”.

Romët protagonistë të manipulimeve

Në bisedat që i lëshoi Zaev, gjatë tërë kohës dëgjohet se si funksionarë të lartë përdorin termin “ciganë” dhe biseda që tu jepen atyre thasë me miell për votën për pushtetin. “Ciganët në Kumanovë i ka nën kontroll Cic. Të kam treguar se në çfarë linje”, ka thënë në një bisedë Jankullovska me një zyrtar të VMRO-së.

Jankullovska: Do i kapim për fyti shqiptarët në Kumanovë

Në një bisedë të publikuar, dëgjohet Jankullovska duke biseduar me Janakievskin lidhur me zgjedhjet lokale në Kumanovë. Ata bisedojnë se në bashkëpunim me BDI mund ta fitojnë Kumanovën. “Duhet të bisedohet me BDI që shqiptarët të kapen për fyti që të mos dalin në zgjedhje”, dëgjohet duke thënë Jankullovska.

Siç është e ditur ky skenar I VMRO-së dhe BDI-së dështoi në Kumanovë, por më vonë vlerësohet se pati sukses në zgjedhjet presidenciale kur BDI I ftoi shqiptarët të mos dalin në zgjedhje me çka u pamundësua fitorja e Pendarovskit kundër Zaevit.

Jankullovska: Atë qe bëjmë ne e bën edhe BDI

Në një prej bisedave të publikuara, Zaev thotë se dëgjohet ministrja e punëve të brendshme Gordana Jankullovska duke biseduar me një person tjetër nga radhët e VMRO-së. Aty ajo flet se VMRO me BDI kanë strategji të njëjtë.

“Edhe BDI është në fushatë. Atë që e bëjmë ne e bën edhe BDI”, thotë Jankullovska duke folur për pengim të pjesëmarrjes së njerëzve në tubimet parazgjedhore të opozitës.

Zaev: Janakievski kërcënon me largime nga puna

Në një material tjetër dëgjohet një bisedë e ministrit Janakievski me një zyrtare.

“Thirri mësuesit dhe falënderoj që votuan për ne, por thuaju se për fitore të VMRO-së duhet të sjellin edhe nga një votë”, thuhet në instruksionet që i jep zyrtares.

Poashtu u publikua edhe një bisedë ku Jankievski porosit një zyrtar që t’i transmetojë dikujt se “do të ja verifikojmë listën dhe nëse nuk voton për ne do ta largojmë nga puna”.

Dëshmi për keqpërdorime zgjedhore edhe nga BDI

Duke u përgjigjur në pyetje të gazetarëve, kryetari i LSDM-së Zoran Zaev tha se posedon dëshmi edhe për presione dhe manipulime zgjedhore që ka bërë BDI.

“Gjithsesi që posedojmë. Patët rastin të dëgjoni se pushteti ka bë bashkërisht skenare për presione. Gjithçka që kemi do të publikojmë, pa marr parasysh a janë për maqedonasit apo për shqiptarët”, tha Zaev. Ai shtoi se në mesin e “bombave” ekzistojnë edhe dëshmi për shkaqet e ndërprerjes së regjistrimit të popullsisë. Pas publikimit të bombës së shtat, kryetari i LSDM-së Zoran Zaev tha se kjo “bombë” ishte vetëm fillimi i ciklit për nxjerrje në shesh të manipulimeve zgjedhore.

Konjanovski e cakton Llatasin si ministër për ‘bombardime’

Në mesin e bisedave të publikuara nga ana e liderit të LSDM-së Zoran Zaev ka qenë edhe një bisedë mes ish ministrit të mbrojtjes Zoran Konjanovski dhe gazetarit Dragan Pavloviq- Llatas.

Në një moment ish ministri Konjanovski thotë se nga ministër për mbrojtje është shndërruar në ministër për sulm dhe se në një bisedë me disa miq ka menduar që “Llatasin ta propozojë bombardues”.

Kryetari i LSDM-së Zoran Zaev deklaroi se ka regjistrime të bisedave që dëshmojnë se ka pasur indikacione për ndërprerjen e regjistrimit të popullsisë.

“Sigurisht se ka incizime në të cilat ka indikacione për të ndërprerë regjistrimin e popullatës”, tha Zaev .

Të martën “bomba” tjera për falsifikimet dhe skandalet zgjedhore

Lideri opozitar maqedonas theksoi se këto materiale dëshmojnë se si në rrugë kriminale ky pushtet po qeverisë me vendin dhe se ai paralajmëroi se do të vazhdojë me serinë e publikimit të materialeve të tjera për skandale dhe falsifikime zgjedhore.

“Ne do të vazhdojmë me publikimin e materialeve të tjera që janë edhe më skandaloze dhe që nxjerrin kriminalitetin e zgjedhjeve nga ana e këtij pushteti”, theksoi Zaev, duke paralajmëruar të martën një konferencë më të gjërë në sallën universale në Shkup, ku do të publikohet një cikël maraton i bisedave të përgjuara lidhur me manipulimet dhe falsifikime të zgjedhjeve. Materialet e publikuara kanë të bëjnë me zgjedhjet e fundit lokale dhe ato presidenciale e parlamentare. (INA)

Maqedonia

‘Bomba” e 7-të e opozitës flet për parregullsitë zgjedhore

Komento

Bisedat telefonike të prezantuara sot në bombën e 7-të të LSDM-së, sipas liderit opozitar Zoran Zaev dëshmojnë vjedhjet dhe falsifikimet drastike të proceseve zgjedhore viteve të fundit. Presione ndaj administratorëve, familjeve sociale, pensionistëve, shfrytëzuesve të subvencioneve, blerje të votive, votime të shumëfishta të personave të njëjtë me disa letërnjoftime, importimin e votuesve të Pustecit, vjedhjen e materialit zgjedhor, keqpërdorimin e institucioneve shtetërore për përfitime zgjedhore dhe madje edhe kërcënime me jetë, janë vetëm disa nga parregullsitë që dëshmohen me telefonatat e publikuara sot nga opozita.

‘Sot fillojmë ti zbardhim vjedhjet në zgjedhje që i bën Nikolla Gruevski me disa bashkëpunëtor të tij. Nga dëshmitë e qarta dhe skandaloze do të dëgjoni si ky grup në pushtet, i rregullon dhe vjedh zgjedhjet në Maqedoni. Nga sot të nderuar qytetarë fillojmë me prezantimin e keqpërdorimet e Gruevskit dhe grupit të ngushtë rreth tij, gjatë proceseve zgjedhore dhe vjedhjeve zgjedhore në disa cikle në Maqedoni, që nuk mbahen mend në rang botëror’, tha Zoran Zaev – Kryetar i LSDM-së.

Në pjesën e parë të bisedave të publikuara, Ministrja e Brendshme Gordana Jankulloska gjatë bisedës me sekretarin e përgjithshëm të Qeverisë Kiril Bozhinovski pranon se kanë regjistruar nga 50 persona në adresa fiktive banesash 40 metra katrorësh, ndërsa Mile Janakievski thotë se kanë sjellë njerëz nga Sveti Nikolla në Gazi Babë, për të votuar në më tepër vendvotime. Kryeministri Gruevski dhe Ministri Mile Janakievski koordinojnë rrjedhën e procesit zgjedhor në Komunën Qendër, ndërsa Jankulloska dhe Martin Protugjer komentojnë votimin masiv të Pustecasve në këtë komunë.

Në një prej bisedave të publikuara, Mile Janakievski dhe drejtori për të hyra publike Goran Trajkovski merren vesh cilave biznese tu dërgojnë inspektime dhe dënime. Në bisedë me një tjetër bashkëpunëtor, Janakievski kërkon që mes transportuesve të shpërndahen spekulime se nëse zgjedhjet i fiton LSDM-ja, ministri i transportit do të jetë shqiptar.

Sipas liderit të LSDM-së Zoran Zaev, VMRO DPMNE-ja ka keqpërdorur edhe subvencionet për përfitimin e votave. Janë keqpërdorur edhe institucionet e shtetit dhe inspektorët financiarë.

Ministrja e Brendshme Gordana Jankulloska, sipas telefonatave të publikuara, ka koordinuar edhe ndarjen e ndihmave sociale për familjet në nevojë, në këmbim të votave për VMRO DPMNE-në. Ajo kërkon që disa qytetarëve të komunitetit rom në Kumanovë, për të cilët nuk është e sigurt se do të votojnë partinë e saj, tu merren letërnjoftimet dhe të mos lejohen të votojnë. Mile Janakievski nga ana tjetër merret vesh që të dërgojë thasë me miell për disa romë që kanë votuar VMRO DPMNE-në.

Për përfitime partiake janë shfrytëzuar edhe kompanitë publike dhe shkollat në Qytetin e Shkupit. Mile Janakievski dhe kryetarja e Këshillit të Qytetit Irena Misheva koordinojnë presionet ndaj punonjësve në ndërmarrjet publike dhe mësuesve në shkollat e kryeqytetit.

Në fushatën parazgjedhore janë përdorur edhe mediat. Vetë pronari i televizionit Kanal 5 Emil Stojmenov, e njofton shefin e kabinetit të kryeministrit Gruevski, Martin Protugjer, se duhet të pengojë transmetimin e një emisioni të papërshtatshëm në televizionin e tij. Stojmenov propozon që të ndërpresë rrymën në televizion në kohën e transmetimit, ndërsa Protugjer e porosit që ta transmetojë emisionin me probleme teknike të zërit.

Në zgjedhjet e fundit lokale, Mile Janakievski ka qenë angazhuar për Komunën Qendër. Sipas telefonatave të prezantuara, ai merret vesh me bashkëpunëtorët e tij për vjedhjen e listave zgjedhore, me qëllim që të kenë emrat e qytetarëve që kanë dalë në zgjedhje dhe atyre që nuk kanë dalë, për të ndikuar në rrethin e dytë të zgjedhjeve. Janakievski merr instruksione nga kryeministri Gruevski që të shpallen sa më shumë vota të pavlefshme në Komunën Qendër, me qëllim që Zhernovski të mos e sigurojë fitoren që në rrethin e parë. Gordana Jankulloska nga ana tjetër, në bisedë me Mile Janakievskin kërkon që në rrethin e dytë të zgjedhjeve në Kumanovë ti kapin shqiptarët për fyti, dhe të mos i lejojnë të votojnë për kandidatin e LSDM-së.

Jankulloska pranon se në ditën e zgjedhjeve, zyra e saj në Ministri është shndërruar në shtab të VMRO –së, ndërsa Ministrinë e Brendshme e emëron si MVR VMRO. Jankulloska kërkon që të anulohen zgjedhjet në disa vendvotime në Strumicë dhe Qendër, ndërsa thotë se në rrethin e dytë do ti nxjerrin për veshi romët të votojnë për ta. Në një bisedë telefonike, ajo e njofton Janakievskin se edhe BDI-ja, sikurse ata, i ndalojnë autobusët e partive opozitare të marrin pjesë në mitingje partiake. Nga ana tjetër, në njërën nga telefonatat e prezantuara sot dëgjohet se në prag të zgjedhjeve ka pasur edhe kërcënime ndaj familjes së kreut të Federatës së Futbollit. Shefi i kabinetit të Gruevskit, Martin Protugjer, kërcënon kreun e Federatës se do ta gjejë familjen dhe fëmijët në hendek, nëse nuk i bindet urdhrave të tyre.

Gazetarët edhe sot u interesuan për rastin Monstra, duke e pyetur liderin opozitarë nëse ka telefonata që dëshmojnë parregullsi në këtë proces. Ai paralajmëroi se njëra nga konferencat e ardhshme për shtyp do të jetë pikërisht për këtë rast.

Zaev paralajmëroi se pjesën tjetër të dëshmive edhe më të forta për vjedhjen e zgjedhjeve do ta publikojë të martën në sallën universale, në prani të një numri më të madh të qytetarëve. Benjamin Arifi

Kosova

Po vazhdon spastrimi i heshtur etnik i Luginës

Komento

Lëvizja qytetare “Vatra” në Kosovë reagon se spastrimi i trojeve etnike shqiptare nuk ka të ndalur. Ata thonë se politika shqiptare po bën pak që të mbrojë interesat kombëtare.Ko lëvizje që tubon të shpërngulur nga Presheva Medvegja dhe Bujanoci kërkon që urgjentisht të ndërmerren hapa konkret nga deputetët shqiptarë në Kuvendin e Serbisë, kryetarët e komunave, kryetarët e kuvendeve komunale, Këshilli Nacional, partitë e përfaqësuara dhe jo të përfaqësuara në kuvende komunale, shoqëria civile, mediat etj., që të fillojnë t’i përdorin të gjitha mekanizmat, të ngrenë zërin më me guxim dhe të alarmojnë bashkësinë ndërkombëtare, Ambasadën e SHBA-ve dhe ambasadat tjera, në mënyrë që t’i bëhet presion Serbisë në parandalimin e spastrimit të trojeve shqiptare të Bujanocit, Preshevës e Medvegjës.

“Ndër shekuj është vërtetuar se politika shqiptare në ecejaket e saj nuk kanë qenë e nuk janë ende të denjë të bëjnë politikë, e aq më pak kur duhet t`i mbrojnë interesat kombëtare. Për këtë kemi shembuj të shumtë, por tani do të ndalemi me fenomenin më të ri në Kosovën Lindore. Fjala është për pastrimin etnik të shqiptarëve në vazhdimësi, por që tani ka marrë përmasa shqetësuese, në gjithë komunën e Bujanocit, e më alarmante në Malësinë e kësaj komune, pastaj në Medvegjë e gjithsesi edhe në komunën e Preshevës. Për këtë nuk qanë kokën askush e sidomos të thirrurit për këtë punë, përkatësisht politikanët e këtyre komunave. Vërtetë nuk e kuptojmë që, këta njerëz kanë hyrë në politikë për t’i shërbyer të gjithë qytetarëve, apo postet që ua ka dhënë qytetari i konsiderojnë vetëm si vende pune?”, thotë kjo lëvizje në një reagim të vet.

Ky diskriminim i pushtetit serb, sipas tyre, bëhet para syve të politikanëve të Kosovës Lindore dhe më gjerë, edhe pse e dinë se kjo është një shkelje flagrante e të drejtave të njeriut, dhe se kjo nuk tolerohet në asnjë shtet, madje është shkelje e kushtetutës së Serbisë. Vlerësojnë se të drejtën e qytetarëve për dy nënshtetësi askush nuk ka të drejt tua mohojë. Prandaj duhet ndërmarr masa nga organet që janë të thirrura për të parandaluar dhe ngritur zërin në instancat më të larta Evropiane dhe Ndërkombëtare.

“Turpi tjetër, është mos kthimi i Lapidarit në vendin prej nga është vjedhur natën, moslejimin e qarkullimit të automjeteve nga Kosova, e shumë e shumë padrejtësi tjera që bëhen në kurriz të qytetarëve tanë. Lëvizja Qytetare Vatra do të angazhohet, në vazhdimësi, sikurse deri më tani, që këtë spastrim etnik, si dhe mos zhvillimin ekonomik të Kosovës Lindore si dhe problemet tjera jetësore të qytetarë shqiptarë ta sensibilizojë edhe më shumë kudo që është mundur me të gjitha mjetet demokratike”, thuhet në reagimin e Lëvizjes “Vatra”. (INA)