Arkivi mujor: Nentor 2015

Kosova, Sport

Pritje madhështore kuqezinjve, Cana: Krenar që do të luaj në stadiumin e Prishtinës

Komento

mire se vini ne shqiperi plisatKombëtarja shqiptare ka arritur në Prishtinë pak pas orës 17:00, ku është pritur në mënyrë madhështore nga “Plisat” dhe një numër tifozësh, pranë hotelit ku ata do të qëndrojnë.

Kapiteni i kombëtares shqiptare, Lorik Cana, me të arritur në Prishtinë tha se është i lumtur, që nesër do të zbresë në stadiumin e Prishtinës, duke shtuar se ky stadium është i lidhur me të dhe familjen e tij, sepse edhe babai i tij, Agim Cana ka qenë lojtar i Prishtinës.

“Jam krenar që jam në një vend dhe në një stadium me një histori të ngushtë, ku unë kam debutuar dhe ku babai im ka qenë pjesë e ekipit që i përket ky stadium. Shto këtu, në një moment kur kombëtarja jonë ka arritur një sukses dhe i ka bërë krenarë të gjithë shqiptarët me kualifikimin në Europianin e Francës”, ka thënë Cana.

“Pritja ka qenë shumë e mirë nga çdo person që kemi takuar, çdo makinë na kanë përshëndetur dhe të gjithë njerëzit, ashtu si dhe ‘Plisat’, ndaj dhe ishte vërtet një pritje fantastike”, ka deklaruar Cana.

/ Top Channel

TIFOZAT KUQEZI NË PRISHTINË, POR JO NË STADIUM

Tifo-grupi më i organizuar i kombëtares shqiptare, “Tifozat Kuq e Zi”, kanë bërë të ditur se më 13 nëntor do të jenë në Prishtinë…

Tifo-grupi më i organizuar i kombëtares shqiptare, “Tifozat Kuq e Zi”, përmes një deklarate për shtyp kanë bërë të ditur se më 13 nëntor do të jenë në Prishtinë, për t’iu bashkuar festimeve mbarëkombëtare për kualifikimin historik në finalet e “Euro 2016”, por jo në stadiumin e Prishtinës, gjatë kohës që do të luhet miqësorja vëllazërore, Kosovë-Shqipëri. Ata ngulin këmbë se duhet të kemi një kombëtare e jo dy, që të përfaqësojë flamurin kuqezi, atë të kombit tonë.

“Këtë të premte, kampionët tanë zhvillojnë ndeshjen e parë, pas kualifikimit historik në Kampionatin Europian “Francë 2016”, në shtëpinë e tyre të dytë, AUTOKTONE, në Prishtinë. Ndeshja do të jetë e karakterit festiv, ndaj një grupimi tjetër të futbollistëve shqiptarë. Që nga themelimi, një ndër misionet bazë të “Tifozave Kuq e Zi” ka qenë që shqiptarët, edhe pse të ndarë në disa shtete, të kenë vetëm një kombëtare dhe të përfaqësojmë vetëm një flamur. Ne vazhdojmë të besojmë në kauzën tonë dhe, për këtë arsye, të premten nuk do të jemi prezent si grupim në stadiumin e Prishtinës, por sigurisht do të jemi prezent në Prishtinë për festën e madhe.

Që nga themelimi dhe deri më sot, ne kemi përkrahur vetëm Kombëtaren Shqiptare dhe skuadrat shqiptare në Europë, por asnjëherë të vetme nuk kemi qenë në tribuna, kur në fushë kanë qenë dy skuadra, me futbollistë shqiptarë. Dhe, me gjithë dëshirën që të festojmë, nuk do të mundemi të jemi aty. “Tifozat Kuq e Zi” u bëjnë thirrje te gjithë shqiptarëve në Kosovë të shfrytëzojnë praninë e kombëtares në Prishtinë dhe të festojnë në numër sa më të madh. Edhe ne, si grupim, do të jemi të pranishëm në Prishtinë dhe do të festojmë të gjithë së bashku këtë arritje historike të kombëtares tonë.

Për fund, “Tifozat Kuq e Zi” vazhdojnë të besojnë se sot, më shumë se kurrë, janë krijuar kushte që të kemi vetëm një kombëtare. Ne duhet të vazhdojmë të përkrahim ekipet shqiptare të të gjitha trevave, që do të luajnë në arenën ndërkombëtare, dhe të mos mbesin të izoluara. Sidoqoftë, në përfaqësimin si komb, duhet të jemi një dhe vetëm një. Kombëtarja që e kemi tani është shembulli më i mirë i bashkimit dhe suksesit. Gëzuar shqiptarë! Gëzuar Shqipëri Etnike!” – thuhet në qëndrimin zyrtar të këtij tifo-grupi.

Bota

Plani rus për Sirinë kundërshtohet nga perëndimi

Komento

SiriaVendet perëndimore dhe ato të Gjirit Arab e kanë hedhur poshtë planin e Rusisë për paqe dhe reforma në Siri, duke thënë se nuk do t’i krijojë bazat për bisedimet në Vjenë këtë fundjavë.

“Ne jemi të vetëdijshëm për propozimet ruse”, u tha të mërkurën vonë gazetarëve ambasadori britanik në selinë e Kombeve të Bashkuara, Matthew Rycroft, dhe ka shtuar se “plani prej tetë pikësht vetvetiu nuk është qendror në disuktimet e Vjenës, por Rusia është”.

Diplomatët e Rusisë kanë theksuar se plani paraqet “vizionin” dhe “idetë” e Moskës dhe se Rusia është e hapur për propozime alternative nga 20 vendet, që marrin pjesë në bisedimet paqësore më 14 nëntor, në përpjekjen më të rëndësishme ndërkombëtare deri tash, për ta përfunduar luftën katërvjeçare në Siri.

Plani i Rusisë, të cilin e kanë parë agjencitë Associated Press dhe Reuters, parasheh propozimin e kushtetutës së re të Sirisë, që do të votohej pas zgjedhjeve të parakohshme presidenciale.

Në këtë plan nuk përmendet tërheqja e presidentit aktual të Sirisë, Bashar al-Assad, gjatë periudhës tranzitore, që në anën tjetër, është kërkesë kryesore e vendeve perëndimore dhe e atyre të Gjrit Arab, që marrin pjesë në bisedime.

Disa diplomatë perëndimorë e kanë hedhur poshtë planin e Rusisë për shkak se ai nuk e qartëson fatin e presidentit Assad.

Një diplomat në Këshillin e Sigurimit të Kombeve të Bashkuara, për agjencinë AFP, e ka përshkruar propozimin rus për reforma në Siri si “tërheqje nga përmbajtja e pakos”.

Plani rus parasheh krijimin e një komisioni kushtetues për t’i hartuar reformat politike siriane dhe specifikon se presidenti Assad nuk do të lejohej ta kryesoj atë komision. Por, plani nuk ia ndalon atij në mënyrë specifike kandidaturën për zgjedhjet presidenciale.

“Kjo nuk mjafton” tha diplomati në OKB dhe ka shtuar se “duhet të jetë pjesë e marrëveshjes finale se pika përfundimtare nuk lejon që Assadi të ketë pushtet”.

Diplomatët kanë thënë se Arabia Saudite, veçanërisht, ka këmbëngul për përkushtim të qartë të Iranit dhe Rusisë, që Assadi do të tërhiqet.

Ministri i jashtëm Adel al-Jubeir, mbrëmë në kryeqytetin Rijad, para gazetarëve e ka paraqitur qëndrimin e Arabisë Saudite, duke thënë se “nëse largimi i al-Assadit nuk kompletohet në mënyrë paqësore, atëherë do të kompletohet në mënyrë ushtarake”.

Por, Rusia dhe Irani e mbajnë qëndrimin se populli i Sirisë, e jo negociatorët për paqe, duhet të vendosin për fatin e Assadit nëpërmjet zgjedhjeve.

Presidenti i Iranit, Hassan Rohani, mbrëmë në një intervistë për mediat franceze, është shprehur se negociatorët duhet të fokusohen në çështje të tjera.

“Nuk është çështje e personit, është çështje e sigurisë dhe stabilitetit”, tha Rohani, dhe ka shtuar se “të gjithë ne duhet të bëjmë përpjekje për çrrënjosjen e terrorizmit në Siri dhe të sigurohemi se paqja dhe stabiliteti janë kthyer”.

“Mënyra më e mirë për t’i eliminuar terroristët është që të mbahet qeveri e fortë në Damask”, tha Rohani, dhe si argument e ka shtruar pyetjen se “cili vend ia doli ta luftojë terrorizmin pa shtet të fortë”? (rel)

Bota

Arrestime në disa vende evropiane nën dyshimet për terrorizëm

Komento

Policia në disa vende të Evropës arrestoi të paktën 15 persona nën dyshimet për përfshirje në veprime terroriste. Autoritetet italiane thanë se në mesin e tyre është një shqiptar nga Kosova

polici italianAutoritetet italiane thanë të enjten se policia në gjashtë vende evropiane, ka arrestuar të paktën 15 persona të dyshuar si pjesëtarë të një grupi militant islamik, që po planifikonte sulme në Evropën veriore dhe në Lindjen e Mesme.

Prokurori italian Franco Roberti tha të enjten në Romë se bastisjet e bashkërenduara të policisë synuan grupin Rawti Shax, i cili sipas policisë synonte rrëzimin e rajonit të Kurdistanit në Irak.

“Pesëmbëdhjetë kurdë nga Iraku dhe një qytetar nga Kosova, janë arrestuar nën dyshimet për terrorizëm ndërkombëtar të lidhur me Shtetin Islamik”, tha ai.

Hetimet rreth grupi ishin kryer nga karabinierët italian së bashku me forcat e sigurisë në Britani, Norvegji, Finlandë, Gjermani dhe Zvicër.

Komandanti i i njësisë kundër terrorizimit Giuseppe Governale, tha se “ky është operacioni me i rëndësishëm që është ndërmarrë në Evropë në 20 vjetët e fundit”.

Forcat e sigurisë kishin lëshuar urdhër arresti ndaj 17 vetave, 15 nga të cilët janë kapur. Të gjithë ata përballen me akuza për terrorizëm ndërkombëtarë, thuhet në një njoftim të karabinierëve italianë.

Në Kosovë, autoritetet nuk kanë njohuri nëse në mesin e të arrestuarve është një person nga Kosova dhe nuk kanë mundur të vërtetojnë njoftimet e medias lokale e cila e identifikoi të arrestuarin si Eldin Hoxha.

Autoritetet italiane thanë se udhëheqësi ideologjik i rrjetit ishte Najmuddin Faraj Ahmad, i cili mbahet në burg në Norvegji.

Autoritetet thonë se ai kishte krijuar një rrjet pasuesish në të gjithë Evropën që komunikonin me internet, biseda të cilat përgjoheshin nga policia italiane dhe që çuan në arrestimet e sotme. (voa)

Shqipëria

“Burg për shpifje”, tërhiqet qeveria

Komento

Propozimi i kryeministrit Rama u kundërshtua me forcë. Përfaqësuesja e OSBE-së për Lirinë e Mediave bëri thirrje që propozimi të rrëzohej nga parlamenti. Reagime nga mediat, opozita dhe presidenti Nishani.

ramaNë Shqipëri një propozim i qeverisë për të rikthyer dënimin me burg për shpifje apo fyerje, ka shkaktuar një reagim të menjëhershëm kundërshtues në opinion, dhe vecanërisht në media, duke u parë atë si një kërcënim të fortë ndaj lirisë së shtypi. Ndërkaq dhe përfaqësuesja e OSBE-së për lirinë e medias Dunja Mijatovic, i bëri thirrje parlamentit të mos e votojë. Kryeministri Edi Rama deklaroi se propozimi nuk lidhet me gazetarët, ndërsa më pas ministrja për marrëdhëniet me parlamentin njoftoi tërheqjen e propozimit dhe riformulimin e tij

Ndryshimi në Kodin Penal është miratuar nga qeveria që 14 tetorin e shkuar. Projektligji u mbajt i fshehtë dhe nuk u përfshi në listën e vendimeve të marra prej saj e që bëhen publike në faqen online të Këshillit të ministrave, pas cdo mbledhjeje. Propozimi u zbulua ndërsa përgatitej t’i nënshtrohej shqyrtimit në komisionet parlamentare.

Ndryshimi i kërkuar është formuluar në këtë mënyrë: “Shpifja e kryer botërisht ndaj një funksionar i të lartë shtetëror apo të zgjedhur, me qëllim atribuimin atij të një fakti, që parashikohet nga ligji si vepër penale, dënohet me gjobë ose me burgim deri në tre vjet”.

Në vitin 2012, nën trysninë edhe të institucioneve dhe organizatave ndërkombëtare, parlamenti shqiptar, me konsensusin e të gjitha palëve, e shfuqizoi nenin që në atë kohë parashikonte dënimin me burg për shpifje apo fyerje, ndërkohë që ka patur kërkesa të vazhdueshme, që shpifja të mos ekzistojë fare si vepër penale.

Por në relacionin që shoqëron propozimin e kryeministrit vlerësohet se vendimi i tre viteve më parë ka qenë i gabuar “ishte një veprim jo thjesht i parakohshëm, por me një impakt tërësisht negativ, pasi ka nxitur në mënyrën më ekstreme shpifjen në emër të lirisë së shprehjes, shpifjen duke i atribuar dikujt tjetër pa asnjë hezitim kryerjen e veprave nga më të rëndat penale, ndërkohë që dihet me siguri se faktet e prezumuara si të tilla janë tërësisht të pavërteta”, shpjegon relacioni, ndërsa nënvizon se “Pështjellimi, që “denoncime” të tilla shpifëse shkaktojnë në opinionin shoqëror, është i tillë që cenon maksimalisht dhe mbi të gjitha ndjenjën e sigurisë dhe të besimit që shteti nëpërmjet përfaqësueve të tij më të lartë shtetërorë përçon dhe ka për detyrë të përçojë te qytetarët”, shkruhet në relacionin shpjegues

Shqetësim për propozimin e tij shfaqi menjëherë përfaqësuesja e OSBE-së për lirinë e Medias Dunja Mijatovic, sipas së cilës “institucionet publike dhe zyrtarët nuk duhet të gëzojnë një mbrojtje shtesë ndaj fjalimeve kritike. Përkundrazi, ata duhet të tolerojnë një shkallë më të madhe kritike, krahasuar me qytetarët e thjeshtë”. Përfaqësuesja e OSBE-së vlerëson se “sanksionet penale janë të tepruara dhe disproporcionale. Ato duhet të zëvendësohen me masa të përshtatshme dhe efektive administrative apo të së drejtës civile”, ndërsa i bën thirrje parlamentit “të rrëzojë propozimin e qeverisë” madje “të konsiderojnë dekriminalizimin e plotë të shpifjes”.

Në Tiranë më herët kjo cështje përfshiu edhe kreun e Shtetit Bujar Nishani sipas të cilit “befasues për mua si qytetar i këtij vendi, por edhe si President i Republikës u shfaq projektligji i qeverisë që kërkon rikthimin e burgimit për gazetarët me pretendimin e luftës ndaj shpifjes. Personalisht një akt të tillë e shoh me preokupim dhe shqetësim. E gjykoj kufizim të lirisë së shprehjes dhe cënim të standarteve demokratike të arritura deri më tash me kontributin e të gjitha paleve politike në vend. Sigurisht, shpifja është një gjest i ulët kudo dhe kurdo e sidomos kur përdoret mirëfilli për qëllime politike ajo shfaq gjithë shëmtinë e saj. Me fjalen mund të abuzohet dhe çdo abuzim është i kritikueshëm, por me ndrydhjen e saj mund të abuzohet shumë më tepër”, theksoi presidenti Nishani.

Kryeministri u vu në qendër të sulmeve edhe të opozitës. Kryetari i saj Lulzim Basha theksoi se “burracaku Rama kërcënon me burg mediat dhe gazetarët që nuk arrin t’i shantazhojë apo bleje e që kanë kurajon të nxjerrin në dritë skandalet, korrupsionin, vjedhjen, ortakërinë e tij me krimin”.

Nga ana e tij kryeministri Edi Rama reagoi përmes disa postimeve në Facebook, duke sqaruar se nisma sipas tij nuk ka lidhje me shtypin, e duke saktësuar se “shpifja duhet të jetë vepër penale për çdo politikan që paguhet me taksat e popullit”. Megjithatë zoti Rama bëri një hap pas ndërsa kërkoi “ndjesë që ka hapur shteg për një keqkuptim të madh”.

Edhe kryetari i parlamentit Ilir Meta foli për “një keqkuptim midis qëllimit të kësaj iniciative dhe të mënyrës se si ka funksionuar formulimi, kështu besoj se ky keqkuptim do të zgjidhet, do të ketë një reflektim”.

Më vonë, ministrja për marrëdhëniet me parlamentin Ermonela Felaj njoftoi se projektligji do të tërhiqet, duke shpjeguar se qëllimi i nismës nuk kishte të bënte me shtypin:  “Ne do ta tërheqim atë nismë për të saktësuar pikërisht këtë moment në mënyrë që të mos ndodhi ky lloj diskutimi por një gjë duhet të jetë e qartë që politikanët duhet të kenë një marrëdhënie korrekte me të vërtetën, kanë detyrimin për sa kohë paguhen nga taksat e publik të shprehin të vërtetën dhe të luftojnë për të vërtetën”.

Por edhe nëse saktësohet cështja lidhur me gazetarët, për opozitën sërish shihet si një instrument për të goditur cdo zë kundërshtar. “Ajo që thotë ministrja Felja, është absolutisht pa sens. Dispozita që është paraqitur nuk është cështje keqkuptimi, është një dispozitë që godet drejtpërdrejtë, median, cdo individ dhe opozitën. Ajo që ka ndërmend kryeministri nuk është gjë tjetër vecse të mbyllë cdo zë opozitarizmi. Dhe më sumë se kushdo, këtu në parlament, këtë e bën partia demokratike”, deklaroi Oerd Bylykbashi, deputet demokrat.

Propozimi i kryeministrit mbërriti në një moment kur ka një rritje të ndjeshme të kritikave ndaj qeverisë së tij dhe ministrave për përfshirje në aktivitetet të paligjshme apo korrupsion, jo vetëm nga opozita por edhe nga mediat. Nga ana tjetër së fundmi, edhe personalisht, zoti Rama ka ngritur tonet ndaj shtypit duke e akuzuar atë se po abuzon me të vërtetat. (voa)

Shqipëria

Tiranë, Këshilli Bashkiak miraton ligjin për parkingjet me pagesë

Komento

Erion-VeliajKëshilli Bashkiak i Tiranës ka miratuar mbrëmjen e së mërkurës ligjin për parkingjet me pagesë. Pas një debati që ka zgjatur për rreth 3 orë, Këshilli ka votuar projektin në fjalë, që përcakton dhe tarifat e parkimit, vetëm me votat e mazhorancës.

Nga ana tjetër, këshilltarët opozitarë e bojkotuan votimin. Me të njëjtat vota janë miratuar ndërkohë edhe pikat e tjera të rendit të ditës, mes të cilave ajo për rritjen e rrogave të administratës së bashkisë.

Në fjalimin e tij në hapje të seancës, kryetari i Bashkisë Erion Veliaj e cilësoi si një domosdoshmëri çështjen e menaxhimit të parkingjeve përmes një agjencie, në mënyrë që të ardhurat e siguruara nga ky shërbim publik t’i shkojnë bashkisë dhe të përdoren më tej për përmirësimin e shërbimit ndaj qytetarëve.

Veliaj solli si shembull projektlin pilot të parkingut tek sheshi “Italia”, të ardhurat e të cilit kanë kapur shifrën e rreth 1 mijë eurove në ditë, apo 30 mijë euro në muaj për Bashkinë e Tiranës.

“Ju i keni parë ca njerëz që vijnë vërdallë dhe marrin para cash nga njerëzit për t’u parkuar makinat. 1 mijë euro në ditë fitim bashkisë nga parkingu te sheshi ‘Italia’, një projekt pilot që rezulton një histori suksesi. Një tjetër projekt pilot është ai në rrugën ‘Dritan Hoxha’, ku kemi edhe një korsi për urbanin dhe një për biçikletat. Lajmi i mirë është për rezidentët, të cilët e kanë parkimin falas. Sheshet e pallateve ishin kthyer në sheshe për shitje automjetesh, ndërkohë që të ardhurat do t’i shkonin qytetit. Vende shumë më të sofistikuara se ne i kanë bërë këto debate, por nuk i kanë politizuar”, tha ndër të tjera Veliaj.

Sa u takon tarifave, Bashkia aktualisht ka vetëm një regjim, atë për 3 mijë vende me 1.000 lekë ora, ndërkohë që sipas Veliajt, kryeqyteti duhet të ketë disa paketa tarifimi.

/ Top Channel

Maqedonia

Kuvendi votoi ministrat e rinj

Komento

parlamenti i mkMe shumicë dërmuese Kuvendi zgjodhi sot edhe dy ministrat e propozuar nga LSDM-së Oliver Spasovski për Punë të Brendshme dhe Frosina Remenski për punë dhe politikë sociale, si dhe Marta Arsovska Tomovska në krye të ministrisë për shoqëri informative dhe administratë publike. Përveç tyre betim solemn sot në Kuvend dhanë edhe zëvendës ministrat, tre nga radhët e LSDM-së që në bujqësi, shoqëri informatike dhe ministrinë e financave dhe dy zëvendës ministra nga radhët e VMRO-së të cilët po ashtu do të kenë të drejtë vetojë në vendimet e ministrave të LSDM-së në polici dhe punë sociale. Kryeministri Gruevski gjatë nominimit të kandidatëve i ftoi ata që interes shtetërore ti kenë mbi ato partiake.

“Pres që ministrat e rinj si edhe Zv. ministrat të jenë të fokusuar në procesin zgjedhor në pajtim me Marrëveshjen e Shkupit, Qershor-Korrik, pres që të mos i ndalojnë projektet e filluara nga Qeveria ,si dhe projektet nga programi i Qeverisë. Pres që të jenë të fokusuar në zgjedhjen e problemeve të qytetarëve të R. Maqedonisë. Pres angazhimin e tyre dhe punë dhe sjellje të përgjegjshme”, deklaroi Nikolla gruevski, kryeministër.

Kreu i LSDM-së, Zoran Zaev para Kuvendit deklaroi se ministrat e partisë së tij do të jenë kontrollues të punës së Qeverisë si dhe garanci për kthimin e lirisë në vend.

“Detyra e këtyre njerëzve është që të jenë kontrollues të gjithë procesit dhe t’ua garantojnë vullnetin tuaj të lirë, përcaktimin e shprehjes së lirë pas shumë viteve në Maqedoni. Në Maqedoni, patjetër, duhet dhe të do të ketë liri dhe demokraci. Pjesëmarrja e këtyre njerëzve në qeverinë kalimtare është kontroll absolut i rolit të tyre. Kontroll me qëllim kthimin e lirinë në vendin tonë. Ndërsa më 24 do t’i kthejmë vlerat Kushtetuese në Maqedoni dhe vlerat ekonomike për të cilat të gjithë angazhohemi”, u shpreh Zoran Zaev, Kryetar i LSDM-së.

Partitë shqiptare u përplasën kryesisht për kontributin në zgjidhjen e krizës si dhe për kompetencat e zëvendës ministrave shqiptarë në kabinetin e ri. Artan Grubi akuzoi Thaçin se nuk ka dhënë asnjë kontribut në Marrëveshjen e Përzhinos, ndërsa Imer Aliu tha se VMRO, LSDM dhe BDI edhe zyrtarisht pranuan fajin për krizën e krijuar në vend.

“Si thonë, ra ky mort e u pamë. Për BDI-në, fakti që ata sot legjitimojnë një diskriminim të skajshëm që po ndodh është katastrofle. Fakti që ata pranuan që zv ministrat e tyre të mos kenë të drejtë veto tregon realisht se në çfarë gjendje gjinden ata dhe me këtë për fat të keq në çfarë gjendje I kanë sjellë shqiptarët e Maqedonisë. Prej sot ju jeni ata kalorësit e epokalipsës, me fat”, u shpreh Imer Aliu, PDSH.
“Në këtë marrëveshje firmën e vetë e vendosi edhe zoti Menduh ThaçI, kryetarë i PDSH dhe përveçse asaj firme dhe atij mundu në ditën e nënshkrimit, asnjë kontribut të vetëm gjatë çdo dite të negociatës që nga 2 qershori, 15 korriku e gjer më sot nuk e ka dhënë për të mirën e shqiptarëve në grupet e punës dhe në negociatat e përditshme. Absolutisht e pavërtetë që e drejta e vetos i mohohet vetëm BDI, por përkundrazi nga 5 zv ministra që nuk do të kenë të drejtë të veto-s, 3 i takojnë VMRO-DPMNE-së”, theksoi Artan Grubi, BDI.

Deputetët e pavarur kanë kritikuar mënyrën e arritjes së marrëveshjes dhe përfshirjen ne bisedimet e grupeve punuese, si dhe u shprehën skeptik se Qeveria e re do të arrinte suksese.

Arben Zeqiri

Maqedonia

Zaev: Pas 24 prillit unë do të jem Kryeministër, jo Kryetar Komune

Komento

zaevZgjedhja e ministrave dhe zëvendësministrave nga LSDM-ja është vetëm një hap drejt rrugës së pandalshme që do të sjellë ndryshime demokratike në Republikën e Maqedonisë, tha Zaev në një konferencë për shtyp para hyrjes kryesore të Kuvendit pasi u zgjodh Qeveria Teknike.

– Funksioni i këtyre njerëzve është për të vepruar si vëzhgues dhe të sigurojnë vullnetin e lirë të qytetarëve. Maqedonia duhet të ketë dhe do të duhet liria dhe demokracia, – tha lideri i LSDM-së.

Ai theksoi se tani pjesëmarrja e LSDM-së në qeveri ka një rol kontrollues, dhe se më 24 prill LSDM-ja do t’i kthejë vlerat kushtetuese dhe ekonomike për të gjithë qytetarët që kërkojnë dhe e meritojnë.

I pyetur nga gazetarët, a do ngel kryetar Komune pas zgjedhjeve të parakohshme të vitit të ardhshëm, ai tha se nuk do të jetë më Kryetare Komune, sepse do të ketë meritën dhe nderin për të udhëhequr qeverinë e re të Republikës së Maqedonisë.

– Kryeministri është ai që duhet të japë dorëheqjen 100 ditë para zgjedhjeve dhe duhet të formojnë një qeveri të re me një kryeministër të ri. Pas 24 prillit nuk do të jem Kryetar Komune, sepse unë do ta të marrë nderin për të udhëhequr qeverinë e re të Republikës së Maqedonisë – tha Zaev tha në një deklaratë të dhënë para Parlamenti, pas zgjedhjes së ministrave dhe zëvendësministrave nga LSDM-ja. (ina)

Kosova, Shqipëria, Sport

Kosovë-Shqipëri, Prishtina mbushet me flamuj kombëtarë

Komento

“Mirë se vini në Shqipëri”

prish-kuqDy ditë para ndeshjes miqësore Kosovë-Shqipëri, grupi i tifozëve nga Prishtina “Plisat” kanë nisur të vendosin rreth 5000 flamuj kombëtarë në rrugët e kryeqytetit kosovar.

Vendosja e flamujve kuq e zi po bëhet për të nderuar Kombëtaren shqiptare pas kualifikimit Europianin e Francës.

Ditë më parë, në rrjetin social Facebook, udhëheqësi i “Plisave”, Albert Kastrati ka shkruar se “Plisat” e konsiderojnë vetën pjesë të Kombëtares, po aq sa Kombëtarja është pjesë e Prishtinës.

“Festën tonë të madhe dhe rrugëtimin tonë të përbashkët drejt Francës, t’a bëjmë ashtu siç na ka hije, të gjithë shqiptarët të bashkuar”, ka shkruar Kastrati.

I pari i “Plisave” ka bërë thirrje që tribuna jugore e stadiumit të Prishtinës të jetë e gjitha kuq e zi. Kjo pasi ndeshja e së premtes është festë dhe për ta përshendetur Kombëtarën në rrugën e saj drejt Parisit.

Slogani me të cilin “Plisat” po presin Kombëtaren është “Mirë se vini në Shqipëri”, të cilin e ka shpërndarë në rrjetin social Facebook edhe kapiteni i Kombëtares, Lorik Cana me mbishkrimin “S’ka nevojë për më shumë fjalë! Bravo Plisat”.

/ Top Channel

Kosova

Pezullimi i përkohshëm i Asociacionit nuk e zhbllokon Kuvendin

Komento

parlamenti ks me lotsjellesVendimi i Gjykatës Kushtetuese për shqiptimin e masës së përkohshme me të cilën suspendohet zbatimi i parimeve të përgjithshme të marrëveshjes për Asociacionin e Komunave me Shumicë Serbe në Kosovë, nuk e ka bindur opozitën që t’i kthehet punës normale të Kuvendit.

Opozita rithekson mosbesimin e saj në Gjykatën Kushtetuese, kurse masën e përkohshme, përveç se e sheh si një procedurë të rregullt të punës, e sheh edhe si një lloj “blerje kohe” nga partitë në pushtet për miratimin e buxhetit të vitit 2016 dhe disa ligjeve të cilat nga Qeveria janë vlerësuar të një rëndësie të veçantë.

Nisur nga këto qëndrime jo-premtuese se do të normalizohet puna në Kuvendin e Kosovës, nënkryetarja e Parlamentit Evropian, Ulrike Lunacek, e cila po qëndron në Prishtinë, ka deklaruar se bllokimi i punës së institucioneve është i papranueshëm.

Ajo i ka kritikuar veprimet e opozitës që përcillen me bllokimin fizik të punës së Kuvendit, qoftë përmes hedhjes së gazit lotsjellës apo përdorimit të gjësendeve tjera.

“Kuvendi është vendi ku duhet të ketë dialog. Ku fjalët dhe argumentet duhet të ballafaqohen dhe jo format tjera. Unë shpresoj që opozita do të kthehet, t’i diskutojë këto çështje dhe përfshihet në debat”, ka theksuar Lunachek. Marrë parasysh përplasjet që ka shkaktuar dialogu me Serbinë në raportet e brendshme politike në Kosovë, eurodeputetja kishte një mesazh edhe për qeverinë e Kosovës gjithashtu.

“Mendoj se do të ishte ide e mirë që qeveria, para se të shkojë në takimin e radhës me Beogradin dhe po ashtu edhe pas dialogut t’i drejtohet Kuvendit dhe të tregon se çfarë kërkon nga ky dialog dhe çfarë është vendosur aty”, ka thënë Lunachek.

Procedimi i lëndës për vlerësimin e parimeve të marrëveshjes për Asociacionin e Komunave me Shumicë Serbe në Gjykatën Kushtetuese është bërë nga Presidentja e Kosovës, Atifete Jahjaga.

Kërkesa ka të bëjë me shqyrtimin e parimeve të saj, përkatësisht të interpretohet nëse ajo është në harmoni me Kushtetutën e Kosovës.

Vendimi i Gjykatës Kushtetuese mund të zgjasë deri në javën e dytë të janarit të vitit 2016. Deri atëherë, Asociacioni nuk do të mund të themelohet ngase është i pezulluar.

Sidoqoftë, pavarësisht kësaj mase, opozita mbetet në qëndrimet e vjetra, duke u zotuar se do ta pengoj punën normale të Kuvendit deri në anulimin e tërësishëm të kësaj marrëveshje dhe marrëveshjes me Malin e Zi për demarkacionin e kufirit.

Deputeti i Lëvizjes Vetëvendosje, Faton Topalli ka thënë se nuk sheh ndonjë arsye që opozita të tërhiqet.

“Nuk ka asnjë kuptim që të vazhdojnë punimet e Kuvendit, për arsye se kryeministri Mustafa vazhdimisht potencon që nuk ka tërheqje nga marrëveshjet me Serbinë. Ne i kundërshtojmë këto marrëveshje, për arsye se e ndajnë Kosovën dhe e bëjnë atë jofunksionale. Pra, nuk ka kuptim që të diskutohet për disa çështje të cilat konsiderohen dhe deklarohen si të përfunduara”, ka thënë Topalli.

Në anën tjetër, Bashkimi Evropian, si ndërmjetësues në dialogun ndërmjet Prishtinës dhe Beogradit ka kërkuar që palët t’i zbatojnë obligimet që kanë marrë me anët ë marrëveshjeve.

Maja Kocijançiq, zëdhënëse e përfaqësueses së Lartë të BE-së, Federica Mogherini përmes një përgjigje me shkrim ka thënë se përderisa çështja është në proceset gjyqësore, duhet shmangur komentet.

Por, ka nënvizuar ajo, Brukseli pret që marrëveshja e 25 gushtit për Asociacionin të zbatohet.

Dialogu ndërmjet Prishtinës dhe Beogradit, sipas BE-së ka si qëllim normalizimin e raporteve mes dyja vendeve.

Por, lobimi i fuqishëm i Serbisë kundër pranimit të Kosovës në UNESCO ka ndikuar tashmë, jo vetëm te partitë politike, por edhe një pjesë e shoqërisë civile që t’i kërkojnë qeverisë ta rishqyrtojë pozicionin e Kosovës në këtë dialog.

Intervista

Ymeri: Të heqin dorë nga marrëveshjet me Serbinë ose kjo qeveri s’është më e jona

Komento

ymeriIntervistë e Visar Ymerit për “Java News”

Ekskluzive/ Kryetari i “Vetëvendosjes” në këtë intervistë për “JAVA”, menjëherë pas mospranimit në UNESCO shpjegon arsyet sepse dështoi Republika e Kosovës; pse nuk mund të bëhet më marrëveshje me Serbinë dhe ca më shumë akoma pse ky lidërship i Kosovës e ka të pamundur ta përfaqësoj vendin me kredencialet e veta…

Intervistoi Ben Andoni

Për kryetarin Visar Ymeri dhe të gjithë njerëzit e tjerë të Vetëvendosjes nuk ka asnjë mëdyshje. Qeveria e kryeministrit Isa Mustafa dhe Hashim Thaçit, si zëvendëskryeministër dhe Ministër i Jashtëm nuk e përfaqëson më Kosovën.

Në një bilanc në retrospektivë që bën prej nga viti 2010, autoriteti ndërkombëtar i Kosovës është përkeqësuar ashpër. Dhe për publikun e “JAVA” ka ardhur një paralele me atë që ka ndodhur në Bosnjë me krijimin e administrimit serb në territor dhe që ka funksionuar për ta në kurriz të Bosnjës. E neve s’na falet sepse e kemi provuar në lëkurën tonë, këtë që kanë bërë serbët, thotë ai.

E nëse kryeministri nuk llogaritet, Thaçi është “përgjegjësi kryesor për një shërbim diplomatik aspak në nivel të detyrës përkundrazi. Prej vitesh ne paralajmërojmë dhe dokumentojmë e argumentojmë se ndikimi i Rusisë dhe përdorimi i saj nga Serbia do ta bllokojë gjithnjë e më shumë aktivitetin ndërkombëtar të Kosovës dhe se rruga nuk është amnistimi i krimeve të Serbisë përmes negociatave me Kosovën por kushtëzimi i saj. Drejtuesit e politikës së Jashtme të Kosovës kanë ndjekur një rrugë pa krye që po e kryqëzon Kosovën. Taktizimi i Hashim Thaçi për të gjetur rrugë të shkurtra pra jo zhvillim e forcim i Kosovës por tryeza negociatash me Serbinë e kanë sjellë një ripozicionim të Serbisë në rajon. Kjo politikë e Thaçit po e normalizon hegjemoninë dhe fashizmin e shtetit serb edhe për të kaluarën edhe për tashmen”.  

Dhe, a ka ndonjë zgjidhje e gjithë kjo. Po, patjetër. “Ne do ta vazhdojmë protestën. Nuk heqim dorë. Do të bëjmë gjithçka që mundemi që Qeveria të heqë dorë nga marrëveshjet ose nga të qenit qeveri e Kosovës”, përfundon ai.

Duket se një nga kërkesat tuaja për të qenë diskret në marrëdhënie me Serbinë është vërtetuar, përkundrejt luftës së paepur të Serbisë për të penguar Kosovën në UNESCO. Duket se politika e jashtme e Kosovës është e dështuar në gjetjen e lobimit të duhur për anëtarësimin në UNESCO? A kishit ndonjë shpresë se Kosova do të votohej?

“Pavarësisht shpresave tona madje pavarësisht dhe rezultatit të mundshëm pozitiv për anëtarësim sulmi agresiv i Serbisë është vërtetimi, për fat të keq, i sërishëm i të gjithë kritikave tona për qëndrimet zyrtare të Qeverive të Kosovës veçanërisht ato pas vendimit të Gjykatës Ndërkombëtare të Drejtësisë lidhur me pavarësinë e Kosovës.

Pozicioni i Kosovës në raport me Serbinë sa i takon subjektivitetit ndërkombëtar të vendit tonë prej vitit 2010 është përkeqësuar ndjeshëm. Në fund të vitit 2011 ekipi negociator i qeverisë së Kosovës ra dakord dhe e finalizoi në shkurt mbajtjen e footnotës për Kosovën me pretekstin se kjo do ta lejonte pjesëmarrjen e papenguar nga Serbia në forume rajonale e më gjerë. Footnota i mbeti Kosovës si një lloj i kontestimit ndërsa Serbia as ndërroi sjellje në pengimin apo protestën sa herë që Kosova që e ftuar në forume.

Në Marrëveshjen të ashtuquajtur për normalizimin e marrëdhënieve Kosovë-Serbi pika 14 e saj shkruan se janë pajtuar që asnjëra palë nuk do të bllokojë ose inkurajojë të tjerët të bllokojnë palën tjetër në rrugën përkatëse drejt BE-së. VETËVENDOSJE! pati protestuar e kërkuar me këmbëngulësi që as mos të miratohej në Kuvend kjo marrëveshje e as mos të pranohej si premisë negociimi. E konkretisht për këtë pikë ne patëm paralajmëruar se Serbia mund të angazhohet kundër anëtarësimit të Kosovës në çdo forum ndërkombëtar përveç në BE, ku edhe ashtu jemi tepër larg, e madje as Serbia s’na bën dot gjë edhe për shumë vite. Në fakt, kjo është më shumë që Kosova të mos e pengojë Serbinë. Por pushteti i Hashim Thaçit në atë kohë na pati nxjerrë zvarrë ne deputetët e VETËVENDOSJE!-s nga salla e Kuvendit të Kosovës duke lejuar të papenguar votimin për këtë marrëveshje që plot frute të hidhura i kanë dhënë brenda Kosovës siç është Lista serbe e Beogradit brenda institucioneve tona dhe frytin e parë të hidhur ndërkombëtarisht e dha të hënën më 9 nëntor ku Kosova u refuzua të jetë anëtare e UNESCO-s.

Sa i takon politikës së jashtme të Kosovës në përgjithësi ajo prej shpalljes së Pavarësisë me 2008 po drejtohet ekskluzivisht nga taktikat, metodat e njerëzit kryesisht të Hashim Thaçit aktualisht dhe Ministër i Punëve të Jashtme. Ai është përgjegjësi kryesor për një shërbim diplomatik aspak në nivel të detyrës përkundrazi. Prej vitesh ne paralajmërojmë dhe dokumentojmë e argumentojmë se ndikimi i Rusisë dhe përdorimi i saj nga Serbia do ta bllokojë gjithnjë e më shumë aktivitetin ndërkombëtar të Kosovës dhe se rruga nuk është amnistimi i krimeve të Serbisë përmes negociatave me Kosovën por kushtëzimi i saj. Drejtuesit e politikës së Jashtme të Kosovës kanë ndjekur një rrugë pa krye që po e kryqëzon Kosovën. Taktizimi i Hashim Thaçi për të gjetur rrugë të shkurtra pra jo zhvillim e forcim i Kosovës por tryeza negociatash me Serbinë e kanë sjellë një ripozicionim të Serbisë në rajon. Kjo politikë e Thaçit po e normalizon hegjemoninë dhe fashizmin e shtetit serb edhe për të kaluarën edhe për tashmen”.

Juve si formacion keni thënë se do të jeni sërish jo bashkëpunues në parlamentin e Kosovës. A mendoni se kjo është rruga e drejtë, në këtë kohë të vështirë? A mund t’i kursenit format e kësaj lloj proteste për të mos krijuar precedentë?

“Ne do të vijojmë protestën tonë në Kuvend e kudo. Ne e konsiderojmë të domosdoshme ndaljen e këtij revanshi të Serbisë ndaj Kosovës dhe në Kosovë. Nuk ka precedentë më të rrezikshëm se sa “Zajednica”.

Doja t’ia rikujtoja lexuesve tuaj një fakt shumë të rëndësishëm këtu në rajonin e Ballkanit.  Serbët në Bosnje Hercegovinë më 6 prill 1991 e shpallën  “Zajednicën e komunave të krahinës së Bosnjës”. Ajo  përbëhej nga 14 komuna me shumicë serbe në Bosnje Hercegovinë dhe drejtuar nga një këshill me përfaqësues nga secila komunë. Vetëm një vit më pas “Asambleja e Popullit Serb të Bosnje Hercegovinës” më 28 shkurt 1992 miratoi kushtetutën e Republikës Serbe të Bosnje Hercegovinës dhe me 14 dhjetor 1995 përmes Marrëveshjes në Dayton, “Republika Srpska” u njoh dhe ndërkombëtarisht. Ne e kemi dhe e njohim këtë eksperiencë e njohim po ashtu dhe Serbinë e kemi provuar në lëkurën tonë. Kështu që asgjë nuk janë mjetet tona të protestës nga ç’është rreziku i madh në të cilin e kanë futur Kosovën Isa Mustafa e Hashim Thaçi me marrëveshjet e fundit”.

 Ku janë pikat e përbashkëta të Pozitës me Opozitën në Kosovë, nga ku mund të fillojë dialogu, sipas VV?

“Për momentin nuk ka asnjë pikë të përbashkët. Ata refuzojnë të bëjnë hapa prapa karshi rrezikut të ndarjes së Kosovës. Edhe pas dështimit të djeshëm në UNESCO dhe fushatës së Serbisë kundër Kosovës Hashim Thaçi u deklarua se dialogu me Serbinë do të vijojë.

Në këto kushte protesta është mjeti i përshtatshëm i komunikimit më këtë lloj të qeveritarëve në Kosovë”.

A është opsioni i vetëm zgjedhjet e parakohshme me këtë situatë ku ndodhet Kosova?

“Kërkesa kryesore e opozitës së bashkuar është tërheqja e Kryeministrit Mustafa nga marrëveshjet me Serbinë dhe ajo për demarkacionin e kufirit me Malin e Zi. Nuk heqim dorë nga kjo kërkesë sepse besojmë se është e drejta, e duhur dhe e mbështetur nga mbi 200 mijë qytetarë të Kosovës në Peticionin kundër marrëveshjeve. Në Kosovë edhe nga opozita e bashkuar edhe nga anëtarë të shoqërisë civile e studiues të së drejtës është përmendur mundësia e referendumit por Isa Mustafa është përgjigjur prerazi që nuk është për këtë opsion.

Ne do ta vazhdojmë protestën. Nuk heqim dorë. Do të bëjmë gjithçka që mundemi që Qeveria të heqë dorë nga marrëveshjet ose nga të qenit qeveri e Kosovës”.