Arkivi mujor: Maj 2016

Maqedonia

Ndërkombëtarët kërkojnë Këshillin Opozitar në negociata, BDI kundër!?

Komento

KeshilliRezultatet dhe anketa e fundit e realizuar nga një prej institutive më prestigjioze në Maqedoni, “Instituti për Demokraci”, ka përfshirë edhe protestën madhështore të Këshillit Opozitar që u realizua më 9 Maj, e ku kishte mbi 30 mijë protestues.

“Më 9 Maj në Ditën e Europës dhe njëvjetori i ngjarjeve të Kumanovës me moton “Dita D – Drejtësi, Demokraci dhe Dinjitet” Këshilli Opozitar organizoi një protestë masovike në Shkup. Këshilli Opozitar shprehu mbështetje për Prokurorinë Speciale dhe kërkoi nga e njëjta t’i marr në shqyrtim rastet e montuara si “Monstra”, “Sopoti”, “Rasti i Kumanovës” dhe rastet e tjera të montuara ndaj shqiptarëve. Po ashtu kjo protestë ishte kundër pushtetit VMRO – BDI”, – thuhet ndër të tjera Instituti për Demokraci.

Burime diplomatike thonë se protesta masovike e 9 majit ka mbushur edhe syrin e bashkësisë ndërkombëtare, prej ku janë paraqitur ide për përfshirje të Këshillit në negociatat për dalje të Maqedonisë nga kriza. Kjo ide e tyre ka hasur menjëherë në rezistencë.

“Nuk na habiti kundërshtimi i partive maqedonase ndaj kësaj ideje, sepse një gjë të tillë e pritnim. Ajo që na habiti ishte kundërshtimi këmbëngulës i BDI-së”, kanë deklaruar diplomatët, transmeton “Lajm”, duke shtuar se kundërshtimi i BDI-së me siguri është për shkak se pjesë e Këshillit opozitar është Lëvizja Besa si dhe intelektualë të shquar.

Më 9 Maj Arjanit Hoxha, anëtari i Këshillit Opozitar kishte theksuar se përkrahja e mbi 30 mijë protestuesve ju jep jep të drejtë të kërkojnë kyçje në bisedimet për dalje nga kriza poltike, duke shtuar se kjo mbështetja masive delegjitimoi tërësisht BDI-në e Ali Ahmetit.

Kjo ndërlidhet me faktin se tashmë qytetarët i kanë dhënë mbështetje edhe idesë për kyçjen edhe të sektorit civil në bisedimet e grupeve të punës për tejkalimin e krizës me 61%. 27% e qytetarëve të anketuar vlerësojnë se ata nuk duhet kyçur në tavolinën e bisedimeve.
Ndryshe, sipas kësaj ankete Ali Ahmeti është lideri më i urryer mes shqiptarëve tëMaqedonisë. Kështu thonë rezultatet e anketës së fundit të realizizuar nga Institutit për Demokraci. Në pyetjen se çfarë mendimi kanë për liderët politik, shumica e shqiptarëve kanë dhënë vlerësime negative për të gjithë, por vendin e parë ia kanë lënë liderit të BDI-së, Ali Ahmetit me 73 % mendime negative.
Roli i SHBA-së dhe BE-së në tejkalimin e krizës për qytetarët është kyç. Shumica prej tyre vlerësojnë se ata e kanë fjalën vendimtare për të larguar drejtuar situatën.
Sa i përket besimin në institucionet e drejtësisë, tani për tani, vetëm Prokuroria Speciale gëzon besimin më të lartë tek qytetarët. Anketa është zhvilluar me 1016 të anketuar prej 6 deri 11 maj. (ina)

 

Shqipëria

Nisin punimet në Selanik për TAP-in. Tsipras: 8.000 vende të reja pune

Komento

tapNë Selanik kanë nisur punimet për ndërtimin e gazsjellësit të ri, që është projektuar të transportojë gazin azer përmes Greqisë veriore e Shqipërisë për në Itali, një investim që do të reduktonte varësinë energjetike të Europës nga Rusia.

Gazsjellësi Trans-Adriatik (TAP) do të jetë 878 kilometra i gjatë nga kufiri i Greqisë me Turqinë, deri në Italinë jugore, si dhe përfshin gjithashtu një shtrirje nën detin Adriatik prej 105 kilometrash. Shpërndarja e gazit drejt Europës pritet të fillojë në vitin 2020.

Kryeministri grek, Alexis Tsipras tha se projekti do të krijonte 8.000 vende të reja pune në vendin e tij që po vuan ekonomikisht, e që deri më tani ka një normë papunësie prej 24 për qind. Kreu i ekzekutivit grek foli gjatë një ceremonie të kësaj të marte, që shënonte fillimin e ndërtimit të gazsjellësit në qytetin verior portual të Selanikut.

“TAP” është një projekt bashkërisht i investuar dhe i zotëruar prej kompanisë britanike “BP”, asaj azere “SOCAR”, italianes “Snam”, belges “Fluxys”, spanjolles “Enagas”, si dhe zviceranes “Axpo”.

/ Top Channel

Shqipëria

Interkonjeksioni me Maqedoninë, kreu i OST: Ul koston

Komento

interkonjektioni me MKLinja e interkonjeksionit me Maqedoninë është projekti më i rëndësishëm energjetik që do të ndërtohet gjatë këtyre 3 viteve.

Kreu i OST thotë se bashkë me linjën e Greqisë, Malin e Zi dhe Kosovën që nis punën në qershor, intekonjeksioni me Maqedoninë ul koston e transmetimit.

“Është konsumatori që fiton në fund, pasi nuk ka kosto gjatë transmetimit nga njëri vend në tjetrin dhe sigurisht që edhe çmimi do të jetë më i ulët i energjisë”, shprehet Engjëll Zeqo.

Linja shtrihet në një gjurmë 55 km nga Qafthana në Elbasan dhe rreth 70 km nga Elbasani në Fier.

Kreu i OST thotë se një tjetër përfitim me përfundimin e ndërtimit të kësaj linje në 2019 n, është rritja e sigurisë së furnizimit me energji në një prej zonave më problematike në vend, atë të jugut.

“Mundëson uljen e humbjeve sepse kalimi në 400 kilovolt, në zemër të jugut ku garancia është e kufizuar pasi bregdeti dhe juglindja furnizohen aktualisht me 220 kilovolt na bën të riskuar. Është garanci edhe për ndërtimin e burimeve të reja gjeneruese në Vjosë dhe vënien në punë të TEC-it të Vlorës”, shprehet Zeqo.

Projekti ka një kosto prej 70 mln eurosh prej të cilave 49.8 mln janë kredi nga KFW, 15.2 mln grante dhe 5 mln euro do të financohen nga OST.

/ Top Channel

Bota

Të paktën 28 të vrarë në Irak

Komento

irakTë paktën 28 vetë janë vrarë dhe 65 janë plagosur nga bombat, sot në kryeqytetin e Irakut.

Sulmi më vdekjeprurës ndodhi në zonën e al-Shaabit në veri të Bagdadit ku zyrtarët thanë se autorja e një sulmi vetëvrasës aktivizoi eksplozivë në një treg.

Një sulm tjetër, një shpërthim me makinë bombë, goditi lagjen Rashid në pjesën jugore të qytetit.

Askush nuk e ka marrë ende përgjegjësinë për sulmin.

Gjatë javës së kaluar, Shteti Islamik mori përgjegjësinë për një valë sulmesh brenda dhe përreth Bagdadit që shkaktuan vdekjen e 100 personave. (voa)

Kosova

Johannes Hahn në Prishtinë pas hyrjes në fuqi të MSA-së

Komento

Një delegacion i madh me përfaqësues nga institucionet e BE-së, Komisioni dhe Parlamenti Evropian, qëndroi në Kosovë për të marrë pjesë në konferencën e nivelit të lartë për MSA-në, ndërmjet Kosovës dhe BE-së.

Johannes HahnMarrëveshja e Stabilizim Asocimit (MSA) është moment historik për marrëdhëniet ndërmjet Kosovës dhe Bashkimit Evropian. Tani është koha që Kosova dhe BE-ja t’i intensifikojmë përpjekjet e përbashkëta, sepse kjo marrëveshje ofron mundësi të shkëlqyeshme të zhvillimit ekonomik.

Kështu tha në Prishtinë, Komisioneri i BE-së për Politika të Fqinjësisë dhe Negociatat e Zgjerimit, Johannes Hahn. Ai së bashku me një delegacion të nivelit të lartë të BE-së dhe Parlamentit Evropian të hënën dhe të martën (16.05 -17.05)qendruan në Kosovë, ku morën pjesë në konferencën e nivelit të lartë për marrëveshjen e Stabilizim Asociimit mes BE-së dhe Kosovës, e para e këtij lloji që nga hyrja në fuqi e MSA-së për Kosovën më 01.04. Në këtë konferencë u diskutua për “stimulimin e ekonomisë, zhvillimit dhe krijimit të vendeve të punës në Kosovë”.

“MSA është një kontratë që lidh Kosovën me BE-në. Është shumë e rëndësishme që e kemi ketë marrëveshje pasi ajo krijon zhvillim ekonomik. Ne po lëvizim drejt zonave të lira tregtare. Brenda 5 viteve pas hyrjes në fuqi të MSA-së Shqipëri – Maqedoni, volumi tregtar është rritur dhe janë krijuar mijëra vende pune. MSA krijon një klimë biznesi për rritjen e investimeve. MSA është një kornizë në marrëdhëniet tona. Është koha t’i intensifikojmë përpjekjet tona të përbashkëta, sepse kjo ofron mundësi të shkëlqyeshme të zhvillimit ekonomik”, tha Johanes Hahn.

Komisioneri evropian tha se “institucionet e Kosovës në veçanti Qeveria e Kosovës duhet të punojë në forcimin e ligjit”. Sipas tij: “MSA nuk do të zgjidhë problemet e brendshme politike të shtetit”. Por sipas komisionerit Johannes Hahn, Kosova duhet të bëjë shumë reforma dhe të punojë shumë në disa çështje thelbësore. “Përforcimi i sundimit të ligjit dhe institucionet e fuqishme janë kyçe për zbatimin e MSA-së, një gjyqësor i mirë dhe përkushtimi ndaj luftimit të krimit. Do të thellojmë marrëdhëniet, por ndryshimi nuk ndodh i vetëm. Implementimi i saj ka të bëjë jo vetëm me qeverinë por dhe me shoqërinë civile pozitën e opozitën. Marrëveshja nuk mund të rregullojë sfidat e brendshme politike të Kosovës. Kosova ka demonstruar aftësi në rezultatet e reformave. Ajo për çfarë kemi nevojë tani për Kosovën është fokusimi që të kemi progres. MSA-ja do të marrë kohë dhe sfida e ardhme është zbatimi i saj. Mund të llogarisni në asistencën tonë”, tha Johannes Hahn.

Sipas komisionerit Hahn, institucionet e fuqishme dhe efikase, janë shumë të rëndësishme për implementimin e suksesshëm të MSA-së. “Ndërkohë, Kosova ka kohë deri në 10 vjet, që të hapë tregun ndaj Bashkimit Evropian, por më duhet të theksoj se 10 vjet është kornizë shumë e gjatë kohore, megjithatë nuk duhet të harroni të filloni menjëherë me përshtatjen ndaj sfidave”, tha Johanes Hahn.

Zyrtari i lartë evropian Johannes Hahn dhe europarlamentarët takuan udhëheqësit më të lartë të Kosovës. Presidenti i Kosovës, Hashim Thaçi, tha se me hyrjen në fuqi të MSA-së dhe rekomandimit për liberalizim të vizave, perspektiva evropiane për Kosovën nuk është vetëm një deklaratë, por një kontratë. “Marrëveshja për Stabilizim-Asocim është një marrëveshje për të ardhmen e shtetit tonë. Nën këtë mesazh sot bashkohemi të gjithë pa asnjë dallim. Ajo paraqet një mundësi për zhvillimin ekonomik të vendit dhe krijimin e vendeve të reja të punës, sepse zgjeron marrëdhëniet tregtare ndërmjet BE-së dhe Kosovës me krijimin gradual të një zone të tregtisë së lirë”, tha presidenti Hashim Thaçi.

Kryeministri i Kosovës, Isa Mustafa nga ana e tij, MSA-në për Kosovën e ka cilësuar si një hap vendimtar për integrimin e vendit në Bashkimin Evropian. Sipas tij, Marrëveshja e Stabilizim Asocimit ka konfirmuar vullnetin e qytetarëve të Kosovës për integrimin evropian, ndërsa,në anën tjetër është konfirmuar vullneti i Bashkimit Evropian për pranimin e Kosovës në familjen evropiane. “Kosova do të ketë qasje të lehtësuar në tregjet e Bashkimit Evropian, asistencë financiare dhe teknike që do të ndihmojë dhe do të shtyjë performancën e funksionimit të institucioneve demokratike të Kosovës”, tha kryeministri Isa Mustafa.

Marrëveshja për Stabilizim Asociim ndërmjet Bashkimit Evropian dhe Kosovës u nënshkrua më 27 tetor të vitit 2015 dhe hyri në fuqi më 1 prill të këtij viti.

Delegacioni i madh me përfaqësues nga institucionet e BE-së, Komisioni dhe Parlamenti Evropian, që qëndruan dy ditë në Kosovë kryesohej nga Tonino Picula dhe Johannes Hahn. Ata shoqëroheshin edhe nga zëvendëspresidentja e Parlamentit Evropian, Ulrike Lunacek, europarlamentarët Dubravka Suica, Tanja Fajon, Jozo Rados, Georgios Kyrtsos dhe Julie Ward. (dw)

Kosova

Këshilli i Sigurimit diskuton për Kosovën

Komento

K i SigurimitKëshilli i Sigurimit i Kombeve të Bashkuara mbajti sot diskutimin e radhës për Kosovën, ku përfaqësuesit e Prishtinës dhe Beogradit, paraqitën pikëpamje shumë të ndryshme për gjendjen në Kosovë, duke nxjerrë kështu në pah se marrëdhëniet mes dy vendeve vazhdojnë të jenë të vështira.

Ambasadorja e Kosovës, Vlora Çitaku u përqendrua tek arritjet e fundit diplomatike të Kosovës, përfshirë anëtarësimin në UEFA dhe FIFA dhe propozimin për liberalizimin e vizave, duke thënë se ato do të hapin mundësi të reja për qytetarët e Kosovës.

Ajo denoncoi reagimin e zyrtarëve të lartë të Serbisë ndaj këtyre zhvillimeve, duke thënë se një reagim i tillë që kërkon t’u mohojë të rinjve të Kosovës mundësinë për të konkurruar në shkallë botërore. Ajo tha se rruga e Kosovës drejt integrimit në institucione ndërkombëtare dhe perspektiva evropiane e saj, është e pakthyeshme.

Ministri i jashtëm i Serbisë, Ivica Daçiç, u përqendrua tek gjendja e sigurisë e serbëve dhe pakicave të tjera joshqiptare në Kosovë, duke thënë se kushtet e sigurisë për ta janë shqetësuese dhe të drejtat e tyre shkelen. Zoti Daçiç e portretizoi gjendjen si mungesë vullneti dhe dobësi në qeverisje, duke përmendur edhe situtën e brishtë politike në Kosovë.

Një nga pikat ku ministri Daçiç dhe ambasadorja Çitaku paraqitën variante që binin ndesh me njëri-tjetrin, ishte çështja e ekstremizimit.

Zoti Daçiç, tha se gjendja e sigurisë në Kosovë, rëndohet edhe më shumë nga ekstremizmi dhe radikalizimi në rritje dhe tha se shifrat zyrtare janë më të vogla se ato aktuale.

Ndërsa ambasadorja Çitaku u përqendrua tek përpjekjet e autoriteteve të Kosovës për ta luftuar këtë dukuri dhe kritikoi Serbinë se po përpiqet ta paraqesë Prishtinën nën një frymë që nuk përputhet me aspiratat e saj evropiane.

Të dy vendet shprehën angazhimin për të zbatuar marrëveshjet megjithëse me rezerva për angazhimin e palës tjetër.

Ndërkohë përfaqësuesi i Shteteve të Bashkuara, zëvendës ambasadori i delegacionit amerikan në OKB, David Pressman u bëri thirrje vendeve të Kombeve të Bashkuara që nuk e kanë njohur Kosovën, ta njohin atë.

Ai kërkoi zvogëlimin e pranisë së UNMIK-ut në Kosovë dhe që takimi tre mujor për përparimin atje të kthehet në në mujor. (voa)

Kulturë

Triumf i Ermonela Jahos, shqiptarja fiton “Oscar”-in e operës botërore

Komento

ermonela jahoSopranoja shqiptare me famë botërore, Ermonela Jaho, ka fituar Çmimin Ndërkombëtar të Operës nga votat e publikut botëror.

Ky çmim, që mund të quhet si “Oscar”-i i Operës Botërore, i është dhënë yllit shqiptar të muzikës operistike, gjatë ceremonisë së ndarjes së çmimeve të zhvilluar të dielën në mbrëmje në Teatrin Savoy të Londrës.

Jaho e ka fituar këtë çmim në bazë të votave të publikut mbarë botëror. Në kategorinë e çmimit të dhënë nga publiku botëror, sopranoja shqiptare konkurronte me disa nga zërat më të bukur dhe më të njohur të operës botërore kontemporane, si  Joyce Didonato, Juan Diego Florez, Dimitri Hvorostovsky, apo Eva Maria Ëestbroek, etj.

Në ceremoninë e ndarjes së çmimeve përfshiheshin çmimet për regjinë më të mirë,  dirigjentin më të mirë, këngëtarët e kategorive të ndryshme apo produksionet e teatrove nëpër botë.

Nomimini dhe votimi nga publiku botëror lihet me performancat e Ermonela Jahos gjatë tërë këtyre viteve, duke përmendur “Sour Angelica” në triptikun e Pucinit, apo edhe regjistrimin së fundmi të operës “Zaza” me  orkestrën simfonike të BBC në Londër. Këto performanca janë vlerësuar maksimalisht nga disa nga mediat më të njohura dhe me më influencë në botë si “Financial Times”, që sërish boton të hënën një shkrim për sopranon shqiptare, “Times” e Londrës, e shume media në mbarë botën.

Duke folur për Top Channel në Londër, pas marrjes së çmimit ndërkombëtar, Ermonela Jaho tha: “Jam shumë e emocionuar në këto momente. Falenderoj gjithë shqiptarët që votuan për mua dhe publikun që më ndjek në çdo anë të botës. Kushdo që përkushton gjithë jetën drejt pasionit të tij, është gjithmonë fitues”, deklaroi Jaho pas marrjes së çmimit ndërkombëtar.

Ky çmim për yllin shqiptar të muzikës operistike është i pari që një artist shqiptar merr në nivele të tilla kaq të larta, vlerësohet se çmim “Oscar” i muzikës operistike në botë.

/ Top Channel

Maqedonia

Brukseli e godet rëndë Gruevskin, nuk pranohen zgjedhjet e 5 qershorit

Komento

brukselKomisioni Evropian(KE) ka ritheksuar qëndrimin se nuk do të pranojë rezultatet e zgjedhjeve të 5 qershorit, në të cilat po merr pjesë vetëm një parti politike.

Nga KE paralajmërojnë se cdo qeveri që del si rezultat i zgjedhjeve në të cilat tre partitë nënshkruese të Marrëveshjes së Përzhinës nuk marrin pjesë, nuk do jetë partnerë i besueshëm për omunitetin ndërkombëtar.

KE vlerëson se nuk janë vlerësuar as kushtet minimale për zgjedhjet e parakohshme parlamentare të 5 qershorit. (INA)

Maqedonia

Dalin në shesh gënjeshtrat: nxënësit maqedonas bien nën 50% nga numri i përgjithshëm!

Komento

NxënësitSe po manipulohet me numrin e popullsisë maqedonase dhe shqiptare, vërteton numri i nxënësve në shkollat fillore. Sipas të dhënave zyrtare, përqindja e nxënësve maqedonas në shkollat fillore në vend nuk kalon 50%-shin, respektivisht është 49.4%, -shkruan gazeta “Koha” në numrin e sotshëm. Nga 190.541 nxënës që janë në kategorinë e nxënësve maqedonas (54.7%), nëse minusojmë  romët, boshnjakët, vllehët etj.(të cilët përbëjnë 5.3%), maqedonasit ngelin me 49.4%, njofton fakte.Ky numër rezulton të jetë rreth 17% më pak se numri i popullsisë maqedonase në vendin tonë, sipas statistikave të regjistrimit të fundit nga viti 2002.

Ndërkaq, nxënësit shqiptarë përfshijnë një numër prej 62.188 ose 32.6% nga numri i përgjithshëm i nxënësve. Edhe përqindja e nxënësve shqiptarë tregon një diskrepancë nga së paku 7.4% mes nxenësve shqiptarë dhe popullatës shqiptare. (INA)

Shqipëria

Selanik, të martën nisin punimet për gazsjellësin TAP

Komento

Trans_Adriatic_PipelineTë martën pas mesdite, në Selanik zhvillohet ceremonia e përurimit të fillimit të punimeve për gazsjellësin Trans-Adriatik (TAP), tubacionit që do të transportojë gaz natyror nga rajoni i Kaspikut në drejtim të Europës.

Kalimi i tij nëpërmjet Greqisë së Veriut dhe Shqipërisë, duke përshkuar më pas detin Adriatik, me destinacion përfundimtar lidhjen me rrjetin italian të gazit natyror, shndërron Shqipërinë dhe Greqinë në dy nyje të rëndësishme energjetike në rajon.

Në ceremoninë e përurimit që do të hapet nga vet kryeministri grek, Alexis Tsipras, kanë konfirmuar pjesëmarrjen e tyre në nivel të lartë edhe Shqipëria, me zv.kryeministrin Niko Peleshi dhe ministrin e Energjetikës, Damian Gjiknuri; Italia, si dhe shumë vende të korridorit të ri jugor, si Azerbajxhani, Gjeorgjia, Turqia dhe Bullgaria.

Gazsjellësi do të sjellë fillimisht hapjen e mbi 8.000 vendeve të punës në Greqi dhe mbi 2.000 në Shqipëri, ndërsa më pas, mijëra vende të tjera pune do të krijohen nga kontratat e reja me kompani vendase dhe të huaja, si dhe nga stimulimi i aktivitetit ekonomik. Gjithashtu përfitim do të kenë edhe qytetarët e të dy vendeve nga përdorimi i gazit natyror.

Vlen të përmendet se, 10 ditë më pas në Athinë mbërrin edhe Presidenti rus, Vladimir Putin, i cili sipas informacioneve ende të pakonfirmuara, do të sjellë propozime të reja për transportin e gazit natyror të “Gazprom”-it në BE, nëpërmjet shfrytëzimit të tubacionit në fjalë.

/ Top Channel