The Soyuz MS spacecraft carrying the crew of Kate Rubins of the U.S., Anatoly Ivanishin of Russia and Takuya Onishi of Japan blasts off to the International Space Station (ISS) from the launchpad at the Baikonur cosmodrome, Kazakhstan, July 7, 2016. REUT

Një kapsulë hapësinore Soyuz me një ekuipazh ndërkombëtar prej tre vetësh u ankorua në Stacionin Ndërkombëtar të Hapësirës të shtunën në mëngjes, rreth 400 kilometra mbi Tokë.

Astronautja e NASA-s Kathleen Rubins, kosmonauti rus Anatoly Ivanishin dhe astronauti japonez Takuya Onishi u nisën nga kompleksi hapësinor rus në Baikonaur të Kazakistanit të enjten.

Ekuipazhi do të kalojë katër muaj në Stacionin e Hapësirës.

Rubins është studiuese e kancerit dhe sëmundjeve infektive. Ajo do që të provojë për herë të parë të realizojë sekuencën e ADN-së në hapësirë. (voa)

Përmirësimi i teknologjisë së informacionit në makina po nxit kompanitë që të kërkojnë mënyra të reja për të përmirësuar ngarjen e tyre. Prodhuesit e makinave dhe krijuesit e programeve janë duke përdorur programin e fundit kumpjuterik të bazuar në aplikacione, që mund ta ndezin makinën nga distanca duke e bërë atë pjesë të telefonit inteligjent.

Në Kongresin Botëror të Teknologjisë në Shanghai, 5G është një term shumë i përdorur. Rrjeti 5G është faza tjetër e rëndësishme e standardeve të telekomunikacionit dhe është gati ta revolucionarizojë ndërlidhjen mes telefonave inteligjentë dhe makinave.

Prodhuesit e makinave duan të zgjerojnë aftësitë teknologjike të makinave për të përmirësuar përvojën e shoferit.

Një numër i prodhuesve po punojnë në sistemet e reja të cilat do ta lehtësojnë ndërveprimin e automjeteve me aplikacionet. Produkti i Fordit, Sync3 e bën makinën pjesë të telefonit inteligjent. Ford ka partneritet me disa kompani lokale kineze, si Dingding Tingche e cila ka krijuar një aplikacion për parkim të makinave.

“Sync3 është më e shpejtë dhe më e lehtë për t’u përdorur se teknologjitë tona të mëparshme të informacionit dhe argëtimit në automjete”, thotë drejtori i pajisjeve teknologjike në makina i kompanisë Ford në rajonin e Azi Paqësorit, Julius Marchwicki.

“Ajo përmirëson përvojën e konsumatorit duke ia lehtësuar atij mundësinë për të bërë telefonata, qasjen në muzikën e tij, dhe përdorimin e aplikacioneve të preferuara brenda makinës përmes aplikacionit Ford AppLink. Shumica e aplikacioneve brenda makinës tani mund të aktivizohen përmes zërit.”

Ford ka shtuar edhe alfabetin kinez në ekranet e makinave të saj të cilët gjithashtu mund të aktivizohen përmes zërit.

Studiuesit e industrisë thonë se përdorimi i këtyre teknologjive në makina ka nxitur novacionin.

Analisti Ishan Dutt i kompanisë Canalys thotë se shumë kompani janë duke u angazhuar në këtë prirje nga frika se mund ngelen pas.

“Kemi parë një angazhim të madh nga shumë kompani të cilat po përdorin teknologjinë e ndërlidhjes dhe të makinave pa shofer, veçanërisht në 18 muajt e fundit. Kjo është nxitur nga konkurrenca. Nëse një kompani prodhon një pajisje origjinale, të tjerët e ndjejnë presionin për të prodhuar pajisje të tilla në një afat sa më të shpejtë. Këtu në Kongresin e Teknologjisë në Shangai, kompanitë lokale si Alibaba dhe SAIC po rrisin praninë e tyre. Këtu janë të pranishme edhe kompani ndërkombëtare të makinave si Ford dhe Volvo që janë duke u përpjekur të hyjnë në tregun kinez me produktet e tyre,” thotë ai.

Gjiganti kinez i shitjeve në internet, Alibaba prezantoi programin e saj të parë kompjuterik për makinat, YunOS.

Analisti Dutt thotë kjo lëvizje e kompanisë Alibaba tregon se ajo dëshiron ta zgjerojë biznesin edhe në këtë fushë. Ai gjithashtu thotë se zhvillimi i teknologjisë së ndërlidhjes në makina është hapi i parë në rrugën drejt makinave autonome.

Kongresi i Teknlogjisë Botërore në Shanghai u zhvillua nga data 29 qershor deri më 1 korrik të këtij viti. (voa)

Njerëzit vazhdimisht ankohen se e kanë të vështirë të mbajnë mend fjalëkalimet, kur hyjnë në kompjuterin apo telefonin e tyre celular. Por ndoshta shpejt do të vijë dita kur nuk do të kemi nevojë për fjalëkalime të gjata e të vështira. Duke përdorur teknologji të bazuara tek të dhënat biometrike, një kompani e re në Londër po përpiqet të ndryshojë rrënjësisht mënyrën se si njerëzit hyjnë tek informacioni i tyre privat apo sensitiv.

Në ditët e sotme, pothuajse gjithçka është në internet. Kjo nënkupton edhe numrin e madh të fjalëkalimeve që nga pini katër shifror i telefonave apo kombinimi i numrave dhe gërmave që bëhet gjithnjë e më i komplikuar. Ndërsa zgjerimi i gjurmëve në internet po i detyron njerëzit të mbajnë mend më shumë se një fjalëkalim për përdorim të përditshëm.

“Kam disa fjalëkalime dhe përdor fjalëkalime të kategorive të ndryshme për gjëra të ndryshme. Për shembull për median sociale, për universitetin ku studioj dhe i mbaj mend të gjitha”, thotë Shannon McIntyre.

Sipas një sondazhi të gushtit të vitit të kaluar nga kompania LaunchKey , 32 përqind e të anketuarve pranuan shpesh se harronin fjalëkalimet, ndërsa 45 përqind thanë se i ruanin ato në shënime. Kompania e re me qendër në Londër, AimBrain, po përpiqet të bëjë ndryshime.

E krijuar nga bashkëthemeluesit lituanez Alesis Novik dhe Andrius Sutas, kompania ka krijuar një diapazon aplikacionesh biometrike të bazuara tek financa, që do të thotë se përdoruesit nuk do të kenë më nevojë për asgjë përveçse vetvetes për të patur qasje tek të dhënat e tyre private.

“Problemi që shohim me fjalëkalimet është eksperienca e përdoruesit, njerëzit duhet t’i mbajnë mend gërmat e përdorura dhe zakonisht njeriu ka probleme me këto. Të dhënat biometrike e zgjidhin këtë çështje duke ofruar një faktor që nuk mund të harrohet, nuk mund ta lësh pas dhe është i lehtë për ta përdorur sepse nga ana e sjelljes nuk duhet të veprosh ndryshe nga normalja. Ne ndjekim veprimet normale në aplikacion pa patur nevojë për gjëra të tjera”, thotë Alesis Novik.

I tillë është aplikacioni i “sjelljes” i ndërtuar nga AimBrain që mundëson përdoruesit të kenë qasje tek të dhënat bankare përmes mënyrës se si gishti i madh i dorës shtyp një kod prej katër numrash ose pin. Aplikacioni monitoron ndryshime të vazhdueshme të tilla si presionin, minutazhin, vendndodhjen dhe shpejtësinë për të konstatuar nëse përdoruesi është ai që pretendohet të jetë.

“Kur fus pinin në mënyrën time të zakonshme, drita jeshile tregon që jam unë. Nëse ja kaloj Andrius, drita do të jetë e kuqe sepse veprimet e tij ndryshojnë nga unë”, spjegon Novik.

Ai thotë se kopjimi i veprimeve nga dikush që të vëzhgon është i pamundur pasi aplikacioni regjistron faktorin kohor që nuk kopjohet me lehtësi. Dikush me gishta të gjatë ka kënd ndryshe nga dikush me gishta të shkurtër. Një tjetër aplikacion është edhe ai për njohjen e fytyrës dhe identifikimin që kërkon vetëm një pjesë të fytyrës së përdoruesit për të patur qasje tek të dhënat financiare.

Novik fotografon veten me telefonin inteligjent duke mundësuar aplikacionin të analizojë karakteristikat e fytyrës dhe vertetojë nëse është ai. Aplikacioni analizon përshembull distancën mes syve dhe format e ndryshme në fytyrë.

“Analizon karakteristika dhe parametra të shumtë që janë të pamundur të rikrijohen. Po shtojmë aftësitë për të zbuluar nëse është foto e fotos në vend të fotos së drejtpërdrejt të njeriut”, thotë Novik

Kompania AimBrain aktualisht ka në shënjestër sektorin financiar, duke ndihmuar instuticione të ndryshme që të zhvillojnë metoda të sofistikuara për të vërtetuar përdoruesit bankarë mobilë. Një botë pa fjalëkalimi duket më pranë nga se mund të ishte parashikuar. (voa)

Sonda Juno, e ushqyer me energji diellore, mbylli dje misionin pesë vjeçar të fluturimit drejt Jupiterit. Juno u dërgua në hapësirë nga NASA për të studiuar origjinën e planetit më të madh të sistemit tonë diellor dhe ndikimin e këtij planeti tek jeta në Tokë.

Ishte një manovër për jetë a vdekje për sondën e NASA-s. Juno ndezi motorin mbrëmë për të ulur shpejtësinë duke lejuar që të tërhiqej nga forca gravitacionale e Jupiterit, në një mision që mund të kishte sjellë një përplasje shkatërrimtare për mjetin hapësinor.

Sonda duhej të pozicionohej në mënyrë ekzakte, të ndizte motorin në kohën ekzakte dhe ta mbante ndezur për 35 minuta për të realizuar futjen në orbitën e Jupiterit.

Inxhinierët në Laboratorin e Lëshimeve Hapësinore të NASA-s në Kaliforni shpërthyen në brohoritje pas përfundimit me sukses të manovrës

“Sa më shumë që di për këto misione, aq më të qartë e ke se sa të vështira janë të realizohen me sukses. Nuk di si ta shpreh me fjalë,” thotë drejtuesja e programit Juno në NASA, Diane Brown.

Tani Juno do të studiojë për 20 muaj planetin gjigant, më të madhin në sistemin tonë diellor, në mënyrë që të ofrojë përgjigje për faktorët që ndikuan në krijimin e sistemit tonë diellor, si dhe për të kërkuar për ekzistencën e një substance të ngurtë në lëmshin prej gazi që përbën ky planet.

Sonda do të bëjë kërkime edhe për gjurmë uji në atmosferën e planetit. Prania e ujit është një ndër treguesit më të rëndësishëm për të analizuar se sa larg nga dielli u formua ky planet.

Origjina e Jupiterit ka ndikuar tek pozicioni dhe madhësia e planeteve të tjera, përfshirë Tokën, ndërsa pozicioni i tij ka diktuar edhe praninë e jetës në Tokë.

Jupiteri, i cili ka një madhësi sa 1300 Tokë, ka një orbitë pesë herë më larg nga Dielli se planeti ynë, por mendohet që në gjenezën e tij mund të ketë pasur tjetër pozicion dhe gradualisht ka lëvizur, duke ndikuar edhe tek pozicioni i planeteve të tjerë në sistemin tonë diellor.

Madhësia e Jupiterit dhe forca tërheqëse e bëjnë atë tepër të vlefshëm për Tokën tonë, pasi ai thith drejt vetes shumë asteroidë dhe kometa, duke na shpëtuar ne nga goditja e tyre me pasoja të mundshme fatale.

Juno është sonda e dytë që mbërrin në Jupiter. Sonda Galileo iu rrotullua Jupiterit nga 1995-2003.

Juno, prodhuar nga firma Lockheed Martin, pritet të vazhdojë punën për 20 muaj. Në orbitën e tij të fundit, Juno do të përpihet në atmosferën e Jupiterit, ku do të shpërbëhet plotësisht për të mos lejuar ndotje kozmike të hënës së Jupiterit, nga mikrobe të sjellë nga Toka. Hëna Europa është në plan si destinacion kërkimesh për jetë jashtë-tokësore. (voa)