Një grup ligjvenësish amerikanë i kanë kërkuar Sekretarit amerikan të Shtetit Rex Tillerson sqarime për ndihmat amerikane në Maqedoni dhe Shqipëri.

Duke ngritur shqetësimin se ato mund të mos jenë në shërbim të interesave strategjike apo ekonomike amerikane, grupi i përbërë nga 6 senatorë, shumica anëtarë të Komisionit të Senatit për Shërbimet e Armatosura, në letrën e tyre, që mban datën 14 mars theksojnë se “Ne kërkojmë që ju të përdorni autoritetin tuaj për të hetuar gjithë fondet amerikane që lidhen me nxitjen e demokracisë dhe mirë-qeverisjes dhe të rishikoni programet, llogaritë dhe shumëllojshërinë e organizatave të ndryshme amerikane që janë të përfsshira në këto aktivitete.”

Senatorët kërkojnë shpjegime mbi aktivitetin e misionit diplomatik amerikan në Shkup, pasi shprehen se kanë marrë “njoftime të besueshme se gjatë viteve të fundit ky mision ka ndërhyrë në mënyrë aktive në politikat partiake në Maqedoni, si dhe në zhvillime që u japin formë mjedisit mediatik dhe jetës civile në vend, shpesh herë në favor të forcave politike me kahje majtiste”.

Në letrën e tyre senatorët përmendin fondet e qeverisë amerikane të ndihmave që u janë akorduar shoqatave si Fondacionit Shoqëria e Hapur të biznesmenit George Soros. Senatorët ngrenë shqetësimin se përmes këtyre fondeve, Fondacioni Shoqëria e Hapur po mbështet një agjendë politike të grupeve të majta, ndërkohë që duhet të mbështesë politika që u shërbejnë interesave strategjike amerikane, pa shkaktuar dëme në marrëdhënie me vende ku përdoret kjo ndihmë.

Senatorët shprehen të shqetësuar lidhur me pretendimet që kanë dëgjuar “nga udhëheqës të respektuar në Shqipëri se diplomatë amerikanë dhe organizata të mbështetura nga Sorosi po i mëshojnë një objektivi politikë” atje. Në letrën e tyre senatorët ngrenë pretendimin se Zyra e Fondacionit Shoqëria e Hapur në Shqipëri, me ekspertët e saj, e mbështetur me fonde nga USAID, “ka krijuar Dokumentin Strategjik për Reformën e Gjyqësorit në Shqipëri. Disa udhëheqës në vend besojnë se këto ‘reforma’ kanë për synim t’i japin kryeministrit dhe qeverisë së qendrës së majtë kontroll të plotë mbi sistemin gjyqësor,” thuhet në letër.

Senatorët paralajmërojnë se efektet destabilizuese të këtyre veprimeve janë të qarta dhe përbëjnë kërcënim për një shkallëzim të mëtejshëm të situatës në Shqipëri, ndërkohë që vendi përgatitet për zgjedhje.

Letra mban firmat e senatorëve Michael Lee, James Inhofe, Thom Tills, David Perdue, Ted Cruz dhe Bill Cassidy.

Fondacioni Shoqëria e Hapur, “Soros” u gjet nën kritika posaçërisht pas zgjedhjeve të dhjetorit në Maqedoni dhe reformës së sistemit të drejtësisë në Shqipëri.

Ish kryeministri i Maqedonisë, Nikola Gruevski e akuzoi miliarderin George Soros se financon Organizatat Joqeveritare, të cilat, sipas tij, “gjithë veprimtarinë e tyre e kanë të programuar kundër partisë së tij” VMRO-DPMNE.

Por drejtuesja e këtij fondi në Maqedoni Fani Karanfilova Panovska, tha më herët gjatë këtij viti se “Gruevski përmes ideve konspirative synon të sulmojë veprimin e sektorit civil për të penguar aktivitetet e Organizatave Joqeveritare të cilat kërkojnë përgjegjësi politike nga drejtuesit e institucioneve për keqqeverisje”.

VMRO-DPMNE nuk arriti të krijojë qeverinë pas zgjedhjeve, ndërsa partia rivale, Lidhja Social-Demokrate e cila siguroi mbështetje të mjaftueshme për formimin e qeverisë, u refuzua nga presidenti Geroge Ivanov, për shkak të marrëveshjes së LSDM-së me partitë shqiptare ku përfshihej edhe platforma e kësaj force politike shqiptare për përdorimin e gjerë të gjuhës shqipe në Maqedoni.

Ambasadori amerikanë në Shkup, Jess Baily, krahas përkushtimit për të mbështetur procesin e tejkalimit të situatës në Maqedoni, ritheksoi të mërkurën se vendimi i presidentit Ivanov, “nuk ishte një vendim i drejtë dhe mendojmë se ai do ta rishikojë atë”.

Në Shqipëri, opozita e ka akuzuar fondacionin Soros, për siç u tha “dirigjim” të reformës në drejtësi.

Shefi i fondacionit “Soros” në Shqipëri, Andi Dobrushi, tha më herët se mbështetja që fondacioni i jep procesit të reformës, është bërë me një marrëveshje me Kuvendin e Shqipërisë. “Kemi pasur përfshirje që në momentin e parë, kemi mbështetur financiarisht bashkëpunimin me ambasadën amerikane dhe partnerët evropianë”, tha në komentet për shtyp zoti Dobrushi.

Kryeministri i Shqipërisë, Edi Rama, tha se të gjithë ata që po e akuzojnë Sorosin kanë përfituar prej tij, ndërsa theksoi se fondacioni “ka kontribuar me një mbështetje financiare për mbarëvajtjen e punës së Komisionit Parlamentar të Reformës në Drejtësi. Kjo padyshim ka qenë diçka pozitive sepse ka lehtësuar disa shpenzime jo të vogla për ekspertizë”, tha ai. (voa)

Parlamenti Europian shtyu sesionin plenar mbi progresraportin e Maqedonisë, të planifikuar të mbahej këtë javë. Arsyeja, përse eurodeputetët vendosën që votimi të mos kryhej tani, është pikërisht kriza e tejzgjatur politike.

Dokumenti mbi përparimin e vendit përfshin ndër të tjera edhe rekomandimin për çeljen e bisedimeve të anëtarësimit. “Radio Europa e Lirë” sqaron ndërkohë se, Lidhja Social-Demokrate po zhvillon bisedime me partitë politike shqiptare për zgjedhjen e kryetarit të ri të Parlamentit, i cili me gjasë mund të mblidhet këtë javë.

Edhe Lëvizja Besa është në pritje të marrjes së nismës për zhbllokimin e Parlamentit.

Njohësit e çështjeve politike mendojnë se, në situatën kur kreu i shtetit refuzon të japë mandatin e krijimit të qeverisë nuk duhet humbur kohë, por duhet zgjedhur kryetari i ri i Kuvendit, duke reflektuar shumicën parlamentare, që erdhi si rezultat i zgjedhjeve të 11 dhjetorit.

Analisti Nikola Dujovski arsyeton se, nuk ka përse të ekzistojë frika nga protestat kundër të drejtave të shqiptarëve, të cilat sipas tij janë thjesht lëvizje në funksion të mbrojtjes së pushtetarëve aktualë, që duhet të japin llogari para organeve të drejtësisë.

Konstituimi i Parlamentit pritet të zhvillohet në një atmosferë tejet të tensionuar, me presidentin Ivanov që refuzon dhënien e mandatit dhe udhëheqësin e VMRO-DPMNE-së, Nikola Gruevski, nga ana tjetër, që ka shtuar kërcënimet për destabilizimin e vendit, duke mbuluar me gjoja revoltën e popullatës faktin që nuk arriti të krijonte qeverinë, edhe pse nga zgjedhjet fitoi dy vende më shumë në Parlament sesa LSDM-ja.

Makthin që i shkakton miratimi i “platformës shqiptare”, ish-kryeministri e tregoi edhe njëherë me përsëritjen e ftesës drejtuar Zaevit për mbështetje në krijimin e ekzekutivit, nëse angazhohet për një Maqedoni të bashkuar dhe shumetnike, e jo një shtet dygjuhësh.

/ Top Channel

Urrejtja është e rrënjosur thellë në Ballkan dhe prova më e mirë për këtë janë ngjarjet më të fundit në Maqedoni. Me këtë fjali nis shkrimi i Profesor Gjovalin Shkurtaj, që ka zënë hapësirë në versionin online të “FoxNews” në Shtetet e Bashkuara.

Këto kohë, vendi është në prag të destabilizimit për të drejtën e shqiptarëve që gjuha e tyre të njihet si gjuha e dytë zyrtare në vend.

“Këto kërkesa janë cilësuar si të papranueshme nga Presidenti Gjorge Ivanov, i cili, në një lëvizje antikushtetuese, nuk lejon që koalicioni mes partisë maqedonase, LSDM dhe partive shqiptare të formojë qeverinë”, vijon më tej analiza.

Gjovalin Shkurtaj pyet nëse vërtet Ivanov po kundërshton gjuhën shqipe, apo bëhet fjalë për diçka tjetër? Përgjigjjen kesaj pyetjeje, ai e jep pasi bën një rezyme të ngjarjeve të ndodhura në Shkup pas zgjedhjeve të dhjetorit.

“Nikolla Gruevski nuk bindi shqiptarët që t’i bashkohen atij në bashkëqeverisje. E kundërta ndodhi me social-demokratët e Zoran Zaev, që nënshkruan një marrëveshje duke siguruar 67 vota në Parlament”, thotë Shkurtaj.

Pikërisht në këtë moment aktivizohet Ivanov, që FoxNews kujton se konsiderohet si i afërt me Gruevskin.

Presidenti Ivanov dhe ish-Kryeministri Gruevski janë të shqetësuar se Zoran Zaev mund të përdorë pushtetin si Kryeministër i vendit për të rihapur hetimet për skandalin e përgjimeve dhe të tjera dosje për korrupsion, që kanë shoqëruar Gruevskin që nga ditët e para të 2015.

Ky jo vetëm mund të ishte fundi i karrierës politike të liderit të VMRO-DPMNE-së, por do të ishte edhe më reale mundësia që ai të përfundonte në burg. Për të shmangur këtë dhe për të mbrojtur edhe miqtë e tij, Presidenti Ivanov, po nxit përplasjen ndëretnike në Maqedoni për një çështje që nuk ekziston, si ajo e përdorimit të shqipes në institucionet publike.

Shkurtaj kujton se shqipja si gjuhë zyrtare sanksionohet edhe në Marrëveshjen e Ohrit të 2001, që i dha fund konfliktit, ndërsa sjell në kujtesë edhe reagimin e Kryeministrit Edi Rama menjëherë pas vendimit të Ivanov për të refuzuar mandatimin e Zaev.

Në fund, në analizën e publikuar nga “FoxNews”, Profesor Gjovalin Shkurtaj u bën thirrje Shteteve të Bashkuara dhe Bashkimit Europian që të ndërhyjnë për të shmangur gjakderdhje të mëtejshme në Ballkan.

/ Top Channel