Opozita protestoi në Tiranë dhe deputetët e saj hodhën tym të kuq në sallën e parlamentit për të kundërshtuar zgjedhjen e Prokurores së Përgjithshme të Përkohshme.

Arta Marku, zv. Prokurore e rrethit të Shkodrës, u zgjodh të hënën (18.12) Prokurore e Përgjithshme e Përkohshme. Në seancën plenare, e fundit për këtë vit, Arta Marku u votua me 69 vota pro, 2 dy kundër dhe 2 abstenime. Opozita zhvilloi një protestë  të paralajmëruar para parlamentit, ku morrën pjesë rreth 3.000 vetë, deputetë, simpatizantë të dy partive partive opozitare, PD dhe LSI për të kundërshtuar atë që këto dy forca politike e quajnë „puҫ kushtetues” me qëllim „ kontrollin e Prokurorisë nga qeveria”.  Sipas opozitës Kushtetuta kërkon që kreu i organit të akuzës të zgjidhet me 84 vota ose 3/5 e 140 deputetëve të Parlamentit. Maxhoranca ka një interpretim tjetër të situatës. Ajo i është referuar dispozitave kalimtare në ligjin “Për organizimin dhe funksionimin e Prokurorisë” për zgjedhjen e Prokurorit të Përgjithshëm të Përkohshëm, në kushtet kur, pas mbarimit të mandatit të ish- Kryeprokurorit  Adriatik Llalla, më 5 dhjetor dhe mosngritjes së Këshillit të Lartë të Prokurorisë, (KLP) që ka kompetencën të emërojë Prokurorin e Përgjithshëm me mandat 7 vjeҫar. Sipas ligjit miratimi i një Prokurori të Përgjithshëm të Përkohshëm mund të bëhet me votat e më shumë se ¼ e numrit të të gjithë deputetëve (140 gjithsej). Opozita kërkoi që ish- Kryeprokurorit Llalla t‘ i zgjatej mandati edhe 2 vjet derisa të mbarojë vettingu i prokurororëve dhe të funsksionojë KLP.

Acarimi i protestës me pasojë të plagosur dhe të arrestuar

Protesta që nisi paqësisht para parlamerntit u tensionua, kur protestuesit kërkuan të ҫajnë kordonin e forcave të rendit dhe atyre të ndërhyrjes së shpejtë për t’u futur në sallën e parlamentit. Ndërhyrja e policisë për t’i penguar solli kundërshtimin e protestuesve. Dy policë u plagosën, njëri prej tyre ndodhet në spital jashtë rrezikut për jetën. Pati lëndime fizike edhe  nga rradhët e protestuesve si dhe arrestime. Ambasada e SHBA-së në një deklaratë zyrtare paralajmëroi qytetarët amerikanë, që jetojnë në Tiranë t’i largoheshin zonës së protestës duke theksuar se ajo nga paqësore “mund të kthehet e dhunshme”. Por brenda sallës së parlamentit ndodhi një akt i paprecedentë në historinë 25 vjeçare të parlamentarizmit post- komunist në Shqipëri. Deputetë të opozitës, në kundërshtim me rregullat e parlamentit, hodhën tym të kuq në drejtim të kryemnistrit Rama dhe kryetarit të Parlamentit Gramoz Ruҫi, kur po kryhej procesi i votimit për kryeprokuroren e përkohshme, Arta Marku.  Pati konfrontimim fizik në foltoren e parlamentit mes ish-kryemnistrit Sali Berisha, deputetëve opozitarë nga njëra anë dhe punonjësve të Gardës së Republikë në sallë kur Berishës nuk ia dha fjala nga kryetari i Parlamentit Gramoz Ruҫi, konfrontim që deri tani  besohej se i ishte lënë së shkuarës se konfliktualitetit ekstrem mes palëve. Seanca u ndërpre, protesta u shpërnda dhe palët kundërshtare dolën me deklaratat përkatëse.

Rama: Askush nuk e ndal dot reformën në Drejtësi 

Kryeministri Rama e quajti protestën e opozitës dhe ngjarjet e dhunshme në parlament “shfaqjen më të fundit të përpjekjes së dëshpëruar të opozitës për të bllokuar reformën në drejtësi, ҫmimin e së cilës e paguan Shqipëria, që është në prag të hapjes së negociatave të anëtarësimit në BE”.

„Shfaqje të tilla i bëjnë dëm Shqipërisë Ato i japin argumenta atyre që jo domosadoshmërisht duan që të hapen negociatat e anëtarësimi duke bërë që Shqipëria, të jetë i vetmi vend në historinë e integrimit europian të ish-vendeve komuniste ku opozita i kundërvihet reformës në drejtësi. Reformën në Drejtësi nuk mund ta ndalë askush”, tha kryemnistri Rama.

Basha: Në fillim të janarit fillon vala e protestave 

Vendim i opozitës pas ndërprerjes së seancës për shkak të dhunës është fillimi i një vale protestash në të gjithë vendin në javën e parë të janarit. “Morëm vendimin për të nisur një valë protestash popullore për të ndaluar çmendurinë e kryemnistrit, që sot u bë edhe prokuror”, tha kryetari i PD, Basha.

Kryeprokurorja do të qëndrojë në këtë detyrë deri sa Këshilli i Lartë i Prokurorisë të zgjedhë Prokurorin e Përgjithshëm me mandat shtatë vjeçar. (dw)

Pas zgjedhjes së Kryeprokurores së përkohshme Arta Marku, Partia Demokratike dhe Lëvizja Socialiste për Integrim morën vendim për të nisur një valë protestash në të gjithë vendin. Ndërsa për kryeministrin Rama, veprimi i sotëm i opozitës ishte një përpjekje e dëshpëruar për të bllokuar reformën në drejtësi. Për ngjarjet e sotme reagoi dhe ambasada amerikane në Tiranë sipas së cilës “dëmtimi i pronës publike, hedhja e granatave tymuese në Parlament dhe dhuna nuk janë të pranueshme”. Sipas ambasadës amerikane lufta mes partive politike “po tregon se Reforma në Drejtësi më në fund po zbatohet”

Dy partitë kryesore të opozitës thirrën një mbledhje të përbashkët të grupeve parlamentare, në të cilin, siç njoftoi kryetari demokrat Lulzim Basha u vendos në unanimitet “nisja e një vale protestash popullore për të ndalur çmendurinë e narkokryeministrit, që sot është dhe kryeprokurori i vendit, duke rrëzuar shtyllat kushtetuese të bashkëjetesës demokratike, duke rrezikuar stabilitetin, demokracinë dhe integrimin europian të vendit”. Sipas zotit Basha, protestat do të nisin ne fillim të janarit në Tiranë për t’u pasuar më pas nga një valë manifestimesh të tjera.

Ndërkohë, kryeministri Edi Rama i cili nuk ndërhyri në seancën e sotme të parlamentit, reagoi nga selia e Qeverisë për ngjarjet. Ai e nisi fjalën e tij me një ndjesë ndaj qytetarëve shqiptarë dhe partnerëve ndërkombëtarë të vendit “për shfaqjen më të fundit të përpjekjes së dëshpëruar për bllokimin e Reformës në Drejtësi. Shfaqjen e sotme e dha opozita, por faturën e kësaj shfaqjeje e merr fatkeqësisht përsëri, e gjithë Shqipëria, e cila është më afër se kurrë çeljes së negociatave për anëtarësim në Bashkimin Europian dhe nuk e meriton as baltën, as tymin, as dëshpërimin e kësaj opozite, që prej dy vitesh udhëhiqet nga frika e Reformës në Drejtësi”.

Sipas kryeministrit, zgjedhja e kryeprokurores së përkohshme vetëm me votat e shumicës “ishte një zgjedhje plotësisht legjitime, kushtetuese, e konfirmuar shkresërisht edhe nga misionet e drejtësisë së Shteteve të Bashkuara dhe të Bashkimit Europian, të cilat asistojnë qysh prej ditës së parë, procesin e vështirë të Reformës në Drejtësi”.

Për ngjarjet e sotme reagoi dhe ambasada amerikane në Tiranë përmes një deklarate ku shprehet se ajo “dënon me forcë dhunën që ndodhi në protestën e sotme në Tiranë”. Ndërsa shpjegon se mbështet të drejtën e qytetarëve për të protestuar paqësisht, ambasada thekson se “dëmtimi i pronës publike, hedhja e granatave tymuese në Parlament dhe dhuna nuk janë të pranueshme” duke i bërë thirrje të gjitha partive që të tregojnë vetëpërmbajtje dhe të nxisin qetësi”.

Sipas ambasadaës amerikane “populli shqiptar nuk duhet të habitet që politikanët e tyre po luftojnë njëri-tjetrin. Kjo do të thotë se reforma në drejtësi më në fund po zbatohet. Komisionet e Vetingut do të kenë së shpejti rezultatet e tyre të para”, thuhet në deklaratën përmes së cilës duket qartë aprovimi për largimin e drejtuesit të deritanishëm të Prokurorisë, Adriatik Llalla: “Prokurori i Përgjithshëm që refuzonte të ndiqte penalisht politikanë është i ikur”, shkruhet në deklaratë ndërsa paralajmërohet se “së shpejti do të shohim krijimin e SPAK-ut dhe Byrosë Kombëtare të Hetimit, të cilat do hetojnë dhe ndjekin penalisht zyrtarë të korruptuar të nivelit të lartë. Qytetarët shqiptarë presin me padurim për drejtësi. Dhe politikanët kanë frikë”, përfundon deklarata e ambasadës amerikane. (voa)

Erjon Braçe akuzoi një ditë më parë në Parlament ish-ministrin e Bujqësisë se i ka dhënë toka me qira familjes Balili gjatë kohës që ushtronte detyrën.

“Është një kontratë dhënë për këta njerëz, nga partia e tyre për njerëzit e tyre”, akuzoi Braçe.

“Ju sfidoj që të provoni që kjo garë nuk ka qenë e ndershme. Merrni dosjet me vete dhe shkojmë në prokurori”, iu përgjigj ish-ministri i Bujqësisë, Edmond Panariti.

Për të hedhur dritë mbi këtë çështje, Top Channel ka siguruar të gjithë procedurën ligjore të njërës prej kontratave. Bëhet fjalë për rreth 21 hektarë në Buronjë të Delvinës.

Gjithçka ka nisur më 28 dhjetor të 2015, kur me një vendim të Qeverisë “Rama” kjo sipërfaqje toke kalon në menaxhim nga Ministria e Arsimit tek ajo e Bujqësisë, me qëllim “të shtohet në listën e inventarit të pronave të paluajtshme shtetërore, për nxitjen e investimeve në bujqësi dhe blegtori nëpërmjet shfrytëzimit të tokës bujqësore”.

Në mars të 2016 Ministria e Bujqësisë shpall garën për dhënien me qira të 21 hektarëve, ndërsa ofertat mbyllen më 5 prill. Më 20 maj të 2016, Ministria e Bujqësisë shpall fitues kompaninë “Alb Universal 95”, e themeluar në fund të dhjetorit 2015, Albin Balili, i cili një muaj më pas, më 22 janar 2016 ia dhuron Xhesjana Ballaçit është pikërisht kjo e fundit që ka hedhur firmën në kontratën me Ministrinë e Bujqësisë. Kontrata ka marrë fuqi ligjore me nënshkrimin nga palët.

Një pronë tjetër e Balilëve, resorti “Santa Quaranta”, ka një histori më të gjatë. Historia e përfitimit të kampit të punëtorëve në Sarandë nga Bashkim Balili, vëllai i Klement Balilit, nis në vitin 2000. Atëherë ky objekt prej 30 mijë metrash/katrorë zotërohej nga dy pronarë: firma e shpallur piramidale “Kamberi” me 60 për qind dhe Bashkimi i Sindikatave të Pavarura me 40 për qind. Në mesin e viteve ’90 prona kishte qenë e tëra në zotërim të sindikatës.

Bashkimi i Sindikatave të Pavarura e kishte përfituar pronën në vitin ‘94 pas një aktmarrëveshje mes sindikatave të Shqipërisë për ndarjen e pronave të përfituara me një dekret të Presidentit Berisha.

Bashkimi i Sindikatave të Pavarura u lidh me një kompani italiane me të cilën krijuan shoqërinë “DEA” për ofrimin e shërbimeve të hotelerisë. Kuotat u ndanë 60 për qind për italianët, që do të investonin 100 mijë dollarë dhe 40 për qind për Bashkimin e Sindikatave të Pavarura.

Në vitin 1996 aksionet e italianëve u blenë nga firma “Kamberi”. Në vitin 1997 firma “Kamberi” u shpall piramidale, por në vitin 2000, kur asetet e saj administroheshin nga shteti, rezultonte ende bashkëpronare e ish-Kampit të Punëtoreve. Në 18 maj po të vitit 2000, kuota prej 40 për qind e Bashkimit të Sindikatave të Pavarura u mor me kontratë qiraje nga shoqëria “Titan Konstrukstion”, që zotërohej nga Bashkim Balili, kundrejt një çmimi prej 4 milionë lekësh në vit.

Pa kaluar një vit, me 7 shkurt 2001, Bashkim Balili bleu kuotat e tjera, 60 për qind të firmës “Kamberi” për rreth 85 milionë lekë. Shuma u likujdua plotësisht në Bankën e Kursimeve.

Në 2008, ndodhi kthesa e madhe, ku Balilët morën të gjithë pronësinë mbi ish-Kampin e Punëtorëve. Palët, Bashkim Balili dhe Bashkimi i Sindikatave të Pavarura, nënshkruan më 22 dhjetor 2008 një kontratë shkëmbimi pasurie. 40 përqindëshi i 30 mijë metrave/katrorë të ish-Kampit të Punëtorëve zotëruar nga Bashkimi i Sindikatave të Pavarura u shkëmbye me një pasuri prej 3500 metrash/katrorë në Linzë të Tiranës, që sipas dokumentacionit hipotekor zotërohej nga Bashkim Balili.

Në fakt kjo kontratë ka qenë e paligjshme, pasi një ligj i ’98-ës, ende në fuqi, ndalon tjetërsimin deri në vitin 2020 të pasurive të zotëruara nga sindikatat, por në pronësi publike.

E megjithatë, kontrata e shitblerjes nga Sindikata mbeti në fuqi. Në vitin 2015 ish-Kampi i Punëtorëve, tani, me emrin “Santa Quaranta” u përurua me bujë, gjatë fushatës për zgjedhjet lokale.

Por nuk përfundon këtu. Ky biznes me këtë emër, “Santa Quaranta Resort” u rregjitrua si i tillë vetëm para dy javësh, më 1 dhjetor të 2017, pranë Qendrës Kombëtare të Biznesit, ose, një javë pasi policia ekzekutoi vendimin e Gjykatës për Krime të Rënda për vënien nën sekuestro të kësaj pasurie.

Top Channel

Ministri i Brendshëmi i Francës zhvilloi një vizitë zyrtare në Tiranë. Bashkëpunimi mes dy vendeve ka hyrë në një fazë të re në luftën kundër migracionit ilegal nga Shqipëria.

Numri ende shqetësues i qytetarëve  nga Shqipëria që kërkojnë azil në Francë dhe vlerësim i reduktimit të tyre në tre muajt e fundit ka sjellë në Tiranë, ministrin e Brendshëm të Francës, njëherazi edhe Ministër Shteti, Gerard Collomb. Sipas shifrave zyrtare rreth shtatë mijë qytetarë nga Shqipëria kërkuan azil në Francë në gjashtë mujorin e parë  të këtij viti.

Në një konferencë të përbashkët për shtyp me kryemnistrin shqiptar Rama, të zhvilluar të premten ( 15.12.2017) ai bëri me dije se numri i azilkërkuesve nga Shqipëria mbetet shqetësues.

“20 përqind  e vendeve të strehimit që ka Franca për azilkërkuesit i zenë qytetarët nga Shqipëria. Jemi të kënaqur me progresin dhe rezultatet e arritura në muajt e fundit për reduktimin dhe frenimin e emigracionit të paligjshëm në drejtim të Francës. Kemi besim në vullnetin e Shqipërisë dhe atë të Francës për të rritur bashkëpunimin mes dy vendeve për të luftuar së bashku fenomenin si edhe rrjetet e krimit të organizuar”,  tha ministri Collomb.

Kryemnistri Rama tha, se ka një dinamikë dhe cilësi të re në marrdhëniet mes dy vendeve nga bashkëpunimi për të ndalur emigracionin e paligjshëm. “Po punojmë për t’ua bërë të qartë qytetarëve shqiptarë se rruga e azilkërkimit jo vetëm që përbën në vetvete një rrugë të paligjshme, por edhe një rrugë pa krye. Vullneti ynë është i plotë dhe procesi i frenimit që ka nisur do të vazhdojë deri në fund”, tha kreu I qeverisë Rama.

Mes dy vendeve në verën e këtij viti u nënshkrua një marveshje bashkëpunimi për të frenuar fluksin e azilkërkuesve nga Shqipëria në Francë. Por Franca kërkon intensifikim të masavedhe bashkepunimit për këtë qëllim.

„Do të ketë një bashkëpunim të ngushtë mes ministrit të Brendshëm të Shqipërisë dhe atij të Francës. Kemi një marrdhënie të ndërsjelltë besimi. Procedurat për azilin dhe emigrimin në Francë duhet të trajtohen me kriteret europiane dhe ato gjermane. Po punojmë edhe me vendet fqinjë, se shqiptarët nuk nisen vetëm nga Tirana, por edhe nga kryeqytetet e vendeve fqinjë, ndaj ne kemi propozuar që nga katër oficerët shqiptarë, dy të punojnë në Francë, në Paris me forcat ajrore dhe të kufirit në zonat, ku janë përqëndruar azilkërkuesit shqiptarë, sidomos në Lion, zonë shumë e prekur nga azilkërkues.

“Kemi vullnet të plotë për të frenuar azilkërkimin dhe këtë do ta vazhdojmë deri në fund. Ky proces është pjesë e rëndësishme e sfidës sonë të madhe për  të hapur me BE-në negociatat e anëtarësimit të Shqipërisë. Presim që në gjashtë muajt e parë të vitit 2018 të marim një rekomandim pozitiv dhe të pakushtëzuar nga Komisioni Europian dhe më pas një miratim nga Këshilli Europian për hapjen e negociatave të anëtarësimit në BE-në” tha kryemnistri Rama në konferencën e përbashkët për shtyp.

Qëndrimi zyrtar i Francës ndaj hapjes së negociatave – Presidenti Macron ka dhënë sinjale pozitive

Cili është qëndrim i Francës, vendit me peshë në BE për hapjen e këtyre negociatave kur ambicia e qeverisë Rama është që ato të hapen Brenda gjashë mujorit të parë të vitit 2018? “Qëndrimin zyrtar për këtë ҫështje do ta thotë Presidenti i Francës, Macron. Ai po përpiqet të luajë një rol pozitiv në të gjitha ҁështjet e rëndësishmë europiane dhe kërkon që ëndrrës europiane t’i jepet një frymë e re në kuadrin e humbjes së besimit tek Europa”, tha ministri Collomb.

Ai përmendi fjalimin që presidenti Macron mbajti në Universitetin e Sorbonës për të ardhmen europiane dhe faktin që Macron u ndal në mënyrë të veҁantë tek rajoni i Ballkanit Perëndimor, kur theksoi në Sorbonë që citoj ministrin Collomb në konferencën e shtypit (15.12) në Tiranë, se “është shumë e rëndësishme që Ballkani Perëndimor të stabilizohet dhe BE nuk mund t’i lërë vendet e këtij rajoni jashtë familjes europiane”

Ministri Collomb tha, se ” Përmendja nga Presidenti Macron i Ballkanit Perëndimor dhe Shqipërisë në fjalimin e tij është një tregues pozitiv”.

BE duhet t’i fusë vendet e Ballkanit perëndimor në një dinamikë të re drejt afrimit me BE-në

Ministri Collomb vlerësoi qeverinë Rama si një qeveri reformash.”Të gjitha vendet e botës kanë nevojë për një botë në  lëvizje të shpejtë. Çdo vend të shohë veten në pasqyrë, të bëjë reforma dhe të ecë perpara. Shqipëria po e bën sepse ia kërkon BE-ja por e bën edhe për vete, sepse  vetëm duke reformuar vendin mund të ecet përpara, si në pikëpamjen kombëtare ashtu edhe ndërkombëtare. BE-ja duhet t’i fusë vendet e Ballkanit Perëndimor në një dinamikë të re ecjeje drejt integrimit europian”, tha ministri Collomb në Tiranë. (dw)