Arkivi mujor: Shtator 2018

Bota, Shkenca

Yusaku Maezawa, pasagjeri i parë në orbitën e Hënës

Komento

SpaceX - MaezawaSpaceX – Maezawa

Një sipërmarrës japonez do të jetë pasagjeri i parë që do të udhëtojë në anijen private hapësinore të korporatës SpaceX drejt Hënës. Themeluesi dhe shefi ekzekutiv i korporatës, Elon Musk, e bërë të ditur emrin e japonezit Yusaku Maezawa gjatë një takimi në zyrat qendrore në Kaliforni.

Pronari miliarder i rrjetit japonez të veshjeve Zozo, Yusaku Maezawa, do të përshkojë orbitën e Hënës në bordin e raketës Falcon në vitin 2023.

“Për mua, ky projekt është shumë kuptimplotë. Kam menduar thellë se sa e vlefshme do të ishte të bëhesha pasagjeri i parë privat që shkon në

Hënë. Njëkohësisht mendova se si mund të kontribuoj ndaj botës dhe paqes. Kjo është ëndërra ime e përjetshme.”

Nuk është bërë e ditur shuma që Yusaku Maezawa po paguan për të realizuar udhëtimin, shumë e cila zoti Musk tha se do të përdoret për të ulur koston e ndërtimit të raketës së re.

Japonezi 42 vjeçar tha se do të ftojë gjashtë deri tetë artisë që t’i bashkohen atij në udhëtimin në orbitën rreth Hënës me qëllimin për të krijuar punime artistike, siç u shpreh ai, “për të frymëzuar ëndërrat tek të gjithë” (voa)

Bota

Me pranimin e fajit nga Manafort, një fazë e re në hetimin “Mueller”

Komento

ManafortNë Uashington, po fillon një fazë e re në hetimin e Prokurorit të Posaçëm Robert Mueller pasi ish-menaxheri i fushatës së presidentit Donald Trump, Paul Manafort, deklaroi se është fajtor për dy akuza për krime. Manafort ra dakord të bashkëpunojë me prokurorët për lidhjet e dyshuara mes Moskës dhe rrethit të brendshëm të kandidatit të atëhershëm Trump – që mund të ketë ndikuar në garën presidenciale 2016.

Paul Manafort ishte në qendër të fushatës për zgjedhjen e presidentit Trump dhe kishte qasje në informacionet e tij konfidenciale, komunikimet, shënimet dhe mbledhjet me dyer të mbyllura. Ai ishte i pranishëm në një takim të vitit 2016 mes djalit të kandidatit Trump dhe një avokateje ruse, e cila premtoi materiale negative për rivalen demokrate Hillari Klinton.

Tani, Paul Manafort është zotuar të bashkëpunojë plotësisht me hetimin e prokurorit Mueller pa praninë e një avokati.

“Bëri gjënë e duhur, është një zgjedhje e zgjuar”, thotë Ken Starr i cili drejtoi hetimin e çështjes Whitewater të ish-Presidentit Bill Klinton në vitet 1990.

“Ka shumë mundësi që Paul Manafort ka lënë të kuptohet, nëpërmjet këshilltarëve të tij dhe drejtpërdrejt, se ai mund të ofrojë informata shumë të dobishme, për t’i shkuar në fund asaj që Bob Mueller dhe ekipi i tij janë ngarkuar të bëjnë”, shton ai.

Duke nënshkruar marrëveshjen për pranimin e fajësisë, Manafort përballet me dënime për vetëm dy nga tetë krimet financiare për të cilat ai ishte dënuar muajin e kaluar dhe shmang një gjyq të dytë. Marrëveshja mund të shfuqizohet nëse Manafort mban informacione ose kapet duke gënjyer.

“Është një ditë e vështirë për zotin Manafort, por ai ka pranuar përgjegjësinë për veprimet e tij”, tha Kevin Downing, avokati i zotit Manafort.

Trump, i cili e quajti Manafortin një “njeri të guximshëm” pas dënimit të tij, të dielën shkroi në Twitter: “Lufta e Gjuetisë së Muellerit vazhdon në kërkim të një krimi. Nuk ka patur asnjë bashkëpunim me Rusinë. ”

Një deklaratë nga Shtëpia e Bardhë thekson se krimet e zotit Manafort janë për periudhën para fushatës së 2016-s dhe nuk përfshijnë presidentin Trump.

Çfarë mund të mësojë Muelleri nga Manaforti?

“Një marrëveshje e tillë arrihet nëse prokurorët janë të sigurt se do të nxjerrin informacion mbi objektiva më të rëndësishëm të hetimit. Kush është mbi Paul Manafortin, i cili ishte kreu i fushatës Trump? … Ndoshta, përfundimisht, presidenti”, thotë Norman Eisen, jurist për etikën në administratën e ish-Presidentit Obama.

Sido që të jetë, disa shohin dritë në fund të një tuneli të gjatë..

“Kjo është shumë e dobishme, mendoj për popullin amerikan. E di që vendi është i ndarë. Por ne duhet të kërkojmë të vërtetën. Le të nxjerrim faktet … Dhe unë mendoj se Mueller është në një situatë tani për të na ndihmuar ta bëjmë këtë”, thotë zoti Starr.

Hetimi i Prokurorit të Posaçëm filloi në maj të vitit të kaluar dhe mund të zgjatet për shumë muaj të tjerë. (voa)

Shqipëria

Shqipëri: Dita e parë e shkollës, emocione dhe probleme

Komento

shkollaNë Shqipëri nisën sot vitin e ri shkollor 480 mijë nxënës të shkollave 9-vjecare dhe të mesme.

Ministria e arsimit deklaroi se programet mësimore janë më të lehtësuara, larg metodave të vjetra.

Afro 32 mijë fëmijë shkojnë në shkollë për herë të parë, ndërsa 39 mijë maturantë në gjimnaze do të provojnë maturën e re, e cila, sipas ministrisë, është e lidhur me Universitetin dhe tregun e punës.

Këtë vit shkollor, deklaroi ministria, u ndanë libra falas nga klasa e parë në të katërtën për afro 190 mijë fëmijë, ndërsa nxënësit nga klasa e 5 në klasën e 12, do të vazhdojnë të paguajnë për tekstet shkollore.

Por Koalicioni për Arsimin deklaroi sot se Shqipëria mbetet ndër vendet e fundit në rajon dhe në Europë për financimin e arsimit. Qeveria, sipas tij, premton prej 6 vjetësh rritjen e buxhetit për arsimin deri në 5 përqind të GDP-së, por buxheti i shtetit për arsimin zë vetëm 3 përqind.

Kjo mungesë e investimeve për arsimimin e fëmijëve dhe të rinjve, e rendit Shqipërinë ndër vendet e fundit në Europë për rezultatet dhe arritjet e nxënësve, krahasuar me vendet e OECD.

Mungesa e investimeve publike në arsim dhe shpenzimet e pakta të Qeverisë për arsim cilësor dhe gjithëpërfshirës vijojnë të lënë pa arsim një pjesë jo të vogël të fëmijëve dhe adoleshentëve, tha Koalicioni për Arsimin.

Sipas Organizatës Botërore të Shëndetit, afro gjysma e shkollave nuk kanë ujë të pijshëm dhe rreth 70 përqind e tyre nuk kanë kushte higjene të përshtatshme për arsimimin e fëmijëve, citoi Koalicioni.

Thuajse 64% e fëmijëve më aftësi të kufizuar mbeten ende jashtë sistemit arsimor parauniversitar dhe vetëm 35% e shkollave në Shqipëri janë të aksesueshme nga këta fëmijë, theksoi Koalicioni. Edhe pse ky vit shkollor e gjen arsimin publik parauniversitar me një numër të dyfishuar të mësuesve ndihmës, pjesa më e madhe e fëmijëve nuk do të përfitojnë nga kjo masë mbështetëse.

Koalicioni për Arsimin shtoi se arsimimi i fëmijëve romë dhe egjyptianë mbetet një problem, ndërkohë që 38.6 % e fëmijëve Rom dhe egjyptian nuk e ndjekin arsimin e detyrueshëm.

Një ndër problemet kryesore të arsimit mbetet dhuna dhe bulizmi në shkollë: afro 40% e nxënësve janë viktima të dhunës fizike dhe psikologjike, ndërsa 22 përqind e tyre ndjehen të kërcënuar nga mësuesit. Thuajse 20 përqind e nxënësve janë viktima të bulizmit ndërsa 50 përqind e nxënësve janë dëshmitarë të diskriminimit të nxënësve në shkollën e tyre, deklaroi Koalicioni për Arsimin. (voa)

Maqedonia

Maqedoni: Përkrahje e SHBA për referendumin

Komento

Mattis Zaev1Ministri i Mbrojtjes i SHBA James Mattis në Shkup: “Referendumi që do të mbahet më 30 shtator në Maqedoni është vota më e rëndësishme në historinë e vendit”

“Bashkohuni me një Aleancë që angazhohet në zbatimin e standardeve për integritetin territorial dhe lirinë nga detyrimi i atyre që përpiqen të ulin këto vlera nga Siria deri në Ukrainë”, kështu u shpreh ministri i Mbrojtjes i SHBA James Mattis gjatë qëndrimit në Shkup. Sipas tijë referendumi që do të mbahet më 30 shtator në Maqedoni është vota më e rëndësishme në historinë e vendit.

“Të citoj kancelaren Merkel, përderisa votoni në referendum për anëtarësim në NATO, ju jepni votën më të rëndësishme në historinë e kombit tuaj. Ne e njohim procesin e zgjidhjes politike që qëndron para kombit tuaj. Ju mbështesim juve dhe miqtë tanë maqedonas në përgjegjësinë tuaj demokratike për të votuar”, ka deklaruar Mattis.

E njohim procesin kompleks politik, i cili qëndron përpara dhe j’u përkrahim  në realizimin e votës tuaj demokratike dhe përgjegjësinë të votoni, ka thënë Mattis.

“Jemi të gatshëm që t’ju dëshirojmë mirëseardhje si anëtare e 30-të në aleancë. Vota në referendum është vota më e rëndësishme historike e vendit tuaj”, ka theksuar Mattis, duke shtuar se këtë porosi do t’ia përcjell edhe kryetarit të shtetit Gjorgje Ivanov. Ai tha se anëtarësimi në NATO sjell siguri dhe zhvillim ekonomik më të fuqishëm për Maqedoninë.

“Duke iu bashkangjitur NATO-s, ju do të rrisni sigurinë e shtetit tuaj dhe kjo do të sjellë ekonomi dhe siguri më të lartë. Ashtu siç u rritën investimet në Mal të Zi, të njëjtat do të rriten edhe në Maqedoni”, ka thënë sekretari amerikan.

Marrëdhëniet në fushën e mbrojtjes midis Maqedonisë dhe SHBA-së, Mattis i vlerësoi të fuqishme dhe tha se SHBA e njeh udhëheqjen e vendit si fuqi të rëndësishme stablizuese në Ballkan dhe më gjerë. Maqedonia ka dëshmuar të jetë partnere i përgjegjshme dhe kontribuese e rëndësishme për paqen globale dhe sigurinë.

Zaev: Ballkani Perëndimor po integrohet në familjen evropiane

Kryeministri i Maqedonisë Zoran Zaev tha, se sekretari amerikan i Mbrojtjes vjen në Maqedoni në një periudhë të jashtëzakonshme kur qytetarët janë duke u përgatitur për të dhënë votën e tyre për pranimin e marrëveshjes për zgjidhjen e çështjes së emrit me Greqinë.

“Vendet e Ballkanit Perëndimor të integruar në familjen euro-atlantike janë një garanci për një parandalim të qëndrueshëm të përfshirjes së palëve të treta këtu në rajon. Vazhdimisht i inkurajojmë liderët tonë rajonal të bashkohen në arritjen e objektivave të përbashkët, paqe të qëndrueshme, bashkëpunim rajonal, zhvillim ekonomik dhe integrim të kombeve në familjen euro-atlantike”, është shpreh  Zaev.

Rusia dhe çështja e referendumit

Ministri i Mbrojtjes i SHBA Mattis, para ardhjes në Shkup paralajmëroi se do të vizitojë Maqedoninë për të shprehur mbështetje të qartë për referendumin e 30 shtatorit për çështjen e emrit, por edhe shqetësimin për shkak të involvimit të mundshëm të Moskës në proces. Ai ka dënuar përpjekjet e Rusisë duke përdorur paratë dhe ndikimin e saj për të forcuar palën opozitare ndaj referendumit në Maqedoni, që hap rrugën për anëtarësimin e vendit në NATO, një veprim që Moska e kundërshton.

Kryeministri i Maqedonisë, Zoran Zaev ka deklaruar se nuk ka informacione mbi ndikimet ruse në Maqedoni, por ka theksuar se Moska qartë ka bërë të ditur, që është kundër anëtarësimit të Maqedonisë në NATO, por jo edhe në Bashkimin Evropian.

“Nuk ka dëshmi për ndonjë ndikim rus. Federata Ruse është mike e Maqedonisë dhe ajo nuk ka asgjë kundër integrimit të Maqedonisë në BE, por është kundër anëtarësimit në NATO. Ketë e thonë shumë qartë. Ne po tentojmë të sqarojmë se për ne nuk ekziston alternativë, përveç integrimit të tërësishëm në NATO dhe BE. Duam të ndërtojmë miqësi me të gjitha vendet, edhe me Federatën Ruse. Mbetemi në këtë përcaktim”, ka deklaruar kryeministri Zaev. Ai këto komente i bëri një konferencë ndërkombëtare të organizuar nga BE-ja lidhur me lirinë e mediave në rajon. (dw)

Maqedonia

Sekretari Mattis në Shkup, në mbështetje të referendumit

Komento

Mattis ZaevSekretari amerikan i mbrojtjes, Jim Mattis akuzoi Rusinë të hënën për përpjekje për të ndikuar në rezultatin e referendumit për ndryshimin e emrit të Maqedonisë. Vota në mbështetje të ndryshimit të emrit, do t’i hapte Shkupit rrugën për anëtarësim në NATO dhe në Bashkimin Evropian.

Duke folur në Shkup me udhëheqësit e Maqedonisë, sekretari Mattis tha gjithashtu se Shtete e Bashkuara po shqyrtojnë zgjerimin e bashkëpunimit në fushën e sigurisë kibernetike me këtë vend të Ballkanit.

Maqedonasit do të votojnë më 30 shtator për një marrëveshje të nënshkruar në qershor mes Maqedonisë dhe Greqisë që do t’i ndryshonte emrin vendit nga Republika e Maqedonisë në Republika e Maqedonisë së Veriut. Athina kërkonte ndryshimin e emrit që të votonte pro anëtarësimit të Shkupit në NATO dhe BE.

“Ne nuk duam të shohim Rusinë të bëjë (në Maqedoni) atë që është përpjekur të bëjë në shumë vende të tjera”, tha sekretari Mattis për gazetarët që po udhëtonin me të drejt Shkupit, duke iu referuar shqetësimeve të Uashingtonit rreth ndërhyrjes ruse në zgjedhjet presidenciale amerikane të vitit 2016.

“Nuk ka dyshim që ata kanë transferuar para dhe po ndërmarrin një fushatë të gjërë ndikimi” tha zoti Mattis, duke shtuar se nuk është e qartë se sa efektive kanë qenë përpjekjet e Moskës për të ndikuar tek referendumi në Maqedoni.

Rusia i ka mohuar akuzat për ndërhyrje, por i kundërshton me forcë planet e Maqedonisë për anëtarësim në NATO.

Sekretari Mattis është zyrtari i fundit i lartë perëndimor, përfshirë kancelaren Angela Merkel që viziton Maqedonisë ditët e fundit për t’u bërë thirrje qytetarëve të saj të miratojnë referendumin.

Zoti Mattis u takua edhe me presidentin Gjorge Ivanov, i cili e kundërshton marrëveshjen për emrin.

Anketat e fundit tregojnë se shumica e maqedonasve e mbështetin ndryshimin e emrin, ndërsa nacionalistët e kundërshtojnë atë. (voa)

Maqedonia, Uncategorized

PRO ET CONTRA REFERENDUMIT

Komento

Shkruan: Bejtullah Sadiku
PRO ET CONTRA REFERENDUMIT NE MAQEDONI

  • Çështja e Referendumit në Maqedoni është një proces mjaft i diskutueshëm, sidomos kohën e fundit dhe që do zgjase me afatizim deri në ditën e mbajtjes me 30 Shtator 2018. Diskutohet, flitet, shkruhet, analizohet, sugjerohet nga sikush dhe Çdokush i jep kahjen e (mos) rëndësisë që do të ketë për ardhmërinë e ketij vendi akoma të pa definuar?!
    Janë vurë në levizje faktorë të ndryshëm politik, nga lider partie, funkcionarë, pushtetarë, intelektual e analist të brendshëm, evropian e ndërkombetarë. Të gjithë japin mendime, sugjerime, ide e propozime për dalje në Referendum, mbështetjen e të njejtit, ku formula e përbashkët është kjo: „Ose-ose“, të dilet a mos të dilet, „për apo kunder“. Qëndrimet në shumicë janë për dalje, mbështetje dhe përfundim të suklsesshëm për „PO“, ku përqindja më e madhe e Poooos, jo e afron, por e Çon vendin në suksese të reja, hyrjen ne BE, NATO dhe si vazhdimësi e kësaj edhe në shumë organizma e organizata tjera evropiane e ndërkombetare si të barabartë në mesin e familjeve të ketyre shtetetve të zhvilluara , nga të cilët pritet që ndihma të jetë akoma ma e madhe dhe ma e fuqishme ndaj këtij populli e këtij grusht vendi të vogël.

Por, dilema që sjell pikëpyetjen e madhe, cka nëse nuk dilet me përqindjen e duhur? Friga, ankthi mbeten të hapur dhe me X gjëra të pa njohura e të pa pritura. Dilemat janë dhe mbeten prezente, jo vetëm në raport maqedon-maqedon, por edhe në raport shqiptarë-maqedon, ngase jo rrallë hudhen parulla jo afrueshmërie në mes këtyre dy nacionaliteteve ma të medha, që e ardhmja duhet të jetë domosdoshmërisht e barabartë në mënyrë reciproke, „sa i yti-po aq edhe i imi“ dhe „sa i imi-po aq edhe i yti“.
Lidhur me këto raporte, ditë e natë janë aktiv nëpër tryeza të rrumbullakëta, mediume të ndryshme dhe tubimet partiake me ma shumë „PRO“ se sa „CONTRA“. Dilemat akoma janë prezente, nga shkaku se akoma nuk janë sqaruar sa duhet e si duhet edhe shumë gjëra që na tangojnë neve shqiptarëve e që janë të hapura para Referendumit, e me ankth që mos hudhen në harresë edhe pas Referendumit.
Para Referendumit është dashur të organizohen debate konstruktive me masën, popullatën duke i lejuar edhe mendimet e tyre që mund të ishin poashtu konstruktive, sikur edhe tubimet që momentalisht mbahen, a janë vetëm informative, me moton kryesore se „duhet të gjithë me dalur e me votuar per PO“.
Në Referendum, materiali apo pyetjet për të cilat duhet të votohet apo rrethohen, poashtu të jenë konkrete, jo sugjestive, që të eliminohen dilemat dhe dyshimet e votuesve, ngase vendoset për një ardhmëri ma të mirë individuale, kolektive e gjithë shtetërore, për një të ardhme ma të shëndoshë e ma të lumtur të këtij vëndi të ri „Maqedonia Veriore“, ku e kaluara e hidhur e me probleme t´ia hudhim harresës dhe arkivave historike…?!
Pjesa e tretë, është dhe duhet mbetur realizimi i Referendumit ku duhet hollë e mire të detalizohen kërkesat e popullit, partive, lidëreve, politikanëve, analistëve, intelektualeve, akademikëve e të tjerëve, që diskutojnë me të madhe, por akoma pa qenë të sigurt në rezultatin final dhe zbatimin praktik në trendin e ri të vëndit në familjen fqinjësisë evropiane, pa u kry edhe detyrat e brendshme si që janë: emërtimi, identiteti, gjuha si dhe prezentimi reciprok në Kushtetute, Preambullë, Ligje e Ligjshmëri, duke patur parasysh edhe popullatën jo maqedone, konkretisht shqiptarë e të tjerë që jetojne dhe do jetojnë në këte vend te ri si në vëndin apo atdheun e tyre. Që nesër duhet të starton me shumë risi, programe, projekte e vlera tjera pozitive në të mire të të gjithëve, pa marrë parasysh identitetin nacional, religjioz e politik.
Nëse edhe ky opcion s´fiton, mendoj se një gjë të këtillë duhet t´i lejohet Parlamentit te Maqedonisë, që me mbështetje të pa kontestueshme të nderkombëtarëve, njëzërit dhe unanimisht të RATIFIKON dështimin e Referendumit për „PRO“.
Ndryshe, që kam potencuar vite më heret, po e them edhe tani, se po dështoj edhe ky projekt i fundit evropian e ndërkombëtar, me mbështetje të plotë edhe të SHBA-s, rrugëdalje tjetër nuk mbetet pos shpëtimit të ketij vendi që vec do e quanja „problematik“ është dhe mbetet vetëm „PROTECTORATI“?!

Sukses!
B.S. : Germany, 16.09.2018

Bota

Kosovë: Aktakuzë në rastin “veteranët”

Komento

uckProkuroria e Posaçme e Kosovës, ngriti të premten aktakuzë kundër 12 personave nën dyshimet për veprën penale “keqpërdorimi i pozitës apo autoritetit zyrtar”, në rastin e njohur në Kosovë si “veteranët”.

Në një njoftim të prokurorisë thuhet se “nga provat e siguruara deri më tani është vërtetuar se nga pagesat e kundërligjshme për veteranët luftëtarë të Ushtrisë Çlirimtare të Kosovës, buxheti i Republikës së Kosovës është dëmtuar në shumën prej 68 milionë eurosh”.

Prokuroria i ka propozuar gjykatës që të urdhërojë “ndalimin e pagesës së pensioneve të fituara në mënyrë të kundërligjshme si veteranë deri në përfundimin e procedurës penale” dhe që gjykata të marrë vendim që të gjithë përfituesve të kundërligjshëm t’u ndalohet marrja e pensionit si veteranë.

Ndonëse prokuroria nuk e ka bërë të ditur identitetin e të akuzuarve, mediat lokale në Kosovë thanë se ata janë: Agim Çeku, Nuredin Lushtaku, Sadik Halitjaha, Shkumbim Demaliaj, Rrustem Berisha, Faik Fazliu, Fadil Shurdhaj, Xhavit Jashari, Qelë Gashi, Shukri Buja, Ahmet Daku dhe Smajl Elezaj.

Ambasadori amerikan në Prishtinë, Greg Delawie, u shpreh “krenar me Kosovës për këtë hap të rëndësishëm për luftën kundër korrupsionit”.

Çështja e listave të veteranëve të luftës u ringrit pasi që ditë më parë prokurori i Prokurorisë së Posaçme të Kosovës, Elez Blakaj, që po e trajtonte këtë çështje, dha dorëheqje duke akuzuar kryeprokurorin e shtetit, Aleksandër Lumezi për ndërhyrje dhe përpjekje për frikësim, ndërsa vuri në pah se sic tha ai, është kërcënuar gjatë trajtimit të keqpërdorimeve me hartimin e listave të veteranëve.

Ish prokurori Blakaj, në një letër të hapur, tha se mund të ishin 19 mijë përfitues të rremë të skemës së pensioneve për veteranët e luftës së ish Ushtrisë Çlirimtare të Kosovës. Pohimet e tilla nxitën diskutime rreth numrit të saktë të tyre.

Ish drejtues e pjesëtarë të Ushtrisë Çlirimtare, japin shifra të ndryshme për numrin e veteranëve. Ish-komandanti i Përgjithshëm i Ushtrisë Çlirimtare të Kosovës. Sylejman Selimi, në një intervistë nga burgu për Gazetën Express tha se pas lufte janë identifikuar rreth 13 mijë ushtarë.

Anëtarë të Komisionit qeveritar për njohjen dhe verifikimin e statusit të veteranëve thotë se numri prej 37 mijë veteranësh që gëzojnë pensionin prej 170 eurosh, nuk është i lartë, por listat nëse duken të fryra, problemi është tek ligji për veteranët që parasheh përfshirjen në lista të shumë kategorive që kanë ndihmuar luftën e ish Ushtrisë Çlirimtare të Kosovës. (voa)

Shqipëria

Avioni i parë i “Air Albania” ulet në Rinas, Rama: Nisi një epokë e re

Komento

Air AlbaniaAvioni i parë i “Air Albania”, kompania e parë ajrore shqiptare, u ul pasditen e së premtes në aeroportin e Rinasit, Airbus 319, që si stemë ka flamurin shqiptar.

Fluturimet e para do të jenë drejt Stambollit, ndërsa “Air Albania” do të ketë destinacione të tjera në qytetet kryesore europiane si Roma, Londra apo Milano.

Në qershor të këtij viti, qeveria nisi procedurat për krijimin e shoqërisë “Air Albania”. Tre ortakët e saj janë “Albcontrol” me 10%, që përfaqëson palën shqiptare, dhe dy subjekte të tjera, “Turkish Airlines” dhe “MDN Investment”, përkatësisht me 49 dhe 41%. Sipas qeverisë, krijimi i kompanisë “Air Albania” do të ofronte më shumë mundësi për fluturime “low cost” nga Shqipëria.

“Me meritë, pa paterica pushteti, “Air Albania” mban flamurin shqiptar dhe përfaqëson çdo shqiptar. Në fokus do të jetë udhëtari dhe nevojat e tij”, u shpreh Drejtoresha e Albcontrol, Belinda Balluku.

I pranishëm në ceremoninë e inaugurimit në Rinas ishte edhe Kryeministri Rama, i cili e vlerësoi kompaninë ajrore me flamurin shqiptar, si një ëndërr të bërë realitet.

“Është një emocion tejet i veçantë për mua, por jo vetëm për mua që sot mes miqsh, bashkëpunëtorësh dhe partnerësh, përmbushim jo thjesht një zotim, por një ëndërr të kahershme, e cila dukej e pamundur për vite të tëra, kompaninë ajrore të flamurit kuqezi. Është një ëndërr që sot merr krahë për të filluar një fluturim që do të jetë i gjatë. Por synimi ynë është që t’i çojë shqiptarët sa më larg dhe t’i ndërlidh ata sa më shumë. “Air Albania” është një vepër kuqezi, kombëtare, një fryt i arrirë në këtë që për ne është viti i Gjergj Kastriotit. “Air Albania” do të ishte ose s’do të ishte, por ideja për ta kthye në liri për shqiptarët dhe mundësi reale që ata ta kenë këtë kompani zgjedhjen e tyre të parë, mbetet ambicia jonë. Tashmë kemi nisur rrugën e një epoke të re”, u shpreh Rama. (tch)

Maqedonia

Maqedoni: Mitchel, thirrje votuesve të dalin në referendum

Komento

MitchelNdihmës-Sekretari amerikan i Shtetit për Evropën dhe Euroazinë, Wess Mithchell gjatë qëndrimit të tij në Shup u bëri thirrje votuesve në Maqedoni që të dalin në referendum, për siç tha, që të dëgjohet zëri i tyre për të ardhmen e vendit të tyre. Ndërkohë, Kryeministri Zoran Zaev shprehu mirënjohe të thella për mbështetjen e vazhdueshme amerikane. Ata të dy inkurajuan të gjithë drejtuesit politikë, sidomos opozitën, që të marrë një qëndrim të qartë lidhur me referendumin e tridhjetë shtatorit.

Zoti Mitchell shprehu mirënjohje për kryeminstrin Zaev dhe ekipin e tij për përpjekjet e mëdha, siç tha, për arritjen e marrëveshjes së Prespës me Greqinë që kërkonte, sipas tij, sakrifica nga të dyja palët

“Mesazhi im”, – tha zoti Mitchell, – “për secilin shtetas që takova, sot ishte i njejtë: se ky është një vendim të cilin vetëm maqedonasit mund ta marrin. Maqedonia ka qenë në rrugën drejt perëndimit për një kohë të gjatë dhe ne i inkurajojmë të gjithë maqedonasit të ushtrojnë lirinë e tyre themelore, por dhe përgjegjësinë gjatë referendumit, që të dalin dhe të votojnë. Mendoj se kjo është mundësi historike dhe një shteg drejt NATO-s dhe BE-së; Është në interes të Maqedonisë që qytetarëve të saj t’u dëgjohet zëri dhe nuk mendoj se është një moment historik në të cilin nuk do të donit që zëri juaj të dëgjohet. Është me rëndësi të ngrini zërin, të bëni të qartë mendimin tuaj. SHBA-të e mbështesin Maqedoninë në këtë proces dhe besoj se është në interes të vetë Maqedonisë, të Evropës e po ashtu edhe në interës të Amerikës që të shohim Gadishullin Ballkanik të qëndrueshëm, të sigurt dhe në mirëqenie”, – tha ai.

Ndërkohë, kryeministri Zoran Zaev e shikon vizitën e Ndihmës-Sekretarit Mitchell si një inkurajim të fuqishëm për Maqedoninë dhe për qytetarët e saj; “për hapin e ardhshëm historik, e ky është referendumi i suksesshëm” – u shpreh ai.

“E dimë se në rrugën tonë nuk jemi të vetëm. U shpreh falënderim të madh aleatëve tanë dhe partnerë strategjik – Shteteve të Bashkuara të Amerikës. Mbështetja nga Amerika është frymëzim dhe shenjë se jemi në rrugën e drejtë. U bëj thirrje drejtuesve politikë që të dalin dhe t’i ftojnë qytetarët për të votuar në referendum. Kjo është në të mirë të shtetit dhe të gjithë qytetarëve. Edhe një herë i bëj thirrje opozitës që të përcaktohet qartazi; ardhmëria e vendit tonë i fton të gjithë!”- tha kryeministri maqedonas, Zaev, ndërsa shtoi se “papërgjegjësia dhe mosnjohja e shansit historik nuk janë veprime patriotike”.

Zyrtari i lartë i Departamentit të Shtetit pati takime edhe me drejtues të tjerë politikë, me ligjvënës dhe me kryetarin e parlamentit, me komunitetin e biznesit dhe pjesëtarë të shoqërisë civile. Vizita e tij i paraprin asaj të Sekretarit të Mbrojtes, James Mattis te planifikuar për të dielën në Shkup. (voa)

Bota

Lavrov dëshiron afrimin me Europën

Komento

LavrovKatër vjet pas fillimit të krizës së Ukrainës Rusia do të ripërtërijë marrëdhëniet me Bahskimin Europian. Gjermania duhet të marrë një rol drejtues për këtë.

“Ne duam t’i përvishemi punës për rinovimin e shtëpisë së përbashkët europiane”, propozoi ministri i Jashtëm rus Sergej Lavrov gjatë një vizite në Berlin. Ai i bëri thirrje Gjermanisë, që në këtë proces të marrë një rol drejtues. “Shumë gjëra varen nga pozicioni gjerman”, tha ai në kuadër të forumit gjermano-rus. Qeveria në Moskë do ta përshëndesë, nëse Berlini ndërmerr iniciativën – pa kushte, tha ai.

Që pas aneksimit të gadishullit të Krimesë në detin e Zi nga Rusia më 2014 marrëdhëniet mes BE-së dhe Rusisë janë tensionuar: BE vendosi sanskione ekonomike. Dialogu mes NATO-s dje Rusisë është tkurrur në minimum. Të dyja palët i kanë përforcuar ndjeshëm trupat në afërsi të kufirit mes  territorit të NATO-s dhe Rusisë.

Merkel kundër shfuqizimit të sanksioneve

Kancelarja Angela Merkel megjithatë u shrpeh kundër shfuqizimit të sanksioneve ndaj Rusisë. “Nuk mund të flasim për shfuquzimin e sanksioneve, pa parë përpara përparime konkrete në marrëveshjen e Minskut”, bëri të qartë Merkel në kuadër të një vizite që po zhvillon në Lituani.

Merkel atje u takua me presidentët dhe kryeministrat e Lituanisë, Letonisë dhe Estonisë. Marrëveshja e Minskut nga viti 2015 ndër të tjera parashikon armëpushimin në Ukrainën lindore. Deri tani kjo marrëveshje është zbatuar pjesërisht dhe është shkelur herë pas here.

Trupat qeveritare ukrainase dhe separatistët pro-rusë akuzojnë reciprokisht njeri-tjetrin si përgjegjës për situatën. Njëkohësisht Gjermania përpiqet gjithnjë e më shumë që të ruajë kontaktin me qeverinë ruse për të avancuar me zgjidhjen e krizave ndërkombëtare si p.sh. në Siri. Për këtë qëllim ministri i Jashtëm gjerman Heiko Maas këtë të premte (14.09) u takua me homologun rus Lavrov në Berlin.

Maas paralajmëron nga rreziku i një ofensive në Idlib

Maas tërhoqi vëmendjen nga rreziku i një “ofensive të madhe” të ushtrisë siriane ndaj bastionit të rebelëve Idlib në veri-perëndim të vendit. Njëkohësisht ai ofroi ndihmën gjermane për rindërtimin, në rast se arrihet në një zgjidhje politike për Sirinë. “Nëse ka një zgjidhje politike për Sirinë, që çon në armëpushim, jemi të gatshëm të marrim përsipër përgjegjësi për ridnërtimin.” Sipas Maas është në interesin gjerman, që Siria të jetë një vend i stabilizuar. Për këtë ky vend duhet të rindërtohet. “Në këtë drejtim ne na pret një rol i rëndësishëm”, theksoi politikani socialdemokrat.

Rusia mbështet kreun e shtetit në Siri Baschar al-Assad në konfliktin e armatosur që vazhdon qysh nga viti 2015. Ndërkohë ushtria siriane ndodhet në prag të një ofensive në Idlib. Meqënëse ky është bastioni i fundit i rebelëve në Siri, priten luftime të ashpra dhe valë refugjatësh drejt Turqisë.

uh/HF (dpa, afp)