SHBA dhe Gjermania u zotuan të mërkurën të pajisin Ukrainën me disa nga armët e avancuara që Kievi i ka kërkuar prej kohësh për rrëzimin e avionëve dhe shkatërrimin e artilerisë. Ndërkohë, forcat ruse janë më afër pushtimit të një qytet kyç në lindje.

Gjermania tha se do të furnizojë Ukrainën me raketa kundërajrore dhe sisteme radarësh, ndërsa Shtetet e Bashkuara njoftuan se do të sigurojnë katër sisteme raketore të sofistikuara me rreze të mesme veprimi dhe municione.

Shtetet e Bashkuara po përpiqen të ndihmojnë Ukrainën të zmbraps rusët pa shkaktuar një luftë më të gjerë në Evropë. Pentagoni tha se mori garanci se Ukraina nuk do t’i përdorte raketat e reja për të goditur objektiva në territorin rus.

Kremlini akuzoi Uashingtonin se po “hedh benzinë në zjarr”.

Armët perëndimore kanë qenë kritike për suksesin e Ukrainës në frenimin e ushtrisë shumë më të madhe dhe më të pajisur të Rusisë, duke penguar përpjekjet e saj për të pushtuar kryeqytetin dhe duke e detyruar Moskën të zhvendosë fokusin e saj në rajonin industrial të Donbasit në lindje të vendit.

Por ndërsa Rusia bombardonte qytetet në lindje të Ukrainës, presidenti ukrainas Volodymyr Zelenskyy kërkonte vazhdimisht më shumë armë, lloje më të mira armësh dhe akuzoi Perëndimin se po lëviz shumë ngadalë.

Andriy Yermak, kreu i zyrës së presidentit ukrainas, përshëndeti njoftimet për dërgimin e armëve të reja nga Perëndimi. “Jam i sigurt se nëse i marrim të gjitha armët e nevojshme dhe forcojmë regjimin efikas të sanksioneve, ne do të fitojmë”, tha ai.

Armët e reja mund të ndihmojnë Ukrainën të krijojë dhe mbajë linja të reja mbrojtjeje në lindje duke goditur artilerinë ruse që kanë bombarduar qytetet e këtij rajoni dhe duke kufizuar sulmet ajrore ruse, tha gjenerali francez në pension Dominique Trinquand, një ish-gjeneral i Francës që ka shërbyer në misione ushtarake të OKB-së.

“Vendet e NATO-s, ato evropiane dhe amerikanët zgjeruar mjetet dhe armët që po i japin Ukrainës dhe ky përshkallëzim ka patur për qëllim të vë në provë reagimin e Rusisë”, tha ai. “Nëse nuk ka asnjë reagim, ata vazhdojnë të furnizojnë armë gjithnjë e më efektive dhe më të sofistikuara.”

Analistët ushtarakë thonë se Rusia shpreson të pushtojë Donbasin përpara se të mbërrijnë armët që mund të ndryshojë situatën në terren. Do të duhen të paktën tre javë për të dërguar armët precize amerikane dhe për të trajnuar trupat ukrainase që t’i përdorin ato në fushën e betejës, tha Pentagoni. Por nënsekretari i Mbrojtjes, Colin Kahl tha se ai beson se ato do të arrijnë në kohë për të bërë një ndryshim në fushën e betejës.

Sistemet e raketave janë pjesë e një pako të re prej 700 milionë dollarësh të ndihmës ushtarake për Ukrainën nga Shtetet e Bashkuara, që përfshin gjithashtu helikopterë, antitank “Javelin”, radarë, automjete taktike, pjesë këmbimi dhe pajisje të tjera.

Raketat kanë një rreze veprimi prej rreth 80 kilometrash dhe mund të lëvizen me lehtësi nga një vend në një tjetër. Ukraina ka këmbëngulur pa sukses të sigurojë raketa me rreze veprimi prej rreth 300 kilometrash.

Zëdhënësi i Kremlinit Dmitry Peskov tha se Moska nuk u beson garancive se Ukraina nuk do të qëllojë në drejtim të territorit rus. “Ne besojmë se Shtetet e Bashkuara me qëllim po i hedhin benzinë zjarrit”, tha ai. Ministri i Jashtëm rus Sergey Lavrov tha se shtytja e Ukrainës për më shumë armë është një “provokim i drejtpërdrejtë që synon të tërheqë Perëndimin në luftime”. Ai paralajmëroi se raketat e shumta do të rrisin rrezikun e një konflikti të zgjeruar.

“Politikanët e arsyeshëm perëndimorë i kuptojnë mirë këto rreziqe”, shtoi ai.

Premtimi nga Gjermania për të ofruar sistemet e mbrojtjes ajrore “IRIS-T” do të shënonte dërgimin e parë të armëve të mbrojtjes ajrore me rreze të gjatë veprimi në Ukrainë që nga fillimi i luftës atje.

Gjermania është kritikuar, si brenda ashtu edhe nga aleatët jashtë vendit, se nuk po bën mjaft për të ndihmuar Ukrainën. Kancelari gjerman Olaf Scholz u tha ligjvënësve se raketat tokë-ajër “IRIS-T” janë sistemi më modern i mbrojtjes ajrore që ka vendi.

“Me këtë, ne do t’i mundësojmë Ukrainës të mbrojë një qytet të tërë nga sulmet ajrore ruse”, tha ai. Sistemet e radarëve do të ndihmojnë gjithashtu Ukrainën të gjejë vendndodhjen e artilerisë së armikut.

Njoftimet për armët erdhën ndërsa një guvernator rajonal tha se forcat ruse tani kontrollojnë 80% të Sievierodonetskut, një qytet që është kyç në përpjekjet e Moskës për të përfunduar pushtimin e rajonit të Donbasit, ku forcat ukrainase dhe separatistët e mbështetur nga Rusia kanë luftuar për vite me radhë. Një pjesë e këtij rajoni kontrollohej nga seperatistët pro-rusë para se Rusia të fillonte sulmin kundër Ukrainës në shkurt të këtij viti.

voa

Britania thotë se do të dërgojë sisteme të sofistikuara raketash me rreze të mesme veprimi në Ukrainë, në një lëvizje të koordinuar me Shtetet e Bashkuara.

Sekretari i Mbrojtjes Ben Wallace tha se Britania e Madhe do të dërgojë një numër të paspecifikuar raketa-hedhësish M270, të cilët mund të dërgojnë raketa të drejtuara me saktësi deri në 80 kilometra.

Britania thotë se vendimi është koordinuar ngushtë me një vendim të SHBA-së për dërgimin e sistemeve raketore të artilerisë me lëvizshmëri të lartë në Ukrainë. Të dy sistemet e raketave janë të ngjashme, megjithëse ai amerikan është i lëvizshëm me rrota, ndërsa ai britanik – gjithashtu i ndërtuar në SHBA – funksionon në shina.

Britania thotë se trupat ukrainase do të stërviten në Mbretërinë e Bashkuar për të përdorur pajisjet.

Ukraina u ka kërkuar aleatëve të saj perëndimorë që të dërgojnë raketa me rreze më të gjatë veprimi për ta ndihmuar atë të kundërshtojë sulmet e artilerisë ruse në rajonin lindor të Donbasit, në qendër të ofensivës së Moskës.

SHBA tha se Ukraina ka premtuar të mos lëshojnë raketa në Rusi. Por Rusia akuzoi Uashingtonin se “i hodhi benzinë zjarrit” në konflikt.

voa

Në një konferencë të përbashkët për shtyp në Uashington, Sekretari i Shtetit Antony Blinken dhe Sekretari i Përgjithshëm i NATO-s Jens Stoltenberg thanë sot se Presidenti rus Vladimir Putin po përballet me një aleancë më të fortë, me më shumë forca ushtarake dhe me më shumë vende anëtare, ndryshe nga sa e priste.

Sekretari Blinken dhe zoti Stoltenberg informuan se në samitin e ardhshëm të NATO-s që do të zhvillohet pas pak javësh në Madrid, aleanca do të miratojë një koncept të ri strategjik për t’u siguruar që do të përballojë sfidat e sotshme dhe të së ardhmes. Strategjia aktuale e NATO-s është miratuar në vitin 2010.

Strategjia e re do të përfshijë çdo aspekt, që nga aktivitetet keqdashëse kibernetike, militarizimin e shpejtë të Kinës dhe sigurisht përpjekjet e hershme të Rusisë për të dobësuar rendin ndërkombëtar të bazuar mbi rregullat që shërbejnë si themeli i paqes dhe sigurisë në mbarë botën.

Sekretari Blinken u zotua për rritjen e buxhetit të NATO-s, për ripërtëritjen e aleancave në fushën e mbrojtjes dhe kapaciteteve parandaluese. Ai përshëndeti kurajon e jashtëzakonshme dhe aftësitë e popullit të Ukrainës të mbështetur nga ndihma e Shteteve të Bashkuara dhe pothuajse të gjitha vendeve anëtare të NATO-s, që janë angazhuar për të mbrojtur sovranitetin, demokracinë dhe pavarësinë e Ukrainës.

Sekretari i Përgjithshëm i NATO-s shprehu gjithashtu mbështetjen për anëtarësimin e ardhshëm të Finlandës dhe Suedisë në aleancë, si dhe për rritjen e pranisë së NATO-s në vendet e Evropës Lindore. Ai tha se mban kontakte të afërta me Presidenti turk Erdogan dhe udhëheqësit e Finlandës dhe Suedisë, dhe se do të organizojë një takim mes zyrtarëve të treja vendeve në Bruksel gjatë ditëve në vazhdim.

Zoti Stoltenberg mirëpriti paketën e re të ndihmave ushtarake për Ukrainën që njoftoi Presidenti Biden sot në mëngjes dhe falenderoi Shtetet e Bashkuara për rritjen e pranisë ushtarake në mbarë Evropën, me mbi 100 mijë forca të dislokuara, të mbështetura nga njësi ajrore dhe detare. Ai tha se e vetmja mënyrë për të shmangur përshkallëzimin është që Rusia të ndalë agresionin dhe luftën që filloi në Ukrainë, ndërsa dënoi retorikën kërcënuese nga Rusia për përdorimin e armëve bërthamore.

voa

Presidenti Joe Biden njoftoi se SHBA-të kanë vendosur t’i sigurojnë Ukrainës “sisteme raketash me teknologji më të përparuar.

Duke shpallur paketën e re të ndihmës për sigurinë Presidenti Biden tha se fondi shtesë për Ukrainën, miratuar me mbështetjen dërrmuese dypartiake në Kongres, do t’i ofrojë këtij vendi më shumë nga armë që po përdoren në mënyrë efektive për të zmbrapsur sulmet ruse.

“Ne do të vazhdojmë të udhëheqim botën në ofrimin e ndihmës historike për të mbështetur luftën e Ukrainës për liri“, thuhej në deklaratën e shpërndarë nga Shtëpia e Bardhë.

Vendimi për të dërguar armë më të avancuara pason hezitimin e mëhershëm të administratës Biden. Vetë Presidenti tha të hënën se Shtetet e Bashkuara nuk do të dërgojnë raketa që mund ta godasin Rusinë.

Aministrata e Presidentit Joe Biden do të dërgojë në Ukrainë një numër të vogël raketash të përparuara me rreze të mesme veprimi.

Kjo është një armë jetike dhe e shumëkërkuar nga udhëheqësit ukrainas, të cilët po mundohen të pengojnë përparimin e forcave ruse në rajonin e Donbasit.

Zyrtarët amerikanë thanë se plani është që në Ukrainë të dërgohet artileri e lëvizshme, një sistem që montohet në kamionë dhe që mund të mbajë deri në gjashtë raketa.

Raketat me rreze të mesme veprimi mund të godasin objektiva në një distancë prej 70 kilometrash dhe forcat ukrainase kanë premtuar që nuk do të godasin objektiva në territorin e Rusisë, sipas zyrtarëve amerikanë.

Por, ky sistem mundëson edhe lëshimin e një rakete me rreze më të gjatë veprimi, deri në 300 kilometra, por që nuk është planifikuar për t’iu dhënë Ukrainës për këtë moment.

Sistemet e raketave janë pjesë e një pakete të re ndihmash prej 700 milionë dollarësh nga Shtetet e Bashkuara për Ukrainën, që do të përfshijë helikopterë, armë antitank Javelin, automjete taktike, pjesë këmbimi dhe të tjera, thanë të martën zyrtarët.

Vendimi për të ndihmuar Ukrainën me sistemin e rakateve është përpjekje për të balancuar dëshirën për të ndihmuar Kievin, por duke mos ofruar armë me të cilat Kievi mund të sulmojë objektiva në territorin rus, gjë që mund të shkaktonte një luftë më të gjerë.

Presidenti Biden tha të hënën se Shtetet e Bashkuara nuk do të dërgojnë në Ukrainë sisteme rakteash me të cilat mund të sulmohet Rusia.

Ndërkohë, Kancelari gjerman Olaf Scholz tha sot se Gjermania do ta furnizojë Ukrainën me sisteme moderne raketash anti-ajrore dhe radarë.

Njoftimi se Gjermania po planifikon rritjen e dërgesave ushtarake vjen pas kritikave se ky vend nuk po bpënte sa duhet për të ndihmuar Ukrainën.

Zoti Scholz u tha ligjvënësve se Ukraina do të furnizohej me raketa IRIS-T, të zhvilluara nga Gjermania së bashku me vende tjera të NATO-s.

“Ky është sistemi më modern i mbrojtjes ajrore që Gjermania ka. Ai do t’i mundësojë Ukrainës të mbrojë një qytet të tërë nga sulmet ajrore ruse”, tha zoti Scholz.

Ai shtoi se Gjermania gjithashtu do të furnizojë Ukrainën me sisteme radari, për të ndihmuar atë në gjetjen e artilerisë së armikut.

Njoftimi vjen ndërsa forcat ukrainase vazhdojnë betejën e vështirë për rajonin industrial lindor të Donbasit.

voa

Në një debat konfrontues mes qeverisë e opozitës në Bundestag, kancelari gjerman Scholz bëri të ditur dërgimin e armëve të tjera në Ukrainë dhe u mbrojt nga akuzat se nuk po vepron sa duhet në mbështetje të Ukrainës.

Gjermania do t’i japë Ukrainës sistemin mbrojtës ajror më modern që ka. Me këtë Ukraina do të jetë në gjendje “të mbrojë një qytet të tërë të madh nga sulmet ajore”, tha kancelari, Olaf Scholz në Bundestag të mërkurën, (01.06). Përveç kësaj Ukraina do të marrë edhe një radar identifikimi për të zbuluar tanke, artileri, raketa armiqësore. Me këto njoftime Scholz u mbrojt në Bundestag kundër akuzës, se po reagon me hezitim, me vonesë dhe se është në pritje pa zbatuar vendimin e parlamentit për t’i dërguar armë të rënda Ukrainës.

Akuzat nuk qëndrojnë, tha Scholz, i cili në fjalimin energjik gjysmëorësh para Bundestagut  bëri një listë të asaj që Gjermania ka ofruar deri tani. Ndër të tjera armë antitank, raketa mbrojtëse ajrore, më shumë se 15 milionë municion, 100.000 granata dore, më shumë se 5000 mina antitank, si edhe shumë lëndë shpërthyese, dhe mjaft kamionë me materiale ushtarake.

Ushtarët ukrainas “gati para përfundimit të trajnimit”

Për 50 tanket kundërajrore të tipit “Gepard” qëndron në dispozicion municion për 1200 veprime ushtarake. Kurse për tanket “Marder” është vendosur këmbimi unazë. Edhe me Greqinë ka marrëveshje përkatëse. Së bashku me Danimarkën janë dorëzuar 54 transportues të blinduar trupash, dhe përmes një këmbimi të parë unazë me Çekinë, Ukraina merr 20 tanke luftarake të tipit sovjetik T-72, që mund të përdoren nga ushtarët. Edhe me Greqinë është rënë në ujdi që ky vend të ofrojë tanke mbrojtëse, dhe Gjermania do të mbushë rezervat greke.

Gjermania së bashku me Holandën në javët e ardhshme do të dorëzojë 12 makineri të blinduar artilerie dhe artileri moderne me një rreze 40 km. Brenda pak ditësh merr fund edhe trajnimi i ushtarëve ukrainas në Gjermani. Përtej kësaj Bundeswehri ka marrë me avionë edhe 168 ushtarë të plagosur ukrainas për t’i trajtuar në Gjermani. Qeveria gjermane ka marrë madje një “vendim të guximshëm” duke thyer traditën e mosdërgimit të armëve në zona luftimesh, tha Scholz, dhe bëri të ditur, se Gjermania do të mbështesë në koordinim me SHBA furnizimin e Ukrainës me artileri moderne raketore. Scholz theksoi, se është i mendimit si presidenti Biden, se Ukraina me këto armë në asnjë rast nuk duhet të sulmojë territorin rus.

“Zemërim” për rolin e Gjermanisë

Kancelari gjerman i përmendi dërgesat e armëve në kuadër të javës së debatit për buxhetin gjerman. Pesë ditë me radhë parlamenti diskuton për buxhetin vjetor, dhe e mërkura tradicionalisht është dita e debatit të përgjithshëm, ku e marrin fjalët kreu i qeverisë dhe krerët e grupeve parlamentare. Më parë Friedrich Merz, kreu i grupit parlamentar në opozitë, CDU/CSU e kritikoi Scholz, se nuk po e mbështet sa duhet Ukrainën. Nëse dëgjon se ç’ thuhet në BE, atëhere gjen vetëm zhgënjim dhe “zemërim të vërtetë” për rolin e Gjermanisë. “Në kohët e fundit ju flisni më shumë se më parë, por si edhe më parë nuk thoni asgjë”, iu drejtua Merz kancelarit. Scholz formulon, se Rusia nuk duhet ta fitojë këtë luftë, në vend që të thotë “Ukraina duhet ta fitojë këtë luftë”.

Scholz mbrohet

Në parlament Merz u shpreh me zemërim, se kancelari telefonon me presidentin Putin, por nuk gjen asnjë orar për bisedime me presidentin e parlamentit ukrainas, që vjen këtë javë në Berlin. Kancelari e ndoqi fjalimin e kreut të opozitës pa asnjë reagim, por kur doli në foltoren e parlamentit, ishte shumë më ofensiv dhe energjik se më parë. Në vend të lexonte fjalimin e përgatitur, kancelari u mbrojt me vendosmëri. Më thoni ju armë të tjera të rënda që nuk janë “Marder” apo “Haubitzen”, iu drejtua kancelari kreut të opozitës Friedrich Merz. “Çfarë thoni ju, janë fjalë të lëshuara kot në ajër.”

dw

Gazprom po shkurton furnizimet me gaz pët një numër në rritje shtetesh evropiane. Sipas tij, ai ka ndaluar furnizimin edhe për Danimarkën.

Rusia ka ndaluar furnizimin me gaz të Danimarkës. Kompania më e madhe e energjisë në Danimarkë, Ørsted, tha se arsyeja ishte se ajo refuzoi të paguante për gazin në rubla. Edhe pse dërgesat janë ndërprerë, kompania pritet të jetë në gjendje të vazhdojë të furnizojë klientët e saj. “Ne i qëndrojmë me vendosmëri refuzimit tonë për të paguar në rubla,” tha shefi ekzekutiv i Ørsted-it, Mads Nipper.

Rusia ka ndërprerë tashmë furnizimin me gaz natyror edhe për Finlandën, Poloninë dhe Bullgarinë, pasi këto vende kanë refuzuar të paguajnë në rubla. Të martën, Rusia ndaloi furnizimet me gaz edhe për Holandën. Sipas Nipperit, ky zhvillim tregon qartë se BE duhet të bëhet i pavarur nga gazi rus dhe se nevojitet më shumë energji e rinovueshme. Meqenëse nuk ka tubacion të drejtpërdrejtë gazi nga Rusia në Danimarkë, qeveria ruse nuk mund të ndërpresë drejtpërdrejt furnizimin me danezët, theksoi Ørstedi. Danimarka tani duhet të blejë më shumë gaz nga tregu evropian, shtoi ai.

Qeveria gjermane: siguria e furnizimit me gaz është e garantuar

Siguria e furnizimit me gaz në Gjermani mbetet e garantuar, tha një zëdhënëse e Ministrisë Federale të Ekonomisë në Berlin. Ajo reagoi me këtë deklaratë ndaj ndërprerjeve të fundit të furnizimit me gaz prej Gazpromit në Danimarkë dhe Holandë, për shembull.

Zëdhënësja nënvizoi se qeveria federale po i ndjek me shumë vëmendje zhvillimet e situatës. Lidhur me të ardhmen e rafinerisë Schwedt, ajo tha se po hartohet një zgjidhje. Synimi është që kjo rafineri të funksionojë deri në fund të vitit edhe pa naftën ruse.

Ndalimi i furnizimeve – një vendim i vështirë për t’u riparuar

Pikëpyetja e madhe është nëse Rusia do ta marrë seriozisht dhe do të mbyllë rubinetin edhe për Gjermaninë.

Sipas Jens Südekum-it, anëtar i Bordit Këshillimor Shkencor të Ministrisë Gjermane të Ekonomisë, ky do të ishte një hap i pakthyeshëm. Sepse sapo zbrazen tubacionet e gazit, një pjesë e infrastrukturës dëmtohet dhe nuk mund të ripërdoret.

Megjithatë, eksperti i ekonomisë mendon se Putini do ta ndërmarrë këtë hap përpara se të ndalojë importi i planifikuar i Gjermanisë në mesin e vitit 2024. Deri atëherë, qeveria gjermane planifikon të jetë e pavarur nga gazi rus. “A do të presë Putini kaq gjatë dhe t’i japë Gjermanisë lamtumirën që ka vendosur vetë ai? Më shumë gjasa ka që ai të veprojë më parë dhe të na mbyllë rubinetin,” vuri në dukje anëtari i Këshillit Shkencor të Ministrisë Federale të Ekonomisë. Kështu, Putini mund të mbillte sërish kaos në industrinë gjermane, përpara se ta mbyllte këtë biznes.

dw