Grupi i vendeve më të zhvilluara në botë, G7 i ka vënë Rusisë sanksione të reja. Por edhe me këtë rast pati diskutime kontradiktore dhe kompromise.

Shtëpia e Bardhë ka kumtuar se në samitin e vendeve ekonomikisht më të zhvilluara në botë G7, do të vendosen sanksione të reja kundër Rusisë, për shkak të agresionit ndaj Ukrainës. Këto burime thonë se sanksionet e reja do të përfshijnë ndër të tjera edhe fushën e prodhimeve ushtarake dhe furnizimin e Rusisë. Qëllimi është që Rusisë t’i pamundësohet qasja tek teknologjia e re ushtarake. Është vendosur po ashtu që të shtohen doganat ndaj prodhimeve ruse dhe që këto të ardhura të ndahen për të ndihmuar Ukrainën, thuhet në kornizat e samitit.

Gjatë ditës do të vendoset edhe për masa të tjera ndëshkuese dhe për sanksione të tjera ndaj Rusisë. Më së shumti debate ka pasur këto dy ditë rreth ndalimit të importit të arit nga Rusia. SHBA e kanë mbështetur këtë propozim, por jo edhe disa vende të tjera. Në grupin G7 bëjnë pjesë SHBA, Gjermania, Franca, Kanadaja, Britania e Madhe, Japonia dhe Italia. Ndërsa në samit janë edhe përfaqësuesit e Bashkimit Evropian.

Scholz: Po kërkohet zgjidhje për transportin e grurit

Kancelari gjerman, Olaf Scholz tha se ata po ndërmarrin të gjitha masat e mundshme për të gjetur një zgjidhje për transportin e drithërave ukrainase, të cilat kanë mbetur të bllokuara. “Jemi duke biseduar ditë e natë, për të gjetur një zgjidhje”, tha Scholz. Shumë vende po kërcënohen nga uria ndërsa Rusia po e përdor edhe grurin si armë. G7 po përpiqet të gjejë zgjidhje për të zbutur problemet me urinë në disa vende të rrezikuara, sepse Rusia dhe Ukraina eksportojnë një të tretën e drithërave të nevojshme në treg. Organizata Botërore e Ushqimeve bën të ditur se rreth 50 milionë njerëz të tjerë po kërcënohen drejtpërdrejt nga uria. Në këtë samit janë inkuadruar edhe krerët e disa vendeve të mëdha në botë, si India dhe Indonezia, por edhe Afrika e Jugut, Senegali dhe Argjentina, si dhe sekretari i përgjithshëm i OKB-së, Antonio Guterres. Megjithatë më së shumti vëmendje ka zgjuar inkuadrimi me video në samit i presidentit të Ukrainës Volodymyr Zelenskyj.

Tema kryesore – lufta në Ukrainë

Presidenti Zelenskyj ka kërkuar prej vendeve të G7-ës që të zgjerojnë ndihmat dhe t’i dërgojnë vendit të tij armë të tjera, me të cilat do të mundësohej mbrojtja nga sulmet brutale të Rusisë. Në një mesazh përmes videos ai tha se Ukraina ka nevojë për sisteme të mbrojtjes kundërajrore, për t’u mbrojtur nga sulmet e intensifikuara ruse. Njëkohësisht Zelenskyj kërkoi nga shtatë vendet më të zhvilluara ekonomike që të shtojnë presionin dhe sanksionet kundër Rusisë. Po ashtu kërkoi që të ndihmojnë Ukrainën në eksportin e drithërave të bllokuara, sepse kjo i siguron këtij vendi të ardhura të tjera financiare, të domosdoshme për mbrojtjen dhe rindërtimin e vendit.

Temat e tjera

Në ditën e dytë të takimit po trajtohen edhe tema të tjera me interes global: Klima, energjia dhe shëndetësia. Në këtë kontekst janë të mirëseardhura edhe kontributet e vendeve të tjera që janë ftuar si pjesëmarrëse mysafire: Indonezia, Afrika e Jugut, India, Senegali dhe Argjentina.

Në samit debatohen edhe partneritetet e qëndrueshme në politikë dhe energji. Kancelari Scholz synon krijimin e një klubi ndërkombëtar për ruajtjen e klimës, i cili do të kishte në thelb vendet e G7. Scholz tha se politika ndërkombëtare e klimës duhet të koordinohet më ngushtë.

dw

Rusia nisi sulme të reja me raketa të dielën ndaj dy qyteteve më të mëdha të Ukrainës, kryeqytetit të vendit, Kievit dhe Kharkivit. Sulmi vjen ndërsa udhëheqësit e Grupit të Shtatëshes, u mblodhën për bisedime për të përcaktuar mënyra të reja për të izoluar Moskën.

Kryetari i Bashkisë së Kievit, Vitali Klitschko, tha se disa shpërthime tronditën pjesën perëndimore të qytetit dhe se u goditën të paktën dy ndërtesa banimi. Sipas zyrës së Prokurorit të Përgjithshëm informacionet paraprake tregojnë se një person ka humbur jetën dhe katër të tjerë janë plagosur, të cilët u shtruan në spital. Kryebashkiaku tha se një vajzë 7-vjeçare ishte nxjerrë e gjallë nga rrënojat e një godine.

Duke iu referuar të dhënave paraprake një ligjvënës ukrainas, tha se Rusia kishte lëshuar 14 raketa kundër Kievit.

Sulmi në kryeqytetin e Ukrainës u krye pas tërheqjes së trupave ukrainase nga qyteti lindor i Sievierodonetskut, një fitore e madhe për Rusinë pas disa javë luftimesh të ashpra.

Ndërkohë, Rusia nisi sulme me raketa anembanë Ukrainës të shtunën. Sulmet u raportua të jenë kryer nga hapësira ajrore bjelloruse, vetëm disa orë përpara se presidenti rus Vladimir Putin të takohej me presidentin bjellorus, Aleksandr Lukashenko në Shën Petersburg të Rusisë.

Presidenti ukrainas Volodymir Zelenskyy tha në fjalimin e tij të përditshëm të shtunën se “Ukraina ka nevojë për më shumë armë dhe se sistemet e mbrojtjes ajrore, sistemet moderne që kanë partnerët tanë, nuk duhet të jenë në zonat e trajnimit apo objektet e magazinimit, por në Ukrainë, ku ato nevojiten tani, nevojiten më shumë se kudo tjetër në botë”.

Ukraina tha se forcat ruse kanë pushtuar plotësisht Lysychanskun, një qytet fqinj i Sievierodonetskut, në rajonin lindor të Luhanskut. Moska pretendon se ka rrethuar rreth 2,000 trupa ukrainase në zonë.

Përparimet ruse duket se e sollën Kremlinin me afër vendosjes së kontrollit të plotë të provincës Luhansk, një nga objektivat e deklaruara të luftës së Moskës.

Një zyrtar i lartë amerikan i mbrojtjes vlerësoi të premten vendimin e Ukrainës për t’u tërhequr nga Sievierodonetsku, duke e përshkruar veprimin si “profesional” dhe “taktik”.

“Ajo që po bëjnë është ta vënë veten në një pozicion ku mund të mbrohen më mirë”, u tha zyrtari gazetarëve në kushte anonimiteti.

Dhe ndërsa tha se forcat ruse arritën përparime rreth Sievierodonetskut, zyrat theksoi se përparimi pati kosto të konsiderueshme.

“Rusët kanë pësuar humbje të rënda në njerëz dhe në pajisje”, tha zyrtari. “Forcat ruse po tregojnë shenja të molisjes dhe moralit të rënë dhe kjo po ndikon në aftësinë e tyre për të ecur përpara me shpejtësi”.

voa

Gjermania po përpiqet të mbushë depozitat e gazit që kur Rusia filloi të kufizojë furnizimin e saj.

Zgjidhjet e mundshme përfshijnë rritjen e përdorimit të qymyrit për energjinë dhe stimujt për të reduktuar konsumin.

Ministri gjerman i Ekonomisë Robert Habeck e përshkroi së fundmi politikën e tij aktuale të energjisë si “një lloj përballjeje” me presidentin rus Vladimir Putin.

Kjo e fundit mund të ketë përparësi për momentin, tha ai të dielën, por kjo nuk do të thotë se “ne nuk mund të avancojmë me përpjekje”.

Habecku, anëtar i partisë ambientaliste të Të Gjelbërve, përballet me një skenar makthi. Me uljen e furnizimit me gaz nga Rusia si hakmarrje ndaj sanksioneve perëndimore të vendosura pas pushtimit të Ukrainës nga Moska, siguria energjetike gjermane përballet me paqartësi.

Berlini po përpiqet të mbushë depozitat gjermane të gazit në 80% të kapaciteteve deri më 1 tetor dhe 90% deri në nëntor, për të përmbushur kërkesën për gaz për muajt e ftohtë të dimrit. Aktualisht, rezervat e gazit janë të mbushura vetëm 57% të tyre.  “Përpjekja” të cilës i referohet zoti Habeck tani nënkupton kursimin e gazit kudo që është e mundur, duke përfshirë atë që përdoret për të prodhuar energji elektrike.

Si pjesë e luftës së gazit midis Gjermanisë dhe Rusisë, Robert Habeck shpërndau pilula të hidhura për të Gjelbrit e tij.

Energjia elektrike e prodhuar nga qymyri dhe linjiti

Energjia elektrike e prodhuar nga gazi përbën rreth 16% të prodhimit të përgjithshëm të energjisë elektrike në Gjermani. Energjitë e rinovueshme, veçanërisht nga era dhe dielli, përfaqësojnë rreth 42% të prodhimit aktual, por është e pamundur që ato të rriten shpejt. Një alternativë e mundshme mund të jenë termocentralet ekzistuese me qymyr, nga të cilët rreth 151 janë ende duke funksionuar në vend, pavarësisht nga plani i qeverisë për t’i mbyllur ato deri në vitin 2038.

Përpara se Rusia të fillonte pushtimin e Ukrainës në fund të shkurtit, partitë anëtare të koalicionit qeveritar, socialdemokratët e qendrës së majtë, Të Gjelbrit dhe liberalët madje vendosën që ta afrojnë braktisjen e qymyrit, me “synim ideal” në vitin 2030. Edhe pse tani është planifikuar të përdoret më shumë qymyr në plan afatshkurtër, Habecku dëshiron t’u përmbahet të dyja objektivave.

Një projektligj që ofron bazën ligjore për konsumin më të madh të qymyrit për prodhimin e energjisë elektrike është në pritje në Bundestag, me qëllim rritjen e prodhimit nga të ashtuquajturat termocentrale rezervë, të cilët përdoren në mënyrë të parregullt për stabilizimin e rrjetit dhe që do të çmontoheshin gjatë viteve të ardhshme.

Veç kësaj, termocentralet që janë prekur si pjesë e planit të mbylljes, por janë ende teknikisht funksionale, do të kthehen në shërbim. Këto të ashtuquajtura termocentrale si mjet i fundit, në përgjithësi djegin linjit, i cili është më ndotës, që vjen nga minierat në Gjermaninë Lindore.

Ringjallja e qymyrit është vetëm e përkohshme

Kerstin Andreae, drejtor i Shoqatës Gjermane të Industrive të Energjisë dhe Ujit, i tha transmetuesit publik gjerman ARD të hënën se termocentralet rezervë me linjit mund të rikthehen në funksionim “në një kohë relativisht të shkurtër”. Kjo mund të bëhet edhe me termocentralet që përdorin qymyrguri për të prodhuar energji elektrike, por në këtë rasti ai do të duhet të importohet nga jashtë.

Gjermania mbylli minierën e saj të fundit të qymyrgurit në vitin 2018 dhe që atëherë është varur nga Rusia për gjysmën e nevojave të saj për qymyrgur. “Qymyri rus mund të zëvendësohet plotësisht nga vende të tjera brenda disa muajsh. Në veçanti nga Shtetet e Bashkuara, Kolumbia dhe Afrika e Jugut,” tha Alexander Bethe, kryetar i bordit të drejtorëve të Shoqatës së importuesve të qymyrit, në një deklaratë për shtyp.

Me parlamentin që do të votojë për projektligjin e qymyrit deri në 8 korrik, qeveria e ka bërë të qartë se ringjallja e karburanteve fosile të Gjermanisë do të zgjasë vetëm deri në mars 2024. Deri atëherë, Berlini dëshiron që furnizimet me gaz rus të reduktohen në rreth 10%, nga 55% para luftës dhe 35% tani.

Pas marrjes së Gazprom Germania, ish-pronarët e tij rusë ngadalësuan furnizimin e qendrës së magazinimit Rehden.

Jo rikthim te energjia bërthamore

Një zgjidhje tjetër do të ishte energjia bërthamore, por përdorimi i kësaj energjie më miqësore me klimën është përjashtuar nga autoritetet qeveritare dhe operatorët bërthamorë. Gjermania po përgatitet të mbyllë tre termocentralet e mbetura bërthamore deri në fund të vitit dhe Markus Krebber, drejtori i kompanisë energjetike RWE, ka thënë se nuk do të ketë kthim në këtë formë të energjisë.

Kursimi i gazit me ankande industriale

Habecku tha se ringjallja e qymyrit ishte një vendim “i hidhur”, por ai shtoi se ishte “thjesht e nevojshme në këtë situatë të reduktohej konsumi i gazit”. Një nga mënyrat se si shpreson ta arrijë këtë Berlini është të reduktojë përdorimin e gazit nëpërmjet një modeli të ri të ankandit të gazit të bazuar në treg. Ai i ofron stimuj industrisë për të reduktuar konsumin dhe për të devijuar furnizimin e panevojshëm të gazit në magazinimin afatgjatë.

Këto masa të reja vijnë në mes të përpjekjeve të shtuara të Gjermanisë për të blerë gaz natyror të lëngshëm (LNG) në tregun global – një treg gjithnjë e më i mbushur, pasi vendet e tjera gjithashtu duan të reduktojnë varësinë e tyre në lidhje me Rusinë. Për këtë, Gjermania planifikon të përdorë impiante të rigazifikimit lundrues, pasi nuk ka asnjë nga objektet e nevojshme për të importuar LNG.

Përveç kësaj, qeveria ka nisur një fushatë publike të diskutueshme për të kursyer gazin, duke u kërkuar gjermanëve që të reduktojnë ngrohjen e tyre në muajt e ardhshëm dhe të bëjnë dush me ujë të vakët.

Duket se ministri i Ekonomisë i Gjermanisë ka disa ide se si të forcojë muskujt e vendit të tij për përballjen me Putinin. Megjithatë, Rusia nuk e ka përdorur ende plotësisht fuqinë e saj, pasi gazi vazhdon të rrjedhë në tubacione, megjithëse jo në sasitë e zakonshme deri tani.

dw

Në kuadër të luftës në Ukrainë, Gjermania e ka furnizuar këtë vend me armatime të ndryshme. Pas SHBA edhe Gjermania ka publikuar sot listën e armëve të dërguara dhe që do të dërgojë në Ukrainë

Qeveria gjermane ka publikuar për herë të parë një listë të dërgesave të armëve në Ukrainë.

Në të pasqyrohen të gjitha armët dhe pajisjet ushtarake që tashmë i janë dorëzuar Ukrainës dhe janë planifikuar për dorëzim.

Sipas informacioneve, bëhet fjalë për armë nga stoqet e Forcave të Armatosura Gjermane dhe dërgesa nga industria gjermane e armatimeve. Lista përditësohet rregullisht.

Zëdhënësi i qeverisë, Steffen Hebestreit tha në Berlin se me këtë publikim, Gjermania ndjek praktikën e aleatëve më të afërt, siç janë Shtetet e Bashkuara të Amerikës.

Ndër armët e dorëzuara deri tani janë 3000 predha topash të lehtë kundërtank, 100.000 granata dore, 500 raketa kundërajrore Stinger, 100 mitralozë dhe 16 milionë fishekë. Përveç kësaj, ka shumë pajisje si 23.000 helmeta luftarake, 14.900 mina antitank, mjete motorike, 1.200 shtretër spitalorë  dhe katër pajisje elektronike anti-dronë dhe një spital fushor.

Pothuajse katër muaj pas fillimit të luftës, nga Gjermania mbërriti në Ukrainë edhe artileria e parë e rëndë,sipas burimeve ukrainase. Ambasadori ukrainas Andrij Melnyk konfirmoi për agjencinë gjermane të shtypit se armët moderne kanë mbërritur në Ukrainë.

Ukraina raportoi se ndërkohë kishte marrë obusët vetëlëvizës 2000. “Më në fund obusi 155 milimetrash është pjesë e arsenalit të  të artilerisë ukrainase”, shkroi të martën në Twitter ministri ukrainas i Mbrojtjes Oleksij Resnikow. Ai falënderoi Ministren e Mbrojtjes Christine Lambrecht (SPD) “për të gjitha përpjekjet” e bëra për të mbështetur Ukrainën.

Qeveria gjermane ka në plan ta furnizojë Ukrainën, ndër të tjera edhe me 30 tanke anti-ajrore Gepard dhe një sistem të mbrojtjes ajrore Iris-T SLM si dhe tre raketahedhës të shumëfishtë.

dpa, dlf