Koha duket se është në anën e nënpresidentes amerikane Kamala Harris të hënën, pasi një numër i madh ligjvënësish demokratë, guvernatorësh dhe dhuruesish financiarë shprehën mbështetjen e tyre që ajo të jetë kandidatja presidenciale e partisë në zgjedhjet e nëntorit, pasi presidenti Joe Biden shpalli të dielën vendimin për t’u tërhequr nga gara.

Presidenti Biden pak pas njoftimit të befasishëm të dielën, i shprehu mbështetjen zonjës Harris si kandidate të partisë për t’u përballur me ish presidentin Donald Trump, kandidatin e Partisë Republikane.

Zonja Harris, e cila është 59 vjeçe, njoftoi shpejt se do të kërkonte emërimin. Ajo ishte senatore nga shteti më i populluar i vendit, Kalifornia, kur zoti Biden e zgjodhi në 2020 si kandidate për postin e nënpresidentes.

Vlerësimet rreth saj në anketat kombëtare kanë pasqyruar në masë të madhe ato për presidentin, por disa anketa të votuesve të mundshëm tregojnë se zonja Harris qëndron pak më mirë se zoti Biden përballë zotit Trump dhe në disa, ajo ka dalë përpara ish presidentit Trump.

Zonja Harris tha në një deklaratë se presidenti Biden, duke u tërhequr nga gara kundër zotit Trump, “po bën atë që ka bërë gjatë gjithë jetës së tij, duke vënë popullin amerikan dhe vendin tonë mbi çdo gjë tjetër”.

“Unë do të bëj gjithçka që është në dorën time për të bashkuar Partinë Demokratike dhe për të bashkuar kombin tonë, për të mposhtur Donald Trumpin”, tha ajo. “Kemi 107 ditë deri në ditën e zgjedhjeve. Së bashku, ne do të luftojmë. Dhe së bashku do të fitojmë”.

ActBlue, platforma kryesore e demokratëve për mbledhjen e fondeve, tha të dielën vonë se kishte mbledhur 46.7 milionë dollarë në donacione të vogla për fushatën e zonjës Harris vetëm gjatë ditës së djeshme. Kjo e dhënë paraqet një ndryshim të madh krahasuar me javët e zbehjes së mbështetjes për zotin Biden, veçanërisht midis dhuruesve kryesorë, pas paraqitjes së tij në një debat në fund të qershorit përballë zotit Trump.

Shumë zyrtarë ta lartë demokrat mbështetën zonjën Harris, përfshirë të paktën një anëtar të kabinetit të zotit Biden, Sekretarin e Transportit Pete Buttigieg, i cili tha se do të bënte “gjithçka që mundem” për të ndihmuar zgjedhjen e saj.

Nëse zonja Harris zgjidhet nga partia për të zëvendësuar zotin Biden, ajo do të ishte gruaja e parë i dhe gruaja e parë afrikano-amerikane dhe me origjinë nga Azia Jugore si kandidate presidenciale në historinë 248-vjeçare të Shteteve të Bashkuara.

Njoftimi i zotit Biden të dielën pasoi shtimin e thirrje brenda Partisë Demokratike që i kërkonin atij të “kalojë pishtarin” tek dikush tjetër, mes rënies së numrave në anketat kombëtare dhe shqetësimeve të ngritura pas paraqitjes së tij në debat me zotin Trump. Gjatë atij debati, presidenti 81-vjeçar shpesh dukej se humbiste fillin e mendimit, nuk arriti t’i kundërvihej me forcë 78 vjeçarit Donald Trump ose të mbronte mandatin e tij në Shtëpinë e Bardhë.

Biden ngulmoi, duke theksuar se nuk do të hiqte dorë nga gara përveç nëse “Zoti i Plotfuqishëm” nuk e kërkonte një gjë të tillë, ose nëse do t’i tregoheshin numrat e anketave që tregojnë se nuk mund ta mposhtë Trumpin për herë të dytë ose nëse do të këshillohej nga mjekët e tij se nuk ishte fizikisht në gjendje të vazhdojë garën.

“Besoj se është në interesin më të mirë të partisë sime dhe të vendit që unë të tërhiqem dhe të përqendrohem vetëm në përmbushjen e detyrave të mia si president për pjesën e mbetur të mandatit tim”, tha ai në një deklaratë të dielën. Mandati i tij përfundon në muajin janar.

Presidenti Biden tha se planifikon t’i drejtohet kombit lidhur me vendimin e tij, më vonë gjatë javës.

Ish presidenti Trump reagoi ndaj njoftimit duke sulmuar zotin Biden dhe zonjën Harris. Në një postim në median e tij Truth Social, ai tha se presidenti Biden “nuk është i përshtatshëm për të kandiduar për president dhe sigurisht që nuk është i përshtatshëm për të shërbyer (në këtë detyrë)”. Ai tha se zonja Harris është edhe më keq se zoti Biden.

“Harris do të jetë më e lehtë për t’u mposhtur sesa do të kishte qenë Joe Biden”, tha ish presidenti Trump për rrjetin CNN.

Shumë republikanë reaguan duke kërkuar që zoti Biden të jap dorëheqjen si president.

Kryetari i Dhomës së Përfaqësuesve, Mike Johnson, i cili është i dyti në linjën e pasuesve presidenciale pas zonjës Harris, i bëri thirrje presidentit Biden të japë dorëheqjen, duke pretenduar që nëse ai nuk është i përshtatshëm për të mbajtur gjallë kandidaturën e tij për një mandat tjetër katërvjeçar, nuk është gjithashtu i përshtatshëm për të qëndruar si president deri më 20 janar.

Nëse zoti Biden do të jepte dorëheqjen, zonja Harris do të betohej menjëherë si presidente, të paktën deri në inaugurimin e fituesit të zgjedhjeve të nëntorit.

Emra të demokratëve të tjerë të shquar janë përmendur si kandidatë të mundshëm përveç zonjës Harris, duke përfshirë disa guvernatorë shtetesh si Gretchen Whitmer nga Miçigani, Josh Shapiro nga Pensilvania, J.B. Pritzker nga Illinoisi dhe Gavin Newsom nga Kalifornia. Josh Shapiro dhe Gavin Newsom mbështetën zonjën Harris të dielën.

Ish presidenti Bill Clinton dhe zonja Hillary Clinton, e cila shërbeu si Sekretare e Shtetit në administratën e presidentit Barack Obama, mbështetën zonjën Harris në një deklaratë. Ish presidenti Obama, me të cilin zotin Biden shërbeu si nënpresident për tetë vjet, falënderoi zotin Biden për patriotizmin e tij, por nuk tregoi nëse ai do mbështeste zonjën Harris ose ndonjë pretendent tjetër të mundshëm.

Raportet e mediave në orët e para pas tërheqjes së zotit Biden, cituan burime të afërta me senatorin Joe Manchin nga Virxhinia Perëndimore, tani një i pavarur, duke thënë se ai po shqyrtonte ribashkimin me Partinë Demokratike në përpjekje për të zëvendësuar presidentin si kandidat i partisë.

Ka dy mënyra se si demokratët mund ta zëvendësojnë zotin Biden.

Njëra do të ishte një votim virtual i delegatëve të Kuvendit Kombëtar Demokratike, që do të përcaktonte një kandidat të ri në fillim të gushtit. Shanset janë që ky proces do të favorizonte zonjën Harris, për të shmangur konfliktin në Kuvendin që mbahet në Çikago nga 19 deri më 22 gusht.

Mënyra tjetër se si demokratët mund të zgjidhnin një kandidat të ri do të ishte një kuvend “i hapur” në të cilën disa kandidatë, përfshirë zonjën Harris, do të kërkonin emërimin presidencial, një skenar që partia nuk e ka përjetuar që nga viti 1968, kur presidenti Lyndon Johnson hoqi dorë nga planet e tij për të kandiduar përballë kundërshtimit të gjerë ndaj trajtimit të tij të luftës së Amerikës kundër Vietnamit të Veriut.

Disa demokratë po propozojnë që partia të mbajë shpejt një palë “mini zgjedhje paraprake” për të mundësuar që zonja Harris dhe kushdo tjetër, të konkurrojnë hapur.

*Disa pjesë të këtij artikulli u morën nga agjencitë e lajmeve Associated Press dhe Reuters.

Pas tërheqjes së Joe Biden nga gara për president, shtrohet pyetja se kë do të zgjedhin demokratët për të kandiduar kundër Trumpit.

Pasi presidenti amerikan Biden njoftoi tërheqjen e tij nga fushata zgjedhore, demokratët duhet caktojnë një kandidat tjetër për t’u futur në garë dhe për t’u përballur me Trumpin në muajin nëntor. Gjasat më të shumta i ka Kamala Harris, por ka alternativa të tjera.

Kamala Harris

59-vjeçarja, personi i dytë në hierarki pas Bidenit, është zgjedhja më e mundshme si kandidaturë e demokratëve. Në vitin 2020 ajo hyri në histori si gruaja e parë, personi i parë me ngjyrë dhe personi i parë me origjinë indiane që merr postin e zëvendëspresidentit amerikan.

Por gjatë qëndrimit të saj në Shtëpinë e Bardhë, Harris e ka pasur të vështirë të zerë vend si udhëheqëse politike e pavarur nga Bideni. Në ditët e hershme të administratës së Bidenit, ajo u ngarkua me drejtimin e përgjigjes që Amerika i jep migracionit masiv që vjen nga Amerika Latine.

Ajo dështoi krejtësisht në uljen e migracionit dhe fushata zgjedhore e Trumpit është duke e përdorur këtë gjë kundër saj.

Që nga viti 2023 Harris ka qenë duke krijuar profilin e saj si zë për të drejtat e riprodhimit, madje duke u kthyer në zëvendëspresidentin e parë në histori që viziton një klinikë aborti, vizitë që e zhvilloi marsin e këtij viti. Identiteti i saj gjinor dhe trashëgimia mund ta ndihmojë të sigurojë më shumë mbështetje nga votuesit femra, me ngjyrë, dhe nga Azia Juglindore. Në të njëjtën kohë, karriera e saj si prokurore në Kaliforni e bën atë të jetë e hapur ndaj sulmeve që vijnë nga një pjesë e të majtës, akuza që mund të përmblidhen më mirë nën slloganin “Kamala është një police”, akuza që e ndoqën gjatë kandidimit të saj në garën presidenciale të vitit 2019.

Gretchen Whitmer

Guvernatoja e Michiganit, Gretchen Whitmer është 52 vjeç dhe me pushtet legjislativ në Partinë Demokratike. Ajo ka vënë në jetë disa politika progresive në shtetin e saj, përfshirë kredi më të mëdha taksore për familjet me të ardhura të pakta, mbrojtje më të madhe për grupet LGBTQ+, disa masa për kontrollimin e armëve, dhe sigurimin e fondeve për t’i bërë më ekologjike firmat e automobilëve me bazë në Detroit.

Në vitin 2020, ajo u përball me një komplot të një grupi të krahut të djathtë, të cilët e rrëmbyen dhe e nxorrën para”gjyqit” për gjoja tejkalim kompetencash, në lidhje me masat e marra për vendosjen e shtetrrethimit gjatë COVID-19 në Miçigan.

Vetëm nëntë ditë pas arrestimit të komplotistëve, Trump mbajti një miting në Miçigan ku tregoi edhe një here qëndrimin e tij kritik ndaj politikës që Whitmerit ka përdorur gjatë pandemisë, duke u thënë mbështetësve të tij “futeni brenda”.

Whitmer ka ende popullaritet në Miçigan, një shtet ku të dy partitë kryesore kanë mbështetje gati të njëjtë, dhe pritet të kandidojë për presidente në vitin 2028. Duke ndjekur debatin aktual Trump- Biden, sipërmarrja mediatike, Politico citoi një burim që nuk e thotë emrin, sipas të cilit Whitmer është ankuar duke thënë se Bideni nuk do të jetë në gjendje të fitojë në Miçigan.

Whitmer e hodhi poshtë këtë pretendim si të gabuar. “Unë jam krenare të mbështes Joe Bidenin në kandidimin e tij dhe jam 100 përqind krah të tij në luftën për të mposhtur Donald Trumpin,” tha ajo në një deklaratë.

Gavin Newsom

Guvernatori i Kalifornisë Gavin Newsom e mbrojti me shpejtësi Bidenin në debatet që pasuar dhe nuk u mor me thirrjet për të hequr dorë. “Ju nuk i ktheni kurrizin (kandidatit tuaj) për shkak të një aktiviteti. Çfarë lloj partie e bën këtë gjë?” i tha Newsom kanalit televiziv amerikan, MSNBC.

Sidoqë të jetë, Newsom përmendet shpesh si pasardhës i mundshëm nëse Bideni heq dorë. 56-vjeçari ka punuar në biznes dhe ka shërbyer si Kryetar Bashkie i San Franciskos, para se të zgjidhej dhe rizgjidhej guvernator i Kalifornisë, shtetit më të populluar dhe më të pasur të Amerikës.

Por lidhjet e biznesit të Newsomit dhe karriera politike mund të përdoren kundër tij nga fushata e Trumpit, sidomos për çështjen e rritjes së numrit të të pastrehëve në shtetin e tij dhe shtimin e vjedhjeve nëpër dyqane në San Francisko.

JB Pritzker

Guvernatori i Ilinoisit, Jay Robert “JB” Pritzker ka lindur në një nga familjet më të pasura të botës. 59-vjeçari është trashëgimtar i pasurisë së Hoteleve Hyatt dhe ka një rrjet me vlerë prej rreth 3,5 miliardë dollarësh (2.78 miliardë euro), siç vlerëson revista e bizneseve, Forbes.

Pritzker ka kohë që e përdor pasurinë e tij për të mbështetur Partinë Demokratike dhe fushatën e tij të kandidimit. Në vitin 2008, ai i diskutoi ambiciet politike në një bisedë telefonike me ish-guvernatorin e atëhershëm, tashmë të larguar të Ilinoisit, Rod Blagojevichin. Pritzker nuk pranon të ketë bërë ndonjë gabim në këtë çështje.

Miliarderi u bë guvernator i Ilinoisit në vitin 2018. Që nga ajo kohë ai ka punuar me politika progresive në kontrollimin e armëve, të drejtat e LGBTQ+, të drejtat e riprodhimit, imigracionin, dhe rrogën minimale.

Duke ndezur më shumë garën presidenciale midis Trumpit dhe Bidenit, Pritzker kritikoi ashpër kandidatin republikan, duke e goditur atë si “fajtor të dënuar, përdhunues që ka përfunduar në gjyq dhe si gënjeshtar të lindur.”

Pritzker e ka quajtur Trumpin po ashtu „racist, seksist, narcist mizogjen që kërkon të përdorë pushtetin për të pasuruar veten dhe për të goditur këdo që guxon të thotë një fjalë kundër tij.”

Trump u përgjegj me sjelljen e tij tipike fëmijërore duke e quajtur Pritzkerin “të lerosur” dhe “buf,” dhe tha se governatori i Ilinoisit ka qenë “emocional” në drejtimin e biznesit familjar.

Pete Buttigieg

Ministri aktual i Transportit, Pete Buttigieg ka qenë një figurë politike që nuk binte në sy para se të kandidonte për president në vitin 2022 dhe të siguronte më pas një vend në administratën e Bidenit. Por karriera e tij politike ka qenë më mbresëlënëse se kaq: Mbas përfundimit të studimeve në Harvard, Buttigieg vazhdoi studimet në Oksford, dhe punoi në kompaninë e këshillimeve, McKinsey. Karriera e tij tetëvjeçare me marinën e SHBA, përfshijnë gjashtë muaj në Afghanistan, si oficer i shërbimeve sekrete.

Ai u bë kryetar Bashkie në South Bend, një qytet i vogël në shtetin e Indianas, në vitin 2011 dhe u fut në kandidimin për president në 2019, për t’u larguar nga gara në favor të Bidenit. Ai ka qenë një nga kandidatët e parë gay që futet në garën për tu zgjedhur president.

Me moshën 42-vjeçare, ai është me diferencë të madhe kandidati më i ri i listës.

Josh Shapiro

Guvernatori i Pensilvanisë, Josh Shapiro ka mbështetje të gjerë në shtetin e tij, i cili do luajë një rol të rëndësishëm në betejën kundër Trumpit, në nëntor. Shapiro ka treguar se është udhëheqës bipartizan, në favor të shkurtimit të taksave për korporatat, por edhe të rekrutimit të më shumë oficerëve të policisë. Gjatë pikut të pandemisë së COVID-19, Shapiro shtroi në pyetje disa nga masat e marra për maskat dhe vaksinat. Këto qëndrime mund të largojnë votuesit nga komunitetet më liberale.

Një pikë tjetër diskutimi mund të jetë mbështetja e madhe e Shapiros për Izraelin. Një pjesë në rritje e elektoratit ka qenë kritike ndaj mosdhënies së mbështetjes së Bidenit për fushatën ushtarake në Gaza, në të cilën janë vrarë mbi 38 mijë civilë duke e kthyer enklavën në prag të urisë. Kritikët i bëjnë thirrje presidentit amerikan të japë mbështetje financiare dhe ushtarake për Izraelin, në mënyrë që të ndalohen vrasjet.

Shapiro, ndërkohë ka akuzuar kolegët amerikanë se nuk kanë luftuar antisemitizmin në protestat pro-palestineze të zhvilluara në SHBA. Në maj ai tha se “ka kaluar koha” kur Universiteti i Pensilvanisë „shpërndau kampin” e studentëve protestues. Më parë, duke pasuar një valë të ngjashme protestash studentore në kampuset e SHBA, studentët e Universitetit të Filadelfias uzurpuan sipërfaqen e kolegjit prë të protestuar kundër luftës që Izraeli bën në Gaza.

Duke ndjekur debatin Trump- Biden, Shapiro pranoi se Bideni “kaloi një natë të keqe” duke vënë në dukje se Donald Trump ka qenë “president i keq”.

Michelle Obama

Ish-zonja e parë Michelle Obama është kandidatja e vetme në këtë listë që nuk ka mbajtur ndonjëherë ndonjë post politik dhe e vetmja që sondazhet e vendosin shumë para Trumpit, nëse ajo vendos të futet në garën elektorale.

Michelle Obama ka përsëritur disa herë se nuk është e interesuar të kandidojë për presidente. Por nëse politika e SHBA na ka treguar diçka javët e fundit, ajo ka qenë se asnjë rezultat elektoral nuk është aq i pamundur të arrihet, saqë dikush të vendosë të heqë dorë prej tij paraprakisht.

voa

Vendimi i Presidentit Joe Biden për t’u tërhequr nga gara për zgjedhjet presidenciale të vitit 2024, i fut Shtetet e Bashkuara në një terren të paeksploruar.

Presidenti Biden shprehu mbështetjen për nënpresidenten Kamala Harris si kandidate e Partisë Demokrate. Përpara se Presidenti Biden të merrte vendimin, Elaine Kamarck, një bashkëpunëtore e lartë në Institutin Brookings, anëtare e Komitetit Kombëtar Demokrat dhe autore e një libri mbi procesin e emërimit presidencial, kishte shpjeguar për agjencinë Reuters se çfarë mund të ndodhë më pas.

ÇFARË NDODH TANI?

Presidenti Biden i ka kaluar muajt e fundit duke siguruar mbështetjen e afro 4000 delegatëve demokratë, pasi fitoi zgjedhjet brenda partisë.

Ata delegatë do të votonin normalisht për të si kandidatin zyrtar presidencial të partisë në Kuvendin Kombëtar të Partisë Demokrate që do të mbahet më 19-22 gusht, por sipas rregullores ata tashmë nuk janë të detyruar ta bëjnë një gjë të tillë.

Delegatët mund të votojnë duke ndjekur ndërgjegjen e tyre, që do të thotë se mund t’ia japin votën dikujt tjetri. Me tërheqjen e tij, zoti Biden në mënyrë efektive po i lë të lirë delegatët e tij, ndoshta duke krijuar kushtet për një konkurrencë midis kandidatëve të tjerë demokratë për emërimin.

CILAT JANË ALTERNATIVAT PËR ZËVENDËSIMIN E PRESIDENTIT BIDEN SI KANDIDAT?

Disa zyrtarë demokratë mund të dëshirojnë të marrin pjesë në garë.

Nënpresidentja Kamala Harris është në krye të listës, por ajo ka patur problemet e saj pas një fillimi të vështirë në detyrë dhe një nivel jo të lartë mbështetjeje në anketime. Kushtetuta amerikane thotë se nënpresidentja mund të bëhet presidente, nëse presidenti vdes apo nuk është në gjendje të ushtrojë detyrën, por nuk parashtron një proces brenda partive për përzgjedhjen e kandidatit zyrtar.

Ndër emrat e tjerë që janë përmendur si zëvendësues të mundshëm janë guvernatori i Kalifornisë Gavin Newsom, guvernatorja e Miçiganit Gretchen Whitmer, guvernatori i Kentakit Andy Beshear dhe guvernatori i Illionit JB Pritzker. Deri më tani, ata kanë qenë mbështetës të presidentit Biden dhe kanë punuar për ta ndihmuar atë të rizgjidhej.

SI DO TË PËRZGJIDHET I EMËRUARI I RI?

Mund të ketë një proces të hapur për të gjithë mes zyrtarëve kryesorë demokratë që e dëshirojnë këtë rol.

Sipas Ballotpedia-s, pritet që për këtë vit të jenë rreth 4,672 delegatë, nga të cilët 3,933 janë delegatë dhe 739 të ashtuquajtur superdelegatë, që janë përgjithësisht zyrtarë të lartë të partisë.

Që të marrë emërimin, një kandidat duhet të fitojë shumicën, pra më shumë vota se të gjithë kandidatët e tjerë së bashku.

Nëse asnjë prej kandidatëve nuk arrin një shumicë të tillë, atëherë do të ketë disa raunde votimesh për të arritur këtë lloj shumice dhe që të dilet me një kandidat zyrtar të partisë. Një konventë e tillë e hapur është mbajtur në vitin 1952 dhe demokratët nuk arritën të përzgjedhin një kandidat me votimin e parë.

ÇFARË DO TË NDODHË ME FONDET E FUSHATËS?

Fushata Biden-Harris pati mbledhur rreth 91 milionë dollarë kontribute deri në fund të majit, por ekspertët për legjislacionin e financimit të fushatave elektorale kanë mendime të ndryshme se si mund të zhvendosen këto fonde.

Për shkak se emri i zonjës Harris shfaqet në dokumentacionin e paraqitur për regjistrimin e fushatës, shumë ekspertë besojnë se fondet mund të transferohen drejt saj, nëse ajo fiton emërimin si kandidate zyrtare e Partisë Demokrate. Por ka edhe debat nëse presidentit Biden do t’i duhej fillimisht të bëhej i emëruari zyrtar i partisë dhe në vazhdim të kryhej transferimi i fondeve.

voa

Tani edhe COVID! Për t’i dhënë fund debatit mbi shëndetin e presidentit amerikan Joe Biden, disa demokratë po bëjnë thirrje për një emërim përfundimtar të kandidatit për zgjedhje.

Në mes të fushatës zgjedhore në radhët e demokratëve amerikanë ka shpërthyer një debat për kohën e emërimit të presidentit amerikan Joe Biden si kandidat për rizgjedhje në zgjedhjet presidenciale të 5 nëntorit. Por gjendja po ndryshon – nga ajo e tensionuar e deri në dëshpërim.

Për Filippo Trevisan, profesor në Universitetin Amerikan në Uashington DC, Partia Demokrate është në një “ngërç”. “Një opsion do të ishte sigurisht gjetja e një kandidati tjetër (në vend të Bidenit). Por kjo do të ishte e mbushur me rreziqe. Një tjetër opsion do të ishte ndryshimi i narrativës së fushatës së Bidenit me propozime të reja radikale,” shpjegon ai në përgjigje të një DW. “Demokratët kanë nevojë për një temë të re në fushatë që mund të tërheqë vëmendjen e votuesve.”

Nominimi po, por kur?

Mosmarrëveshja për emërimin e hershëm të Joe Biden si kandidat presidencial demokrat, tregon se mbështetësit dhe kundërshtarët kanë qëndrime shumë të ndryshme mes vete. Disa po bëjnë thirrje që Biden të emërohet zyrtarisht sa më parë, pra përpara konventës së emërimit të Demokratëve nga 19 deri më 22 gusht në Çikago. Të tjerët duan patjetër ta parandalojnë këtë dhe të mos bëjnë asnjë ndryshim në orar. Ndërkohë republikanët kanë përcaktuar Donald Trump kandidat.

“Nuk ka asnjë arsye ligjore për një emërim të tanishëm, përmes një votimi virtual”, thuhet në një letër të disa demokratëve. “Një votë e tillë do të ishte kundërproduktive dhe do të minonte unitetin dhe kohezionin e partisë.”

“Një ide e tmerrshme”

Letra e diskutueshme nga kundërshtarët e nominimit të menjëhershëm u shkrua nga kongresmeni demokrat Jared Huffmann nga Kalifornia. Demokrati amerikan tashmë ka fituar shumë mbështetës. Drafti i letrës thotë se debatimi për ndryshimet në procedura është “një ide e tmerrshme”. Një emërim i hershëm i kandidatit presidencial demokrat do të vinte “në kohën më të keqe të mundshme”.

Sipas raportimeve të mediave, mbështetësit e një nominimi të hershëm gjithashtu kanë shkruar një letër. Kjo u drejtohet anëtarëve të komitetit të konventës së emërimit të Demokratëve, “Konventa Kombëtare Demokratike” (DNC). Ata i bëjnë thirrje partisë që të miratojë votimin e parakohshëm virtual.

Kryetari i Komitetit Kombëtar Demokratik Jaime R. Harrison sqaroi në X, dikur Twitter: “Ne do të përmbushim afatin e 7 gushtit dhe kandidati ynë do të jetë në fletën e votimit në Ohio në nëntor.”

Shtohet presioni ndaj Biden

Por nuk është e sigurt nëse do të ketë ndonjë epilog të shpejtë. Presidenti amerikan Biden ka qenë nën presion masiv prej javësh për shkak të moshës dhe dyshimeve për gjendjen e tij mendore.

Pas atentatit ndaj Trump më 13 korrik, frika për një fushatë zgjedhore të dështuar u rrit edhe më shumë te demokratët. Të mërkurën (17 korrik), Bidenit iu desh të anulonte sërish të gjitha aktivitetet e fushatës për shkak të një infeksioni COVID.

Dhjetëra politikanë demokratë, përfshirë ish-kryetaren e Dhomës së Përfaqësuesve, Nancy Pelosi, i kanë bërë thirrje Biden të tërhiqet nga gara javët e fundit. Vetë Biden komentoi për herë të parë këtë çështje më 17 korrik në një intervistë me transmetuesin amerikan BET News: “Unë do të largohesha nga gara nëse doktori im më thotë se kam probleme serioze shëndetësore,” i tha ai reporterit Ed Gordon.

Biden kishte lavdëruar më parë Kamala Harris, pas një fjalimi të saj në organizatën e të drejtave civile të zezakëve NAACP në Las Vegas. “Ajo nuk është vetëm një zëvendëspresidente e mirë, ajo mund të jetë edhe presidente e SHBA-së”, tha Biden.

Duke pasur parasysh situatën e paparashikueshme, shkencëtari politik Trevisan dyshon se një emërim i menjëhershëm i Bidenit do t’i jepte fund debatit për shëndetin dhe moshën e tij të shtyrë. “Sa herë që Biden bën ndonjë gabim apo refuzon ndonjë intervistë e takim me gazetarë, do të ngrihen dyshime për shëndetin e tij,” shpjegon ai. Emërimi i tanishëm si kandidat zyrtar nuk do ta ndryshonte këtë.

Ekspertja amerikane Andrea Römmele nga Shkolla Hertie supozon “se Biden do të mbetet në garë”. Në një intervistë për kanalin televiziv gjerman ZDF, ajo pyeti: “Si duhet të profilizoni një kandidat të ri për një kohë kaq të shkurtër?” Biden nuk mund të fajësohet për faktin se ai është 81 vjeç. Tani është e rëndësishme që Biden të qëndrojë deri në vjeshtë dhe të fokusohet në sukseset ekonomike.

Strategu politik Trevisan kujton se ka pasur diskutime të ngjashme brenda partive edhe në të kaluarën – për shembull për Hillary Clinton në 2016. “Demokratët e SHBA-së kanë një spektër më të gjerë ideologjik se shumica e partive progresive në Evropë,” shpjegon ai. “Ky pluralizëm mund të kthehet ndonjëherë në një disavantazh strategjik.”

dw