Lëvizja Vetëvendosje nuk është kundër përcaktimit të vijës kufitare me Malin e Zi por se kërkojnë që nga ky proces të mos humbas asnjëra palë .

Për Lëvizjen Vetëvendosje deklarimet e Departamentit Amerikan të Shtetit se shënjimi i vijës kufitare me Malin e Zi është bërë pa gabime dhe se përputhet ngushtë me kufirin e definuar në Kushtetutën e vitit 1974, nuk nënkupton se është vijë e saktë dhe nuk dëshmon që Kosovës nuk po i merret pjesë e territorit.

Sipas anëtarit të Kryesisë së këtij subjekti Zgjim Hyseni, vijë e ngushtë ashtu siç përkufizohet në raportin e prezantuar nga Departamenti Amerikan i Shtetit është një përkufizim mjaftë domethënës. Nëse kjo vijë e “ ngushtë” e thënë në këtë deklaratë nga larg shihet pak territor, për Kosovës sipas Hysenit do të thotë shumë.

“Vija e ngushtë që përmenden në këtë deklaratë është mjaftë signifikative, vija e ngushtë nuk do të thotë vijë e saktë dhe vija e ngushtë për kaq pak territor sa ka Kosova do të thotë shumë, megjithëse nëse ajo shikohet nga larg, lart mund të duket pak”, tha Hyseni përmes telefonit.

Ai theksoi se Lëvizja Vetëvendosje nuk është kundër përcaktimit të vijës kufitare me Malin e Zi por se kërkojnë që nga ky proces të mos humbas asnjëra palë .

Hyseni tha se çështja e demarkacionit nuk është çështje e deklaratave politike por është në radhë të parë çështje e ekspertëve, ekspertë të cilët sipas tij tashmë kanë dëshmuar se kjo vijë kufitare cenon integritetin territorial të vendit.

“Profesionistët e kësaj fushe përfshirë edhe ata që vijnë nga radhët e koalicionit kanë ardhur në përfundim se përcaktimi i vijës kufitare e cenon integritetin territorial të vendit duke humbur mijëra hektar tokë të Kosovës”, theksoi Hyseni.

E deputeti Shpejtim Bulliqi që vjen nga radhët e LDK-së e që ka kundërshtuar vazhdimisht mënyrën se si është bërë shënjimi i kësaj vije kufitare tha për KosovaPress se ende nuk e ka parë deklaratën zyrtare për të parë se në cilat fakte është bazuar një deklaratë e tillë.

Sipas tij në rast se kjo deklaratë është bazuar në punën e Komisionit Qeveritar për përcaktimin e vijës kufitare me Malin e Zi, atëherë është e kuptueshme të ketë këso deklaratash. Mirëpo ai në cilësinë e një profesionisti të kësaj fushe ka thënë se ai bashkë me të tjerë që kanë punuar për të zbardhur të dhëna dhe fakte lidhur me këtë proces i kanë ofruar ato për të dëshmuar se Kosova po dëmtohet në këtë proces.

“Nëse është mbështet në punën e komisionin dhe në versionin që ka dhënë Qeveria është përgjigje normale. Mirëpo ne po presim një komision për t’ia ofruar të gjitha faktet që kemi e që janë të bazuara shkencore dhe profesionale të marra nga institucionet e ish- Jugosllavisë. Derisa të mos bindemi me fakte, ne këto do t’i marrim për bazë”, tha Bulliqi përmes telefonit.

Sot gjatë ditës Departamenti i Shtetit Amerikan ka lëshuar një deklaratë ku përveç tjera ka thënë se vija e përcaktuar së voni përputhet ngushtë me kufirin e definuar në Kushtetutën e vitit 1974. “Kufijtë që ne i kemi përshkruar që nga viti 2008, përputhen detajisht me kufirin e propozuar në vitin 2015”, thuhet në raportin e DASH.

Rikujtojmë se përfundimi i marrëveshjes së kufirit me Malin e Zi është njëri nga kushtet për liberalizimin e vizave dhe përbën një hap të rëndësishëm në rrugën e Kosovës drejt integrimeve evropiane. (rtk)

Qëndrimi i Departamentit Amerikan të Shtetit dëshmon se procesi i shënimit të kufirit ndërmjet Kosovës dhe Malit të Zi është kryer në përputhje me të gjitha aktet juridike.

Qeveria e Republikës së Kosovës shpreh mirënjohje për punën verifikuese dhe përshëndet deklaratën e Departamentit të Shtetit të Shteteve të Bashkuara të Amerikës lidhur me Raportin për Demarkacionin e Kufirit ndërmjet Republikës së Kosovës dhe Malit të Zi.

“Duke pasur parasysh përkrahjen e jashtëzakonshme e të gjithanshme të SHBA-ve për Kosovën, si dhe rishikimin e detajuar të vijës kufitare nga ana e Departamentit të Shtetit, Qeveria e Kosovës konsideron se qëndrimi i Departamentit Amerikan të Shtetit dëshmon se procesi i shënimit të kufirit ndërmjet Kosovës dhe Malit të Zi është kryer në përputhje me të gjitha aktet juridike dhe realitetin faktik në terren”, thuhet në një komunikatë për media nga zyra e kryeministrit Isa Mustafa.

Duke pasur parasysh këtë, Qeveria e Republikës së Kosovës fton të gjithë përfaqësuesit politik që të punojnë për avancimin e proceseve dhe të perspektivës integruese euroatlantike të Kosovës, duke filluar nga liberalizmi i vizave që pritet të finalizohet së shpejti. Qeveria do të jetë e hapur për të diskutuar çdo vërejtje të mundshme të qytetarëve dhe të përfaqësuesve politikë lidhur me të gjitha proceset e rëndësishme për vendin.

Qeveria e Kosovës, me këtë rast, shpreh mirënjohjen e qytetarëve dhe të institucioneve të Kosovës për mbështetjen e përhershme që SHBA-të po japin për Republikën e Kosovës, duke theksuar njëkohësisht përkushtim të plotë për fuqizimin e marrëdhënieve dhe partneritetit strategjik ndërmjet dy vendeve. (rtk)

Qeveria e Malit të Zi serish ka shprehur gatishmëri për rishqyrtimin e kufirit me Kosovën, ndonëse në muajin gusht në Vjenë u nënshkrua demarkacionin.

Këshilli Ligjvënës i Kuvendit të Malit të Zi mbështeti sot Marrëveshjen për kufirin shtetëror të Malit të Zi me Kosovën, si dhe Marrëveshjen për kufirin me Bosnjë e Hercegovinën (BeH), të cilat janë nënshkruar në Vjenë më 26 gusht.

Marrëveshja për kufirin me BeH-në është mbështetur njëzëri nga ana e anëtarëve të Këshillit, ndërsa për Marrëveshjen për kufirin shtetëror me Kosovën votuan shtatë anëtarë të Këshillit, ndërsa dy anëtarë ishin të përmbajtur.

Negociatat lidhur me kufizimin dhe vërtetimin e kufijve shtetërorë mes Malit të Zi dhe Kosovës filluan në nëntor të vitit 2012, ndërsa përfunduan sivjet. Në takimin përmbyllës të komisionit për kufijtë të Malit të Zi dhe Kosovës, më 8, 9 dhe 10 qershor të vitit 2015 në Prishtinë, u harmonizuan dhe parafuan të gjitha dokumentet kufitare lidhur me kufizimin dhe vërtetimin e kufijve në mes dy shteteve.

“Marrëveshja për kufirin shtetëror do të kontribuojë në implementimin e plotë të marrëveshjeve të nënshkruara për vendkalimet kufitare, zbatimin e regjimit të përcaktuar të komunikacionit kufitar, bashkëpunimin tejkufitar policor dhe zbatimin e patrullimit të përbashkët në mbikëqyrjen e kufijve shtetëror dhe me rëndësi të veçantë është për shkatërrimin e të gjitha llojeve të krimit tejkufitar”, theksohet në Marrëveshjen e kufirit të Malit të Zi me Kosovën.

Përfaqësuesit e partive opozitare në Kosovë kundërshtojnë Marrëveshjen e propozuar për kufirin me Malin e Zi. Qeveria e Kosovës ftoi ekspertë nga Bashkimi Evropian (BE) dhe Shtetet e Bashkuara të Amerikës (SHBA), për të kryer revidim të Marrëveshjes për demarkacion me Malin e Zi, shkruan Gazeta Express.

Qeveria e Malit të Zi kohë më parë shprehu gatishmëri për rishqyrtimin e kufirit me Kosovën, ndonëse në muajin gusht në Vjenë u nënshkrua demarkacioni.

Millan Paunoviq nga Ministria e Punëve të Brendshme e Malit të Zi, duke sqaruar Marrëveshjen për demarkacion me Kosovën, si dhe kyçjen potenciale të ekspertëve të BE-së dhe SHBA-ve në revidim të marrëveshjes, tha se në vetë aktin e nënshkrimit të kësaj marrëveshjeje në Vjenë “BE-ja ka dhënë qëndrimin lidhur me këtë çështje”.

“Kur janë në pyetje SHBA-të, presidenti Barack Obama tha se kjo është ‘marrëveshje historike’, ndërsa Sekretari amerikan i Shtetëror John Kerry theksoi se ‘kjo marrëveshje duhet të mbetet’. Duhet pasur durim. Demokracia është proces i pjekurisë, doemos duhet pasur mirëkuptim”, tha Paunoviq.

Negociatat lidhur me demarkacionin, vendosjen e kufijve dhe përgatitjet për firmosjen e marrëveshjes ndërkombëtare mbi kufijtë shtetërorë ndërmjet Malit të Zi dhe BeH-së, filluan në tetor të vitit 2008, ndërsa përfunduan në maj të vitit 2014. Në takimin përmbyllës të komisionit për kufijtë të Malit të Zi dhe BeH-së më 26 dhe 27 maj të vitit të kaluar në Sarajevë, u harmonizuan dhe parafuan të gjitha dokumentet kufitare nga komisioni dhe grupi i ekspertëve.

Këshilli për marrëdhënie ndërkombëtare dhe emigrantë të Kuvendit të Malit të Zi gjatë muajit të kaluar mbështeti marrëveshjen për kufijtë të Malit të Zi me Kosovën dhe BeH-në. Këto dokumente duhet të verifikohen nga parlamenti malazez. (rtk)

Departamenti Amerikan i Shtetit thotë se kufiri i Kosovës me Malin e Zi i përshkruar që nga viti 2008 kur Kosova shpalli pavarësinë, përputhet me kufirin e propozuar në vitin 2015.

Departamenti Amerikan i Shtetit thekson se vija kufitare ndërmjet Kosovës dhe Malit të Zi, e përcaktuar nga Komisioni Shtetëror i Kosovës për shënimin e kufirit është në pajtim me dokumentet dhe hartat e përdorura që nga vitit 1940 e deri më sot.

Në një njoftim të publikuar në faqen zyrtare të ambasadës amerikane në Prishtinë, thuhet se “baza e Komisionit për shënimin e kufirit ka qenë Kushtetuta jugosllave e vitit 1974, e cila e ka definuar kufirin e Kosovës me anë të kufijve administrativë komunalë, që janë të ndarë në zona kadastrale. Kjo bazë e përcaktimit të vijës kufitare është përdorur edhe në Propozimin Gjithëpërfshirës të të dërguarit të posaçëm të Kombeve të Bashkuara, Marti Ahtisaarit dhe në Kushtetutën e vitit 2008 të Republikës së Kosovës”.

Në njoftim thuhet se pas një rishikimi të hartave që nga viti 1940 e deri më tani, përfshirë edhe ato që janë përdorur nga komisioni për përcaktimin e kufirit, Departamenti Amerikan i Shtetit “ka kuptuar se vija e përcaktuar së voni përputhet ngushtë me kufirin e definuar në Kushtetutën e vitit 1974. Kufijtë që ne i kemi përshkruar që nga viti 2008, përputhen në hollësi me kufirin e propozuar në vitin 2015”.

Në përfundim të njoftimit tërhiqet vëmendja se “përfundimi i marrëveshjes për demarkacionin e kufirit është një kusht i BE-së për liberalizimin e vizave dhe është një hap i rëndësishëm në rrugëtimin e Kosovës drejt integrimeve evropiane”.

Më 26 gusht, Kosova dhe Mali i Zi, nënshkruan marrëveshjen për shënimin e kufirit, e cila nxiti reagimet e partive opozitare në Kosovë, të cilat vlerësojnë se me të Kosova humbë rreth 9 mijë hektarë tokë.

Duke kundërshtuar këtë marrëveshje si dhe atë të arritur me Serbinë për krijimin e asociacionit të komunave me shumicë serbe, partitë opozitare  bllokuan punën e parlamentit që nga 22 shtatori, duke hedhur gaz lotsjellës.

Ato i kërkojnë qeverisë të anulojë marrëveshjet apo t’i hedh ato në referendum, në të kundërtën sipas tyre vendi duhet të shkojë në zgjedhje të parakohshme.

Qeveria u ka bërë thirrje partive opozitare që të hapin dialogun, ndërsa është zotuar se do të pres dhe do të respektojë vendimin e Gjykatës Kushtetuese, lidhur marrëveshjen për asociacionin e komunave me shumicë serbe, zbatimi i së cilës është pezulluar në pritje të këtij vendimi. Ajo është shprehur e gatshme që duke përfshirë edhe ekspertë ndërkombëtarë, të diskutojë lidhur me shënimin e vijës kufitare më Malin e Zi.

Kriza politike bëri që edhe sekretari amerikan i shtetit John Kerry të bëjë thirrje kundër dhunës në parlament. Gjatë vizitës së dy dhjetorit në Prishtinë ai tha se Shtetet e Bashkuara nuk do të mbështesnin asnjë marrëveshje “që do të kërcënonte sovranitetin, sigurinë apo pavarësinë e Kosovës.

Marrëveshjet me Serbinë që çuan në shtim të tensioneve politike në Kosovë, ishin pjesë e bisedimeve për normalizimin e marrëdhënieve ndërmjet të dyja palëve që janë edhe kusht për afrimin e tyre me strukturat evropiane. Ato i siguruan Serbisë negociatat për anëtarësim në Bashkimin Evropian, të cilat u hapën më 14 dhjetor, ndërsa Kosovës Marrëveshjen e Stabilizim Asocimit, e cila u nënshkrua me 27 tetor. (voa)