Policia e Tiranës po heton mbi pretendimet e familjarëve të këngëtarit Doktor Flori’ i cili humbi jetën një ditë më parë krejt papritur, edhe pse shtëpia ku banonte ishte pak metra larg Urgjencës së Tiranës. Ndërkohë që pritet që mjekësia ligjore të nxjerrë zyrtarisht shkaqet e vdekjes nga rezultatet përfundimtare të toksikologjisë, policia po heton pretendimet e familjarëve, të cilët thonë se ambulanca është vonuar për t’i dhënë atij ndihmën.

Policia ka marrë dëshminë e bashkëshortjes së të ndjertit, ndërsa ka pyetur edhe mjekët e stafit të Urgjencës. Ndërkohë që materialet hetimore do t’i kalojnë Prokurorisë së Tiranës.

Në një emision televizov, pastori i një kishe ku kantautori i njohur shkonte sëfundi deklaroi se, gruaja e tij sëbashku me djalin disa javësh në krahë kishte shkuar në urgjencë për të kërkuar ndihmë dhe aty ishte përballur me shprehjen “Silleni vetë të sëmurin, nuk kemi ambulancë”.

“E kishin marrë urgjencën në telefon, por ajo nuk po vinte megjithëse klinika është vetëm 5 minuta larg në këmbë. Ata thoshin vetëm që nuk kemi ambulancë për momentin pasi është diku tjetër. Bashkëshortja e tij, ka marrë djalin në dorë dhe ka shkuar tek ambulanca e lagjes ku i kanë thënë që ta sjellin familjarët në urgjencë”, tha pastori.

Pastori tha se gjithçka mbaroi rreth orës 10.05 ndërsa kur mbërritën mjekët gjithçka ishte e kotë. “Si ka mundësi që t’i thuhet një nëne të re me një fëmijë në krahë silleni këtu të sëmurin, kur mjekët mund të shkonin në këmbë për të ndihmuar një njeri” – tha pastori Muça.

URGJENCA: ZBATUAM PROTOKOLLIN ME PËRPIKMËRI
Ndërkohë që Urgjenca e Tiranës ka mohur akuzat për vonesën e ambulancës. Burime nga urgjenca bëjnë me dije se autoambulanca ka mbërritur në shtëpinë e të ndjerit 3 minuta pas njoftimit.

Të njëjtat burime saktësojnë se, gruaja e “Doktor Florit’ ka lajmëruar fillimisht për gjendje të dehur të bashkëshortit të saj.

Ndërsa shefi i Urgjencës, Naim Lusha thotë se është zbatuar me përpikmëri protokolli.

Shefi i Urgjencës: Dr Flori në vdekje klinike nga overdoza, padi ndaj akuzave të familjarëve

Shefi i Shërbimit të Urgjencës, Naim Lusha bën të ditur se ekipi mjekësor ka mbërritur në orën 10:08 minuta në vendin e ngjarjes ku ka gjetur Florand Kondin ne vdekje klinike nga nje arrest kardio-vaskular nga overdoza.

“Shefi i shërbimit të urgjencës Naim Lusha: jemi njoftuar në orën 09.45 fillimisht nga gruaja e doktor Florit e cila ka kërkuar ndihmë mjekësore për burrin e saj që është i alkolizuar dhe axhituar dhe i dhunshëm, i është dhënë përgjigje nga personeli se duhet të shoqërohet personeli mjekësore me policë, në këto momente gruaja është larguar pa dhënë me shpjegime. Në orën 10 e 05 është telefonuar në shërbimin tonë për një rast emergjencë dhe menjëherë është nis ekipi mjekësore dhe në 10.08 minuta është gjendur në vendin e ngjarjes.
Personi Florian Kondi ishte në vdekje klinike arrest kardio vaskular nga ovërdoza. Në këtë moment është tentuar rikthimi në jetë nga ekipi mjekësore nëpërmjet reanimimit zemër mushkri dhe i është injektuar adrenalinë, por pamundësi rikthimi në jetë. Është cuar në QSUT nga autoambulanca jonë në prani të ekipit mjekësor dhe vëllait.
Në një turn 12 orësh ka tre automjete autoambulancë, 6 mjekë, 5 infermiere dhe tre shofer.

Naim Lusha thekson se do të bëjë kallzim penal për shpifje në adresë të Urgjencës për pastorin, vëllain e viktimës që kanë ngritur akuza ndaj tij.
“Do bëjmë kallëzim penal për shpifje në adresë të shërbimit të urgjencës për pastorin dhe vëllain e viktimës që kanë ngritur akuza”.

BEQAJ: GRUAJA E DOKTOR FLORIT KËRKOI NDIHMË PËR DIKË QË KISHTE KONSUMUAR ALKOOL
Në lidhje me pretendimet e familjarëve të “Doktor Florit’ për mungesën e autoambulancës në dhënien e ndihmës së parë, ka regjur edhe kreu i Shëndetësisë, Ilir Beqaj.

Sipas ministrit, “Thirrja telefonike nga familjarët është bërë në orën 10:05 minuta”.

Beqaj tha më tej se, “Gruaja kërkoi ndihmë për dikë që ka konsumuar alkool. Në raste të tilla ambulanca shkon bashkë me një polic, por gruaja nuk donte të shoqërohej nga policia”.

VDEKJA E DR.FLORIT, PROKURORIA: PROCEDIM PENAL PËR MOSËDHËNIE NDIHME
Prokuroria e Tiranës ka regjistruar kryesisht procedimin penal për “Mosdhënie ndihme”, parashikuar nga neni 97 i Kodit Penal për rastin e vdekjes së shtetasit Florian Kondi (Dr. Flori). Po punohet intensivisht për marrjen në pyetje të personelit mjekësor dhe familjarëve të të ndjerit.

KUSH ISHTE DOKTOR FLORI
Dr.Flori ishte një ndër tre anëtarët e grupit shqiptar të njohur me emrin “West Side Family”. Rolandi, Miri dhe Flori, dikur shokë në një klasë, më pas anëtarë të një prej grupeve më të njohura muzikore të Shqipërisë. Pas suksesit të madh me këngën-hit ‘Mesazh’, shikohen në skenën e festivalit të “Këngëve të Stinës”, por tashmë jo për të kënduar, por për të prezantuar. Ndërsa Doktor Flori, si pjesë e grupit mjaft të njohur “West Side Family” do të mbahet mend edhe për bashkëpunimin me ish-kreun e Bashkisë së Tiranës dhe ish-kreun e opozitës, tashmë kryeministër, Edi Rama. Kënga e parë e debutuar nga ata ishte “Tirona”, prej nga doli edhe shprehja: “Gjithçka mund të ndodhë, jetojmë në Tironë”. Në atë kohë, grupi i mirënjohur mbajti një koncert recital, me të ftuar special kryebashkiakun Rama. Kënga ‘Tirona’ ishte pa dyshim që i dha dhe famën më të madhe grupit të tre djemve. Në 2009-ën, ‘West Side Family’ u bashkua përsëri me Ramën, këtë herë për të sjellë këngën e fushatës elektorale. Në qershor të vitit 2013, Flori si solist tashmë publikoi një këngë, ku shfaqte dukshëm zhgënjimin që kishte marrë nga Partia Socialiste dhe nga Edi Rama. Megjithatë edhe kjo këngë shënjoi një
sukses për këngëtarin e rrepit. Teksti i këngës i shkruar nga 35-vjeçari, “Zjarr e Ftohtë”, i kënduar nga këngëtari Luiz Ejlli, fitoi në “Festivali i Këngës 44″ dhe më vonë përfaqësoi Shqipërinë në “Eurovision Song Contest 2006″. Florian Kondi ishte baba i dy fëmijë dhe në rininë e tij ka qenë pjesë e grupit “West Side Family”. Ai ka marrë pjesë në disa festivale.

(ma.ar/d.b/BalkanWeb)

Kryeministri Edi Rama i paraqiti Parlamentit buxhetin e vitit 2015. Në fjalimin, që zgjati për më shumë se një orë, kreu i Qeverisë nënvizoi që në fillim se thelbi i draftit është mbështetja e rritjes ekonomike pa masa shtrënguese.
Eshtë një buxhet me disa standarde të mirëpërcaktuara dhe me disa zgjidhje realiste për një situatë, ku potencialet janë padyshim të mjaftueshme për të arritur objektivin tonë minimal të një rritje ekonomike përtej 4 për qindëshit në fund të vitit të katërt të këtij mandati, tha Rama.

“Kemi frenuar rënien ekonomike, kemi frenuar gropën e madhe ekonomike që gjetëm në shtator 2013 dhe po konsolidojmë rritjen ekonomike me instrumentat buxhetorë”, saktësoi më pas ministri i Ekonomisë, Arben Ahmetaj.

Duke shprehur keqardhjen për mungesën e opozitës në Parlament, teksa diskutohen dy nga ligjet më të rëndësishme të vitit, si buxheti dhe paketa fiskale, zoti Rama i është përgjigjur akuzave të saj në distancë për rritjen e taksave.

“Ky është një buxhet që vjen si rezultat i reflektimit të një pakete të re fiskale, që ul ose zeron 15 taksa, ndërkohë që rrit vetëm 3. Eshtë një Paketë Fiskale, që në kushtet e vendit tonë, na jep mundësi që të stimulojmë prodhimin që të stimulojmë përpunimin në vend”, tha Rama.

Zoti Rama listoi të gjitha taksat që lehtësohen për vitin e ardhshëm dhe efektet pozitive që ato do të kenë në ekonomi. Ndërsa ka shpjeguar arsyet për tre taksat që rriten, duke u ndalur tek ajo e naftës.

“Kjo nuk është një dëshirë e Qeverisë për të rënduar mbi ata të cilët përdorin makina, por ky është një kontribut i atyre të cilët përdorin makina, për të patur një vend më të mirë. Të gjitha ato investime që lidhen me rritjen e sigurisë në rrugë, që lidhen me rritjen e përmasës së gjelbër në akset e vendit tonë, janë të lidhura drejtpërdrejt me këtë kontribut minimal të gjithësecilit”, tha Rama.

Buxheti i vitit 2014 i rrit me rreth 49 miliardë lekë të ardhurat totale krahasuar me këtë vit, nga të cilat 16 miliardë vijnë nga rritja e taksave dhe pjesa tjetër nga rritja e ekonomisë dhe mirëadministrimi. Buxheti ul me 48 për qind deficitin buxhetor krahasuar me 2014, çka sipas Qeverisë bën të mundur që vitin tjetër borxhi publik të ulet pas disa vitesh rritje.

/ Top Channel

Kryeministri Edi Rama u është përgjigjur akuzave të Partisë Demokratike për foton e Enver Hoxhës së shfaqur në aktivitetet për 70-vjetorin e çlirimit të Tiranës, të përkujtuar ditën e hënë. Rama u është kundërpërgjigjur “me keqardhje” akuzave në rrjetet sociale, ku shkruan: “Keqardhje për të paftuarit që futen si diversantë nëpër turmat e aktiviteteve përkujtimore të çlirimit, për të ngritur fotografitë e Enver Hoxhës. Keqardhje për të fandaksurit që kapen pas fotografive të Enver Hoxhës, për të bërë luftë politike me ne. Të dyja palët janë e shkuara e këtij vendi i cili s’ka kohë për të humbur me marrëzitë e tyre! Të vdekurit me të vdekurit, të gjallët me të gjallët”.

Më herët, nëpërmjet kreut të grupit parlamentar, Edi Paloka opozita akuzoi udhëheqësit e mazhorancës, Rama dhe Meta për përdhosje të luftës dhe rehabilitim të figurës së Enver Hoxhës.

“Me fotot e Enverit pas shpatullave, me korin e Enverit në sfond, Rama dhe Meta, gjetën mënyrën më të turpshme për të baltosur 70 vjetorin e clirimit të Tiranës. Duke përkujtuar këtë ditë të shënuar, me dikatorin Hoxha, Rama dhe Meta, kanë fyer kujtimin e dhjetra intelektualëve, heronjtë e vërtetë të luftës, të cilët u vranë dhe u lincuan drejtpërdrejt nga dora e Enverit”, tha Paloka.

/ Top Channel

Autoritet më të larta në vend Kryetari parlamentit Meta, Kryeministri Rama dhe disa ministra kremtuan 70-vjetorin e Çlirimit të Tiranës. Së bashku me shumë qytarë tiranas të mbledhur tek monumenti “Ushtarit të Panjohur”, ata përkujtuan luftën e mijëra kryeqytetasve për çlirimin e qytetit të tyre, duke vendosur kurora me lule.

Sadi Vorpsi, prefekt i qarkut të Tiranës tha se “të gjthë brezat duhet të përkulen me nder në kujtim të atyre që dhanë jetën gjatë Luftës Nacional Çlirimtare”.

“70 vite më parë, në Tiranë agoi një ditë e re, e lirë nga pushtuesi i huaj. Shtëpitë përdhese të këtij qyteti u bënë fole e ëndrrave, shpresave, idealeve të lartësuara, planeve dhe strehimit të gjithë atyre njerëzve që i dolën për zot kombit në ato ditë të errëta të historisë. Bujaria e njohur e tiranasve i hapi dyert për të gjithë ata që kaluan në ilegalitet. Rinia tiranase e dëgjoi thirrjen e atdheut të saj që lëngonte për liri dhe nuk hezitoi për asnjë moment të bashkohej me idealet e larta kombëtare”, tha Vorpsi.

Pjesëmarrës në këtë 70-vjetor të Tiranës ishin edhe veteranët e luftës, disa prej tyre jo shumë larg Kryeministrit Edi Rama mbanin në duar pankarta me portretin e komandantit të Luftës Nacional-Çlirimtare, Enver Hoxha. Kryeministri Rama u shqetësua nga prania e pankartave të tilla dhe i kërkoi një prej asistenteve të protokollit largimin e tyre. Më pas oficerë të Gardës kanë ndërhyrë për largimin e personave që mbanin portretet e Enver Hoxhës.

Kjo ngjarje është komentuar edhe nga ambasada amerikane në Tiranë, nëpërmjet dy postimeve në Twitter, ku ambasadori Arvizu citohet të thotë se fatkeqësisht fotot e diktatorit Enver Hoxha e njollosën ceremoninë e sotme në Varrezat e Dëshmorëve. Kjo sipas kryediplomatit amerikan ishte një fyerje për shqiptarët.
/ Top Channel

Presidenti Bujar Nishani i ka dërguar sot një letër Kryetarit të Kuvendit, Ilir Meta, kreut të grupit parlamentar të PS-së, Gramoz Ruçi, kreut të grupit parlamentar të PD-se, Edi Paloka si dhe kreut të grupit parlamentar të LSI-së, Petrit Vasili për Projekt Buxhetin e vitit 2015. Në këtë letër Nishani shpreh keqardhje që nuk është ftuar në komisione për të dëgjuar kërkesat specifike që i janë paraqitur Ministrisë së Financave gjatë fazës së hartimit të projektbuxhetit 2015. Gjithashtu ai rendit edhe disa problematika ku ndër më kryesoret është ulja e buxhetit për Presidencën.

LETRA E PLOTË

Lënda: Mbi Projekt Buxhetin e vitit 2015

Drejtuar: Sh.T.Z. ILIR META
KRYETAR
Kuvendi i Republikës së Shqipërisë

Z. GRAMOZ RUÇI
Kryetar i Grupit Parlamentar të Partisë Socialiste (PS)

Z. EDI PALOKA
Kryetar i Grupit Parlamentar të Partisë Demokrattike (PD)

Z.PETRIT VASILI
Kryetar i Grupit Parlamentar të Partisë Lëvizja Socialiste për Integrim (LSI)

TIRANË

I nderuar Zoti Kryetar i Kuvendit,
Të nderuar kryetarë të grupeve parlamentare të PS, PD dhe LSI,

Në kuadër të diskutimeve për miratimin e Projekt Buxhetit për vitin 2015, paraqitur nga Këshilli i Ministrave për shqyrtim dhe miratim në Kuvendin e Shqipërisë, fillimisht shpreh keqardhjen që Institucioni i Presidentit të Republikës nuk u ftua në seancë dëgjimore nga Komisionet e përhershme për t’u dëgjuar mbi kërkesat specifike që i janë paraqitur Ministrisë së Financave gjatë fazës së hartimit të projektbuxhetit 2015.

Në pamundësi për t’u dëgjuar, edhe pse zyrtarisht kemi kërkuar të dëgjohemi nga Komisioni i cili mbulon veprimtarinë e institucioneve të pavarura, jam i detyruar t’ju paraqes disa problematika që implikojnë veprimtarinë e Institucionit të Presidentit të Republikës përgjatë vitit 2015, ndërkohë që projektbuxheti i vitit 2015 po diskutohet në seancë plenare.

Për vitin 2014, Institucionit të Presidentit të Republikës, megjithëse me ulje te theksuar krahasuar me dhjetë vitet e fundit, iu akorduan 183.2 milion lekë në total, ndërkohë që për vitin 2015 janë parashikuar 177 milion lekë, me një diferencë negative prej rreth 3.4 % më pak. Po kështu për zërin shpenzime të tjera operative në buxhetin e vitit 2015 është parashikuar ulje e këtij zëri me 8.5% më pak.
Vë në vëmendjen tuaj se përgjatë vitit 2014 janë kryer dhe shpenzime të paparashikuara, siç ishte rasti i vizitës së Papa Franceskut në vendin tonë, ku kemi kërkuar në Ministrinë e Financës fonde shtesë për shpenzime të kryera dhe të faturuara, për të cilat jemi akoma në pritje.

Siç jeni në dijeni, për vetë natyrën specifike të Institucionit, për përmbushjen e funksioneve kushtetuese të Presidentit të Republikës si në veprimtarinë brenda vendit, ashtu edhe në arenën ndërkombëtare, dalin vazhdimisht aktivitete shumë të rëndësishme për t’u kryer.
Kështu, në kuadër të Presidencës Shqiptare të SEECP, në përmbyllje të Presidencës, në mes të vitit 2015, do të organizohet Samiti i Kryetarëve të Shteteve të këtij organizmi ku roli i Institucionit të Presidentit të Republikës në këtë organizim është primar, por që buxheti i planifikuar nuk e mundëson organizimin serioz shtetëror.

Gjithashtu, viti 2015 përkon me 25 vjetorin e rënies së komunizmit në vendin tonë, ku Institucioni i Presidentit të Republikës ka të parashikuar organizimin e ceremonive me pjesëmarrjen e personaliteteve të shquara ndërkombëtare dhe buxheti i alokuar për këtë vit nuk e bën të mundur realizimin e të tilla aktiviteteve.

Duke shpresuar në pranimin e shqetësimeve të sipërpërmendura, dhe reflektimin përkatës, kërkojmë të vendoset buxheti i Institucionit të Presidentit të Republikës në parametrat e funksionimit normal të këtij Institucioni dhe të përmbushjes së misionit kushtetues të Kreut të Shtetit Shqiptar.

(a.n/BalkanWeb)

Debat në sallën e Kuvendit me kryeministrit Edi Rama e deputetit Pandeli Majko për kamatëvonesat e energjisë elektrike. Deputeti i Tiranës, Pandeli Majko ka thënë se ato duhen falur, pasi PS-në e largojnë nga forcat e majta nuk e bëjnë më njerëzore. “Ne sot do të votojmë faljen e kamatvonesave për pensionet në fshat e ç’na gjen të flasim këtu dhe për ata që janë me mbrojtje sociale. Nuk besoj se kjo na shmang nga ndonjë faturë e kripur, përkundrazi na bën më njerëzorë. Po nuk ditëm të flasim me njerëzit, nuk jemi të majtë. Të falen kamatëvonesat për energjinë”, tha Majko.

Duke ju përgjigjur deklaratave të deputetit Pandeli Majko, kryeministri Edi Rama ka deklaruar se nuk do të falet asnjë kamatë-vonesë dhe nuk do falet askush që nuk paguan energjinë.

“E vërteta është që ne kemi 20 vjet që tërhiqemi zvarrë duke bërë një faj tradicional që ne këtu sot nuk duhet t’ia lejojmë vetes, fajin e mbajtjes së pushtetit në kurriz të shtetit. E kemi shtyrë të ardhmen për shumë vite duke folur në emër të asaj, por duke qenë peng të së sotmes…Ne nuk do të falim asnjë kamatvonesë të energjisë dhe nuk do të falim asnjë mospagesë të energjisë. Dhe për ata që thonë që nuk paguajmë dot energjinë i them që pensionistët dhe personat me aftësi të kufizuar paguajnë më shumë energjinë elektrike”, ka thënë kryeministri Rama.

Ai u shpreh se kjo e majtë është zgjedhur për të vendosur barazinë përpara ligjit. “Nëse kjo shoqëri do paguante 100% energjinë, do kishim një Shqipëri më të mirë. Ne na kanë zgjedhur për të vendosur barazinë para ligjit dhe para të drejtës. Ne nuk do heqim dorë nga mbledhja e parave të energjisë”, ka thënë Rama.

Rama tha më tej se pagesa e energjisë është diçka e dobishme duke u shkëputur nga ndarjet e djathtë e majtë. Ai shtoi edhe njëherë se pagesa e energjisë sot është një mision historik dhe se nuk ka asnjë kompromis për këtë çështje.

“Sfida jonë është që me këto para të mbështesin suksesin jo parazitizmin. Nëse kur vjen puna tek personat me aftësi të kufizuar jemi të detyruar të përulemi të tjerët i konsdierojmë pa aftësi të kufizuara. Gjithçka që tha Pandi e falënderoj që më dha mundësinë ta shtjelloj këtë çështje. Sikur ne, kjo qeveri të arrijë në 4 vjet vetëm kaq, që Shqipëria të mos vjedhë më veten duke vjedhur energji, besomëni kemi bërë një mision historik. Vetëm kaq, asgjë tjetër. Në këtë betejë nuk bëjmë asnjë lëshim. Energjia paguhet dhe nuk vidhet, pikë”.

Kryeministri foli edhe për rimbursimin e naftës për fermerët, për të cilën tha se mbështetja nuk do bëhet nëpërmjet subvencionimit të korruptuar. “Ne nuk do ta rimbursojmë naftën pa faturë. Ne jemi votuar që çdo qindarkë ta çojmë në funksion të shtetit e shoqërisë. Ka marrë fund historia e subvencionit të korruptuar. E merrnin naftën për traktorët dhe e përdornin për Benzat. Ne nuk mund të mendojmë me të majtën që mendon me zemër, por pa mend. Ne duam që të mbështesim fermerët. Kush bashkohet merr më shumë mbështetje nga ne. Ne nuk jemi këtu për tu kujdesur për të mbajtur status-quon, por për të thyer status-quon. Kjo është arsyeja që unë besoj se kemi arritur të vendosemi në një pozicion jo komod por shumë të qëndrueshëm. Do të legalizojmë shtëpitë në zonat informale, dhe ata që nuk kanë alternativë do tu gjejmë alternativë”, ka thënë kryeministri Rama.

Majko: Shumë taksa për të larë “gjylen” e lënë nga paraardhësit
Deputeti i PS-së Pandeli Majko duke u ndalur tek rritja e akcizës së duhanit, tha se ajo nuk i shërben shëndoshjes së familjes shqiptare, ashtu siç deklaruan me humor deputetët e majtë, por se kjo rritje bëhet për të paguar borxhet e lëna nga qeverisja e mëparshme.

“Nuk mendoj se shqiptarëve do tu shëndoshet familja duke lënë duhanin. Nuk është duhani shkak për prishjen e familjeve, do rendisja një sërë shkaqesh për prishjen e familjeve. Një shkak janë pijet alkoolike, por ju zoti Beqaj nuk na keni sjellë ndonjë taksë për pijet alkoolike. Prishja e familjeve lidhet edhe me ekzistencën e pikave të basteve e lojërave të fatit. Me këtë buxhet nuk shikoj ndonjë taksë për lojërat e fatit. Kemi të bëjmë me një buxhet të kontraktuar, për shkak të “gjyles” që kanë lënë paraardhësit tanë.

Majko tha se këtë vit nga buxheti i taksapaguesve janë paguar 260 mln dollarë nga borxhet ndërsa deri në fund të vitit do paguhen të tjera dhe shuma do arrijë në 350 mln dollarë. “Ndërkohë që qeverisim ne paguajmë për rrugët e bëra në 2006, në 2009 etj”, tha deputeti i PS-së Pandeli Majko. Më tej ai ka kërkuar faljen e kamatëvonesave për energjinë elektrike. “Po nuk ditëm të flasim me njerëzit, nuk jemi të majtë. Të falen kamatë-vonesat për energjinë”, ka kërkuar deputeti i PS-së.

(m.k/ma.ar/BalkanWeb)

Ndërron jetë Dr Flori, kantautori dhe këngëtari i njohur shqiptar. Florand Kondi 35 vjec, i njohur me emrin artistik, “Dr Flori’ dyshohet se ka ndërruar jetë nga shkaqe natyrale. Keshtu pohojne burime nga Qendra Spitalore Universitare “Nënë Tereza në Tiranë’.Mësohet se Dr Flori ka mbërritur në spital pa shenja jete.

Burime nga Urgjenca bëjnë me dije se këngëtari mbërriti rreth orës 09:20 minuta të paradites së sotme pa shenja jete në trup.
Gjithsesi pritet që mjekësia ligjore të nxjerrë zyrtarisht shkaqet e vdekjes, por dyshimet më të forta janë dhe per nje atak kardiak zemre. Trupi u dërgua morgun e QSUT ku pritet të kryhet një autopsi e plotë, dhe pas kësaj të bëhet zyrtare shkaku i vdekjes.

Mësohet se për ngjarjen është lajmëruar edhe Policia, e cila ka nisur të hetojë mbi shkaqet që kanë çuar në vdekjen e këngëtarit të mirënjohur për publikun shqiptar. Dr. Flori para disa vitesh i këndoi Tiranës dhe fatkeqësisht ndërroi jetë ditën e çlirimit të Kryeqytetit.

Shoku i tij,kantautori Ermal Mamaqi njofton se varrimi i Doktor Florit do bëhet nesër në orën 11:00. “Për ti dhënë lamtumirën e fundit Florit, nisja për në varrezat e Sharrës bëhet nesër dt.18 ne orën 11:00 nga shtepia e tij, pranë shkollës “Emin Duraku'”- njofton Mamaqi.

Kush ishte Dr. Flori
Ish-anëtari i grupit “West Side Family’, baba i dy femijeve u bë i njohur me këngën “O cike cike”, me pas ajo me titullin, ‘Tirona’ që u performua krah kryetarit të atëhershëm të Bashkisë së Tiranës, Edi Rama.

Dr Flori është dhe kompozitor por autori i shumë këngëve. Në Festivalin e 51-të të këngës ai prezantua me këngën “Jam ti”. Muzika: Dr.Flori ft. Fabi, Orkestroi: Dr.Flori ft. Fabi, Teksti: Dr.Flori ft. Fabi.

Dr. Flori ishte një ndër tre anëtarët e rep grupit shqiptar të njohur me emrin West Side Family. Rolandi, Miri dhe Flori, dikur shokë në një klase, më pas anëtarë të një prej grupeve më të njohura muzikore të Shqipërisë. Ata nuk mund të rrinin një moment pa ngacmuar njëri-tjetrin.
Pas suksesit të madh me këngën hit “Mesazh’, shikohen në skenën e festivalit të “Këngëve të stinës”, por tashmë jo për të kënduar, por për të prezantuar.

Ndërsa kënga më së shumti që bëri jehonë ishte “Tirona”, në të cilën ishte pjesëmarrës edhe kryetari i Bashkisë së Tiranës, Edi Rama, tani kryeministër i Shqipërisë.

Teksti i këngës i shkruar nga 34-vjeçari, “Zjarr e Ftohtë”, i kënduar nga këngëtari, Luiz Ejlli, fitoi në “Festivali i Këngës 44″ dhe më vonë përfaqësoi Shqipërinë në “Eurovision Song Contest 2006″.

Ja disa nga hitet e Dr.Florit:

2010 – Origjinale (feat. Aurela Gaçe & Marsel)
2011 – Ca po menon (feat. Anila Jonuzi)
2011 – Ca na ke
2011 – S’ma ndjen
2011 – Bota nuk është bardhë e zi
2011 – Personale
2012 – Pasion (feat. Fatima Ymeri)
2012 – Tune tune (feat. Fatima Ymeri)
2012 – Ka kalle (feat. Noga)
2012 – Ku ka si Tirona (feat. Ermal Mamaqi)
2012 – Jam ti! (feat. Fabi)
2013 – Zemërthyer (feat. Tiri)
(Ballkanweb)