Ministri i Ekonomisë dhe Industrisë, Arben Ahmetaj, në një komunikim me mediat ka deklaruar se, oferta për ndërtimin e zonës së lirë ekonomike do të sjellë përfitime të mëdha për ekonominë shqiptare.

“Brenda 30 ditësh do të shpallet fituesi për zonën e Spitallës. Ky është një hap i rëndësishëm pasi janë 1.5 miliardë dollarë të mundshëm që në 9 vitet e ardhshme do të injektohen në ekonominë shqiptare, në industri të ndryshme, me teknologji të lartë. Por mbi të gjitha janë 90 mijë vende të reja pune që do të krijohen për qytetarët shqiptarë”, ka deklaruar Ahmetaj.

Ai ka nënvizuar se, ekzistenca e dy ofertave për krijimin e kësaj zone, ajo e grupit kinez dhe ajo e kompanisë italiane, që ende nuk e ka finalizuar vlerën monetare, vjen si pasojë e reformave të qeverisë për përmirësimin e klimës së biznesit.

“Sot kemi oferta sepse kemi incentivë për këtë zonë, që do ta kthejnë në një ndër zonat më konkurrueset në rajon. Kjo është ekonomia reale që ofron mundësi punësimi dhe zhvillimi ekonomik”, ka shtuar Ahmetaj.

/ Top Channel

Sektori i furnizimit me ujë dhe trajtimi i ujrave të përdorura është ndër komponentët kryesorë të bashkëpunimit Gjermani – Shqipëri. Banka gjermane KfW ka investuar 334 milionë Euro në këtë sektor brenda dy dekadave.

Një udhëtim me gazetarë, në rajonin e Beratit, organizuar nga Ambasada Gjermane në Tiranë, në kuadër të Tetorit Gjerman 2015, bën të prekshme ndryshimet pozitive që investimet gjermane në sektorin e ujit u sjellin jetës së përditshme të qytetarëve në këtë rajon. Ambasadori gjerman në Tiranë Hellmut Hoffmann thotë për DW: “Uji është shumë i rëndësishëm për jetën. Investimet gjermane ndihmojnë pikërisht për të përmirësuar kushtet e jetesës në themelin e tyre. Këtu në Berat, me financimin e KfW po bëhet rikonstruktimi i ujësjellsave. Qëllimi është përmirësimi i kushteve të jetesës së njerëzve që ata ta shohin të ardhmen e tyre, perspektivën e jetës në Shqipëri”.

Furnizim i sigurtë, tarifa të pranueshme për qytetarët

Projekti i përmirësimit të infrastrukturës bashkiake në rajonin e Beratit është pjesë e programit të investimeve në sektorin e ujit. Bledar Dollaku, përfaqësuesi i bankës gjermane KfW, që po zbaton programin thotë për DW: “Ky program përfshin shtatë qytete mes të cilave edhe rajonin e Beratit me Kuçovën me një investim total prej 65 milion Eurosh, ku Gjermania financon me 30 milion, BE me 25,5 milion dhe Zvicra me 10 milion Euro. Qëllimi i programit është sigurimi i qëndrushëm i furnizimit me ujë të pijshëm, të pastër. Programi synon higjenë të standardeve bashkëkohore në zonat ku realizohet investimi. Në shtatë qytetet pagesa për konsumimin e ujit pritet të jetë me tarifa të përballueshme nga familjet dhe bizneset.”

Berat- Kuçovë – 9,3 milion euro, në 2017 ujë në rubineta

Në rrugën kryesore të qytetit muze të Beratit punëtarët po hapin kanalet nga ku do të kalojnë tubacionet e ujësjellesit të ri Berat- Kuçovë, që do të funizohet me ujin e cilësisë së lartë nga burimi i Bogovës, 37 km larg nga qyteti i Beratit. Rreth 150 km tubacione çeliku, hekuri të derdhur dhe të galvanizuar të ndërtuar rreth 60 vjet më parë do të zëvendesohen me tubacione të reja. Situata aktuale është pothuajse dramatike: humbje rreth 80% e ujit në rrjet, furnizimi me 3 deri në 10 orë në ditë. Projekti parashikon instalimin e matësave të mëdhenj të ujit për bizneset dhe matësave për familjet si edhe zëvendësimin e 3300 lidhjeve familiare jo të rregullta.

Afrimi me standardet e BE – perspektiva e jetës në Shqipëri

Në rajonin e Beratit, qeveria gjermane mbështet me grante ngritjen dhe funksionimin e fermave familiare në zonat rurale apo biznese të tilla si linja e prodhimit për eksport të bimëve të rralla mjekësore, ndërtim i sistemit të ngrohjes qendrore për kopshtin publik në Kuçovë etj. Ambasadori gjerman, Hellmut Hoffmann, thotë se në javët në vijim, si çdo vit do të zhvillohen bisedimet qeveritare mes RFGJ dhe Shqipërisë për sektorët e bashkëpunimit ekonomik në vitet e ardhshme. “Nuk mund të parashikoj se çfarë do të dalë nga këto bisedime. Por sekstori i ujësjellës – kanalizimeve, i ujit, i energjisë, linjat e transmetimit të energjisë mbeten sektorë të rëndësishëm të bashkëpunimit. Ka edhe projekte të tjera të rëndësishme, ide të reja që priten të diskutohen. Gjermania po kontribuon në reformën e sistemit gjyqësor në Shqipëri, përmes fondacioneve të saj politike dhe kjo, krahas përmirësimit të jetës së përditshme, është pjesë e mbështetjes për ta sjellë Shqipërinë më pranë BE-së. Gjermania dhe komuniteti ndërkombëtar e mbështesin Shqipërinë në këtë proces, që sjell njëherazi edhe perspektivën e jetës këtu në Shqipëri”, thekson Ambasadori gjerman Hoffmann.

365 azilkërkues nga Shqipëria të kthyer këtë javë nga Gjermania

Numri i azilkërkuesve nga Shqipëria, të kthyer vetëm këtë javë nga Gjermania, arriti (28.10.2015) në 365 vetë. Përshpejtimi i procedurave për kthimin e të gjithë shqiptarëve që kanë kërkuar azil në Gjermani për motive ekonomike është tanimë një fakt. Ajo që mbetet paskëtaj është përpjekja për të ndërtuar jetën në Shqipëri: inisiativa private, shkollimi professional, zbatimi rigoroz i ligjeve dhe rregullave të lojës, idetë novatore që meritojnë të mbështeten me grante nga Gjermania apo donatorë të tjerë europianë. (dw)

Banka Botërore publikoi sot raportin vjetor për lehtësinë e të bërit biznes, që vlerëson faktorët që lehtësojnë ose pengojnë biznesin në 189 vende të botës.

Vlerësimi përfshin periudhën nga viti 2014 deri në qershor të vitit 2015.

Sipas raportit, Shqipëria shënon ulje në klasifikimin e 189 vendeve, duke u radhitur në vendin e 97. Një viti më parë Shqipëria renditej e 68.

Sipas vlerësimit të Bankës Botërore, Shqipëria ka shënuar hapa prapa në aspektin e lejeve të ndërtimit, duke e bërë më të vështirë procesin për shka të pezullimit në dhënien e këtyre lejeve.

Vendi ka marrë vlerësime pozitive në forcimin e mbrojtjes së investimeve të pakicave, duke paraqitur kërkesa ligjore për publikimin e menjëhershëm të transaksioneve.

Shqipëria, sipas raportit të Bankës Botërore ka lehtësuar gjithashtu eksportin ndërkufitar duke zbatuar një sistem elektronik inspektimi që ka shkrtuar kohën e procedurave që kryhen në kufi.

Kosova rendiet e 66 mes 189 vendeve dhe përparimin më të madh e ka arritur me lehtësimin e pagimit të taksave për kompanitë duke eliminuar tarifën vjetore për liçensën e biznesit.

Për rajonin e Euro-Azisë, renditjen më të lartë e ka Maqedonia, duke zënë vendin e 12. Sipas Bankës Botërore, Maqedonia merrë pikë shumë të larta në disa fusha për lehtësinë e të bërit biznes.

Gjatë vitit të kaluar, për shembull, Maqedonia e lehtësoi më tej procesin duke kërkuar regjistrimin të detyruar online. Si rezultat, Maqedonia rendiet e dyta në botë në kategorinë e hapjes së një biznesi.

Pesë treguesit kryesorë që ndikuan në vlerësimet e raportit të të bërit biznes, janë Lejet e Ndërtimit, Furnizimi me Energji, Zbatimi i Kontratave, Regjistrimi i Pronave dhe Tregëtia Ndërkufitare.

Raporti i këtij viti finalizon një punë dy vjeçare për të zgjeruar kriteret që përdoren për matjen e cilësisë së rregullave, si dhe efektshmërinë e kornizës ligjore të të bërit biznes, në mënyrë që të bëhet një vlerësim më i saktë i realitetit në terren. (voa)

Kongresi i Autoriteteve Vendore dhe Rajonale në Këshillin e Europës miratoi rezolutën për zgjedhjet e 21 qershorit 2015 në Shqipëri, bazuar në draftin e hartuar nga raportuesi britanik Stewart Dickson dhe vlerësimet e Declan McDonnell, përfaqësuesit irlandez të Komitetit të Rajoneve, pjesëmarrës në misionin vëzhgues.

“Ajo që mund të them për Shqipërinë është e ndryshme dhe e pazakontë. Aspekti i parë i çuditshëm për treguesit e mi të misionit në Shqipëri ishte që një vend me 2.8 milionë banorë ka për votime 3.2 milionë të regjistruar. 50% e këtij numri votoi dhe kjo do të thotë se mbase kanë votuar 70% e atyre që banojnë në Shqipëri”, deklaroi McDonnell.

Ai i quajti “aspak demokratike” vendimet e KQZ-së për çështjet mbi të cilat ishte shprehur gjykata më parë, privimin e personave me aftësi të kufizuara për të votuar në të gjitha qëndrat zgjedhore të vizituara prej tij, ndërsa gara sipas tij ishte e pabarabartë për kandidatët e pavarur, të cilët nuk patën financime si partitë nga buxheti i shtetit.

Ndërsa raportuesi Dickson përgëzoi autoritetet shqiptare për organizimin e zgjedhjeve sipas ndarjes së re administrative territoriale, por përmendi shqetësimet e opozitës dhe pretendimet për rryshfet e blerje vote.

“Vëzhguesit e Kongresit dëgjuan gjithashtu pretendime për intimidim dhe presion mbi punonjësit e sektorit publik. Ne u vumë në dijeni për blerjen potenciale të votës dhe rryshfeteve ndaj anëtarëve të komisioneve zgjedhore. Të gjitha këto janë praktika të papranueshme dhe autoritetet shqiptare nuk duhet të hezitojnë për të hetuar të gjitha rastet potenciale të mashtrimit”, deklaroi Dickson.

Në emër të delegacionit shqiptar, kryebashkiaku i Tiranës, Erion Veliaj u zotua në këtë seancë për ndjekjen e rekomandimeve të Strazburgut, veçanërisht për parregullësitë e vërejtura.

Por Veliaj u shpreh i kënaqur me gjetjet e raportit për “progres në krahasim me zgjedhjet e 2013-s”, për një fushatë të civilizuar elektorale, për pjekurinë e votuesve, për faktin që dita zgjedhore dhe procesi numërues u konsiderua i rregullt, dhe se për herë të parë, me këto zgjedhje Shqipëria plotësoi kriterin e ri për pjesëmarrjen 50% të kandidateve femra për këshillat bashkiakë”.

“Misioni vëzhgues ka bërë një punë të shkëlqyer në evidentimin e fushave ku është arritur progres, por gjithashtu në evidentimin e fushave që mbeten shqetësuese, për çështjet që duhen trajtuar dhe parregullësitë që duhen korrigjuar. Këto të fundit, në fakt, janë për ne pjesa më e rëndësishme e raportit, sepse do të shërbejnë si bazë për përmirësime të mëtejshme dhe për rregullimin e të gjithë procesit zgjedhor në Shqipëri. Rekomandimet e Kongresit do të shërbejnë si udhërrëfyes për autoritetet shqiptare dhe si kryetar i delegacionit, unë zotohem për të ndjekur këtë punë në çdo hap”, deklaroi Veliaj.

Sesioni i 29 plenar i Kongresit të Autoriteteve Vendore dhe Rajonale përkon me 30-vjetorin e Kartës Europiane të Vetëqeverisjes Lokale, e ratifikuar 17 vite më parë nga Shqipëria. Strazburgu njofton se pas 3 ditësh në Vlorë do të mbahet ceremonia e hapjes për Agjencinë e Demokracisë Lokale.

/ Top Channel

Gjatë këtij viti nga Shqipëria janë larguar vetëm drejt Gjermanisë 6-7 mijë shqiptarë çdo muaj, pra në 10 muaj 60-70 mijë vetë.

Sipas statistikave zyrtare gjermane, emigrantët shqiptarë në Gjermani janë të dytët nga numri pas Sirisë, prej nga njerëzit ikin prej luftës. Por kjo është një dukuri shqetëuese në dy dekada.

Analisti i njohur Fatos Lubonja thotë se është dramatik krahasimi me Sirinë 19 milionë banorë, që ikin sepse bombardohen çdo ditë, kur Shqipëria nuk ka luftë, por njerëzit ikin njëlloj.

Zoti Lubonja thotë se sot pas 25 vitesh Shqipëria është përsëri në një gjendje të ngjashme me luftën dhe kjo tregon dështimin e plotë të klasës politike, ekonomike dhe mediatike të vendit si dhe dështim i sistemit gjyqësor.

Sipas tij, shqiptarët po ikin nga Atdheu, sepse kanë ankth prej pasigurisë për të ardhmen, sepse qeveria nuk i jep asnjë siguri për të ardhmen e afërt, ndërkohë që ekonomia nuk është e qëndrueshme.

Shumica janë të papunë, thotë ai, por pak njerëz e dinë në Shqipëri se cila do të jetë puna e tyre të nesërmen, të gjithë punojnë dhe grabitin sot për sot.

Të varfërit nuk kanë para as për të ngrënë as për të shpërndarë rryshfetet e majme që u kërkohen majtas djathtas, theksoi ai.

Zoti Lubonja thotë se Shqipërinë po e braktisin edhe të shkolluarit edhe të pashkolluarit, po ikin me shpejtësi nga atdheu edhe krahu fizik i punës edhe të diturit.

Por më e keqja, thotë ai, është edhe ata që po rrinë këtu kanë braktisur pjesëmarrjen në veprimtari demokratike sepse ndjehen të pafuqishëm dhe të nënshtruar përballë arrogancës dhe indiferenca e pushtetit dhe e politikës.

Njerëzit janë mbyllur në vetvete, në punët e tyre dhe nuk marrin pjesë në ndryshimet që ka nevojë shoqëria, thotë ai.

Zoti Lubonja mendon se të katër pushtetet; politika, ekonomia, media dhe gjykata janë përgjegjës për këtë hemoragji të rëndë, ku ata vazhdojnë të korruptojnë njëri tjetrin deri në skaj.

Rrugëdalja e parë, sipas tij, është përpjekja e pamjaftueshne për t’i demokratizuar dhe emancipuar me lëvizje kulturore. Rruga tjetër është lëvizja popullore.

Por aktualisht nuk ka as demokraci në udhëheqjen politike dhe as lëvizje popullore dhe kjo gjendje është më keq se status quo-ja.

“Autoritetet politike dhe pushtetare po qeverisin territore të zbrazura nga popullata dhe territore të zbrazura nga ambicjet e njerëzve për liri, dinjitet dhe demokraci” – tha zoti Lubonja.

Nga kjo situatë, thotë ai, mund të dilet vetëm me kurajo qytetare dhe me angazhim të gjerë demokratik të shoqërisë. (voa)

Kryeministri Edi Rama përsëriti sot se do të kërkohet hetim me ekspertëizë ndërkombëtare për kontratën e ish qeverisë Berisha me CEZ-in. Opozita sulmon qeverinë për zgjidhjen me mirëkuptim të kontratës e këmbëngul për hetim ndërkombëtar

Në Shqipëri çështja e kompanisë ceke CEZ e cila për disa vite administroi kompaninë e shpërndarjes së energjisë, vazhdon të mbetet pjesë e debateve politike. Ajo duket se është kthyer më shumë pjesë e retorikës politike se sa një vullneti për të bërë dritë rreth saj. Aq më tepër kur nuk bëhet fjalë për një rast të zbuluar papritur. I njejti debat u zhvillua dhe një vit më parë kur në parlament kaloi marrëveshja e arritur  mes qeverisë shqiptare dhe kompanisë ceke për një zgjidhje miqësore të mosmarrëveshjes që kishte përfunduar në dyert e Arbitrazhit Ndërkombëtar. Sërish sot kemi të majtën që akuzon kundërshtarët e vet politik për kontratën që u realizua me cekët në vitin 2009, dhe opozitën që drejton gishtin nga qeveria aktuale për marrëveshjen e arritur në 2014.

Kryeministri Edi Rama, iu rikthye kësaj teme në një takim të orgnizuar për të bërë bilancin njëvjetor të operacionit kundër vjedhjeve dhe abuzimeve në sektorin energjitik, duke deklaruar se kontrata e ish-qeverisë Berisha me CEZ-in ishte sipas tij një pazar i madh “dhe kur u prish pazari i madh, bëri gabimin e madh, fajin e madh, mëkatin e madh të ofensivës policore, duke e ekspozuar tërësisht shtetin shqiptar përballë privatizuesve dhe duke e dënuar shtetin shqiptar si palë humbëse në çdo lloj gjykate”, deklaroi zoti Rama.

Por për një pazar po të madh flet edhe kreu i opozitës Lulzim Basha duke ju referuar marrëveshjes për zgjidhjen me mirëkuptim të kontratës me CEZ-in nga qeveria aktuale, e që sipas tij i ka kushtuar shtetit 600 milion euro.

Palët tani po këmbëngulin ne nevojën e një hetimi. Zoti Rama tha sot sërish se do kërkojë një hetim me mbështetjen e ekspertëve ndërkombëtarë, ndërsa mbrojti marrëveshjen e arritur nga qeveria e tij:  “Eshtë një marrëveshje e cila u negociua jo në kulisa, as në zyrën e Kryeministrit, siç negocioheshin pazaret e faktuara me dokumente që do të jenë pjesë e hetimit penal që ne do të kërkojmë me mbështetjen e ekspertizës ndërkombëtare dhe u negociua në zyrat e Komunitetit të Energjisë në Vjenë, me pjesëmarrjen e 15 personave nga pala shqiptare, dhe me çdo seancë të regjistruar”.

Ideja e qeverisë për hetim, dy vjet pasi ndodhet në pushtet, ngjan më tepër si një kundërpërgjigje ndaj opozitës, e cila gjithashtu këmbëngul për një hetim ndërkombëtar, dhe ka depozituar për këtë dhe një projektligj në parlament.  “Hetimi i skemës më të madhe të korrupsionit, i aferës së CEZ është gur themeli për stabilitetin e vendit dhe të ardhmen e tij. Çdo ditë që kalon pa hedhur dritë e pa bërë transparencë, pa nxjerrë përgjegjësitë dhe pa i vënë para drejtësisë për 600 milionë euro që u janë marrë shqiptarëve, është një kthim pas. Nuk mundet që Edi Rama të vazhdojë të qeverisë vendin, kur e ka plaçkitur atë me 600 milionë euro. Nuk mundet Edi Rama të dalë para shqiptarëve, kur u ka marrë nga shtëpia e tyre, nga tavolina e bukës së tyre, nga ekonomia e tyre, nga e ardhmja e fëmijëve të tyre, 600 milionë euro. Zvarritja e qëllimshme është thellim i kësaj vjedhje”, u shpreh zoti Basha.

Mbi marrëveshjen e arritur nga qeveria dhe CEZ-i për zgjidhjen me mirëkuptim të kontratës javën e shkuar edhe Kontrolli i Lartë i shtetit paraqiti një padi në Prokurori pasi sipas tij ka patur një dëm prej 479 milion eurosh. Por dhe gjetjet e këtij institucioni u cilësuan si të pambështetura nga qeveria, e cila foli madje dhe për akuza me një prapavijë politike. (voa)

Qeveria do të paguajë një kompani konsulence për ta ndihmuar që të vlerësojë ofertën e kompanisë kineze “China State Construction” për ndërtimin e Rrugës së Arbrit.

Përmes një njoftimi zyrtar bëhet e ditur se, Avokatura e Shtetit ka hapur zyrtarisht procesin e kontraktimit të studios konsulente, e cila do të këshillojë komisionin e negocimit.

Sipas dokumentit, qeveria kërkon asistencë për të vlerësuar jo vetëm aspektin ligjor, por edhe atë financiar të ofertës që ka paraqitur kompania kineze.

Rruga e Arbrit do të ndërtohet përmes një procedure të veçantë, jashtë ligjit të konçesioneve dhe atij të partneritetit publik-privat.

Pak muaj më parë, Parlamenti miratoi një ligj të posaçëm, i cili i jep të drejtën qeverisë të shmangë ligjin e prokurimeve dhe t’ia akordojë kompanisë kineze pa garë kontratën për ndërtimin, mirëmbajtjen dhe menaxhimin e rrugës.

Sipas ligjit, i gjithë procesi i negocimit për lidhjen e kontratës do të ndiqet nga një komision i posaçëm, i kryesuar nga Ministria e Transporteve, por me anëtarë edhe nga Ministria e Financave, ajo e Zhvillimit Ekonomik, e Drejtësisë dhe Avokatura e Shtetit.

Komisioni do të ketë për detyrë të shqyrtojë propozimin që kompania kineze ka paraqitur në Ministrinë e Transporteve. Në këtë propozim janë përcaktuar kushtet financiare, afati dhe gjithë detajet e tjera të draft-kontratës.

Dokumenti i Avokatit të Shtetit zbulon se oferta zyrtare e “China State Construction” ka mbërritur, edhe pse qeveria, përkatësisht Ministria e Transportit ka qenë e rezervuar për ta bërë publike.

Tani, ajo që mbetet për t’u parë është se cilat do të jenë kushtet financiare, por jo vetëm ato të propozuara nga “China State Construction” dhe se çfarë do të pranojë qeveria.

Ajo që dihet me siguri është se 26.8 kilometrat e patenderuar të rrugës do të ndërtohen nga kompania kineze dhe, me gjasa, aksi do të jetë me pagesë për qytetarët; drejtpërdrejt ose përmes buxhetit, apo një kombinim i të dyjave. Kjo do të zbulohet kur kontrata të bëhet publike.

/ Top Channel

Në Tiranë u zhvillua të dielën “Maratona e Jetës”, një veprimtari për të ndërgjegjësuar opinionin ndaj kancerit të gjirit, i cili po përhapet në mënyrë të konsiderueshme. Një tjetër tubim u zhvillua në sheshin Nënë Tereza për Ditën Europiane kundër Trafikimit të Personave.

Organizata dhe vullnetarë të shoqërisë civile si dhe të rinj e banorë te Tiranës u bashkuan sot në sheshin Nënë Tereza në Dita Europiane kundër Trafikimit të Personave.

Drejtues të arsimit, të çështjeve sociale dhe të forcave të rendit bënë thirrje për pjesëmarrje të vendosur në luftën kundër trafiqeve.

Koordinatorja kombëtare kundër trafiqeve njerëzore, Elona Gjebrea, kërkoi që qytetarët të mos qëndrojnë indiferentë, por të ndihmojnë personat e rrezikuar.

Në të njëjtën kohë me veprimtarët kundër trafiqeve njerëzore në sheshin nënë tereza, qindra veprimtarë të tjerë morën pjesë në maratonën e jetës, kushtuar ndërgjegjësimit të grave kundër kancerit të gjirit.

Ministri i shëndetësisë Ilir Beqaj, tha se sëmundja është detyrë e mjekësisë, por kujdesi për shëndetin është detyrë e të gjithëve për të parandaluar të keqen me sporte dhe veprimtari pro mjedisit.

Dita Europiane kundër trafikimit të personave u bashkua sot edhe me ditën e Tiranës pa makina dhe me maratonën e jetës për ndërgjegjësimin e shoqërisë ndaj kancerit të gjirit.

Qindra sportistë dhe shkollarë mbushën rrugët e kryeqytetit me maratonistë dhe me biçikleta, duke tërhequr vëmendjen për kujdes më të madh ndaj jetës dhe shëndetit. (voa)

Socialdemokrati gjerman Knut Fleckenstein, raportues i PE për Shqipërinë has vështirësi për të besuar shtyrjen e dytë të datës së publikimit të raportit të progresit nga ekzekutivi europian, qoftë për Turqinë, qoftë për sebepin e PPE-së. Ai këshillon shqiptarët të vazhdojnë në rrugën e duhur, por dhe që të mos kenë pritshmëri të larta nga raporti i radhës.

“Unë nuk do doja të bëhej kjo (shënim: shtyrje) , por nuk besoj se këto zëra janë të vërtetë. Nuk arrij ta besoj dot se Komisioneri përgjegjës për këtë paketë tani, nuk e prezanton dot pse nxiton për një takim partiak të PPEsë në Madrid. Unë nuk mendoj se zgjerimi nuk është më kaq i rëndësishëm. Por, mesazhi im kryesor për Shqipërinë është “vazhdoni të ecni” sepse Shqipëria është në një rrugë mjaft të mirë. Edhe pse e dimë se ka ende shumë për t’u bërë, por, për shembull për reformën në drejtësi është bërë shumë punë dhe tani priten komentet e Komisionit të Venecias dhe më pas, ka shumë më tepër rëndësi madhore, që kjo reformë të marrë me shumicë të gjerë në arlamentin tuaj, të gjitha ndryshimet kushtetuese, sepse kjo reformë është baza për gjithçka tjetër, si dekriminalizimi, lufta ndaj korrupsionit e me radhë, ndaj mendoj se jemi tashmë në një fazë emocionuese.”, është shprehur Fleckenstein.

TCH : Çfarë duhet të presin shqipëtarët nga raporti i ri?

“Unë do ju thoja mos prisni shumë. Kësaj radhe do të përmendet vetëm se ku ka patur progres, sigurisht, për 5 prioritetet kyçe ka patur progres, dhe se cilat janë hapat e radhës për t’u marrë, që ju i dini më mirë se Komisioni. Kështu që shpresoj se vitin tjetër do të mund të ecim para me hapin e mëtejshëm”.

TCH: Pra, vitin tjetër mund të nisin negociatat për anëtarësim?

“Unë shpresoj vërtet kështu, që ato të nisin vitin e ardhshëm, dhe jam i bindur se do ishte e drejtë dhe e ndershme të veprohej kështu”.

/ Top Channel