Arkivi mujor: Shkurt 2015

Maqedonia

Administrata amerikane shqetësime për situatën në Maqedoni

Komento

Departamenti Amerikan i Shtetit (DASH) ka shprehur shqetësime lidhur me tensionet politike në Maqedoni.Një zëdhënës i DASH tha se Qeveria amerikane me shqetësim po ndjek zhvillimet politike në Maqedoni, pas shpërthimit të aferës së përgjimeve dhe rastin e ashtuquajtur “Puç”, informon Zëri i Amerikës në gjuhën maqedonase.

Uashingtoni zyrtar vlerëson se këto zhvillime kanë ngritur çështje serioze për qytetarët e këtij vendi, por edhe për miqtë ndërkombëtarë.

DASH i bën thirrje autoriteteve maqedonase që të respektojnë standardeve më të larta të shtetit të së drejtës, transparencë, mbrojtje të lirisë së shprehjes dhe pavarësi të gjyqësorit, por edhe sigurimin e integritetit të proceseve demokratike në Maqedoni.

Lidhur me raportet e disa Mediave se mund të anulohen vizat amerikane dhe sanskione të tjera për shumë zyrtarë dhe protagonistë politik në Maqedoni, një zyrtar amerikan nuk përjashtoi një gjë të tillë dhe se informacione për këtë çështje mund të sigurohen edhe në faqen zyrtare të DASH:
(http://travel.state.gov/content/visas/english/general/ineligibilities.html#visa и http://travel.state.gov/content/visas/english/fees/presidential-proclamations.html).

(INA)

Shqipëria

Atentatet me eksploziv, katër të tjerë në pranga, dy në kërkim

Komento

Prokuroria e Krimeve të Rënda ka vënë në pranga pesë persona dhe shpallur në kërkim dy të tjerë, të dyshuar si organizatorët dhe autorë të vendosjes së eksplozivë në farmacine e të atit të Ministrit të Brendshëm, Saimir Tahiri dhe për ekspolzivin e vendosur pranë stacionit të autobusit në rrugën “Muhamet Gjollesha”. Me anë të një njoftimi për shtyp, Prokuroria e Përgjithshme thotë se këta persona akuzohen për “Vepra me qëllime terroriste” , “Krijim të grupit të strukturuar kriminal” dhe “Kryerjes se veprave penale nga grupi i strukturuar kriminal”.

Në bazë të kësaj akuze edhe Gjykata e Krimeve të Rënda vendosi arrestimin për shtetasit Lumjan (Emiljano) Matmuja, Ernest Gjuta, Kamber Bruka, Erjon Dule, ndërsa Emirjon Gjuta ka qenë i ndaluar më parë si autori i shitjes së telefonit të përdorur për shpërthimin në rrugën “Muhamet Gjollesha”.

Janë shpallur në kërkim Vladimit Gjuta dhe Baftjar Bruka, dy emra jo të panjohur për Policinë e Shtetit, pasi janë ndaluar disa herë për ngjarje të ndryshme kriminale në vend.

Ndërkohë, Vladimir Gjuta dhe Lumjan Matmuja janë arrestuar nga policia më 5 shtator 2014 në Sheshin Skënderbej, pasi në automjetin e tyre u gjetën armë. Më pas ata u lanë të lirë.

Pas shpërthimit me tritol në farmacine e babait të Ministrit të Brendshëm, Saimir Tahiri dhe në stacionin e autobusit të Valdimir Gjuta dhe Baftaj Bruka janë në kërkim për t’u arrestuar, ndërsa për eksplozivin të vendosor në një biçikletë pranë shkollës “Petro Nini” dhe shpërthimin në shtëpinë e komisar Alfred Numait, hetimet janë në vijim. / Top Channel

Shqipëria

Rama-Meta kokë më kokë për bashkitë. PS ofron 3, LSI kërkon 4 bashki të nivelit të parë dhe Pogradecin

Komento

Koalicioni qeverisës përfshihet nga ethet elektorale të Lokaleve të 21 Qershorit. Takimi i përjavshëm i të mërkurës Rama-Meta ka shërbyer thjesht për të ndërtuar platformën e ndarjes së bashkive, ku do të garojnë kandidatët e PS dhe LSI-së. Një burim pranë negociatave i tha Top-Channel se për momentin është duke u diskutuar për Bashkitë e nivelit të parë, siç quhen ndryshe 12 bashkitë kryesore që janë kryeqendrat e 12 Qarqeve te vendit. Vetëm atëherë kur të jetë arritur akordi për këto 12 bashki, palët do të diskutojnë emrat e kandidatëve.

Mësohet se Rama i ka propozuar Metës një projekt “9+3”, që do të thotë se LSI do të marrë kandidatët në 3 bashki dhe PS në 9 të tjerat.

Për cilat bashki bëhet fjalë? Tre bashkitë e propozuara nga socialistët janë ato të Kukësit, Lezhës dhe Beratit për LSI-në, ndërsa 9 të tjerat; ato Shkodër, Korçë, Elbasan, Durrës, Tiranë, Fier, Vlorë, Gjirokastër dhe Laç; të jenë me kandidatë socialistë. Por duket se Meta nuk e ka pranuar këtë formulë.

Negociatat kanë vijuar edhe paraditen e së enjtes në kafenenë e Kuvendit, ku Rama dhe Meta kanë bashkëbiseduar për më shumë se 30 minuta përpara nisjes së seancës plenare.

Burime nga Kuvendi pohojnë se Meta ka kërkuar në këtë takim, që LSI të ketë Bashkitë e Fierit, Beratit, Lezhës, madje edhe Gjirokastrën, si Bashki të nivelit të parë, ndërsa atë të Pogradecit si Bashki të nivelit të dytë.

Kërkesa e LSI-së për Fierin dhe Gjirokastrën e ka komplikuar ekuacionin e mbërritjes drejt një dakordësie. Socialistët nuk duan asesi të humbasin Fierin dhe as Gjirokastrën, bastione të tyre.

E ndërsa aleatët po negociojnë për bashkitë, në selinë e LSI-së, grupi i punës është duke punuar për kandidatët.

Emrat që qarkullojnë në LSI për kadidatë janë: në Bashkinë Berat është Gledion Rahovica, aktualisht deputet; Robert Bitri në Fier, Viktor Tushe në Lezhë, ndërsa për Gjirokastrën Vangjel Tavo. Ndërsa për socialistët, në Bashkitë e nivelit të parë, pavarësisht sesi do të shkojnë negociatat për Fierin dhe Gjirokastrën, duket i pamundur rikandidimi i Baftjar Zeqos dhe Flamur Bimes, ndërkohë që një pikëpyetje e madhe ekziston për Qazim Sejdinin e Elbasanit.

I vetmi që duket në pozita të forta për rikandidimin duket Vangjush Dako, në Durrës, ndërsa në Shkodër për PS-në po bëhen gjithmonë e më konsistente zërat për Keti Bazhdarin.

Paralelisht janë duke u kryer negociata edhe me atë, që mund të quhet “martesa” më e re politike në vend, PDIU-në e Shpëtim Idrizit, i cili ka ambicie për të patur Bashkitë e Konispolit, Patosit dhe për të vijuar së drejtuari atë të Librazhdit.

Por nëse mazhoranca do të arrijë një marrëveshje me PDIU-në, atëherë do të shkohet drejt një marrëveshjeje politike, e cila vlen për t’u parë nëse do të jetë edhe më e gjerë se sa zgjedhjet lokale.

Gjithsesi, java e ardhshme do të jetë vendimtare për koalicionin qeverisës, në konfigurimin e zonave se ku do të kenë kandidatët e tyre.

Burime pranë negociatave shprehen se mazhoranca synon ta ketë përfunduar këtë proces dhe të shpallë kandidatët e saj më 5 mars. / Top Channel

Maqedonia

Situata politike në Shkup, delegacioni i PSE-së takon Zaevin: Jemi të shqetësuar

Komento

Një delegacion i Partisë së Socialistëve Evropiane, i kryesuar nga kryetari Sergei Stanishev dhe eurodeputeti Richard Howitt, është takuar mbrëmjen e së mërkurës me udhëheqësin e partisë opozitare maqedonase, LSDM. Delegacioni i PSE-së ka shprehur shqetësimin për shkak të gjendjes aktuale politike në Maqedoni dhe ka bërë thirrje që vendi, të bëjë atë që pritet nga një vend kandidat për anëtarësim në BE: të përmbushë kriteret e Kopenhagenit.

“Nuk ka negociata për kriteret e larta politike, si liria e gjyqësorit, e Mediave, e fjalës, por dhe lirisë së opozitës për të kritikuar pushtetin. Jemi të shqetësuar nga akuzat e orientuara drejt liderit të opozitës, Zoran Zaev”, ka deklaruar kryetari i PSE-së, Sergei Stanishev, pas takimit me udhëheqësin e LSDM-së.

Stanishev ka paralajmëruar se, gjatë vizitës së tyre do të takohen edhe me përfaqësues të shoqërisë civile, me përfaqësues të Qeverisë dhe të partive të tjera politike.

Edhe ish-raportuesi për Maqedoninë në Parlamentin Evropian, Richard Howitt, u ka bërë thirrje autoriteteve të vendit që të respektojnë standardet e vendosura.

“I lus të gjithë autoritetet e sigurimit dhe gjyqësorit në vend, që të respektojnë të drejtat fundamentale: parimin e barazisë para ligjit dhe supozimin e pafajësisë. Ka histori pikëlluese në këtë vend, në këtë rajon, por dhe në pjesë të tjera të Evropës, të sistemeve të përgjimit dhe të akuzave ilegale, të cilat morën hov kundër individëve për qëllime politike. Këto praktika nuk duhet të kenë vend sot, qoftë në Maqedoni ose në Evropë”, ka thënë mes të tjerash Howitt. / Top Channel

Kosova

Rasti “Stojanoviq” të mos injorohet!

Komento

Fletë-arresti i Interpolit në kërkim të deputetit në Kuvendin e Serbisë, Momir Stojanoviq, është lëshuar me kërkesën e një prokurori ndërkombëtar të Misionit Evropian për Sundimin e Ligjit, EULEX, në kuadër të Prokurorisë Speciale të Kosovës.Stojanoviq është në mesin e 17 personave të kërkuar për krime lufte në Kosovë.

Kërkesa për arrestimin e tyre është dërguar në kuadër të një lënde, e cila është subjekt hetimesh pesë vjeçare, e që kanë të bëjnë me periudhën kur Stojanoviq ishte shef i sigurimit në korpusin e dikurshëm të Ushtrisë Jugosllave në Prishtinë.

Stojanoviq sot është deputet i Partisë Përparimtare të Serbisë, e cila udhëhiqet nga kryeministri serb, Aleksandar Vuçiq. Ai është gjithashtu kryetar i komisionit parlamentar për çështje sigurie.

Ndryshe, organizatat që mbrojnë të drejtat e njeriut në Kosovë thonë se kërkimi dhe arrestimi i personave që dyshohet se kanë kryer kime është shumë i rëndësishëm.

Drejtori ekzekutiv i Këshillit për Mbrojtjen e të Drejtave dhe Lirive të Njeriut, Behxhet Shala, thotë se përpjekjet për arrestimin e Momir Stojanoviqit dhe shumë personave të tjerë që dyshohet se kanë bërë krime janë përpjekje të mira për drejtësinë.

“Nëse arrestohen ata persona që janë në listë, është mirë. Po ashtu nëse gjykohen, është mirë për viktimat, për drejtësinë. Por, prej asaj që është bërë publike, deri të ekzekutimi i atyre akuzave, është një rrugë e gjatë dhe mendoj që nuk do të shkojë me një rritëm të përshpejtuar, por ndoshta as nuk do të arrestohen të gjithë ata të cilët janë në listën e kërkimit”, tha Shala.

Natasha Kandiq, e cila ka themeluar Fondin për të Drejtën Humanitare, për rastin në fjalë, thirret në dëshminë e dëshmitarit Nik Peraj, ish komandant i Ushtrisë Jugosllave.

Zonja Kandiq kujton se Peraj, në dëshminë e dhënë më 2002 gjatë procesit gjyqësor në Tribunalin e Hagës kundër ish presidentit serb, Slobodan Millosheviq, pati folur për “operacionin Meja” në prill të vitit 1999 në komunën e Gjakovës dhe pati cituar Momir Stojanoviqin të ketë thënë se po përgatiten vrasje në numër të shqiptarëve.

Trupat e pajetë të shqiptarëve të vrarë në këtë lokacion në komunën e Gjakovës janë zbuluar në varrezën masive në Batajnicë, afër Beogradit.

Sipas Perajt, Kandiq thotë se shkak për “operacionin Meja” ka qenë vrasja e një polici serb atëbotë, Millutin Prashçeviq.

Drejtori ekzekutiv i Fondit për të Drejtën Humanitare Kosovë, Bekim Blakaj, shprehet se futja e emrit të Momir Stojanoviqit në listën e personave të kërkuar nga Interpoli, jep shpresë se ai do të arrestohet dhe drejtësia do të vihet në vend.

“Ky është një hap shumë pozitiv e sidomos për shkak se i njëjti ka pasur një gradë goxha të lartë në hierarkinë ushtarake serbe deri tani vonë. Të gjithë kemi pasur dyshime se ndoshta kurrë nuk do të nxirren para drejtësisë, sidomos ata që kanë pasur përgjegjësi komanduese. Prandaj unë e shoh si një hap goxha pozitiv”, tha Blakaj.

Blakaj thotë po ashtu se praktikat e deritanishme kanë treguar se autoritetet në Serbi nuk kanë bashkëpunuar me drejtësinë, por tani kur bëhet fjalë për Interpolin ndoshta gjërat do të ndryshojnë.

“Besoj se megjithatë autoritetet serbe do të vihen në një pozitë ku do te jenë të shtyrë të bashkëpunojnë me drejtësinë. Mendoj që ketë rast thjesht nuk mund ta injorojnë dhe duhet t’i përgjigjen Interpolit”, tha Blakaj.

Lidhur me ketë çështje, në një përgjigje me shkrim përmes postes elektronike, Ministria e Drejtësisë në qeverinë e Kosovës ka thënë se “Departamenti për Bashkëpunim Juridik Ndërkombëtar, pranë Ministrisë së Drejtësisë, në të gjitha rastet që është duke u zhvilluar procedurë penale para organeve tona gjyqësore ose është nxjerr vendim për kryerjen e ndonjë vepre penale dhe për të gjitha rastet që është kërkuar lëshimi i Letërreshtimit ndërkombëtar, Ministria e Drejtësisë do të kërkoj ekstradimin e tyre”.

Interpoli është organizata më e madhe ndërkombëtare policore në botë.

Pjesë e kësaj organizate janë 190 shtete. Kosova ende nuk është pjesë e këtij mekanizmi. (rel)

Kosova

Interpoli kërkon 17 serbë të dyshuar për krime lufte në Kosovë

Komento

Autoritetet serbe reaguan pas njoftimeve se në policinë ndërkombëtare janë ngritur urdhër arreste për 17 të dyshuar për krime lufte, në mesin e tyre një deputet serbAutoritetet serbe thanë se nuk e njohin autoritetin e gjykatave të Kosovës. Komentet e tyre pasuan njoftimet se një gjykatë në Gjakovë, në Kosovën perëndimore, ka shpallur një urdhër arresti për ish gjeneralin serb Momir Stojanoviç dhe 16 serbë të tjerë, nën akuzat për krime lufte.

Urdhër arresti tashmë është në faqen e policisë ndërkombëtare (Interpol), ku është vendosur me kërkesën e një prokurori ndërkombëtar të Misionit të Bashkimit Evropian për sundimin e ligjit, EULEX.

Urdhër arresti pasoi një periudhë hetimesh pesë vjeçare, që lidhen me kohën kur Momir Stojanoviç ishte pjesë e korpusin të dikurshëm të Ushtrisë Jugosllave në Prishtinë.

Ai dhe 16 persona të tjerë dyshohen për përfshirje në masakrën e fshatit Mejë të komunës së Gjakovës më 27 prill të vitit 1999, kur ishin vrarë afro 400 shqiptarë. Trupat e shumicës prej tyre ishin fshehur për një kohë në një varrezë masive në Serbi.

Në të njëjtin urdhër arrest janë edhe Nikola Miçunoviç, Zoran Mirkoviç, Momçilo Stijoviç, Momçilo, Milutin dhe Miladin Novakoviç, Dragan e Aleksandër Pekoviç, Zhivko Vuksanoviç, Mirash Gegoviç, Predrag Stojanoviç, Muharrem Ibraj, Misho Popoviç, Dimitrije Rashoviç, Sreten Camoviç dhe Llazar Drashkoviç.

Në bazë të këtij urdhër arresti ditë më parë Podgoricë, kryeqyteti Malit të Zi, është arrestuar Mirash Gegoviç, i cili ndodhet në paraburgim.

Momir Stojanoviç aktualisht është deputet i Partisë Përparimtare të Serbisë, që udhëhiqet nga kryeministri serb, Aleksandar Vuçiç dhe kryetar i komisionit parlamentar për çështje të sigurisë.

Ai u tha medieve serbe se urdhër arresti ndaj tij është trysni politike ndërsa pret mbështetjen e shtetit serb.

“Këto urdhër arreste kanë funksion të dyfishtë: kjo është në njëfarë mënyrë përgjigje e institucioneve të përkohshme të Kosovës ndaj vendimit të Kombeve të Bashkuara për formimin e gjykatës për krimet që kanë bërë pjesëtarët e Ushtrisë Clirimtare të Kosovës, ndërsa në anën tjetër nëpërmjet tyre të pengohet kthimi i serbëve në Kosovë”, tha ai.

Ndërsa, ministri në qeverinë e Serbisë Aleksandër Vulin, tha se Serbia nuk njeh kurrfarë gjyqi në Gjakovë, ndërsa sipas tij, koha dhe vendi i shpalljes së fletë arrestit si dhe zgjedhja e njerëzve “nuk është e rastësishme”.

“Qeveria në Prishtinë në këtë mënyrë dëshiron t’i shmanget marrëveshjes së Brukselit. Që nga fjalët e Hashim Thaçit se Kosova do të nisë një aktakuzë për gjenocid e deri te gjoja fletë arrestet për krime lufte për deputetë serbë e gjeneralë, janë mënyra që të frikësohen serbët për t’u kthyer dhe t’u thuhet se këtë nuk mund ta bëjnë”, citohet të ketë thënë ministri serb.

Autoritetet vendase e ndërkombëtare në Kosovë nuk e kanë komentuar ngritjen e urdhër arrestit, ndërsa veprimtarët humanitar thonë ndonëse është e vështirë të besohet se Serbia do të dorëzojë të kërkuarit, fakti që urdhri është ngritur nga policia ndërkombëtare, shton shpresat për vënien e drejtësisë.

Kosova doli nga lufta Kosova doli nga lufta me mbi 10 mijë të vrarë dhe mbi 5 mijë të zhdukur. Një pjesë e madhe e trupave u gjetën në varreza masive ne Serbi ku ishin dërguar nga forcat serbe në përpjekje për të fshehur gjurmët e mizorive të tyre. Varreza më e madhe është zbuluar në vitin 2001, në Batajnicë afër Beogradit, ku në terrenet e stërvitjeve të forcave të posaçme serbe u gjetën trupat e 800 shqiptarëve të Kosovës.

Edhe më tej nuk dihet asgjë për fatin e mbi 1 mijë 600 personave, pjesa më e madhe të përkatësisë kombëtare shqiptare. (voa)

Bota

Komisioni i BE kërkon Bashkim Energjetik

Komento

Furnizimi me energji i Evropës duhet të bëhet më i lirë, më efikas dhe më i pavarur nga Rusia. Por për këtë nevojitet një politikë energjetike gjithëevropiane.BE ka tregun e brendshëm. Por në sektorin energjetik vazhdon të ekzistojë partikularizmi evropian. Çdo shtet anëtar i BE ndjek në një masë të konsiderueshme politikën e tij energjetike.
Për shkak të pikërëndesave të ndryshme – Franca mbështetet tradicionalisht në energjinë atomike, Gjermania mbështet prej disa vitesh veçanërisht energjitë e ripërtëritshme – tregu energjetik evropian është më i copëzuar se më parë. Para së gjithash rrjetet janë të orientuara tek shtetet nacionale. Dhe kur blihet energji nga bota e jashtme, çdo shtet shumicën e herëve del si blerës individual. Kjo e bën furnizimin me energji të shtrenjtë dhe pak ekonomik. Sipas Komisarit të BE përgjegjës për Politikën Energjetike, Miguel Arias Canete “Evropa humbet çdo vit deri 40 miliardë euro, sepse nuk ka një treg të ndërthurur energjetik”. Kjo do të ishte e barabartë me 80 euro humbje, për çdo evropian çdo vit.
Zvogëlimi i ndikimit rus
Por copëzimi nuk është vetëm harxhim, por edhe varësi. Këtë shtetet e veçanta e vënë re para së gjithash kur kanë probleme me furnizuesit, për shembull me Rusinë. Por Rusia është furnizuesja më e rëndësishme me gaz e BE, mbulon një të tretën e nevojës energjetike. Por disa importues gazi, si Bullgaria ose shtetet baltike janë thuajse plotësisht të varura nga gazi rus.
Konflikti midis Rusisë dhe Ukrainës e ka ashpërsuar edhe më shumë konfliktin. Ukraina përcjell rreth gjysmën e gazit të caktuar për në BE përmes tubacioneve të saj. Në raport me Rusinë, gazi është bërë përfundimisht çështje strategjike. Këto të gjitha janë shkaqe që shtetet e BE të afrohen më shumë në politikat energjetike.
Trase energjetike mes për mes Evropës
Sa e madhe është kjo detyrë, këtë Mares Sefcovici, Komisari i BE për Bashkimin Energjetik e përshkroi pak kohë më parë: “Në tregun energjetik ne duhet të nisim praktikisht edhe njëherë nga e para dhe ta ndërtojmë nga e para tregun”. Në bazë të dokumentit të paraqitur tani, energjia synohet të bëhet për qytetarët “e sigurtë, e qendrueshme, konkuruese dhe e bleshme”. Një rrugë për në këtë objektiv është diversifikimi i ofruesve.
Për këtë do të ndërtohen ose do të zgjerohen marrëdhëniet e furnizimit me Norvegjinë, SHBA, Algjerinë ose Turkmenistanin. Një blerje e përbashkët e energjisë do t’i ulë çmimet. Edhe pjesa e gazit të lëngshëm, e cila transportohet me cisterna do të rritet. Dhe përsa i përket energjisë do të ketë rrjete transevropiane, të cilat e përshkojnë tej për tej Evropën. Për shembull energjia djellore do të transportohet nga rajoni i Mesdheut për në Veri, energjia e erës nga Deti i Veriut për në Jug.
Komisioni synon një shkëmbim ndërkufitar të energjisë për 10 përqind të prodhimit, gjë që, po ta masësh me mundësitë teknike dhe me nevojën, nuk është synim veçanërisht ambicioz. Po krahasuar me gjendjen aktuale është shumë. (dw)

Bota

Clapper: furnizimi i Ukrainës me armë do të provokonte Putinin

Komento

Zyrtari më i lartë i zbulimit amerikan tha se furnizimi i Ukrainës me armë për të luftuar separatistët e mbështetur nga Moska, do të provokonte një “reagim negativ” nga presidenti rus Vladimir Putin. Por ai shtoi se personalisht është në favor të furnizimit të Kievit me armë mbrojtëse nga Uashingtoni.Duke folur para Komisionit të Senatit për Shërbimet e Armatosura, James Clapper, drejtor i Zbulimit Kombëtar, tha se ndërsa veprimet e zotit Putin janë të vështira për t’u parashikuar, një vendim i SHBA për të armatosur Ukrainën mund të bënte që Rusia t’i furnizonte separatistët me më shumë armatime të sofistikuara.

Zoti Clapper tha se ai personalisht do të ishte pro furnizimit të Ukrainës me armë mbrojtëse, por shtoi se kjo është thjesht pikëpamja e tij personale dhe nuk përfaqëson një politikë zyrtare të komunitetit të zbulimit.

Zyrtarët e Shtëpisë së Bardhë thonë se ata janë ende duke shqyrtuar mundësinë për armatosjen e Ukrainës, forcat e së cilës ndonjëherë kanë qenë të armatosura më keq se sa separatistët.

Zoti Clapper tha se gjetja e një zgjidhjeje të qëndrueshme për krizën e Ukrainës që të lejonte Kievin të integrohej me Perëndimin, do të jetë e vështirë, për të thënë të paktën. (voa)

Shqipëria

Horzetzky: ‘Besueshmëria – formula magjike për investime’ në Shqipëri

Komento

Sekretari i shtetit në ministrinë e Ekonomisë të Renanisë Veriore-Vestfalisë, Günther Horzetzky, vlerëson pozitivisht shanset për investime në Shqipëri. Ai u takua me ministrin e Ekonomisë së Shqipërisë, Arben Ahmetaj.DW: Dje (25.02.15) ambasada e Shqipërisë në Berlin, konsullata e nderit e Shqiperisë në landin e Renanisë Veriore-Vestfalisë, në bashkëpunim me ministrinë e Ekonomisë të landit organizuan një takim për investimet në Shqipëri. Ju pritët ministrin e Ekonomisë, Arben Ahmetaj, i cili promovoi mundësitë ekonomike të Shqipërisë dhe ftoi investorët për të bashkëpunuar. Cili është vlerësimi juaj për shanset e bashkëpunimit ekonomik?
Horzetzky: Shanset i vleresojmë si shumë pozitive. Ne u takuam dhe këtë nuk do ta kishim bërë, sikur të mos kishim patur shpresë. Besoj se ka mundësi të shumta për t’i përmirësuar në mënyrë të konsiderueshme marrëdhëniet ekonomike mes Shqipërisë dhe landit të Renanisë Veriore-Vestfalisë. Vetëm për të sjellë një krahasim, ndërmjet Shqipërisë dhe landit të Renanisë Veriore-Vestfalisë. kemi një vëllim tregtar prej 33 milionë eurosh në vit. Produkti i brendshëm bruto i landit Renani Veriore-Vestfali është rreth 600 miliardë euro. Mes këtyre dy shifrave ka mjaft hapësirë për të përmirësuar marrëdhëniet bilaterale.
DW: Në fund të marsit ju do të shkoni për herë të parë në Tiranë me sipërmarrës dhe përfaqësues të institucioneve të landit Renani Veriore-Vestfali . Bashkëpunimi i deritanishëm fokusohej më shumë në projekte të mbështetura nga shteti. A mendoni se ky udhëtim do të sjellë impulse të reja për zgjerimin e bashkëpunimit?
Horzetzky: Sigurisht që po. Fillimisht na nevojitet pak njohje me njëri-tjetrin, që ishte sot takimi i parë me zotin ministër. Në mars do t’i vazhdojmë takimet e filluara sot dhe me siguri që do t‘i intensifikojmë ato, si dhe do të eksplorojmë mundësitë për investimet e sipërmarrjet tona, dhe në rastin më të mirë të intensifikojmë edhe tregtinë. Siç e përmendi ministri Ahmetaj, nëse Shqipëria do të kishte një rritje vjetore 6 përqind dhe Bashkimi Evropian vetëm 1 përqind, Shqipërisë i nevojiten 22 vjet për të arritur nivelin mesatar të BE, domethënë ka mjaft hapësirë për të punuar.
DW: Cili është vlerësimi juaj për klimën e investimeve në Shqipëri dhe për premisat ligjore? Çfarë kushtesh janë sipas mendimit tuaj të domosdoshme, me qëllim së sipërmarrjet nga landi Renani Veriore-Vestfali të angazhohen atje?

Horzetzky: Të gjitha sipërmarrjet në mbarë botën kanë nevojë në radhë të parë për kushte sigurie për investime. Besueshmëria është formula magjike, me të cilën mund t’i bindësh me të vërtetë sipërmarrjet për të investuar. Në këtë drejtim ka ndoshta akoma për të bërë në Shqipëri. Neve na nevojiten ligje korrekte, një ligj i arsyeshëm për tatimet dhe një drejtësi e sigurtë. Kur të jenë krijuar kushtet e tilla, atëherë përmirësohet klima për sipërmarrjet dhe atëherë edhe ne do të investojmë.
DW: Cilët sektorë të ekonomisë shqiptare paraqesin më shumë interes për sipërmarrjet e landit Renani Veriore-Vestfali?
Horzetzky: Ne kemi ndërkohë interes te madh në sektorët e energjisë, lëndëve minerare, turizmit, shërbimeve, si dhe të prodhimeve ushqimore. Ministri përmendi për shembull edhe pjesën e agrobiznesit. Ka interes në të gjithë sektorët, pastaj duhet parë, nëse arrijmë me të vërtetë në biznes në marrëdhënie bashkëpunimi.
DW: Cila është përvoja e sipërmarrjeve gjermane, që kanë investuar ndërkohë në Shqipëri, me klimën e biznesit në vend?
Horzetzky: Tashmë në Shqipëri janë aktive kompani të mëdha nga landi Renani Veriore-Vestfali, që nga Hochtief një sipërmarrje ndërtimi, pastaj prodhuesi i energjisë Eon, sipërmarrja spedicionare DHL dhe Telekomi Gjerman. Këto janë të gjitha sipërmarrje, që janë të pranishme, ato nuk janë larguar nga Shqipëria, vazhdojnë të jenë aktive dhe kjo është një shenjë, që atyre u pëlqen të bëjnë biznese atje dhe besoj se edhe ndërmjarrjet e vogla dhe të mesme mund të marrin shembull për të kërkuar dhe zbuluar shanset për vete atje.
Intervistën e zhvilloi Angjelina Verbica

Bota

Uashington, legalizohet marihuana

Komento

Në Uashington DC hyri në fuqi ligji që legalizon marihuanën. Ligji i lejon të rriturit mbi 21 vjeç të posedojnë privatisht dhe të pinë deri në 200 gramë marihuanë dhe të rrisin sasi të vogla të bimës.Blerja, shitja dhe pirja në publik janë ende të paligjshme. Kryeqyteti amerikan i bashkohet Alaskës, Kolorados dhe shtetit të Uashingtonit për legalizimin e marihuanës. Por ndryshe nga tre shtetet e tjera, Uashington DC nuk është tërësisht autonom, pasi Kongresi amerikan ka autoritetin përfundimtar mbi qytetin qeveritar. (voa)