Arkivi mujor: Shkurt 2015

Shqipëria

Tusk: Zgjerimi mbetet prioritet. Rama: Ballkani, jo periferi e periferisë

Komento

Për herë të parë që pas zgjedhjes së tij në krye të Bashkimit Europian, Donald Tusk priti zyrtarisht Kryeministrin Edi Rama, të cilin e siguroi se zgjerimi me Ballkanin mbetet prioritet. Shefi i qeverisë shqiptare kërkoi që të shmangen boshllëqet në aspektin ekonomik për këtë rajon, i cili sot kërcënohet po ashtu nga terrorizmi. Politika rajonale e Shqipërisë u vlerësua më shumë se ajo brenda vendit. Tusk çmoi ecurinë e Tiranës, por për nisjen e negociatave të anëtarësimit kërkohet dialog politik, si dhe zbatim i 5 prioriteteve kyçe. Përmbushja e reformave politike ka rëndësi dhe për zgjedhjet e ardhshme lokale, sipas Tusk.

Kryeministri Edi Rama: “Falenderime të veçanta për mbështetjen konsistente që Presidenti Tusk tregon për procesin e anëtarësimit të Shqipërisë në BE. Patëm mundësi të bisedonim mbi agjendën e zgjerimit të BEsë, në të dy aspektet, si një projekt politik dhe gjeostrategjik, i cili qëndron në thelb të politikave të brendshme e të jashtme që ndjek Shqipëria. Gjithashtu, në kuadër të kryesimit shqipëtar të procesit të bashkëpunimit për Europën Juglindore, e informova Presidentin Tusk mbi tendencat e bashkëpunimit të rajonit në energji dhe siguri. Egziston rreziku për ngecjen e Ballkanit Perëndimor në kuptim të standarteve të demokracisë dhe të sigurisë, në një mjedis të ri sfidues ku vendet e rajonit duhet të bëjnë përpjekje të konsiderueshme për të përballur kërcënime ndërkombëtare dhe ky rrezik është terrorizmi. Me fjalë të tjera, ka një rrezik në rritje për vendet e Ballkanit që të mbeten periferia e periferisë europiane, sidomos në aspekt të boshllëqeve ekonomike dhe kjo është ajo që duam të evitojmê. Ballkani Perëndimor ka potencialin për të qënë histori suskesi në BE.

Donald Tusk, President i Këshillit të BE: Zgjerimi mbetet një prioritet i fuqishëm për Bashkimin Europian dhe mua, personalisht. Gjithësesi, siç i rrëfeva dhe kryeministrit Rama, çdo hap përpara në këtë rrugë sjell përgjegjësi të reja dhe kërkon një punë më të madhe, por, këtë ju e dini shumë më mirë se unë. Shqipëria tashmë është kandidate për në BE dhe ne presim që ajo të intensifikojë përpjekjet e saj për reforma. Në fokus duhet të mbeten prioritetet e përcaktuara Dhjetorin e kaluar, për të dorëzuar gjurmë provash, çfarë na mundëson për të marrë vendimin mbi hapin tjetër të radhës në procesin e anëtarësimit. Shumë është arritur, sidomos në luftën ndaj krimeve dhe drogës, megjithatë, ajo që nevojitet është zbatim i prioriteteve, përgjithësisht. Në përfundim, biseduam për nevojën e rritjes së dialogut politik brenda vendit në Shqipëri. Politikat konfrontuese, bojkotet dhe sjellja që fituesi merr gjithçka, nuk ndihmon shqipëtarët. Për të qenë një vend më europian, Shqipëria nevojitet të ndërtojë një kulturë të dialogut politik që bazohet mbi kompromis. Kjo krijon kuadrin optimal për kryerjen e reformave aq të kërkuara politike, megjithëse të vështira. Kjo është me rëndësi edhe në këndvështrimin e zgjedhjeve të ardhshme lokale. Shqipëria duhet të jetë po aq e arsyeshme dhe konstruktive në jetën e saj politike, sa ç’është dhe në rajon”.

Kryeministri Rama tregoi se janë miratuar vendimet e Konferencës së Berlinit mbi Ballkanin dhe pas identifikimit të projekteve tê përbashkëta për zhvillim, punësim dhe rritje të konkurrencës, ai “pret që konferenca e Vjenës në gusht të jetë gur kilometrik për to”. / Top Channel

Kosova

Analistët: Hahn kishte të drejtë për liberalizimin e vizave

Komento

Me vizitën e Komisionerit të Bashkimit Evropian për Zgjerim dhe Fqinjësi të Mirë, Johanes Hahn në Prishtinë, është sqaruar përfundimisht se Kosova ende nuk i ka përmbushur të gjitha kriteret e kërkuara me udhërrëfyesin evropian për liberalizimin e vizave.Përkundër deklaratave të kryeministrit të Kosovës, Isa Mustafa dhe zëvendësit të tij, Hashim Thaçi se Kosova i ka përmbushur kriteret, komisioneri Hahn, ka thënë se Kosovës i mbetet ende punë në këtë proces.

Duke i komentuar deklaratat e zyrtarëve të Qeverisë së Kosovës dhe komisionerit Hahn, njohësit e proceseve integruese evropiane i japin të drejtë zyrtarit evropian.

Shenoll Muharremi e sheh si paradoksiale që vet kryeministri dhe qeveria e Kosovës ta komentojnë punën e vet.

Sipas tij, përparimin në këtë proces në fund do ta bëjnë Komisioni Evropian dhe vendet anëtare të Bashkimit Evropian, kurse Qeveria e Kosovës, ka vijuar ai, duhet të përqendrohet në detyrat e shtëpisë.

“Qeveria le të fokusohet në zbatimin e kushteve në mënyrë që ne të sigurohemi se do t’i zbatojmë kushtet, sidomos nga aspekti i zhvillimit ekonomik në mënyrë që të ndalet migrimi ilegal dhe të kthehet shpresa te njerëzit të mos ikin jashtë vendit. Pavarësisht, nëse zbatohen të gjitha kushtet teknike nga udhërrëfyesi dhe rekomandimet e raporteve të Komisionit Evropian, me këtë numër, me këto trende të migrimit ilegal nuk ka gjasa të merret liberalizimi i vizave për vitin 2015″, ka deklaruar Shenoll Muharremi.

Mes deklaratave kundërthënëse të kryeministrit të Kosovës dhe komisionerit të BE-së, edhe analisti Avni Mazreku, thotë se Johanes Hahn ka të drejtë.

Ai rikujton se Kosova ende nuk i ka përmbushur të gjitha kriteret e kërkuara, duke i numëruar vetëm disa prej tyre.

“Njëra nga fushat është reforma në administratën publike që lidhet edhe me procesin e liberalizimit të vizave. Kjo administratë publike e pareformuar ka rezultuar në një shkallë të lartë të korrupsionit dhe krimit të organizuar dhe çështje tjetër mjaftë kritike për Kosovën, është se ajo ende nuk ka arritur të ushtrojë pushtetin e saj në gjithë territorin e saj”.

“Rrjedhimisht Kosova nuk ka kapacitete aktualisht që ta kontrollojë gjithë territorin e saj dhe vijat kufitare që Kosova i ka”, ka thënë Avni Mazreku.

Në vijim, Avni Mazreku flet edhe për sfidat tjera me të cilat po përballet Kosova, nisur nga ato politike, ekonomike e juridike.

Problemet me sundimin e shtetit ligjor, luftimi i krimit të organizuar dhe korrupsioni dhe të ngjashme, janë çështje që merren parasysh për vendet që pretendojnë procesin e liberalizimit apo atë të integrimit në Bashkmimin Evropian.

“Shteti që aplikon për të qenë pjesë e zonës Shengen, ai duhet të kualifikohet si shtet nëse është stabil në planin ekonomik, politik dhe atë juridik. Marrë si shembull, në planin e parë, atë ekonomik Kosova përderisa ka një lëvizje e shpërngulje kaq të madhe të njerëzve, e kontradikton përmbushjen e kriterit të parë, përkatësisht stabilitetin ekonomik”, ka deklaruar Mazreku.

Ndërkohë, Shenoll Muharremi, ka vërejtur se edhe brenda kabinetit qeveritar, zyrtarët paraqiten me deklarata kontraverse. Sipas tij, ka dallime të mëdha në deklaratat e kryeministrit Isa Mustafa, zëvendësit të tij, Hashim Thaçi apo të ministrit të Integrimeve Bekim Çollaku kur është në pyetje ky proces, ka theksuar Muharremi.

“Ministri i Integrimeve është më real në kohët e fundit me qasjen e tij, ngase ai po tregon që ne nuk i kemi plotësuar këto kushte dhe fokusin duhet ta vendosim tek zbatimi. Në anën tjetër e kemi ministrin e jashtëm i cili thotë që Kosova moti i ka kryer obligimet e veta, gjë që nuk qëndron aspak dhe kemi kryeministrin Mustafa i cili po varion në qëndrimet e veta”.

“Ai ka filluar mandatin në dhjetor me premtimin duke thënë që vizat do të hiqen në fillim të vitit 2015, por pastaj kur e ka filluar punën e ka parë që kjo nuk është punë aq e thjeshtë”, ka thënë Shenoll Muharremi.

Gjatë vizitës së tij në Kosovë, komisioneri Johanes Hahn ndër tjera ka këshilluar Qeverinë e Kosovës, që para se të aplikojë për liberalizimin e vizave duhet të sigurohet që numri i azilkërkuesve dhe migrimeve ilegale të ulet.

Sipas tij, Kosova ka tri çështje urgjente para vetës në rrugën drejt Bashkimit Evropian. Aty hyjnë sundimi i ligjit, funksionimi demokratik i institucioneve dhe zhvillimi ekonomik me theks të veçantë në uljen e papunësisë. (rel)

Shqipëria

Rama takon drejtuesit e BE-së

Komento

Kryeministri shqiptar në Bruksel pritet nga presidenti i komisionit europian Juncker dhe ai i Këshillit europian Tusk. Bisedime për ecurinë e procesit të integrimit europian të Shqipërisë dhe mbështetjen e BE-së për projektet e zhvillimit në BallkanKryeministri Edi Rama u shpreh sot mjaft i kënaqur nga bisedimet që ai zhvilloi në Bruksel me drejtuesit më të lartë të Bashkimit europian. Gjatë paradites zoti Rama u takua me presidentin e Komisionit europian Jean Claude Juncker dhe pasdite me presidentin e Këshillit Europian Donald Tusk. Në qendër të bisedimeve ka qenë ecuria e Shqipërisë në procesin e integrimit europian si dhe mbështetja nga ana e Bashkimit europian i projekteve të përbashkëta të vendeve të rajonit të Ballkanit, duke qenë se kryeministri shqiptar ishte në Bruksel edhe në cilësinë e kryesuesit të radhës së Procesit të bashkëpunimit te vendeve të europës juglindore, SEECP-it.
“Shqipëria është tashmë kandidate për anëtarësim në Bashkimin Europian, ndaj dhe shpresojmë e presim që ajo të intensifikojë përpjekjet e saj për reforma. Fokusi duhet të jetë mbi përparësitë e identifikuara dhjetorin e kaluar. Kjo do të vendosë baza të forta dhe do të bëjë të mundur që të ndërmerren hapa të tjera drejt pranimit. Shumë është arritur deri tani, përfshi luftën kundër krimeve të drogës. Gjithësesi, ajo çka pritet dhe është e nevojshme të bëhet është zbatimi në të gjitha fushat”, deklaroi pas takimit presidenti Tusk.

Drejtuesi i lartë i BE-së u përqëndrua edhe të rëndësia e një klime të qëndrueshme politike në Shqipëri dhe nevojën për të rritur dhe përmirësuar dialogun e brendshëm: “Politika e kundërvënies, bojkotet dhe qëndrimi që “fituesi i merr te gjitha” nuk do t’i ndihmojnë qytetarët shqiptarë. Për t’u bërë një vend modern europian, Shqipërisë i duhet të ndërtojë një dialog politik bazuar mbi kulturën e kompromisit. Një gjë e tillë krijon hapësirën optimale për të realizuar reforma politike të vështira, por shumë të nevojshme. Kjo ka rëndësi të posaçme edhe në kuadrin e zgjedhjeve të ardhshme vendore. Shqipëria duhet të jetë po aq konstruktive dhe e arsyeshme në politiken e brendshme sa është në rajon”.

Në të vërtetë, roli i Shqipërisë në Ballkan është përshëndetur nga presidenti Tusk vecanërisht për faktin se Tirana ka mbështetur plotësisht linjën e politikës së jashtme të Bashkimit europian, lidhur me rastin e Ukrainës apo dhe për sfidat e tjera.

Nga ana e tij kryeministri Edi Rama tha se në situatën e re të kërcënimeve terroriste stabiliteti i Ballkanit merr një rëndësi të vecantë: “Ekziston rreziku që Ballkani Perëndimor të mbetet në vend, kur bëhet fjalë për standardet demokratike dhe sigurinë në një mjedis te ri plot sfida, në të cilin vendet e rajonit duhet të bëjnë përpjekje të konsiderueshme për t’u përballur me kërcënimet ndërkombëtare dhe ky rrezik është terrorizmi. Me fjalë të tjera, ka një rrezik gjithnjë e në rritje që Ballkani Perëndimor të mbetet në periferinë e periferisë së Evropës, sidomos sa u përket hendeqeve ekonomike dhe kjo është diçka që ne duam ta evitojmë me çdo kusht. Ballkani Perëndimor ka potencialin për të qenë një histori suksesi e BE-së. Suksesi i programit të Evropës për demokratizim dhe stabilizim varet nga besueshmëria dhe suksesi i politikës së zgjerimit në Ballkan”.

Në këtë kontekst, kryeministri shqiptar, vuri theksin dhe në rrugën se si BE-ja mund të rrisë më tej përpjekjet për të ndihmuar Ballkanin perëndimor që ai të bëhet një rajon I vertët në terma ekonomikë, tha zoti Rama, duke ju referuar nevojës që procesi i nisur në konferencën e Berlinit të ketë vijueshmëri, ndërkohë që vendet e Ballkanit po përgatiten të paraqesin projekte të përbashkëta zhvillimi. (voa)

Bota

Posta nga Athina me kërkesën për më shumë para – Qeveria gjermane e refuzon

Komento

Të premten (20.02) ministrat e financave të Eurogrupit do të shqyrtojnë postën e ardhur nga Athina. Qeveria gjermane e hedh poshtë kërkesën si “pa substancë”.Gjermania e refuzon kërkesën e qeverisë greke për shtyrjen e afatit të ndihmave financiare. Zëdhënësi i Ministrisë së Financave, tha, se “Letra nga Athina nuk është një propozim me substancë për zgjidhje”. Në të vërtetë kjo kërkesë ka për qëllim një financim të përkoshëm, pa i përmbushur kërkesat e programit. “Letra nuk u përgjigjet kritereve për të cilat u ra dakord të hënën në Eurogrup.” – thuhet në pronocnimin e Ministrisë Federale të Financave.
Në letrën nga Athina dërguar shefit të Eurogrupit Jeroen Dijsselbloem, thuhet, se duhet të shtyhet gjashtë muaj programi i ndihmave duke respektuar marrëveshjet me BE-në, Bankën Qendrore Europiane (BQE) dhe Fondin Monetar Ndërkombëtar (FMN). Deri tani qeveria e majtë në Athinë e refuzonte bashkëpunimin me institucionet, të emërtuar si trojka.
Qeveria greke e pranon si të detyrueshme përmbajtjen financiare dhe proceduriale të programit ekzitues të shpëtimit, thuhet në letër. Gjithashtu qeveria pranon detyrimet financiare kundrejt kreditorëve. Masat e reja të qeverisë duhet të jenë plotësisht të financuara. Gjatë gjashtë muajve po ashtu Greqia do të bashkëpunojë ngushtë me partnerët, në mënyrë që të mos ndërmerren reforma të njëanshme, të cilat mund të rrezikojnë objektivat e buxhetit, ripërtëritjen ekonomike apo stabilitetin financiar të vendit.
Në letër janë radhitur një sërë pikash, të cilat mund t’i krijojnë më shumë hapësirë veprimi Greqisë. Vendi i zhytur në borxhe do ta shfrytëzojë sa më mirë të jetë e mundur fleksibilitetin që ofron paketa aktuale e ndihmës. Synohet më tej që shtyrja e afatit të përdoret për të realizuar një sufiçit primar të përshtatshëm. Deri tani partnerët e Eurozonës i kërkonin Greqisë që të realizojë një sufiçit 3% për këtë vit dhe 4,5% (raporti mes boxheve dhe shpenzimeve) për vitin e ardhshëm. Greqia aplikon gjithashtu për shtyrjen e huave të meknaizmit për stabilitetin financiar në Eurozonë, EFSF (European Financial Stability Facility), të cilat janë parashikuar për stabilizimin e bankave të Greqisë. Greqia do të negociojë edhe për lehtësimin e borxheve, gjë që u projektua nga Eurogrupi nëntorin e vitit 2012.
Të premten (20.02) ministrat e financave të Eurogrupit duan të konsultohen në Bruksel për letrën e Athinës dhe zgjidhjen e grindjes mbi borxhet.

BQE rekomandon kontrollin e qarkullimit të kapitalit
Për shkak të pasigurive të mëdha mbi qendrimin në Eurozonë të vendit të zhytur në borxhe, grekët janë duke i tërhequr në sasi të mëdha paratë e tyre nga bankat. Sipas një informacioni të gazetës “Handelsblatt” që nga nëntori 2014 janë regjistruar tërheqje parashë në vlerën e rreth 21 miliardë eurove. BQE vazhdon t’i mbajë në jetë bankat greke me zgjerimin sërish të mërkurën (17.02) të kuadrit për kredi emergjence me 3,3 miliardë euro. Kësisoj kuadri për të tilla inxheksione finaniare arrin tani në 68,3 miliardë euro. Në Athinë, siç mësohet nga qarqet bankare, kishte shpresa për një rritje edhe më të madhe të kësaj shume.
Sipas një njoftimi të gazetës “Frankfurter Allgemeinen Zeitung” BQE e konsideron të arsyeshëm aplikimin e kontrollit të qarkullimit të kapitalit në Greqi. “Këshilli i BQE-së dhe mbikqyrësit e bankave të BQE-së do të ndiheshin më mirë nëse do të kishte kontroll të qarkullimit të kapitalit, për të penguar zbarzjen e bankave”, citon gazeta një person nga radhët e BQE-së. Nëse do të aplikohet kontrolli i qarkullimit të kapitalit, mund të kufizohen tërheqjet e parave. (dw)

Kosova

Breedlove: Të gjitha kombet evropiane kërcënohen nga terrorizmi

Komento

Komandanti i lartë i NATO-s, Philip Breedlove tha në Prishtinë se të gjitha kombet evropiane duhet të punojnë së bashku për të përballur kërcënimet nga terrorizmiKomandanti lartë i NATO-s, gjenerali amerikan Philip Breedlove, tha sot pasdite në Prishtinë se të gjitha vendet në Evropë janë të kërcënuara nga terrorizmi dhe po përballen me atë që ai e quajti “valën e luftëtarëve të huaj”.

“Ky problem do të bëhet më i madh në të ardhmen para se të bëhet më i vogël”, tha ai, duke bërë thirrje për një angazhim të përbashkët në përballje me këtë problem.

Gjenerali amerikan, në një takim me gazetarët në Prishtinë, përmendi edhe migrimin e qytetarëve të Kosovës, duke thënë se ky fenomen është një “tregues se njerëzit nuk po gjejnë mundësitë që u duhen në këtë vend”.

ndërsa mohoi të ketë ndonjë lidhje ndërmjet kësaj dukurie dhe gjendjes së sigurisë të cilën ai e cilësoi të mirë në gjithë Kosovën përfshirë edhe veriun e saj.

Ai tha se çështja e urës kryesore mbi lumin Iber, që shënon edhe vijën ndarëse të qytetit të Mitrovicës në veriun e banuar me shumicë serbe dhe jugun me shumicë shqiptare, është më shumë çështje simbolike. Ai tha se ndryshimi i gjendjes në urën me forcë, nuk do të ishte e dobishme. Ura vazhdon të jetë e mbyllur për lëvizjen e makinave, meqë strukturat e veriut të Mitrovicës, ngritën një lulishte mbi urë.

Zoti Breedlove vlerësoi edhe zhvillimin e Forcës së Sigurisë së Kosovës, ngritja e së cilës është mbikëqyrur nga NATO-ja. Autoritetet në Prishtinë synojnë shndërrimin e saj në Forcat e Armatosura të Kosovës, një veprim që nuk shihet me sy të mirë nga Beogradi i cili vazhdon të kundërshtojë pavarësinë e Kosovës. Zyrtarët e NATO-s kanë përsëritu në disa raste se krijimi i Forcave të Armatosura të Kosovës, është vendim i brendshëm i saj.

Ai u shpreh i pakënaqur më zhvillimet në Ukrainë pas armëpushimit.

“Ajo çfarë po shohim në lindje të Ukrainës është se Rusia ka krijuar një armatë të frikshme. Ajo është e armatosur dhe e pajisur mirë. Ajo është e mbikëqyrur mirë dhe e forcuar me artileri dhe mbrojtje kundërajrore. Pra është një forcë e frikshme”, tha ai, duke nënvizuar se Shtetet e Bashkuara nuk përjashtojnë asnjë mundësi që të vënë të dyja palët në tryezën e bisedimeve për të gjetur një zgjidhje paqësore. Ai tha zgjidhja e konfliktit është politike e diplomatike dhe jo ushtarake.(voa)

Bota

Koment: Diplomacia në limitet e saj

Komento

Ndoshta marrëveshja e Minskut nuk ka dështuar ende. Por rasti Debalcevos tregon se vetëm me bisedime diplomatike nuk mund të vendoset paqe në Ukrainën lindore, mendon Bernd Johann.Nëse merret një qytet me rëndësi strategjike, atëherë nuk mund të flitet për armëpushim. Nëse sulmuesit vazhdojnë të përdorin tanket dhe raketahedhësit, atëherë nuk mund të flitet për tërheqjen e armëve të rënda. As një javë nuk ka kaluar nga marrëveshja e Minskut, e cila duhet të shërbejë si një lloj udhërrëfyesi për paqen në Ukrainën lindore. Por në fushën e betejës Debalcevo në veri të Donjeckut ky proces me sa duket po dëmtohet tani nga të shtënat dhe bombardimet.
Shpresa të mëdha për ҫtensionim në Ukrainën lindore nuk kishte në Minsk. Në Debalcevo separatistet e kanë injoruar krejtësisht armëpushimin dhe tërheqjen e armëve, dy objektivat e para të marrëveshjes, që përfshin 13 pika. Kanë shkelur armëpushimin, për të krijuar fakte ushtarake. Duke bërë që përpjekjet diplomatike të shkojnë dëm.
Kjo ka ndodhur me sa duket me miratim nga Rusia. Këtë e bëri të qartë presidenti rus Vladimir Putin në një mënyrë gati provokuese, të martën (17.02) në daljen e tij para shtypit në Hungari, një vend anëtar i BE dhe vend fqinj i Ukrainës. Ai e quajti udhëheqjen politike në Kiev përgjegjësen e vetme për gjakderdhjen në Debalcevo. Putin kërkoi madje edhe kapitullimin e ushtrisë ukrainase. Më qartë nuk ka si të formulohet mbështetja e tij për planet e pushtimit të separatistëve.
Poshtërim për Poroshenkon
Për presidentin e Ukrainës Petro Poroshenko rasti i Debalcevos nuk është vetëm një katastrofë ushtarake, por edhe politike. Në vendin e tij kritikohet shumë marrëveshja e Minskut, e cila u arrit në negociata të vështira mes Ukrainës dhe separatistëve prorusë, me pjesëmarrjen e krerëve të shteteve dhe qeverive të Gjermanisë, Francës, Rusisë dhe Ukrainës. Dokumenti përmban shumë kompromise, që janë të dhimbshme për Kievin. Sepse faktikisht në këtë mënyrë krijohet një “konflikt i ngrirë” në tokën e Ukrainës dhe një strukturë shtetërore separatiste nën ndikimin e Rusisë.

Qysh në Minsk ishte e qartë, se as separatistët as Rusia nuk pranonin, që Debalcevo të mbetet ukrainase. Sepse nëpër qytet kalonte lidhja kryesore – rruga dhe shinat e hekurudhës- ndërmjet Donjeckut dhe Luhanskut. Kjo rrugë është trafiku lidhës i dy “republikave popullore”. Dhe që andej hekurudha vazhdon për në Rusi. Furnizimet ushtarake për separatistët mund të sigurohen tani më lehtë.
Ushtria ukrainase e rrethuar prej javësh në Debalcevo nuk kishte asnjë shans ndaj kundërshtarit të pajisur me armë moderne ruse. Por Poroshenko nuk donte të dorëzohej, këmbëngulte për qëndresë. Ndërsa tani ushtarët ukrainas duhet të tërhiqen të mundur nga Debalcevo. Prandaj humbja është edhe një poshtërim për Poroshenkon, i cili brenda vendit do të bjerë nën një presion të mëtejshëm.
Vetëm diplomacia nuk mund ta ndalë një agresor
Shumica e ukrainasve e kanë të qartë se të vetëm nuk mund ta fitojnë ushtarakisht luftën. Prandaj përpjekjet diplomatike duhet të vazhdojnë. Nëse luftëtarët prorusë do ta ndalojnë përparimin e tyre pas rënies së Debalcevos, atëherë ndoshta do të ketë ende një shans për ta shpëtuar marrëveshjen e Minskut. Por kërcënon edhe një rrezik i mëtejshëm. Nga Debalcevo nuk është shumë larg deri në qytetin e madh të Kharkivit në veri. Edhe Mariupol në jug është ende në shënjestrën e separatistëve. Lufta mund të shkallëzhet në mënyrë dramatike.
Ndoshta separatistët do të mjaftohen me zonat Luhansk und Donjeck. Por ngjarjet në Debalcevo tregojnë se me diplomaci, qoftë edhe në nivelin më të lartë, nuk mund të ndalet një agresor, që grabit toka. Nëse luftëtarët prorusë do të marshojnë me të vërtetë në drejtim të Kharkivit apo Mariupolit, atëherë çështja e furnizimit të Ukrainës me armë do të dalë në rend të ditës. Mbi të gjitha duhet të përgatiten të tjera sanksione kundër separatistëve dhe mbështetësve të tyre në Rusi. Diplomacia e Europës ka arritur në limitet e saj. (dw)

Bota

Obama: Terroristët përdorin Islamin si justifikim për dhunën

Komento

Presidenti amerikan Barack Obama deklaroi sot se çdo pretendim nga grupet terroriste se vendet perëndimore janë duke zhvilluar luftë kundër Islamit, është një “gënjeshtër e shëmtuar”.Në fjalimin që mbajti të enjten në Uashington në takimin e organizuar nga Shtëpia e Bardhë mbi përpjekjen ndërkombëtare kundër terrorizmit, zoti Obama u zotua për një luftë të papajtueshme kundër Shtetit Islamik dhe grupeve të tjera terroriste. Ai e hodhi poshtë idenë se vendet perëndimore të krishtera dhe shteti hebraik janë duke zhvilluar luftë kundër myslimanëve.

Zoti Obama tha se qeveritë dhe kulturat e ndryshme të botës duhet të përpiqen që t’u jepet fund konflikteve sektare, siç është ai mes sunive dhe shiitëve në botën myslimane. “Por udhëheqësit botërorë, – tha ai, – duhet t’i ndihmojnë njerëzit që t’u shpëtojnë varfërisë dhe shtypjes, për të cilat ai tha se i shërbejnë përpjekjeve për rekrutimin e terroristëve”.

Presidenti tha se të rinjve në mbarë botën “ua mësojnë urrejtjen” dhe se “jemi ne të rriturit që i mësojmë ata”, – tha Presidenti.

Zoti Obama e mbajti fjalimin në Takimin e organizuar nga Shtëpia e Bardhë për t’iu kundërvënë ekstremizmit të dhunshëm, pas Sekretarit të Përgjithshëm të OKB-së Ban Ki-moon. Takimi u mbajt në Departamentin amerikan të Shtetit.

Udhëheqësi i OKB-së i cilësoi veprimet e dhunshme të Shtetit Islamik dhe të grupit Boko Haram “një kërcënim i rëndë ndaj paqes dhe sigurisë botërore”, por shtoi ai, “qeveritë në mbarë botën janë ato që duhen dënuar shpesh se ushqejnë apelin e grupeve terroriste drejt tiranizimit”. “Dhuna, korrupsioni dhe padrejtësitë shërbejnë si fole për krijimin e pakënaqësive”, – tha zoti Ban.

Zoti Ban i tha zyrtarëve të mbi 60 vendeve të botës se “parandalimi i ekstremizmit të dhunshëm dhe nxitja e të drejtave të njeriut janë të pandara”, por se “lufta kundër terrorizmit nuk mund të përdoret si një mënyrë për t’i bërë të heshtin kritikët e udhëheqësve të veçantë”. (voa)

Bota

Koment: Vetëm sunitët mund ta mundin IS

Komento

Bombardimet e “koalicionit të të vullnetshmëve” të udhëhequra nga SHBA e kanë dobësuar të ashtuquajturin “Shtet Islamik”. Por për ta mundur atë, nevojitet urgjentisht një aleancë e arabo-sunite, mendon Loay Mudhoon.Pa dyshim që sulmet masive ajrore të koalicionit të drejtuar nga Shtetet e Bashkuara kundër të ashtuquajturit Shteti islamik (IS) kanë ndikuar dukshëm që të ndalohej fillimisht zgjerimi territorial i pseudo-kalifatit të xhihadistëve. Edhe çlirimi i qytetit verior kufitar sirian Kobane nga luftëtarët irakiano-kurdë Peshmerga do të ishte i paimagjinueshëm pa mbështetjen e sulmeve ajrore amerikane dhe arabe. Këto arritje të pamohueshme e kanë shkërmoqur disi mitin e pathyeshmërisë të të ashtuquajturit “Shteti Islamik” (IS), por për një fitore të afërt ndaj këtyre ekstremistëve nuk mund të flitet.
Sepse lufta e Perëndimit dhe e arabëve kundër IS ndalohet vazhdimisht: Pas katër muajsh lufte ajrore aleancës i mungojnë objektiva të tjera me rëndësi strategjike, që mund të bombardoheshin. Këtë e vështirëson edhe fakti se luftëtarët e IS kanë kaluar në një taktikë guerilase. Kështu është e vështirë, që ata të luftohen nga ajri.
Aleancë e brishtë kundër IS
Tani duken pasojat e asaj, që “koalicioni i të vullnetshmëve” ndërkombëtarë u nis në luftën kundër Kalifatit të horrorit pa një koncept politik dhe në rradhë të parë pa qartësi lidhur me objektivin strategjik të operacionit ushtarak. Sidomos për arsyen, se ishte e qartë, që terrori i IS nuk mund të luftohet vetëm me mjete ushtarake.

“Koalicioni i të vullnetshmëve” ka qenë në fakt që në fillim i brishtë dhe politikisht kontradiktor. Sepse ai mbështetet në aleatë arabë të dyshimtë si Arabia Saudite dhe shtete të tjera të Gjirit. Kanë qenë ato, që e hapën ideologjikisht rrugën për zhvillimin e të gjitha rrymave xhihadiste në Lindjen e Mesme dhe në luftën e tyre kundër regjimit të Asadit mbështetën forcat radikale në Siri.
Shumë i rëndë mund të jetë në moment fakti, që përfshirja e fuqive të rëndësishme rajonale sunite në “Koalicionin e të vullnetshmëve” nuk ka qenë e mjaftueshme. Kjo duket në atë, që Perëndimit i mungojnë momentalisht aleatët, të cilët do të ishin në gjendje për të drejtuar një luftë efektive tokësore kundër IS në territoret sunite në Siri dhe Irak.
Anëtarët e deritanishëm të koalicionit perëndimor dolën se ishin të gabuarit: Kurdët ndjekin interesat e tyre kryesisht territoriale. Ata i kanë dëbuar arabët vendas nga territoret e pushtuara prej tyre dhe i kanë shpallur ata pjesë të Kurdistanit. Ndërsa milicët shiitë, që mezi kontrollohen dhe skuadrat e vdekjes janë partneri më i paimagjinueshëm, për t’i bërë ballë IS në tokë.
Edhe siguria e Afrikës së veriut është e rrezikuar
Ngaqë xhihadistët e IS shfrytëzojnë kaosin në Libi për të zgjeruar bazën operative dhe për të bërë aleancë me xhihadistët egjiptianë, ata bëhen kërcënim real për sigurinë nacionale të Egjiptit dhe Tunizisë. Prandaj nuk ishte e habitshme që pas prerjes së tmerrshme të kokave të 21 koptëve nga xhihadistët e IS presidenti egjiptian al-Sisi kërkon një rezolutë të OKB-së për ndërhyrje ushtarake ndërkombëtar e në vendín e përfshirë nga lufta civile.
Pikërisht këtë çast duhet të kapë Perëndimi dhe të bëjë çdo gjë të mundshme për të krijuar një aleancë egjiptiano-turko-saudite kundër IS, mundësisht duke marrë në konsideratë islamikët e moderuar, por pa Iranin dhe regjimin e Assadit të diskredituar ndërkombëtarisht. Sepse përfshirja e Iranit do të ishte më tepër kundërproduktive, për shkak të qëndrimit ekstrem antishiit të gati të gjithë xhihadistëve.
Sepse vetëm myslimanët sunitë janë në gjendje të mundin IS dhe të thajnë trungun ideologjik të xhihadizmit. Perëndimi duhet të insistojë në përfshirjen e tyre të vërtetë në veprimtarinë e qeverisë së Irakut. Të tjerë partnerë, më të dobishëm në luftën kundër pseudo-kalifatit IS, Perëndimi nuk ka. (dw)

Maqedonia

Zaev: Jemi gati për anonimët, do të marrin përgjigjen

Komento

Lideri i LSDM-së Zoran Zaev iu përgjigj kërcënimeve të të ashtuquajturve “Anonymous” të cilët paralajmëruan se do të publikojnë gjëra që sipas tyre, opozita ka dashur t’i fshehë. Në profilin e tij në Facebook, kreu i LSDM-së u ka bërë thirrje autorëve të fillojnë me publikimin e së vërtetës, por jo vetëm në Facebook.“Jemi gati për të ashtuquajturit “anonymous”… le të fillojnë e pastaj do të shohin se çdo të thotë “anonymousw të vërtetë. Jo vetëm në Facebook. Flisni për të vërtetën kudo që mundeni”, shkruante Zaev në profilin e tij.

Dy ditë më parë në rrjetin Youtube u paraqit një video që mban vulën nga Anonymous-Maqedoni, e cila kërcënon Zaevin dhe kundërshtarët e tjerë të pushtetit, se do të publikojë materialeve komprometuese për ta.

“Ne luftojmë për liri! Ne luftojmë për drejtësi! Kjo që ndodh në Maqedoni është skenar i përgatitur nga shërbimet e huaja dhe mercenarë e shërbëtorë nga vendi. Me qëllim që e vërteta të jetë e hapur për të gjithë, por e vërteta e plotë, jo e pjesshme, e përzgjedhur dhe e montuar, ne e piratuam çerdhen e atyre që e krijojnë gjithë këtë e që janë të lidhur me personin Zoran Zaev”, thuhet mes të tjerash në videon e publikuar.

Por, qëndrimi i këtij grupi u hodh poshtë nga një tjetër grup që pretendon të jetë Anonymous-i i vërtetë në Maqedoni. Sipas këtij grupi të dytë, pas videos që qarkullon në rrjete sociale nga grupi i parë, qëndron pushteti dhe keqpërdor qëllimin e vërtetë të Anonumous-ve.

“Përgënjeshtrim. Faqja jonë nuk ka bërë video të tillë dhe ne nuk qëndrojmë pas saj. Dyshojmë se videoja është bërë për qëllime të caktuara politike. Mos bini pre e tyre. Anonimët nuk janë dhe asnjëherë nuk do jenë të përcaktuar politikisht”, thuhet në reagimin e tyre.

35t ndërkohë citojnë një prej anëtarëve të vetëshpallur si “Anonymous-ët e vërtetë, të thotë se ky manipulim është vepër e Ministrisë së Brendshme e cila synon që përmes lojës së dyfishtë të publikojë telefonatat e përgjuara të të gjithë atyre që kundërshtojnë pushtetin. Megjithatë, këto akuza deri tani nuk janë komentuar nga policia. Benjamin Arifi

Maqedonia

Kriza politike, Han në takime maratonë me liderët politikë

Komento

Takimet maratonë të komisionarit evropian për zgjerim Johanes Han në Shkup përfunduam pa ndonjë rezultat konkret. Zyrtari i lartë evropian madje vendosi të mbante të fshehtë mesazhet e Brukselit në drejtim të zgjidhjes së krizës politike edhe pse mësohet se gjatë takimeve me aktorët politik nuk ka ofruar ndonjë zgjidhje konkrete. Pas takimit me Gruevskit, Han madje tha shkurt se ndonjëherë mos publikimi i këtyre bisedave mund të nxis progres. “Shpresoj se në fund do të arrijmë progres domethënës për perspektivën evropiane të vendit. Ndonjëherë është më mirë të zhvillohen biseda të brendshme me qëllim që të arrihet progres”, tha Johanes Han, komisioneri evropian për zgjerim dhe fqinjësi.

Ndryshe nga herët e tjera, në vend që zyrtari i lartë të pritej në qeveri, ka qenë Han ai i cili priti kryeministrin Gruevski në një drekë pune në rezidencën e Bashkimit Evropian në Shkup. Pas takimit me komisionarin Han, Gruevski gjithashtu shmangi komentet nëse janë diskutuar propozime konkrete, por tha se kishin shkëmbyer mendime.

“Folëm edhe për situatën aktuale politike. E treguam të vërtetën respektivisht atë që po ndodh. Kishim shkëmbim mendimesh”, u shpreh Nikolla Gruevski, kryeministër.

Cila është e vërteta?

“E vërteta është ajo që e tregova publikisht”, u përgjigj Gruevski.

Komisioneri Evropian Johanes Han më herët takoi edhe liderin e opozitës Zoran Zaev, për të dëgjuar argumentet e tij rreth situatës aktuale. Zaev ka siguruar Han se do të vijoj procesin e publikimit të gjitha aferave korruptive dhe kriminale të qeverisë.

“Skandali i përgjimit të 20 mijë qytetarëve dhe ndërhyrja e qeverisë në funksionimin e Prokurorisë Publike, gjykatave, kurdisja e proceseve gjyqësore, janë një pjesë e vogël e dëshmive që i posedojmë për shkatërrimin e rendit kushtetues të Maqedonisë nga ana e Nikolla Gruevskit, dhe disa bashkëpunëtorëve të tij”, ka theksuar Zaev në takimin me komisionerin Han. Ndërkohë që Han pas takimit me liderin e opozitës shkurt tha se po përpiqet të gjejë zgjidhje politike që do të jetë në interes të shtetit, por pa dashur ta bënte publike.

Në agjendën e ngjeshur të komisionarit Han, ishin edhe takimet me kreun e BDI-së, Ali Ahmeti, me Presidentin Ivanov, zv/kryeministrin Fatmir Besimi si dhe kreun e parlamentit Trajko Veljanovski. Ivanov në takimin me Han ka theksuar se mbështet procesin e zbulimit të aktiviteteve që janë në kundërshtim me kushtetutën dhe ligjet dhe sanksionimin e autorëve të veprave penale. Ndërkohë që në takimin me Veljanovskin, siç kumtojën nga kabineti tij, Han ka theksuar se edhe deputetët evropianë janë të gatshëm t’i ndihmojnë kolegët e tyre maqedonas për kapërcimin e situatës aktuale. Nga ana tjetër në takimin mes zv/kryeministrit Fatmir Besimi dhe komisionarit Han në qendër të bisedës kanë qenë liria e 35ve, gjyqësia, lufta kundër krimin dhe korrupsionit si dhe marrëdhëniet ndëretnike. Semra Jakupi