Në ëndrrat tona më të këqia nuk na e merrte mendja një gjë të tillë, tha shefi i Lufthansas Carsten Spohr. Më parë ai kishte konfirmuar para medieve se piloti i dytë qe mbyllur në kabinë për të nisur rrëzimin e avionit.

Andreas L, piloti i dytë në avionin e Germanwings ishte një njeri që i pëlqenin shakatë. “Të qeshësh sa të të paralizohet fytyra” ishte një faqe që e preferonte ai në Facebook. Sipas informacioneve të gazetës gjermane “Die Welt”, pilotit 28 vjeçar i pëlqenin shakatë që i kalonin pak kufijtë dhe e shkelnin disi etiketën e mirësjelljes. I pëlqente p.sh. që burrat të silleshin si çuna të mëdhenj dhe pilotët si kokëkrisur me zgërdhirje të vazhdueshme në fytyrë.

Po a kishte Andreas L. edhe një anë tjetër, të errët? Probleme private për momentin nuk janë të njohura. Edhe nëse mungon ende siguria për rrjedhën e katastrofës, pyetja tjetër që shtrohet është a vuante piloti i dytë vuante nga sëmundje psikike. Shkollimin si pilot, që e pati nisur gjashtë vjet më parë në Bremen (Gjermani) dhe në Phoenix, Arizona (SHBA), sipas Lufthansas ai e ndërpreu për disa kohë. “Për shkak të problemeve psikike?”, pyetën përfaqësuesit e shtypit në zyrën e Germanwings-it. Një përgjigje për këtë koncerni nuk dëshiron të japë. Në bazë të ligjeve gjermane janë vetëm autoritetet e ndjekjes penale ato që mund të shohin kartelën mjekësore. Ky informacion i nënshtrohet detyrimit për të heshtur të mjekut “edhe pas vdekjes”, thanë përfaqësues të koncernit.

Por pas ndërprerjes së shkollimit si pilot, Andreas L. i ishte nënshtruar sërish një testi shëndetësor dhe një testi nëse ishte i përshtatshëm si pilot. Dhe këtë test e kishte kaluar me sukses.

Kontrolli i fundit për Andreas L.: janar 2015

Në janar 2015, në një kontroll rutinë për sigurinë, Andreas L. ju dëshmua së fundi se ai nuk është i përfshirë në vepra penale ose ekstremiste.

“Ai ishte 100 përqind i aftë për të fluturuar. Rezultatet e tij në fluturim ishin shumë të mira, asgjë nuk të tërhiqte vëmendjen”, u tha sot medieve shefi i Lufthansas, Carsten Spohr. Ai shtoi se në ëndrrat më të këqia nuk ia kishte e merrte mendja se mund të ndodhte një gjë e tillë.

Përvojat e para si pilot, 28 vjeçari i pati bërë me avionë pa motor, që rrëshkasin në ajër të shtyrë nga era. Faqja e klubit të sporteve ajrore Montabaur në Westerwald, ku mësoi ai, për momentin është jashtë sistemit të internetit.

“Ai deshi ta shihte të realizuar ëndrrën e tij, fluturimin”, e përshkruajnë atë shokët e klubit. Kjo ëndërr u kthye me sa duket në zhgjëndërr të tmerrshme paraditen e 24 marsit në Alpet franceze.

Kërkimi i gjurmëve sapo ka nisur. Një prokuror gjerman tha të enjten se ka nisur kontrolli i apartamentit të Andreas L. në Dyseldorf dhe vende të tjera për të gjetur dokumente dhe dëshmi nëse Andreas L e kishte planifikuar më parë aktin e tij. Vështirë është të përfytyrohet si e ndiejnë veten të afërmit e viktimave, tani që mësuan për tragjedinë. Gjithashtu është e vështirë të përfytyrosh si ndihen prindërit e Andreas L., në shtëpinë e të cilëve në Montabaur, midis Frankfurtit dhe Këlnit, lindi më 1987 Andreas L. dhe ku banoi deri në fund. Sipas prokurorit francez, Brice Robin, familja e Andreas L. është nisur për në vendin e rrëzimit të avionit.

Policia e ka bllokuar rrugën që çon në shtëpinë e prindërve të Andreas L. me automjete policie, të vendosura tërthorazi. Për të penguar automjetet e tjera të kalojnë. Shumë ekipe kameramanësh përpiqen të arrijnë në këtë zonë, për të folur me fqinjët. Por banorët janë tërhequr në shtëpitë e tyre. Disa shohin nga pas perdeve ose grilave gjysëm të ulura të dritareve. (dw)

Është ky versioni shokues që ofron kutia e parë e zezë e avionit tip “Airbus”, që u rrëzua në Alpet franceze. Versioni është publikuar nga prokurori që po heton tragjedinë, Brice Robin, në Marsejë.

Sipas versionit, në fillim dy pilotët po bisedonin, më pas komandanti ka dalë nga kabina, por në kthim e ka gjetur derën të mbyllur dhe është përpjekur ta hapë.

150 pasagjerët që ndodheshin në bord e kanë kuptuar vetëm në momentin e fundit atë që po ndodhte dhe kanë nisur të klithin. Ata ishin viktima të një drame që hap pas hapi po gjen shpjegim.

“Andreas Lubitz, 28 vjeç, me origjinë nga Montabaur, ishte me shtetësi gjermane dhe nuk është sinjalizuar kurrë si një terrorist i mundshëm”, ka deklaruar prokurori Robin.

I pyetur se cilës prejardhje etnike i përkiste, hetuesi nuk ka qenë në gjendje të përgjigjej, por ka përjashtuar për momentin pistën e terrorizmit.

“Avioni ishte në funksion përmes pilotit automatik. Komandanti i tha ndihmësit të tij: ‘Po të lë drejtimin’ dhe më pas shkoi në tualet. Më pas, ndihmësi bllokoi aksesin në kabinë dhe, sipas të dhënave të rekuperuara nga kutia e zezë, ishte gjallë në momentin e impaktit. Për rrjedhojë, mbeti i vetëm në kabinë dhe aktivizoi butonët e zbritjes së avionit”, ka thënë prokurori.

Sipas të dhënave të kompanisë “Lufthansa”, 28-vjeçari kishte nisur punën në këtë grup në shtator 2013 dhe kishte bërë që prej atëherë 630 orë fluturim.

Ndërsa kapiteni kishte mbi 6 mijë orë fluturim dhe ishte piloti i parë i Germanwings që nga maji 2014. Më parë, përveçse për “Lufthansa” kishte punuar edhe për kompaninë “Condor”.

Pas publikimit të fakteve hija e vetëvrasjes por edhe ajo e një atentati kanë filluar të mbulojnë motivet e tragjedisë. Sipas gazetës franceze “Le Figaro”, hetimi mbi sigurinë ajrore mund të kthehet shumë shpejt në një hetim kriminal.

“Hipoteza e atentatit apo ajo e vetëvrasjes së pilotit që mbeti i vetëm në kabinën e pilotazhit mund të marrin më shumë peshë në orët në vazhdim”, shkruan gazeta.

Ndërsa e përditshmja tjetër “Le Monde” pretendon për një tjetër pistë kur shkruan në edicionin e saj online se, ishte komandanti i bordit që ndodhej në kabinë dhe bashkëpunëtori i tij jashtë saj

Hetuesit francezë kanë filluar t’i analizojnë të dhënat nga incizimi i zërit në kabinën e pilotëve të avionit Germanwings, që u rrëzua në Alpe të Francës, me ç’rast u vranë të 150 njerëzit në të.

E përditshmja New York Times, ka raportuar se dëshmia nga incizimi tregon se njëri nga pilotët ishte larguar nga kabina dhe më nuk ka mundur të kthehej.

“Personi jashtë ka trokitur lehtë në derë, por nuk ka pasur pëgjigje”, i ka thënë një hetues i paemëruar gazetës, duke u mbështetur në incizim, dhe ka shtuar se ”ai pastaj e ka goditur derën më fuqishëm, por pa përgjigje…nuk ka pasur kurrfarë përgjigje nga ana tjetër”.

Ky hetues, ka shpjeguar se “mund të dëgjohet se ai është përpjekur ta thyejë derën nga poshtë”.

Aeroplani i tipit Airbus A320, fluturonte nga Barcelona për në Dyseldorf, ditën e martë, kur u rrëzua në shpatijet e maleve me shpejtësi të madhe, pasi ka rënë për tetë minuta pa dërguar thirrje alarmi.

Një zëdhënës i kompanisë Lufthansa, e cila e operon firmën ajrore të buxhetit të ulët, Germanwings, tha se ka njohuri për raportin e gazetës amerikane dhe ka shtuar se “nuk ka informacion nga autoritetet, që e konfirmojnë këtë raport”.

Kjo kompani tha se “po bën çdo gjë të mundshme për të pasur informacione dhe nuk angazhohemi në spekulime”.

Sips masave të ashpërsuara të sigurisë, pas rrëmbimeve të aeroplanëve më 11 shtator 2001, në Shtetet e Bashkura, autorizimi për ta hapur derën e pilotit mund të bëhet vetëm nga brenda dhe nga piloti.

Byroja franceze e hetimeve, BEA, nuk ka komentuar raportin e gazetës New York Times.

“Ne vetëm kemi qenë në gjendje ta nxjerrim një audio-incizim”, u tha gazetarëve drejtori i zyrës BEA, Remi Jouty.

I cituar nga gazeta amerikane, një zyrtar i lartë ushtarak, i përfshirë në hetime, tha se audio-incizimi kishte lënë të kuptohet se ka pasur një bisedë “shumë të qetë dhe të rrjedhshme” ndërmjet pilotëve në pjesën e hershme të fluturimit.

“Ne ende nuk e dimë shkakun përse njëri prej personave doli jashtë”, tha ky zyrtar dhe ka shtuar se “ajo që është e sigurt është se deri në përfundim të fluturimit, piloti tjetër ishte i vetmuar dhe nuk e ka hapur derën”.

Presidenti i Francës, Francois Hollande, kancelarja gjermane, Angela Merkel, dhe kryeministri i Spanjës, Mariano Rajoy, e kanë vizituar vendin e largët të përplasjes së aeroplanit në Alpet e Francës për të nderuar të 150 njerëzit që e kanë humbur jetën. Shumica prej viktimave ishin gjermanë dhe spanjollë.

Hollande, Merkel dhe Rajoy, i kanë falënderuar ekipet e kërkimit dhe janë takuar me banorët e fshatit, Seyne-les-Alpes, ku po vazhdon operacioni për gjetjen e mbetjeve njerëzore.

Gazeta londineze, Guardian, ka raportuar se grupi prej 16 nxënësve gjermanë dhe dy mësuesve, thuajse e humbën fluturimin, për shkak se një nxënëse kishte harruar dokumentin e identifikimit.

Por, i zoti i shtëpisë ku ajo ishte mysafire, me të shpejtë ishte kthyer prapa e kishte marrë dokumentin dhe e kishte çuar nxënësen në aeroport.

“Kjo është diçka që ta thyen zemrën”, e ka cituar gazeta një zyrtar në qytetin spanjoll, ku nxënësit gjermanë kishin qëndruar në kuadër të një programi arsimor për këmbim nxënësish.  (rel)

Presidenti amerikan Barack Obama ka premtuar gati 250 milion dollarë për të mbështetur studimet në shkencë, teknologji, inxhinieri dhe matematikë, grup fushash ky i njohur shkurtimisht si STEM. Në panairin e shkencës në Shtepinë e Bardhë të hënën, presidenti theksoi rendësinë e përpjekjeve të sektorit privat për të nxitur më shumë nxënës që të ndjekin studimet shkencore.

Presidenti pa nga afër panairin e shpërndarë në disa dhoma dhe u ndal për të diskutuar projektet me nxënësit. Një grup vajzash të vogla i treguan presidentit një shfletues librash me bateri që ndihmon njerëzit e paralizuar ose ata që vuajnë nga artriti.

Një gjimnaziste nga New Mexico i tregoi presidentit se si algat mund të përdoren për të prodhuar një infrastrukturë energjie të qendrueshme me kosto të ulët.

“Janë disa reaksione zinxhir që demostrojnë përftimin e energjisë, dhe kjo bëhet duke eleminuar hapin më të kushtueshëm energjitikë të procesit”, thotë gjimnazistja.

Presidenti u tha të pranishmëve se novatorët e rinj kanë gjëra për të na mësuar ne.

“Këta shkencëtarë dhe inxhinierë të rinj na mësojnë ne pëtej temave specifike që po eksplorojnë. Ata na mësojnë se si të shtrojmë pyetje përballë supëzimeve dhe si mund t’i përmirësojmë gjërat. Ata na kujtojnë se gjithmonë ka më shumë gjëra për të mësuar dhe asnjëherë nuk është herët apo vonë për të zbuluar diçka të re.”   

Mëse 100 nxënës nga 30 shtete amerikane që përfaqësojnë më shumë se 40 organizata dhe olimpiada, morën pjesë në panairin e këtij viti. Presidenti Obama i inkurajoi ata të vazhdojnë përpjekjet e tyre novatore. Por ai tha se Shtetet e Bashkuara duhet të nxisin më shumë të rinj drejt arsimit shkencor.

“ Pesë vjet më parë filluam fushatën “Arsimim për Novacione” për të ndihmuar më shumë nxënës për të eksploruar shkencën, teknologjinë, inxhinierinë dhe matematikën. Kam kënaqësinë të njoftoj kontributin prej 240 milion dollarësh nga biznese, shkolla dhe fondacione në mbarë vendin për të ndihmuar fëmijët të mësojnë në këto katër fusha.”

Presidenti Obama tha se asnjë i ri nuk duhet të humbasë këtë mundësi për të shkëlqyer në shkencë, megjithë mungesën e fondeve. Ai tha se me premtimet e reja për fonde, universitetet dhe korporatat kanë angazhuar deri në 1 miliard dollarë për të ndihmuar në zgjerimin e arsimimit të avancuar në shkencë dhe teknologji në SHBA. (voa)