Ish-komandantë dhe ish-pjesëtarë të UÇK-së në Maqedoni ditëve të fundit janë marrë në biseda informative.

Një ish-pjesëtar i UÇK-së ka informuar për INA se ditëve të fundit është thirrur në bisedë informative nga ana e DSK (Drejtorisë së Sigurimit dhe Kundërzbulimit) dhe se arsyeja e ftesës ka qenë incidenti i armatosur në postën policore kufitare Gushincë në Karadakun e Shkupit.

Ai theksoi se është  i shqetësuar nga ky veprim i organeve të sigurimit shtetëror dhe se gjithçka po ndodhë vetëm pas këtij incidenti.

“Unë jam ish-pjesëtar dhe sot i jam kthyer jetës normale, duke kryer punët e përditshme. Nuk kemi lidhje me skenare të errëta apo raste siç ishte incidenti në Gushincë. Disa prej nesh ka kaluar tre luftërat e fundit dhe sot i jemi rikthyer jetës normale me familjet tona. Nuk dij çka na shqetësojnë me këto veprime dhe shqetësimi është edhe tek familjet tona.  Apeloj që Ali Ahmeti ta dij se çka po ndodhë.  Ai dhe funksionarët e tij sot po shfrytëzojnë imunitetin dhe funksionet dhe nuk po shohin përtej kësaj dhe se si po maltretohen disa bashkëluftëtarë. Le të stopojnë këtë që po ndodhë dhe mos të hyjnë skenareve të rrezikshme”, deklaroi për INA, një ish-pjesëtar  i UÇK-së.

Një pjesë e tyre duke mos pasur asnjë mbështetje institucionale, kanë marrë avokatët e tyre për t`u mbrojtur dhe për të shmangur çdo lloj tendence të inskenimeve të mundshme.

Ish-pjesëtarë të UÇK-së gjithashtu informojnë se për këto raste kanë informuar edhe përfaqësues të bashkësisë ndërkombëtare në Shkup. (INA)

Komisioni parlamentar i politikës së jashtme ka thirrur për informim përfaqësues të Ministrisë së Jashtme për situatën e tensionuar në Maqedoni.

Sekretari i përgjithshëm Qirjako Qirko në dikasterin e diplomacisë dhe drejtori për Rajonin në të, Bashkim Rama kanë informuar mbi situatën shqetësuese në vendin fqinj, si dhe i janë përgjigjur pyetjeve të anëtarëve të komisionit për gjendjen e shqiptarëve atje, gjatë raportimit me dyer të mbyllura në komision.

Në vendin që shqiptarët janë faktor shtetformues, paradoksalisht Shqipëria nuk është e përfaqësuar me ambasador, si shkak i bllokimit të diplomatit të karrierës, Fatos Reka, nga presidenti i Republikës, Bujar Nishani. Ky fakt është nënivizuar nga kryetarja e komisionit, Arta Dade gjatë pjesës së hapur për mediat.

“Nuk ndërhyjmë në kompetencat që ka presidenti, por është urgjente që Republika e Shqipërisë të paraqitet në nivelin më të lartë, atë të ambasadorit, në ambasadën që ne kemi në Shkup”, deklaroi Dade.

Ndërsa qëndrimi zyrtar për situatën në Maqedoni, ashtu si edhe në raste të tjera është diskutuar me dyer të mbyllura në komision, për shkak të sensibilitetit të çështjeve.

Nënkryetari i këtij komisioni, Aldo Bumçi e shprehu qëndrimin e tij për mediat për atë çka është duke ndodhur në Maqedoni. Ish-ministri i Jashtëm e krahasoi kryeministrin Nikolla Gruevski për politika të ngjashme me ato të presidentit rus, Putin.

“Është shumë e qartë që kriza në Maqedoni nuk ka shkaqe etnike, por është një krizë e krijuar nga zbatimi i putinizmit. Një sistem autoritar që po zbatohet nga qeveria aktuale dhe kryeministri, i cili po kontrollon institucionet e pavarura, median, godet opozitën dhe po zbaton modelin e Putinit në Maqedoni. Një shqetësim i ngritur nga sekretari amerikan i Shtetit dhe zyrtarë të tjerë të lartë perëndimorë, për këtë rrezik të dobësimit të demokracisë në Europën Lindore dhe në Ballkan”, tha Bumçi.

Nëse situata në Maqedoni duket se nuk ka shumë vend për debat mes palëve politike në Shqiperi, emërimi i ambasadorëve mbetet një objekt debati.

Për Aldo Bumçin, ngërçi i mungesës së përfaqësimit të Shqipërisë në Shkup në nivel ambasadori është propozimi, sipas tij, politik i Ministrisë së Jashtme.

Ndërsa vetë presidenti, që ka refuzuar të dekretojë diplomatin e karrierës Fatos Reka, ka deklaruar se nuk i ka dhënë OK-ejin për shkak të mungesës së konsultimit të qeverisë me të për emrat e ambasadorëve, duke bllokuar disa të tillë.

Në ping pongun e procedurave Presidencë-Qeveri, ajo që mbetet fakt është mungesa e përfaqësimit me ambasador të Shqipërisë në Maqedoni, ku shqiptarët janë etni shtetformuese. / Top Channel

U bë shumë zhurmë për një ngjarje e cila cilësohet më shumë si inskenim i qeverisë maqedonase sesa diçka që ka të bëjë me realitetin.

Por, si do që të jetë, aksionet e policisë së këtij shteti, rikthyen tek shqiptarët ankthin e ditëve kur Maqedonia u përfshi në konfliktin e armatosur të vitit 2001.

Kjo ndjenjë e përcjell edhe tash familjen Osmani nga Haraçina e cila u përball me një akuzë që e ngarkon kryefamiljarin si të përfshirë në incidentin e ndodhur në Gushincë.

Pasiguria është prezente tek shqiptarët atje që jetojnë me frikën e një aksioni të radhës. Ekipi i RTK-së ka qëndruar në këto zona që pakkush nga mediat shqiptare ka mundur t’i vizitojë.

Ankthi i shqiptarëve të Maqedonisë është rikthyer pas incidentit të ndodhur në Gushincë të Likovës.

Në kërkim të gjetjes së fajtorit nga ana e Qeverisë maqedonase, anëtarët e familjes Osmani në fshatin Bërrnjac të Haraçinës së Shkupit, ishin në shënjestër të plumbave të policisë së këtij shteti.

Kryefamiljari Sylejman Osmani kërkohet nga policia si i dyshuari kyç për sulmin ndaj policisë maqedonase ditë më parë. Kjo ka bërë që edhe anëtarët e tjerë të kësaj familjeje më shumë të qëndrojnë larg shtëpisë.

Duke mohuar çdo akuzë të autoriteteve, ata theksojnë se e gjithë kjo ngjarje është një kurth.

Kryefamiljarja tregon se gjatë bastisjes, policia nuk arriti të gjente asnjë gjurmë që do ta lidhte këtë familje me aktivitete kriminale.

Haraçina e Shkupit njihet si një nga vatrat ku konflikti i vitit 2001 kishte jehonë më të madhe.
Nga kjo zonë e populluar me shqiptar e deri tek brezi kufitar me Kosovën përkatësisht fshati Malinë dhe Brezë, nevojiten deri në 3 orë rrugë.

Megjithëse mungonin kontrollet e policisë, prezenca e tyre gjatë rrugës vërehej në pothuajse çdo 20 kilometra.

Shtëpia e të kërkuarit shqiptar tashmë e është e lirë nga policia.

Ky objekt ishte përdorur nga familja osmani vetëm në sezon vere pasi ka vite janë shpërngulur në Haraçinë të Shkupit.

Lidhur me këtë rast, banorët e paktë të mbetur në mes dy kufijve nuk duan të thonë as edhe një fjalë.

Heshtja ka mbuluar fshatin për të cilin u bë shumë zhurmë. (Valdete Osmani / rtk)

Institucionet shtetërore në Maqedoni nuk reagojnë ndaj kërkesave në rritje për përgjegjësi politike dhe dorëheqje për t’i hapur rrugën hetimeve lidhur me pretendimet nga “afera e përgjimeve” të publikuara nga opozita.

Kryeministri Nikolla Gruevski dhe zyrtarët e tjerë të lartë të kabinetit qeveritar, të gjitha këto pretendime i kanë quajtur “të montuara me ndihmën e shërbimeve të huaja sekrete me qëllimin e vetëm rrëzimin e qeverisë dhe destabilizimin e vendit“.

Pas publikimit të njëpasnjëshëm të aferave të përgjimit janë intensifikuar edhe prononcimet e diplomatëve perëndimorë, të cilët kërkojnë hetim të plotë të rasteve, madje ambasadorja gjermane në Shkup, Kristine Althauzer, tha se bazuar në praktikën ndërkombëtare për raste të tilla jepen edhe dorëheqje për t’i hapur rrugën zbardhjes së rastit. “Sipas standardeve politike perëndimore, pasojat politike janë të pashmangshme në raste të akuzave të përmasave të tilla. Që të jem e qartë, ashtu siç ishte edhe kolegu im amerikan javën e kaluar, pasojat politike përbëjnë, për shembull, dorëheqje si parakusht që të zbatohet një hetim i nevojshëm, transparent dhe i plotë.Vetëm përmes një procesi të besueshëm hetimor, do të mund të ruhet perspektiva euroatlantike e Maqedonisë”, ka deklaruar ambasadorja gjermane Kristine Althauzer.

Qeveria e “shurdhët” ndaj mesazheve të ndërkomëtarëve

Deklarata e ambasadores gjermane është vlerësuar si reale nga njohësit e çështjeve ndërkombëtare. Ata thonë se në situatën e krijuar hetimet nuk mund të bëhen nga pushteti aktual i cili apostrofohet si fajtori kryesor për gjithçka që ndodh në vend.

“Deklarata e ambasadores gjermane po hap rrugën që Maqedonia të futet drejt një procesi, fillimisht me një qeveri teknike e një konsensusi të gjerë dhe pastaj t’i hapet rruga një procesi gjyqësor dhe një zbardhjeje për të parë se çfarë përmbajnë përgjimet. Qëndrimi amerikan dhe ai gjerman është shumë i qartë se kjo qeveri nuk ka më mbështetje dhe e ka humbur legjitimitetin. Vlerësoj se faktori ndërkombëtar nuk do të lejojë që pushteti aktual përmes krizave të ndryshme të mbijetojë politikisht “, thotë Arsim Sinani nga Qendra për studime ndërkombëtare dhe hulumtime ballkanike.

Deklarata e prerë e ambasadores gjermane dëshmon angazhimin më serioz të bashkësisë ndërkombëtare në zgjidhjen e krizës politike, por paraqet njëkohësisht edhe planin e tyre për kapërcimin e krizës, thotë analisti Xhelal Neziri.
“Izolimi i kësaj qeveria sa vjen e shtohet, të gjitha qendrat ndërkombëtare të vendimmarrjes ia bëjnë me dije se dorëheqja është rruga e vetme e zgjidhjes së krizës, pra dorëheqja e qeverisë dhe prokurorit, mund hapë një mundësi dhe rrugë drejt zgjidhjes legale dhe institucionale të krizës me të cilën ballafaqohet Maqedonia”, vlerëson Neziri.
Për Bojan Mariçiq nga Qendra Maqedonase për edukim europian , mesazhet e Uashingtonit dhe Berlinit, gjithashtu sugjerojnë që qeveria të jetë më fleksibile në bisedimet që zhvillohen në Bruksel. “Këto porosi të bashkësisë ndërkombëtare i kuptoj si porosi ndaj qeverisë që të jetë më fleksibile gjatë bisedimeve, sepse është e qartë se nuk shkojnë mirë. Pasi këto mesazhe përbëjnë tërheqje të vërejtjes se përgjegjësia është e piketuar dhe e qartë dhe në këto bisedime qeveria ka shanse ta mbajë përgjegjësi me qëllim që ta shpëtojë shtetin nga skenarë më seriozë ose më të padëshirueshëm”, shprehet Bojan Mariçiq.
Opozita paralajmron protesta masive

Maqedonia në muajin maj pritet të tronditet nga një protestë masive gjithëpopullore kundër pushtetit të udhëhequr nga kryeministri Nikolla Gruevski, kështu paralajmëroi ditë më parë lideri i opozitës maqedonase Zoran Zaev. Sipas Zaevit protesta gjithëpopullore është metoda e vetme me të cilën mund të ndryshohet situata në Maqedoni, sidomos pas skandalit të përgjimeve që dëshmoi se në Maqedoni krimi, korrupsioni, kontrolli i mediave, gjykatave, administratës, është nën direktivë të plotë të kryeministrit Gruevski.
Analistja politike Lidija Dimova tha se është optimiste, që protestat e paralajmëruara në maj do të japin rezultat. “Protestat do të jenë gjithëpopullore, mirëpo nuk do të jenë të dhunshme. Nga masovivteti i qytetarëve, të cilët do të shprehin pakënaqësinë do të bindet pushteti dhe regjimi i Gruevskit se i ka ardhur fundi. Skandali i përgjimeve nuk mund të tolerohet, pasi ka rrënuar të gjitha institucionet e shtetit, gjykatat, prokurorinë dhe në përgjithësi sigurinë”, thotë Dimova.

Profesoresha e Institutit për hulumtime sociologjike dhe politiko-juridike Mirjana Najçevska thotë se kjo qeveri mund të ndryshohet vetëm me demonstrata masive si dhe me bllokimin e instituteve. “Kjo qeveri mund të largohet vetëm me mospranimin e gjerë të qytetarëve, me demonstrata masive, me bllokimin e institucioneve.”, vë në dukej Najçevska.

Në Maqedoni po qëndron një delegacion i nivelit të lartë të Komisionit Monitorues të Asamblesë Parlamentare të Këshillit të Evropës, i cili po zhvillon të veçuara bisedohet për krizën politike në vend me përfaqësuesit më të lartë shtetrorë dhe përfaqësuesit e partive politike. (dw)

Organizata OBRIE kërkon përgjegjësi nga inskenuesit, hetuesit, strukturat e shërbimit sekret, gjykatësit dhe strukturat politike që kanë gisht në rastin e Sopotit.

Organizata për Bashkëpunim Rajonal dhe Integrime Evropiane (OBRIE) kërkon përgjegjësi penale dhe politike lidhur me rastin e Sopotit, për të cilin së fundi lideri opozitar Zoran Zaev publikoi faktet dhe dëshmitë për një montim klasik  të këtij rasti gjyqësor.

OBRIE vlerëson se në bazë të parimeve të së drejtës vendore por edhe ndërkombëtare, autorët e këtij montimi monstruoz duhet të përgjigjen penalisht para organeve të drejtësisë.

“Të gjithë ata që kanë marrë pjesë në këtë montimin e këtij rasti, duke filluar nga hetuesit, strukturat e shërbimit sekret që kanë ushtruar  dhunë dhe inskenim, gjykatësit, prokurorët dhe bashkëpunëtorët tjerë që kanë ndihmuar këtë proces, duhet të përgjigjen penalisht. Përgjegjësi duhet të jap  e lidershipi politik maqedonas dhe shqiptar që ka udhëhequr shtetin  në këtë periudhë kohore, i cili edhe pse i ka ditur faktet ka heshtur përballë kësaj padrejtësie”, vlerëson OBRIE.

Kjo organizatë kërkon të kompensohen viktimat e këtij procesi, të burgosurit nga familja Klaiqi nga fshati Sopot, të cilët për gati një decenie u mbajtën të torturuar fizikisht dhe psiqikisht në kushte mizore në burgjet e Maqedonisë.

OBRIE gjithashtu  kërkon të zbardhen edhe raste tjera gjyqësore të montuara gjyqësore përmes të cilave shqiptarët etnik në Maqedoni janë dënuar me mijëra vite burg.

OBRIE gjithashtu kërkon nga komuniteti ndërkombëtar të ndihmojë në zbardhjen e këtyre rasteve eklatante në të cilat njerëz të pafajshëm ende vuajnë dënime të rënda, të viktimizuar nga një sistem i degraduar i drejtësisë

“Pa u zbardhur dhe gjykuar në mënyrë të plotë dhe të drejtë këto raste Maqedonia nuk mund të pretendoj anëtarësimin në familjen evropiane. Maqedonia si shtet kandidat për anëtarësim në BE e ka të domosdoshme ti respektoj konventat ndërkombëtare dhe evropiane për të drejtat e njeriut”, thuhet në fund të reagimit.

Zbardhja e këtij procesi do të duhet të fillojë menjëherë sapo të merret një vendim gjyqësor lidhur me këtë rast. Në Gjykatën e Shkupit më 5 maj është caktuar seanca e radhës për rastin e Sopotit, por nuk dihet se çfarë vendimi final do të pasojë.

Sopoti është rikthye me publikimin e disa materialeve të përgjimeve nga opozita maqedonase, ku dolën shumë të vërteta në një bisedë midis ministres së brendshme Gordana Jankullovska dhe shefit të shërbimit sekret DSK, Sasho Mijallkov, se procesi ishte i montuar dhe se nuk kishte dëshmi dhe prova edhe në MPB.

Sulejman Sulejmani, Hasan Klaiqi, Samet Lutfiu, Shaban Limani, Shaqir Sulejmani, Bashkim Ukshini, Musa Klaiqi, Zenel Klaiqi, Selman Jahiu, i ndjeri Samet Limani dhe Afrim Ukshini ishin  11 personat e akuzuar për këtë rast. Grupi i atyre që kanë qenë në burg kanë mbajt dënimin për 7 vjet, dhe pas rikthimit të hetimeve për shkak të dyshimeve për proces të montuar, ata vazhdojnë të qëndrojnë në shtëpi, deri në finalizimin e procesit gjyqësor.(INA)