Përfaqësues të shteteve më të fuqishme evropiane po i kërkojnë deputetëve kosovarë që të votojnë pro themelimit të Gjykatës Speciale në Kuvend, në të kundërtën, siç thonë ata, kjo çështje do të kalojë në kompetencë të Këshillit të Sigurimit të Organizatës së Kombeve të Bashkuara.

Matthias Kiesler, i ngarkuar me Punë në Ambasadën gjermane në Prishtinë, ka deklaruar për “Zërin” se deputetët e Kosovës duhet ta kenë parasysh se në rast të një dështimi të votimit të Speciales e gjithë çështja do të kalojë në KS të OKB-së.

“A do të ishte një shqyrtim i sërishëm nga ana e OKB-së në interes të Kosovës?”, pyet Kiesler.

Kiesler i kujton ligjvënësve kosovarë se në prill të vitit 2014, presidentja e Kosovës, Atifete Jahjaga, nëpërmjet shkëmbimit të letrave me Përfaqësuesen e atëhershme të Lartë të BE-së për Politikë të Jashtme dhe Siguri, Lady Ashton, është marrë përsipër obligimi për të themeluar këtë Gjykatë. /Zëri/

Programi “Ditët e Gjuhës gjermane 2015″ që zhvillohet gjatëmujait maj në Kosovë synon t’u ofrojë mundësinë të merren me gjuhën gjermane të gjithëve si fillestarëve ashtu edhe atyre që e kanë gjermanishten gjuhë amtare.

Ashtu si në pesë vitet e kaluara, edhe sivjet Ambasada Gjermane në Prishtinë së bashku me Ambasadën Zvicerane dhe atë Austriake, përfshirë dhe partnerë të tjerë organizon “Ditët e Gjuhës gjermane 2015″.

Me këtë program të gjerë që nisi në fillim të muajit maj dhe do të zgjasë deri në fund të majit, dëshirohet që të gjithëve, nga fillestarët deri tek folësit amtarë, t’u ofrohet mundësia për t’u marrë me gjuhën gjermane. Krahas kësaj, Ambasada Gjermane e vlerëson përpjekjen e të gjithë atyre, të cilët e flasin rrjedhshëm gjuhën gjermane.

Në kuadër të programit “Ditët e Gjuhës gjermane 2015″, për plot 24 ditë ofrohen aktivitete të ndryshme anë e mbanë Kosovës. E veçanta e gjithë kësaj është se ofrohen bursa për nxënës, bursa për studentë dhe shkencëtar, bursa për ekspertë të ardhshëm dhe mundësi për mësimdhënien e gjuhës gjermane.

Ambasadorja e Gjermanisë në Kosovë, Angelika Viets, në një nga fletushkat ku jepen informacione të shumta për bursa të ndryshme për studime në Gjermani, shkruan se arsimi është burimi i çdo shoqërie dhe baza për zhvillimin secilit vend. “Arsimi i lartë në këtë mes ka një domethënie të veçantë, ai nga nxënës të përgjithshëm bën ekspertë në drejtësi, inxhinieri, matematikë, ekonomi apo gjuhë të huaja. Këta ekspertë kanë dijen e nevojshme për të udhëhequr apo për të themeluar ndërmarrje, për t’u dhënë mësim gjeneratave të reja në shkolla, apo, të përgatisin në aspektin profesional vendimet e ministrave në ministri të ndryshme”, shkruan ambasadorja Angelika Viets.

“Me anë të diplomimit të pjesëshëm të studimeve, apo një praktike jashtë vendit, ekziston mundësia që dija e fituar në Universitet në atdhe të thellohet dhe të shikohet nga një perspektivë e re. Gjermania ka shumë universitete të mira me një numër të madh dhe të ndryshëm të drejtimeve, të cilat mund të jenë të përshtatshme për studime post-universitare”, thotë në shkrimin e saj, ambasadorja gjermane Angelika Viets, e cila u bën thirrje të rinjve kosovarë që të aplikojnë për bursa që u mundësojnë studime në Gjermani.

Njëra nga shqetësimet e vazhdueshme të autoriteteve kosovare që nga paslufta ishte dhe vazhdon të jetë pamundësia e të rinjve kosovarë që të shkollohen jashtë vendit për shkak se Kosova akoma nuk është përfshirë në liberalizimin e vizave dhe kjo sipas udhëheqësve politik kosovar, po shkakton pengesë për qytetarët e Kosovës. Por sa i përket Gjermanisë, ky vend tashmë e ka të rregulluar çështjen e të rinjve që dëshirojnë të studiojnë në Gjermani dhe këtë e tha gjatë vizitës në Kosovë në fund të majit prill, shefi i diplomacisë gjermane, Frank Wallter Steinmeier.

“Liberalizimi i vizave nuk duhet të keqkuptohet si një parakusht për të rinjtë që të fillojnë një studim në Gjermani. Ne në Gjermani për këtë çështje kemi gjetur zgjidhje, shembull për studime nuk nevojitet që të ketë liberalizim të vizave”, tha Frank Wallter Steinmeier.

Janë shumë organizata gjermane që në kuadër të “Ditëve të Gjuhës gjermane 2015″, përmes broshurave informatiove dhe aktiviteteve në terren njoftojnë të rinjtë mbi mundësinë e përfitimit të një burse gjermane.

Është fondacioni “Europeans For Peace”, që ndan bursa për nxënës, “Shërbimi Gjerman për Shkëmbime Akademike” ( DAD), fondacioni “Alexander von Humboldt”, që ofron bursa kërkimore, “Erasmus Mundus”, që ofron kurse master dhe doktorate, janë fondacionet e njohura “Friedrich Erbert Stiftung”, “Konrad Adenauer Stiftung”, “Friedrich Naumann Stiftung”, që ofrojnë bursa për këshillim politik, shkollim dhe trajnim politik për pozita udhëheqëse e shumë fusha tjera. Është fondacioni i Ministrisë Federale të Punëve të Jashtme, si dhe fondacione të tjera: “Rosa Luxemburg Stiftung”, “Robert Bosch Stiftung”, “Internationales Parlaments-Stipendium des Deutschen Bundestages” (IPS), etj. E mbështjetje të veçantë për përhapjen e gjuhës e kulturës gjermane jepn instituti “Goethe Institut”, që vepron në tërë botën e që përkujdesët për bashkëpunim ndërkombëtar në fushën e kulturës.

Aktivitetet “Ditët e Gjuhës gjermane 2015″ zhvillohen në për të pestin vit radhazi në bashkëpunim edhe më ambasadën Zvicerane dhe atë Austriake promovojnë gjuhën gjermane duke u dhënë mundësi qytetarëve të Kosovës, sidomos të rinjve që përmes bursave të ndryshme që ofrojnë organizatat gjermane, të studiojnë në shkollat dhe universitetet më të mira gjermane. (dw)

Një debat përplot polemika dhe akuza të ndërsjella ka përcjellë punimet e seancës plenare në Kuvendin e Kosovës të mërkurën.

Debatet u ashpërsuan në momentin kur zëvendëskryeministri dhe ministri për Kulturë, Rini dhe Sport, Kujtim Shala, i cili vjen nga radhët e Lidhjes Demokratike të Kosovës, ka njoftuar deputetët se qeveria ka tërhequr disa projektligje nga rendi i ditës, përfshi Projektligjin për Parandalimin e Konfliktit të Interesit dhe Projektligjin për Trashëgiminë Kulturore.

Tërheqja e këtyre projektligjeve ka irrituar tej mase deputetët opozitarë. Kryetarja e Komisionit Parlamentar për Legjislacion, deputetja Albulena Haxhiu nga radhët e Lëvizjes Vetëvendosje tha se Qeveria ka tërhequr Projektligjin për Parandalimin e Konfliktit të Interesit për shkak të interesave të zyrtarëve të lartë të cilët mbajnë disa funksione publike.

“Arsyeja kryesore e tërheqjes së këtij projektligji është e qartë, pasi që amandamenti gjashtë në këtë projektligj, i përpiluar nga Komisioni thotë: zyrtari i lartë nuk mund të ushtroj më shumë se një funksion në sektorin publik si dhe nuk mund të jetë anëtar në bordet e ndërmarrjeve publike dhe në agjencitë e pavarura”, ka thënë deputetja Haxhiu.

Polemikat janë shtuar sidomos pas fjalimit të deputetes së Aleancës për Ardhmërinë e Kosovës, Donika Kadaj Bujupi e cila tha se tërheqja e Projektligjit për Parandalimin e Konfliktit të Interesit ka të bëjë me krimin e organizuar mbi të cilin, sipas saj, po funksionon qeveria aktuale e Kosovës.

“Përpjekja për tërheqjen me çdo kusht projektligjin i cili parandalon konfliktin e interesit lidhet me krimin e organizuar përmes së cilit po funksiononi duke i mbikëqyrë, monitoruar, kapë të gjitha bordet e pavarura dhe duke i vendosur aty njerëzit e juaj të cilët kanë nga pesë vende pune”, ka thënë Kadaj Bujupi.

Ndaj deputetes Donika Kadaj Bujupi ka reaguar zëvendëskryeministri Kujtim Shala duke i quajtur të pakuptimta akuzat e saj dhe subjektit politik që ajo përfaqëson.

“Zonja Bujupi është shenja më e mirë se si mashtruesit nuk lejohen në pushtet sepse nuk votohen. Dhe, e dyta, më duket paradoksale se si një përfaqësuese e Aleancës për Ardhmërinë e Kosovës i drejtohet dikujt tjetër për krim të organizuar”, është kundërpërgjigjur Shala.

Por, deputetja e AAK-së nuk është ndalur.

Ajo ka thënë se kryeministri i Kosovës, Isa Mustafa ka mbi 70 dosje në prokurori, kështu që, sipas saj, nga një qeveria që udhëhiqet nga këso njerëz, nuk mund të pritet ndonjë ndryshim pozitiv.

“Shefi yt (Kryeministri Isa Mustafa) i cili ka ardhur në pushtet me premtimin për 120 mijë vende pune, i ka nja 70 – 80 dosje në prokurori dhe në momentin kur ky shtet të çlirohet do t’i vijë rendi për t’u marrë vesh se kush është kush”, ka theksuar Kadaj Bujupi.

I menjëhershëm ka qenë reagimi i zëvendëskryeministrit Kujtim Shala, i cili ka apostrofuar me këtë rast komunën e Pejës, që njihej deri vonë si bastioni i AAK-së, por që në zgjedhjet e fundit qeveriset nga LDK-ja, si një qytet ku, sipas zëvendësministrit Shala, po luftohet krimi dhe zhvatja.

“Se çka është ç’kapja e shtetit shko e shiko në Pejë. Shihni se çka po ndodhë atje. Se çka është dalja nga zhvatja, nga shantazhet dhe nga krimi i organizuar shkoni dhe shikoni në Pejë”, ka theksuar Shala.

Më pas, polemikat janë ashpërsuar, kur deputetja e AAK-së tha se Shala po gënjente duke mos treguar të vërtetën në foltoren e Kuvendit.

“Për një ministër që sillet si rrugaç, dua të them se ai po rren”, është shprehur Donika Kadaj Bujupi.

Debatet polemizuese janë ndërprerë pas vërejtjes së shefit të Grupit Parlamentar të Lidhjes Demokratike të Kosovës, Ismet Beqiri i cili kërkoi nga kryetari i Kuvendit, Kadri Veseli që të mos e lejojë që foltorja e Kuvendit të përdoret për fyerje e etiketime.

Në vijim, deputetët nga radhët e opozitës kanë kritikuar qeverinë edhe në lidhje me tërheqjen nga rendi i ditës së Projektligjit për Trashëgiminë Kulturore.

Sipas tyre, qeveria nuk po thotë të vërtetën, pasi që ky projektligj është tërhequr me kërkesë të Beogradit dhe Listës Serbe.

Ndaj këtyre deklaratave ka reaguar sërish zëvendëskryeministri Kujtim Shala duke thënë se tërheqja e këtij Projektligji ka të bëjë me disa harmonizime që duhet bërë me UNESCO-n. (rel)

Autoritetet e Kosovës thonë se ndërtimi i ambasadës nuk është vetëm përcaktim i adresës së përhershme amerikane por edhe simbol i qëndrueshmërisë së shtetit të ri.

Presidentja e Kosovës, Atifete Jahjaga, kryeministri Isa Mustafa dhe ambasadorja amerikane Tracey Ann Jacobson hodhën gurthemelin e ndërtesës së Ambasadës së Shteteve të Bashkuara në Prishtinë. Rreth 700 punëtorë do të angazhohen në ngritjen e kësaj godine që siç u tha, shënon fillimin e ndërtimit të shtëpisë së përhershme të diplomacisë amerikane në Kosovë.

Presidentja e Kosovës, Atifete Jahjaga tha se qytetarët e Kosovës janë përjetësisht falënderues dhe mirënjohës për rolin e guximshëm dhe historik që Shtetet e Bashkuara kanë në bërjen e Kosovës shtet.

“Bashkë kemi bërë goxha një udhëtim. Qëndruat përkrah nesh në momentet më sfiduese të shekullit të kaluar, dhe bashkërisht nisëm një kapitull të ri të shpresës dhe optimizmit në fillim të këtij shekulli për të kurorëzuar përpjekjet tona për Kosovën shtet të të gjithë qytetarëve të saj shtatë vite më parë. Në Shtetet e Bashkuara të Amerikës qytetarët e Kosovës gjetën mbështetjen dhe besimin për realizimin e vizionit tonë për liri, pavarësi e demokraci. Përkundër shumë vështirësive, vullneti ynë i përbashkët triumfoi ndaj të keqes dhe sot si dy popuj që ndajnë vlerat fundamentale dhe idealet e demokracisë shënojmë edhe një fillim të ri – atë të vendosjes së adresës tuaj permanente si simbol i qëndrueshmërisë”.

Ambasadorja amerikane, Tracy Ann Jacobson tha se dita e sotme shënon thellimin e marrëdhënieve ndërmjet dy vendeve.

“Në këto vjet ekipi ynë ka punuar me shumë zell për ta mbështetur Kosovën në rrugëtimin e saj drejt zhvillimit të demokracisë, sundimit të ligjit dhe në zhvillimin ekonomik. Prandaj, po e ndjej që sot po e vëmë gurthemelin jo vetëm për ambasadën e re aq të nevojshme, por edhe të simbolit të përkushtimit dhe miqësisë së vazhdueshme të Shteteve të Bashkuara me Republikën e Kosovës”, tha ambasadorja Jacobson.

Ndërtimi i ambasadës amerikane ndodhë 19 vjet pas hapit të parë të pranisë së përhershme amerikane në Kosovë. Në qershor të vitit 1996 Shtetet e Bashkuara hapën në Prishtinë Zyrën Informative, e cila pas luftës u shndërrua në misionin e Shteteve të Bashkuara për t’u shndërruar në ambasadë pas shpalljes së pavarësisë në vitin 2008.

Në Kosovë vazhdon të çmohet shumë roli i Shteteve të Bashkuara të Amerikës në të gjitha proceset nëpër të cilat ka kaluar vendi. Ky rol shihet i pazëvendësueshëm edhe në proceset e ardhme politike të Kosovës dhe përmbushjen e aspiratave të saj për integrimet euro atlantike. Shtetet e Bashkuara janë mbështetësit më të fuqishëm të pavarësisë së Kosovës të shpallur në shkurt të vitit 2008. Deri tash mbi 100 vende të botës e kanë pranuar pavarësinë e shtetit të ri e cila kundërshtohet ashpër nga Serbia dhe aleatja e saj Rusia. Zyrtarët amerikan kanë përsëritur në vazhdimësi se pavarësia është proces i pakthyeshëm dhe se Kosova është e bashkuar dhe e pa ndarë. Por, njëkohësisht ata kanë kërkuar që institucionet e Kosovës të marrin përgjegjësitë për ndërtimin e një shteti funksional, ringjalljen ekonomike, luftën kundër krimit të organizuar e korrupsionit dhe veçanërisht mbrojtjen e pakicave kombëtare. (voa)