Dita ndërkombëtare Pa Duhan më 31 maj është një ditë për duhanpirësit për të menduar lidhur me zakonin e tyre – dhe për ta lënë atë të paktën për 24 orë. Por cilat janë disa prej strategjive që i ndihmojnë njerëzit ta lënë duhanin?

Nuk është sekret se përdorimi i duhanit dëmton shëndetin. Por, shumica e njerëzve, e kanë të vështirë për ta lënë. Kjo, për shkak se shumë prej tyre e kanë filluar këtë zakon që në moshë të re dhe për shkak se duhani përmban nikotinë.

Nikotina është shumë problematike, drogë shumë e fuqishme, thonë ekspertët

Dr Kimberly Horn thotë se adoleshentët ka të ngjarë ta përdorin duhanin në shumë forma. Kjo mund të jetë cigare, puro të vogla, duhan patym. Ka edhe nga ata që pinë cigare elektronike, të cilat gjithashtu përmbajnë nikotinë.

“Sa më shumë nikotinë, aq më shumë të varur bëhen, dhe aq më e vështirë është për ta lënë.”

Nuk ka një teknikë për të gjithë për të lënë duhanin. Disa i kthehen cigares elektronike, me shpresë se ajo mund të ndihmojë të heqin dorë nga ky zakon.

“Pas shumë vitesh të pirjes së duhanit, nuk më pëlqen era e tymit, nuk më pëlqen grumbulli i bishtave të cigareve, nuk më pëlqen shija që duhani lë në gojën time, dhe nuk më pëlqen fakti që njerëzit e tjerë shqetësohen nga tymi.”

Studimet tregojnë se pajisjet elektronike mund të japin rezultat për disa, por jo për të tjerët. Terapi të sjelljes dhe barna, dhe çamçakëz që reduktojnë dëshirën për nikotinë mund të ndihmojnë.

Dr Nancy Rigotti dhe studiues të tjerë kanë projektuar një program të thjeshtë për të ndihmuar lënien e duhanit. Pacientëve iu jepen medikamente dhe këshilla në spital, dhe gjendja e tyre ndiqet pasi dalin nga spitali.

“Ne e dimë se ilaçet dhe këshillat japin rezultat, dhe të dyja së bashku  punojnë shumë më mirë se sa vetëm një.”

Shtatëdhjetë për qind e duhanpirësve në këtë program nuk pinin duhan gjashtë muaj pas përfundimit të programit.

Qeveria amerikane dhe organizata private zhvillojnë fushata kundër duhanit që nga viti 1964. Një studim nga Shëndetit Publik në universitetin Yale ka gjetur se ata që e lanë duhanin gjatë kësaj periudhe kanë pasur një shtim prej 30 për qind në jetëgjatësi. Dr Theodore Holford është një nga bashkë-autorët. Ai dhe të tjerë që studiojnë përdorimin e duhanit kanë këtë këshillë:

“Kush mendon të pijë duhanit nuk duhet ta konsiderojë kurrë atë.” (voa)

Manipulime si në filma me agjentë? Rusia bën përgjegjëse Ukrainën për rrëzimin e avionit të shoqërisë malajziane, MH17. Por sipas një analize të pavarur: Pamjet satelitore u manipuluan.

Qeveria ruse sipas të gjitha gjasave ka manipuluar pamjet satelitore që lidhen me rrëzimin e avionit MH17 në 17 korrik 2014 në lindje të Ukrainës, me qëllim që të provonte fajin e qeverisë ukrainase. Në këtë përfundim vjen një analizë e një grupi investigativ gazetarësh. “Analiza forensike” ka nxjerrë “qartë dhe pa dyshim” se pamjet satelitore kanë datë të fallsifikuar dhe u ndryshuan me programin Software Adope Photoshop CS25, thuhet në këtë raport që citohet nga mediat gjermane, Zeit Online dhe Spiegel Online.

Grupi investigativ “Bellingcat” ka marrë nën vëzhgim dy pamje satelitore të Ministrisë së Mbrojtjes të Rusisë, të cilat paraqiteshin si prova nga pala ruse se aviacioni ukrainas në ditën e rrëzimit kishte qenë aktiv në rajon. Qeveria ruse i publikoi pamjet më 21 korrik 2014, në një konferencë shtypi në Moskë, pak ditë pas rrëzimit të avionit.

Raketahedhës i zhvendosur në mënyrë digjitale?

Sipas të dhënave ruse në një fotografi të bërë ditën e rrëzimit duket se së paku një raketahedhës vetëlëvizës i tipit Buk i forcave ukrainase nuk ndodhej më në bazën ushtarake të Donjeckut. Pamja e dytë satelitore provon, sipas rusëve, se dy raketahedhës dhe një automjet tjetër ushtarak ukrainas ndodheshin në jug të fshatit Zaroshinskoje. “Këto aparatura komplekse janë në gjendje të godasin objektiva në distancë 35 kilometra dhe lartësi 22 kilometra”, u tha në konferencën e shtypit. Sipas tyre raketahedhësit ndodheshin në afërsi të fluturimit të MH17.

Por hulumtimet e grupit investigativ Bellingcat kanë provuar se fotografitë e paraqitura nga rusët janë bërë qartazi para ditës së rrëzimit të avionit. Pamja e parë satelitore është bërë nga 1-18 qershor 2014, dhe e dytë para 15 korrikut, njofton Spiegel Online. Ky rezultat del pas krahasimit me pamjet satelitore të hapura për publikun në të njëjtën hapësirë kohore -si psh. ato të Google Earth. Veç kësaj pamjet janë ndryshuar më pas: Raketahedhësit e tipit Buk janë hequr nga një foto, dhe janë shtuar në tjetrën, shkruan Zeit Online.

298 viktima

Avioni Boeing 777 i Malaysia Airlines me numrin MH17 u rrëzuar më 17 korrik 2014 në lindjen e Ukrainës, në një rajon luftimesh. 298 vetë humbën jetën, 193 holandezë, katër gjermanë. Avioni ndodhej në itinerarin e fluturimit nga Amsterdami në Kuala Lumpur. Në lartësitë mbi 10.000 metra avioni u godit me shumë gjasa nga një raketë.

Holanda është ngarkuar me hetimet mbi shkakun e rrëzimit dhe ato penale. Sipas një raporti të parë avioni është goditur nga jashtë, këtë e tregojnë vrimat e shumta në pjesë të tij. Këtë verë pritet një raport se kush është fajtor për rrëzimin e tij. Qeveria ukrainase dhe disa qeveri europiane fajësojnë Rusisë si bashkëpërgjegjëse, pasi ajo u ka ofruar sisteme raketash kryengritësve në lindje. Rusia dhe separatistët e hedhin poshtë këtë akuzë dhe fajësojnë palën ukrainase. (dw)

Ministri i Jashtëm rus Sergei Lavrov kritikoi Bashkimin Evropian për publikimin e një liste të zyrtarëve evropianë që ndalohen të udhëtojnë në Rusi. Ai i bëri komentet sot në Moskë gjatë një takimi me homologun e tij italian Paolo Gentiloni për të diskutuar mbi marrëdhëniet dypalëshe.

Ministri i Jashtëm i Italisë Paolo Gentiloni tha pas një takimi me biznesmenët italianë në Moskë se krijoi bindjen që ata duan ta vazhdojnë punën e tyre në Rusi dhe të kërkojnë atje mundësi të reja.

“Është e qartë se ata dëshirojnë ta vazhdojnë punën e tyre këtu. Sigurisht, ekzistojnë vështirësi por është gjithashtu e qartë se situata e re na jep mundësi të reja,” tha zoti Gentiloni.

Duke folur në prani të ministrit italian, ministri rus Sergei Lavrov tha se Rusia është e zhgënjyer me reagimin e Evropës ndaj masave të Moskës për të ndaluar dhjetëra zyrtarë evropianë të vizitojnë Rusinë. Ai kritikoi Bashkimin Evropian  për publikimin e kësaj liste që duhej të mbetej konfidenciale.

“Ne e dorëzuam këtë listë me kërkesë të BE-së mbi bazën e konfidencialitetit. Por ajo menjëherë u publikua nga mediat. Bashkimi Evropian i cili normalisht nuk komenton për rrjedhjet e informacionit, e bëri listën subjet komentesh.  Pra, unë shoh këtu shkelje të normave etike,” tha ministri rus.

Zoti Lavrov shpjegoi gjithashtu se ata që janë në listën e personave të ndaluar për të udhëtuar në Rusi kanë mbështetur ngjarjet që çuan në përmbysjen e Presidentit ukrainas Viktor Janukoviç në shkurt të vitit 2014.

Rusia fajëson për krizën në Ukrainë atë që ajo e quan ndërhyrje amerikane në një rajon që Moska e ka parë tradicionalisht si sferën e saj të ndikimit.

Kriza në Ukrainë i ka zhytur marrëdhëniet midis Rusisë dhe Perëndimit në pikën e tyre më të ulët që nga fundi i Luftës së Ftohtë. Por Shteteve të Bashkuara u duhet bashkëpunimit rus për të zgjidhur një sërë çështjesh të tjera globale, si Irani dhe konflikti sirian. (voa)

Robotët luftojnë krimin

T: Paisjet e sigurisë pritet të përgjysmojnë krimet

Qendrat tregtare, stadiumet dhe kampuset universitare së shpejti mund të kenë një mjet të ri për të luftuar krimin. Një kompani e quajtur Knightscope thotë se robotët e saj të lëvizshëm mund të parashikojnë dhe parandalojnë krimet. Kompania thotë se synon të ulë krimet me rreth 50 përqind në zonat ku do të patrullojnë robotët.​

Dikur pjesë e filmave fantastiko-shkencor …robotët po bëhen realitet.

Këta robotë, roje të sigurisë, do të ndryshojnë botën thotë William Santana Li.

“Në planetin tonë jetojnë shtatë miliardë njerëz dhe së shpejti do të bëhet nëntë miliardë. Organet egzistuese të rendit nuk do të jenë në gjendje ta përballojnë këtë.” 

Ai thotë se kompania e tij, “Autonomous Data Machines”, mund të shëbejë si sytë dhe veshët e organeve të rendit.

Ai tregon se çfarë shikon roboti në këtë demostrim në Los Angeles.​ 

“Ndërthurja e njeriut me robotët. Makinat bëjnë punën monotone kompjuturike dhe nganjëherë punët e rrezikshme, ndërsa njeriu merr vendimet strategjike, dhe kështu ndodh bashkërendimi i gjërave.” 

I gjatë 90 centimetra dhe me peshë 136 kilogram, këto makina lëvizin lirshëm brenda një perimetri të caktuar. Ato nuk janë të armatosura por kanë video kamera që filmojnë 360 gradë.

“….po ashtu kemi një sistem optik indentifikimi në robotët që kontrollon 300 targa makinash në minutë.” 

Robotët mund të zbulojnë armë kimike dhe biologjike. Li thotë se edhe pse robotë, prania e tyre mund të ndryshojë sjelljet kriminale.

Por profesori i ligjeve Eugene Volokh thotë se robotët duhen përdorur sipas rregullave.

“Nëse roboti ndodhet aty ku është polici dhe shikon ato që mund të shkikojë polici, atëherë nuk ka probleme kushtetuese, nuk ka probleme të privacisë.”   

Profesori thotë se mund të ketë shqetësime të ngjashme me ato që dalin nga policët që kanë kamera trupore.

“Një shqetësim është se në rastin kur dikush bën diçka të paligjshme në vende publike mund të arrestohet dhe gjobitet. Por ata nuk duan që videoja që pasqyron këtë veprim të publikohet sa herë e kërkon dikush dhe të vihet në internet.  Do të jetë interesante të shihet se si ligjet e shteteve do ta trajtojnë çështjen e survejimit kur flitet për arkivimin e të dhënave publike.”

William Santana Li thotë se shumë kampuse universitare, qendra tregtare dhe stadiume së shpejti mund të kenë robotë të lëvizshëm.

Ai thotë se ka një listë të gjatë subjektesh brenda dhe jashtë Amerikës që janë të interesuar të kenë këto roje sigurie të së ardhmes.  (voa)