Ndërkohë që procesi i numërimit vazhdon, sipas rezultateve të arritura deri më tani aleanca e majtë arrin në fitojë në 11 bashki, ndërsa aleanca e djathtë në dy prej tyre . Në katër vitet e ardhshme Bashkia e Skraparit, Pustecit, Peqinit, Hasit, Delvinës, Kolonjës, Libohovës, Fushë Arrzit dhe Pukës do të drejtohen nga kryetarë të koalicionit të majtë.

13:00 – Mbyllet numërimi në Belsh, fiton ASHE

Përfundon numërimi edhe në Belsh, ku fitues ka dalë Arif Tafani i ASHE-së, me 45.51%, ndërsa Asqeri Kuqja i APPD-së ka marrë 38.45% të votave.

12:50 – PS fiton në Poliçan

Kandidati i majtë për Bashkinë e Poliçanit, Adriatik Zotkaj, ka fituar me një rezultat bindës duke marrë 72,5% të votave. Ndërsa kundërshtari Florian Qama ka marrë vetëm 27.5%

12:35 – ASHE fiton garën për Bashkinë e Urës Vajgurore

Ka përfunduar procesi i numërimit të votave edhe në Bashkinë e Urës Vajgurore, fituese është shpallur kandidatja e ASHE-së, Juliana Memaj, e cila ka marrë 8908 vota, përkundrejt 6419 votave që ka marrë kandidati i APPD-së Bujar Hoxhaj. Nga 50 kuti, njëra doli me probleme dhe nuk u mor në shqyrtim për t’u numëruar.

12:30 – Veliaj fiton në lagjen e Bashës

Kandidati i majtë për Tiranën, Erion Veliaj, arrin të mund kundërshtarin e tij të djathtë pikërisht në lagjen e liderit demokrat, Lulzim Basha.

Edi Rama humbi në këtë zonë me 650 vota në zgjedhjet e fundit, kurse tani Veliaj duket se do të ketë një rezultat të ndryshëm.

Mësohet se, në minutat e fundit kandidati i majtë ka kaluar 79 vota para në numërimin e kutive të njësisë tetë, një nga “kështjellat” elektorale historike të së djathtës në Tiranë.

11:35 – Mbyllet numërimi në Bashkinë e Klosit, fiton e djathta

Ka përfunduar procesi i numërimit të votave edhe në Bashkinë e Klosit, ku është shpallur fitues kandidati i Aleancës Popullore për Punë dhe Dinjitet, Basir Çupa. Çupa ka marë 935 vota ndërsa kandidatja e Aleancës për Shqipërinë Europiane, Valbona Kola ka marë 608 vota.

11:25 – Mbyllet Roskoveci, fiton kandidatja e ASHE-së

Majlinda Bufi, kandidatja e koalicionit “Aleanca për Shqipërinë Evropiane” është shpallur fituese në Bashkinë e Roskovecit. Bufi fitoi përballë kandidatit të “Aleancës Popullore për Punë dhe Dinjitet”, Gëzim Çaushi.

11:19 – Aleanca e djathtë merr Përmetin dhe Tropojën

PËRMET – Në Bashkinë e Përmetit fitues shpallet kandidati i aleancës së djathtë Niko Shupuli, me 4771 vota (58.58%), kundrejt 3138 votave (38.53 %) të kandidatit të majtë, Gilberto Jaçe.

TROPOJË – Aleanca e djathtë arrin të fitojë Bashkinë e Tropojës me kandidatin e saj, Besnik Dushaj. Ky i fundit arriti të siguronte 5810 vota (51.94 %), ndërsa kandidati i majtë Rexhe Byberi, mori 4992 vota (44.63 %).

Aleanca e majtë merr 12 bashki

SKRAPAR – Procesi i numërimi u mbyll mëngjesin e kësaj të hëne në Skrapar, ku fitues ka rezultuar kandidati i ASHE-së, Nesim Spahiu, i cili mori 84.43% të votave, ndërsa rivali i tij demokrat, Hajredin Bakjasi, mori 15.57% të votave.

DELVINË - Përfundoi mëngjesin e sotëm procesi i numërimit në Bashkinë e Delvinës. Fitues i këtyre zgjedhjeve doli kandidati i majtë, Rigels Balili, me një diferencë të lartë votash. Balili merr postin e kryebashkiakut të Delvinës, duke rrëzuar nga ai post kandidatin e djathtë që pretendonte mandatin e tretë.

Kandidati i Aleancës për Shqipërinë Evropiane, Rigels Balili, u shpall fitues me 72.8% të votave, ndërsa kandidati i djathtë, Dhurim Alinani mori 27.2% të votave. Konvertuar në vota respektivisht Rigels Balili caktohen në postin e kryebashkiakut me 4735 vota, kundrejt kundërshtarit të tij që mori 1769 vota.

LIBOHOVË – Me përfundimin e votimeve në Bashkinë e Libohovës fituese u shpall kandidatja e ASHE-së, Luiza Mandi, e cila mori 1692 vota (53.65%), duke mundur kandidatin e djathtë Altin Çomon, që mori 1462 vota (46.35%).

PEQIN – Edhe Bashkia e Peqinit është fituar nga një kandidati i majtë, Saimir Hasalla, i cili arriti të merrte 9020 vota ose 67.94 % të tyre, ndërsa Albert Kreçi kandidati i APPD mori 4284 vota ose 32.06 %.

FUSHË ARRËZ/PUKË – Po ashtu edhe bashkia e Fushë Arrzit dhe e Pukës është fituar nga kandidatët e ASHE, por me një diferencë të vogël. Në Pukë Gjon Gjonaj arriti të fitonte me një diferencë vetëm me 97 vota, ndërsa në Fushë Arrëz diferenca ishte vetëm 66 vota. Kandidati i ASHE-së Gjonaj arriti të fitonte me 4122 vota (50.9 %), ndërsa kundërshtari i tij i djathtë Rrok Dodaj mori 3976 vota (49.1 %).

HAS - Kandidati i majtë për Bashkinë e Hasit fiton mandatin e dytë. Përfundoi në orën 06:00 të mëngjesit të sotëm procesi i numërimit në Bashkinë e Hasit.  Adem Lala i koalicionit të majtë arriti të fitojë me 4884 vota ose 52.98%, ndërsa kandidati i APPD, Elez Maçi arriti të merrte 4245 vota ose 46.05%. Në garë për këtë bashki ishte edhe kandidati i PSD-së, Gëzim Ukperaj, i cili mori vetëm 0.97% të votave.

KOLONJË – Përfundon numërimi edhe në Bashkinë e Kolonjës duke nxjerrë fitues kandidatin e ASHE-së, Arben Malo, me 4997 vota(53.45 %), kundrejt kandidatit të djathtë, Viktor Duro, që u votua nga 4076 qytetarë (44.69 %). Në garë për Bashkinë e Kolonjës ishte dhe kandidati i PSD-së, Paqësor Cane, i cili mori vetëm 154 vota (1.86 %).

PUSTEC – Gjithashtu edhe Bashkia e Pustecit u fitua nga kandidati i majtë Edmond Themelko me 2075 vota (80.96 %), ndaj kundërshtarit të tij Miallaq Apostollovski, i cili mori 488 vota (19.04 %).

MIRDITË – Në Bashkinë e Mirditës, Ndrec Dedaj, i ASHE-së ka fituar me 55.37% të votave, ndaj 44.63% të votave të Gjergj Prengës së APPD-së.

HIMARË - Bashkia e Himarës u fitua sërish nga kandidati i majtë, Jorgo Goro. Kandidati i ASHE-së Goro merr mandatin e dytë të tij në krye të Himarës me 4747 vota. Ai ka lënë pas konkurrentin e tij kandidatin e PBDNJ-së, Fredi Beleri, me një diferencë prej 2412 votash.  Beleri mori 2335 vota, ndërkohë që kandidatja demokrate Lefteri Prifti siguroi 596 vota dhe kandidati i pavarur Vladimir Kumi, 861 vota.

KONISPOL – Kandidati i majtë, Shuaip Beqiri, fiton zgjedhjet për Bashkinë e Konispolit me 2245 vota (43.93 %). Ndërkohë që rivali i tij i djathtë, Ismail Murtaj, mori 1831 vota (35.83 %).

/Shekulli Online/

Në 13 bashki fitojnë kandidatët e Aleancës për Shqipërinë Europiane, në 2 Aleanca për Punë dhe Dinjitet. Koalicioni për Zgjedhje të Lira e të Ndershme publikoi raportin e vëzhgimit.

Komisionerët në Shqipëri përfunduan numërimin e votave në 15 bashki. Fitojnë kandidatët e Aleancës për Shqipërinë Europiane në 13 prej tyre.

Bashkitë e Hasit, Pukës, Mirditës, Fushë-Arrëzit, Peqinit, Belshit, Skraparit, Delvinës, Himarës, Kolonjës, Libohovës, Konispolit dhe Pustecit do të kenë bashkiakë socialistë.

Fituesi i Skraparit Nesim Spahiu arriti rezultatin më të thellë me 84, 4 për qind të votave.

Po ashtu fituesi i bashkisë së Delvinës Rigels Balili mori gati 73 për qind të votave.

Himara rizgjodhi kryetarin aktual Jorgo Goro me 60 për qind. Fitoret e tjera janë me shifra më shumë se 50 për qind.

Aleanca për Punë dhe Dinjitet fitoi me kandidatët e saj në Përmet dhe Tropojë. Kandidati i APPD, Niko Shupuli, fitoi në Përmet me rreth 60 për qind të votave.

Në bashkitë e tjera më të mëdha procesi i numërimit të votave po ecën shumë ngadalë ose nuk ka nisur ende.

Në disa bashki rezultatet e pjesshme janë shumë të ngushta, ndërsa të tjera shifrat janë thelluar qysh në fillim.

Të dyja aleancat konkurruese kanë deklaruar interesimin dhe angazhimin e tyre të madh për të zbatuar ligjin me nxjerrjen e rezultateve, ndonëse po ato vetë po shkaktojnë zvarritje, duke ndërruar vazhdimisht komisionerët, numëruesit dhe zyrtarë të tjerë në zgjedhje.

Vëzhguesit vendas po nxjerrin raportet e tyre mbi mbarëvajtjen e procesit zgjedhor dje.

Koalicioni për Zgjedhje të Lira e të Ndershme e Demokraci të Qëndrueshme publikoi raportin paraprak të vëzhgimit mbi procesin e votimit në 21 qershor.

“Vëzhguesit e pavarur të Koalicionit nuk shënuan gabime të rëndësishme proceduriale as shkelje gjatë procesit zgjedhor” – pohoi Mirela Arqimandriti, drejtuese e Koalicionit për Zgjedhje të Lira.

Sipas raportit të Koaliconit, në 25 % të qendrave të votimit pati votues që nuk gjetën emrin në listë.

Në 57 % të qendrave të votimit votuesit me aftësi të kufizuar nuk mundën të hidhnin votën e tyre në mënyrë të fshehtë pasi këto qendra ishin të papërshtatura për ta.

Në 17 % të qendrave të votimit nuk u shpërnda kopja e procesverbalit për vulat e sigurisë te vëzhguesit e partive politike, ndërsa 10 % e qendrave të votimit nuk u hapën me numrin e duhur të komisionerëve.

Rreth 37 % e qendrave të votimit nuk kishte gra komisionere dhe vetëm në 15 % të qendrave të votimit gratë ishin kryetare në komisionet e qendrave së votimit.

Koalicioni për Zgjedhje të Lira e të Ndershme është një organizatë e pavarur, e përbërë nga 30 organizata dhe nga qindra vullnetarë në të gjithë vendin.

Në këto zgjedhje ata kishin 90 vëzhgues afatgjatë dhe mbi 1000 vëzhgues afatshkurtër.

Ndërsa në mesditë pritet edhe një konferencë e misionit të vëzhguesve ndërkombëtare të OSBE/ODIHR-it.

OSBE/ODIHR së bashku me një delegacion nga Këshilli I Europës, shpërndan në të gjithë vendin afro 200 vëzhguesë, ndërkohë që dhjetra diplomatë të ambasadave të huaja në Tiranë, patën në qendër të vëmendjes disa zona potencialisht të nxehta gjatë fushatës zgjedhore.

Deri në orët e para të mëngjesit procesi i numërimit kishte nisur vetëm në një numër të kufizuar bashkish në të gjithë vendin.

Procesi i dorëzimit të kutive dhe dokumentacionit nga qendrat e votimit tek ato të numërimit pranë 90 komisioneve zonale ka kërkuar gati më shumë se 5 orë, duke paralajmëruar një fazë që duket se do të zgjasë.

Partitë kryesore kanë bërë thirrje që faza e numërimit të zhvillohet në respekt të ligjit.

Deputetja Olta Xhacka duke folur në emër të kryetarit të Partisë Socialiste tha se i bënte “thirrje të gjithë komisionerëve të jenë në lartësinë e ambicies sonë për Shqipërinë Europiane. Çdo votë duhet të numërohet me besnikëri të plotë ndaj votuesve dhe asnjë kandidat e asnjë subjekt që gjendet në fletën e votimit, nuk duhet të penalizohet me asnjë votë nga procesi i numërimit. Dua të nënvizoj se në nuk do të tolerojmë asnjë shkelje të standardeve më të larta europiane ne numërimin e votave në të 61 bashkitë e reja të vendit tonë”, u shpreh deputetja Xhacka.

Edhe kryetari i opozitës Lulzim Basha në një deklaratë të shkurtër për gazetarët pranë selisë së Partisë Demokratike nënvizoi rëndësinë që ka procesi i numërimit: “I bëj thirrje numëruesve të PD të qëndrojnë në lartësinë e detyrës sipas ligjit. I kujtoj të gjithë numëruesit zbatimin me përpikmëri të ligjit për të përfunduar leximin me transparencë të verdiktit në kutitë e votimit”, u shpreh zoti Basha duke ju drejtuar qeverisë, që sic theksoi ai “të mos përsërisë dhunimet dhe parregullsitë e vërejtura gjatë ditës” së votimit.

Nga ana e tij më herët, kryeministri Edi Rama, përmes një postimi në Facebook i kishte cilësuar “zgjedhjet e sotme më të mirat, më të lirat e të ndershmet që kemi zhvilluar deri më tani”.

Ecuria e procesit të votimit duket se ka qenë përgjithësisht normale. Raste problematike ka patur, që nga ato teknike, te mosmarrëveshjet mes komisionerëve, ndërprerje të procesve në disa qendra votimi apo dhe përplasje e tensione në zona të vecanta. Komisioni Qendror i Zgjedhjeve është detyruar të marrë vendim për problemet e lidhura me fletët e votimit në Rroskovec ku në krah të emrit të kandidatit të djathtë ishte vënë emri i koalicionit të majtë, apo në Tepelenë ku emri i një kandidati të pavarur nuk figuronte në fletën e votimit. Në të dy rastet KQZ –ja ka vendosur që procesi të vijojë. Institucioni qendror i zgjedhjeve është vënë ndërkohë në akuzë për rastin e Kurbinit ku kandidati i së djathtës mbeti jashtë. Sipas përfaqësuesit demokrat, KQZ-ja ka zëvendësuar në shkelje të hapur me ligjin dhe komisionerët e saj në këtë zonë. Partia demokratike megjithatë ka denoncuar një sërë rastesh që sipas saj kanë cënuar procesin. Kryetari i grupit parlamentar të PD, Edi Paloka foli dje në mbrëmje për “kërcënime të votuesve nga zyrtarë të policisë apo funksionarë publikë, si dhe dhunë në disa dhjetëra raste”, apo dhe “njerëz që kanë votuar me karta identiteti false”. (voa)

Me një pjesëmarrje rreth 48 përqind, procesi i votimit në 61 bashkitë e vendit kaloi normalisht, pa incidente serioze, por për nxjerrjen e rezultateve zyrtare për drejtuesit fitues të pushtetit vendor duhet ende kohë.

Zgjedhjet vendore të 21 qershorit 2015 kanë nxjerrë në pah disa risi krahasuar me ato të mëparshmet. Gjatë gjithë ditës së dielë pranë qendrave të votimit dhe në vendqendrimet e komisioneve zonale në 12 qarqet e vendit nuk pati prezencë të liderëve politikë, deputetëve, apo funksionarëve të administratës, një nga fenomenet mbisuenduese në proceset e kaluara zgjedhore, që kanë gjeneruar situata të tensionuara dhe konfliktuale mes simpatizantëve, që jo pak herë kanë përfunduar dhe në akte ekstreme dhune, ku janë përdorur dhe armët e zjarrit.

Thirrje për votim

Të dielën në procesin e votimit forcat policore kanë realizuar shërbimet e tyre në distancë nga vendet ku ishin instaluar kutitë e votimit dhe ato janë thirrur vetëm në një rast nga një komision lokal zgjedhor për ndihmë jashtë qendrës së votimit. Një tjetër risi ishte dhe mosaktivizimi i selive të partive kryesore politike me deklarata dhe kundërdeklarata. Përkundrazi gjatë kohës kur votohej nga politikanët dhe zëdhënësit partiakë në daljet e tyre publike dhe mediatike pati vetëm apele për pjesëmarrje masive në votime nga ana qytetarëve, ku u përsërit slogani: “Nëse nuk voton mos u anko!”

Megjithatë gjatë procesit të votimit ka pasur dhe raportime për mangësi teknike, parregullsi a incidente, si përshembull, hapja me vonesë e qendrave të votimit, vonesa në pajisjen me bazën materiale, printimi me gabime i fletëve të votimit për këshillat bashkiake në tre raste, mosmarrëveshjet mes komisionerëve për procedurat etj. Me ndërhyrjen e Komsionit Qendror të Zgjedhjeve dhe vetë Komisioneve Zonale Zgjedhore shumë prej këtyre problemeve janë zgjidhur me mirëkuptim mes komisionerëve, apo me vendimarrje për vijimin e procesit.

Përfaqësuesi i Dhomës Zgjedhore, Afrim Krasniqi, tha për Deutsche Welle-n, se nga një sondazh që ishte bërë nga aktivistët e kësaj strukture të pavarur monitorimi, në tre zona, në Tiranë, Paskuqan dhe Kashar, kishte pasur pjesëmarrje të ulët të numrit të grave në votime.

“Gjithashtu personave me aftësi të kufizuar nuk u ishin krijuar kushtet e nevojshme të parashikuara në ligj për ushtrimin lirisht të së drejtës së votës. Vumë re që në disa raste se komisionet nuk kishin marrë masa për zbatimin e kërkesave dhe të ligjit, që në 150 metra distancë larg qendrave të votimit të mos ketë materiale propagandistike”.

Diplomatët përendimorë në terren

Një risi tjetër për zgjedhjet e së dielës ka qenë vëmendja e shtuar e përfaqësuesve të ambasadave perëndimore. Pas deklaratave të përsëritura gjatë fushatës elektorale të diplomatëve kryesorë për pjesmarrje masive në votime, për mosshitjen e votës, për mosvotimin e kandidatëve të inkriminuar etj., ata iu bashkuan ekipit të vëzhguesve të OSBE/ODIHR-it për monitorimin e votimeve të dielën. Shefja e delegacionit të BE-së, ambasadorët e Gjermanisë, SHBA-ve, Britanisë së Madhe, Italisë, Suedisë, Holandës etj., asistuan në qendra të ndryshme votimi në disa qarqe, duke përfshirë dhe në ato që konsideroheshin si zona të nxehta. Diplomatët kanë mbajtur shënim, duke lënë të nënkuptohet se do të jenë prezentë dhe në procesin e numërimit të votave deri në nxjerrjen e rezultateve për kryetarët e bashkive dhe këshillat e tyre bashkiake. Konstatimet e tyre ata do t’i propozojnë në ekipin afatshkurtër dhe afatmesëm të OSBE/ODIHR-it, për t’u përfshirë në raportin paraprak dhe përfundimtar të këtij isntitucioni.

Pritmëria për procesin e numërimit të votave

Votimet e ditës së dielë do të mbahen mend edhe sepse për herë të parë shtabet kryesore politike nuk shpallën fitoren pa filluar ende procesi i numërimit të votave nëpër kuti. Kjo përmbajtje ka qenë një zhvillim pozitiv për krijimin e një klime të qetë deri sa të numërohet dhe vota e fundit. Pas mbylljes së kutive të votimit kryeministri Edi Rama përmes një postimi në rrjetet sociale ka falenderuar qytetarët që morrën pjesë në zgjedhje, pavarësisht se për kë votuan ata. “Sot u votua reforma e madhe e riorganizimit administrativ të shtetit shqiptar që nga nesër do të jetë një shtet më modern”, shkruante mes të tjerave Rama.

Shefi i opozitës dhe kryetari i PD, Lulzim Basha, rreth katër orë pasi ishim mbyllur kutitë e votimit pasi ka kritikuar disa raste incidentesh që sipas tij, janë shkaktuar për faj të mazhorancës së majtë, ka përshkruar si mjaft të rëndësishëm fazën e numërimit të votave, ku i ka bërë thirrje numëruesve të opozitës që të qëndrojnë në lartësinë e kryerjes së detyrës. “Kujtoj numëruesit për rëndësinë e madhe që ka zbatimi i ligjit për të lexuar me transparence verdiktin e sovranit tashmë në kutitë e votimit.”

Rreth mesnatës në disa prej zonave zgjedhore në qarkun e Tiranës dhe në rrethe kanë nisur procesi i numërimit të votave. Sipas kodit elektoral, procesi i numërimit fillon vetëm atëherë kur merret në dorëzim e gjithë baza materiale nga ana e të gjithë anëtarëve të komisionit. Për disa nga bashkitë e vogla të vendit si në Pustec, Has apo Urën Vajgurore rezultati mund të shpallet gjatë ditës së hënë, kurse për njësitë e tjera administrative që kanë pasur dhe më shumë votues do të duhen më shumë ditë për shpalljen e rezultateve për fituesit si kryetarë bashkie, apo për anëtarët e këshillave bashkiake. (dw)

Rezultatet paraprake të “Exit Poll” të “IPR Marketing” dhe televizionit Ora News parashikojnë një fitore të koalicionit të majtë në Durrës dhe në Tiranë.

Në Tiranë, Erion Veliaj kryeson me  58% ndërsa Halim Kosova, sipas këtij projeksioni merr 38%. Ndërkohë Vangjush Dako po garon kundër kandidates demokrate Grida Duma, e cila në mbyllje të votimeve deklaroi se fitorja në Durrës është e Partisë Demokratike.

Sipas këtyre rezultateve, në Shkodër kryeson koalicioni i djathtë, me kandidaten demokrate Voltana Ademi, e cila garon përballë kandidates se koalicionit të majtë, Keti Bazhdari. (Eva Hoxha)