Një koncern ndahet nga disa degë të dhe krijon firma-bijë – duke i bashkuar të gjithë nën një emër të ri – një procedurë normale. Por kur ndryshimet i bën Google-i – bota mban vesh.

“Google nuk është një firmë konvencionale. Dhe nuk duam të bëhemi të tillë.” Me këtë fjali themeluesi i firmës, Larry Page kumton reformën radikale në koncernin e njohur. Tregtia në “web” dhe reklama online duhet të ndahen nga degët e reja të firmave që prodhojnë automjetet automatikë apo dronet. Google do të vazhdojë të mbajë këtë emër, por do të transferohet nën një “çati” me koncernin e ri holding që do të mbajë emrin “Alphabet”. Holding është një firmë që nuk prodhon, por merr pjesë në aksione financiare. Këtu do të kategorizohen për shembull degët e specializuara për lidhjen e ambienteve shtëpiake me rrjetin “Nest”, apo laboratori inovativ “Google X” apo firma start-up “Ventures” do të ekzistojnë si firma të pavarura.

“Koncerni ynë është në gjendje të mirë, por ne besojmë se mund ta bëjmë më transparent dhe më të verifikueshëm”, shkruan Page. Google ka kohë që nuk është më thjesht një makineri kërkimi në internet, ashtu si filloi. Emri Google që simbolizon kërkimin në internet do të jetë vetëm si degë bijë e internetit nën firmën e re “Alphabet”. Google do t’i mbetet në thelb tregtia me kërkimin në internet, videoplatforma YouTube si edhe sistemi mobil Android.

Themeluesi i Google Larry Page tani mund të ketë më shumë kohë për t’iu kushtuar ideve të reja

Më shumë transparencë?

Struktura e re do të krijojë më shumë transparencë, që duket se ka humbur në valën e ideve të reja tek Google. Koncerni zhvillon automjete automatikë, termostate të lidhura në rrjet, eksperimenton me drone dhe balona që krijojnë akces në internet – pra koncerni është i shpërndarë në shumë fusha, e nuk dihet ende se kur do të startojnë ato si duhet, dhe kur do të kthehen në minierën e re të arit për koncernin.

Dihet që Google i financon degët eksperimentuese me reklamën në internet. Por nuk dihet se sa para fitojnë degët e veçanta – kjo i zemëron investitorët. Nëse në të ardhmen do të ndahen shifrat e fitimit të tregtisë bazë të Google-it nga fitimet e degëve eksperimentuese si Nest apo Google X kjo do të kontribuojë për më shumë transparencë. Investitorët e vlerësuan këtë hap duke i rritur me gjashtë pikë vlerat e bursës së Google.

Ajo që bie në sy është se YouTube me më shumë se 1 miliardë përdorues nuk do të dalë si pjesë më vete e koncernit Alphabet, por do të mbesë brenda firmës së re bijë, Google. Analistët besojnë se YouTube në këtë rast nuk duhet të bëjë publike shifrat e fitimit, që mendohet se janë shumë më të ulta se pritshmëritë.

Karriere e shkëlqyer: Sundar Pichai drejton firmën-bijë Google brenda Alphabet

Një ekspert nga India bën karrierë 

Ajo që nuk ndryshon është se kush do të jetë bosi që ka fjalën e fundit. Kreu i koncernit, Larry Page do të jetë tani në krye të Alphabet, dhe do të mbetet bosi i koncernit. Page shkroi se bashkëthemeluesi Sergey Brin do të qëndrojë krah tij si president… Por struktura e re sjell me vete ngjitjen spektakolare në karrierë për Sundar Pinchai, topmenaxher bei Google. Specialisti nga India erdhi në vitin 1993 me një bursë për universitetin e Stanfordit. Para dhjetë vitesh Pinchar erdhi tek Google. Propozimi i tij Google duhet të krijojë “browser”-in e tij i bindi themeluesit e firmës- kështu suksesi i “Chrome” i hapi menaxherit rrugën e karrierës. Tani Pichai do të jetë kreu i firmës bijë Google, dhe do të ketë përgjegjësinë që koncernit të mos i mbarojnë fondet për projekte të reja.

Emri i ri “Alphabet” është një sfidë për konvencionet. Me këtë emër nuk duan të krijojmë një markë të re, shkruan Page, firmat e Alphabetit do të duhet ta kenë lirinë dhe pavarësinë për t’u zhvilluar si marka më vetë. “Dhe mos kini frikë: Edhe ne duhet të mësohemi me emrin e ri.” (dw)

Në Turqi, një seri sulmesh që ndodhën sot kishin në shënjestër policët dhe ushtarët, duke lënë disa të vdekur. Një tjetër incident kishte si objektiv konsullatën amerikane në Stamboll. Konsullata u qëllua me armë nga dy gra, të cilat arritën të ikin nga vendi i ngjarjes pasi policia u kundërpërgjigj, por më vonë njëra prej tyre u arrestua.

Sulmi ndaj konsullatës amerikane në Stamboll u krye nga dy gra, njëra prej të cilave u kap e plagosur, tha sot zyra e guvernatorit të Stambollit.

Policë të armatosur rrethuan zonën pranë konsullatës amerikane në lagjen Sarıyer në pjesën evropiane të Stambollit pas sulmit me armë që ndodhi atje.

Sipas banorit Ahmet Akcay, policët u vunë në ndjekje të personave të dyshuar.

“Dy gra me çanta ishin duke ecur në lagje. Ne dëgjuam të shtëna dhe dolëm në dritare. Pamë një grua me armë, por ajo nuk po shtinte. Gruaja tjetër qëlloi katër ose pesë herë në drejtim të rojeve të sigurisë dhe zyrtarëve të konsullatës,” tha dëshmitari.

Agjencia e lajmeve Dogan tha se gruaja e arrestuar ishte e moshës 51 vjeç dhe kishte bërë burg si anëtare e dyshuar e organizatës së ekstremit të majtë Fronti i Ushtrisë Revolucionare Çlirimtare Popullore.

Kjo është një organizatë anti-amerikane dhe klasifikohet si grup terrorist nga Shtetet e Bashkuara dhe Turqia.

Turqia vazhdon të jetë në gjendje gatishmërie të lartë që nga fillimi i luftës së saj “të sinkronizuar kundër terrorit” muajin e kaluar, e cila përfshin sulme ajrore kundër luftëtarëve të Shtetit Islamik në Siri dhe militantëve të Partisë së Punëtorëve të Kurdistanit në Irakun verior.

Qindra persona të dyshuar si militantë në Turqi janë arrestuar.

Sulmi në konsullatën amerikane erdhi në të njëjtën kohë që, sipas autoriteteve, një automjet i ngarkuar me lëndë shpërthyese në anën tjetër të Stambollit u përdor për një sulm kundër një stacioni policor, duke plagosur tre policë dhe shtatë civilë.

Në të njëjtin vend, policia u përfshi më vonë në një shkëmbim zjarri me dy sulmues duke i vrarë të dy.

Ndërkohë, në provincën Sirnak të Turqisë jugore po sot shpërtheu një bombë në anë të rrugës, duke lënë katër policë të vrarë.

Deri tani askush nuk e ka marrë përgjegjësinë për asnjërin prej sulmeve, por në të kaluarën misionet diplomatike amerikane dhe stacionet e policisë kanë qenë në shënjestër të grupeve të ekstremit të majtë në Turqi. (voa)

Nisur prej valës së madhe të refugjatëve në Gjermani ndaj politikës po rritet presioni për të vepruar. Prandaj samiti i planifikuar për azilin do të zhvillohet përpara parashikimeve, pra më 9 shtator.

Gazeta “Frankfurter Allgemeine Sonntagszeitung” (FAS), e cila i referohet për këtë njoftim zyrës së Kancelares, njofton se fillimisht ky samit mes qeverisë federale dhe atyre të landeve qe planifikuar të zhvillohej në tetor apo nëntor, por shkak të gjendjes së tensionuar në kampet e refugjatëve, përfaqësues të disa landeve federale kishin kërkuar me forcë që takimi të mbahet më herët.

Sidomos kryeministri bavarez Horst Seehofer (CSU) kishte ngulur këmbë për këtë takim duke thënë se takimi i kryeministrave të landeve me Kancelaren gjermane Angela Merkel nuk mund të shtyhet deri në vjeshtë. Sipas tij në rast se nis stina e ftohtë është tepër vonë, “sepse në dimër nuk mund të strehohen njerëzit në çadra,” tha Seehofer, dhe “ne duhet t’i shpërndajmë refugjatët detyrimisht në objekte publike, dhe kjo nuk është më e rehatshme dhe duhet shmangur.”

Zgjerimi i listës së vendeve të sigurta

Në takimin e ri të nivelit të lartë pritet të diskutohet ndër të tjera edhe për një zgjerimin e rrethit të vendeve të sigurta të origjinës dhe përfshirjen në të të Kosovës, të Shqipërisë dhe të Malit të Zi. Vitin e kaluar si vende të sigurta qenë shpallur Serbia, Bosnja-Hercegovina dhe Maqedonia. Ky klasifikim mundëson një procedurë të shkurtuar të azilit dhe një dëbim më të shpejtë në vendet e origjinës.

Sipas të dhënave të Entit Federal për Migracionin dhe Refugjatët (BAMF) përfshirja e Serbisë, Bosnje-Hercegovinës dhe Maqedonisë në listën e vendeve të sigurta të origjinës ka ndikuar në rënien e nivelit të azilkërkuesve nga këto vende.

Kështu në gjysmën e parë të vitit 2015 nga Serbia, Bosnja dhe Maqedonia ka pasur vetëm një rritje prej 23 për qind të numrit të azilkërkuesve në Gjermani në krahasim me muajt e mëparshëm. Kursi numri i kërkesave për azil nga vendet e tjera të Ballkanit që nuk konsiderohen ende si të sigurta u rrit me 515 për qind.

Gjermania – ëndërr për refugjatët nga Ballkani

Këtë vit kanë erdhur në Gjermani 200.000 azilkërkues. 97,000 e tyre janë refugjatë nga Ballkani dhe nga këta 78.000 nga Kosova, Shqipëria dhe Mali i Zi. Kërkesat e tyre kanë pak shanse për t’u pranuar në Gjermani. Niveli i refuzimit të kërkesave të refugjatëve nga Ballkani është sipas Entit Federal për Migracionin dhe Refugjatët (BAMF) 99 për qind. Sipas BAMF-it 85 për qind e të gjithë azilkërkuesve që vijnë nga Ballkani në Evropën Perëndimore bëjnë kërkesë për azil në Gjermani. Rreth 44.000 kërkesa për azil u takojnë refugjatëve nga Siria, të cilëve në 85 për qind të rasteve u ofrohet mbrojtje në Gjermani, njofton BAMF-i. (dw)