Do të rrezikojnë të nxirren jashtë nga Kuvendi i Kosovës edhe me Polici, nëse një gjë të tillë e kërkon kryetari i Kuvendit të Kosovës Kadri Veseli, por, “Zajednicën” do ta kundërshtojnë me të gjitha forcat.

Do të mbajnë aktivitete të tilla si ajo e hedhjes me vezë në seancën e 22 shtatorit, do të protestojnë e demonstrojnë, e çka tjetër nuk do të bëjnë deputetët e Lëvizjes Vetëvendosje bashkë me ata të AAK-së dhe Nismës, vetëm për ta kundërshtuar “Zajednicën” dhe Demarkacionin me Malin e Zi.

Gatishmërinë e VV-së dhe dy partive tjera opozitare AAK-së dhe Nismës po e tregon ish – lideri i Lëvizjes Vetëvendosje, deputeti Albin Kurti.

Në një intervistë për Agjencinë e Lajmeve KosovaPress, politikani që deri tani nuk i shmanget idesë që në Kosovë nuk ka institucione që mund të thirren si të tilla dhe se Republikën e Kosovës më shumë vazhdojnë ta karakterizojnë mungesat sesa pranitë e aspekteve pozitive e progresive, rastet e fundit po e shtyjnë që të kundërshtojnë edhe më fuqishëm tërheqjen e nënshkrimit nga marrëveshjet e Brukselit.

Mosfunksionimin e institucioneve Kurti e mbështet edhe tek raporti i “Transparency International” që sipas tij nxjerr Kosovën si shtet gjysmë autoritar. Ndërsa me kapjen që i është bërë shtetit nga dyshja Mustafa-Thaçi dhe mos transparencës nga këta të dy, po e shtyjnë Kurtin bashkë me kolegët e tij që të marrin veprime si ato të 22 shtatorit në seancën e Kuvendit.

Një mos transparencë e tillë nga Mustafa është vetëm trashëgimi e paraardhësit të tij Hashim Thaçit, i cili sipas Kurtit ia dorëzoi stafetën Mustafës për t’i bërë punët në shpejtësi. Të shpejtuar po e quan edhe nënshkrimin e fundit për krijimin e “Zajednicës”.

Kjo nguti e Mustafës, sipas Kurtit, e la Kosovën edhe pa formimin e Forcave të Armatosura të Kosovës.

Në anën tjetër thotë se Kosovës nuk i duhen Forcat e Armatosura të Kosovës, kur veç se është nënshkruar marrëveshja për krijimin e “Zajednicës”.

Qeveria e Kosovës para disa ditësh ka thënë se shumë shpejt do ta dërgojë në Kuvend edhe ligjin për Forcat e Armatosura të Kosovës, në kohën kur Kurti dhe bashkëpartiakët e tij po synojnë ta bllokojnë funksionimin e Kuvendit.

Edhe pse këtë ligj Vetëvendosja e ka pritur që moti, në ditët e ardhshme nuk do ta ketë parasysh një gjë të tillë.

Kurti, thotë për KosovaPress, se janë të vendosur që ta bllokojnë Kuvendin pa marrë parasysh se aty do të mund të vijë ligji për krijimin e FAK-ut.

Ai nuk tregon për formën e veprimeve të ardhshme që do të ndërmarrë bashkë me kolegët e tij të opozitës për ta bllokuar Kuvendin. Megjithatë, tregon se është i vendosur për bllokim edhe nëse kryetari i Kuvendit do t’i përdorë kompetencat e tij.

Kryetari mund të kërkojë edhe ndërhyrjen e zyrtarëve policorë.

Albin Kurti me këtë rast ka një porosi për kryetarin e Kuvendit të Kosovës, Kadri Veselin.

“Le ta bëjë ai një gjë të tillë dhe do t’i sheh edhe veprimet tona”, thotë Kurti për KosovaPress.

Kurti me grupin opozitar kanë nisur nënshkrimin e një peticioni për këtë punë. Atë e kanë nënshkruar më shumë se 100 mijë qytetarë. Dyshimet bien se sa do të jenë të gatshëm që një numër i tillë t’iu bashkohet opozitës edhe në veprimet e tyre të ardhshme.

Protestat dhe demonstratat janë forma tjetër pos peticionit që do të përdor opozita. Për ta, sipas Kurtit, është e rëndësishme që të përdorin gjithçka legjitime vetëm që të ndalin “Zajednicën”.

“Zajednica” është kuptimi i fusnotës thotë tutje Kurti, ‘ ajo fjollë e borës që u krijua nga Edita Tahiri tashmë është bërë dordolec’.

Pos anulimit të “Zajednicës”, për Kurtin dhe VV-në nuk janë të rëndësishme as rezultatet zgjedhore.

Madje, siç thotë ai, Kosova do të duket edhe më e dinjitetshme para syve të Bashkimit Evropian. /KosovaPress/

Insistimi i opozitës që kryeministri Isa Mustafa të tërheqë nënshkrimet nga marrëveshja me Serbinë për Asociacionin e Komunave me Shumicë Serbe dhe marrëveshja me Malin e Zi për demarkacionin e kufirit si kusht për zhbllokimin e punës së Kuvendit, e ka vënë Kosovën në një krizë serioze, thonë analistët politik.

Sipas tyre, nëse pushteti lëshon pe ndaj këtyre kërkesave, atëherë do të krijohej edhe një precedent për të ardhmen.

Analisti nga Instituti Demokratik i Kosovës, Albert Krasniqi, në një prononcim për Radion Evropa e Lirë ka përmendur disa mundësi ligjore që parashihen për zhbllokimin e punës së Kuvendit.

Një prej mundësive, parashihet me anë të rregullores së punës së Kuvendit, sipas të cilës, kryetari i Kuvendit duhet të përkujdeset për zbatimin e saj.

Kurse masë tjetër është ajo e ndërhyrjes së presidentes.

“Në rast të parregullsive serioze, është kryetari i Kuvendit ai që është përgjegjës për mbarëvajtjen e punimeve dhe rregullin e seancës, duke kërkuar ndërhyrjen e policisë së Kuvendit për ta zhbllokuar punën në mënyrë që seanca të vazhdoj normalisht punimet. Si masë e dytë është ajo e ndërhyrjes së presidentes, e cila ka obligim të garantoj funksionimin kushtetues të institucioneve”, ka thënë Krasniqi.

Tek ndërhyrja e presidentes si një mundësi për zhbllokim të Kuvendit, Albert Krasniqi nuk beson se mund të realizohet.

Nëse do të ketë nevojë për ndërhyrje politike, atëherë këtë mund do të mund ta bënte vetëm bashkësia ndërkombëtare, thotë ai.

Ndërkaq, njëri nga gazetaret që ka përcjellë për një kohë të gjatë punimet e Kuvendit të Kosovës, tani kryeredaktor në Tribuna Channel, Agron Halitajthotë se në sistemet parlamentare, opozita mund ta bllokoj punën e Kuvendit vetëm në rastet kur koalicioni qeverisës e humb fuqinë numerike në organin përfaqësues.

Por, në Kuvendin e Kosovës, vijon Halitaj, pozita nuk e ka humbur shumicën, përderisa opozita është dukshëm më e vogël.

Në këto rrethana, më së shumti do të sfidohet kreu i Kuvendit, ka thënë Halitaj, pasi ai është i obliguar të kujdeset për rend e rregull në mbledhje.

“Kryetari Kadri Veseli i ka vetëm dy zgjidhje dhe cilëndo ta zgjedh nuk është e favorshme, nëse i kërkon sigurimit që t’i largojë deputetët nga foltorja atëherë gjasat për të shpërthyer tensionet si brenda ashtu edhe jashtë Kuvendit janë më së evidente. Por, nëse vendos ta respektoj vullnetin e opozitës, atëherë do ta bllokoj Qeverinë në përmbushjen e obligimeve si ndaj qytetarëve ashtu edhe në raport me ndërkombëtarët”, ka thënë Halitaj për Radion Evropa e Lirë.

Edhe Halitaj nuk pret që presidentja të arrijë të vendos dialogun ndërmjet pozitës dhe opozitës për të garantuar funksionimin e institucioneve siç parashihet edhe me Kushtetutën e Kosovës.

Një rol të tillë të ndërmjetësimi politik, ai më shumë e sheh tek faktori ndërkombëtar.

“Zgjidhja nuk besoj se mund të jetë në zyrën e Presidentes, por në zyrat e përfaqësive diplomatike. Ata tashmë kanë dasmuar se mund t’i thyejnë blloqet, pavarësisht kauzave që mund të kenë”, ka deklaruar Halitaj.

Në anën tjetër, Albert Krasniqi thotë se ka edhe një mundësi tjetër në bazë të cilës, qeveria do të mund ta ri-legjitimonte fuqinë e vet duke kërkuar mocion të votëbesimit në Kuvend.

“Një mocion i votëbesimit do të shërbente si një konfirmim për qeverinë nëse e ka mbështetjen e Kuvendit për këto marrëveshje. Mirëpo në krejt këto rrethana që janë krijuar dhe nëse asnjë prej këtyre masave nuk prodhon efekt, atëherë edhe zgjedhjet e parakohshme nuk janë opsion që duhet përjashtuar”, ka theksuar Krasniqi.

Mes opsionit të rritjes së tensioneve dhe zgjedhjeve, analistët thonë se mund të përdoret edhe shembulli i Greqisë ku kryeministri grek ishte detyruar të qoj vendin në zgjedhje duke dhënë dorëheqje pas marrëveshjes me Bashkimin Evropian.

Megjithatë, tërhiqet vërejtja se as zgjedhjet nuk do të mund të ishin garantuese të zhbllokimit të institucioneve, nëse edhe pas tyre pozita dhe opozita do të mbeteshin njësoj siç janë tani. (rel)

Kryetarja e Komunës së Gjakovës, Mimoza Kusari-Lila, në një intervistë për Radion Evropa e Lirë tha se është e bindur që vetëm puna e saj si kryetare i ka penguar dikujt ose ka qenë shkak të iniciojë planet për ekzekutimin e saj.

Radio Evropa e Lirë: Zonja Kusari-Lila, për rreth dy muaj keni mbrojtje të afërt nga Policia Speciale e Kosovës. Pse?

Mimoza Kusari-Lila: Mbrojtja e afërt është përcaktuar për sigurinë time nga drejtoria e Policisë së Kosovës për arsye të kërcënimit, që është vlerësuar që ka ardhur si rrjedhojë e një informacioni që Policia e Shqipërisë ia ka përcjellë Policisë së Kosovës për urdhër ose për porosi të vrasjes së kryetares së Komunës së Gjakovës, gjegjësisht të ekzekutimit.

Informacionet kanë qenë shqetësuese, natyrisht për policinë dhe janë marrë masat e duhura. Kjo çështje është e hapur, ka më shumë se dy muaj. Do të thotë, që nga fundi i korrikut të këtij viti kur ka ardhur informacioni, por nuk kam ndonjë informatë lidhur me procesin e hetimeve.

Ajo çka dihet është se personat që kanë angazhuar persona nga Republika e Shqipërisë, në fakt ndërmjetësit, janë nga Komuna e Gjakovës. Ngjarja apo biseda për porosinë, vrasjen ose ekzekutimin ka ndodhur në Gjakovë, përderisa nuk dihet se kush janë ata ideatorë të këtij akti tepër të rëndë dhe të pakuptimtë në këtë situatë të cilën gjendemi ne ose shteti, ose edhe vetë rrjedhoja e ngjarjeve të cilat lidhin udhëheqësinë komunale të Gjakovës.

Radio Evropa e Lirë: A keni ndonjë informacion se ku ka arritur ky proces? Çfarë janë duke bërë autoritetet e rendit, Prokuroria Speciale e Kosovës që ka marrë përsipër këtë rast?

Mimoza Kusari-Lila: Nuk kam informata. Unë kam pasur seancën dëgjimore me prokurorin special në muajin gusht. Prej asaj kohe nuk kam pasur asnjë informacion tjetër shtesë. Më kanë kërkuar të dhëna, informacione, natyrisht përshkrimin e rastit, dyshimet e mia dhe të tjera. Por që nga ai moment nuk kam pasur as kontakt më prokurorin special apo me hetues për diçka të re në raport më rastin.

Radio Evropa e Lirë: Sipas jush, a është heshtur ky rast?

Mimoza Kusari-Lila: Unë shpresoj të mos jetë heshtur, sepse po e vërejmë tani nga opinioni publik reagimin e përgjithshëm mbi shëmtinë e këtij rasti. Gjegjësisht, mbi atë se sa e ulët dhe e rëndë është vetëm të mendohet, se jo më të planifikohet një vepër e tillë. Por që besoj sinqerisht që edhe hetuesia, dhe Prokuroria Speciale, do t’i japin fund hetimit, natyrisht me rezultate konkrete.

Konsideroj se ky është një aksion [hetime] që duhet të përfshihen të dy shtetet, gjegjësisht Republika e Shqipërisë dhe Republika e Kosovës. Pasi kemi të bëjmë me iniciatorë nga Kosova dhe ekzekutues nga Shqipëria. Besoj se në të dy vendet duhet të ekzistojnë pistat e hetimeve dhe të izolimit të autorëve.

Radio Evropa e Lirë: Zonja Kusari-Lila, thuhet se ju i njihni ndërmjetësuesit që kanë porositur personat nga Shqipëria për ekzekutimin tuaj fizik. A e dini se kush janë ata? A i keni takuar ndonjëherë? A bëhet fjalë për ndonjë konflikt?

Mimoza Kusari-Lila: Unë jam afërsisht e informuar mbi personalitetin e ndërmjetësuesve apo ndërmjetësve, por që asnjë lidhje ose informatë tjetër nuk kam ose nuk mund ta mendoj për këtë rast. Do të thotë, asnjë formë e veprimtarisë time, përveç punës që ushtroj si kryetare e komunës; nuk besoj që mund të ketë shkas tjetër.

Do të thotë, unë jam thellësisht e bindur që vetëm puna ime si kryetare i ka penguar dikujt ose ka qenë shkaku i kujtdo që i ka shkuar ndërmend, si autor ose ideator i këtij rasti, të iniciojë një akt të tillë. Por, në asnjë formë tjetër nuk kam paraparë rrugë të tjera që hetimet mund të çojnë ose do të mund të çonin në pozita tjera të mia.

Kjo me të vërtetë është shqetësuese për shumë arsye. Arsyeja e parë është që të gjinden forma, të paguhen vrasës për të vrarë të vetmen kryetare femër në Kosovë. Së dyti, që dikush mendon që me eliminim fizik mund të arrijë qëllimet e veta, çfarëdo qofshin ato. Dhe së treti, ku në asnjë formë personale nuk kam targetuar ndonjë rast, përveç në aspektin parimor.

Do të thotë në Kosovë, sot, 16 vjet pas luftës, ende dikush mendon që për parime dhe për ushtrim të mirëfilltë të detyrës, mund ta sanksionojë me vdekje një udhëheqës të zgjedhur nga populli.

Radio Evropa e Lirë: Pra, mendoni që kjo ka të bëjë me politikën?

Mimoza Kusari – Lila: S’e kisha thënë domosdoshmërisht. Tash, mbetet fjala e fundit të jepet nga hetuesia dhe prokuroria. Unë mendoj që ka të bëjë me pozitën të cilën unë e ushtroj.

Radio Evropa e Lirë: Thuhet gjithashtu se këta persona, që ju thoni se janë të paguar, kanë hyrë në Kosovë disa herë dhe nuk janë identifikuar në kalimet kufitare. Ju dini diçka për këtë?

Mimoza Kusari – Lila: Unë mund të flas vetëm nga ajo se çfarë kam pasur me bisedat me prokurorin special dhe me hetuesit. Është e vërtetë që hyrje-daljet në Kosovë nga Republika e Shqipërisë mund të bëhen edhe pa u evidentuar. Komuna e Gjakovës në vete ka një kufi prej 54 kilometrash me Republikën e Shqipërisë, çfarë ka bërë që këta njerëz, gjegjësisht personat në fjalë, mund të hyjnë ose edhe kanë hyrë pa u evidentuar nga policia.

Ka ardhur në vëmendjen time që njëri nga dy të porositurit ka qenë në Gjakovë edhe pas denoncimit të rastit, gjegjësisht edhe pas zbulimit të rastit është kthyer prapë dhe është vërejtur në qytet, por nuk ka qenë i evidentuar në policinë kufitare.

Do të thotë kjo është një prej informatave shqetësuese, natyrisht për secilin individ, jeta e të cilit mund të kërcënohet. Por besoj që një mobilizim edhe njëherë, i të dy organeve të drejtësisë, të Republikës së Shqipërisë dhe Kosovës, mund ta sjellë në përfundim këtë rast jo të lehtë për mua personalisht, por natyrisht edhe për të gjithë qytetarët e Komunës së Gjakovës dhe të Republikës së Kosovës.

Radio Evropa e Lirë: A e keni mbrojtjen e afërt ende?

Mimoza Kusari – Lila: Jo. Ka dy ditë që nuk e kam mbrojtjen e afërt. Kam kërkuar vetë. Arsyeja ka qenë që filloi të duket absurde që unë të endem me mbrojtjen e afërt përderisa ka pasur mundësi për t’u mbyllur rasti. Me iniciativën time dhe me vlerësimin e policisë që rreziku nuk është në shkallën çfarë është vlerësuar në fillim, unë kam nënshkruar që nuk ka nevojë të më përcjellë policia në mbrojtje të afërt. (rel)

Borxhi publik i Kosovës gjatë pjesës së parë të këtij viti ka shënuar rritje prej 17.1 për qind.

Sipas të dhënave të Bankës Qendrore të Republikës se Kosovës (BQK), borxhi ka arritur në 649.1 milionë euro nga 554.5 milionë euro sa ishte në tremujorin e dytë të vitit 2014.

Shprehur në përqindje, borxhi ka arritur 11.2 për qind të Bruto Produktit Vendor nga 10.3 për qind sa ishte në vitin paraprak.

Niveli aktual i borxhit, Kosovën e bënë vendin me shkallën më të ulët të borxhit publik krahasuar me vendet e rajonit.

Sipas BQK-së, në vitin 2014, mesatarja e borxhit publik në vendet e Evropës Juglindore ishte rreth 57.3 për qind e Produktit të Brendshëm Bruto, përderisa Kosova kishte nivelin prej 10.6 për qind.

Edhe në raportin e fundit të publikuar nga Banka Botërore, thuhet se borxhi publik ende mbetet i vogël, por më rritje të shpejtë.

Lidhur më këtë, ekspertë për çështje ekonomike theksojnë se niveli i borxhit nuk është i lartë, por që autoritetet kompetente duhet të jenë të kujdesshëm në marrjen e borxheve.

Eksperti i ekonomisë, Ismail Kastrati, duke folur për Radion Evropa e Lirë ka thënë se niveli i borxhit nuk është i lartë, por kjo sipas tij, ka ndodhur për shkak të pamundësisë së Kosovës për të huazuar mjete në institucionet financiare ndërkombëtare.

“Ne aktualisht jemi shumë ulët më borxhin publik. Jo pse Qeveria e Kosovës nuk ka dashur të hyjë në borxhe, por ka pasur shumë vështirësi për huazime nga institucionet ndërkombëtare. Prandaj është mirë që borxhi të jetë i logjikshëm, gradual dhe jo për një herë të jetë borxh i madh”, thotë Kastrati

Ndryshe, sipas Ligjit për Borxhet Publike, në asnjë rast shuma e papaguar e borxhit të përgjithshëm nuk duhet të tejkalojë dyzet për qind të Bruto Produktit Vendor (BPV).

Në rast se borxhi i përgjithshëm e tejkalon këtë përqindje të Bruto Produktit Vendor, atëherë Qeveria duhet t’i paraqesë Kuvendit strategjinë për të kthyer Borxhin e Përgjithshëm nën pragun dyzet për qind.

Edhe eksperti tjetër për çështje ekonomike, Naim Gashi, vlerëson se niveli i borxhit është i ulët, por megjithatë sipas tij, duhet të planifikohet mirë marrja e borxhit, sepse jo në të gjitha rastet marrja e borxheve rezulton më sukses.

“Ne duhet të masim kapacitetet tona aktuale për gjenerimin e vendeve të reja të punës dhe zhvillimin ekonomik dhe në bazë të atyre kapaciteteve duhet t’i bëjmë edhe planifikimet buxhetore dhe jo të futemi në borxhe të pakontrolluara në të cilat do t’i paguanin gjeneratat në vijim”, tha Gashi .

Për t’i ikur rrezikut të mundshëm sa i përket rritjes se nivelit të borxhit publik, Gashi thekson se Kosova duhet të krijojë një strategji nacionale.

“Strategjia nacionale duhet të përkojë më kapacitetet tona zhvillimore që i kemi dhe kryesisht borxhi publik do të duhej të ishte për ndërtimin e kapaciteteve të reja energjetike”.

“Ndërsa sa i përket borxheve tjera publike për mbulimin e deficiteve buxhetore nacionale, këto janë jashtëzakonisht të dëmshme dhe Kosova nuk duhet të lëshohet në një pozicion të tillë” tha Gashi

Ndryshe, borxhi i jashtëm i Kosovës, i cili përfshinë borxhin e jashtëm privat dhe borxhin e jashtëm publik, në fund të vitit 2014 arriti në 1.7 miliardë euro që është për 8 përqind më i lartë se sa në fund të vitit 2013. (rel)

Serbia dhe Rusia protestuan ndaj pranisë së Kosovës në takimin e lartë kundër ekstremizmit të dhunshëm, që u mbajt nw New York. Prishtina e cilëson pjesëmarrjen si dëshmi të faktorizimit të Kosovës

Misioni i Serbisë në Kombet e Bashkuara, në këshillim me ministrin e Jashtëm serb, Ivica Daçiç, i ka drejtuar një notë proteste OKB-së për shkak të pranisë së përfaqësuesve të Kosovës në takimin e lartë kundër ekstremizmit të dhunshëm që u mbajt të martën në New York me ftesë të presidentit amerikan Barack Obama.

Nota e protestës pasoi reagimin e të dërguarit të Rusisë në Kombet e Bashkuara, Vitaly Churkin, ndaj pjesëmarrjes së Kosovës në takim.

Rusia, një aleat i Serbisë, mbështetë qëndrimin e Beogradit kundër pavarësisë së Kosovës që u shpall në shkurt të vitit 2008.

Ambasadori rus, tha se pjesëmarrja e Kosovës që nuk është anëtare e Kombeve të Bashkuara, dëshmon se “në këtë ndërtesë, gjithçka është nën komandën e Obamas”.

Përfaqësuesit e Kosovës, thanë se pjesëmarrja e tyre dhe trajtimi i barabartë sikundër të gjitha shtetet tjera është një dëshmi e “faktorizimit të Kosovës”.

Në takimin e lartë që u mbajt në margjinat e Asamblesë së Përgjithshme të Kombeve të Bashkuara, morën pjesë përfaqësues të mbi 100 vendeve. Presidenti Obama tha se fitorja ndaj grupit ISIS nuk mund të jetë vetëm ushtarake, por përpjekjet e tilla duhet të shoqërohen me përparim ekonomik dhe politik, për të eliminuar radikalizmin dhe ekstremizmin. Kjo, theksoi presidenti Obama, nënkupton të fitohet ndaj ideologjisë së grupit Shtetit Islamik, i cili po shfrytëzon kaosin dhe boshllëqet e krijuara në vende me qeveri të dështuara ose ato të përfshira në konflikte.

Në takim foli edhe kryeministri i Shqipërisë, Edi Rama, i cili theksoi se Shqipëria ka qenë dhe do të jetë gjithmonë përkrah Shteteve të Bashkuara në çdo betejë luftarake kundër ekstremizmit të dhunshëm. Por zoti Rama tha se kjo betejë kërkon më tepër se thjesht luftë me armë.

Kosova është përballur me sfidën e përfshirjes së qytetarëve të saj në luftërat në Lindjen e Mesme. Qytetarët e parë të Kosovës që u janë bashkuar konflikteve në Siri dhe Irak janë regjistruar nga mesi i vitit 2012. Fillimisht ata u ishin bashkuar forcave opozitare në Siri që luftonin për rrëzimin e regjimit të presidentit sirian, Bashar Al Asaad. Por, më vonë, shumica e tyre u bashkuan me organizatat si Al Nusra apo edhe grupi i quajtur Shteti Islamik i Irakut dhe Sirisë. Që atëherë rreth 300 qytetarë të Kosovës i janë bashkuar konfliktit atje ndërsa aktualisht sipas vlerësimeve të organeve të sigurisë numri sillet nga 60 deri në 100 veta. Mbi 40 prej tyre janë të deklaruar të vdekur.

Që nga viti 2013, autoritetet kanë hetuar mbi 180 persona të përfshirë në vepra që lidhen me terrorizmin. Rreth 90 persona janë arrestuar dhe janë ngritur mbi 40 aktakuza.  Në muajin mars, parlamenti i Kosovës miratoi ligjin që parasheh dënime deri në 15 vjet heqje lirie për të gjitha ata që marrin pjesë, nxisin apo ndihmojnë përfshirjen në luftëra të huaja.

Por, veprimtarët thonë se krahas veprimeve ligjore, lufta kundër ekstremizmit të dhunshëm duhet të jetë gjithëpërfshirëse, duke vënë theksin tek edukimi dhe informimi i drejtë i qytetarëve të Kosovës.

Autoritetet në bashkëpunim me bashkësitë fetare, agjencitë e sigurisë e organizatat e shoqërisë civile, hartuan një strategji kombëtare për “Parandalimin e Ekstremizmit të Dhunshëm dhe Radikalizmit”, në përpjekje për të gjetur rrugët për përballjen më këtë dukuri. (voa)