Në Kosovë u prit me gëzim të jashtëzakonshëm rekomandimi i Komisionit Evropian për liberalizimin e vizave për shtetasit kosovarë.

Selia e Komisionit të BE-së në Bruksel

Komisioni Evropian zyrtarisht propozoi heqjen e vizave edhe për qytetarët e Kosovës. Propozimi i Komisionit Evropian i dërgohet Këshillit të Bashkimit Evropian dhe Parlamentit Evropian për heqjen e vizave për qytetarët e Kosovës dhe vënien e Kosovës në listën e vendeve me qarkullim të lirë.

Komisioneri për migracion Dimitris Avramopoulos, tha se “E di sa i rëndësishëm është udhëtimi pa viza për qytetarët e Kosovës dhe jam i kënaqur me progresin e arritur. Shpresoj që Parlamenti Evropian dhe Këshilli ta miratojnë propozimin tonë”, tha Dimistris Avramopoulos.

“Sot ne po vazhdojmë me përkushtimin tonë për propozim të udhëtimit pa viza në BE për qytetarët e Kosovës me pasaporta biometrike duke lehtësuar kontaktet mes njerëzve dhe duke forcuar lidhjet e biznesit, ato sociale e kulturore ndërmjet BE-së dhe Kosovës. Ky është rezultat i punës së madhe dhe përpjekjeve të suksesshme të autoriteteve të Kosovës në bërjen e reformave të gjera dhe të vështira në fushën e drejtësisë, të punëve të brendshme dhe më gjerë, që kanë ndikim në fusha të tilla si sundimi i ligjit dhe reformat në drejtësi. E di sa i rëndësishëm është për popullin e Kosovës udhëtimi pa viza dhe jam shumë i kënaqur me progresin e arritur. Shpresoj që Parlamenti Evropian dhe Këshilli do ta miratojnë shumë shpejtë propozimin tonë”, tha Avramoupulos.

Sipas tij, Komisioni Evropian konfirmon se Kosova i ka përmbushur të gjitha kriteret e udhërrëfyesit të saj për liberalizim të vizave, që nënkupton se deri në miratimin e këtij propozimi nga ana e Parlamentit Evropian dhe Këshillit, Kosova do ta ketë të ratifikuar marrëveshjen për kufirin me Malin e Zi dhe ta ketë të forcuar regjistrin e të dhënave në luftën kundër krimit të organizuar dhe korrupsionit.

Dimistris Avramopoulos tha se zbatimi i vazhdueshëm nga ana e Kosovës i të gjitha kritereve të përcaktuara nga katër blloqet e udhërrëfyesit për viza, si dhe riintegrimi dhe riatdhesimi, do të monitorohen përmes mekanizmit monitorues të pas liberalizimit të vizave, procesi i Stabilizim Asociimit, dhe nëse paraqitet nevoja, përmes mekanizmave përcjellës ad-hoc.

Ai tha se në momentin që propozimi miratohet nga Parlamenti Evropian dhe Këshilli i Bashkimit Evropian, qytetarët e Kosovës me pasaporta biometrike nuk do të kenë nevojë për vizë kur udhëtojnë për qëndrime të shkurtra deri në 90 ditë në vendet anëtare të BE-së.

Rekomandimi i Komisionit Evropian për liberalizimin e vizave për Kosovën u prit me një gëzim të jashtëzakonshëm në Kosovë. Kjo për faktin që Kosova tash e katër vjet bën përpjekje që të plotësojë kriteret e kërkuara nga Komisioni Evropian. Presidenti i Kosovës, Hashim Thaçi, thotë se izolimit të Kosovës i erdhi fundi. “Pas dekadave të izolimit, nuk do të ketë më pritje para ambasadave, nuk do të ketë refuzime. Nuk kemi fituar dhuratë, por kemi merituar liberalizimin me punën tonë të përbashkët. Kur punojmë bashkë, asnjë kufi nuk na ndal”, shkroi në profilin e tij në facebook, Presidenti i Kosovës Hashim Thaçi.

Në të njëjtën linjë shprehet edhe kryeministri i Kosovës, Isa Mustafa. “Rekomandimi pozitiv për heqjen e vizave është vlerësimi më i merituar për qytetarët e Republikës së Kosovës nga Bashkimi Evropian. Rezultatet e punës së Qeverisë çdo ditë e më shumë janë të prekshme për qytetarët e Kosovës, qytetarë të kontinentit dhe të vlerave evropiane”, u shpreh kryeministri Isa Mustafa.

Ministri i integrimeve evropiane në qeverinë e Kosovës, Bekim Qollaku, ministria e të cilit kishte 　barrën kryesore për përmbushjen e kritereve për liberalizimin e vizave, thotë se nga sot “izolimi mbetet vetëm një kujtim i hidhur i së kaluarës. “Kjo është një tjetër ditë historike në procesin e integrimit evropian. Nga sot po fillon të hapet horizonti evropian para kosovarëve. Ky vendim është rezultat dhe konfirmim i përmbushjes së suksesshme të kritereve të udhërrëfyesit, rezultat i punës së përbashkët të qeverisë, kuvendit dhe institucioneve të pavarura. Mbesim të përkushtuar që ta çojmë këtë proces deri në fund sa më shpejt”, tha ministri Qollaku.

Të enjten (05.05) në Kosovë do të qëndrojë shefja e Bashkimit Evropian për Politike të Jashtme dhe Siguri, Federika Mogherini dhe komisionari për migrim, Dimistris Avramopoulos. Që të dy sipas Avramopoulos, lajmin për liberalizimin e vizave duan ta ndajnë me qytetarët e Kosovës.

Kosova është vendi i vetëm në Evropën Juglindore, ku qytetarët e saj　 nuk mund të udhëtojnë pa viza në vendet e Bashkimit Evropian. Kosova mori udhërrëfyesin për liberalizimin e vizave në qershor të vitit 2012, ndërsa　 ju deshën plot katër vjet që të plotësojë kriteret e kërkuara, ndonëse disa herë udhëheqësit e institucioneve të Kosovës thonin se Kosova ka kohë që i ka përmbushur kriteret. (dw)

Kongresi i UEFA-s në Budapest votoi me shumicë të vogël pro pranimit të Kosovës si anëtare e pavarur e Bashkimit të Futbollit Evropian. Kosovarët tani duan të bëhen anëtarë të FIFA-s.

Republika e Kosovës është anëtarja e 55-të e Bashkimit të Futbollit Evropian, UEFA. Kongresi i UEFA-s votoi me një shumicë të vogël votash pro një lutjeje përkatëse të shoqatës kosovare të futbollit. 28 anëtarë të UEFA-s ishin pro, 24 kundër. Dy vota qenë të pavlefshme. “Jam shumë i prekur. Ju falenderoj para së gjithash në emër të lojtarëve të rinj të vendit tim për këtë vendim. Kjo është një ditë historike për ne”, tha Fadil Vokrri, President i Federatës së Futbollit të Kosovës, FFK.

Niersbach:”Një vendim tepër politik”

Kosova e ka shpallur pavarësinë në vitin 2008 dhe ndërkohë, shtetin me 1,8 milionë banorë e kanë njohur 111 shtete. “Vendimi do të jetë i ngushtë”, tha ish-Presidenti i Federatës Gjermane të Futbollit Wolfgang Niersbach para votimit, veç kësaj do të jetë “një vendim tepër politik.” Tomislav Karaxhic, shef i Federatës Serbe të Futbollit u pozicionua para votimit, siç pritej, kundër pranimit të Kosovës: “Kufijtë e vendit nuk lejohet të ndryshojnë. Një republikë e vetëshpallur nuk duhet të marrë leje që të bëhet anëtare e UEFA-s”.

Pas suksesit në UEFA, Federata Kosovare mund të bëhet anëtare e FIFA-s që javën e ardhshme, në 12 dhe 13 maj në Meksikë. Kosovarët shpresojnë të lejohen të zhvillojnë me vonesë ndeshjet për kualifikim në Kampionatin Botëror të Futbollit në vitin 2018 në Rusi.

Infantino kërkoi pagesa solidariteti

Në mesazhin e tij përshëndetës drejtuar delegatëve të UEFA-s, Presidenti i FIFA-s, Gianni Infantino u bëri thirrje të 54 federatave evropiane të futbollit që të bëjnë pagesa solidariteti për vendet më të varfra. Para zgjedhjes së tij si funksionari më i lartë i futbollit në botë, Infantino i premtoi secilit prej të 209-të anëtarëve të FIFA-s një lloj pagese shpërblim prej pesë milionë dollarësh. “Ju keni mundësinë të merrni shumë më tepër para”, u tha zvicerani delegatëve të UEFA-s. “Kur nuk keni nevojë për të gjitha paratë, që ju jep FIFA, jepjuani shoqatave të tjera në botë. Atëherë ne mund të ndërtojmë një FIFA tjetër, një FIFA të solidaritetit.”

Mbledhje krize në 18 maj?

Vakumi në drejtimin e UEFA-s për shkak të bllokimit të Presidentit të deritashëm Michel Platini mbizotëroi në diskutimet në kongresin në Budapest. “Shpresoj dhe dëshiroj që Misheli pas pak ditësh të jetë sërish pranë nesh”, tha zëvendësi i UEFA-s, Anger Maria Villar Llona nga Spanja. Gjykata Ndërkombëtare e Sportit (CAS) do ta shpallë vendimin më e vonta në nëntë maj. Platini u bllokua për gjashtë vjet së bashku me ish-shefin e FIFA-s, Joseph Blatter, për shkak të një pagese të dyshimtë prej 1,8 milionë eurosh. Nëse ai nuk do të shpallet i pafajshëm, siç presin shumë ekspertë, komiteti ekzekutiv i UEFA-s do të mblidhet në 18 maj në Basel në një mbledhje krizë – më pak se tri javë prej fillimit të Kampionatit Evropian të Futbollit në Paris. (dw)

Bashkimi Europian ka publikuar një sondazh në faqen informuese mbi liberalizimin e vizave për në vendet e zonës “Schengen”, përmes të cilit kërkon të marrë mendimin e lexuesve dhe anketuesve se, cili prej 4 vendeve, me të cilat BE-ja është në negociata për heqjen e vizave, do të duhet ta fitojë më parë një lehtësim të tillë.

Bëhet fjalë për Kosovën, Turqinë, Ukrainën dhe Gjeorgjinë, vende të cilat prej kohësh diskutojnë me institucionet e Bashkimit Europian për të përfituar nga lëvizja e lirë e shtetasve të tyre në zonën “Schengen”.

“BE-ja ka zhvilluar një dialog për liberalizim vizash me Turqinë, Ukrainën, Gjeorgjinë dhe Kosovën, ndërsa së fundmi institucionet tona janë shumë pranë hapave konkretë drejt rekomandimit të liberalizimit të vizave për qytetarët e tyre, në mënyrë që të lëvizin të lirë brenda territorit të ‘Schengen’-it”, thuhet në përshkrimin esondazhit.

Nuk dihet ende sesa do të zgjasë sondazhi, por të gjithë shqiptarët kudo ndodhen kanë mundësi të kontribuojnë me një votë “online” për liberalizimin e vizave me shtetin e Kosovës, gjë që realisht është paralajmëruar prej disa ditësh dhe që pritet të bëhet realitet në një të ardhme të afërt.

/ Top Channel