Arkivi mujor: Maj 2016

Shqipëria

TEC-i i Vlorës me koncesion, jashtë pune për shkak të kostos

Komento

tec vloreGazsjellësi TAP është mundësia e vetme për të risjellë në jetë termo-centralin e Vlorës. Investimi prej 95 mln eurosh, kryer një dekadë më parë rezultoi i dështuar për shkak të kostos së lartë të prodhimit të energjisë me naftë.

Por ende pa përfunduar studimi i fizibilitetit për të kthyer teknologjinë e TEC-it nga nafta në gaz, qeveria shqiptare thotë se do të japë operimin dhe mirëmbajtjen tek privati.

“Kemi synimin që të gjejmë një operator privat përmes partneritetit public privat të marrë përsipër vënien në punë riparimin investimin e nevojshëm për konvertimin me gaz megjithëse turbinate punojnë edhe me naftë edhe me gaz”, thotë ministri i Energjitikës, Damian Gjiknuri.

Aktualisht qeveria shqiptare gjendet në Arbitrazh Ndërkombëtar me kompaninë ndërtuese italiane, lidhur me atë se kush duhet të kryejë riparimin e një defekti në impiantin e ftohjes së termo-centralit.

/ Top Channel

Shqipëria

Shqipëria, ekonomia dhe klima e biznesit

Komento

drejtoresha e BBTDrejtoresha e Bankës Botërore në Tiranë: Vendi duhet të ketë një rritje mesatare mbi 4.5 përqind. Duhen ndryshime strukturore. Reforma në Drejtësi vlerësohet si element kyç për investimet e huaja

Në Shqipëri përfaqësuesit e institucioneve financiare ndërkombëtare thanë sot se vendi duhet të bëjë më shumë për të krijuar një klimë sa më tërheqëse për investimet e huaja dhe për të nxitur zhvillimin e ekonomisë. Drejtoresha e Bankës Botërore Tahseen Sayed deklaroi se Shqipëria duhet të ketë një rritje mesatare mbi 4.5 përqind që të përshpejtojë arritjen e standartee të vendeve të Bashkimit europian. Një element kyç për të ardhmen e investimeve të huaja u konsiderua realizimi i reformës në Drejtësi

Zhvillimet ekonomike dhe cështja e investimeve të huaja ishin në qendër të një takim që bashkoi sot përfaqësuesit e qeverisë, të institucioneve financiare ndërkombëtare dhe të botës së sipërmarrjeve të huaja që veprojnë në Shqipëri. Ndërsa nga njëra anë u vlerësuan reformat dhe ndërhyrjet e realizuara, nga ana tjetër u theksua se vendi ka një rrugë të gjatë përpara.

Për Drejtoreshën e Bankës Botërore Tahseen Sayed Shqipërisë i duhet një rritje mesatare ekonomike prej mbi 4,5 përqind dhe kjo sipas saj kërkon një zhvendosje strukturore drejt rritjes së produktivitetit dhe konkurrueshmërisë. Autoritetet deklarojnë se një ndër shtyllat e rritjes ekonomike do të jetë eksporti, i cili përfaqëson 33 përqind të prodhimit të brendshëm bruto, një nivel jo i duhur për të mbështetur një rritje të shpejtë, ndërkohë që sipas drejtoreshës së Bankës Botërore eksportet shqiptare janë të përqëndruara vetëm në disa produkte, gjë që rrit shkallën e cënueshmërisë së tyre. Lidhur me investimet e huaja ajo tha se duhet të ketë një rregjim transparent politikash që të jetë dhe i parashikueshëm.

Edhe përfaqësuesi i FMN-së në Shqipëri Jens Reinke theksoi se “komuniteti ndërkombëtar ka ende një vlerësim të dobët për Shqipërinë si destinacion investimesh”. Sipas tij “niveli i investimeve është ende i ulët dhe to janë në një drejtim, të përqëndruara në sektorin e energjisë, apo te gazsjellësi TAP. Ka nevojë për më shumë investime të huaja dhe në industrinë e shërbimeve”. Ai u tregua ndërkohë kritik lidhur me sistemin fiskal. “Shqipëria nuk po ecën mirë në sistemin e të ardhurave. Ajo që dua të them është se ky sistem është jo funksional. Sistemi i taksave duhet të jetë i parashikueshëm, i drejtëpërdrejtë dhe autoritetet tatimore duhet të gëzojnë besim. Administrata duhet të përmirësojë punën përsa i përket llogaridhënies dhe luftës kundër korrupsionit”.

Por të gjithë bien dakort megjithatë për rëndësinë që ka realizimi i reformës në Drejtësi për të ofruar garancitë e nevojshme për sipërmarrjet e huaja. Këtë e theksoi dhe kryeministri Edi Rama: “Padyshim që reforma në drejtësi është themelore për ti dhënë gjithë këtyre reformave të tjera qëndrueshmëri. Unë kam patur me disa kontakte me disa kompani, që janë dhe këtu në sallë që kanë hasur në arbitraritete të paimagjinueshme në gjykatë, por besoj shumë që duhet të ndajmë bashkërisht një bindje. Shqipëria nuk mund të bëhet vendi që duam nëse informaliteti, privilegjet dhe shpejtësitë e ndryshme të siguruara përmes korsive preferenciale nuk do të luftohen përditë dhe kudo, qoftë një biznes i brendshëm, qoftë një biznes i huaj”.

Zoti Rama solli shembullin e konfliktit me kompaninë kanadeze të naftës Bankers Petroleum e cila sipas tij nuk paguante taksat dhe se arbitrazhi i dha të drejtë qeverisë. Ai hodhi poshtë ndërkohë zërat se investitorët e huaj po lënë Shipërinë: “Çfarë janë këta që çohen dhe thonë: Po ikin investitorët? Kush investitor po ikën? E kam dëgjuar nga përfaqësues të dhomave te huaja të tregtisë. Kush janë investitorët që po ikin?! Më thoni një investitor që po ikën nga Shqipëria? Bankersi nuk po ikën nga Shqipëria. Bankersi po shitet domethënë që po fiton, ata që e kanë po fitojnë. Bankers do vazhdojë të qëndrojë aty, do vazhdojë të punojë aty, do ketë gjithë mbështetjen tonë. Po ashtu dhe aeroporti i Rinasit. Po e shesin dhe shumë më tepër seç e morën. Mos duhet ti ndalojmë edhe gjermanët dhe amerikanët të shesin se duhet të rrinë këtu?! Kanë ardhur të fitojnë, kanë bërë fitimet e tyre, po shesin dhe po vijnë të tjerët”.

Ndaj kritikave të shpeshta për situatën ekonomike të vendit, kryeministri Rama ngriti disa herë zërin, duke kërkuar që të mos harrohet sipas tij gjendja në të cilën ndodhej vendi kur qeveria e tij nisi punën 32 muaj më parë, apo reformat e ndërmarra që nga ajo për energjinë elektrike, të reforma e pensioneve, e ndarjes territoriale apo dhe operacioni kundër informalitetit.

Për opozitën shqiptare, “takimi i sotëm i kryeministrit me biznesin u kthye në një bumerang aktakuzash publike, sy për sy, cka dëshmon se sa e rëndë është situata ekonomike, sa e thellë kriza e biznesit, dhe sa e pashpresë mundësia e tyre për të hapur vende të reja pune nën qeverisjen e Ramës, nënvizoi kreu i Partisë demokratike Lulzim Basha në një deklaratë. (voa)

Bota, Shkenca

Popullariteti i garave me dronë

Komento

dronePopullariteti i garave me dronë po vazhdon të rritet në botë. Ky sport i teknologjisë së lartë shumë shpejt është shndërruar në një sport ndërkombëtar me transmetime të drejtëpërdrejta televizive dhe me çmime të larta për fituesit.

Një garë me dronë po zhvillohet në një magazinë në Silicon Valley. Pjesëmarrësit po konkurojnë në një sport të ri të teknologjisë së lartë, i cili vazhdon të zgjerohet në botë.

“Gara me dron është si të jesh në kabinën e një avioni, duke fluturuar me një shikim tre-dimensional me pilotët e tjerë, në ajër. Dhe ne mund të bëjmë gjëra që janë vërtetë të rrezikshme, si përplasjet në ajër, manovrimi në hapësira të ngushta dhe përplasje të tjera pa lënduar njeri. Kështu që është një gjë e bukur, emocionuese, e zhurmshme dhe krejtësisht e sigurt,” thotë Ken Loo, pjesëmarrës në garë.

Pilotët drejtojnë dronë të posaçëm nëpër këtë korsi me pengesa, me një shpejtësi deri në 96 kilometra në orë.

Ata përdorin syze përmes të cilave ata mund të shohin nga përspektiva e dronit që ata drejtojnë.

“Pasi t’i vësh syzet, praktikisht ndjeheni sikur jeni pjesë e dronit. Pra, ju mund të ndjeni dallimin kur rrisni shpejtësinë, mund të ndjeheni sikur vërtet po fluturoni,”thotë Colby Curtola, pilot droni​.

Pilotët amatorë gjejnë vende unike për gara me dronë, si kjo zonë me trena të braktisur në jug të San Franciskos.

Për shumë pilotë, gara me dron është një pasion i tyre. Ata shpenzojnë shumë orë në modifikimin e dronëve të tyre me pjesë të reja ose ndërtimin e tyre nga e para.

Disa thonë se ata kanë shpenzuar më shumë se 10 mijë dollarë për pjesë të ndryshme të dronit si motorët, bateritë dhe kamerat.

Për të konkurruar, ju duhet një dron i shpejtë, reflekse të shpeja, koordinim të mirë të syve me lëvizjet e duarve, por kjo nuk është e gjitha.

“Është gjithashtu e rëndësishme të keni durim gjatë manovrimit në pista dhe të mos keni tension kur përplasni dronin. Kjo është një gjë e vështirë kur përpiqeni të tejkaloni kufijtë tuaj në drejtimin e dronëve në ajër,” thotë Larry Davis, pjesëmarrës në gara me dron.

Ajo që filloi si një konkurrencë miqësore mes të apasionuarve, tani është kthyer në një sport ndërkombëtar.

Në mars, Dubai organizoi garën botërore, Drone Prix, ku çmimi për fituesin ishte 250 miijë dollarë. Garën e fitoi 15-vjeçari nga Anglia, Luka Bannister.

“Askush nuk e priste që gara me dronë do të kishte kaq shumë popullaritet në më pak se një vit”, thotë Sahand Barati, drejtor i Shoqatës Ndërkombëtare të Garave me Dronë.

Kjo shoqatë njoftoi kohët e fundit nënshkrimin e një marrëveshjeje me kanalin televiziv ESPN për të transmetuar drejtpërdrejt në internet garat e ardhshme me dronë, por vëzhguesit thonë se organizatorët e garës duhet të përmirësojnë më tej përvojën e spektatorëve.

“Ata janë shumë të shpejtë, shumë të vegjël, dhe është e vështirë të ndjekësh dhjetë prej tyre duke garuar në të njëjtën kohë. Është e vështirë dhe konfuze të mbash sytë tek drejtuesi i garës, sidomos në rastet kur udhëheqësi i garës ndryshon shpesh,”thotë Patrick Egan, redaktor lajmesh.

Një tjetër organizator i garave me dronë, Drone Racing League, po përpiqet ta ndryshojë këtë sport përmes prodhimit të videove online.

Liga zhvilloi garën e saj të parë të madhe në stadiumin e ekipit të futbollit amerikan,Miami Dolphins.

“Sjellja e çdo sporti të ri shoqërohet me sfida. Dhe ne po përpiqemi ta bëjmë këtë sport emocionues dhe popullor në një mënyrë sa më të kuptueshme për audiencën,” thotë Nick Horbaczewski, drejtor i Ligës së Garave me Dronë​.

Një sport që lejon njerëzit të ndjejnë të veçantën e fluturimit pa lëvizur nga ulëset e tyre. (voa)

Bota, Shkenca

Vajzat dhe angazhimi i tyre në shkencë

Komento

vajzat ne shkenceNumri i vajzave të cilat kur rriten bëhen shkencëtare, është i vogël në krahasim me djemtë. Një muze i shkencës në Denver po përpiqet për ta ndryshuar këtë prirje, duke u dhënë mijëra vajzave shansin të takojnë gra që merren me shkencë dhe të frymëzohen që edhe ato të përpiqen për të patur një karrierë shkencore.

Kur është fjala për karrierën, vajzave u pëlqejnë profesionet më interesante.

Për t’i ndihmuar vajzat të realizojnë ëndërrën e tyre, shumë familje u mblodhën në Muzeun e Natyrës dhe të Shkencave në Denver, për Ditën e Shkencës. Inxhinierja për mjedisin, Daniela Castaneda, tregon se si qyteti filtron ujin e pijshëm.

“Kjo është tabela që tregon se si ndotet uji dhe përse është e rëndësishme që ai të pastrohet…”, thotë Daniela Castaneda.

Vajzat përdorin zogj-lodra, sikurse shkencëtarët si biologia Emily Snode-Brenneman veprojnë me zogj të vërtetë, me qëllim që të studjojnë sjelljen e tyre të vërtetë.

​“Ngjisim këtë pajisje të vogël në shpinën e zogjve për të monitoruar lëvizjet e tyre,”thotë Emily Snode-Brenneman.

“Mendoj se është bukur të punosh me zogjtë, mua më kanë pëlqyer ata gjithmonë,”thotë Annika, nxënëse e shkollës së mesme.

Por, jo gjithshka është punë praktike. Stilistja Meghan Anderson Doyle shpjegon se si shkenca e gjeometrisë e ndihmon atë të krijojë fustane.

“Fillimisht ne vizatojmë modelin në letër, dhe pastaj e realizojmë atë në mënyrë tre-dimensionale tek stofi, i qepim bashkë copat, duke krijuar kështu fustanin,” thotë Megan Anderson Doyle.

Inxhinierja Tinesha Ross tregon një qark të bordit kompjuterik nga stacioni ndërkombëtar i hapësirës, i cili duhet riparuar.

“E vendos këtë bord nën mikroskop dhe pastaj ju më thoni në se ju ndihmon ta shihni më mirë këtë pjesë…”

Në fushën e gazetarisë shkencore, Kayla Mitchiner interviston organizatoren e ekspozitës “Girls and Science”, Colleen Carter.

“-Përse vendosët të bëni ekspozitën për pjesëmarrjen e vajzave në shkencë?

-Fillimisht, sepse vetë jam nënë dhe kam vajza. Është e rëndësishme për mua që vajzat ta dinë se ato mund të bëjnë gjithshka që duan.

-Unë dua të bëhem shkrimtare kur të rritem.

-Kjo është diçka e shkëlqyer, sepse shpresoj që një ditë do të lexoj librat e tua…”

Kur ka kaq shumë mundësira për shkencë, Lilly, nxënëse e klasës së 5-të, thotë se është mirë t’i ndash idetë e tua me të tjerët.

“Unë mendoj se djemtë duhet që patjetër të provojnë të merren me shkencë, edhe pse është Dita e Vajzave, sepse është diçka e bukur të merresh me shkencë”, thotë Lilly, nxënëse e klasës së pestë.

Familjet, përfshirë djemtë, janë gjithmonë të mirëpritur në këtë ditë të veçantë, për të parë se si karrierat në shkencë janë të hapura për të gjithë. (voa)

Analiza

E shkruar dje, e vlefshme edhe për sot

Komento

Nga revista elektronike “Shqiptaria”

UDHEHEQËSIT (JO)UDHEHEQËS

Në të gjitha periudhat kohore të të gjitha formacioneve shoqërore, ka pasur nga ata që kanë udhëhequr dhe ata që kanë qenë të nënshtruar, të shfrytëzuar dhe të disiplinuar për zbatimin e urdhrave të udhëheqësve të tyre, që i kanë prijë masës apo grupit të caktuar.

Shkruan: Bejtullah Sadiku, arsimtar i shkollës shqipe, 29-01-2009, Gjermani

Kështu ka qenë në kohën antike, mesjetë, kohën e re, e kështu akoma mbetet edhe sot!

Përdorimi i fjalës latine „dux“ (udhëheqës) si titull nderi, respekti, që i prinë masës, grupit apo kombit, si p.sh: „Skenderbeg dux albancorum“ (Skënderbeu, udhëheqës i shqiptarëve).

Por, duke analizuar të gjitha etapat shoqërore nëpër të cilat ka kaluar njerëzimi, dihet dhe njihet historikisht, se ka pasur prijës-udhëheqës historikisht të njohur, pozitiv, që de-facto kanë mbrojtur masën, shumicën apo shoqërinë në tërësi, të cilës i kanë takuar dhe me të cilën kanë udhëhequr, dhe “udhëheqës” negativ, të njohur historikisht, që kanë dëmtuar e shkatërruar shumicën, gjithmonë në llogari të interesave të ngushta, për të cilat interesa kanë dhënë e shkrirë gjithë mundin dhe bërë luftën, vetëm e vetëm të prijë, apo të emërtohet në „udhëheqës“?!

Në të kaluarën, kushte mashtrimi e manipulimi për një udhëheqje despotike, shtypëse, klasore, klanore e mashtruese ka pasur shumë më tepër se sot, ngase niveli i ngritjes dhe zhvillimit të atëhershëm me të sotshmen, si ekonomikisht, politikisht, kulturor e shkencor ka qenë i nivelit të pa krahasuar me të arriturat e sodit, sa që edhe shumë më lehtë është vepruar e manipuluar me ta.

Por, sot tendenca veprimi e manipulimesh të këtilla ka dhe tentohet të ketë, por se harrojnë se jemi në shekullin XXI, dhe se të mirat e të këqijat, si vlera dhe jo-vlera, sot i kupton dhe i din çdo person apo individ i cilës do qoftë kategori shoqërore, ngase për tu njohur me problemet shoqërore nuk është koha e udhëtimit të një letre me muaj e vite, e as e leximit së letrave apo dhënies së informimeve nga imami i xhamisë së fshatit, sepse jetojmë në shekullin e elektronikë dhe digjitalizimit, ku për ndodhitë e gjithë botës çka po ndodhë, i kemi në tavolinë brenda ca sekondave. E si duket këtë mënyrë komunikimi e harrojnë ca udhëheqës tanë, ku akoma mashtrojnë veten se janë duke na mashtruar! Andaj, vend për gabime e mashtrime s`ka mbetur. Dushk për gogla më nuk shitet, dhe as dielli me shoshë kurrë nuk është mbuluar, e aq më pak nga ju, ngase gjërat dhe sendet, veprimet e juaja sot i kuptojnë edhe fëmijët e djepit, e mos bëjmë fjalë e gjithë ajo armatë e shkolluar e të rinjve të tjerë.

Nëse këto pak fjalë merren apo duhet të merren parasysh nga prijësit-udhëheqësit tanë, gjendja jonë shqiptare nuk do ishte këtu ku akoma është, nuk do flitej as për kundërthënie, as për grindje, as për raporte të brishta, as për vrasje politike, as për hakmarrje të llojeve të ndryshme, as për Brodec e Sopot, as për antagonizma ndërpartiake apo brenda-partiake, as për prishje raportesh në mes vetë ish ushtarëve të UÇK-së e udhëheqësve të tyre e kështu me radhë, sa që të gjitha këto, japin pasqyrën e vetë „udhëheqësve“ se a janë të mirë, se a duhet të mbesin, se a duhet të ndërrohen, se a duhet… a duhet…?!

Andaj, ju lutem, gabimet e udhëheqësve-prijësve të kombit, qofshin partiak, të pozitës, opozitarë, pushtetar komunash e shteti, është koha e ndryshimeve dhe ndërrimeve të qëndrimeve të veseve e virtyteve dhe zëvendësimi i tyre me norma të edukimit politik, shoqërorë e kombëtarë të qytetëruar e të civilizuar, ashtu si kërkojnë të gjitha rregullat, ligjet dhe ligjshmëritë e atyre vendeve ku edhe e keni cakun e qëllimit të arritjes, duke i anuluar e larguar vetitë e këqija e zëvendësuar me ato më të mirat, që t`u ketë udhëheqja hije burrërore, njerëzore , atdhetare/kombëtare, pa lajka, pa dredhia e t`u jenë të pastra si loti, të çiltërta si qielli. Të shndritni si rreze dielli për ta luftuar errësirën që akoma është prezent ndër shqiptarë, kështu do t`u urojnë e përgëzojnë të gjallë e të vdekur, kështu do të lehtësoni tokën arbërore të larë e ujitur me gjakun e vëllezërve që flijuan jetën për ta shijuar (jo vetëm ju) të gjithë ne!

Koha për aq sa punon, jo vetëm që thërret, por edhe vajton për ndryshime!

Maqedonia

Treshja e eurodeputetëve godet koalicionin VMRO-DPMNE dhe BDI: Qeveria e re, hap prapa

Komento

vajgl kukan houitTre euro-deputetët Houit, Kukan dhe Vajgëll përmes një deklarate të përbashkët kanë shprehur shqetësimin e tyre të thellë që 4 partitë politike nënshkruese të marrëveshjes së Përzhinës nuk arritën një marrëveshje të përbashkët e cila do të kontribuonte në drejtim të kapërcimit të krizës politike.

“Ne shprehim keqardhjen tonë të thellë që dialogu i fundit mes partive kryesore politike nuk çoi në një qasje të përbashkët për të kapërcyer krizën në vend. Lidhur me situatën e tanishme jemi të prerë dhe të shqetësuar se marrëveshjet për një qeveri që nuk bazohet mbi një marrëveshje nga të gjitha partitë rrezikon shuarjen totale të Marrëveshjes së Përzhinës dhe përfaqësojnë një kthim serioz mbrapa mbi sundimin e së drejtës, pavarësinë e sistemit gjyqësor dhe medias, si dhe rrezikojnë rëndë procesin e reformave dhe rrugën euroatlantike të vendit”, thuhet në deklaratën e përbashkët të Eurodeputetëve.

Në deklaratën e përbashkët të tre eurodeputetëve, iu bëhet apel liderëve që t’i mbeten besnik Marrëveshjes së Përzhinës, dhe të kthejnë prapa hapat e bërë në sundimin e ligjit.

“Ne mbetemi të bindur se marrëveshja e Përzhinës – dialogu politik përmes parlamentit, përgjegjshmëria dhe reformat që duhet të bëhen për mbajtjen e zgjedhjeve – mbeten mënyra më e mirë për ta nxjerr vendin nga kriza aktuale. Edhe pse lëvizja e gjykatës kushtetuese i hapi rrugën parlamentit për t’u rimbledhur dhe planifikuar zgjedhje të reja, ne besojmë se kriza mund të kapërcehet vetëm nëse 4 partitë i qëndrojnë besnike marrëveshjes së Përzhinës dhe punojnë për të zhbërë këto hapa prapa mbi sundimin e ligjit dhe të përgatisin terrenin për zgjedhje të besueshëm si dhe zbatimin e plotë të prioriteteve të reformave urgjente që janë pjesë e marrëveshjes së Përzhinës. Në veçanti faljet e presidentit përbëjnë shkelje të Marrëveshjes së Përzhinës dhe nuk janë në përputhje me sundimin e ligjit dhe funksionimin e demokracisë. Gjithashtu partitë duhet të ofrojnë mbështetjen e nevojshme ndaj Prokurorisë speciale dhe punës së saj, të cilat janë pika kryesore të marrëveshjes së Përzhinës”, thuhet më tej në deklaratë.

Në këtë reagim të tre eurodeputetëve kërkohet gjithashtu edhe angazhim më i fuqishëm i opozitës dhe shoqërisë civile.

“Iu bëjmë thirrje liderëve politikë që të tregojnë përgjegjshmërinë për fjalën e dhënë ndaj Marrëveshjes së Përzhinës dhe të punojnë fuqishëm për aspiratat demokratike dhe interesat e qytetarëve të Maqedonisë”, përfundon deklarata./Alsat-M/

Maqedonia

Gati Lista e Zezë për Maqedoninë, 60 emra, ja kush mund të jenë ?!

Komento

blacklistBashkësia ndërkombëtare po përgadit listën e zezë për 60 personalitete publike të Maqedonisë.

Sipas portalit Svedok, bëhet fjalë për politikanë, biznesmenë dhe persona të lidhur me biznese të dyshimta dhe me llogari të dyshimta bankare jashtë vendit.

Sipas këtij portali, institucione përkatëse, të tilla si Prokuroria Speciale, bankave dhe institucioneve të tjera financiare janë të detyruar të komunikojnë dhe të shkëmbejnë të dhëna me homologët e tyre evropianë dhe të SHBA për të dërguar të dhënat mbi pronën dhe llogaritë e personave që janë të dyshuar, me pastrimin e parave apo trafikimin e armëve dhe drogës.

Në mesin e 60 personave të parë janë edhe emra të panjohur të personave për publikun, por që kanë shërbyer për realizimin e transaksioneve sekrete dhe që kanë emrat e tyre si drejtues të kompanive të dyshimta.(INA)

Shqipëria

Rama për “Euronews”: Miratojmë drejtësinë, çelim negociatat. Nuk jemi “djalli” i Europës

Komento

edi ramaNë një intervistë dhënë për gazetaren Audrey Tilve të “Euronews”, kryeministri Edi Rama është shprehur mbi temat më të nxehta aktuale, përfshi Reformën në Drejtësi dhe synimin për të çelur negociatat për anëtarësim në BE, por nuk i kanë munguar edhe disa pyetje jo të rehatshme.

Megjithatë, Rama ka këmbëngulur në idenë e tij se realiteti i Shqipërisë, por edhe i Ballkanit, nuk është ai që propagandohet nga krerë ekstremistë si Marine Le Pen apo aleatët e saj dhe se vendi ynë nuk është shtëpia e “djallit” në Europë.

Gazetarja, që në fillim është ndalur te ëndrra e shqiptarëve për t’u bërë pjesë e Bashkimit Europian, edhe pse Shqipëria – sipas saj, – është një vend ballkanas i prekur nga disa gjëra shqetësuese si korrupsioni dhe krimi. Megjithatë, përpara saj qëndronte një kryeministër socialist, që ndodhet në pushtet prej 3 vitesh dhe që, si reformator i shquar ka për synim vetëm një gjë: bashkimin me klubin europian.

Ja intervista e plotë e Ramës për Audrey Tilve:

Audrey Tilve: Le ta nisim me misionin europian, duke qenë edhe objektivi juaj. Shqipëria është një vend kandidat që prej vitit 2014, ndërkohë, prej fillimit të këtij viti qeveria juaj po bën gjithçka të nevojshme për të çelur sa më shpejt negociatat për anëtarësim. Çfarë shihni kaq tërheqëse te Bashkimi Europian, duke parë edhe gjendjen aktuale të vendit tuaj?

Edi Rama: Mendoj se në Shqipëri, por edhe në Ballkan në përgjithësi, ne nuk kemi harruar atë që shpesh harrohet në Europë. Faktin që Bashkimi Europian është, mbi të gjitha, një projekt i paqes dhe prosperitetit. Mund ta kujtoni shumë mirë që, për herë të parë pas 68 vitesh, unë shkova në Beograd, ndërkohë që edhe homologu im serb erdhi në Tiranë, për herë të parë në historinë e dy vendeve fqinje, të cilat kanë zhvilluar edhe luftëra me njëri-tjetrin. Pse e bëra këtë? Sepse jemi të gjithë të bashkuar sa i përket synimeve tona për t’iu bashkuar Europës. E nëse Europa ka probleme, ne nuk duhet ta trajtojmë këtë si diçka që nuk funksionon, por si diçka që ka nevojë për udhëheqësi dhe kurajo për të ecur përpara.

Audrey Tilve: E në mesin e një Bashkimi Europian të trazuar, cili do të ishte thelbi i mirëpritjes së Shqipërisë, që ka ndoshta edhe më shumë probleme?

Edi Rama: Kjo është pikërisht ajo çfarë ju kanë dhënë Marine Le Pen dhe aleatë te saj në Europë. Ata kanë përhapur propagandë ndaj procesit të zgjerimit, por Europa do të bëhet gjithnjë e më solide nëse kompletohet si projekt, e duke mos lënë një “zonë gri” në mes të Europës, ku lojtarë të jashtëm si Rusia apo fundamentalistë islamikë të mund të gjejnë terren për të rrezikuar sigurinë e Europës.

Audrey Tilve: Përpara se ju të nisni negociatat për anëtarësim, Brukseli thotë se ju duhet të bëni një reformim kolosal të sistemit tuaj të drejtësisë. Progresi në këtë aspekt ka qenë i ngadaltë, kryesisht për shkak të konflikteve mes qeverisë suaj dhe opozitës, që kanë ngadalësuar këtë reformë. Si mund të dilni nga kjo situatë e ndërlikuar?

Edi Rama: Reforma nuk do të marrë edhe shumë kohë. E nisëm këtë rrugë mbi një vit më parë dhe jemi në fazat e fundit të procesit. Ajo është një reformë radikale dhe fundamentale kushtetuese, në mënyrë që të ndryshojmë tërësisht sistemin tonë të drejtësisë. Dhe, po. Është diçka shumë e vështirë. Kemi pasur diskutime të shumta dhe me siguri do të ketë sërish. Por duhet të dini se, për një fillim të mbarë ne jemi ende në kohë…

Audrey Tilve: Cila është korniza kohore e saj. Kur pritet që ta miratoni dhe implementoni këtë reformë?

Edi Rama: Ne duam të nisim negociatat për anëtarësim brenda fundit të këtij viti. Ndaj dhe duam që reforma të miratohet brenda kohës së nevojshme, përpara se të mblidhet Këshilli i Europës. Do të kalojë! Megjithatë, nga ana tjetër, ne duhet t’u japim fund historive të një Shqipërie të korruptuar dhe kriminale.

Audrey Tilve: A janë të korruptuar gjykatësit shqiptarë? A mundeni ju ta konfirmoni një gjë të tillë përpara kujtdo?

Edi Rama: E thashë edhe më sipër. Duhet t’u japim fund historive të një Shqipërie të korruptuar dhe kriminale, ashtu sikurse edhe të një Ballkani të korruptuar dhe kriminal. Këto besoj se janë stereotipe të krijuara vite më parë dhe që stigmatizojnë ende vendet tona lehtësisht.

Audrey Tilve: Sipas prokurorëve antimafia të Italisë dhe raportimeve të ekspertëve, rreth 1/3-ta e ekonomisë shqiptare qeveriset prej krimit dhe llojeve të ndryshme të trafikimit. Droga, trafiku i armëve, trafiku i qenieve njerëzore veçanërisht femrave, i organeve…?

Edi Rama: Kjo është e neveritshme! E neveritshme. Nuk ka pasur kurrë raport, askund, që të thotë se një e treta e ekonomisë shqiptare është e prekur prej trafikut të qenieve njerëzore apo drogës.

Audrey Tilve: Çfarë thoni ju atëherë, cilat janë shifrat tuaja? E mohoni faktin që ekziston një trafik ilegal i drogës, armëve apo i grave në Shqipëri?

Edi Rama: E refuzoj kategorikisht këtë dhe mund t’iu them se është tërësisht e pavërtetë, sikurse edhe e padrejtë të flitet për trafik armësh në Shqipëri.

Audrey Tilve: Pra, nuk ka probleme me krimin në Shqipëri? Gjithçka shkon mirë?

Edi Rama: Pse duhet të shkojmë nga njëri ekstrem, në tjetrin. Nuk e kuptoj këtë. Pse duhet të themi s’ka asnjë problem, apo që krimi është i shtrirë kudo? Pse? A ka një pyetje më racionale për këtë? Apo është diçka interesante nga ana gazetareske që t’i thoni të tilla histori? Ju e përshkruani Shqipërinë si të ishte shtëpia e djallit në Europë. Por kjo nuk është aspak e vërtetë.

Audrey Tilve: Nuk është kjo ajo që thashë unë.

Edi Rama: Shqipëria është një vend që ndryshon përditë. Me probleme dhe me një të kaluar shumë, por shumë të vështirë. Ndoshta më të vështirën nga të gjitha vendet ish-komuniste, sepse ne ishim të mbyllur jo vetëm ndaj Europës Lindore, por edhe asaj Perëndimore për 50 vite. Kështu që, ajo çfarë kemi bërë në këto 25 vite është një mrekulli e vërtetë, duke ditur se nga erdhëm.

Audrey Tilve: Le të ndryshojmë bisedë. Të flasim për ekonominë, që ju po përpiqeni ta zhvilloni dhe ta nxisni të përparojë. Investimet e huaja po rriten, megjithatë vendi prodhon shumë pak dhe importon shumë të mira. Cili sektor ka një potencial të madh për të ardhmen?

Edi Rama: Po, Shqipëria është e pasur me burime natyrore, përfshi naftën, gazin dhe mineralet. Industria e turizmit në Shqipëri ka një potencial të jashtëzakonshëm. Ne mund të zhvillojmë një sektor tepër konkurrues agrikulturor, në mënyrë që të prodhojmë mjaftueshëm për kërkesat tona. Por kemi bërë shumë edhe në sektorin e energjisë. Mbi të gjitha, kemi një krah pune shumë të lirë, që na ka ndihmuar të zhvillojmë edhe industrinë tonë prodhuese. Pikërisht në këto fusha po fokusohemi për të ngritur një model të ri biznesi dhe duket se po funksionon.

Audrey Tilve: Le të përqëndrohemi pak në këndvështrimin personal. Përpara se t’i hynit politikës ju keni qenë një artist, më saktë një piktor. Nëse shihni pas, a ju vjen keq që keni lënë botën e artit?

Edi Rama: Personalisht nuk ndiej keqardhje për asgjë. Kam pasur plane të tjera, por ja ku jemi tani. Unë jam këtu përballë jush. Madje kam marrë përsipër përgjegjësinë e madhe për të udhëhequr vendin tim. Ky është privilegji dhe nderi më i madh që dikush mund të ketë. Sigurisht që për këtë më është dashur të lë pas dore punën time si artist. Gjithsesi unë jam artist dhe kryeministër njëkohësisht. Edhe gjatë takimeve të mia unë pikturoj, sikurse edhe gjatë telefonatave. Kjo më ndihmon të përqëndrohem gjatë tyre. Megjithatë (qesh) siç e shihni nuk pikturoj gjatë intervistave, kështu që jo gjithmonë gjërat ecin në mënyrë perfekte.

Audrey Tilve: Faleminderit Edi Rama.

/ Top Channel

Kosova

Demarkacioni duhet Kosovës për liberalizimin e vizave, Malit të Zi i duhet për anëtarësimin në NATO

Komento

demarkacioni-me-malin-e-ziProcesi i anëtarësimit të Malit të Zi në NATO është duke shkuar drejt përfundimit dhe marrëveshja për anëtarësim do të hyjë në fuqi pas ratifikimit nga të gjitha vendet anëtare të aleancës. Kjo, ani pse Mali i Zi e Kosova ende nuk kanë përcaktuar vijën kufitare me njëra tjetrën.

Njohësi i çështjeve të sigurisë, Burim Ramadani, për Koha.net ka thënë se çështja e Demarkacionit të kufirit edhe për Malin e Zi është e nevojshme në procesin e anëtarësimit në NATO. Por, ka shtuar se nuk është kusht i pakapërcyeshëm, derisa NATO synon që ta pranojë Malin e Zi me demarkacion të kryer.

“Thjesht, tashmë po afrohet koha kur të dy shteteve u ngutet për Demarkacion: Kosovës për liberalizimin e vizave, ndërsa Malit të Zi për anëtarësimin në NATO”, tha Ramadani.

Kjo, sipas tij, është rast i mirë për rinegocim.

“Prandaj, mendoj se të dy shtetet duhet të ulen edhe njëherë dhe të ripërcaktojnë pikat kontestuese për Kosovën dhe të vazhdojnë tutje si fqinj të mirë që janë”, ka përfunduar Ramadani. (telegrafi)

Bota

EgyptAir, gjendet vendndodhja e rrëzimit

Komento

ministri egjiptianEkipet e kërkimit në Mesdhe kanë identifikuar vendndodhjen e mbetjeve të avionit të kompanisë Egyptair që udhëtonte nga Parisi drejt Kajros. Ministri egjiptian i aviacionit tha se rrëzimi i avionit ka më shumë gjasa të jetë shkaktuar nga një sulm terrorist se sa nga një difekt teknik.

Ministri Sherif Fathy komentoi mbi rrëzimin dhe mbi një operacion kërkimi në Mesdhe për avionin, ku ndodheshin 66 njerëz.

Presidenti francez, François Hollande u tha gazetarëve në Paris se asnjë hipotezë nuk përjashtohet.

Sipas njoftimeve të para nga Greqia, disa mbeturina të avionit mund të jenë diktuar nga ajri.

Ndërkohë, të afërmit e personave që ndodheshin në bord u mblodhën në aeroport, në pritje të lajmeve për njerëzit e tyre.

Kompania Egyptair tha se e kishte humbur kontaktin me avionin Airbus rreth orës 02:30 të mëngjesit, kur ai ishte në një lartësi prej rreth 11.300 metra dhe vetëm 16 kilometra brenda hapësirës ajrore egjiptiane.

Ministri grek i mbrojtjes Panos Kamennos tha se avioni bëri kthesa të papritura dhe një rënie të shpejtë para zhdukjes nga radari. Zyrtarët grekë thanë se kërkimet po zhvillohen në det, rreth 130 milje detare në juglindje të ishullit Karpathos.

Ministri i Jashtëm francez Jean-Marc Ayrault tha se Franca do të kontribuojë në kërkime me avionë dhe me anije dhe se po mbahen kontakte të afërta me autoritetet egjiptiane.

“Jemi në dispozicion të familjeve, kjo është përparësia jonë… prandaj dhe jemi në kontakt të vazhdueshëm me autoritetet egjiptiane”, – tha ai në një konferencë shtypi në Paris.

Ministrat e Jashtëm francez dhe egjiptian shkëmbyen ngushëllime lidhur me incidentin. (voa)