Dy javë më parë,  Top Channel provokoi Lulzim Bashën dhe Edi Ramën nëse ata do të takoheshin me njëri-tjetrin për reformën në drejtësi. Kur të dy ranë dakort, ajo që ngeli ishte caktimi i datës dhe i detajeve të tjera.

Palët u vunë në kontakt dhe takimi u realizua këtë të hënë, por ashtu siç shumë e prisnin prodhoi…asgjë dhe nga tryeza Rama-Basha nuk pati “tym të bardhë”.

Në fund të takimit Rama fajësoi Partinë Demokratike, ndërsa Basha maxhorancën, madje ai tha në fund se bindjen që Kryeministri nuk do reformën ja përforcoi edhe fjalimi i përgatitur i tij.

Rama sqaroi këtë duke thënë se kishte shkuar me dy fjalime të parapërgatitur, njëri për suksesin e bisedimeve dhe tjetri për dështimin.

“Kisha dy fjalime, një për suksesin dhe një për dështimin. Ne u përgatitem me shumë seriozitet për këtë takim dhe isha përgatitur për të dyja mundësitë, që të dilnim me sukses dhe pa sukses”, tha ai.

Rama tha se maxhoranca dha kompromisin për kërkesën e Partisë Demokratike për shumicën 2/3, por tha se kjo shumicë nuk i jep Kuvendit të drejtën që të bllokojë sistemin.

“Sistemi i ri garanton që Parlamenti nuk e bllokon dot sistemin duke mos gjetur dakordësinë për të votuar sepse sistemi e gjeneron vetë duke përzgjedhur personat përkatës”, tha ai.

Rama thotë se drafti rrëzon sistemin aktual dhe garanton përzgjedhje në bazë të aftësisë dhe pastërtisë së figurave të reja, proces që do të jetë tërësisht në duar të ndërkombëtarëve.

“Vetingu, cilësia e karrierës, provimi i aftësive profesionale dhe morale dhe e gjithë kjo do të bëhet nën kontrollin e ndërkombëtarëve. Ata që kanë pasuri, qoftë edhe gjëra të tjera që do të kalojnë në këtë radiografi personale, duhet ta masin mirë para se të thonë që duam të rrijmë në sistem. E dyta, ne kemi garantuar me këtë draft që sistemi aktual bie përtokë, që nga Këshilli i Lartë i drejtësisë, një bandë që duhet të shkrihet. Mundëson që gjyqtarët t’i dalin zot detyrës dhe të kalojnë procesin e skanimit dhe të shërbejnë dhe promovohen pa qenë të detyruar, as për të paguar rryshfete për të marrë një post në Gjykatën Kushtetuese, Apel dhe Gjykatën e Lartë”, u shpreh ai.

Me takimin e së hënës, Rama thotë se PD humbi justifikimet dhe argumentet për të kundërshtuar reformën, përfshirë këtu edhe Këshillin e Emërimve në Drejtësi. Ai tha se ka dy rrugë për PD.

“PD sot nuk konteston dot më këtë strukturë të re. Përfshirë edhe Këshillin e Emërimeve në Drejtësi. PD duhet të zgjedhë, ose do t’i bëjë rezistencë kalimit të reformës duke zgjedhur përfundimissht avazin e vjetër, ose do të bashkohet për ta kaluar atë”, u shpreh ai.

Ai tha se reforma nuk është perfekte, por është më e mira e mundshme dhe për shembullin kroat thotë se ka probleme.

“Në Kroaci një parti mund të zgjedhë një deputet dhe ta bëjë gjykatës dhe Kroacia sot ka një vit debat që do të heqë këtë mortje që nuk është asgjë tjetër vetëm ndarja e karrigeve në institucionet e larta”, u shpreh ai.

Rama deklaron se vendit i duhet një tërmet që të shembë përtokë të gjithë sistemin e drejtësisë.

“Ndryshe do të kemi lëvizur vetëm dritat dhe nuk do të kemi spostuar skenën nga një vend krimi, siç është sot sistemi i drejtësisë, në një vend ku drejtësia nuk është mall për t’u shitur”, tha ai.

Rruga e draftit drejt votimit në seancë plenare nis që nga e marta dhe ky është plani B i maxhorancës.

“Sot kemi mbyllur 1 vit e gjysmë diskutime. Nesër drafti fillon rrugën proceduriale drejt sallës dhe sesa ditë duhet që të rrijë në Komisionin e Posaçëm dhe sa do të rrijë në sallë janë teknikalitete që nuk i di. Nuk presim më asnjë sekondë. Drafti do të vazhdojë rrugën e vet deri në sallë”, tha ai.

Kryeministri tha se nëse PD nuk rrëzon vetëm reformën në drejtësi, por rrëzon Shqipërinë, shtegun për të marrë hapjen e negociatave.

Rama sqaroi edhe praninë e Vasilit.

“Unë do të paraqitesha në takim me Xhafajn dhe Finon, pra me kryetarin e Komisionit të Reformës në Drejtësi dhe atë të Komisionit të Reformës Zgjedhore. Nuk erdhi Bashkim Fino për shkaqe shëndetësore dhe morëm Petrit Vasilin, që është pjesë e LSI-së në të dyja këto komisione. Pra erdhi një njeri që njeh të dyja çështjet nga brenda”, u shpreh ai.

Kryeministri tha se ka mbështetjen e LSI-së për reformën.

“LSI ka kohë që ka lëvizur nga pozicioni konsensus me patjetër në pozicionin reformë me patjetër dhe është normale. Është e siguritë që si ne, si LSI do të mbështesim me të gjitha votat tona reformën bazuar mbi draftin e miratuar nga Euralius dhe Opdat”, tha ai.

Kryeministri nuk përjashtoi mundësinë që të merren në konsideratë zgjedhjet e parakohshme nëse dështon reforma.

“Është një temë që i takon një momenti të mëvonshëm, por sot për sot nuk ka vend për këtë temë”, tha ai.

/ Top Channel

Palët nuk arritën dakortësi lidhur me formulën e emërimeve të anëtarëve të institucioneve të Drejtësisë nga ana e parlamentit. Kryeministri: Pranuam dy të tretat. Basha: Kërkuam formulën e “vendeve të rezervuara” e cila garanton moskapjen

Ka dështuar sonte takimi mes kryeministrit Edi Rama dhe kreut të opozitës Lulzim Basha për Reformën në Drejtësi. Pas tre orësh bisedimesh mes palëve, si zoti Rama ashtu dhe zoti Basha bënë përgjegjës njëri tjetrin për dështimin e bisedimeve të sotme. Ashtu sic ishte paralajmëruar, ngërci ka qenë i lidhur me formulën e votimit të disa prej anëtarëve të institucioneve të Drejtësisë që emërohen nga parlamenti.

“Drafti që kishim në tryezën e diskutimit ishte ai i diskutuar në komisionin e Posacëm, i shoqëruar me një plan disa pikësh që u ofrua nga ekspertët e huaj për të lehtësuar afrimin mes palëve. Ne e kishim pranuar 100 përqind këtë plan ku përfshihej dhe shumica e cilësuar e dy të tretave që është kërkuar pa pushim nga PD pas leximit të parë të raportit të Komisionit të Venecias”, deklaroi kryeministri Rama, duke shtuar se “për habinë e shumëkujt, PD e refuzoi këtë ofertë që e barazon shumicën dhe opozitën në përzgjedhjen me votë të kandidatëve”.

Nga ana e tij kreu demokrat Basha shpjegoi se “ne erdhëm me modelin e Venecias atë të vendeve të rezervuara që garanton moskapjen politike. E kundërta është një kapje. Shumica nuk ka argument dhe vetëm ajo mban përgjegjësinë e abortimit të një kompromisi që con në dështimin e reformës në Drejtësi”, deklaroi zoti Basha, në daljen e tij menjëherë pas kryeministrit.

Shumica la megjithatë një derë të hapur për vazhdim të bisedimeve mes palëve. “Jemi gati të dëgjojmë cdo ide e propozim që nuk e cënon thelbësisht përmbajtjen e draftit dhe që nuk përbën një përpjekje për të mbajtur duart brenda sistemit të Drejtësisë. Të hapur për cdo përmirësim”, deklaroi zoti Rama duke njoftuar se “ne nuk do ta presim më PD. Do të vazhdojmë në rrugën e vetme që kemi. Pas këtij takimi reforma do të niset drejt e për në sallën e parlamentit”, njoftoi zoti Rama, duke saktësuar se “deri ditën e votës në parlament ka plot orë dhe jo pak ditë që demokratët të mos e humbasin këtë tren të historisë dhe krejt fytyrën e tyre”. Por kryetari demokrat paralajmëroi se “çdo akt unilateral i një pakete të parakorduar me opozitën është një dështim i sigurt. Çdo dështim është shtyrje e reformës në drejtësi”, tha zoti Basha sipas të cilit “ky është në të vërtetë qëllimi i shumicës”. (voa)

Shqipëria dhe Greqia do të krijojnë një mekanizëm të përbashkët për të zgjidhur gradualisht çështjet e mbetura pezull mes dy vendeve.

Ministri grek i punëve të jashtme Nikos Kotzias, po zhvillon një vizitë dyditore në Tiranë, ku u prit me tubime proteste nga shqiptarët e krahinës së Çamërisë.

Ata kërkojnë respektimin e të drejtave njerëzore të popullsisë çame, kthimin e pronave të tyre të sekuestruara nga shtetit grek dhe njohjen si genocid ndaj banorëve çamë dëbimin e tyre nga territoret e tyre historike.

Ministrit shqiptar të punëve të jashtme, Ditmir Bushati, iu desh sot t’iu kërkonte protestuesve të lironin portën e ministrisë pak minuta para se të mbërrinte aty për një vizitë dyditore, ministri i jashtëm grek, Nikos Kotzias.

Tubimi u organizua nga Partia për Drejtësi, Integrim dhe Unitet, e cila ka kërkuar diskutimin e çështjes çame.

Protestuesit kërkuan heqjen e ligjit të luftës nga Greqia, i cili pengon kthimin e pronave të popullsisë shqiptare të krahinës së Çamërisë.

Ministri Bushati tha se me çështjen çame Shqipëria kërkon kthimin e një drejtësie të munguar.

“Çështja çame është pjesë e kapitullit që e ka origjinën në Luftën e Dytë Botërore. Jemi vende fqinje dhe është normale të kemi lexime të ndryshme, besojmë se një trajtim realist do të zbuste tonet nacionaliste dhe të vendoste drejtësinë e munguar. Nuk bëhet fjalë për pretendime territoriale. Shqipëria nuk ka asnjë lloj pretendimi territorial”, – tha ministri Bushati.

Të dy vendet po bisedojnë prej disa kohësh për një platformë të përbashkët që të zgjidhë në mënyrë peridike çështjet e hapura.

Ndërsa ministri grek i punëve të jashtme Nikos Kotziasias thotë se ligji i luftës ka mbetur një teknikalitet, dhe natyrisht të dy vendet nuk janë në luftë.

“Një grup çamësh jetojnë në Shqipëri dhe uroj të ketë përfitime nga integrimi i Shqipërisë në BE. Janë disa çamë të vjetër kristianë të myslimanizuar të vitit 1911, të cilët janë grekë. Janë disa çamë, që bashkëpunuan me pushtuesin gjerman, të cilët u dënuan nga gjykatat greke. Ndryshe nga njerëz të tjerë që jepnin llogari në Europë, u larguan nga vendi dhe nuk u ekzekutuan. Kur flasim për këta çamë, nuk nënkuptojmë shqiptarë dhe nuk nënkuptojmë Shqipërinë. Disa duan t’i bëjnë t’i barazojnë shqiptarët dhe ata që kanë bashkëpunuar me nazizmin. Për ne ekziston problemi në mënyrën si e percepton vendi fqinj. Ne kemi një qasje të ndryshme dhe këto janë të njohura nga pikëpamja e historisë”, tha ministri Kotzias.

Qeveria greke ka deklaruar qysh në 1987 se të dy vendet nuk janë në luftë.

Po ashtu në vitin 1996 Shqipëria dhe Greqia kanë miratuar një marrëveshje miqësie, ndërkohë që integrimi në NATO dhe BE i bën të dy vendet miq dhe partnerë. (voa)