Ishte debati i fundit publik televiziv para referendumit: sërish mbështetësit e “largimit” dhe të “qendrimit” në BE kishin mundësi të luftonin me njëri-tjetrin. Shumë të reja dueli nuk solli. Barbara Wesel ndoqi debatin.

Moderatori

BBC e nxjerr para kamerave moderatorin e saj veteran David Dimbledy para së gjithash në rastet e martesave mbretërore, të jubileve të fronit dhe në raste varrimesh shtetërore. Prandaj me sa duket atij iu dha mundësia të drejtonte edhe një diskutim, që mund të përfundojë ndoshta në varrimin e idesë evopiane. Por Dimbledy është kaq i qetë, sa mund të shoqëronte në ekran edhe përmbysjen e botës. Megjithëse në këtë debat të Brexit u fol aq ashpër sa nuk kishte ku të shkonte më. “Shpresoj se i sqaruam disa çështje”, tha Dimledy në fund. Kjo në një kohë kur gënjeshtrat, gjysmë të vërtetat, sloganet dhe propaganda e kulluar vetëm sa kontribuan në shtimin e “mjegullës së luftës”.

Boris është Brexit

Para disa ditësh, në një gazetë britanike u spekulua nëse Boris Johnson i lyen në fakt flokët. Veç ngjyrës bjond në të bardhë të flokëve të tij, që të bie në sy, ai është shitësi më i mirë i mesazhit të Brexit. Borisi mund të flasë me kaq entuziazëm për të ardhmen e madhe të britanikëve jashtë BE, sa të duket sikur ai e beson vërtet atë. Kjo në një kohë kur synimi i tij është vetëm të rrëzojë David Cameronin dhe të bëhet vetë kryeministër.

“Mos ia ulni rëndësinë vendit tonë”, kërkon ai me këmbëngulje nga mbështetësit e qendrimit në BE, kur ata paralajmërojnë për pasojat ekonomike. E ardhmja e Britanisë së Madhe, kur të jetë e vetme dhe e lirë, do të jetë madhështore. Para syrit të mendjes të shfaqen lëndina të gjelbra dhe maja me dritë. Zgjedhësve nuk duhet t’u merret mendja nga fushata e frikës e qeverisë. Ekonomia britanike do të ketë suksese gjigande në Kinë dhe në Indi, kur të shpëtojnë më në fund nga vargonjtë e Evropës. Dhe kjo e enjte mund të kthehet në “ditën e pavarësisë të vendit tonë”. Regjia e emisionit këtu për fat të keq harroi të vinte të dëgjohej himni kombëtar.

Kundërshtarët

Sadiq Khan është kryetari i ri i bashkisë së Londrës dhe një talent politik. “Kur je vetëm 1,65 m i gjatë është e vështirë të flasësh për madhësi”, por madhësia luan një rol në BE si bllok tregtar, tha ai. Ironia me veten ecën gjithmonë mirë tek britanikët. Khan është i shkathët për të kthyer përgjigje, vepron me mesazhe të thjeshta dhe emocionale dhe i bie në kokë problemit: “Kush është këtu ai që përhap frikë? Ata që thonë se Turqia do të hyjë së shpejti në BE!”, gjë që është një gënjeshtër, thotë Khan. Dhe politikani laburist kalon në sulm: “Si mund të pohoni që tregtia pas daljes nga BE do të bëhet më e lehtë se më parë? Brexit është një kërcim në errësirë!”

Krahas kryetarit të bashkisë së Londrës lufton ylli i ri i konservatorëve skocezë. Ruth Davidson është kaq e prerë dhe e vendosur, sa po të ndodheshe në ndonjë rrahje në kafene, me shumë dëshirë do të dëshiroje ta kishe në krah. Me energji u bie kokës ajo me argumentat e saj mbështetësve të Brexit: të gjithë ekonomistët paralajmërojnë që në rast të daljes nga BE në Britaninë e Madhe do të ketë recesion. Por këtë, Boris dhe të tjerët e kundërshtojnë me fjalët: Sloganet nuk janë plane. Në gjysmën e debatit, mbështetësit e Brexit kanë kërkuar 17 herë që Mbretëria “të rimarrë më në fund kontrollin në dorë!” Në këtë rast vetëm mund të thuash: epo kontroll të mbarë. (dw)

Kandidatja e pritshme demokrate për presidente, Hillary Clinton e portretizoi rivalin republikan Donald Trump si të papërshtatshëm për të drejtuar ekonominë, duke thënë se politikat e tij të “papërgjegjshme” do “ta hedhin vendin përsëri në recesion” dhe do të rrisin papunësinë.

Duke folur të martën në shtetin e Ohajos, zonja Clinton sulmoi të kaluarën e kandidatit Trump në fushën e biznesit si një tregues se si ai do ta menaxhojë ekonominë më të madhe të botës.

Ajo përmendi falimentime dhe padi të shumta të ngritura ndaj zotit Trump, duke përfshirë sipërmarrjen e tij në fushën e arsimit, Universitetin Trump.

Clinton, Trump dhe sondazhet

Zonja Clinton shpreson të bindë votuesit se ajo do të jetë një administratore më e mirë e ekonomisë.

Por disa sondazhe të fundit tregojnë se shumica e votuesve të mundshëm favorizojnë zotin Trump në çështjet ekonomike.

Një sondazh i kompanisë Gallup i kryer gjatë këtij muaji tregon se zoti Trump është 10 pikë përpara zonjës Clinton për pyetjen se kush duhet besuar më shumë për ekonominë dhe shtatë pikë përsa i përket punësimit.

Kandidati Trump, republikanët dhe fondet e fushatës

Donald Trump, kandidati i pritshëm presidencial republikan thotë se po përpiqet për të fituar mbështetje nga zyrtarët republikanë, por shpreh pak shqetësim për faktin që është prapa demokrates Hillary Clinton në mbledhjen e fondeve për zgjedhjet e 8 nëntorit.

Manjati miliarder i pasurive të patundshme, dikur personalitet televiziv i bëri komentet pak orë pas njoftimeve të reja se fushata e tij kishte vetëm 1.3 milion dollarë fonde në fillim të qershorit, në krahasim me zonjën Klinton që kishte 42.5 milionë.

“Hillary Clinton do të shpenzojë një miliard dollarët nga paratë e Wall Streetit dhe Lindjes së Mesme”, tha zoti Trump për Fox News. “Ndërsa unë kam vetëm një burim, paratë e mia.”

Zyrtarët e lartë republikanë, përfshirë ligjvënësit kryesorë në Kongres, po tregohen të ngadalshëm për të mbështetur kandidaturën e zotit Trump, duke thënë se kanë në plan të votojnë për të, ndërsa kritikojnë thirrjet e tij për një ndalim të përkohshëm që muslimanët të hyjnë në Shtetet e Bashkuara.

Disa republikanë, duke përfshirë kandidatin presidencial të vitit 2012, Mitt Romney, kanë thënë se nuk e përkrahin zotin Trump, duke i cilësuar komentet e tij si fyerje ndaj muslimanëve, meksikanëve, grave dhe të paaftëve.

Trump, po rigjallëron fushatën?

Me mbledhjen e fondeve që pakësohen dhe sondazhet në shkallë kombëtare që tregojnë se zonja Clinton gëzon popullaritet 5.8-përqind më të lartë, kandidati Trump shkarkoi të hënën menaxherin e fushatës, Corey Lewandowski.

Zgjedhjet e fundit presidenciale në vitin 2012 treguan se paratë janë faktor i rëndësishëm në fushatat moderne. Komisioni i fushatës së presidentit Barack Obama shpenzoi 775 milionë dollarë për rizgjedhje më 2012, ndërsa Mitt Romney 460 milionë. (voa)

Dy ditë para se referendumi të vëndosë mbi të ardhmen e Britanisë, nuk është e qartë nëse shumica e votuesve do të mbështesin qendrimin në Bashkimin Evropian apo largimin nga blloku. Vrasja javën e kaluar e një ligjvënësje britanike që mbështeste qendrimin në bllokun 28 vendësh, duket se ka nxitur disa votues të ndryshojnë qendrimin.

Ligjvënësit britanikë u kthyen nga pushimet të hënën për të nderuar ligjvënësen e Partisë Laburiste Jo Cox, vrasja e së cilës duket se kishte motive politike. Kryeministri David Cameron citoi fjalë të zonjës Cox gjatë apelit për unitet.

“Për të kujtuar Jo, të përsërisim të vërtetën që tha ajo në Parlament dhe e di që do të citohet disa herë sot: ‘Ne jemi më të bashkuar dhe kemi më shumë gjëra të përbashkëta se sa gjëra që na ndajnë’.”

Britania duket të jetë e ndarë në mes lidhur me anëtarësinë në BE sikurse edhe politikanët. Kryeministri ka argumentuar me pasion kundër largimit, por disa nga miqtë e tij kornservatorë thonë se vendi ka humbur shumë sovranitet tek Brukseli. Boris Johnson është ligjvënës koservator në parlamentin britanik.

“Kjo nuk egziston askund tjetër në botë në këtë lloj eksperimenti për ngjitjen e shteteve sëbashku për të krijuar një supershtet, Shtetet e Bashkuaa të Evropës. Është jodemokratike.”

Shumë britanikë hedhin poshtë rregullat e BE për imigracionin nën drojen se do të bëhen barrë e sistemit. Por largimi nga blloku do të kishte pasoja më të rënda ekonomike. Mark Mobius është specialist i financave me Tempelton Markets në Hong Kong.

“Ndikimi do të ishte negativ sepse Britania në Evropë nënkupton një bllok tregtar. Është më lehtë për importin dhe eksportin si dhe shtrirjet e tjera. Largimi do të ishte një bilanc negativ.”

Administrata amerikane ka shprehur mbështetje për qëndrimin e Britanisë në BE, por Shtëpia e Bardhë tha të henën se vendimi i takon popullit britanik. Josh Earnest është zëdhënës i Shtëpisë së Bardhë.

“Britanikët do të vendosin për atë që besojnë se është në interesin e tyre më të mirë për vendin, por presidenti e ka bërë të qartë se çfarë është në interesin më të mirë të Shteteve të Bashkuara. Duke patur parasyshë marrëdhëniet speciale mes dy vendeve tona, ne besojmë se kjo ka rëndësi.”

Anketat e fundit tregojnë se prirja për largimin nga blloku ka rënë që nga vrasja e ligjvënëses Cox të enjten. Por shumë votues ende mbeten të pavëndosur. (voa)

Tetë ditë pas vrasjeve masive më të rënda në historinë amerikane, senati amerikan hodhi poshtë një seri propozimesh për të kufizuar të drejtën për të blerë armë zjarri dhe për kontrollin e blerësve. Propozimet mbështeteshin me forcë nga senatorë demokratë.

Dje vonë, republikanët bllokuan dy propozime të hershme që demokratët i kishin përkrahur me forcë pasi personi i armatosur Omar Mateen vrau 49 persona vetëm një javë më parë në Orlando të Floridas.

Votimi vjen disa ditë pasi senatori demokrat i Kënektikatit Chris Murphy foli për 15 orë radhazi javën e kaluar për të kërkuar veprim legjislativ për dhunën nga armët.

“Terroristët sot përdorin armë luftarake në vend të avionëve për të sulmuar amerikanët. Pas 11 shtatorit, ne vendosëm të mos lejonim terroristët të merrnin avionë për të vrarë civilët. E pra, sot ata po përdorin armët luftarake.”

Një projekt-ligj do të bllokonte personat në listat e ndryshme federale për terrorizëm, përfshi ata që nuk lejohet të fluturojnë, që të mos lejohen as të blejnë armë.Projekt-ligji tjetër do të zgjeronte kontrollin mbi blerjet e armëve duke përfshirë shitjet në internet.

Republikanët thanë se nuk mund të votojnë për asnjë propozim që nuk jep rrugëzgjidhje për personat që janë vendosur gabimisht në listat e terroristëve.

Votimi i së hënës vazhdoi modelin e ngërçit legjislativ për propozimet e kontrollit të armëve pas disa vrasjeve massive në Shtetet e Bashkuara, përfshi masakrën e vitit 2012 të 20 fëmijëve të një shkolle fillore dhe gjashtë mësueseve të tyre në Njutaun të Kënektikatit, dhe sulmin vitin e kaluar në San Bernardino të Kalifornisë, ku u vranë 14 persona.

Udhëheqësi i shumicës republikane Mitch McConnell akuzoi demokratët se po e përdorin tragjedinë e Orlandos për axhendën e tyre partiake ose si reklamë zgjedhore. (voa)