Arkivi mujor: Gusht 2016

Maqedonia

Kuriri sërb thumbon Gruevskin

Komento

GruevskiMediat në Sërbi kanë thumbuar ish-kryeministrin Nikolla Gruevski të cilin e akuzojnë se ka shitur emrin e shtetit tek grekët dhe te ndërkombëtarët vetëm për të qenë në pushtet. Këtë lajm agjencia sërbe Kurir e ka lidhur me vizitën e Nikos Kotzias në Maqedoni gjatë javës së kaluar.

”Edhe pse shitet si nacionalist dhe patriot, ai gjatë javës së kaluar është takuar me ministrin e punëve të jashtme të Greqisë ku kanë biseduar në mënyrë intensive për emrin e Maqedonisë.” shkruan portali Kurir nga Sërbia.

”Ministri i Punëve të Jashtme të Greqisë Nikos Kotzias javën e kaluar ka qenë në Shkup ku është takuar me Nikolla Gruevski. Në mes tjerash ata kanë biseduar edhe për ndryshimin e emrit të Maqedonisë. Gruevski mundohet që të përdor emrin e shtetit si kartë të fundit për të ikur nga përgjegjësia.” thotë burimi i mirëinformuar i Kurir.rs.

Ndërkohë Kurir e ka publikuar edhe bombën e opozitës ku Gruevski ka biseduar për emrin me zyrtarë tjerë të partisë së tij. (ina)
Shqipëria

Rama: Vettingu do të kalojë, me ose pa PD

Komento

edi ramaKryeministri Edi Rama shfrytëzoi shërbimin e transmetimit të drejtpërdrejtë të rrjeteve sociale për t’iu përgjigjur pyetjeve të marra prej qytetarëve.

Interesimi më i madh ka qenë për reformën në drejtësi. Rama shprehu bindjen se reforma do të kalojë me apo pa Partinë Demokratike.

“Shpresoj që Partia Demokratike do të reflektojë dhe do të përpiqet që ta fshehë se nuk e do reformën. Me ose pa PD, reforma nuk ndalet”, tha Rama.

Kryeministri u shpreh se vettingu dhe gjashtë ligjet e tjera që kompletojnë reformën në drejtësi do të kalojnë me votat e maxhorancës nëse nuk kanë miratimin e Partisë Demokratike.

Reforma do të kërkojë vite, por Kryeministri tha se efekti i parë i saj do të jetë lehtësimi i barrës së madhe të padrejtësisë për njerëzit.

Kryeministri u ndal edhe tek korrupsioni.

“Shqipëria ëshë larg së qëni e shëruar nga korrupsioni dhe kjo është një betejë që vazhdon. Por lufta më e mirë kundër kësaj është lufta për të modernizuar shtetin dhe nëse i referohemi këtij parimi ka shumë përparime për të cilat të gjithë së bashku duhet të ndjehemi mirë, edhe pse nuk janë të mjaftueshme”, u shpreh ai.

Duke folur për Policinë e Shtetit, Rama tha se ajo është shëmbëlltyra e suksesit të reformave, megjithëse shtoi se ka ende shumë punë për të bërë.

/ Top Channel

Kosova

Vetëvendosje hedh poshtë mundësinë që aktivistët e saj sulmuan Kuvendin

Komento

Visar Ymeri LVVLëvizja Vetëvendosje ka hedhur poshtë mundësinë e ndërlidhjes së arrestimit të gjashtë aktivistëve të saj me sulmin me bombë ndaj ndërtesës së Kuvendit të Kosovës.

Në një konferencë të jashtëzakonshme për media, kryetari i Vetëvendosjes Visar Ymeri dhe Sekretari Organizativ, Dardan Molliqaj kanë akuzuar kreun e Policisë së Kosovës, Shpend Maxhuni se është vënë në shërbim të politikës ditore të pushtetit.

Policia e Kosovës ka arrestuar të martën gjashtë persona, të cilët më pas u konfirmuan se janë aktivistë të Lëvizjes Vetëvendosje.Sipas njoftimit të policisë, Prokuroria Speciale në bashkëpunim me Policinë pas një hetimi intensiv lidhur me sulmin në Kuvendin e Kosovës të kryer më 4 gusht 2016, ka arritur të identifikojë të dyshuarit, të cilët, thuhet se kishin planifikuar, organizuar dhe ekzekutuar sulmin, si dhe kanë marrë përgjegjësinë për kryerjen e këtij sulmi.

“Gjatë zbatimit të urdhër-kontrollit, në cilësinë e provave materiale, janë sekuestruar: gjashtë armë zjarri, tre pushkë automatike, 2 revole, një karabinë, municion, si dhe dëshmi tjera materiale që ndërlidhen me rastin. Sendet e sekuestruara do të ekzaminohen nga ekspertët e fushave përkatëse”, thuhet në njoftimin e policisë.

Por, drejtuesit e Vetëvendosjes kanë vlerësuar se këto arrestime janë “akt klasik i përndjekjes ndaj kundërshtarëve politikë”.

“Këto metoda, nuk është që po i shohim sot për herë të parë. Është ky regjim policor ai që kishte hyrë në zyrat e Vetëvendosjes vetëm e vetëm për të shpërndarë frikë. Ne atëherë nuk kemi heshtur, sot nuk do të heshtim dhe nuk do të heshtim as nesër”, ka thënë kryetari i Vetëvendosjes, VisarYmeri.

Përderisa Dardan Molliqaj ka thënë se kjo që po ndodhë në Kosovë “është shënjues i një shteti totalitar”.

Molliqaj ka thënë se të arrestuarit nuk kanë pranuar së armët që ka ekspozuar policia janë në pronësi të tyre.

Sipas tij, të arrestuarit janë keqtrajtuar nga policia gjatë mbajtjes në paraburgim dhe ka ftuar organizatat ndërkombëtare që monitorojnë të drejtat e njeriut t’i vizitojnë ata në burgje për të konstatuar gjendjen e tyre shëndetësore. (REL)

Kosova

Arrestime për sulmin në parlamentin e Kosovës

Komento

sulmi parlamentitNë Kosovë autoritetet thanë se janë arrestuar gjashtë persona nën dyshimin për sulmin mbi ndërtesën e parlamentit të Kosovës në fillim të muajit gusht.

Në një njoftim të shkurtër thuhet se prokuroria e posaçme dhe njësitë e Policisë së Kosovës, kanë arritur që të “identifikojnë të dyshuarit që kanë planifikuar, organizuar dhe ekzekutuar sulmin, si dhe kanë marrë përgjegjësinë për kryerjen e tij”.

Në kumtesë thuhet se “hetimi i ndërlikuar është trajtuar me teknika dhe masa të specializuara të hetimit dhe me urdhëresë të Gjykatës Themelore në Prishtinë është kryer kontrolli i 6 lokacioneve në Prishtinë”.

Sipas prokurorisë gjatë kontrolleve janë “janë konfiskuar gjashtë armë zjarri: tri pushkë automatike, 2 revole, një karabinë, municione, si dhe dëshmi tjera materiale që ndërlidhen me rastin”.

Lëvizja Vetëvendosje tha të arrestuarit janë veprimtarë të saj. Kryetari i kësaj lëvizjeje Visar Ymeri tha se “arrestimi i sotëm i gjashtë aktivistëve të Lëvizjes është akt klasik i përndjekjes ndaj kundërshtarëve politikë”.

Ndërtesa e parlamentit të Kosovës është qëlluar më 4 gusht me një mjet shpërthyes që la pas vetes dëme materiale, por pa pasoja në njerëz.

Sulmi mbi ndërtesën e parlamentit u pasua nga një bombë e pashpërthyer në oborrin e shtëpisë së kryetarit të komisionit shtetëror për shënimin e kufirit, Murat Meha, një sulm në oborrin e pasmë të Radiotelevizionit të Kosovës dhe më pas me një tjetër në pjesën e pasme të shtëpisë së drejtorit të përgjithshëm të këtij mediumi, Mentor Shala. Sulmet kaluan pa pasoja në njerëz.

Kosova po përballet tash e gati një vit me krizën më të thellë që nga shpallja e pavarësisë së saj në vitin 2008, për shkak të mospajtimeve rreth një marrëveshjeje të arritur me Serbinë për krijimin e asociacionit të komunave me shumicë serbe dhe asaj për shënimin e kufirit me Malin e Zi.

Më 1 shtator parlamenti i Kosovës pritet të debatojë ratifikimin e Marrëveshjes për kufirin me Malin e Zi.

Opozita dhe ekspertët e pavarur thonë se marrëveshja e dëmton Kosovën për mbi 8 mijë hektarë tokë dhe hedhin poshtë pohimet e Komisionit Shtetërorë për kufirin se shënimi i tij është në pajtim me dokumentet në fuqi, përfshirë edhe planin në bazë të të cilit është shpallur pavarësia e Kosovës. (voa)

Kosova

Serbia të jap përgjigjen për 1650 persona të zhdukur

Komento

te zhdukuritPër Nehbi Morinën nga fshati Samadrexhë, Komuna e Suharekës, plagët e luftës së fundit në Kosovë mbesin ende të hapura, teksa kërkon me ngulm që të zbulojë se ku gjenden eshtrat e vajzës së tij 26 vjeçare, të vrarë në periudhën e luftës.

Në Ditën Ndërkombëtare për personat e zhdukur, Nebi Morina, nuk ka shuar shpresat se megjithatë një ditë do të zbardhet edhe fati i vajzës së tij, së bashku me qindra qytetarë të Kosovës, të pagjetur që prej përfundimit të luftës.

“Vajza ime ishte masakruar nga policia serbe dhe ishte marrë nga shtëpia nga forcat serbe me 26 mars të vitit 1999. Tash e 17 vite Mevludja, vajza ime mungon. Ne nuk kemi arritur të gjejmë eshtrat e saj. Në ankth jemi gjithmonë – ditën e natën. Kah të shkojmë. Por, jetojmë me shpresë se një ditë do t’i gjejmë eshtrat e saj”, thotë Morina.

Morina beson në institucionet e Kosovës se do të arrijnë të bëjnë më shumë në gjetjen e personave të zhdukur, në mesin e të cilave është edhe vajza e tij.

Familjarë të personave të pagjetur kanë kërkuar në vazhdimësi angazhimin e të gjithë faktorëve vendor e ndërkombëtarë për zgjidhjen e kësaj çështjeje.

Ata thonë se asnjëherë nuk do të ndalen deri se të gjendet edhe personi i fundit i pagjetur nga lufta e fundit në Kosovë.

Që prej përfundimit të luftës në Kosovë janë edhe 1,650 persona të pagjetur, fati i të cilëve ende nuk është ndriçuar.

Bajram Qerkini, kryetar i Këshillit Koordinues të Asociacioneve të Familjarëve të të Zhdukurve të Kosovës, thotë se “kjo plagë e cila është e hapur tek familjarët për 17 vite duhet të mbyllet”.

“Të gjithë ne besojmë dhe shpresojnë se kjo çështje me të vërtetë do të merret seriozisht, e posaçërisht pas konkluzave të një tryeze të djeshme ku janë dhënë disa rekomandime të cilat do t’ua përcjellim të gjithëve”, thekson Qerkini.

Në ditën Ndërkombëtare të Personave të zhdukur, presidenti i Kosovës Hashim Thaçi, ka bërë nderime dhe homazhe te përmendorja kushtuar personave të zhdukur në luftën e fundit në Kosovë.

Ai tha se institucionet e Kosovës po punojnë që të zbardhet fati i të pagjeturve.

“Si president i vendit, shpreh sërish solidaritet të plotë me familjet e të pagjeturve, por njëherësh edhe zotimin dhe përgjegjësinë për të punuar edhe më tepër që sa më shpejtë të zbardhet fati i çdo të personi të zhdukur”, ka thënë presidenti Thaçi.

Presidenti Thaçi ka shtuar se kjo çështje mund të zgjidhet me një vullnet dhe një mbështetje të fuqishme edhe të bashkësisë ndërkombëtare.

Familjarë të personave të pagjetur kanë kërkuar që të shtohet presioni mbi Serbinë me qëllim të zbardhjes së fatit të personave të pagjetur.

Informacioni i besueshëm mbetet sfida më e madhe për ndriçimin e fatit të të pagjeturve gjatë luftës së fundit në Kosovë.

Adresa për të kërkuar për personat e zhdukur si pasojë e luftës, për kryetarin e komisionit qeveritar për persona të pagjetur,Prenk Gjetaj, mbetet Serbia.

“Cila është adresa për të kërkuar personat e zhdukur si pasojë e luftës dhe adresa është e njohur është Serbia, institucionet serbe, sepse ushtria serbe, policia serbe kanë bërë krime dhe kanë fshehur gjurmët e krimit dhe mendojmë se ende ka varreza masive të cilat nuk i dimë, prandaj kërkohet një presion më i madh në palën serbe”, thotë Gjetaj.

Çështja e personave të zhdukur, shton Gjetaj mban peng shumë procese tjera, përhapa të mëtutjeshëm në ballafaqim të së kaluarës dhe normalizimit të marrëdhënieve në kuptim të ripajtimit.

“Derisa ende kemi këtë numër të personave të pagjetur nuk mund të bëhet hapa të mëtutjeshëm për normalizimin e marrëdhënieve dhe në këtë drejtim apelojmë që faktori ndërkombëtarë të jetë më këmbëngulës dhe kushtëzues për Serbinë”, thotë Gjetaj.

Autoritetet në Kosovë kanë paralajmëruar se gërmimet në një nga varrezat e supozuara masive në Serbi pritet të fillojnë së shpejti.(REL)

 

Bota

FBI: Hakerët mund të kenë hyrë në regjistrat zgjedhorë

Komento

DNHByroja Federale e Hetimeve, FBI, ka gjetur prova se kohët e fundit ka patur ndërhyrje nga njerëz, që besohet se janë hakerë të huaj, në regjistrat e votuesve në dy shtete.

Kjo ka bërë që FBI-ja t’u kërkojë zyrtarëve lokalë të zgjedhjeve të përmirësojnë sistemet kompjuterike të sigurisë.

Një javë më parë, seksioni i FBI-së që merret me kibernetikën lëshoi një udhëzues sekret, por pa sqaruar se cilat shtete ishin vënë në shënjestër. Agjencia “Yahoo News”, e cila njoftoi e para për çështjen të hënën, citon burime që thonë se sistemet e regjistrimit të votuesve në shtetet e Arizonës dhe Illinoit ishin penetruar nga hakerët.

Ndërhyrja më serioze u njoftua të ketë ndodhur në Illinoi ku një zyrtar i bordit të zgjedhjeve për atë shtetet tha se sistemi i regjistrimit të votuesve ishte mbyllur për 10 ditë muajin e shkuar pasi hakerët kishin vjedhur të dhënat personale të rreth 200 mijë votuesve.

Sulmi në Arizonë përfshinte edhe futjen e programeve kompjuterike me qëllime dashakeqe në regjistrin e votuesve. Një zyrtar në Arizona tha se të dhënat e votuesve nuk ishin hequr.

Për zyrtarët amerikanë të zbulimit, shqetësimet po shtohen gjithnjë e më shumë, se hakerët e huaj, të mbështetur kryesisht nga Rusia, mund të përpiqen të pengojnë zgjedhjet presidenciale amerikane në muajin nëntor.

Zyrtarët kanë thënë kohët e fundit se sulmet kibernetike ndaj Komitetit Kombëtar Demokrat dhe gjetkë në institucionet e kësaj partie, ishin kryer ndoshta nga njerëz brenda qeverisë ruse. Rusia ka hedhur poshtë se ka patur gisht në sulmet kibernetike. (voa)

Bota, Shkenca

Panairi i paisjeve elektronike në Berlin

Komento

panairi pajisje elektronikeNdërsa afrohet hapja e panairit evropian në Berlin për paisjet elektronike të konsumit, pritet që telefonat inteligjentë të vazhdojnë të zënë vendin kryesor. Ekspertët thonë se nuk pritet ndonjë hap gjigand teknologjik dhe se telefonat inteligjentë mund të kenë arritur kulmin e novacioneve.

Panairi i përvitshëm teknologjik në Berlin është më i madhi në Evropë. Ndërsa hap dyert me 2 shtator, pritet që mbi 240 mijë njerëz të vizitojnë panairin dhe prodhimet e reja të mbi 1,600 kompanive pjesmarrëse.

Kompania kineze Huawei pritet të sjellë në panair variantin e fundit të telefonit inteligjent. Konkurenca do të jetë e fortë pasi edhe dy kompani të tjera kineze Lenovo dhe ZTE do të ekspozojnë paisjet e tyre inteligjente.

Sipas ekspertëve, kompanitë do të ofrojnë ekrane, procesorë dhe kamera më të mira, por jo novacione dramatike që mund të ndikojnë tek tregu i telefonave inteligjentë. Amir Tammanai është redaktor i faqes elektronike GIGA Android.

“Mendoj se kemi arritur kulmin e novacioneve sepse nuk ka asgjë të re që mund ofrohet. …. Realiteti Virtual mund të kërkojë telefona më të fuqishëm, gjë që mund të realizohet, ekranet mund të bëhen më të mëdhenj dhe të përmirësohet rezolucioni, por arrin një pikë, që sado i lartë të jetë rezolucioni ai nuk të jep më ndonjë avantazh”.

Vitet e fundit është rritur kërkesa për telefonat inteligjentë me çmime mesatare. Kompanitë kineze si Huawei, Xiaomi dhe ZTE janë bërë kërcënim për kompanitë të vjetra si Samsung me paisje më pak të kushtueshme. Tregu global i telefonave inteligjentë po ngadalësohet dhe sipas kompanisë IDC, shitjet do të rriten me 3.1 për qind gjatë këtij viti ose 7 për qind më pak se një vit më parë.

iPhoni i parë doli në treg në vitin 2007 ndërsa një vit më pas Samsung do të sillte në treg rivalin e saj. Në vitet që pasuan pati hapa galopantë teknologjikë tek industria e telefonave inteligjentë. Shu On Kwok, redaktori i faqes teknologjike Android Pit, thotë se ngadalësimi i novacioneve teknologjike është një hap natyral që ka ndodhur edhe tek teknologji të tjera ndërsa tregjet stabilizohen.

“Ndoshta jemi llastuar në të kaluarën me evolucionin teknologjik të telefonave inteligjentë. Kështu ka ndodhur edhe me kompjuterat përsonal në të shkuarën. Ndërsa është zvogëluar madhësia, janë shtuar kapacitetet dhe aftësitë. Edhe telefonat inteligjentë, vinë me aftësi të reja por jo aq domethënës.”

Përparimet teknologjike që nga telefonat inteligjentë, makinat, llambat apo frigoriferët inteligjentë, kanë nxjerrë në pah rëndësinë e internetit si nyja kryesore lidhëse në jetën dhe punën e përditshme dhe përdorimi i telefonit inteligjent si qendra nga ku jepen të gjitha komandat.

“Telefoni inteligjent është truri për gjërat e tjera. Mund të kontrollosh dronët, mund të shikosh lojëra apo filma virtualë. Të gjitha teknologjitë që sillen rreth telefonave inteligjentë po bëhen edhe më të rëndësishme. E ardhmja është kur gjithçka të jetë e ndërlidhur”, thotë Shu On Kwok, redaktori i faqes teknologjike Android Pit.

Samsung vazhdon të jetë gjigandi i tregut të telefonave inteligjentë me 22.4 për qind i ndjekur nga Apple me 11.8 për qind dhe Huawei me 9.4 për qind në tremujorin e dytë të vitit sipas kompanisë IDC. (voa)

Bota, Shkenca

Zbulohet një planet i ngjashëm me Tokën

Komento

planeti i riObservatori Evropian Jugor njofton se ka zbuluar një planet të ngjashëm me Tokën. Shkencëtarët e kanë pagëzuar atë Proxima Centauri B.

Me sa duket, ne nuk jemi të vetëm në univers. Observatori Evropian Jugor në Garching pranë Mynihut, njoftoi se ka zbuluar një planet të ngjashëm me Tokën, i cili përshkon orbitën më të afërt yjore të diellit tonë. Shkencëtarët e kanë pagëzuar këtë planet të ngjashëm me Tokën Proxima Centauri B dhe besojnë se në të është e mundur jeta.

Gëzim i madh tek astronomët

Proxima B ka shkaktuar një gëzim të madh tek astronomët. Planeti përshkon një yll në një zonë, që shkencëtarët e konsiderojnë si të banueshme. Kjo zonë nuk është as tepër e ngrohtë dhe as tepër e ftohtë për ujin e rrjedhshëm – që është një ndër parakushtet më të rëndësishme për lindjen e jetës.

yjet me teleskopPor kjo nuk është veçanta e vetme e Proxima B. “Ne besojmë plotësisht se planeti me një masë prej 1.3 e masës së Tokës është i ngjashëm me Tokën si në formë edhe në përbërje. Ai nuk është një top gazi, por ka sipërfaqe shkëmbore.” – thotë astrofizikanti Ansgar Reiners.

Vetëm katër vite-dritë larg Tokës

Kjo galaktikë gjendet vetëm katër vite-dritë larg galaktikës sonë, gjë që për relatat astronomike do të thotë tepër afër. Zbulimi i planetit Proxima B përbën pikën kulmore të projektit “Pale Red Dot” të Observatorit Evropian Jugor, për të cilin kontribuojnë 16 vende, shumica anëtare të BE-së. Planeti i ri u zbulua nga teleskopët e këtij instituti në La Silla të Kilit.

Afër, me madhësinë e duhur, sipërfaqe shkëmbore dhe me sa duket edhe me ujë të rrjedhshëm. Proxima B mund të bëhet kandidati perfekt për jetën jashtëtokësore. Me sa duket ne banorët e Tokës duhet të përgatitemi tani për marrëdhënie të mira fqinjësore. (dw)

Bota, Shkenca

Anija e hapësirës “Juno” i afrohet Jupiterit

Komento

Anija JunoAnija e Hapësirës “Juno” e NASA-s të shtunën iu afrua në distancën më të afërt Jupiterit, që është planeti më i madh i Sistemit tonë Diellor.

Sipas NASA-s, në orën 8:51 të mëngjesit Juno ishte në pozicionin 4 mijë e 200 kilometra mbi Jupiterin, gjatë udhëtimit të saj me një shpejtësi prej 208 mijë kilometrash në orë.

Kjo distancë nuk ngjan edhe aq e afërt, duke patur parasysh që Jupiteri ka një diametër prej më shumë se 140 mijë kilometrash. Planeti ynë, Toka, ka një diametër prej vetëm 8 mijë kilometrash.

NASA thotë se synimi kryesor i misionit të Juno-s është të studjojë evolucionin dhe origjinën e Jupiterit. Këtë mision anija e hapësirës do ta realizojë gjatë periudhe prej të paktën 20 muajsh. (voa)

Bota

Bankat qendrore të hutuara

Komento

Guvernatorja SHBAGuvernatorja e Bankës Federale të SHBA-së Janet Yellen

Guvernatorja e Bankës Federale të SHBA-së Janet Yellen nuk guxon ende që t’i rrisë normat e interesit.

Kur i jep dikujt para borxh, duhet të marrën përqindje interesi. Përse tjetër duhet të japësh para borxh dhe të rrezikosh që të mos i shohësh më kurrë paratë e tua?

Por bankat qendrore të disa vendeve të botës, e kanë lënë në masë të madhe pas dore këtë koncept – në SHBA, për shembull, për shumë vite nuk kushtonte asgjë që të merrje hua para. Në vende të tilla si Japonia dhe Zvicra madje të japin para në qoftë se merr kredi në bankë. Parimi pra kush kursen dënohet, kush merr kredi shpërblehet. Kjo është vetëm e dyshimtë, por mund të bëhet edhe e rrezikshme. Prej një kohë të gjatë Banka Federale po diskuton për të rritur përsëri normat e interesit. Por guvernatorja e Bankës Federale të SHBA-së Janet Yellen nuk guxon ende që t’i rrisë normat e interesit.

Kreditë e ulëta dhe rritja e konsumit

Që nga kriza financiare norma bazë e interesit është në një nivel historikisht të ulët. Kreditë janë të ulëta, sepse me këtë shpresohej të rritej konsumi. Rritja e konsumit nga ana tjetër duhet të forconte ekonominë.

Sot, tetë vjet pas krizës, normat e interesit janë ende vetëm pak mbi zero për qind. Janet Yellen nuk i ka prekur fare normat e interesit edhe këtë vit, sepse frika se kjo mund të trondisë ekonominë është mjaft e madhe. Megjithatë ekonomia dhe Wall Street-i janë të irrituar shpjegon brokeri Peter Tuchman, që punon prej më shumë se 30 vjetësh në Bursën e Nju Jorkut, për shkak se Yellen kishte deklaruar se këtë vit do të kishte katër rritje të normës së interesit.

Të dhënat, mbi të cilat bazohet vendimi për rritjen e normës së interesit ndryshojnë muaj pas muaji, por sipas Peter Tuchman, Banka Federale duhet të vendosë sipas përvojës se deritanishme, sepse ajo tregon se përqindjet e ulëta të interesit nuk e kanë nxitur kurrë në mënyrë të vazhdueshme dhe të qëndrueshme ekonominë.

Mirë për Wall Street-in

Megjithatë paratë e lira i kanë bërë mjaft mirë Wall Street-it: barometrat kryesorë të tregut të aksioneve kanë arritur nivele rekord. Për shkak se investitorët nuk kanë alternativa, ata i fusin paratë e tyre në aksione. Disa kanë frikë se pas ndonjë ngritjeje të normës çdo gjë mund të përfshihet në kaos.

Meqë Banka Federale e SHBA-s vazhdon të ngurrojë për të ndërmarrë hapa në lidhje me përqindjet e ulëta të interesit, ajo është kthyer vetë në një burim pasigurie për tregjet, sepse në vend që t’i qetësojë ato, shkakton spekulime të mëtejshme. (dw)